སྤོབས་པ་མཐའ་ཡས།
- ལོ་གསར་གྱི་གལ་ཆེའི་རང་བཞིན་གླེང་བ།
- ལོ་གསར་ནི་ང་ཚོའི་གཅིག་གྱུར་མཚོན་རྟགས་ཤིག་ཡིན།
- ལོ་གསར་མི་གཏོང་བ་ནི་རིག་གཞུང་རང་སྲེག་ཡིན།
- ཆོས་སྲིད་བྱེད་སྒོ་རྐྱང་པས་ལོ་གསར་གྱི་ཚབ་བྱེད་མི་རུང་།
- ལོ་གསར་མེད་པ་ནི་རྒྱལ་གཅེས་དཔའ་བོའི་དགོངས་བཞེད་མིན།
- ལོ་གསར་གོ་མ་མྱོང་བའི་བོད་ཀྱི་མི་རབས་གསར་པ།
- ལོ་གསར་ནི་ནོར་བུ་ཞིག་ཡིན།
ལོ་གསར་གྱི་གལ་ཆེའི་རང་བཞིན་གླེང་བ། ཉེ་སྔོན་ཁ་བརྡར་ངས་ལོ་གསར་གཏོང་དགོས་སྐོར་ཞིག་བཤད་པར་གསལ་ཁ་འདོན་ཆེད་དུ་དེ་རིང་འདིར་ཡང་དེའི་སྐོར་ལ་གླེང་མོལ་རེ་བྱ་འདོད་བྱུང་། ལོ་ནས་ལོ་མཐུད་དེ་ལོ་གསར་མི་གཏང་བའི་ལས་འགུལ་འདིས་ང་ཚོར་ཁེ་ཕན་གང་ཡང་ཐོབ་ཀྱིན་མེད། དེ་ཡང་དེའི་སྐོར་ལ་ཁ་གསལ་པོས་གཤམ་གསལ་གནད་དོན་ཁ་ཤས་ལས་བརྩམས་ཏེ་ཅུང་ཙམ་གླེང་། ལོ་གསར་ནི་ལོ་ཧ་ཅང་མང་པོའི་སྔོན་ནས་བརྩི་སྲུང་བྱེད་སྲོལ་ཡོད་པའི་བོད་མིའི་ཐུན་མིན་དུས་ཆེན་ཞིག་ཡིན། བཙན་པོའི་རྒྱལ་རབས་ཀྱི་དུས་སུ་ལོ་གསར་དགའ་སྟོན་བརྩི་སྲོལ་ཡོད་པར་གསལ་ཡོད། ཕྱིས་སུ་ལོ་མགོ་འཛིན་སྟངས་ལ་འགྱུར་བ་བཏང་མྱོང་ཡོད། དེ་ནི་མ་འོངས་པར་ཡང་གནས་སྟངས་དམིགས་བསལ་ལ་བརྟེན་ནས་འགྱུར་བ་གཏང་མི་ཆོག་པ་ཞིག་མིན། འོན་ཀྱང་ལོ་གསར་གཏོང་སྲོལ་འདི་རྒྱུན་ཆད་མི་བྲ་བའི་དུས་སྟོན་ཡིད་དུ་འོངས་བ་ཞིག་ཡིན། བོད་ལ་ཆོས་ཕྱོགས་ཀྱི་དུས་ཆེན་མང་ཡང་དམངས་ཁྲོད་དུས་ཆེན་མང་པོ་བརྩི་སྲོལ་མེད་ཅིང་ལོ་གསར་འདི་གཅིག་པོ་ནི་ཆོས་སྲིད་དང་འབྲེལ་བ་མེད་པའི་དམངས་ཁྲོད་སྲོལ་རྒྱུན་གྱི་དུས་ཆེན་ཞིག་ཡིན། རྒྱས་སྤྲོས་ཆེ་ཞིང་སྤྲོ་སྣང་དོད་པའི་བོད་ཀྱི་ལོ་གསར་ནི་འཛམ་གླིང་ལ་སྙན་གྲགས་ཧ་ཅང་ཆེ་བའི་དམངས་ཁྲོད་དུས་ཆེན་ཞིག་ཡིན། བོད་མི་སུ་ཡིན་ཡང་བོད་ཀྱི་སྐོར་ཞིག་གླེང་དགོས་སྐབས་ལོ་གསར་འདི་སྤོབས་པ་ཆེན་པོས་ཤོད་སྲོལ་ཡོད་ཅིང་། ཕྱིའི་མི་སྣས་བོད་ཀྱི་སྐོར་གླེང་སྐབས་ཀྱང་ལོ་གསར་འདི་བོད་ཀྱི་སྤྱི་ཚོགས་རིག་གནས་ཀྱི་གྲུབ་ཆ་གལ་ཆེན་ཞིག་ཏུ་བརྩིས་ནས་གླེང་སྲོལ་ཡོད། ལོ་གསར་ལ་བརྟེན་ནས་བོད་ཀྱི་སྲོལ་རྒྱུན་རིག་གནས་ཧ་ཅང་མང་པོ་ཞིག་རྒྱུན་འཛིན་ཐུབ་ཀྱིན་ཡོད། དཔེར་ན། བོད་ཀྱི་ཁྱད་ཆོས་ལྡན་པའི་ཟས་སྣ་གཡོས་སྦྱོར། གྱོན་ཆས་གྱོན་སྟངས། གླུ་ལེན་པ། གཞས་གཏང་བ། བྲོ་འཁྲབ་པ། ཤག་འགྱེད་པ། འབེལ་གཏམ་བཤད་པ། དར་མའི་རྩལ་འགྲན་པ། བྱིས་པའི་རྩལ་འགྲན་པ། དངོས་བྱུང་དང་རྟོག་བཏགས་ཀྱི་གནའ་གཏམ་ཤོད་པ། བསང་མཆོད་གཏང་བ། གནའ་བོའི་ལྡེའུ་ཞེས་པའི་ནང་ཕྱོགས་གཏོགས་ཁེད་འཇོག་པ། ཁང་ཁྱིམ་རྒྱན་སྤྲོས་བྱེད་པ། ཡ་རབས་སྤྱོད་པ་ལ་གནས་པའི་དམ་བཅའ་དང་རྟེན་འབྲེལ་སྒྲིག་པ། ལོ་གསར་རྙིང་གི་སྤངས་བླངས་འཆར་འགོད། མགྲོན་པོ་སྣེ་ལེན་བཅས་ཚུད་པའི་བོད་མིའི་ཐུན་མོང་མིན་པའི་སྲོལ་རྒྱུན་རིག་གནས་ཧ་ཅང་མང་པོ་ཞིག་ལོ་གསར་སྐབས་མ་གཏོགས་མཐོང་ཐོས་དཀོན་པ་ཡང་མང་།
ལོ་གསར་ནི་ང་ཚོའི་གཅིག་གྱུར་མཚོན་བྱེད་ཅིག་ཡིན་པས་ཉམས་མི་རུང་། ལོ་གསར་ནི་ཆོས་སྲིད་དང་མ་འབྲེལ་བའི་དམངས་ཁྲོད་དུས་ཆེན་ཞིག་ཡིན་སྟབས་ཆབ་སྲིད་ཀྱི་འཛིན་སྐྱོང་ལངས་ཕྱོགས་མི་འདྲ་བ་དང་། ཆོས་ལུགས་མི་འདྲ་བ། ས་མཚམས་ཆུ་མཚམས་ཀྱིས་ཆོད་པའི་ཡུལ་ལུང་གང་ན་གནས་ཀྱང་བོད་ཀྱི་རིག་གནས་ཁྱབ་ཁོངས་སུ་ཚུད་པའི་མི་སྡེ་ཚང་མས་གཏོང་སྲོལ་རྒྱུན་ཆད་མ་མྱོང་། དུས་ཆེན་འདིས་ནི་འཛམ་གླིང་གི་ཡང་རྩེར་གནས་པའི་མི་རིགས་འདིའི་ཤེས་རིག་དཔལ་ཡོན་གྱི་ཁྱབ་ཚད་དང་ཁྱད་ཆོས་སྟོན་བཞིན་ཡོད་པས་བོད་མི་ཚོས་སྤོབས་པ་ཆེན་པོས་རོལ་བཞིན་ཡོད། ལོ་གསར་འདི་ཆོས་སྲིད་ཀྱི་བྱེད་སྒོ་དང་མ་འབྲེལ་བའི་སྟབས་ཀྱིས་ད་ལྟ་བར་དུ་བོད་ཕྱི་ནང་གང་སར་གནས་པའི་བོད་ཀྱི་ཆབ་འབངས་ཡོད་དོ་ཅོག་གིས་ལོ་གསར་ལ་རོལ་བར་བཀག་རྒྱ་སོགས་མེད་པ་ཙམ་དུ་མ་ཟད་དཔལ་ལྡན་ལྷོ་འབྲུག་གི་ལྗོངས་དང་། གློ་དོལ་ཤར་པ་སོགས་ལྷོ་བལ་གྱི་ཁོངས། མངའ་རིས་སྐོར་གསུམ་གྱི་ནང་ཚན་སྤི་ཏི་སྦལ་ཏི་སོགས་ཧིན་དྷུ་སི་ཐན་དང་པ་ཀི་སི་ཐན་གྱི་ཁོངས་ཚུན་དུ་ཡང་ལོ་གསར་གྱི་དུས་སྟོན་འདི་སྤོབས་པ་ཆེན་པོས་གཏོང་བཞིན་ཡོད། དེ་བཞིན་དུ་ཆོས་ལུགས་ཀྱི་ཆ་ནས་ཀྱང་ཡིད་ཆེས་དད་མོས་གང་ཡིན་ལ་མ་ལྟོས་པར་གངས་ཅན་བོད་ནས་ཆད་པའི་མི་སྡེ་ཚང་མས་དུས་སྟོན་འདི་རྒྱས་སྤྲོས་ཆེན་པོས་རོལ་སྲོལ་ཡོད།
ལོ་གསར་མི་གཏང་བ་ནི་རིག་གཞུང་རང་སྲེག་ཡིན། འདི་ལྟ་བུའི་དམངས་ཁྲོད་དུས་ཆེན་གཏང་སྲོལ་རྦད་དེ་མཚམས་འཇོག་པའམ་དེ་ཆོས་དང་ཆབ་སྲིད་བྱེད་སྒོ་རྐྱང་པ་ལ་སྒྱུར་དགོས་པའི་བསམ་འཆར་འདོན་པ་ནི་མི་རིགས་ཀྱི་མཚོན་རྟགས་སུ་གྱུར་པའི་སྲོལ་རྒྱུན་རིག་གནས་གལ་ཆེན་རང་གིས་སྲེག་པའི་བྱེད་སྟངས་ཐབས་སྡུག་ཅིག་ཡིན། རང་རེ་ལ་ཆབ་སྲིད་རང་དབང་མེད་པའི་དཀའ་རྙོགས་ཡོད་པ་རྒྱུ་མཚན་དུ་བྱས་ནས་གནའ་བོའི་དུས་ནས་བརྒྱུད་དེ་ཡོང་བའི་ལོ་གསར་གཏོང་སྲོལ་མཚམས་འཇོག་པ་དེ་ནི་”རང་གིས་རང་བཞོག་ན་རང་ཕྲ་སྤྱད་དང་། རང་གིས་རང་གཏུབ་ན་རང་ཐུང་སྤྱད་”ཟེར་བའི་དཔེ་རུ་གྱུར་ཡོད། ད་དུང་འདི་ལྟ་བུ་ལ་བོད་ཀྱི་གཏམ་དཔེར། “ཚིག་པ་ཤིག་ལ་ཟོས། སློག་ཧྲུལ་མེ་ལ་སྲེག”་ཟེར་སྲོལ་ཡོད་པ་བཞིན་ཡིན།
