ཀླུ་སྨྱོན་ཧེ་རུ་ཀ
རྒྱལ་ཀུན་གསང་གསུམ་ནམ་མཁའི་ཀློང་དུ་ཐབས་ཤེས་རྡོར་དྲིལ་ཉི་ཟླའི་ཕྱག་རྒྱ་གཟུང་འཛིན་མུན་པའི་གཤེད་དུ་སྤྲོས།།
དག་པའི་སྣང་བར་སྒྱུ་འཕྲུལ་ཟློས་གར་གངྒྰའི་འགྲམ་དུ་ཅིར་ཡང་འཕྲུལ་པ་མཁས་གྲུབ་ནྰ་རོ་མཻ་ཏྲི་སོགས།།
རང་སྣང་དབང་སྡུད་གཞན་སྣང་ཟིལ་གནོན་སྒྲ་སྒྱུར་ཆེན་པོ་མར་པ་མི་ལ་སྒམ་པོ་པ་སོགས་སྒྲུབ་བརྒྱུད་ཆེ།།
གངས་རིའི་ལྗོངས་ན་མཁས་དང་གྲུབ་པའི་འཁོར་སྒྱུར་མི་ཡི་ཉི་མ་གང་དག་སྤྱི་གཙུག་ཅོད་པཎ་གདན་དུ་ལེན།།
སྔོན་བྱོན་ལོ་པཎ་གངས་རིའི་གདོང་ལྔ་འཇིགས་མེད་ཆོས་ཀྱི་ང་རོ་ཆེར་སྒྲོགས་ལྟ་ངན་རི་དྭགས་ཚོགས་ཀུན་འཇོམས།།
མ་རིག་མུན་པའི་གཡུལ་ངོ་མཐར་བྱེད་ཐོས་བསམ་སྒོམ་པའི་འོད་སྟོང་འབར་བ་གང་ཞིག་ཀུན་གྱི་སྙིང་གནས་པ།།
སྐྱོབས་པ་འཇིག་རྟེན་གསུམ་གྱི་མགོན་ཞེས་སྙན་པའི་རོལ་མོ་སྲིད་ཞིར་ཁྱབ་པ་གང་དེའི་ཁྲི་ལ་དབང་སྒྱུར་བ།།
འབྲི་གུང་གདན་རབས་སོ་བདུན་པ་གང་འཁྲུངས་སྐར་དཔྱིད་ཀྱི་དཔལ་མོའི་གླུ་དབྱངས་སྐྱེ་དགུ་དགའ་བའི་གསོས་སུ་ལེན།།
རྒྱལ་རིགས་སྰ་ལ་ཆེན་པོའི་མཚོ་རུ་ཐུགས་བསྐྱེད་བསོད་ནམས་མནྡྷ་རས་བསྲུབས་ལུང་རྟོགས་ཉི་ཟླའི་འོད་རླབས་འབར།།
མཁྱེན་བརྩེ་ནུས་པའི་དཀྱིལ་འཁོར་ཡོངས་རྫོགས་ཐོས་བསམ་སྒོམ་པའི་མཁའ་རུ་རྩེན་ཅིང་མཁས་བཙུན་བཟང་པོའི་བཅུད་ཀྱིས་གཏམས།།
གནའ་དེང་རིག་པའི་ཤེས་བྱའི་ཕ་མཐའ་གུས་རྟག་བརྩོན་པའི་རླུང་གིས་བསྐྱོད་ཅིང་གདུལ་བྱའི་པད་ཚལ་རྒྱས་མཛད་པ།།
གང་ཁྱེད་འགྲོ་བའི་ཉེར་འཚོའི་རྟེན་དུ་རྫོགས་ལྡན་སྐྱ་རེངས་གསར་པས་ལེགས་དྲངས་ཨེ་མ་བདག་ཅག་སྐལ་བ་བཟང་།།
མཚན་ལྡན་བཤེས་གཉེན་དུ་མས་རྗེས་བཟུང་སྒྲུབ་བརྒྱུད་གདམས་པའི་བདུད་རྩི་ལ་རོལ་སྒྲུབ་པའི་རྒྱལ་མཚན་མཐོན་པོར་བསྒྲེངས།།
དུས་འགྱུར་ཡོ་ལངས་དྲག་ཏུ་འཕྱུར་ཡང་དམ་པའི་རང་བཞིན་རྡོ་ཡི་རི་མོ་རྐྱེན་ངན་ཆར་ཆུས་འཇིག་པ་མེད།།
