གཞུང་པ་ཚེ་དབང་བསོད་ནམས་།
ཀ་ཁ་སྤྱི་བོར་བཀུར་ནས་ཀ་བཤད་བྲིས།།
ཁ་སྐད་བོད་སྐད་རྒྱབ་ནས་ཀ་བཤད་སྤེལ།།
ག་པར་གནས་ཀྱང་བོད་སྐད་བོད་ཡིག་ཟབ།།
ང་ཚོའི་སྐད་ཡིག་ང་ཚོའི་བདག་པོ་རྒྱོབ།།
ཅ་ཅོ་མ་མང་ཆོལ་གསུམ་ཆིག་སྒྲིལ་བརྟན།།
ཆ་ལུགས་མ་འཆོལ་ཕ་མེས་རིག་གཞུང་སྲུངས།།
ཇ་ཆང་ལོངས་སྤྱོད་ཕ་མེས་བསྟན་པའི་ཟས།།
ཉ་ཕག་སྒོང་གསུམ་སྡིག་ཟས་སྐྱུར་ན་དགའ་།།
ཏ་ཐཱ་ག་ཏའི་བསྟན་ལ་འཇུག་འདོད་ན་།
ཐོས་བསམ་སྒོམ་གྱི་དར་ཆེན་སྒྲེངས་ན་དགའ་།
དམ་ཆོས་བདུད་རྩི་མཐར་ལམ་སྟོན་པའི་ཆོས་།
ན་གསོ་དར་དུས་ནང་ཆོས་ཉམས་ལེན་ཟབ་།
པ་ཏྲའི་རི་མོ་བོད་མིའི་སྒྱུ་རྩལ་ལ།།
ཕ་མའི་རིག་གཞུང་རྒྱུན་འཛིན་བུ་ཕྲུག་འགན།།
བུ་རབས་ཚ་རྒྱུད་ཕ་མས་སྐད་རིག་སྲུངས།།
མ་འོངས་བོད་ཀྱི་སོན་རྩ་ན་གཞོན་ཚོ།།
རྩ་བ་བརྟན་པའི་རང་གི་སྐད་ཡིག་ལ།།
ཚ་གྲང་མ་འཛེམས་ཉིན་མཚན་མེད་པར་སྦྱོངས།།
ཛ་དྲག་ཆེ་བའི་དུས་རབས་ཉེར་གཅིག་འདིར།།
ཝ་སྤྱང་དམར་པོའི་བོད་ཀྱི་བསྟན་སྲིད་སྣུབ།།
ཞ་མོ་འཐོམ་ཞ་གྱོན་ནས་གཞན་སྐད་སྦྱངས།།
ཟ་འཐུང་ལོངས་སྤྱོད་ཆེད་དུ་གཞན་སྐད་སྦྱངས།།
འ་ར་འུར་རེའི་ངང་ནས་མི་ཚེ་རྫོགས།།
ཡ་རབས་ངོ་ཚ་བཟང་སྤྱོད་མིང་ཙམ་ལྷག།
ར་བ་གངས་རིའི་བསྐོར་བའི་ཆོས་ལྡན་ཞིང་།།
ལ་ལུང་ས་མཐར་གནས་ཀྱང་བརྗེད་མི་ཉན།།
ཤ་ཚ་ཡོད་ན་རང་ཡུལ་རང་མི་སོམས།།
ས་ཆ་འདི་ནི་མི་ཡུལ་གནས་ཚང་རེད།།
ཧ་ལོ་ཧ་ལོ་ལབ་ནས་མི་ཡུལ་ལྷག།
ཨ་ཁ་ཨ་ཁ་ལབ་ནས་དུས་ཚོད་རྫོགས།།
གཞུང་པས། ༢༠༢༡ / ༡༢ / ༡༨
ཀ་བཤད་ལེགས་བྲིས་གནང་འདུག་
ཀ་དག་གདོད་མ་ཉིད་ཅེས་མ་འགྲེལ་རོགས།།
ཁ་བ་གངས་ཅན་ཞེས་སུ་མ་གསུང་ཞིག།
ག་ནས་བཤད་བཤད་རང་གི་ལག་པ་རེད།།
ང་ཚོའི་ཁ་ལ་བདག་པོ་མེད་འདི་མཚར།།