༅༅།། འཆི་ཡུལ་ནས་ཕྱིར་ལོག་པ། རྫུ་འཕྲུལ་གྱི་བུ། དངོས་མཐོང་བདེན་དཔང་། ལེའུ་ཉེར་ལྔ་བ།

རྔ་བ་རྒྱལ་ཁམས་པ།

ངས་བཤད་འདོད་པ་ནི། ཚེ་སྲོག་ལ་ཉེན་ཁ་ཤིན་ཏུ་ཆེ་བའི་ནུབ་ལུགས་སྐྲན་བཅོས་འདི་ཚོ་བརྒྱུད་མ་དགོས་པར་ལག་ཐབས་དང་། ཡོ་གའི་ཉམས་ལེན། བཟའ་བཏུང་གི་ཀུན་སྤྱོད། ལུས་རྩལ་སོགས་ལ་བརྟེན་ནས་སྐྲན་བཅོས་ཐུབ་པའི་ལམ་ཁ་ཞིག་གམ། ཡང་ན། སྐྲན་བཅོས་ཀྱི་ལས་རིམ་ནང་ནད་བདག་རང་ཉིད་ཀྱི་ཉམས་མྱོང་ལ་དཔགས་པའི་སྨན་གྱི་ཐུན་ཚད་སོགས་ལ་སྟངས་འཛིན་བྱེད་ཤེས་པ་ཞིག་བྱུང་ན། སྐྲན་ནད་ཕལ་ཆེར་ཞིག་སེལ་ཐུབ་པའི་ལམ་ཁ་ཞིག་ཡོད་སྣང་ཤར།
ནམ་ཡང་བརྗེད་དཀའ་བའི་ཚོར་བ་ཞིག་ལ། ང་ཚོ་དང་མཉམ་པོར་སྨན་ཁང་དུ་སྡོད་མཁན་གྱི་ཀོ་རུ་ཡའི་ཕོ་སར་དེ། ཐོག་མར་ཕོ་སྐྲན་ཡིན་ཡང་སྐྲན་བཅོས་ཀྱི་བརྒྱུད་རིམ་ཁྲོད། ཁྲག་སྐྲན་དུ་གནས་འགྱུར་ཡོད་པ་དང་། རྒྱ་གར་གྱི་བུ་མོ་ཆུང་ཆུང་ཞིག་ཐོག་མར་གློ་སྐྲན་ཡིན་མོད། ཟེར་བཅོས་ཀྱི་བརྒྱུད་རིམ་ནང་། སྐྲན་ནད་གཞན་ཞིག་ཏུ་གནས་འགྱུར་ཡོད་པ་དང་། ངས་རྒྱུན་དུ་མཐོང་མྱོང་བའི་སྐྲན་ནད་ཅན་གི་བྱིས་པ་མང་བོ་ཞིག ཉེ་ལམ་ཞིག་ནས་གར་སོང་ཆ་མེད་དུ་གྱུར་ནས་ཤི་གསོན་ཆ་མ་འཚལ་བའི་གནས་སུ་གྱུར། ཉིན་ཁ་ཤས་སྔོན་སྨན་ཞབས་མ་ཁ་ཁྲི་ལེན་ལ་དེ་སྐོར་དྲི་རྩད་བྱས་པས། མོས་ངོ་མདོག་འགྱུར་ནས་མགོ་བོ་གཡུག་གཡུག་གནང་བཞིན་པ་ལས་ལན་ཅིའང་མི་འདུག

དཀོན་མཆོག་གསུམ་གྱི་ཐུགས་རྗེའི་བྱིན་རླབས་དང་། ཆོས་ལུགས་མི་འདྲ་བ་མང་བོའི་གསོལ་སྨོན། ང་ཚོ་རང་ཉིད་ཀྱི་ནད་བཅོས་ལག་ཐབས། སྡིག་སྤོང་དགེ་སྒྲུབ་ཀྱི་ནུས་པ། སྨན་པ་དང་སྨན་ཞབས་ཚོའི་ལྷག་བསམ་ལ་བརྟེན་ནས། ངའི་བུ་ནི་ད་ལྟ་སྐྲན་ནད་ལས་གྲོལ་ཡོད་པའི་ཡིད་ཆེས་བྱེད་བཞིན་པ་མ་ཟད། སྒོ་གསུམ་གྱི་སྤྱོད་ལམ་ཡང་སྔོན་མ་ལས་ལྷག་མེད་ཀྱང་དམན་དུ་སོང་མི་འདུག ཅེས་ཁྱེད་ཀློག་པ་པོ་རྣམ་པར་ཞུ་འདོད་བྱུང་། ད་ལོའི་སྤྱི་ཟླ་དགུ་བ་ནས་ཁོ་རྒྱུན་ལྡན་སློབ་གྲྭར་འགྲིམས་བཞིན་ཡོད། ཁོ་ད་ལོ་འཛིན་རིམ་དྲུག་པ་རེད།
ང་ཚོས་ཁོ་སྨན་བཅོས་ཀྱི་དུས་ཡུན་རིང་སློབ་ཚན་མང་བོ་ཞིག་སློབ་སྐལ་བྱུང་མེད་པས། སློབ་གྲྭ་གསར་བ་དེའི་འཛིན་སྐྱོང་ལ་འབྲེལ་ལམ་བརྒྱུད། སློབ་གྲྭ་དེའི་དམིགས་བསལ་བསྐྱར་སྦྱོང་གི་ལས་འཆར་ནང་བུ་འཛུལ་ཞུགས་དགོས་མིན་གྱི་དྲི་བ་ཞིག་བཏང་། སློབ་སྤྱིའི་མཚན་ཐོག་ནས་ཕྱག་ཡིག་ཅིག་ཕེབས་གསལ། ཁྱེད་ཀྱི་བུའི་འདས་ཟིན་པའི་སློབ་སྦྱོང་གི་ཡིག་ཚགས་དང་། ཉེ་ཆར་བླངས་པའི་རྒྱུགས་འབྲས་ལ་བལྟས་ན། ཁྱེད་ཀྱི་བུ་དེ་བཞིན་རྒྱུན་ལྡན་འཛིན་གྲྭ་ལས། དམིགས་བསལ་བསྐྱར་སྦྱོང་གི་ལས་འཆར་ནང་ཞུགས་དགོས་པ་མི་འདུག ཅེས་བརྗོད་འདུག འདི་ནི་ངེས་པར་ཡང་བདེན་པ་ཞིག་ཡིན་པ་འདྲ་སྟེ། ངའི་བུ་སློབ་གྲྭ་འདིར་ཞུགས་རྗེས་ཀྱི་ཐེངས་དང་གཉིས་ཀྱི་རྒྱུགས་ཆུང་ཕལ་ཆེར་བརྒྱ་ཆ་བརྒྱ་བླངས་འདུག་པས། ངེད་བཟའ་ཚོ་གཉིས་ཀྱང་ཧ་ལས་དགོས་པ་ལྟ་བུར་གྱུར། ངས་ཁོའི་བརྒྱ་ཆ་བརྒྱ་ཟིན་པའི་རྒྱུགས་འབྲས་རེ་རེ་ལ་སྒོར་བཅུ་བཅུའི་དགའ་རྟགས་སྤྲད་པས། སྒོར་བརྒྱ་ལྷག་ཅིག་བབས་སྟབས་ཁོ་སེམས་པ་ཤིན་ཏུ་དགའ།