ཆོས་སྲིད་བྱེད་སྒོ་རྐྱང་པས་ལོ་གསར་གྱི་ཚབ་བྱེད་མི་རུང་། ལོ་གསར་ནི་མི་རིགས་ཆེན་པོ་ཞིག་གི་གཅིག་གྱུར་མཚོན་རྟགས་དང་། ནང་མི་མཉམ་འཛོམ། མི་མང་གི་བདེ་སྐྱིད། སྤྱི་ཚོགས་ཀྱི་རེ་སྨོན་མཚོན་པའི་དུས་ཆེན་སྤྱིར་བཏང་བ་ཞིག་ལས་ཆབ་སྲིད་ཀྱི་དགོས་མཁོ་དང་། ཆོས་ལུགས་ཀྱི་དད་མོས་བྱེད་སྒོ་ཕྱོགས་རེ་བ་ཞིག་དང་བསྡུར་ཐབས་གཏན་ནས་མེད། དམངས་ཁྲོད་སྲོལ་རྒྱུན་དེ་དག་ནི་ཆོས་སྲིད་བྱེད་སྒོ་དང་མ་འབྲེལ་བར་རྒྱང་ག་ཚོད་བཀྱེད་ཐུབ་པ་དེ་ཙམ་གྱིས་སྲོལ་རྒྱུན་རིག་གནས་དེ་ཉིད་ཡོངས་ཁྱབ་ཅན་དང་ཡུན་དུ་བརྟན་པ་ལ་ཕན་ཐོགས་ཆེན་པོ་ཡོད། དཔེར་ན། སྔོན་མ་ལྷོ་ནུབ་མི་རིགས་སློབ་ཆེན་བོད་རིག་པའི་སྡེ་ཚན་དུ་བོད་ཀྱི་ལོ་གསར་གཏང་སྲོལ་ཡོད་པས་ཉིན་དེའི་ཕྱི་དྲོ་ནི་མི་རིགས་ལྔ་བཅུ་ང་དྲུག་གི་སློབ་མ་ཚང་མའི་སྤྲོ་སྣང་ཆེ་ཤོས་ཀྱི་དུས་ཚོད་ཅིག་ཡིན་པས་ཚང་མ་ཆང་གིས་བཟི་ཡོད་སྐད། ལོ་གསར་ལ་ཆོས་སྲིད་ཀྱི་བྱེད་སྒོ་གཞན་དང་མི་འདྲ་བའི་ཁྱད་ཆོས་ཡོད། དེ་ཡང་བོད་ཀྱི་ཆོས་སྒྲུབ་ཏུ་ཤོག་ཅེས་བོས་ན་ཡོང་མཁན་མང་པོ་མི་རྙེད། བོད་ཀྱི་ཆབ་སྲིད་ལས་འགུལ་ལ་ཞུགས་སུ་ཤོག་ཅེས་བོས་ན་དེ་ལས་ཉུང་ཞིག་ལས་ཞུགས་མཁན་མེད། བོད་ཀྱི་ལོ་གསར་ལ་ང་ཚོས་སྣེ་ལེན་བྱེད་ནུས་ན་ཕལ་ཆེར་འཛམ་གླིང་གི་མི་གྲངས་དུང་ཕྱུར་བདུན་ཅུ་བོ་ཡང་དགའ་བཞིན་སྤྲོ་བཞིན་དུ་བསྡུ་ནུས་པར་ཐག་ཆོད། དྲི་མ་མེད་པའི་སྲོལ་རྒྱུན་རིག་གནས་དེ་ཆོས་དང་ཆབ་སྲིད་ཀྱི་བྱེད་སྒོར་སྒྱུར་བ་དེ་ནི་མིག་རྒྱང་རིང་པོའི་འཐབ་ཇུས་ཤིག་མིན། རང་རེའི་སྤྱི་ཚོགས་ཀྱི་སྣེ་ཁྲིད་མཁན་དུ་སྒྲོག་བཞིན་པའི་ཚོགས་པ་སྒྲིག་འཛུགས་ཀྱི་ལས་སྣེ་ཁ་ཤས་རེས་མང་ཚོགས་ལ་ལོ་གསར་གཏང་རྒྱུ་ཡིན་མིན་དང་གཏོང་སྟངས་སོགས་ཀྱི་ལམ་སྟོན་བྱེད་སྐད་པ་དེ་ནི་འོས་བབ་གཏན་ནས་མེད་པ་ཞིག་ཡིན། དེ་ལས་ལྡོག་སྟེ་རང་རེའི་ཚོགས་པ་སྒྲིག་འཛུགས་ཚོས་བོད་མི་དང་བོད་ཀྱི་གྲོགས་པོ་ཚོ་སྤྲོ་སྐྱིད་འདུ་འཛོམས་ཆེད་དུ་ཆོས་སྲིད་ཀྱི་བྱེད་སྒོ་རྐྱང་པ་དང་མ་འབྲེལ་བའི་བོད་རང་གི་སྔར་ཡོད་སྲོལ་རྒྱུན་བསྐྱངས་ཏེ་ལོ་གསར་གཏོང་བའི་མ་དངུལ་ཟུར་བཅད་སོགས་ཐབས་ལམ་སྤྱད་དེ་མཐུན་རྐྱེན་གང་ནུས་སྦྱར་དགོས་པར་སེམས།
ལོ་གསར་མི་གཏོང་བ་ནི་རྒྱལ་གཅེས་དཔའ་བོ་ཚོའི་རེ་འདུན་མིན། ཉེ་བའི་ལོ་ཤས་རིང་བོད་ཀྱི་རང་དབང་ལས་འགུལ་ལ་ལུས་སྲོག་བཏང་བའི་དཔའ་བོ་མང་པོ་ཞིག་བྱུང་བས་ལོ་གསར་མི་གཏོང་ཟེར་བ་དེ་ནི་དགྲ་དགའ་གཉེན་སྡུག་གི་བྱེད་སྟངས་ཤིག་ཡིན། སྤྱིར་དཔའ་བོའི་གདུང་རྒྱུད་མ་ཆད་པའི་གདོང་དམར་བོད་ཀྱི་ལུགས་སྲོལ་ལ་དཔའ་བོ་གཡུལ་དུ་ཤི་བར་མྱ་ངན་བྱེད་སྲོལ་མེད། གལ་སྲིད་ངའི་ནང་མི་སྤུན་ཉེ་ཞིག་གིས་བོད་སྤྱིའི་རང་དབང་ལས་དོན་ལ་ལུས་སྲོག་ཕུལ་ཐུབ་ཡོད་པ་ཡིན་ན་ངའི་ཁྱིམ་ཚང་གིས་ལོ་གསར་རྒྱས་སྤྲོས་བརྗིད་ཉམས་ལྡན་པ་ཞིག་ལ་རོལ་ངེས་ཡིན། དཔའ་བོ་དཔའ་མོ་ཚོའི་ཐ་ཚིག་ཞལ་ཆེམས་མང་པོ་ཞིག་ཤུལ་དུ་བཞག་པ་དེ་དག་ལས་ཀྱང་བོད་མིའི་མཐུན་སྒྲིལ་གཅིག་གྱུར་དང་། སྲོལ་རྒྱུན་རིག་གནས་རྒྱུན་འཛིན་དར་སྤེལ། མི་རིགས་ཀྱི་ལ་རྒྱ་འཛིན་དགོས་ཚུལ་སོགས་དངོས་སུ་གསལ་ཡོད། ལོ་གསར་ནི་དེ་ལྟ་བུའི་རེ་འདུན་གྱི་མཚོན་རྟགས་གྲུབ་ཆ་གལ་ཆེན་ཡིན་ཚུལ་གོང་དུ་བཤད་པ་ལྟར་ལེགས་པས་ལོ་གསར་མི་གཏང་བ་ནི་དཔའ་བོ་དཔའ་མོ་ཚོའི་དགོངས་བཞེད་དང་རྒྱབ་འགལ་ཡིན་པར་སེམས།
བོད་ཀྱི་ལོ་གསར་གོ་མ་མྱོང་བའི་བོད་ཀྱི་མི་རབས་གསར་པའི་སྐོར་ཞིག་འཚར་གྱིན་ཡོད། ངའི་གྲོགས་པོ་སྐལ་བཟང་ནི་བོད་ཀྱི་ཆབ་སྲིད་རང་དབང་རྩོད་ལེན་ལ་ཆོད་སེམས་ཆེན་པོ་ཡོད་མཁན་ཞིག་དང་། སྲོལ་རྒྱུན་རིག་གནས་ལ་དད་དུང་བླ་མེད་ཡོད་མཁན་ཞིག་ཡིན། ཁོང་ལ་ལོ་བདུན་དུ་སོན་པའི་བུ་ཞིག་ཡོད། བུ་ཆུང་དེ་ཡང་རིག་པ་གྲུང་ཞིང་གཏམ་བཤད་ལ་མཁས་པ་སོགས་སྙིང་དུ་འབབ་པ་ཞིག་འདུག བུ་ཆུང་དེས་ཕ་ཡུལ་བོད་མཐོང་མ་མྱོང་མོད་བོད་ཀྱི་སྐོར་གླེང་བ་དང་ཉན་པར་དགའ་སྤོབས་ཆེན་པོ་འདུག ཁོས་ང་ལ་བོད་ཀྱི་སྐོར་ཁོ་རང་གིས་གང་ཤེས་པ་ཁ་ཤས་བཤད་བྱུང་། དེར་ངས་ཁོ་ལ་”བོད་ཀྱི་དུས་ཆེན་གང་དང་གང་ཤེས”་ཞེས་དྲིས། དེར་ཁོས། གསུམ་ཅུའི་དུས་དྲན་དང་ས་ག་ཟླ་བ་གཉིས་བགྲངས་བྱུང་། དེར་ངས། ཁྱོད་ཚོས་གསུམ་ཅུ་དུས་དྲན་ལ་གང་བྱེད་ཅེས་དྲིས་སྐབས་ཁོས་”རྒྱ་དམར་གྱི་དར་ཆ་མེ་ལ་སྲེག་ཅིང་ངའི་ཨ་ཕ་ཉིན་དེར་ངུས་ནས་འདུག་གི་རེད་”ཟེར། ས་ག་ཟླ་བ་ལ་གང་ཞིག་བྱེད་དྲིས་སྐབས། ཁོས་”ཉིན་དེར་མཆོད་མེ་སྦར་དགོས་པ་རེད་”ཟེར། དེ་ན་ལོ་གསར་སྐབས་གང་བྱེད་དྲིས་སྐབས་ཁོས་ལོ་གསར་ཟེར་བ་དེ་གཏན་ནས་ཤེས་ཀྱིན་མི་འདུག དེར་ངས་གྲོགས་པོ་སྐལ་བཟང་ལ་དེ་ལུགས་བཤད་སྐབས། སྐལ་བཟང་གིས། “རེད་རེད། ལས་ངན་འདི་ཚོར་ལོ་གསར་གྱི་བསོད་ནམས་ཞིག་མེད་པ་རེད། བུ་འདི་ལོ་ན་གཉིས་ལ་སོན་པའི་ལོ་ནས་ང་ཚོས་ལོ་གསར་གཏན་ནས་བཏང་མེད་”ཟེར། སྐབས་དེར་ངའི་སེམས་ལ་འཇིགས་སྣང་ཞིག་སླེབས་བྱུང་། ལོ་གསར་གྱི་བསོད་ནམས་མེད་པར་བྱེད་མཁན་དེ་ང་རང་ཚོ་རེད། ང་ཚོས་ཚིག་པ་ཤིག་ལ་ཟོས། སློག་ཧྲུལ་མེ་ལ་བསྲེགས་པའི་དཔེ་ལྟར་བྱས་པ་ལས་གཞན་གང་ཡང་མིན།
