ཆོས་རྗེ་དམ་པ་ཡིད་བཞིན་ནོར་བུའི་རྣམ་ཐར་རྗེས་དྲན་རིག་པའི་མེ་ལོང་ཞེས་བྱ་བ།

དཔལ་དགྱེས་པ་རྡོ་རྗེ།

 
ན་མོ་མ་ཧཱ་གུ་རུ་ཨ་བྷྱ་ལཀྵྃ་ཀ་ར་ཡེ།

༡
ཕྱོགས་དུས་རྒྱལ་བ་ཀུན་གྱི་ཡེ་ཤེས་སྐུ། །
དཔལ་ལྡན་རྫོགས་པའི་སངས་རྒྱས་པདྨ་འབྱུང་། །
འཇམ་དཔལ་ཡིད་བཞིན་ནོར་བུར་གསོལ་བ་འདེབས། །
བཀྲ་ཤིས་དོན་ཀུན་འགྲུབ་པར་བྱིན་གྱིས་རློབས། །

༢
རབ་འབྱམས་སྲས་བཅས་རྒྱལ་བའི་མཁྱེན་རབ་ཉིད། །
སྨིན་གྲོལ་ཡོན་ཏན་གཅིག་ཏུ་འདུས་པའི་སྐུ། །
བཀའ་གཏེར་དག་སྣང་མ་ལུས་འཆད་པའི་གསུང་། །
བརྒྱུད་གསུམ་བླ་མ་ཀུན་འདུས་རྒྱལ་གྱུར་ཅིག །

༣
མཆོག་གི་དཔལ་ཡོན་ཟབ་རྒྱས་ཆུ་གཏེར་ལ། །
གཞལ་འདོད་བྱིས་ཆུང་བློ་ཡིས་དཔག་དཀའ་ཡང་། །
བདག་ཡིད་དད་གུས་གདུང་བ་སྐྲ་རྩེའི་ཆབ། །
པདྨ་གེ་སར་དགྱེས་པའི་དཔྱིད་དུ་ཕུལ། །

༤
འཇིགས༵་མེད༵་འཆད་རྩོད་རྩོམ་གསུམ་ངག༷་ལ་དབང༷་། །
ཕུན༵་ཚོགས༵་དགེ་ལེགས་ཡོན་ཏན་འབྱུང༵་བའི་གནས༵། །
དཔལ་ལྡན་བློ༷་གྲོས༷་མཚུངས༷་མེད༷་ཆོས་ཀྱི་རྗེ། །
ཡིད་བཞིན་ནོར་བུ་རིན་ཆེན་ཕྱག་གིས་མཆོད། །

༥
གང་ཞིག་གཟུར་གནས་བློ་ལྡན་དོན་གཉེར་བའི། །
སྐལ་བཟང་ཆོས་མཆེད་ཀུན་བཟང་དགྱེས་པའི་དབྱངས། །
མི་ཟད་དགའ་བའི་སྒྲ་སྙན་འདི་དཀྲོལ་བས། །
ཆོས་རྔ་སྒྲོགས་པས་འཁོར་འདས་མཛེས་གྱུར་ཅིག །

༦
ཆོས་དབྱིངས་གནས་སུ་ཀུན་ཏུ་བཟང་པོ་དང་། །
ལོངས་སྐུའི་ཞིང་དུ་རྡོ་རྗེ་སྙིང་པོའི་གར། །
སྤྲུལ་བའི་ཞིང་དུ་ཁྱེའུ་ཆུང་ཤེད་ལ་རོལ། །
ཡང་སྤྲུལ་བསམ་ཡས་མཛད་པའི་ཕྲིན་ལས་ཅན། །

༧
སྐྱེ་དགུའི་བདག་མོ་བདེ་ལྡན་དབང་མོ་དང་། །
ཡིད་བཞིན་དཔལ་དང་ཆོས་བློན་མཆོག་གི་སྐུ། །
ཤྰཀྱ་མི་ཏྲ་ཛི་ན་མི་ཏྲ་དང་། །
རྡོ་རྗེ་བདུད་འཇོམས་ལ་སོགས་མངོན་པར་སྤྲུལ། །

༨
གཞན་ཡང་འཕགས་བོད་མཁས་གྲུབ་ཐམས་ཅད་དང་། །
གསར་རྙིང་བཤད་སྒྲུབ་བསྟན་པའི་བརྒྱུད་འཛིན་རིགས། །
བསམ་བཞིན་སྲིད་པར་བཟུང་བའི་དགེ་བཤེས་ཞེས། །
འབྲེལ་ཚད་དོན་ལྡན་རྡོ་རྗེའི་ལུང་གིས་བསྔགས། །

༩
ཁྱད་པར་གཏེར་ཆེན་ལས་རབ་གླིང་པ་ཡིས། །
གནས་ཡུལ་རིགས་སྤྲུལ་ལོ་དུས་མ་འདྲེས་པར། །
བརྡ་རྟགས་གསང་གསུམ་ཀུན་གསལ་མེ་ལོང་བཞིན། །
མི་འགྱུར་རྟགས་བདུན་དམ་ཚིག་རི་མོ་བཀྲ། །

༡༠
དེ་བཞིན་པདྨའི་ལུང་བྱང་རབ་གསལ་དང་། །
རྡོ་གྲུབ་ཀུན་བཟང་གཞན་ཕན་ལུང་བསྟན་སོགས། །
མཁས་གྲུབ་རིག་འཛིན་བགྲང་ཡུལ་འདས་པ་ཡིས། །
ཕུན་ཚོགས་བསྔགས་པའི་ཡོན་ཏན་ཁྱེད་ལ་ཕྱོགས། །

༡༡
སྐུ་ཉིད་ཕན་བདེ་བྱེ་བའི་འོད་སྟོང་བདག །
ལེགས་སྨོན་རྟ་བདུན་ཁྱོགས་ཀྱིས་ཉེར་དྲངས་ཚེ། །
འགྲོ་ཀུན་མོས་བློའི་རྫིང་བུ་དང་འཚམས་པར། །
འགོག་མེད་སྣང་ཡང་ཀུན་རྟོག་ཟུག་རྔུས་དབེན། །

༡༢
དེ་ལྟར་རིགས་ཆོས་ཕུན་ཚོགས་ཡབ་ཡུམ་ལ། །
རབ་རྒྱལ་ཆུ་བྱའི་ཆོ་འཕྲུལ་ཟླ་བ་ཡི། །
རྒྱལ་བ་དང་པོ་ལེགས་པ་བརྒྱད་འཛོམས་ཉིན། །
ཤར་ཕྱོགས་ཆོས་ལྷས་དཔལ་དུ་སྐུ་མཆོག་བལྟམས། །

༡༣
མི་གཡོ་སྐུ་ཡི་བཞུགས་སྟངས་དྲང་པོར་བསྲངས། །
ཞལ་འཛུམ་སྤྱན་ཕྱེས་རིགས་སྔགས་ལན་བདུན་བཟླས། །
ངོ་མཚར་བལྟས་བཟང་འོད་ཆེན་རང་གསལ་བཅས། །
འཇིགས་མེད་རྒྱལ་བའི་མྱུ་གུ་ཞིང་འདིར་འཁྲུངས། །