ཕྱག་རྒྱ་ཆེན་པོའི་ལྟ་བའི་ཀློང་དུ་བདེ་སྡུག་ལས་འབྲས་སྒྱུ་མའི་གཟུགས་བརྙན་དྲི་བྲལ་ཐུགས་ཀྱི་མེ་ལོང་ངོར།།
ལག་མཐིལ་རྫས་བཞིན་ཆུ་ནང་ཟླ་བའི་ཟློས་གར་མ་ངེས་ཅི་ཡང་སྒྱུར་བའི་རང་བཞིན་རོལ་བའི་ཏིང་འཛིན་བསྟེན།།
རྒྱལ་སྲས་བྱང་ཆུབ་སེམས་དཔའ་ཆེན་པོའི་ཐུགས་བསྐྱེད་དམ་བཅའ་དུས་སུ་སྨིན་ཚེ་ཧི་མ་ལ་ཡ་འཕྲེད་ཀྱིས་བཅད།།
འཕགས་ཡུལ་ཆོས་ཀྱི་ཞིང་ས་ཆེན་པོར་བཀྲ་ཤིས་མཚན་མས་ཀུན་ནས་མཛེས་པའི་ཞབས་མཐིལ་འཁོར་ལོའི་རི་མོ་བཀོད།།
རིས་མེད་བཤེས་གཉེན་གངས་ཀྱི་རི་ལས་དམ་ཚིག་གཙང་མའི་སྒྲ་དབྱངས་དང་བཅས་ལྷུང་ལྷུང་བབས་པའི་བདུད་རྩི་བཞེས།།
ནུབ་གླིང་ཡུལ་དུ་འཁོར་བའི་བདེ་སྡུག་སྒྱུ་མའི་སྨྱུ་གུས་འདོད་དགུར་འབྲི་བའི་མ་ངེས་ཟློས་གར་ཡང་དག་གཟིགས།།
སྣ་ཚོགས་སྐད་དང་རིག་གཞུང་དག་ཀྱང་ཅུང་ཟད་འབད་པས་ཐུགས་སུ་ཆུད་དེ་ཤེས་བྱའི་སྒོ་མོ་ཕྱོགས་སུ་ཕྱེས།།
ཤར་ནུབ་ལོ་རྒྱུས་རིག་གཞུང་གླེགས་བམ་བྲག་རིའི་ཟོལ་དུ་བརྩིགས་པའི་འཁྲིས་སུ་ཁྱོད་ཡོན་མཚོ་མོ་དགུང་དུ་འཕྱུར།།
སྐུ་ཕྲེང་གོང་མའི་རྣམ་ཐར་ཙམ་གྱིས་ཆོག་ཤེས་མ་གནང་སྐུ་ཚེ་འདི་ཉིད་མཁས་གྲུབ་གོ་འཕང་ཆེན་པོར་གཤེགས།།
བསྟན་པའི་རྩ་བ་འདུལ་བའི་སྡེ་ཆེན་བཤད་སྒྲུབ་ཆོས་ཀྱི་འཁོར་ལོའི་གཟི་འབར་དགོན་སྡེ་ཆེ་ཆུང་འཛུགས་སྐྲུན་མཛད།།
ཐོས་བསམ་སློབ་གཉེར་ཕྱིར་བལྟས་མ་སོང་སྒྲུབ་པའི་བཀའ་བབ་སྒོམ་ཆེན་བཞུགས་སའི་རི་སུལ་རས་པའི་སྒྲུབ་ཁང་བཞེངས།།
ཕྱི་ནང་ཐུན་མོང་ཐུན་མིན་རིག་པའི་གཞུང་ལུགས་ཀུན་ལ་སློབ་གཉེར་བྱེད་སའི་སྲོང་བཙན་དཔེ་མཛོད་ཁང་ཆེན་བསྐྲུན།།
གངས་རིའི་ལྗོངས་ཀྱི་ཉི་ཟླ་སྐར་གསུམ་རྒྱལ་བློན་སེམས་དཔའི་མཛད་འཕྲིན་མེ་ལོང་དེབ་ཐེར་བཙན་པོའི་རྒྱལ་རབས་བརྩམས།།
སྣོད་བཅུད་དགེ་བའི་ཐབས་ལམ་ཉག་གཅིག་ཤིང་འཛུག་ཁོར་ཡུག་གཙང་སྦྲ་ལ་སོགས་སྐྱེ་དགུའི་སྲོག་གི་གསོས་སུ་བཞུགས།།