ལོ་གསར་ནི་ནོར་བུ་ཞིག་ཡིན། ལོ་གསར་ལ་རང་རེ་བོད་མི་རྒན་གཞོན་རིས་མེད་ཀྱིས་དགའ་མོས་བྱེད་པ་དང་། སྲོལ་རྒྱུན་ཆོས་སྲིད་ཀྱི་རིག་གནས་གླེང་སར་རྣ་བ་འོན་ནས་བསྡད་ཡོད་པའི་ན་གཞོན་ཀླད་གསར་ཚོས་ཀྱང་ལོ་གསར་འདུ་འཛོམ་ཞེས་པ་དེ་ཐོས་སྐབས་པདྨའི་མཚོ་ལ་ངང་པ་འདུ་བ་བཞིན་དུ་རང་རེའི་ཕོ་གསར་མོ་གསར་སྟག་འདྲ་གཟིག་འདྲ་བ་ཚོའི་གདོང་པ་འཛུམ་གྱིས་གང་ནས་འདུ་ཡོང་བ་དེས་ཀྱང་ལོ་གསར་གྱི་འགུགས་ཤུགས་མཐོང་ནུས། དེ་བཞིན་དུ་བོད་ཀྱི་གྲོགས་པོ་རུ་བརྩི་བའི་ཤར་ནུབ་ཀྱི་མི་སྣ་སུ་ཡིན་ཡང་བོད་ཀྱི་ལོ་གསར་ཞེས་བྱ་ཁུ་ཡུག་གིས་གནམ་ཆུ་སྒུག་པ་བཞིན་བྱེད། མདོར་ན་ང་ཚོའི་ལོ་གསར་ལ་རང་རེའི་བྱིས་པ་རྣམས་དགའ་བ་ཙམ་མིན་པར་བོད་ལོ་གསར་གྱི་མདུན་དུ་འཛམ་གླིང་གི་མི་ཚང་མ་བོད་ཀྱི་བྱིས་པར་བསྒྱུར་ནུས་པའི་ནོར་བུ་ཞིག་ཡིན། བོད་ལ་གྲོགས་པོ་མང་པོ་ཡོད་དོན་དེ་ཡང་ཕྱིའི་མི་མང་པོས་བོད་ལ་ནོར་བུ་ཁ་ཤས་ཤིག་ཡོད་པར་ཡིད་ཆེས་བྱེད། ལོ་གསར་ནི་བོད་ཀྱི་ནོར་བུའི་ཡ་གྱལ་ཞིག་ཡིན། བོད་ཀྱི་ནོར་བུ་འདི་ཚོའི་ནུས་པ་ནི་གཅིག་ཁོ་ན་ཡིན་པར་འདོད། བོད་ཀྱི་ནོར་བུ་དེ་ཚོས་བོད་མི་རང་དང་བོད་མི་ལ་ཁ་འཁོར་ཚད་ཚང་མའི་གདོང་ལ་འཛུམ་མདངས་དབྱུངས་བའི་ནུས་པ་དང་ལྡན་པར་ཡིད་ཆེས་ནས་མི་མང་པོ་ཞིག་བོད་ཀྱི་གྲོགས་པོ་བྱེད་པར་དགའ། དེ་ལྟ་བུའི་ནོར་བུ་ཞིག་མེད་པར་བྱེད་ནི་སྨྱོན་པ་དང་བླུན་པོའི་བྱ་བ་ལས་གཞན་མིན་ཞེས་ངས་མགྲིན་པ་གཟེངས་སུ་བསྟོད་ནས་གླེང་འདོད་བྱུང་།
རེད་རེད། གོ་ཡ་འདུག ཏ་སི་བྱང་ཆུབ་རྒྱལ་མཚན་གྱི་བཀའ་ཆེམ་དུ་ཡང་། ཁོང་གིས་ང་ཤི་རྗེས་ལོ་གཅིག་ལས་ལྷག་པར་མྱ་ངན་མ་བྱེད་ཅེས་པའི་སྐོར་བཀའ་མོལ་རིང་པོ་ཞིག་ཡོད་པར་ཡང་རྒྱུ་མཚན་ཕྱོགས་འདྲ་ཡོད་རེད།
ལོ་གསར་འདི་ཁྱད་པར་ཕྱི་ཕྱོགས་སུ་གྱར་ནས་ཡོད་མཁན་དག་ལ་མཚོན་ན་དོན་སྙིང་ནི་སྤྲོ་སྐྱིད་ལས་ཀྱང་བརྒལ་ཏེ་ཡོད། ངས་འདིའི་སྐོར་ཚོགས་འདུ་དེ་འདྲར་བཤད་མྱོང་།
གང་ལྟར་ཁྱེད་ལ་རྒྱབ་སྐྱོར་ཡོད།
སྤོབས་པའི་སྐད་ཆ་ལ་གནས་ལུགས་དང་རྒྱུ་མཚན་འདུག དེ་ག་རང་རེད་ཟེར་ཞུ་གི་ཡིན།
ཇི་སྲིད་བོད་མི་གནས་པ་དང་། །
བོད་དོན་ཇི་སྲིད་གནས་གྱུར་པ། །
དེ་སྲིད་ལོ་གསར་གནས་གྱུར་ནས། །
བོད་ཀྱི་རིག་གཞུང་དར་པར་ཤོག ། ཞེས་བཀྲ་ཤིས་སྨོན་ཚིག་གི་ཁ་གཡང་འབོད།
བོད་ཀྱི་ལོ་རྒྱུས་ཐོག་ད་ལོ་ལྟ་བུའི་རང་སྲེག་ཅིག་བྱུང་མྱོང་བས་ད་ལོའི་ལོ་མ་གསར་ན་བོད་ཀྱི་རིག་གནས་ཤི་འགྲོ་བ་ཞོག་མིན་ལ་གསར་ནའང་བོད་ཀྱི་རིག་གཞུང་སྐྱོབས་ཐུབ་ཞིག་མིན་པས་མ་གསར་ན་བཟང་།བུ་ཡ་རབས་ཤིག་ཡིན་ན་རིག་གནས་ལ་ཁ་གཡར་ནས་སྤྲོ་སྐྱིད་གཏོང་འདོད་ཀྱི་གླེང་སློང་འཇགས་ན་བཟང་།སྤོབས་མཐའ་ཁྱེད་ཀྱི་ནང་མི་གལ་ཏེ་བཀྲོངས་ན་ཁྱེད་ཀྱིས་རིག་གཞུང་ལ་ཁ་གཡར་ནས་ལོ་གསར་གཏོང་ཐུབ་བམ།ངས་ལྟས་ན་ཁྱེད་ཀྱིས་གཏོང་རྒྱུ་མ་རེད།
བྱུང་མ་མྱོང་བར་བཅོས་རོགས།
དཔའ་བོ་དཔའ་མོ་ཚོས་གཅིག་གྱུར་དགོས་ཟེར་བ་དེ། མི་རིགས་ཀྱི་འཐབ་རྩོད་དང་རྒྱལ་ཁབ་ཀྱི་བདག་དབང་རྩོད་ས་ན་གཅིག་གྱུར་དགོས་ཡོད་ཟེར་བ་ལས། གཅིན་སྐྱག་གཏོང་ས་ན་གཅིག་གྱུར་ཞིག་དགོས་བ་བཤད་ཀི་ཡོད་པ་མ་ཪེད།
ལོ་གསར་ནི་ལོ་གསར་རེད། ཆོས་དང་ཆབ་སྲིད་ཀྱི་དགོས་མཁོ་ལ་སུས་ཀྱང་བསྒྱུར་ཡོད་པའི་སྐད་ཆ་མེད་པ་རེད། ཡིན་ན་ཡང་། འགྲོ་བ་མི་ལ་མི་ཤི་ན་མྱ་ངན་ཡོད་པ་རེད། རྒྱལ་དོན་ལ་ཤི་ན་རྒྱལ་ཁབ་ཀྱིས་མྱ་ངན་བྱེད། སྡེ་དོད་དུ་ཤི་ན་སྡེ་བ་བོས་མྱ་ངན་བྱེད། ཐ་ན་ཁྱིམ་མི་ཙམ་ཤི་ན་ཡང་ཁྱིམ་མཚེ་ཚོས་མྱ་ངན་བྱེད། དེ་ལྟར་གདུང་སེམས་དེ་གཅིག་སེམས་གཅིག་ལ་འཇོག་མ་ཐུབ་ན། སྐྱོབ་པའི་མགོན་ཞིག་དང་སྐྱོང་བའི་དམངས་ཞིག། དུངས་བའི་གྲོགས་ཞིག་སོགས་དགོས་དོན་མེད་པ་རེད། ཁ་རང་མགོ་དང་། བུ་སུ་དཔའ་རེད། དེ་ལྟར་བྱེད་མི་ཉན། རྡོག་རྩ་ལ་གནོད།
ལོ་གསར་ནི་ནོར་བུ་ཡིན་ན་མིན་ན་ཡང་། དེ་ནི་སེམས་ཀྱི་དགའ་སྡུག་ཞིག་ལ་སྟུན་ནས་རོལ་དགོས་བའི་ཡུལ་སྲོལ་ཙམ་ལས་ཡུལ་ཁྲིམས་དེ་འདྲ་གང་ཡང་མ་རེད། བླ་ཆེན་སྤྱི་ཆེན་དམ་པ་གཤེགས་ཤུལ་ན་ལོ་གསར་མེད་པའི་མྱ་ངན་ལུགས་སྲོལ་ནི་ད་ལྟ་གསར་བ་བྱུང་དེ་འདྲ་ཡང་མ་རེད། སྔར་ནས་ཡོད་པ་དང་ད་ལྟ་ཡང་ཡོད་ཆོག་པ་དེ་འདྲ་རེད། ད་ལྟའི་བོད་མདོ་དབུས་ཁམས་གསུམ་གྱི་དཔའ་བོ་དཔའ་མོ་དེ་ཚོ་བླ་ཆེན་འདྲ་མི་ན་ཡང་བོད་སྤྱི་བའི་མི་ཆེན་རེ་ཡིན་པར་འདོད།
ལོ་མང་རིང་ལོ་གསར་མེད་པར་ལྷག་པ་དང་། སྔོན་མ་ལོ་མང་རིང་ཆོས་སྒོ་མེད་པར་ལྷག་པ་དང་། ལོ་མང་རིང་རྒྱལ་ཁབ་མེད་པར་ལུས་ཡོད་པ་སོགས་ནི་དགྲ་རྒན་ཚང་གིས་ང་ཚོའི་མགོ་ཐོག་ལ་བཞག་པའི་ལས་འཕྲོ་ལྷག་མ་འདི་མི་རབས་གསར་བ་ལ་ཤེས་སུ་བཅུག་ན་ལོ་གསར་བཏང་བ་ལས་ཀྱང་དགེ་མཚན་ལྡན་པར་འདོད།
མཐའ་དོན། སྤོབས་མཐའི་རྐུབ་ཀྱི་སྐྱག་དྲི་ལ་སྣོམ་ནས་ལོ་གཅིག་འགོར། དེ་རིང་རང་གི་སྐྱག་དྲི་འདི་སྤོབས་པ་ལ་སྣོམ་བཅུག་པའི་སྐལ་བཟང་ཤར། སྤོབས་པ་རྒྱལ་ནས་འགྲེ་མ་སོང་ན་ཡང་ཡང་འདི་འདྲ་མི་བྱེད་ཁོ་ཐག་ཡིན། ཧ་ཧ་ཧ།
ད་ལོའི་ལོ་གསར་བའི་དུས་སྟོན་ཐད་ལ་བསམ་ཚུལ། །