༡༤
སངས་རྒྱས་བྱང་ཆུབ་སེམས་དཔའི་སྤྲུལ་སྐུ་ཉིད། །
འཕགས་དང་སོ་སྐྱེའི་གཟུགས་སུ་ཡོངས་བསྒྱུར་ནས། །
འགྲོ་ཀུན་བྱང་ཆུབ་ལམ་ལ་དཀྲི་མཛད་པ། །
ཁེངས་ཞུམ་མེད་པར་རྒྱལ་སྲས་ཁྱེད་མིན་སུ། །

༡༥
རང་ལས་གཞན་གཅེས་གནང་བའི་སྙིང་རྗེ་དང་། །
གསང་རབ་དགོངས་འགྲེལ་མཁྱེན་པའི་ཤེས་རབ་ཅན། །
ཟབ་གཏེར་བཅོ་བརྒྱད་དབང་བའི་རིག་པ་འཛིན། །
པདྨའི་ཐུགས་སྲས་དམ་པའི་ཁྱད་ཆོས་ལགས། །

༡༦
མདོ་སྔགས་རིག་གཞུང་རྒྱ་མཚོའི་ཚིག་དོན་ལ། །
འབད་བརྩོན་ངལ་བའི་ཁུར་ལ་མ་ལྟོས་མིན་པར། །
སྙིང་དབུས་མི་ཤིགས་གཉུག་མའི་དོན་མཐོང་བས། །
གཟུངས་སྤོབས་གཏེར་ཆེན་ཀུན་ལ་མངའ་དབང་འབྱོར། །

༡༧
ནམ་མཁའ་ལག་མཐིལ་མཉམ་པའི་ཏིང་འཛིན་གྱིས། །
རྡུལ་ཕྲན་ཁྱོན་ལ་རྡུལ་སྙེད་ཞིང་ཁམས་བཀོད། །
བསྐལ་མང་མཛད་པ་སྐད་ཅིག་ལ་ཡང་སྟོན། །
སྣང་སྲིད་མངའ་དབང་བསྒྱུར་བའི་རྩེད་མོ་རོལ། །

༡༨
ཟབ་རྒྱས་གདམས་པའི་མན་ངག་མ་ལུས་པ། །
ཨོ་རྒྱན་རྗེ་དང་ཞབས་དཀར་ཀོང་སྤྲུལ་སོགས། །
མཁས་གྲུབ་དམ་པའི་མདུན་ནས་མནོས་ཚུལ་དང་། །
བརྗེད་མེད་དྲན་པའི་དབང་ཕྱུག་འདན་སྲས་དངོས། །

༡༩
བྱིས་པའི་དུས་ནས་མཁྱེན་པའི་རྩལ་རྫོགས་པས། །
ངེས་འབྱུང་རྣལ་མའི་ཐུགས་རྒྱུད་རབ་བསྐུལ་ནས། །
བྲག་རྫོང་མཁན་པོ་བསོད་ནམས་རིན་ཆེན་ལས། །
རབ་བྱུང་ཐུབ༵་བསྟན༵་དགེ༵་ལེགས༵་དཔལ༵་བཟང༵་པོ༵། །

༢༠
ཚུལ་གནས་ཐོས་བསམ་སྒོམ་པར་རབ་སྦྱོར་བས། །
ཐུབ་བསྟན་འཛིན་སྐྱོང་སྤེལ་ལ་ཟླ་བྲལ་ཞིང་། །
ཁྱད་པར་ཀུན་མཁྱེན་མི་ཕམ་རྒྱ་མཚོ་ཡིས། །
ཡེ་ཤེས་བླ་མས་རྗེས་བཟུང་དབྱེར་མེད་གྱུར། །

༢༡
ཆོས་ཉིད་གཉུག་མ་དོན་གྱི་ཡེ་ཤེས་ཉིད། །
རིག་སྟོང་རིག་པའི་རང་གཤིས་འཇམ་དཔལ་དབྱངས། །
མཚོན་བྱ་དོན་གྱི་ཡོངས་འཛིན་རྣམ་རོལ་བས། །
ངག༵་དབང༵་བློ༵་གྲོས༵་མཚུངས༵་མེད༵་ཡོངས་སུ་གྲགས། །

༢༢
ངེས་དོན་རྒྱལ་བའི་རྒྱལ་ཚབ་མངའ་གསོལ་བས། །
ཡོངས་འཛིན་བསྟེན་པའི་ངལ་བ་མི་དགོས་ཀྱང་། །
གདུལ་བྱའི་སྣང་ངོར་མཆོག་གསུམ་གལ་ཆེ་བར། །
སྟོན་ཕྱིར་དཀའ་སྤྱད་བླ་མ་མང་དུ་བསྟེན། །

༢༣
སྤྲོས་བྲལ་རིག་པའི་གནད་གསང་ལེགས་རྟོགས་ནས། །
རྨི་ལམ་སྤྲུལ་བསྒྱུར་འོད་གསལ་འབྱམས་སུ་ཀླས། །
མཁའ་སྤྱོད་ས་སྤྱོད་ཞིང་ཁམས་རྣམས་སུ་ཕེབས། །
སངས་རྒྱས་མཇལ་དང་གདམས་ངན་ནོད་པར་བྱུང་། །

༢༤
ཚེ་རབས་ལས་ཀྱི་རྟེན་འབྲེལ་ལ་དགོངས་ནས། །
དཀའ་བ་སྤྱད་ནས་རྫ་སྟོད་ལྕང་མར་ཕྱིན། །
བཤེས་གཉེན་དམ་པ་ཐུབ་བསྟན་ཆོས་འཕེལ་ལ། །
མཉེས་པ་གསུམ་གྱིས་སྒོ་ནས་ཚུལ་བཞིན་བསྟེན། །

༢༥
ཐུན་མོང་གཙུག་ལག་རིག་པའི་བཤད་རྒྱུན་དང་། །
ཐུན་མིན་རྡོ་རྗེ་ཐེག་པའི་སྨིན་གྲོལ་དང་། །
རྒྱབ་བརྟེན་མན་ངག་རྫོགས་ཆེན་ཆ་ལག་བཅས། །
རྒྱལ་ཐབས་བུམ་པ་གང་བྱོའི་ཚུལ་དུ་བསྩལ། །

༢༦
མི་ལ་ལྟ་བུའི་དཀའ་སྤྱད་བདག་གིར་བཞེས། །
ཞི་བ་ལྷ་ལྟར་བྱང་ཆུབ་མངོན་སུམ་ཐོབ། །
གནས་བརྟན་འོད་སྲུང་ལྟ་བུར་བསྙེན་པར་རྫོགས། །
བསླབ་གསུམ་ལྡན་པའི་རྣལ་འབྱོར་རིན་པོ་ཆེ། །

༢༧
ཚར་གཅོད་རིག་པར་ཕྱོགས་ཆོས་ཐོན་མི་དངོས། །
རྗེས་འཛིན་རིག་པར་གཡུ་ཐོག་བཟོ་རྒྱལ་བཞིན། །
ཟབ་རྒྱས་རིག་པར་མཁན་སློབ་ཆོས་གསུམ་དཔལ། །
ཀུན་འདུས་པན་ཆེན་དམ་པ་ཁྱེད་མིན་སུ། །