འཛམ་གླིང་ཤར་ནུབ་གདུལ་བྱའི་ཚོགས་ལ་ཐེག་གསུམ་རྒྱུད་སྡེ་བཞི་ཡིས་བསྡུས་པའི་མདོ་སྔགས་ཆོས་ཀྱི་ཆར་ཆེན་ཕབས།།
ཆེ་རྒུ་ཀུན་གྱི་གཙུག་ན་མཛེས་ཀྱང་ཞི་དུལ་བག་ཡོད་སྤྱོད་པར་གནས་པས་བསླབ་གསུམ་རྒྱ་ལས་འདའ་བ་མེད།།
འདུ་བ་རྣམ་གསུམ་མཚོ་ལྟར་འཕྱུར་ཀྱང་འདོད་ཡོན་ཟང་ཟིང་དུག་ལྟར་གཟིགས་པས་སྒྱུ་མའི་དངོས་ལ་ཆགས་ཞེན་མེད།།
ཕྱི་རུ་ཉན་ཐོས་ནང་དུ་བྱང་སེམས་གསང་བ་སྔགས་ཀྱི་ཐུགས་དམ་ཟབ་མོར་ཉིན་མཚན་དུས་དྲུག་གཞོལ་བའི་མགོན།།
སྤྱི་དང་བྱེ་བྲག་རྒྱལ་བའི་བསྟན་པ་ཁྱད་པར་སྒྲུབ་བརྒྱུད་འབྲི་གུང་བ་ཞེས་བཤད་སྒྲུབ་རྒྱུན་བཟང་མ་ཉམས་པ།།
འདི་ཉིད་འཛམ་གླིང་ཕྱོགས་མཐར་ཁྱབ་ཅིང་སྐྱེ་རྒུ་འཁོར་བའི་མཚོ་ཆེན་ཀློང་ནས་ཐར་བའི་སྐམ་སར་མ་ཕྱིན་བར།།
མགོན་ཁྱེད་ཞབས་པད་གསེར་གྱི་རྩིབས་སྟོང་སྲིད་ཞིའི་མཁའ་རུ་ཐོགས་མེད་འཕགས་ཏེ་ཇི་སྲིད་བསྐལ་པ་མ་སྟོངས་བར།།
བསྟན་དང་འགྲོ་བའི་མགོན་དཔུང་གཅིག་བུར་རྡོ་རྗེའི་ཁྲི་ལ་བཞུགས་པར་འཚལ་ཞེས་གསོལ་འདེབས་སྙན་ངག་འདི་འབུལ་ལོ།།
མེ་ཏོག་ཆུང་ཡང་ལྷ་ཡི་རྫས་དང་གུར་གུམ་ཉུང་ཡང་སྨན་གྱི་རིགས་སུ་མགོན་པོ་ཁྱེད་ཀྱིས་ལེགས་གཟིགས་ཏེ།།
ད་དུང་འཁོར་བའི་ཕྱི་མཐའ་བར་དུ་ཐུགས་བསྐྱེད་དམ་བཅའི་མདུད་རྒྱ་མ་ལྷོད་སྐུ་གཟུགས་ཚེ་ལྷའི་ངོ་བོར་བཞུགས།།
ཟབ་རྒྱས་ཆོས་ཀྱི་གདམས་པ་དཔག་ཡས་འཆད་རྩོད་རྩོམ་པའི་དཔལ་ལ་དབང་འབྱོར་གསུང་སྙན་ཚངས་པའི་དབྱངས་སུ་བཞུགས།།
ཐོས་བསམ་སྒོམ་པའི་གཏིང་མཐའ་ཟབ་ཅིང་རིམ་གཉིས་ཟེགས་མའི་རྩེ་དགའ་འཕྱུར་བའི་ཐུགས་དགོངས་རྒྱ་མཚོའི་ངོ་བོར་བཞུགས།།
