གཞུང་པ་ཚེ་དབང་བསོད་ནམས།
ཀ་དག་ཕྱག་རྒྱ་གངས་ཅན་མགོན་པོ་བསྟན་འཛིན་རྒྱ་མཚོ་ཞི་བདེའི་མགོན།
ཁ་བ་རི་པའི་འདི་ཕྱིའི་མགོན་པོའི་ནོ་ཝེལ་ཞི་བདེའི་གཟེངས་རྟགས་བཞེས།
ག་ནས་བསམ་ཀྱང་སྟོན་པ་གཉིས་པ་དུས་རབས་ཉེར་གཅིག་སྐྱེ་འགྲོའི་མགོན།
ང་ཚོ་བོད་མིའི་ལས་སྨོན་བཟང་པོ་སྤྱན་རས་གཟིགས་ཀྱིས་འདུལ་བྱར་སྐྱེས།
ཅ་ཅོ་མང་བའི་འཛམ་གླིང་མི་མང་སེམས་རྒྱུད་འདུལ་བའི་ཆོས་སྦྱིན་གནང་།
ཆོས་ལུགས་རིས་མེད་འཆམ་མཐུན་འོག་ཏུ་རང་རང་ཆོས་རྒྱུད་ལྟ་གྲུབ་སྲུང་།
ཇ་ཐུན་གཅིག་ལའང་སྐུ་ངལ་མི་གསོ་གཞན་ཕན་གསུང་ཆོས་ཉིན་ལྟར་གནང་།
ཉ་ཕག་ལ་སོགས་སེམས་ཅན་ཤ་ཡིས་ཉེས་དམིགས་ཀུན་ལ་རྟག་ཏུ་སྡོམ།
ཏ་ལའི་བླ་མ་སྐུ་ཕྲེང་རིམ་བྱོན་གངས་ཅན་བོད་ཀྱིས་ལྷ་སྐལ་བྱོན།
ཐ་མག་ནག་པོ་བཟི་སྨན་སྨྱོ་ཆུ་རྟག་ཏུ་དོར་བའི་བསྐུལ་མ་གནང་།
ད་ལྟའི་དུས་རབས་ཉེར་གཅིག་འདི་ལ་ཞི་བདེའི་དེད་དཔོན་༧ གོང་ས་མཆོག
ན་གཞོན་ཕོ་མོ་རྒྱལ་ཁབ་སྐྱོང་བའི་མ་འོངས་སོན་རྩའི་ཐུགས་སྨོན་མཛད་།
པ་ལྕོག་ཅན་གྱི་སྡེ་གཞུང་སྐུ་དྲག་ཛ་དྲག་ཆེ་དུས་༧ གོང་ས་མཆོག
ཕ་ལམ་འདྲ་བའི་དགོས་འདོད་ཀུན་འབྱུང་བོད་མིའི་མགོན་སྐྱབས་གངས་ཅན་མགོན།
བོད་འབངས་བདེ་སྐྱིད་ཁྱེད་ཀྱི་སྐུ་ཚེ་རྡོ་རྗེའི་ཁམས་སུ་བརྟན་པ་ཤོག
མ་འགྱུར་སེམས་ཅན་འཁོར་བའི་མཚོ་ལས་འདྲེན་པའི་ཤིང་རྟ་སྤྱན་རས་གཟིགས།
ཙ་ཆུ་འཛོམས་པའི་བོད་ཡུལ་ལྷ་ཡུལ་ས་ལ་འཕོས་འདྲའི་ཞིང་ཁམས་སུ།
ཚ་གདུང་སེལ་བའི་ནང་ཆོས་སྙིང་པོ་དུས་ཀྱི་འཁོར་ལོའི་དབང་ཆེན་གནང་།
ཛ་དྲག་རྐྱེན་ངན་བོད་ལ་འཕྲད་སྐབས་མཐུ་སྟོབས་ནུས་པས་འཕགས་ཡུལ་བྱོན།
ཝ་མོ་འདྲ་བའི་ཀླ་ཀློ་གུང་ཁྲན་ཅི་བྱ་གཏོལ་མེད་ངང་དུ་ལྷག །
ཞ་སེར་བསྟན་པ་འཛིན་པའི་ཚོགས་དབུས་ལྷ་རམ་དགེ་ཤེས་དམ་བཅའ་ཕུལ།
ཟ་ཧོར་ཡུལ་དང་ཆེན་པོ་ཧོར་སོགས་ཕྱི་གླིང་རྒྱལ་ཁམས་ཆོས་ལ་གྱུར།
འུ་ཅག་བོད་རིགས་མགོན་པོ་གང་གི་ཐུགས་སྐྱེད་དམ་བཅའི་འོག་ཏུ་འཚོ།
ཡ་རབས་བཟང་སྤྱོད་བོད་མིའི་རིག་གཞུང་གསོན་པོར་གནས་པའི་ལམ་སྟོན་གནང་།
ར་བ་གངས་རིའི་བསྐོར་བའི་ལྷ་ཡུལ་སྤྲེལ་ཚའི་རིགས་རྒྱུད་འཚོ་བའི་གནས།
ལ་ལུང་ཐམས་ཅད་བདག་མེད་སྲོག་ཆགས་རི་ལུང་རྩ་ཚིག་འོག་ཏུ་འཚོ།
ཤ་བ་གླ་བ་རི་དགས་རྩོད་འབྲོང་ཙ་ཆུ་འཛོམས་པའི་བོད་ཡུལ་གནས།
ས་ཕྱོགས་བོད་ཡུལ་འཛམ་གླིང་ས་ཡིས་་ཞི་བདེ་ལྷིངས་འཇགས་ལྷ་ཡུལ་འདྲ།
ཧ་ཅང་སྙན་གྲགས་ཆེ་བའི་ནོ་ཝེལ་ཞི་བདེའི་གཟེངས་རྟགས་བཅུ་གཉིས་བཅུ།
ཨ་ཀ་མ་བཞེས་དཔལ་ལྷའི་ལུང་བསྟན་ཞི་བདེའི་དེད་དཔོན་ཆེན་པོར་མདུད།