༢༨
ལྟ་བ་ཀློང་ཆེན་དགོངས་པ་མངོན་གྱུར་ཀྱང་། །
སྤྱོད་པ་གནང་བཀག་བཅས་མཚམས་མ་ནོར་བར། །
འདུལ་འཛིན་གྲུབ་པའི་དབང་ཕྱུག་དགེ་སློང་ཆེས། །
བསྟན་པའི་མིག་ལྟོས་ཁོ་ནར་རྟག་ཏུ་དགོངས། །

༢༩
བརྩེ་ཆེན་སྙིང་རྗེའི་རང་གཟུགས་མིག་མི་འཛུམ། །
མཁྱེན་རབ་དབང་ཕྱུག་རྗེ་བཙུན་འཇམ་དཔལ་དབྱངས། །
མཐུ་སྟོབས་ནུས་པའི་མངའ་བདག་རྡོ་རྗེ་འཛིན། །
རིགས་གསུམ་ཀུན་འདུས་པདྨའི་རྒྱལ་ཚབ་རྗེ། །

༣༠
རིགས་བདག་བླ་མ་ཡིད་བཞིན་ནོར་བུའི་བཀས། །
ང་ཡི་སྤྲུལ་སྐུ་རྒྱ་སྒོང་མ་ཡིས་ནི། །
མཛད་ཕྲིན་ཅི་བསྟན་ཨེ་ཐོན་ལྟོས་ཞིག་ཅེས། །
འདུས་པ་རྒྱ་མཚོའི་དཀྱིལ་ནས་དགྱེས་ཉམས་གནང་། །

༣༡
མ་ཚད་ཡབ་སྲས་དམ་ཚིག་བརྩེ་གདུང་ཡང་། །
ཤ་ཁྲག་ལུས་ལས་ཆད་པའི་བུ་རྒྱུད་དང་། །
ཁྱད་པར་མེད་ཅེས་རྡོ་རྗེའི་བདེན་གསུང་དང་། །
འབྲལ་དཀའི་མི་རྟག་གདམས་པ་མཐར་ཐུག་གནང་། །

༣༢
བླ་མར་སངས་རྒྱས་མཇལ་བའི་དག་སྣང་དང་། །
ཆོས་མཆེད་སེམས་དཔའ་མཐོང་བའི་མོས་གུས་ལས། །
ཐ་མའི་རྟོག་ངན་སྐད་ཅིག་ཙམ་ལ་ཡང་། །
སྐྱེ་མ་མྱོང་བའི་དམ་པ་ཨེ་མ་ཧོ། །

༣༣
དེ་བཞིན་གྲུབ་དབང་ནམ་མཁའ་འཇིགས་མེད་དང་། །
ཡོན་ཏན་མགོན་པོ་མདོ་སྔགས་བསྟན་ཉི་སོགས། །
མཁན་སྤྲུལ་བླ་མ་དམ་པའི་སྐུ་མདུན་ནས། །
མདོ་སྔགས་རིག་གཞུང་ཀུན་ལ་གསན་བཞེས་མཛད། །

༣༤
དགེ་བའི་བཤེས་གཉེན་དེ་དག་ཐམས་ཅད་ལ། །
བསམ་སྦྱོར་ཟོལ་མེད་བསྙེན་པས་ཐུགས་དགྱེས་ཏེ། །
བདག་ལ་འབྲི་འོས་རྣམ་ཐར་གཞན་མེད་ཀྱང་། །
བླ་མ་དམ་པའི་ཐུགས་ཟིན་བྱུང་ལགས་གསུངས། །

༣༥
རང་གཞན་གྲུབ་མཐའ་རྒྱ་མཚོའི་ཕ་རོལ་ཕྱིན། །
རིས་མེད་བསྟན་པའི་བདག་པོ་ཆོས་ཀྱི་རྗེ། །
གངས་ལྗོངས་བསོད་ནམས་གསར་བའི་ལང་ཚོ་ཅན། །
ལུང་རིགས་མན་ངག་འདོམས་པའི་མཁས་གྲུབ་རྒྱལ། །

༣༦
བཀའ་དང་བསྟན་བཅོས་ཇི་སྙེད་བཞུགས་ཀུན་གྱི། །
དགོངས་པའི་གནད་གསང་ཚང་ལ་མ་ནོར་བ། །
ཉུང་ངུའི་ངག་གིས་བདེ་ལེགས་སྟོན་མཛད་པའི། །
རླབས་ཆེན་ཐུགས་བསྐྱེད་སྨོན་པའི་རྟེན་འབྲེལ་ཤར། །

༣༧
ཁྱད་པར་ཡང་གསང་རྫོགས་པ་ཆེན་པོ་ཡི། །
སེམས་ཀློང་མན་ངག་སྡེ་བའི་གསང་གསུམ་སྐོར། །
སྐོར་ཚོ་ཆེན་པོ་བཞི་ཡི་དགོངས་གནད་ཀུན། །
རང་བྱུང་རིག་པའི་ཀློང་ནས་རྡོལ་འདི་རྨད། །

༣༨
ཐོག་མར་བློ་ལྡོག་རྣམ་བཞིར་ཐུགས་ཉམས་བསྟར། །
བར་དུ་ནང་རྒྱུད་སྡེ་གསུམ་ཐུགས་དམ་མཛད། །
མཐར་ཕྱིན་བསྐྱེད་རྫོགས་ཟུང་འཇུག་གྲུབ་པའི་འབྲས། །
སྣང་སྲིད་ཡེ་སངས་རྒྱས་པའི་དགོངས་པར་ཅན། །

༣༩
ཟབ་རྒྱས་གསང་ཆེན་རྒྱུད་ལུང་མན་ངག་ལ། །
བཤད་པའི་བཀའ་བབས་རྣམ་འདྲེན་བཞི་བ་དང་། །
བཀའ་ཡི་སྡུད་པོ་གསང་བདག་རྡོ་རྗེ་ཉིད། །
བཤེས་གཉེན་ཟོལ་དུ་བསྒྱུར་བ་ཁྱོད་མིན་སུ། །
༤༠
སྣང་སྤྱོད་ཐམས་ཅད་ལྷ་སྐུའི་རོལ་བར་འཆར། །
བསྙེན་སྒྲུབ་དུང་ཕྱུར་ལྗགས་བཟླས་ཚད་དུ་འཁྱོལ། །
རླུང་སེམས་སྲོག་རྩོལ་རྒྱུ་བ་དབུ་མར་ཐིམ། །
འཕོ་མེད་ཚུལ་ཁྲིམས་དམ་པར་མངའ་དབང་འབྱོར། །

༤༡
བོགས་འདོན་ཐབས་ལྡན་ཕྱག་རྒྱའི་ཉེ་རྒྱུ་ཡི། །
རོལ་བའི་དུས་རྟགས་རྟེན་འབྲེལ་མངོན་གྱུར་ཀྱང་། །
ཇི་བཞིན་བདག་གིར་མ་མཛད་སྤྱི་མཐུན་ལས། །
སྲོལ་རྒྱུན་ཡབ་མེས་རིག་གནས་དུང་དུ་བླངས། །