བོད་ཕྱི་ནང་གཉིས་ཀ་ནས་ལོ་ངོ་ཁ་ཤས་ཤིག་ལ་ལོ་གསར་གྱི་དུས་སྟོན་མི་བྱེད་པའི་རྣམ་འགྱུར་ཞིག་བསྟན་པ་ཙམ་རེད་མ་གཏོགས་ད་ནས་བཟུང་བོད་ཀྱི་ལོ་གསར་དུས་སྟོན་དེ་རྩ་བ་ནས་གཅོད་ཀྱི་ཡིན་ལབ་པ་དང་མཇུག་བསྒྲིལ་བ་ཡིན་ཟེར་གྱི་ཡོད་པ་མ་རེད་བསམ། ལོ་གསར་བ་ཚེས་པ་ལ་ལོ་གསར་གྱི་དུས་སྟོན་བྱེད་པ་ནི་འཛམ་གླིང་སྤྱི་ལ་གཅིག་མཚུངས་སུ་ཡོད་པ་ཞིག་རེད་མ་གཏོགས་བོད་མིས་འཛམ་གླིང་ལ་མ་དར་བ་ཞིག་གསར་བཏོད་དང་གསར་རྙེད་བྱུང་བ་དེ་འདྲ་ཅི་མ་རེད། ཡིན་ནའང་ལུང་པ་ཡར་རྒྱས་མེད་པ་དང་གནའ་བོའི་སྲོལ་རྒྱུན་མཐུག་སའི་ཡུལ་ལུང་མང་པོ་ཞིག་ལ་ད་ལྟ་དངོས་སུ་ཉིན་མང་པོའི་རིང་ལ་ལོ་གསར་བས་དགའ་སྟོན་རྟེན་འབྲེལ་དང་བཟའ་བཏུང་ལོངས་སྤྱོད་ལ་རོལ་ནས་དུས་ཚོད་སྐྱེལ་གྱི་ཡོད་པ་རེད། དེ་མིན་ཡར་རྒྱས་ཅན་གྱི་རྒྱལ་ཁབ་དང་ཡར་ཐོན་ཅན་གྱི་མི་རིགས་ཤིག་ལ་མཚོན་ན་ལོ་གསར་ནི་རྟེན་འབྲེལ་ཙམ་ཞིག་ལས་ང་ཚོ་བོད་པ་ནང་བཞིན་རང་ལ་མེད་ན་མི་ལ་གཡར་སྐྱི་དང་བུ་ལོན་སྟོང་འཇལ་སོགས་བྱས་ནས་ཉིན་བརྒྱ་དུས་གཅིག་གི་ཉི་མ་ལྟ་བུར་བརྩིས་ནས་ཁ་ཕོ་རིས་ཀྱིས་རང་སྲོག་གཅོད་པས་རྣམ་པ་དེ་མེད་པ་རེད། ལོ་གསར་དེ་བོད་ཀྱི་ནོར་བུ་ཞིག་ཡིན་ན་བོད་ལ་ངོམ་སོ་བྱེད་རིན་དེ་ཙམ་མེད་པ་རེད་འདོད། གང་ཡིན་ཞེ་ན། བལ་བོ་ལྟ་བུ་ལ་མཚོན་ན་ལོ་གཅིག་ལ་ལོ་གསར་དུ་མ་ཞིག་གཏོང་སྲོལ་ཡོད་པས་བལ་བོའི་རྒྱལ་ཁབ་དེ་ནོར་བུའི་རྒྱལ་ཁབ་ལྟ་བུ་ཞིག་ཏུ་ངོས་འཛིན་ཅིའི་ཕྱིར་མི་ཞུ། དེ་མིན་བོད་ཀྱི་ལོ་གསར་དུས་སྟོན་དེའི་ནང་ལ་བོད་མི་ས་ཡ་དྲུག་པོའི་ཚེ་སྲོག་ཡོངས་རྫོགས་ཐིམ་ཡོད་པ་འདྲ་བོ་ཞིག་ལབ་ན་ཡང་དེ་ཙམ་མཛའ་བོ་ཞིག་མི་འདུག་སྙམ། ལོ་ཁ་ཤས་ལ་ལོ་གསར་དུས་སྟོན་མ་བྱས་པ་ཙམ་གྱིས་ཡང་སྲོལ་རྒྱུན་དེ་རྣམས་གཏན་དུ་ཡལ་འགྲོ་བ་ཞིག་ག་ལ་སྲིད། གལ་ཏེ་སོ་སོ་ལ་སྤྱི་མི་མགྲོན་པོ་ཁ་ཤས་རེ་ཡོད་པ་རྒྱུ་མཚན་དུ་བྱེད་ཀྱི་ཡོད་ན་དེ་ནི་སོ་སོའི་ངོས་ནས་ཁེ་བཟང་དང་མཐུན་ལམ་ཙམ་ཞིག་ཡིན་པ་ལས་བོད་མི་རིགས་སྤྱིའི་སྐྱིད་སྡུག་ལ་ཁག་བཞག་མི་རུང་ངོ་། བདག་ལ་མཚོན་ན་ལོ་གསར་ལ་ཚང་མ་མཉམ་འཛོམས་བྱས་ནས་དགའ་སྟོན་རྟེན་འབྲེལ་གྱིས་ཐུགས་སྤྲོ་མི་གཏོང་བའི་མྱ་ངན་བྱས་པ་དེ་ནི་མི་འོས་པ་ཞིག་ཏུ་མཐོང་གི་མེད་ལ་གལ་ཏེ་མཉམ་དུ་འཛོམས་ནས་མཆོད་འབུལ་ཙམ་དང་སྨོན་ལམ་དེ་བཞིན་ལོ་འཁོར་གཅིག་ནང་གི་བྱ་བ་ལམ་འགྲོ་ཡོང་བས་སེམས་ནང་གི་རེ་སྨོན་རེ་ཕུལ་བ་ལའང་དེ་ཙམ་ཉེས་འགལ་དུ་མཐོང་གི་མེད། དེས་ན་ངས་ག་རེ་བཤད་ཀྱིན་ཡོད་ཟེར་ན། རང་རང་ས་ནས་རང་རིགས་སྤུན་ཟླ་དང་སྤྱི་མི་གྲོགས་པོ་སོགས་མགྲོན་འབོད་རེ་བྱས་ནས་རྟེན་འབྲེལ་ཙམ་རེ་བྱེད་འདོད་ན་ནི་མ་འགྲིག་པ་ཆེན་པོ་ཅི་མི་འདུག་སྙམ། ཡིན་ནའང་དེ་ལས་ལྡོག་སྟེ་ཅི་ཞིག་ལོན་མདོག་མདོག་དང་གོ་རབ་ཞིག་བཅད་མདོག་མདོག་གིས་ཧ་ལོ་རྒྱལ་ཏེ་དགུང་ལ་འཕར་སྡོད་པའི་དུས་བོད་ཅིག་ནི་མིན་པར་སྙམ། དེ་ནི་རང་རིགས་ཀྱི་སྤུན་ཟླའི་ངོ་མི་ཆོད་ལ་སྤྱི་ཡུལ་རྒྱལ་ཁབ་ཚོའི་མི་རིགས་ཀྱི་མདུན་ལའང་ངོ་གནོང་དགོས་པ་ཞིག་རེད་འདོད། གང་ཡིན་སྙམ་ན་མི་ལོ་དུ་མའི་རིང་གི་ལོ་རྒྱུས་ཡོད་པའི་ས་ཡ་དྲུག་ལྷག་གི་མི་གྲངས་དང་བོད་ཅེས་པའི་རྒྱལ་ཁབ་དེ་རྒྱ་དམར་གྱི་འོག་ལ་འཛུལ་ཞུགས་ཀྱི་ལས་འགུལ་ཙམ་རེ་སྤེལ་བ་ལས་བོད་རང་དབང་རང་བདག་གི་ལས་འགན་རྣ་རྒྱབ་ཀྱི་རླུང་ལ་བསྐུར་ནས་ལོ་རྒྱུས་རྒྱལ་རབས་ཤིག་འཕྲེད་གཏུབ་བྱས་ཏེ་འདས་སོང་གི་མྱེས་པོ་ཚོའི་རྣམ་ཤེས་ལ་བདེ་བ་མི་ཐོབ་ཅིང་། ད་ལྟའི་སྤུན་ཟླ་ཚོའི་ལས་ངག་ཡིད་དང་གློ་སྙིང་བྲང་གསུམ་དེ་བཞིན་ཤ་ཁྲག་རུས་གསུམ་ས་ལ་འཐོར་མི་ཐུབ་པ་བཟོས་ཤིང་། མ་འོངས་པའི་མི་རབས་ཚོའི་འདུན་ལམ་ཀྱག་ཀྱོག་དེ་ནག་བསུབ་ལ་བཏང་བའི་མུན་ནག་གི་རྟེན་འཇིག་ཞིག་ལ་བསྐྱལ་ཡོད་པའི་དུས་འདིར། ངོ་མ་ལོ་གསར་གྱི་དགའ་སྟོན་རྟེན་འབྲེལ་རེ་རྩི་སྲུང་བྱས་ན་ཡང་བྲོ་བ་ཞིག་མེད་པའི་མུན་ནག་གི་འཇིག་རྟེན་ཞིག་རེད་སྙམ།
ལོ་གསར་གཏོང་དང་མི་གཏོང་གང་ཟག་སོ་སོའི་སེམས་ཀྱི་འདུ་ཤེས་འཛིན་སྟངས་ཤིག་རེད། འདི་ལ་ཡོངས་ཁྱབ་རང་བཞིན་གྱི་ཐག་གཅོད་ཅིག་བྱེད་ཐབས་མེད་ལ་བྱེད་དགོས་པའང་མེད། དེ་བས། ལོ་གསར་གཏོང་བ་རིག་གཞུང་སྲུང་སྐྱོབས་སུ་འདོད་པ་ཚོས་དེ་ག་བྱོས། ལོ་གསར་མི་གཏོང་བ་མྱ་ངན་མཚོན་སྟངས་ཤིག་ཏུ་བསམ་མཁན་ཚོས་ཀྱང་དེ་ག་བྱོས། མང་པོ་བཤད་པའི་དགོས་པ་མེད། ངས་ནི་ལོ་གསར་གཏོང་ངེས་ཡིན། འོན་ཀྱང་རིག་གཞུང་སྲུང་སྐྱོབས་ཀྱི་འདུ་ཤེས་ཀྱིས་བསྐུལ་ནས་མིན།
སྤོབས་པ་མཐའ་ཡས་ཀྱིས་གསུང་ལ་རྒྱ་སྐྱོར་ཡོད། ང་ཚོའི་ཕ་ཆོས་གྲུ་བཞི་གསེར་འདྲ་བོ་དེ་རྒྱ་བོ་རྒྱ་ནག་གི་ལག་ལ་ཤོར་ནས་ཝ་རྔ་མ་ཤར་ལེ་བྲོས་འགྲོ་དུས་ཡང་ལོ་གསར་བཏང་པ་རེད། ད་ལོ་རྒྱལ་གཅེས་དཔའ་བོ་ཚོ་སྟག་འཛུམ་དྲུག་ཉུ་ལེ་ཤར་ནས་དགྲ་བོ་ལ་རང་ལུས་མེ་བསྲེག་བཏང་ནས་ངོ་སྒོལ་བྱེད་དུས་དཔའ་བོའི་དཔུང་བསྟོད་གི་ཚུལ་དུ་ལོ་གསར་དེས་ཁོང་རྣམས་པའི་རྣམ་ཤེས་ལ་མཆོད་པ་ཕུལ་དགོས་ངེས་རེད།
དྲ་གྲོགས་རྣམས་ཀྱིས་བཤད་པ་ལ་རྒྱུ་མཚན་འདུག འོན་ཀྱང་། བདེན་དོན་ཆེད་སྐུ་སྲོག་བཏང་བའི་དཔའ་བོ་ཚོ་སེམས་ལ་དྲན་ཚེ་ལོ་སར་ལ་སྤྲོ་སྣང་དང་ཡི་ག་མི་འདུག་གལ་སྲིད་ལོ་སར་བཏང་ན་ཡང་ལོ་སར་གྱི་གཟུགས་བརྙན་ཙམ་ཞིག་ལས་མངོན་ཐུབ་རྒྱུ་མ་རེད།
ཡིད་སྤྲོ་བའི་ངང་ནས་ལོ་གསར་ལ་རོལ། བོད་ཀྱི་སྐད་དང་རིག་གཞུང་ལ་གཅེས་པ་་སྐུ་གཤེགས་པ་རྣམས་ཀྱི་བཞེད་དོན་མྱུར་དུ་འགྲུབ་པར་སྨོན།
འགལ་རྐྱེན་ཞི་བ་དང་མཐུན་རྐྱེན་འགྲུབ་པ་ལ་འབད།
འགལ་རྐྱེན་ནི། བོད་རྒྱ་ཆེ་མི་མངས་ལ་རང་རང་སོ་སོའི་ཁ་སྐད་བཀོལ་བ་དེ་ཡིན། དེ་ཉིད་མཚམས་འཇོག་དགོས།
མཐུན་རྐྱེན་ནི། བོད་རིགས་གཅིག་འགྱུར་ཆེད་དུ། ཆོས་སྐད་དེ་བཀོལ་བར་དམ་བཅའ་བའི་ངང་ནས་དཔལ་བོད་ཀྱི་ལོ་གསར་དགའ་སྟོན་ལ་རོལ་བར་མཛོད་ཅིག བཀྲ་ཤིས་བདེ་ལེགས་བཅས་སོ།།