ཞེས་པའི་སྙན་ངག་ཤོ་ལོ་ཀ་སྟོབས་བཅུའི་གྲངས་ལྡན་འདི་ཡང་། དཔལ་རྒྱལ་བ་འབྲི་གུང་བའི་༧ སྐྱབས་མགོན་ཆེན་པོ་དཀོན་མཆོག་བསྟན་འཛིན་ཀུན་བཟང་ཕྲིན་ལས་ལྷུན་གྲུབ་དཔལ་བཟང་པོ་མཆོག་གི་དགུང་གྲངས་དོན་ལྔའི་སྐུའི་འཁྲུངས་སྐར་འཆར་ལ་ཉེ་བའི་དུས་སུ། ལུང་རྟོགས་ཡོན་ཏན་དུ་མས་ཐུགས་རྒྱུད་གཏམས་ཤིང་། སྤྱི་ཚོགས་ཞབས་ཞུ་སོགས་ཕྱི་ནང་གི་མཛད་སྤྱོད་ཁྱད་དུ་འཕགས་པའི་འབྲི་གུང་བླ་མ་མགོན་པོ་རྡོ་རྗེས་གསུང་སྐུལ་བཞིན། དུས་མཐའི་སྙན་ངག་པའི་གྲལ་མཇུག་པ་སྤྲུལ་སྐུ་ཆོས་དབྱིངས་ཡེ་ཤེས་སམ་སྔགས་བཙུན་ཀླུ་སྨྱོན་ཧེ་རུ་ཀས་དང་བའི་བློས་སྦྱར་བ་དགེ་ལེགས་འཕེལ།།
སྤྱི་ལོ་ ༢༠༢༠ ལོའི་ཟླ་ ༧ ཚེས་ ༡༠ ལ།
རྡོ་རྗེ་འཆང་དང་གྲུབ་ཆེན་ཏི་ལོ་པ།
མར་པ་མི་ལ་མཉམ་མེད་དྭགས་པོ་སོགས།།
ཉམས་ལེན་བྱིན་རླབས་བརྒྱུད་ཀྱི་བླ་མ་རྣམས།།
བདག་སྙིང་ཆོས་ཀྱི་འཁོར་ལོའི་མགྲོན་དུ་བསུ།།
ཀླུ་སྨྱོན་ལགས།རྗེས་སུ་ཡི་རང་ཞུ།ཚིག་སྙན་པོ་དང་དོན་འཐད་པོ་ཞིག་བྲིས་འདུག་སྙམ།
ཀླུ་སྨྱོན་སྙན་ངག་གི་རྟ་རྒོད་དེ་ཆོས་བརྒྱད་སྒྲོག་གིས་ཐུལ་བས་བོང་གུ་ལྟར་གྱུར།
རྡོ་རྗེ་འཆང་དང་གྲུབ་ཆེན་ཏི་ལོ་པ། །
ན་རོ་མར་པ་མི་ལ་དྭགས་པོ་སོགས། །
ཉམས་ལེན་བྱིན་རླབས་བརྒྱུད་པའི་བླ་མ་ཡིས། །
བདག་གི་སྙིང་ལ་གྲུབ་ཆོས་བྱིན་གྱིས་རློབས། །
་
ཆོས་རྒྱལ་མར་པ་རྒྱལ་སྲས་དར་མ་མདོ། །
ཏི་ཕུ་པ་དང་རས་ཆུང་རས་ཚོགས་དང་། །
འབྲི་གཡུང་སྐྱོབ་པ་མགོན་གྱི་བརྒྱུད་འཛིན་པ། །
འབྲི་གུང་༸སྐྱབས་མགོན་སྐུ་ཚེ་ཡུན་བརྟན་ཤོག །
བཙན་བྱོལ་ན་ཀླུ་སྨྱོན་ལས་ལྷག་པའི་སྙན་ངག་མཁན་ཧ་ཅང་ཉུང་ཉུང་རེད། དྲ་འབུ་ཚོའི་ནང་ན་ཨ་ཅང་ཅང་།
རྡོ་རྗེ་འཆང་ཆེན་ཏེ་ལོ་ནཱ་རོ་དང་།།
མར་པ་མི་ལ་ཆོས་རྗེ་སྒམ་པོ་པ།།
ཕག་མོ་གྲུ་པ་རྒྱལ་བ་འབྲི་གུང་སོགས།།
བཀའ་བརྒྱུད་གོང་མ་རྣམས་ལ་གསོལ་བ་འདེབས།།
རིགས་རུས་གཙང་ཞིང་ལྷ་ལྡན་ཡུལ་དུ་འཁྲུངས།།
ཕྱི་ནང་རིག་པའི་གཞུང་ལུགས་མཐའ་དག་སྦྱངས།།
ལྷག་པར་རྒྱལ་བ་འབྲི་གུང་བསྟན་འདི་ཉིད།།
ཤར་ནུབ་ཡོངས་ལ་སྤེལ་མཛད་ཁྱེད་ལ་འདུད།།