༤༢
རང་བཞིན་ཡེ་གནས་ཏིང་འཛིན་རྒྱལ་པོ་ལ། །
རང་གསལ་ལྷག་མཐོང་ཟུང་འཇུག་རྗོགས་པ་ཆེའི། །
ཀ་དག་ཁྲེགས་ཆོད་ཆོས་སྐུའི་ངོ་བོ་ལས། །
ལྷུན་གྲུབ་ཐོད་རྒལ་ལོངས་སྐུའི་ཞིང་སྣང་རོལ། །

༤༣
སྒོམ་བྱུང་ཀློང་ནས་ཐོགས་མེད་མཁྱེན་རབ་ལས། །
གསོ་བྱེད་ཡན་ལག་བརྒྱད་པའི་མན་ངག་དང་། །
ཀ་ཙན་དབྱངས་གསུམ་གནད་འདུས་བསྟན་བཅོས་དག །
དུས་རྐྱེན་རྟེན་འབྲེལ་སྣ་རལ་འཕྲོ་ཅན་ལྷག །

༤༤
ཕུལ་བྱུང་བསྟན་བཅོས་དུས་ཀྱི་འཁོར་ལོ་དང་། །
གཡུལ་ལས་རྣམ་རྒྱལ་མུ་ཏིག་ཕྲེང་མཛེས་བརྩམས། །
བརྡ་རྟགས་དོན་གྱི་ངོ་མཚད་རྨད་བྱུང་བས། །
ཀུན་མཁྱེན་བླ་མའི་གསུང་དང་རྣམ་དབྱེར་མེད། །

༤༥
མདོར་ན་མགྲིན་པ་ལོངས་སྤྱོད་འཁོར་ལོ་ཡི། །
རྩ་ཁམས་ཡི་གེ་སྤྲིན་དུ་དག་པ་ལས། །
དགོངས་གཏེར་བསྟན་བཅོས་ཚུལ་དུ་སྤེལ་བ་འདི། །
བརྒྱུད་གསུམ་བླ་མ་བྱིན་རླབས་ཁོ་ནར་གསུངས། །

༤༦
དམ་ཆོས་ཉམས་སུ་ལེན་པོས་ཕོངས་པ་ལས། །
དམ་པའི་ཆོས་ཀྱི་ཕོངས་པ་མི་འདུག་པས།
སྔོན་བྱོན་མཁས་གྲུབ་དག་གི་གསུང་ཆོས་རྣམས། །
གཙོ་བོར་དགོས་ཞེས་ཡང་དང་ཡང་དུ་གསུངས། །

༤༧
གསེར་ལྗོངས་གནུབས་ཟུར་གསང་ཆེན་དགོན་པ་རུ། །
མི་འཇིགས་ཆོས་ཀྱི་ཁྲི་ལ་དགྱེས་རོལ་ནས། །
གཞུང་ཆེན་པོད་ལྔར་སྒྲ་ཚད་རིག་གནས་བཅས། །
འཆད་རྩད་རྩོམ་པའི་མཛད་པ་རླབས་ཆེན་གནང་། །

༤༨
བསྟན་དང་འགྲོ་བའི་ཕན་བདེ་ལ་དགོངས་ནས། །
ཟང་ཟིང་མ་ལྟོས་དམ་ཆོས་སྦྱིན་པར་བསྩལ། །
སྐལ་བཟང་སློབ་བུ་ཆོས་ཀྱིས་ཚིམ་པར་བསྐྱངས། །
སྨིན་གྲོལ་ལམ་གྱི་སྒོ་ཆེན་་ཡངས་པར་མཛད། །

༤༩
དགོན་ལུང་བུམ་པའི་ཁ་ནས་ཆུ་གཏེར་བླངས། །
གནུབས་ལུང་སྟོད་ནས་གནས་ཀྱི་སྒོ་ཆེན་ཞིག །
འབྱེད་དུ་ཡོད་ཀྱང་རྟེན་འབྲེལ་འཕྱུགས་རྐྱེན་གྱིས། །
མ་འགྲུབ་ཡིན་ཡང་སྒྲུབ་ཕུག་དངོས་སུ་བཏོད། །

༥༠
སྔོན་སྨོན་ལས་རྒྱའི་གཏད་རྒྱ་དུས་སུ་སྨིན། །
དངོས་རིག་ལས་ཀྱི་ཕྱག་རྒྱ་མདུན་དུ་ལྷགས། །
ཟབ་མོའི་ལམ་གྱི་མན་ངག་བརྟེན་གསུངས་ཀྱང་། །
ཐ་སྙད་བསྟན་པའི་མིག་ལྟོས་དགོངས་ནས་བརླགས། །

༥༡
ཀྱེ་མ་གངས་ལྗོངས་ལས་དབང་བསོད་ནམས་ཞན། །
གངས་ཅན་བདེ་བའི་ཉི་མའི་དུས་ཚོད་ཡོལ། །
དུས་འཁྲུགས་རྒུད་པའི་མུན་པ་ཤིན་ཏུ་འཁྲིགས། །
ཟབ་གཏེར་སྒོ་ལྔའི་ལྡེའུ་མིག་དབྱིངས་སུ་ཡལ། །

༥༢
དེ་ལྟར་གཏད་རྒྱའི་རྟེན་འབྲེལ་རལ་རྐྱེན་ལས། །
རི་བྲག་མཚོ་གནས་ས་གཏེར་མི་དབང་བས། །
ངེས་མེད་བྱ་བྲལ་གནང་ནས་དབེན་པར་བྱོན།།
ལྷང་བྲག་སོགས་སུ་ཕེབས་ནས་འགྲོ་དོན་སྐྱོང་། །

༥༣
སླར་ཡང་མདོ་སྨད་སེངྒེའི་ཡང་རྫོང་དུ། །
རི་ཁྲོད་བཏབ་ནས་སྐལ་ལྡན་སློབ་མ་ལ། །
མདོ་སྔགས་སྤྱི་དང་ཁྱད་པར་མཛོད་བདུན་སོགས། །
རིག་སྟོང་ཆོས་སྐུའི་དགོངས་དོན་རྩལ་གཏོན་སྤེལ། །

༥༤
དེ་དུས་འོད་གསལ་ངང་ནས་དཔལ་རིར་བྱོན། །
རིག་འཛིན་མཁའ་འགྲོ་རྣམས་ལས་གདམས་པ་ནོད། །
ཁྱད་པར་ཨོ་རྒྱན་རཀྴ་ཐོད་ཕྲེང་གི །
སྐུ་དྲུང་ལྷགས་ཏེ་ཚོགས་འཁོར་དགྱེས་རོལ་གནང་། །

༥༥
གུ་རུ་མཚན་བརྒྱད་བྱིན་རླབས་ཐུགས་ལ་འཁྲུངས། །
ཉེ་སྲས་བརྒྱད་ཀྱི་ཐབས་མཁས་དཔལ་ལ་འགྲན། །
རིག་འཛིན་རྣམ་བརྒྱད་དགོངས་པའི་གཏེར་བདག་མཆོག །
མགོན་འདིས་ཡོན་ཏན་བསམ་བཞིན་སྙིང་ནས་དད། །