རེད་རེད་་་ལོ་གསར་གཏོང་དགོས་གང་ཡིན་ཞེ་ན། ང་སྐབས་རེ་ང་ཚོས་རོ་ཐོ་བྲོ་བརྡུང་རེ་བཟོས་ན་སྐྱིད་པོ་ཡོད་སྲིད་པ་རེད་ལ་བོད་བསྟན་སྲིད་ཀྱིས་ཆེད་དུ་གཤེགས་ཟིན་པས་ཤུལ་ལུས་ནང་མི་ཚོའི་ཐུགས་ཡང་དགྱེས་ངེས་རེད། དེ་སྔར་གཞིས་སུ་ཡོད་པའི་བོད་མིའི་ལོ་གསར་མ་བཏང་དུས་རྒྱལ་མིའི་ངེས་པར་དུ་གཏོང་དགོས་ཟེར་ནས་ས་ཁུལ་མང་པོར་ལོ་གསར་གཏོང་ཆེད་དངུལ་མང་པོ་བཏང་ཡོད་ཀྱང་ལོ་གསར་མ་བཏང་བ་རེད། ངོ་མ་ཁོང་ཚོས་གླེན་རྟགས་སྟོན་པ་རེད། འདི་ལོ་སྤྱང་གྲུང་ལྡན་པའི་དྲ་འབུ་དག་གིས་སློབ་བསྟོན་རེ་གནང་ནས་ངེས་པར་དུ་རོ་ཐོག་བྲོ་ཞབས་བྲོ་སྐྱིད་པོ་ཞིག་འཁྲབ་དགོས། བྲོ་དཔོན་སྤོབས་པ་མཐའ་ཡས་དང་། རོལ་ཆ་བརྡུང་མཁན་སྤྲུལ་སྐུ་དབང་ཆེན་དང་། གླུ་གཞས་བཏང་མཁན་ཨ་ལྕག་ཚེ་རྟེན་སྒྲོལ་མ་དང་་སྐུ་འགྲོན་གཙོ་བོ་ཧུས་ཅིང་ཐ་འོ་དང་་་ཀྲང་ཆི་ལིས་་་བྱམས་པ་ཕུན་ཚོགས་་་རག་ལྡི་་པདྨ་འཕྲིན་ལས་་་་་བློ་བཟང་རྒྱལ་མཚན་དང་་་ང་བླ་མ་་་གངས་ཅན་བླ་མ་་་དགའ་ལྡན་ཁྲི་ཟུར་ལུང་རིག་རྣམ་རྒྱལ་སོགས་ཡིན་་་་གཟིགས་མོ་བ་ཚོ་ནི་་་་་དམར་དམག་ལས་ཟུར་དང་བཅས་པར་ཡིན་་་་་་་
ལོ་གསར་གཏང་དགོས་མིན་དེ། དང་པོ་སོ་སོའི་སྤུན་མཆེད་དམ། ནང་མི་ཕ་མ་བུ་ཕྲུག་གང་རུང་ཞིག་འདས་གྲོངས་སུ་གྱུར་སོང་ན། ལོ་གསར་གཏོང་ནུས་མིན་གྱི་ཞིབ་འདང་ཡག་པོ་ཞིག་རྒྱག་དགོས། ཉིས་སྟོང་དགུ་ཚུན་ནས་རང་རེའི་དཔའ་བོ་བརྒྱ་ཕྲག་ལས་བརྒལ་བས། འོ་སྐོལ་གྱི་བདེན་དོན་ཆེད་དུ་མེ་སྲེག་ཆུ་མཆོང་དང་། དེ་བཞིན་བཙོན་འོག་ཏུ་ཚུད་པའི་དཔའ་བོ་ཚོས། མནར་གཅོད་ཀྱི་སྡུག་བསྔལ་མྱངས་དང་མྱོང་བཞིན་ཡོད་པ་མ་ཟད། གོ་མཚོན་ཐོགས་པའི་དམག་གིས་བོད་ས་ཡོངས་རྫོགས་ཁེངས་ཏེ། བོད་ཆེན་པོ་འདི། ཆེས་སྡུག་རྩུབ་ཆེ་བའི་བཙོན་རྭ་ཙམ་ལ་དཔེ་འགྲན་ན་ཆུང་དྲགས། འཇིག་རྟེན་མི་ཆོས་ལ་མེད་པའི་དམྱལ་བ་མི་ཡུལ་ལ་འཕོ་ཞེས་བརྗོད་ན་རན་པར་མཐོང་། རང་རེའི་ལས་དབང་འདི་འདྲའི་སྐབས་སུ། ལོ་གསར་ལ་སྤྲོ་སྐྱིད་གཏོང་བར་འདོད་མཁན་དག་ནི། སེམས་ཀྱི་གཏིང་ནས་མི་རིགས་ཀྱི་དཔའ་བོ་དེ་དག་ལ་སྤུན་ཟླའི་འདུ་ཤེས་མེད་པར་མ་ཚད། སྤྲོ་སྐྱིད་གཏོང་འདོད་པ་ཙམ་གྱིས། མི་དེ་དག་གི་བསམ་བློའི་གནས་བབ་གང་འདྲ་ཡིན་པར་མཐོང་ཡོང་གི་འདུག
གསོད་གཏུབ་རྒྱོབ་གསུམ་གྱི་སྒྲ་དེ་བོད་ས་ཡོངས་སུ་ཁྱབ་སྟེ། སྔར་འཛམ་གླིང་དུ་མ་གྲགས་པའི་དམར་གསོད་དང་། མནར་གཅོད་ཀྱིས་སྡུག་གི་མིག་ཆུ་ཁྲག་ལ་འདྲེས་ཤིང་རྒྱུན་མ་ཆད་པའི། བགྲང་བྱ་དྲུག་ཅུའི་ནང་གི་ཆེས་འཇིགས་སུ་རུང་བའི་མུན་ནག་གི་ཉིན་ཞག་སུམ་བརྒྱ་དྲུག་ཅུ་ཧྲིལ་གྱིས་འདས་ཏེ། ལོ་གསར་པ་མགོ་བཙུགས་པ་འདི་ལ། ཕྱི་སྡོད་བོད་མི་ཡོད་དོ་ཅོག་གིས་ལོ་གསར་གྱི་ཉིན་མོ་ཚེས་གཅིག་ནས་བཟུང་། མྱ་ངན་གྱི་ལོ་གསར་གཞི་རྒྱ་ཆེ་ཞིང་རྒྱུན་རིང་པོས། འཛམ་གླིང་མི་དམངས་སེམས་འགུལ་ཐེབས་པའི་ལས་འགུལ་སྤེལ་ཞིག་དགོས་ངེས་སོ།།
ཨོ་ཨོ་་་གོང་གསལ་མིང་གཞུང་དེ་དག་གི་ནང་ནས་གནས་སྐབས་ཅིག་ལ་སྤྲུལ་སྐུ་དབང་ཆེན་མིང་དེ་ཕྱིར་འཐེན་གྱི་ཡིན་་་་་
་་་་་གལ་སྲིད་ངའི་ནང་མི་སྤུན་ཉེ་ཞིག་གིས་བོད་སྤྱིའི་རང་དབང་ལས་དོན་ལ་ལུས་སྲོག་ཕུལ་ཐུབ་ཡོད་པ་ཡིན་ན་ངའི་ཁྱིམ་ཚང་གིས་ལོ་གསར་རྒྱས་སྤྲོས་བརྗིད་ཉམས་ལྡན་པ་ཞིག་ལ་རོལ་ངེས་ཡིན།་་་་་་་ཟེར།
སྤོབས་མཐས་གསུང་ལ་རྒྱབ་སྐྱོར་ཡོད།ང་ཚོས་རང་གི་ལོ་སར་སྲུང་བརྩི་བྱེད་དགོས་པ་རེད་མ་གཏོགས།བོད་ཕྱིའི་གཞོན་སྐྱེས་མང་ཆེ་བས་ཕྱི་ལོ་དང་ཡེ་ཤུའི་ལོ་སར་ལ་ཕྱི་རྒྱལ་བ་རྣམས་དང་ལྷན་རོལ་ཡོང་གི་འདུག་པས།བོད་ཕྱིའི་བོད་མིའི་སྤྱི་ཚོགས་ནང་བོད་ཀྱི་སྲོལ་རྒྱུན་ལོ་སར་ཉམས་རྒྱུ་ཉག་གཅིག་རེད།
བོད་ཀྱི་ལོ་སར་མེད་པར་བརྟེན་ཕྱི་རྒྱལ་ཁག་ནང་བོད་མི་ནང་ཁུལ་ལྷན་འཛོམས་ཀྱི་གོ་སྐབས་མེད་པར་ཡེ་ཤུ་ལོ་སར་དེ་བོད་མི་གཞོན་སྐྱེས་ཕོ་མོ་རྣམས་དང་ཕྱི་རྒྱལ་བ་གཞོན་སྐྱེས་རྣམས་དགའ་རོགས་སྒྲིག་སའི་གོ་སྐབས་ཤིག་ཆགས་འདུག
སྤྱི་ཚོགས་ཀྱི་དཀའ་ངལ་དངོས་ལ་བསམ་བློ་གཏོང་རྒྱུ་གལ་ཆེན་རེད་མ་གཏོགས་རྟག་པར་ཚོར་བ་ཙམ་གྱི་རྗེས་སུ་འབྲངས་ཏེ།དོན་དག་ཆེ་ཕྲ་ཀུན་ཐག་གཅོད་བྱེད་པ་ནོར་འཁྲུལ་རེད་སྙམ།
རྒན་ལ་དྭགས་པ་འདི་ག་དུས་ཡིན་ཡང་ཕལ་སྐད་དགྲ་ལ་འཛིན་མཁན་གྱི་མི་ཞིག་རེད། ཡུལ་སྐད་ཡིག་ཐོག་ཏུ་བཤད་ན་ཁྱོད་ལ་མི་བཟོད་པའི་ཞེ་འཁོན་དེ་འདྲ་ཞིག་ག་ནས་བྱུང་བ་རེད་ལགས། ཁ་སྐད་བཤད་ན་འགལ་རྐྱེན་དུ་འགྲོ་གི་ཡོད་ན་བོད་མི་ཚང་མས་ཁ་བཙུམ་ནས་འདུག་དགོས་གི་རེད་པས།
རྒན་ལགས་ཀྱིས་མཐུན་རྐྱེན་དུ་འགྲོ་བའི་ཆོས་སྐད་དང་། འགལ་རྐྱེན་དུ་འགྲོ་བའི་ཁ་སྐད་རྣམས་སོ་སོར་འབྱེད་དང་། རྗེས་སོར་ང་ཚོས་དེ་ལྟར་དུ་ཆོས་སྐད་ཐོག་བཤད་ཆོག་གི་རེད། དེ་ལྟར་མིན་ན་ཁ་བརྡ་བྱེད་པར་ཕེབས་པའི་མི་ཚང་མ་ཆོས་པ་རྐྱང་རྐྱང་དང་ལྟ་གྲུབ་རྩོད་མཁན་ཁོ་ན་མིན་ཙང་སྤྱི་ཚོགས་འཚོ་བའི་ནང་གི་གནས་ཚུལ་ཡོད་ཚད་ཆོས་སྐད་ཐོག་བཤད་ན་དགོས་པ་ག་རེ་ཡོག་རེད།
ཆོས་སྐད་ཐོག་བཤད་ན་དགོས་པ་མེད་ཐོག་བོད་ཀྱི་ཡུལ་ལུང་སོ་སོ་ན་མིང་བརྡ་ཕུན་སུམ་ཚོགས་པ་ཡོད་པ་རྣམས་བེད་མེད་དུ་ཉམས་འགྲོ་བའི་འགལ་རྐྱེན་ཡོད་པ་རེད། ཕྱོགས་བཞི་མཚམས་བརྒྱད་ཀྱི་ཡུལ་སོ་སོའི་བོད་སྐད་རྣམས་ཕྱོགས་གཅིག་ཏུ་སྤུངས་ནས་ཁ་བརྡ་བྱེད་ཐུབ་ན་བོད་སྐད་ཀྱི་ཐ་སྙད་ཇེ་ཕྱུག་ཏུ་འགྲོ་བའི་དགེ་ཕན་ཧ་ཅང་ཆེན་པོ་ཡོད་པ་རེད། སྐད་ཡིག་ཕྱུག་མ་ཕྱུག་དེ་ཐ་སྙད་མང་ཉུང་ལ་རག་ལས་ཡོད་པ་དེ་ཤེས་ན་ཡག་གི་རེད། དེ་མིན་ཚོད་ཚོད་འུར་བརྒྱབ་པ་དེ་ནི་ཐོ་རེངས་རྟ་ཕོ་འཚེར་བའི་རྗེས་སུ་འགྲོ་བ་ཡིན་པས། མི་གཞན་གྱི་ཁ་རྡུང་དང་བཤད་བཤད་ཉོ་གི་རེད་གདའ།
