ཀླུ་སྨྱོན། (1939-1987) ཆོས་རྒྱམ་དྲུང་པ་རིན་པོ་ཆེས་ལོ་རབས་དྲུག་ཅུ་བའི་ནང་དབྱིན་ཡིག་ཏུ་བྲིས་པའི་ཁོང་གི་སྐུ་ཚེའི་སྟོད་ཀྱི་རང་རྣམ་བོད་དུ་སྐྱེས་པ་ཞེས་པ་ཞིག་ཡོད་པ་དེ་ཨ་མདོ་བ་དེང་སྐབས་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་པད་མ་དབང་རྒྱལ་གྱིས་བོད་ཡིག་ཏུ་གང་འཚམ་ཞིག་བསྒྱུར་ཡོད་ལུགས་ཐོས། ཁོང་གི་སྐུ་ཚེ་སྨད་ཀྱི་རྣམ་ཐར་ནི་ཁོང་གི་གསང་ཡུམ་སྒྲ་ཡ་ན་སྨུག་པོ་ལགས་ཀྱིས་ལོ་ཤས་གོང་བརྩམས་པའི་དེབ་རྒན་ འབྲུག་སྒྲ། ངའི་མི་ཚེ་ཆོས་རྒྱམ་དྲུང་པ་དང་ལྷན་དུ་ ཞེས་པ་ཞིག་ཡོད་པ་དེར་གཟིགས་ན་ལེགས། སྤྱིར་དྲུང་པ་རིན་པོ་ཆེ་འདི་བ་ཀརྨ་པ་སྐུ་ཕྲེང་བཅུ་དྲུག་པ་རིག་པའི་རྡོ་རྗེས་ངོས་འཛིན་གནང་པའི་སྤྲུལ་སྐུ་ཞིག་ཡིན་ཞིང་། ཁོང་གི་དགོན་པ་དེ་ནི་ཁམས་ཟུར་མང་བདུད་རྩི་དིལ་ཞེས་པ་དེ་རེད། ཁོང་གི་རྩ་བླ་གཅིག་ནི་གངས་ཤར་མཁན་པོ་ཞེས་པའི་སྐུ་ཚེ་དེ་ལ་རྟོགས་པ་བརྙེས་པའི་རྣལ་འབྱོར་བ་དེ་རེད། སྐྱབས་བཅོལ་ལ་ཕེབས་རྗེས་གོང་ས་མཆོག་ནས་སྐབས་དེའི་སྤྲུལ་སྐུ་ཆུང་ཆུང་ཚོའི་ཚོགས་པ་དེའི་དགེ་རྒན་དུ་བསྐོ་བཞག་གནང་འདུག ཨ་སྐོང་སྤྲུལ་སྐུ་དང་མཉམ་དུ་དབྱིན་ཡུལ་ལ་ཕེབས་ནས་སློབ་གཉེར་ཁྱུག་ཙམ་གནང་རྗེས་ཨ་རིར་ཕེབས། དང་པོར་ཝེ་ཐི་ནམ་དམག་འཁྲུག་ལ་རྒོལ་བའི་ཨ་རིའི་སྐྱིད་ཉལ་རིང་ལུགས་པ་HIPPIEཚོ་དང་མཉམ་དུ་རོ་སྙོམས་ཀྱི་སྤྱོད་པ་ཡང་གང་འཚམ་ཞིག་བསྐྱངས།