༥༦
མི་རུང་དུས་ཀྱི་འཕོ་འགྱུར་ཆེན་པོའི་འོག །
ཆོས་བཞིན་སྤྱོད་པའི་སྐྱེ་བོ་ཕལ་མོ་ཆེ། །
ཉམ་ཉེས་མིང་གི་ལྷག་མ་གྱུར་པའི་ཚེ། །
རྗེ་ཉིད་རྩ་གསུམ་སྲུང་མས་བར་ཆད་བསལ། །

༥༧
སྡིག་ཅན་མི་ཡིས་མཇལ་ན་སྔངས་སྐྲགས་གྱུར། །
དད་ལྡན་གཉེན་གྱིས་མཇལ་དུས་བཞིན་བཟང་སྐུ། །
དྲག་ཆས་དམག་མིས་བཙལ་ཀྱང་མི་རྙེད་པའི། །
ངོ་མཚར་སྦས་པའི་རྣལ་འབྱོར་ཁྱེད་ལ་གུས། །

༥༨
རབ་རྒྱལ་ས་བྱའི་ཟླ༧་ཚེས་༢༥་དགེ་བ་ལ། །
ཐོ་རེངས་རྨི་ལམ་འོད་གསལ་འདྲེས་པའི་སྐབས། །
གཏན་གྲོགས་བསྐུལ་མས་གླིང་དཀར་ཞིང་དུ་ཕེབས། །
ཡབ་སྲས་དགོངས་ཀློང་བྱིན་རླབས་མངོན་དུ་གྱུར། །

༥༩
དེ་བཞིན་རབ་རྒྱན་ས་སྦྲུལ་ཟླ༡༡་ཚེས་༡༡་ཀྱི། །
སྔ་གྲོར་དག་སྣང་འཇའ་འོད་ཟེར་ཀློང་ནས། །
འཛམ་གླིང་གེ་སར་སྐུ་འཁོར་མངོན་སུམ་མཇལ། །
དགྲ་བླའི་གད་རྒྱངས་དོ་ཧའི་བསྟོད་བསྐུལ་མཛད། །

༦༠
དེ་བཞིན་དག་མཉམ་ཀེེ་ལ་ཤ་ཡི་མདངས། །
དྲི་བྲལ་ཐུགས་རྗེ་ཉིན་བྱེད་སྣང་བ་ཡིས། །
གསལ་བྱེད་མཛེས་པའི་ཞིང་ཁམས་རབ་འབྱམས་ཚུལ། །
སྣ་ཚོགས་བཀོད་པ་སྲིད་གསུམ་ཁྱོན་ན་དཀོན། །

༦༡
ཆོས་པ་གཤེ་བརྡེགས་གོ་རར་གཞུག་པའི་ཚེ། །
རྗེ་ཉིད་ཞུམ་མེད་རླབས་ཆེན་ཐུགས་བསྐྱེད་དང་། །
རྩ་གསུམ་སྲུང་མས་ཕྲིན་ལས་སྒྲུབ་པའི་མཐུས། །
ཆོས་ཁྲིད་སྒོམ་རྒྱུན་མ་ཆད་ཨེ་མ་ཧོ། །

༦༢
ཟབ་གསལ་གཉིས་མེད་སྟོན་པའི་རྒྱུད་ཀྱི་དོན། །
གྲུབ་བརྒྱའི་སྤྱི་མེས་མཆོག་གི་མན་ངག་བཞིན། །
ཡང་གསང་སྙིང་ཐིག་ལམ་དུ་བཀྲལ་བའི་གཞུང་། །
དབང་ལུང་ཁྲིད་འཆད་སྤེལ་བས་དུས་སུ་སྣང་། །

༦༣
གཟུངས་སྤོབས་གཏེར་ལ་དབང་བའི་ཆོས་རྗེ་ཡིས། །
ཚིག་གཅིག་དོན་ཡང་བསྐལ་མང་བརྗོད་བྱས་ཀྱང་། །
མི་བཟློག་ཟད་པ་མེད་པའི་རྣམ་ཐར་སྒོ། །
རིས་མེད་འགྲོ་བའི་མངོན་སུམ་དཔལ་དུ་བཞག །

༦༤
འཕགས་བོད་རྒྱ་ནག་ཤམ་བྷ་ལ་སོགས་ཀྱི། །
སྒྲ་རིགས་མཐའ་དག་ཐུགས་ཀྱི་དབུས་སུ་འཆང་། །
ཀ་ཙན་དབྱངས་ཀྱི་རི་མོར་བྱང་ཆུབ་པས། །
མཁས་རློམ་དག་གི་འགྲན་པའི་ཡུལ་ལས་འདས། །

༦༥
གསོ་རིག་ཡན་ལག་བརྒྱད་པའི་རྒྱ་མཚོ་ཆེ། །
རྣམ་དཔྱོད་ཧུབ་ཀྱིས་ལྷག་མེད་དྲངས་མཁས་པས། །
འཆི་གསོས་བདུད་རྩིའི་ཐུགས་ཀྱི་དཔལ་དུ་གཏམས། །
རོ་བརྒྱའི་ཞལ་ཆབ་སྐལ་བཟང་དཔྱིད་དུ་སྨིན། །

༦༦
བཟོ་འཕྲུལ་སྒྱུ་རྩལ་རྩེད་མོ་ཐབས་ཤེས་འབུམ། །
རིག་རྩལ་དབྱིངས་ལ་ཤར་བ་རྨད་བྱུང་བ། །
ཕྱོགས་བཅུའི་རྒྱལ་ཁམས་གང་དུ་དབེན་པའི་ཕྱིར། །
ཐབས་མཁས་བཟོ་རྒྱལ་བཀའ་དྲིན་སུ་ཡིས་གཞལ། །

༦༧
བཅུ་གཉིས་ཁྱིམ་ལ་རྒྱུ་བ་གཟའ་དགུའི་འགྲོས། །
སྒྱུར་བགོད་རི་མོས་འཇལ་བ་ཙམ་མིན་པར། །
ལས་རླུང་དབུ་མར་སོན་པའི་ཨྰ་དར་ཤར། །
ཞག་གསུམ་ཡུལ་དུས་སྣང་བརྙན་ཇི་བཞིན་གསལ། །

༦༨
སྭོ་རོ་དོ་ཡི་རྒྱུད་གཞུང་གཟའ་སྐར་ཚོགས། །
ཁྱོད་ཐུགས་མཁའ་དབྱིངས་ལྟོ་བར་སྦྲུམ་པ་དང་། །
ཆབ་གཅིག་ཚར་གཅོད་རྗེས་འཛིན་ཟེར་ཕྲེང་དག །
མ་འབད་གླིང་བཞི་གསལ་བའི་རྒྱན་དུ་ཆེ། །