སྤོབས་མཐའ་ཅན་ལ་ཞུ་རྒྱུར། གལ་སྲིད་ཉིད་ཀྱི་ཨ་མ་གྲོངས་ནས་ཉིན་ཤས་ལས་ཕྱིན་མེད་ན་ཁྱེད་ཀྱི་སེམས་ནང་དགའ་སྤྲོ་བྱ་རྒྱུའི་བསམ་བློ་ཞིག་སླེབས་སྲིད་དམ། དྲང་པོར་གསུང་རོགས། ལོ་གསར་སྐབས་དགའ་སྤྲོའི་སྤྲོ་སྟོན་འགའ་ལ་བོད་ཀྱི་རིག་གཞུང་རེད་ཅེས་ངེས་པར་གཏོང་དགོས་ན་བོད་ཀྱི་རིག་གཞུང་སྐྱོ་པོ་དེ་འདྲ་བརླག་ནའང་ང་ལྟ་བུར་ཕངས་སེམས་གང་ཡང་མེད། བོད་ཀྱི་རིག་གཞུང་ནི་གཙོ་བོ་ནང་རིག་དང་། གསོ་རིག སྒྲ་རིག བཟོ་རིག་ཀྱང་འགའ་ཡོད་པ་དེ་དག་ཡིན་པས་དེ་དག་བསླབ་སྦྱོང་བྱས་ནས་བདག་པོ་རྒྱག་དགོས་པ་ལས་སྤྲོ་སྐྱིད་ལམ་སྲོལ་ཞིག་ལ་རག་ལས་མེད། རྫ་ཚེ་བཀྲ་པས་ལུང་ཞིག་དྲངས་འདུག་ཀྱང་ལུང་དྲངས་པ་གནད་དུ་འཁེལ་མི་འདུག བཀའ་གདམས་པའི་དགེ་བའི་བཤེས་གཉེན་རྣམས་ལ་ལོ་གསར་གཏོང་བའི་ལམ་སྲོལ་རྩ་བ་ནས་མེད་པར་མ་ཟད་ལོ་གསར་གཏོང་བ་དག་ལ་ཟུར་ཟའི་ཚུལ་གྱིས་ལོ་གསར་པ་མ་རེད་ལོ་ཟད་རེད་ཅེས་མི་རྟག་པ་དྲན་དགོས་པར་གདམས་ཡོད། བཀའ་གདམས་ཕ ཆོས་བུ་ཆོས་ལ་གཟིགས་ཤིག
ལས་རྒྱུ་འབྲས་དང་མི་རིགས་ཀྱིས་བདེ་སྡུག་སེམས་ཁོངས་སུ་ཡོད་མཁན་ཀུན་ལ་ལོ་གསར་པའི་སྤྲོ་སྐྱིད་མེད་ངེས་རེད། དེ་མིན་སོ་སོའི་ཁ་ཕོར་མ་གཏོགས་མི་སེམས་མཁན་གྱི་ངོ་ཚ་ཁྲེལ་གཞུང་བྲལ་བས་མགོ་སྟོང་ཀླེད་མེད་ཁྱི་དང་འདྲ་བས་དཀྲུགས་ཤིང་མཁན་དག་གིས་ནི་གང་འདོད་བྱོས་ཤིག་་་འདིར་འུར་དཀྲོགས་བཟོ་དགོས་དོན་གང་ཡང་མི་འདུག་་་་་་
རང་ཉིད་བསམ་ཚུལ་བྱས་ན་འདི་ནི་བོད་མི་རིགས་ཀྱི་ལོ་རྒྱུས་ནང་མཐོང་དཀོན་པའི་ལོ་རྒྱུས་ཤིག་ཡིན་ན། ལོ་སར་མ་གཏང་ན་བཟང་སྙམ། རྒྱུ་མཚན་ལོ་འདི་ནང་དུ་བོད་མི་རིགས་ཀྱི་བསྟན་པ་ཆབ་སྲིད་ཀྱི་དོན་དུ་ཡོད་ཚད་བློས་བཏང་གནས་ནས་སྐུ་ལུས་རིན་ཆེན་མཆོད་མེ་སྒྲོན་གནང་མཛད་ཡོད། བོད་མི་རིགས་ཀྱི་དཔའ་བོ་དཔའ་མོ་ཁོང་རྣམས་ལ་བཀའ་དྲིན་རྗེས་དྲན་དང་སྐྱིད་སྡུག་མཉམ་མྱོང་མཚོན་ཆེད་དུ། དེ་བཞིན་ལོ་སར་གཞུང་འབྲེལ་དགུང་གསེང་ཉིན་གསུམ་དེ་ཡང་ད་ལོ་མ་གཏང་ནས་བོད་མི་རིགས་ཀྱི་ཆེད་དུ་ལས་འགུལ་ཞིག་སླེལ་ན་ཡག་པོ་མཐོང་གི་འདུག དེ་བཞིན་བཀའ་ཤག་གི་ལོ་འདི་ནི་གདུང་སེམས་མཉམ་སྐྱེའི་ལོ་ཞིག་ལ་ངོས་འཛིན་གནང་གི་ཡོད་ན་དེ་བཞིན་གདུང་སེམས་མཉམ་སྐྱེའི་ལོ་སར་མ་གཏང་ནས་ལས་དོན་བྱེད་དགོས་ན་དོན་སྙིང་ལྡན་འདུག་སྙམ།
ཐུ་བ་རྒྱ་མཚོ་ལེགས།
ཁྱེད་ཀྱི་བགྲོ་གླེང་ལ་བདག་དགའ། ང་ཙམ་དུ་མ་ཟད་སྔོན་གྱི་སྐྱེས་བུ་ས་པཎ་དང་། ཕྱིས་ཀྱི་སྐྱེས་བུ་དགེ་ཆོས་ལ་སོགས་པས་བོད་གཅིག་སྒྲིལ་འདོད་པས་ཆོས་སྐད་བཀོལ་བར་འབོད་འབོད་འབོད་དོ།
ཁྱེད་ཀྱི་ཁ་སྐད་དཔེར་ན། ༼ག་རེ་ཡོག་རེད།༽ཅེས་པ་དེ་བོད་རིགས་ཀྱི་མི་མངས་པོས་གོ་མི་ཐུབ་པ་མངོན་སུམ་ཚད་མས་གྲུབ་བོ།།
སྐུ་ཞབས་གནམ་གྱིས་བཤད་པ་ལ་དངོས་གནས་རྒྱུ་མཚན་དང་གནས་ལུགས་ཡང་དག་ལྡན་པ་ཞིག་རེད། སྤྱིར་རང་རེའི་བོད་ལ་གནའ་ནས་ད་བར་དུ་མྱ་ངན་བྱེད་སྲོལ་ཞིག་ཡོད་ལ། དེ་ཡང་བོད་མི་ཡོངས་ཀྱི་མགོན་སྐྱབས་སུ་གྱུར་བའི་སྐྱེ་ཆེན་དམ་པ་༸རྒྱལ་བ༸པཎ་ཆེན་ལྟ་བུ་ཞིག་ཡིན་ཚེ་མདོ་དབུས་ཁམས་གསུམ་གྱི་བོད་མི་ཡོད་དོ་ཅོག་གིས་ཉུང་མཐར་ཡང་ལོ་གཅིག་ཙམ་ལ་ལོ་སར་གཙོས་བའི་སྤྲོ་སྐྱིད་ཀྱི་བྱེད་སྒོའི་རིགས་གཏོང་སྲོལ་མེད་ལ། དེ་བཞིན་ལུང་ཚན་བྱེ་བྲག་པ་ཞིག་གི་བླ་ཆེན་མི་ཆེན་ཞིག་སྐུ་གཤེགས་ཚེ་ཡུལ་མི་རྣམས་ཀྱི་ལོ་གཅིག་ལྷག་ལ་སྤྲོ་སྐྱིད་ཀྱི་རིགས་གཏོང་སྲོལ་མེད། ཐ་ན་མི་ཚང་ཕལ་བ་ཞིག་གི་ནང་མི་སྤུན་མཆེད་ཅིག་གྲོངས་པ་ཡིན་ན་ཡང་མི་ཚང་དེ་དང་དེའི་གཉེན་ཉེ་ཚང་མས་ལོ་གཅིག་ལྷག་ཙམ་ལ་ལོ་སར་གཙོས་པའི་སྤྲོ་སྐྱིད་ཀྱི་རིགས་ནི་ཉིན་མོའི་སྐར་མ་ལྟར་གྱུར་ཡོད། དེའི་ཕྱིར་ལོ་སར་མི་གཏོང་བ་འདི་ནི་འདས་གྲོངས་སུ་གྱུར་བའི་གང་ཟག་དེ་ལ་གདུང་སེམས་མཉམ་སྐྱེད་དམ་མྱ་ངན་ཞུ་བའི་སྲོལ་རྒྱུན་གྱི་ཐུན་མིན་རིག་གཞུང་ཞིག་ཡིན་པ་ལས་སྤྲོ་བ་མཐའ་ཡས་ཀྱིས་བཤད་པ་ལྟར་ལོ་སར་མི་གཏོང་བ་ནི་དགྲ་དགའ་གཉེན་སྡུག་གི་བྱེད་སྟངས་ཤིག་དང་།རིག་གཞུང་མེ་སྲེག་གཏོང་བ་ཞིག་གཏན་ནས་མིན།ད་དུང་ཁོང་གིས་སྤོབས་པ་ཆེན་པོའི་སྒང་ནས་ལྷོ་ནུབ་མི་རིགས་སློབ་ཆེན་གྱི་བོད་རིགས་པའི་སྡེ་ཚན་གྱིས་ལོ་སར་གྱི་དུས་ཆེན་འདི་དང་བསྟུན་ནས་མི་རིགས་ལྔ་དྲུག་གི་སློབ་མ་བསྡུ་སྐོང་གིས་ལོ་སར་བཏང་རབས་ཤིག་བཤད་འདུག་སྟེ། དེ་ནི་ལོས་ཡིན། གང་ན་འགྲོ་སོང་མེད་པར་ཟ་འཐུང་མང་ན་དེ་ལ་མི་མང་འདུ་འཛོམས་བྱུང་བ་ནི་ངྷ་སའི་ཁོར་ཡུག་འདི་ནའང་ང་ཚོས་མིག་མཐོང་ལག་ཟིན་དུ་གྱུར་ཡོད་པ་མ་ཡིན་ནམ།གང་ལྟར་སྙིང་ལ་རུས་པ་དང་སེམས་ལ་མེ་ལོང་ཞིག་ཡོད་ན་ལོ་སར་གྱི་སྤྲོ་སྐྱིད་གཏོང་བ་འདི་ནི་རང་རེའི་བོད་ཀྱི་རིག་གཞུང་ཞིག་ཡིན་མོད། མི་གྲོངས་ཚེ་ལོ་སར་གཙོས་བའི་སྤྲོ་སྐྱིད་ཀྱི་རིགས་མི་གཏོང་བ་འདི་ཡང་ང་ཚོ་བོད་ཀྱི་ཐུན་མིན་རིག་གཞུང་ཞིག་ཡིན། དེ་བཞིན་བོད་དོན་དུ་རང་ལུས་མེ་སྲོག་བཏང་མཁན་རྣམས་ཀྱིས་བོད་མི་ཡོངས་ཀྱིས་ལོ་སར་མི་གཏོང་འདི་ནི་ཁོང་རྣམ་པའི་རེ་འདོད་མིན་པ་བདེན་ན་ཡང་ཁོང་ཚོས་བོད་དོན་དུ་རང་ལུས་མེ་སྲེག་གིས་འདས་གྲོངས་སུ་གྱུར་བ་འདི་ལ་ང་ཚོས་ལོ་སར་གྱི་སྤྲོ་སྐྱིད་གཏོང་མཚམས་བཞག་ནས་གདུང་སེམས་མཉམ་སྐྱེད་དང་མྱ་ངན་གུས་འདུད་ཞུ་བ་འདི་ནི་རིག་གཞུང་ཙམ་དུ་མ་ཟད། མི་བུ་ཞིག་གི་བཟང་སྤྱོད་ཅིག་དང་དཔའ་བོ་དཔའ་མོ་ཚོའི་དགོངས་བཞེད་དང་རྒྱལ་འགལ་དུ་སོང་བ་ཞིག་གཏན་ནས་མ་རེད་སྙམ།
