རྔ་བ་རྒྱལ་ཁམས་པ།
སྣ་ཚོགས་ཚོན་ལྡན་དར་གྱི་ཤམ་བུ་ལྕི་བསེར་རླུང་གིས་ལྷབ་ལྷུབ་བསྐྱོད།།
གཟབ་འཕྱོར་སྤྲས་པའི་ཕྱོགས་ཕེབས་མགྲོན་དག་གར་གྱི་འདུ་རྭ་ཟླུམ་པོར་བསྐོར།།
མདོ་འཛིན་པ་ཡི་ཟབ་སྙན་གླེང་བསླངས་རྣ་ལམ་དག་ཏུ་འོང་བ་ན།།
དགའ་སྡུག་མས་མིག་མཐའ་བརླན་ཞིང་ལ་རྒྱས་སྙིང་ཁམས་དྲག་ཏུ་ལྡང་།།
གླུ་གར་རྩེད་འགྲན་རྫོགས་ཐེངས་རེ་ལ་རིས་ཆད་ཐལ་སྐད་ལྡབ་ལྡིབ་གྲགས།།
ཆེ་ཆུང་གོ་བཟློག་བསྟོད་ཚིག་དག་གིས་སེའུ་བཅུའི་བློ་ཡི་གཤིས་ཤིག་བསྟན།།
སྒམ་ཚུགས་ཅན་གྱི་བགྲེས་གཞོན་ཁག་ཅིག་དོན་སྙིང་མེད་ཅེས་འཁང་ར་བྱེད།།
ཐ་དད་བློ་ཡི་འཁྱེར་སོ་གཉིས་ལ་གདོང་མར་རྣམས་ཀྱི་ལངས་ཕྱོགས་བགྲངས།།
སྙན་འཇེབས་ཀླུ་གར་རོལ་མོའ་སྒྲ་དག་དར་དིར་སྒྲོག་པའི་འགྱུར་ཁུག་ཁྲོད།།
སྡེ་བཞིས་མཉམ་བསྡེབས་གར་གྱི་སྟངས་སྟབས་དགའ་འཁྱིལ་ནོར་བུའི་རི་མོའི་གཟུགས།།
ནམ་ཡང་མི་འགྱུར་འཐབ་ཕྱོགས་གཅིག་གྱུར་རྡོག་རྩ་དམ་པོར་སྒྲིལ་ཅིག་ཅེས།།
ལྷ་རྫས་རྦ་རླབས་མཁའ་ལ་འཕྱོ་བ་ཕུགས་འདུན་བསུ་བའི་དགའ་སྟོན་ཅིག།
ལྷ་གཉན་གསོལ་བསྟོད་བསང་གི་དུད་སྤྲིན་ནམ་མཁའི་དབྱིངས་སུ་ལྷོག་ལྷོག་འཕྱུར།།
དགྲ་ལྷ་དཔུང་བསྟོད་ཀི་བསྭོའི་འབོད་སྒྲས་རང་འདོད་འགྲུབ་པར་འཕྲིན་བཅོལ་ཞུས།།
ཁྲི་ལྡན་ཅང་ཤེས་བང་ཁ་འཐབ་ལས་ས་རྡུལ་དམར་པོའི་མཆོད་ཁ་འཕངས།།
ལུང་ཕྲན་ཁུག་ཅོག་དོག་མོའི་ནང་ན་མནོག་ཆུང་འཐེན་འཁྱེར་ཀླད་ཀ་ཆེ།།
རྒྱལ་བ་སྐུ་ཚེ་ཞབས་པད་རབ་བརྟན་དགོངས་བཞེད་ལྷུན་གྲུབ་མྱུར་དུ་ཕེབས།།
ཤ་རུས་གཅིག་པའི་བོད་རིགས་སྤུན་ཟླ་མཛའ་མཐུན་དཔུང་གདེངས་གཅིག་ཏུ་བསྒྲིལ།།
ལུགས་ཟུང་ཆོས་མཐུན་ཞི་བདེའི་དཔལ་ལ་མགྱོགས་མྱུར་རོལ་བར་ཤོག་ཅིག་ཅེས།།
ལས་གཤིས་ཁྲོས་པའི་ཞལ་སྒོའི་ཁ་ན་སྙིང་སྟོབས་ཅན་དག་ཤིས་ཚིག་བརྗོད།།
བློན་ཚང་སྡེ་བའི་གླུ་གར་འཁྲབ་སྟོན་རྩེ་ཕུད་བྱུང་ཞེས་མགྲོན་དག་སྨྲ།།
ཁ་ཤྰི་ཡུལ་སྡེའི་རྒྱན་དང་ཆས་གོས་སྤུས་ཀ་བཟང་བར་ཡོངས་སུ་གྲགས།།
ཐྰ་ར་བ་དག་སྒྲིག་ལམ་རལ་བྱས་ཞེ་སྡང་ཕྲག་དོག་ཆེ་རབས་བཤད།།
དགའ་ཉེ་ཕྱོགས་འཐེན་བཤད་རྒྱུ་མང་བས་དོན་དངོས་གང་བདེན་གསལ་བོ་མེད།།
ཟུར་མཆན། ཡི་གེ་འདི་གོ་བརྒྱད་ལོ་ང་རང་ཕ་ཡུལ་དུ་བསྐྱོད་སྐབས་ཀྱི་དངོས་དོན་གནས་ཚུལ་ཞིག་ཡིན། ང་དངོས་སུ་སྐབས་དེའི་༼ནས་གཅོད་སྟོན་མོ༽རྐྱེན་དབང་གིས་འགྲོ་མ་ཐུབ། འགྲོ་མཁན་དག་གི་གླེང་མོལ་འཕྲལ་དུ་ཡིག་གེར་ཕབ་པ་ཞིག་ཡིན།