༦༩
སྡེབ་སྦྱོར་རྒྱན་གྱིས་སྤུད་པའི་སྙན་འཇེབས་ངག །
བྱ་དཀའ་མཁས་མང་ལོ་ཟླར་བསྒྲིག་དགོས་གནས། །
མཉམ་པར་བཞག་པ་ཁོ་ནའི་ལག་རྗེས་སུ། །
མིག་འཕྲུལ་བཞིན་དུ་སྐད་ཅིག་ཡུན་ལ་བསྐྲུན། །

༧༠
སྐད་ཅིག་རེ་ཡང་ཕྱོགས་བཅུའི་ཡིད་ཅན་ལ། །
རང་རང་སྐད་དང་སྤྱོད་པའི་ཆོས་སྟོན་ཕྱིར། །
མངོན་བརྗོད་ཟློས་གར་གཏམ་གྱི་རྣམ་འགྱུར་ཀུན། །
གང་གི་ཞལ་ལས་འོངས་མོད་ངོ་མཚར་ཅི། །

༧༡
དཔྱད་གསུམ་དག་པ་ཉིད་ཀྱི་ལེགས་བཤད་ཀུན། །
ཀུན་རྟོག་བློ་ཡིས་ཆེད་དུ་སྒྲིགས་མིན་པར། །
འཁྲུལ་མེད་དགོངས་པའི་གཏེར་ལ་དབང་བའི་ཚུལ། །
བདེན་གསུང་དྲི་བྲལ་ཕྱི་རབས་དཔལ་དུ་བཞག །

༧༢
ཕྱི་གནོད་དམར་ཕྱོགས་སྡིག་སྤྱོད་དམ་དྲག་ཀྱང་། །
མ་གནོད་སྦས་ཡུལ་རི་སུལ་གང་དགའ་རུ། །
ཡིད་རྟོན་སློབ་ཚོགས་སྐྱོང་བའི་ངོ་མཚར་གཏམ། །
ཕྱི་རབས་སྐལ་བཟང་རྣམ་ཐར་རྒྱན་དུ་བཞག །

༧༣
སྡིག་ལ་རྔམ་པའི་ཏང་ཡན་ཤན་པ་དག །
ང་རྒྱལ་ཁོང་ཁྲོ་དབུགས་རྒོད་སྟོང་འཚང་ཡང་། །
རྗེ་ཉིད་མཇལ་བས་གདུག་རྩུབ་རང་སར་ཞི། །
རབ་དགའ་མཆི་མས་མིག་བརླན་རིམ་གྲོར་བརྩོན། །

༧༤
དེ་བཞིན་དྲུང་ན་གནས་པའི་སྲོག་ཆགས་རིགས། །
སྔོན་བྱོན་དམ་པའི་རྣམ་ཐར་ཇི་ལྟ་བར། །
ཕན་ཚུན་བྱམས་བརྩེ་སྙིང་རྗེའི་སེམས་གནས་ཏེ། །
ཤ་གཟན་རི་དྭགས་ཀུན་མཐུན་ལྷན་ཅིག་འགྲོགས། །

༧༥
ར་དང་སྤྱང་ཀི་སྦྲུལ་དང་སྲེ་མོང་དང་། །
ཁྱི་དང་རི་བོང་འཚེ་མེད་མཐུན་སྣང་གྲུབ། །
ར་ཡིས་ཆོས་ཉན་ཤམ་བྷ་ལ་སོགས་ཕེབས། །
མངོན་དགའི་ཞིང་ནས་བརྡ་ལུང་གསང་རྒྱ་གནང་། །

༧༦
བླུན་དམན་སྤྱོད་པའི་སྲོག་ཆགས་དུད་འགྲོའི་ཡང་། །
སངས་རྒྱས་མཚན་ཐོས་གཟུགས་སྔགས་བྱིན་རླབས་ཅན་། །
ཐོས་པའི་ཕན་ཡོན་ཤེས་པ་གལ་ཆེ་ཞེས། །
ལས་འབྲས་བསླུ་མེད་བསྟན་པའི་བཀའ་ཆོས་བསྩལ། །

༧༧
ཆོས་རྗེ་དམ་པའི་དྲུང་དུ་སྐལ་ལྡན་ལས། །
གངས་ལྗོངས་ཡུལ་གྲུའི་བསྟན་པ་རིན་པོ་ཆེ། །
ཕལ་ཆེར་མིང་གི་ལྷག་མ་ཙམ་དུ་བསྒྱུར། །
ཆོས་མེད་ཀླ་ཀློས་མུན་པའི་གླིང་དུ་གྱུར། །

༧༨
དམ་པ་ཕལ་ཆེར་ཞི་བའི་དབྱིངས་སུ་གཤེགས། །
ལ་ལ་རང་ཡུལ་བསྐྱུར་ནས་གཞན་དུ་བཞུད། །
ཁ་བའི་ཞིང་དུ་བདུད་ཀྱི་རྒྱལ་མཚན་སྒྲེང་། །
ཆོས་བཞིན་སྤྱོད་པ་ཉིན་སྐར་ལས་ཀྱང་དཀོན། །

༧༩
རྗེ་ཉིད་ཐུགས་བསྐྱེད་སྨོན་ལམ་དུས་སུ་སྨིན། །
རབ་རྒྱལ་ལྕགས་སྤྲེལ་སྤྲེལ་ཟླའི་ཚེས་བཅུ་ལ། །
འཇའ་ལུས་གྲུབ་པའི་གདན་ས་ཁྱད་པར་ཅན། །
གསང་ཆེན་འོད་སྐུར་གྲོལ་བའི་དབེན་སར་བྱོན། །

༨༠
སྔོན་དུས་གཤིན་རྗེ་དམར་པོ་ས་གནད་བཙལ། །
དེང་དུས་འཇའ་ལུས་གྲུབ་པ་བཅུ་གསུམ་བྱོན། །
དམ་སེལ་སྐྱོན་གྱིས་མ་གོས་དབང་གནས་མཆོག །
གསེར་ལྗོངས་བླ་མ་རུང་དུ་བཤད་སྒྲུབ་གཙུགས། །

༨༡
སྒྱུ་འཕྲུལ་དྲ་བའི་སྨིན་གྲོལ་དབང་བསྐུར་བསྩལ། །
དུས་གསུམ་སྒྲིབ་མེད་མཁྱེན་པའི་ལུང་བསྟན་གནང་། །
རྩ་རླུང་བདེ་སྟོང་རྡོ་རྗེའི་རྣལ་འབྱོར་མཐུས། །
ལས་བཞི་གྲུབ་པས་གདོན་བགེགས་བར་ཆད་སེལ། །

༨༢
སྡོམ་གསུམ་གནང་བཀག་གཙང་མའི་ནོར་འཛིན་གཞིར། །
ཕན་བདེ་བྱང་སེམས་འཁྲུངས་པའི་དགེ་བའི་བཤེས། །
གསང་ཆེན་བསྟན་པའི་བདག་པོ་རིག་འཛིན་རྗེ། །
མགོན་ཁྱེད་རྡོ་རྗེ་འཆང་དང་དབྱེར་མ་མཆིས། །