་་་་་ དེ་ཡང་བོད་ཀྱི་ཆོས་སྒྲུབ་ཏུ་ཤོག་ཅེས་བོས་ན་ཡོང་མཁན་མང་པོ་མི་རྙེད། བོད་ཀྱི་ཆབ་སྲིད་ལས་འགུལ་ལ་ཞུགས་སུ་ཤོག་ཅེས་བོས་ན་དེ་ལས་ཉུང་ཞིག་ལས་ཞུགས་མཁན་མེད། བོད་ཀྱི་ལོ་གསར་ལ་ང་ཚོས་སྣེ་ལེན་བྱེད་ནུས་ན་ཕལ་ཆེར་འཛམ་གླིང་གི་མི་གྲངས་དུང་ཕྱུར་བདུན་ཅུ་བོ་ཡང་དགའ་བཞིན་སྤྲོ་བཞིན་དུ་བསྡུ་ནུས་པར་ཐག་ཆོད། ་་་་ཟེར།
ལོ་གསར་གཏོང་དགོས་ཀྱང་། སྤྲོ་སྐྱིད་གཏོང་དགོས་པའི་དོན་མིན།
ལོ་གསར་གཏོང་དགོས་ཀྱང་། མྱ་ངན་གུས་དུད་བརྗེད་དགོས་པའི་དོན་མིན།
རྒྱབ་སྐྱོར་གཙང་མ་ཡོད། ཆན་བུ་ཚང་མ་ཀློག་པའི་ཁོམ་པ་མ་བྱུང་འོན་ཀྱང་ལོ་གསར་གྱི་དགེ་མཚན་ཐད་ཁ་གསབ་ཕྲན་བུ་ཞུས་ན། སྤྱིར་ང་ཚོ་བོད་པ་ནི་གནམ་རྟོགས་ཆེ་ཞིང་ཡིད་ཆེས་ལྷ་ལ་གཅོལ་མཁན་གྱི་མི་རིགས་ཞིག་ཡིན་སྟབས་ང་ཚོའི་ཕ་ཡུལ་དུ་འདི་ལྟར་ཟེར་སྲོལ་ཡོད། གལ་སྲིད་ད་ལོའི་ལོ་གསར་ལ་ཁྱོད་མ་བདེ་བ་དང་མ་ལེགས་པའི་བྱ་བ་བྱུང་ཚེ་ལོ་དེའི་ནང་ཁྱེད་རང་བར་ཆད་ཡོད་པར་ངོས་འཛིན་ལ་ཡང་དེར་བཀྲ་ཤིས་པ་བྱུང་ཚེ་ལོ་དེར་བཀྲ་ཤིས་པར་ཡོང་བའི་རེ་བ་བྱེད་ཀྱི་ཡོད། ང་ཚོས་ཀྱང་ལོ་སར་པ་རྒྱས་པོ་ཞིག་བཏང་ཏེ་ལོ་དེའི་ནང་བོད་ཀྱི་བདེན་མཐའ་གསལ་བའི་རེ་བ་བྱེད་དགོས། ལོ་གསར་པའི་ཉིན་ང་ཚོས་མྱ་ངན་བྱས་ནས་སྡད་ན་ལོ་དེ་ཆ་ཚང་ཡང་མྱ་ངན་བྱས་སྡོད་མི་དགོས་པའི་ངེས་པ་མེད་དེར་རྟེན་ང་ཚོས་ལོ་གསར་གྲ་རྒྱས་ཞིག་བཏོང་རྒྱུ་ནི་རིགས་གཞུང་སྲུང་སྐྱོབ་ཡང་ཡིན་ལ་ལོ་དེའི་ནང་བྱ་ཞག་ལེགས་གྲུབ་ཡོང་བའི་བརྟེན་འགྲེལ་དང་རེ་བ་ཡང་ཡིན།།
སེམས་སྡུག་གིས་མནར་ཡོད་ན་ལོ་གསར་གྱི་སྤྲོ་སྐྱིད་གཏོང་མི་ཐུབ། སེམས་ལ་དགའ་ཚོར་ཆེན་པོ་ཞིག་བྱུང་ཡོད་ན་ལོ་གསར་གཏོང་། རྐང་པས་བྲོ་ཁྲོབ། ལག་པས་གར་བསྒྱུར། ཁ་ཡིས་གླུ་ལོངས་ཤིག། ང་ཡི་ཡུལ་ཆུང་དུ་གྲོང་པ་ཁྱིམ་མཚེས་ཀྱི་ནང་མིར་སྡུག་པོ་བྱུང་ན་གླུ་བྲོ་ལ་རོལ་རྒྱུ་ཕར་ཟད་རེད། རྣམ་འགྱུར་དགའ་སྣང་བཏོན་པའང་བྱེད་མི་སྲིད། ཅི་སྟེ་དེ་ལྟར་བཏོན་ཚེ་སྐྱིད་སྡུག་ནི་རེ་མོས་ཤིག་ཡིན་པ་ལས་རྟག་ཏུ་ཁྱིམ་ཚང་གཅིག་ལ་འཁོར་ཡོང་བ་ཞིག་གཏན་ནས་མིན། དཔེར་ན། སྤོབས་མཐའ་ལས་སོགས་ཀྱི་ཕ་མ་གང་རུང་འཆི་ལམ་བྱུང་བར་ངས་ཁྱེད་ཚོའི་སར་ཡོང་བསྡད་ནས་གླུ་གར་ལ་རོལ་ན་ཅི་བསམ་ས་རེད་དམ། སྐྱིད་སྡུག་མཉམ་སྤྱོད་ཟེར་བ་སྐྱིད་ན་སྐྱིད་མཉམ་དང་སྡུག་ན་སྡུག་མཉམ་ཁུར་བྱེད་པ་ལ་ཟེར་བ་མ་གཏོགས། རོ་ཐོག་ཏུ་བྲོ་འཁྲབ་ཚུལ་འདི་ནི་ཕ་རོལ་པོའི་མི་ལ་སྙིང་རྗེ་ཉམས་ང་སྤུ་ཙམ་ཅིག་ཀྱང་མི་བྱེད་པའི་རྟགས་མཚན་རེད། དེ་ལྟར་ན་སུམ་ཅུའི་དུས་དྲན་ལའང་དགའ་དགའ་སྤྲོ་བྱེད་ན་འགྲིག་གམ། མི་འདི་རིགས་རྟག་ཏི་བྱ་བརྒྱ་ཁ་ཤར་དུ་བསྟན་དུས་ཁོང་ཚོས་ཁ་ནུབ་ཏུ་སྟོན་གྱི་རེད།
རྒྱལ་ཁབ་གང་འདྲ་ཞིག་ཡིན་ནའང་དཔའ་བོ་དམག་མི་ལས་སོགས་དགྲ་ལག་ནས་འཆི་བ་སོགས་བྱུང་ཚེ་མྱ་ངན་ཞུས་ཏེ་རྒྱལ་ཁབ་ཀྱི་དར་ཆ་མར་ཕབས་པ་དང་ངག་བཅད་སྐར་ཆ་ཞུ་བ་ལས། སྐབས་དེར་རྒྱལ་དར་དགུང་ལ་འཕྱར་ཏེ་གླུ་གར་ལ་རོལ་པ་གོ་ཐོས་སུ་མེད་པ་ལོས་ཤེས།
རྒྱ་མིའི་འབོད་སྲོལ་ལྟར་མ་གུས་བའི་ཐ་སྙད་རང་སྲེགས་ཞེས་བར་བློ་ཕམ་ཡོད། དེ་མིན་ཞུ་ཡ་མེད།
ཁྱེད་རྣམ་པ་ངའི་ཁ་བརྡ་ལ་བསམ་ཚུལ་བཤད་མཁན་ཚོར་ཐུགས་རྗེ་ཆེ་ཞུ། ངའི་བསམ་ཚུལ་ལ་དགག་པ་རྒྱག་མཁན་ཁ་ཤས་བྱུང་འདུག་པ་དེ་ཚོར་ལན་ནི་གོང་གི་ངའི་སྐད་ཆ་དངོས་གཞིའི་ནང་དུ་བཤད་ཟིན་པ་འདྲ་བས་འདིར་བཤད་དགོས་པ་མི་འདུག ངས་ཁྱོད་ཚོར་ཁ་གསལ་པོས་ཤོད་ཀྱིན་ཡོད། ངའི་ཨ་ཕ་ཨ་མ་ཚུད་པའི་ནང་མི་སྤུན་ཡ་སུ་ཞིག་བོད་མིའི་སྤྱི་དོན་གྱི་ཆེད་དུ་ལུས་སྲོག་བློས་བཏང་ཐུབ་མཁན་ཞིག་བྱུང་ཡོད་པ་ཡིན་ན་ངའི་ནང་མིས་ལོ་གསར་རྒྱ་ཆེ་ཞིང་རྒྱས་སྤྲོས་ལྡན་པ་ཞིག་གཏོང་བར་ཐེ་ཚོམ་མེད། དེ་ངས་ཡང་ངས་ཡང་དུ་བཤད་བཞིན་ཡོད།
གོང་དུ་དཔྱོད་ལྡན་སྤྲུལ་སྐུ་དབང་ཆེན་ཞེས་པ་ཞིག་གིས་ང་ཚོས་རྒྱལ་ཁབ་དགྲ་ལག་ལ་བསྐྱལ་ཡོད་པས་ལོ་གསར་གཏོང་བའི་འོས་བབ་མེད་ཅེས་པའི་དོན་ཅི་ཡིན་ཤེས་མ་སོང་། ང་ནི་རྒྱལ་ཁབ་དགྲ་ལག་ལ་སྐྱེལ་མཁན་གྱི་གྲས་སུ་མེད། རྒྱལ་ཁབ་དགྲ་ལག་ལ་སྐྱེལ་མཁན་སུ་ཡིན་ན་དེ་ཚོར་ལོ་གསར་གྱི་འོས་བབ་མེད་ན་མ་གཏོགས་ཁྱོད་དང་ང་ཚོ་ལྟ་བུའི་ཉེས་མེད་ཚོས་ཅིས་ཕྱིར་ལོ་གསར་མི་གཏོང་།
བོད་མིའི་སྤྱི་དོན་ཆེད་དུ་སྐུ་སྲོག་ཤོར་མཁན་དག་ལ་མཚོན་ན་ལོ་རྒྱུས་ནང་གསེར་ཡིག་འབྲི་འོས་པའི་ཆེས་རླབ་ཆེན་གྱི་གཟི་བརྗིད་ཞིག་རེད། ཡིན་ཡང་ཤུལ་དུ་ལུས་པའི་བོད་མི་དག་ལ་མཚོན་ན་དེ་ནི་ཆེས་གྱོང་ཁ་ཆེན་པོ་ཞིག་ཏེ་དུས་ནམ་བསབས་མི་ཐུབ་པའི་གནས་སྟངས་ཡ་ང་བ་དང་ཡིད་མུག་དགོས་པ་ཤིག་རེད། དེའི་ཕྱིར་རླབས་ཆེན་གྱི་བྱ་བ་གང་འདྲ་ཞིག་གི་ཆེད་དུ་སུ་འདྲ་ཞིག་གི་སྐུ་སྲོག་ཤོར་ན་དེའི་རྗེས་ཤུལ་དུ་སྤྲོད་སྐྱིད་གཏོང་བ་ནི་ངོ་མ་འཛམ་གླིང་སྤྱིའི་སྲོལ་དང་མི་མཐུན་ལ། དེ་བཞིན་བོད་གངས་ཅན་པ་དག་གིས་དུས་རྒྱུན་ལྡན་མ་ནི་བགྲང་པ་བཞིན་བགྲང་བཞིན་པའི་ཡ་རབ་བཟང་སྤྱོད་དང་། ལས་རྒྱུ་འབྲས་སོགས་ཏེ་མདོར་བསྡུས་ན་དམ་པ་ལྷ་ཆོས་དང་འཇིག་རྟེན་མི་ཆོས་སོགས་གང་གི་ཐད་ནས་ཆེས་མི་འོས་པས་སྐྱུག་བྲོ་བས་བྱེད་སྟངས་ཤིག་ཡིན་པས་འདི་ལོའི་ལོ་གསར་གཏན་ནས་གཏོང་མི་རུང་ངོ་། །