༨༣
སྔོན་བྱོན་འཇམ་དཔལ་གཞོན་ནུའི་སྐུར་བཞེངས་དུས། །
གང་གི་མཛད་སྤྱོད་དྲི་བྲལ་ནམ་མཁའི་ཁྱོན། །
བསྟན་པའི་བདག་པོ་ཉན་རང་རྣམས་ཀྱིས་ཀྱང་། །
གཞལ་དཀའི་གནས་སུ་མཐོང་བར་ཡིད་སྣང་འཆར། །

༨༤
སྒྲིབ་གཉིས་ཟད་པ་སྤངས་བའི་སེམས་དཔའ་ཁྱོད། །
སྒྲིམ་པོའི་སྤྱོད་ལ་དགྱེས་ཚུལ་མི་དགོས་ཀྱང་། །
དོན་མཐུན་སྤྱོད་པའི་ཚུལ་འདི་བསམ་བྱས་ཚེ། །
ཟ་ཧོར་མཁན་ཆེན་མཆོག་དང་དབྱེར་མ་མཆིས། །

༨༥
གསང་ཆེན་སྔ་འགྱུར་བསྟན་པའི་ཉིན་བྱེད་འོད། །
ལྔ་བདོའི་སྤྲིན་ནག་རུམ་དུ་གཟིམས་པའི་ཚེ། །
གང་གི་ཐུགས་བསྐྱེད་དྲི་གཞོན་ཕོ་ཉ་ཡིས། །
སླར་ཡང་སྣང་བའི་སྒོ་འབྱེད་པད་འབྱུང་དངོས། །

༨༦
ཆོས་ཁྲིམས་དར་གྱི་མདུད་པ་སླར་ཡང་བཅས། །
རྒྱལ་ཁྲིགས་གསེར་གྱི་གཉའ་ཤིང་ཕྲག་ལ་བླངས། །
ཐབས་མཁས་རིག་པས་བོད་འབངས་བདེ་ལ་བཀོད། །
མཉམ་མེད་ཆོས་རྒྱལ་ཆེན་པོ་སླར་ཡང་དྲན། །

༨༧
ཟབ་མོའི་གཏེར་གྱི་སྒྲོམ་བུ་ཕྱག་ཏུ་བབས། །
རྟེན་འབྲེལ་སློབ་མའི་འདུ་བ་མཚོ་བཞིན་རྒྱས། །
མདོ་སྔགས་བསྟན་པའི་ཉི་ཟླ་རབ་ཏུ་གསལ། །
ཐེག་རྩེ་ཡིད་བཞིན་ནོར་བུའི་གཏེར་སྒོ་ཕྱེས། །

༨༨
རྒྱལ་དང་རྒྱལ་སྲས་ཕལ་ཆེར་ཞི་བ་གཤེགས། །
རྒྱལ་བའི་བཀའ་བསྟན་འབྱུང་བཞིའི་རྡུལ་དང་བསྲེས། །
འཆད་ཉན་བྱེད་མཁན་འཆི་ཁའི་ནད་པ་ལ། །
འཆི་མེད་བསྟན་པའི་མེ་རོ་རྨང་ནས་བསླངས། །

༨༩
འོད་གསལ་ངང་ནས་གཏེར་ཆེན་ཆོས་བདག་གནང་། །
ཀློང་ཆེན་རབ་འབྱམས་ཡེ་ཤེས་མཚོ་རྒྱལ་གཉིས། །
ཞལ་གཟིགས་སྒྱུ་འཕྲུལ་དབང་བསྐུར་སྒྲུབ་ཐབས་མཛད། །
ཟུར་ལུགས་རང་ཀློང་དགོངས་པ་འགལ་མེད་བསྒྲུབས། །

༩༠
འདུལ་བསྟན་སྲོག་གི་རིན་ཐང་ཆེ་དགོངས་ནས། །
རྒྱལ་བསྟན་ཞབས་ཏོག་བསྒྲུབ་པར་ཐུགས་ལ་བཅགས། །
བསྟན་པ་དག་ཐེར་མདོ་ཁམས་ལྗོངས་སུ་སྤེལ། །
ཕལ་ཆེར་བློ་ཁ་ལེགས་པའི་ལམ་དུ་བསྒྱུར། །

༩༡
ཟབ་གཏེར་རྫས་གཏེར་དགོངས་གཏེར་ལ་སོགས་པ། །
གཏེར་རིགས་བཅོ་བརྒྱད་དབང་བའི་བཀའ་རྟགས་དང། །
རིས་མེད་གྲུབ་མཐའ་བསྟན་པའི་བདག་པོ་རུ། །
མ་བསྐོས་དབང་གི་རྒྱལ་པོའི་སྐུ་རུ་སྣང་། །

༩༢
ཙོང་ཁ་བླ་མས་ཞལ་གཟིགས་ལུང་བསྟན་གནང་། །
ས་པན་བླ་མས་ལུང་ཕོག་བྱིན་རླབས་མཛད། །
འཇམ་མགོན་བླ་མས་རྗེ་བཟུང་ཐུགས་སྲས་མཆོག །
རྩ་གསུམ་རྒྱལ་བའི་སྤྱི་གཟུགས་དམ་པ་ལགས། །

༩༣
རི་བོ་རྩེ་ལྔར་ཆོས་གཏེར་སྒོ་མོ་ཕྱེས། །
བཟང་སྤྱོད་དུང་ཚོགས་སྨོན་ལམ་གསར་དུ་བསྐྲུན། །
དེ་བཞིན་སེམས་དཔའ་བརྒྱད་ཀྱི་སྒྲུབ་གནས་སུ། །
ཐུགས་བསྐྱེད་བསྙེན་སྒྲུབ་བརྩོན་པར་ཨེ་མ་ཧོ། །

༩༤
ཀུན་གཟིགས་བཅུ་བས་གདན་དྲངས་གསོལ་འདེབས་བཞིན། །
ས་འབྲུག་ལོ་ལ་ནང་བསྟན་སློབ་གླིང་དུ། །
ཐུབ་བསྟན་ཡོངས་ཀྱི་བདག་པོ་མངའ་གསོལ་ཚེ། །
སྒྲུབ་བརྒྱུད་བརྒྱད་ཀྱི་ཟབ་གནད་བསྡུས་ཏེ་གསུངས། །

༩༥
སྣོད་བཅུད་རྒུད་པའི་གདུང་བ་གཞོམ་པའི་ཕྱིར། །
ཡུལ་ཕྱོགས་ཀུན་ཏུ་གཏེར་གྱིས་ཕྱུར་བུར་གཏམས། །
དགེ་ལེགས་སྲིད་གསུམ་ཁྱབ་པའི་ཐུགས་སྨོན་མཆོག །
པདྨའི་སྲས་མཆོག་ཁྱོད་མིན་སུ་ལ་དབང་། །

༩༦
ཐུགས་སྲས་དམ་པ་མཁས་གྲུབ་ཉེར་ལྔ་དང་། །
གསུང་སྲས་ས་ཡ་བྱེ་བ་བསམ་ཡུལ་འདས། །
མཐོང་གྲོལ་འབྲེལ་ཚད་ཡིད་བཞིན་ནོར་བུ་ཉིད། །
བདེ་ཆེན་ཞིང་གི་འདྲེན་པ་ཁྱེད་མིན་སུ། །