ཁྱེད་དགའི་ཨུ་ཚུགས་ལ་ནང་མིའི་བདེ་སྡུག་དང་ཚེ་སྲོག་གིས་རྩེ་སྤྱད་བྱེད་པ་ནི་ཤིན་ཏུ་ནས་མི་འཐེད་དོ། མི་མ་ཡིན་ནོ། ཀླད་པ་ཡོད་པ་མ་ཡིན་ནོ། བློ་ཁོག་ཡོད་པ་མ་ཡོན་ནོ། ཨུ་ལོག་ཆེ་འོ། གང་ཐད་ནས་མི་འོས་སོ། དགྲ་བོད་དབྱིན་སོགས་ལ་ངོ་གནོང་ངོ། འཇིག་རྟེན་མི་ཆོས་དང་མི་མཐུན་ནོ། བཀྲ་མི་ཤེས་བའི་སྐད་དོ།
བློ་དང་ལྡན་པ་ཞིག་ཡིན་ན་འདས་སོང་དེ་དག་གི་ཤུལ་དུ་སྤྲོ་སྐྱིད་ལ་རོལ་རྒྱུ་ཞིག་སེམས་ལ་འཆར་དཀའ་མོད། ན་ནིང་ཆོས་ཀྱི་བྱེད་སྒོ་ལ་ཁ་གཡར་ནས་ལོ་སར་བཏང་བ་རེད། ད་ལོ་བོད་ཀྱི་རིག་གཞུང་ལ་ཁ་གཡར་ནས་ལོ་སར་གཏོང་འདོད་པ་དག་གི་སེམས་ཚོར་དེ་ཡ་མཚན་ཞིག་མིན་ནམ།
བསམ་ཚུལ་ཤོད་མཁན་བློ་ལྡན་པ་ཁག་ཅིག་གི་སྐད་ཆ་དེ་མདའ་འཕང་བ་ནང་བཞིན་ཐད་ཀར་དུ་འགྲོ་གི་མི་འདུག སྦྲུལ་ནུར་བ་ནང་བཞིན་གཡས་གཡོན་ལ་འཁྱོག་ནས་འགྲོ་གི་འདུག ལོ་གསར་གཏོང་དགོས་རེད་ཟེར་པ་དེ་བསམ་བཞིན་སྤྲོད་སྐྱིད་གཏོང་འདོད་ལ་ཁག་གཡོག་སྐྱོན་འདོགས་བྱེད་པ་ནི་བསམ་ཚུལ་འཁྱོག་པོ་ཅིག་རེད། རྣམ་དཔྱོད་དང་ལྡན་པ་ཞིག་ཡིན་ན་དེ་འདྲ་རང་མ་ཤོད། བོད་མི་རིགས་ཀྱི་རིག་གཞུང་གོམས་སྲོལ་མང་པོ་ཅིག་ལོ་གསར་དང་འགྲོགས་ནས་ཡོད་པ་ཚང་མས་མཁྱེན་མཁྱེན་པ་ལྟར། རང་གི་རང་ལ་དཔེ་ཅིག་བླངས་ན་ཧ་གོ་གི་རེད། བྱིས་པའི་སྐབས་སུ་ལོ་གསར་ལ་རེ་བ་ག་ཚད་ཅིག་ཡོད་པ་མ་རེད། ལོ་ཧྲིལ་པོའི་རེ་བ་ཕལ་ཆེར་ལོ་སར་ལ་བཅོལ་བ་འདྲ་ཞིག་ཡོད་རེད། དཔེ་བཞག་ན་ལོ་སར་མ་སླེབས་སྔོན་གྱི་ཟླ་གཅིག་ཟླ་གཉིས་སྔོན་ནས་ལོ་གསར་སླེབས་པར་ཉིན་མའི་གྲངས་ཀ་བགྲང་གི་རེད། དེ་འདྲ་བའི་བོད་ཕྲུག་བྱིས་པ་ག་ཚད་ཅིག་ཡོད་པ་རེད། ཚོད་དཔག་བྱས་ན་མ་མཐར་ཡང་བོད་ཕྲུག་བྱིས་པ་ཁྲི་ཁ་ཤས་ཡོད་ངེས་རེད། ལོ་གསར་མེད་པར་གཏོང་བ་ནི་བྱིས་པ་འདི་འདྲ་མང་པོའི་མགོ་ལ་ཁུག་མ་ནག་པོ་རེ་བསྐོན་ནས་ལོ་སར་མི་མཐོང་བར་བྱེད་པ་དང་ཁྱད་ཅི་ཡོད། མ་འོངས་སོན་རྩར་གྱུར་པའི་མི་རབས་གསར་པའི་བོད་ཕྲུག་བྱིས་པ་འདི་རྣམས་ཀྱི་ཆེད་དུ་འང་ལོ་གསར་ནི་ཅིས་ཀྱང་གཏོང་འོས་པ་ཞིག་རེད་ལ་གཏོང་དགོས་ངེས་ཞིག་ཀྱང་རེད། ཡིན་ན་ཡང་ལུགས་སྲོལ་དང་མི་མཐུན་པའི་ཐལ་དྲགས་པའི་འཆལ་སྤྱོད་རིགས་སྤང་གང་ཐུབ་བྱེད་དགོས་པ་དང་སྤང་ཐུབ་པ་ཅིག་ཡང་ཡིན་ཙང་ཁྲེལ་མེད་ཀྱི་བྱ་བ་དེ་འདྲ་བྱེད་མཁན་ཕལ་ཆེར་ཡོང་གི་མ་རེད་བསམ།
རྒྱ་ནག་གིས་སྤྱི་ལོ་༡༩༥༠ནང་ནས་བཟུང་བོད་ཀྱི་རིག་གཞུང་རྩ་མེད་བཟོས་ནས་མི་ལོ་ཉི་ཤུ་ཙམ་འགོར་ཡང་ཡུལ་སྲོལ་གོམས་གཤིས་ཉམས་མེད། དེང་སང་ལོ་གཅིག་དང་གཉིས་ལ་ལོ་སར་མ་ཐུབ་ན་བོད་ཀྱི་སྲོལ་རྒྱུན་རིག་གཞུང་ཉམས་འགྲོ་བའི་སེམས་ཁུར་བྱེད་པ་འདི་ཅི་ཡིན་པ་བླུན་རྨོངས་བདག་ལྟ་བུ་ལ་འཆར་དཀའ་བས་དྲ་གྲོགས་རྣམས་ཀྱིས་བདག་ལ་ལམ་སྟོན་གནང་རོགས་ཞུ།
རིགས་གཞུང་སྲེག་པ་ལ་དགའ་ན་་་་་ལོ་གསར་མ་བཏོང་རོགས་་་་་་་བོད་ཀྱི་རིགས་གཞུང་ཉམས་པ་ལ་དགའ་ན་ལོ་གསར་མ་བཏོང་རོགས་་་་་ནང་མིང་སྤུན་མཆེད་མཉམ་དུ་འཛོནས་པ་ལ་མི་དགའ་ན་་་་ལོ་གསར་མ་བཏོང་རོགས་་་་་་་འཛས་གླིང་རྒྱལ་ཁབ་གང་འདྲ་ཞིག་ཡིན་ཡང་ལོ་གསར་མ་བཏོང་པ་བྱུང་མྱོང་མེད་་་་་་་ལོ་གསར་བཏོང་ན་དགའ་་་་་
སྤྲུལ་སྐུ་དབང་ཆེན་དང་སྤོབས་མཐའ་ཅན་སོགས་ནས་རྐྱག་པས་རྐུབ་བཀྱག་ལྟར་རང་གིས་རག་བཀྱག་ནས་རང་ཡུལ་དགྲ་ལག་ཏུ་བསྐྱལ་མཁན་ཚོར་ལོ་གསར་གཏོང་བའི་འོས་བབ་མེད་ཀྱང་ང་ཚོར་ཡོད་ཅེས་སྲིན་བྱ་ཌྷུག་པའི་སྐད་ལྟར་རྒྱག་པ་ངོ་ཚ མི་ཤེས་པ་བོད་མིའི་ཞབས་འདྲེན་རེད། དགྲ་ལག་ཏུ་ཤོར་བ་ལས་བསྐྱལ་མཁན་སུ་ཡང་མེད། ལར་ནས་རྒྱ་དམག་ཐོག་མར་བོད་ས་གང་འཛུལ་བ་རེད། ཨེ་ཤེས། སྤྲུལ་དབང་འདི་ནི་རྒྱུན་དུ་ནས་རང་རེའི་བོད་གཞུང་ལ་ཞེ་ནས་སྡང་མཁན་དང་ཕྲག་དོག་ཅན་ཞིག་རེད་འདུག སྙིང་རྗེ་ཡས་རེད། ལྷག་པར་ཆོལ་ཁ གསུམ་བར་ཞེན་ཁོག་མེ་འབར་མཁན་ཞིག་ཀྱང་ཡིན་པ་ཁོ་པའི་ཡིག་ནག་དག་ལས་ཤེས་ནུས། བོད་ལ་ཤ་ཚ་མཁན་ཞིག་ཡིན་ན་ནང་ལོག་ལ་ཁ རྐྱང་རྐྱང་བཏང་ནས་བསྡད་ཀྱིན་རེད་པས། བོད་ཤ་ཚ་མཁན་ཞིག་ཡིན་གང་ཐུབ་ཀྱིས་མཐུན་སྒྲིལ་ལ་འབད་པ་མ་གཏོགས་མེས་པོ་གོང་མ་ཚོ་ལ་དམའ་འབེབས་བྱེད་སྲིད་དམ། ལུང་པ་མི་ལག་ཏུ་ཤོར་མི་མྱོང་བའི་རྒྱལ་ཁབ་གཅིག་ཧ་ལམ་ཡོད་མ་རེད་ཟེར་ནའང་ཆོག་པས་སྤྲུལ་དབང་གཟའ་རྒྱག་རྒྱུ་ཁྱོད་ཀྱིས་སྡུག་མིག་གིས་ལྟོས་དང་། ཡིན་ནའང་ཁོ་ཚོས་རང་གི་མེས་པོ་གོང་མ་དང་མི་རབས་གོང་མ་དང་ནང་ཁུལ་དུ་ཁ་རྐྱང་རྐྱང་བཏང་ནས་བསྡད་མཁན་སུ་འདུག
ལོ་གསར་གཏོང་རྒྱུ་ནི་་་་མི་ཚང་ཞིག་ལ་མཚོན་ཡང་ལོ་སྔོན་མར་མི་ཤི་བ་སོགས་བཀྲ་མི་ཤིས་པ་འདྲ་བྱུང་ཚེ་གཏོང་སྲོལ་མེད་པ་ནི་ཡབ་མས་ནས་བརྒྱུད་པའི་སྲོལ་རྒྱུན་གྱི་མིའི་སེམས་ཁམས་མཚོན་པའི་གོམ་གཤིས་བཟང་པོ་ཞིག་ཡིན་པ་དང་་་་་་ལོ་གསར་པ་དེའི་ནང་དུ་དེ་འདྲའི་རིགས་མི་ཡོང་ཆེད་རྟེན་འབྲེལ་སྒྲིག་པ་ཞིག་རེད་་་བོད་མི་རྣམས་མི་ཚང་གཅིག་མ་ཡིན་ཀྱང་འདས་ཟིན་པའི་དཔའ་བོ་དཔའ་མོ་རྣམས་ཀྱིས་རང་ལུས་མེ་བསྲེག་གཏོང་དགོས་དོན་ནི་ང་ཚོ་བོད་མི་ཡོང་ཀྱི་ཆེད་དུ་ཡིན་པས་་་ང་ཚོས་ཁོང་ཚོ་ལ་མྱི་ངན་དང་རྗེས་ཕྱོགས་ང་ཚོའི་དེ་འདྲས་རིགས་བྱེད་མི་དགོས་པར་རང་ས་རང་བདག་ཡོང་ཆེད་རྟེན་འབྲེལ་དགོས་རྒྱུ་ང་ཚོའི་སྲོལ་རྒྱུན་ནས་བྱུང་པའི་གོམ་སྲོལ་བཟང་པོ་དེ་མ་རེད་དམ།
ངོས་ལེན་ཞུ།
སྤོབས་པ་མཐའ་ཡས་ཟེར་བ་འདི་ལ་ཁ་བདེ་གི་ལབ་ན། ཚོད་ཟིན་གྱི་མི་འདུག བོད་མིས་སྐྱིད་སྡུག་མཉམ་མྱོང་བྱེད་མ་འདོད་ན་རང་དབང་རེད། ལོ་སར་རྒྱས་སྤྲོ་གནང་།