༩༧
ཆོས་ཀྱི་རྒྱལ་མཚན་ལམ་རིམ་གདམས་པ་གཏད། །
བསྟན་འཛིན་རྒྱ་མཚོར་རིག་པ་ངོ་སྤྲོད་གནང་། །
བདུད་འཇོམས་ལམ་མཁྱེན་སྨིན་གྲོལ་ལམ་ལ་བཀོད། །
གོ་ལ་ཟླུམ་པོར་སློབ་ཚོགས་ཕྱུར་བུར་གཏམས། །

༩༨
མདོར་ན་འཛམ་གླིང་ཤར་ནུབ་ཐམས་ཅད་དུ། །
རྒྱལ་བསྟན་ཞུགས་པའི་གང་ཟག་ཡིན་ནས་བཟུང་། །
མཆོག་གི་སློབ་མ་མ་གྱུར་ཅིག་ཀྱང་མེད། །
སྐྱེས་རབས་རྟོགས་བརྗོད་འདི་འདྲ་སྲིད་ན་དཀོན། །

༩༩
བསམ་ཡས་གཙུག་ལག་ཁང་གི་དབུ་རྩེ་རུ། །
མི་ནུབ་གསེར་གྱི་རྒྱལ་མཚན་གསར་དུ་བསྒྲེངས། །
རྒྱལ་བསྟན་སྤྱི་དང་སྔ་འགྱུར་བསྟན་པ་ཉིད། །
ཕྱོགས་དུས་དར་རྒྱས་ཡོངས་ཁྱབ་རྟེན་འབྲེལ་བསྒྲིགས། །

༡༠༠
དེང་དུས་འཛམ་གླིང་ཤར་ནུབ་མཁས་བླུན་ཀུན། །
ཡང་གསང་རྫོགས་ཆེན་མན་ངག་དྲི་མེད་ལ། །
སྡང་ཞུགས་ལོག་ལྟའི་གདོན་ཆེན་སྤངས་པ་འདི། །
ཆོས་རྗེ་དམ་པ་ཁྱེད་ཀྱི་དྲིན་ལས་བྱུང་།

༡༠༡
དུས་གསུམ་ཀུན་མཁྱེན་པདྨ་སམ་བྷ་ཝས། །
སྤངས་རྟོགས་མཐར་སོན་ཁྱེད་ཀྱི་བསྟོད་བསྔགས་ཚོགས། །
ལན་བརྒྱར་བརྗོད་པའི་དྲི་བྲལ་ལུང་བྱང་རྣམས། །
རྗེ་འབངས་གྲོགས་ལ་གཅེས་ནོར་ཚུལ་དུ་གདམས། །

༡༠༢
མཛད་པ་མཐའ་མའི་ཚུལ་ལ་དགྱེས་དགོངས་ཚེ། །
དབང་བཅུ་མཐའ་རུ་ཕྱིན་པའི་འབྲས་རྟགས་འབུམ། །
དད་ལྡན་འགྲོ་ལ་སྣང་བའི་རྣམ་ཐར་འདི། །
ཡང་ཡང་བསམས་ཚེ་སངས་རྒྱས་དངོས་དང་མཉམ། །

༡༠༣
གཟུགས་སྐུའི་བཀོད་པ་དབྱིངས་སུ་བསྡུས་པའི་ཚེ། །
སྐུ་གདུང་འཇའ་འོད་རིང་བསྲེལ་ལ་སོགས་པ། །
གསང་ཆེན་གཞུང་ལས་བཤད་པའི་གྲོལ་རྟགས་ཀུན། །
མ་ཚང་མེད་པ་འགྲོ་ཀུན་དཔལ་དུ་ཤར། །

༡༠༤
རང་སྣང་རྣམ་དག་བདེ་ཆེན་ཞིང་ཁམས་སུ། །
རྫོགས་སྨིན་སྦྱངས་བ་རྒྱ་མཚོ་མངོན་བྱས་ནས། །
ནམ་མཁའ་སྲིད་དུ་དཔག་ཡས་སྤྲུལ་བ་ཡིས། །
འགྲོ་རྣམས་འདྲེན་པའི་ཞལ་ཆེམས་དགྱེས་བཞིན་བསྩལ། །

༡༠༥
ཉིད་ལ་འབྲེལ་བ་ཐོགས་པ་ཇི་སྙེད་ཀུན། །
མི་རིང་བདེ་ཆེན་དག་པའི་ཞིང་ཁམས་སུ། །
མཇལ་བར་འགྱུར་ཞེས་དྲི་མེད་རྡོ་རྗེའི་གསུང་། །
སྐལ་བཟང་ཡིད་ཀྱི་དཔལ་དུ་ཡང་ཡང་གནང་། །

༡༠༦
མ་འོངས་རིགས་ལྡན་ཕྲིན་ལས་སྤེལ་བའི་དུས། །
ཉིད་ཀྱི་ཆོས་བརྒྱུད་འཛིན་པ་མཐའ་དག་ཀུན། །
ཚོམ་བུ་གཅིག་ཏུ་འདུ་མངོན་པར་སངས་རྒྱས་གསུང་། །
མི་འཇིགས་སེངྒེའི་ང་རོ་ཡང་ཡང་དྲན། །

༡༠༧
སྐྱེས་སྦྱང་ཤེས་རབ་དམན་པ་བདག་ལྟ་བུས། །
རྣམ་ཐར་དྲན་པའི་རིག་པའི་མེ་ལོང་ལ། །
མ་རྟོགས་ལོག་རྟོག་ཉེས་འགལ་གང་མཆིས་པ། །
གཟུར་གནས་བློ་ལྡན་ཀུན་ལ་སྙིང་ནས་བཤགས། །

༡༠༨
འདིར་སྨྲས་དགེ་བས་བདག་གཞན་མཁའ་མཉམ་འགྲོ། །
ཆོས་རྗེ་དམ་པ་ཡིད་བཞིན་ནོར་བུ་ཡིས། །
སྐུ་གསུང་ཐུགས་ཀྱི་བྱིན་རླབས་རྟག་ཞུགས་ནས། །
བསྟན་འགྲོའི་དོན་ཆེན་བདེ་མྱུར་ལྷུན་གྲུབ་ཤོག །

ཅེས་པའང་རབ་རྒྱན་ལྕགས་སྟག་མགོ་ཟླ་བའི་ཉའམ་ཆོས་རྗེ་དམ་པ་ཡིད་བཞིན་ནོར་བུའི་འདས་མཆོད་སྐབས་སུ་རྗེས་དྲན་དུ་དམ་པ་གང་གི་ཞབས་རྡུལ་སྤྱི་བོར་ལེན་པ་སྐྱབས་འོག་པ་རྨོངས་རྟུལ་གྱི་ན་བ་དཔལ་དགྱེས་པ་རྡོ་རྗེས་བོད་བརྒྱུད་རྣལ་འབྱོར་ཆོས་ཚོགས་ཁང་ནས་མི་ཕྱེད་དད་པས་སྙིང་ནས་གསོལ་བ་འདེབས་པར་དགེའོ། དགེའོ། དགེའོ། ཤྲྰི་སརྦ་མངྒ་ལཾ་བི་ཛ་ཡནྟུ།། །།