དེ་ནས་བཟུང་ངས་ཁོའི་སློབ་ཚན་རེ་རེའི་རྒྱུགས་འབྲས་བརྒྱ་ཆའི་བརྒྱ་སླེབས་ཚད་ལ་སྒོར་བཅུ་རེ་དང་། ཤོག་ངོས་བརྒྱ་ཡན་ཆད་ཟིན་པའི་དཔེ་དེབ་རེ་ཀློག་ཚར་ཚེ་སྒོར་གཅིག་རེ་སྤྲོད་རྒྱུའི་ཁ་ཆད་བྱས་པས། ཁོས་དཔེ་ཆ་ཀློག་པའི་སྤྲོ་སྣང་དང་གྲངས་འབོར་ཡང་མང་ནས་མང་དུ་སོང་། ང་ཚོས་སྨན་ཁང་གི་སྣེ་ལེན་མདུན་སྟེགས་ལས་ཤེས་རྟོགས་བྱུང་བ་བཞིན། ད་ལོའི་སློབ་གྲྭའི་དབྱར་ཁའི་གུང་སེང་སྐབས། ༼བདེ་སྐྱིད་ནི་སྡོད་སྒར༽རེད་ཅེས་མིང་དུ་བཏགས་པའི་ཤོག་ཁག་སྡོད་སྒར་ཞིག་ཏུ་གུང་སེང་འཛུལ་ཞུགས་ཀྱི་དེབ་སྐྱེལ་བྱས། ང་ཚོའི་འཛུལ་ཞུགས་དེབ་སྐྱེལ་ཅུང་འགྱང་དྲགས་པས་བདུན་གསུམ་ལས་དེབ་བསྐྱེལ་གྱི་དུས་ཡུན་ལྷག་མི་འདུག རེ་བ་ཞུས་དོན་བཞིན་གལ་སྲིད་ཟླ་གཅིག་དེབ་སྐྱེལ་གྱི་ས་མིག་སྟོང་བ་འདྲ་བྱུང་ཚེ། བདུན་གཅིག་ཁར་སྣོད་རྒྱག་ཆོག་ཟེར།
སློབ་གྲྭའི་དབྱར་ཁའི་གུང་སེང་མགོ་ཚུགས་པ་དང་། གོན་པ་དང་། ཉལ་ཆས། སྨན། ལུས་སྐྱོབ་དུག་འགོག་བྱུག་སྨན། ལྟོ་སྣོད། མིག་ཤེལ། ཆུ་འཚོག་པར་ཆས། མི་འཕྲོད་ཟིལ་གནོན་སྨན་ཁབ་སོགས། བུ་ལ་ཉེ་བར་མཁོ་བའི་དངོས་པོ་ཚང་མ་གྲ་སྒྲིག་ཚགས་ཚུད་ཀྱིས། ངེད་བཟའ་ཚོ་གཉིས་དང་ཆུང་མའི་མ་རྒན་བུ་ཆུང་བཅས་ངེད་ཅག་མི་བཞི་རླངས་འཁོར་བཏང་སྟེ། སྡོད་སྒར་དེ་ཉིད་ཀྱི་ཕྱོགས་སུ་བསྐྱོད། རླངས་འཁོར་བསྐོར་ནས་ཆུ་ཚོད་གཅིག་དང་ཕྱེད་ཀ་ཡས་མས་ཤིག་གི་མཚམས། ལམ་ཆེན་དེ་རིམ་པས་ལམ་ཁ་ཆུང་རུ་ཆུང་རུ་ཕྱིན། གྲོང་དང་གྲོང་རྡར་ཁ་ཤས་བརྒྱུད་རྗེས། ཞིང་ཁ་ཆེ་ཆུང་དང་། རྟ་ནོར་ལུག་ཁྱུ་འགའ་རེ་ཡོད་པའི་ལུང་གཤོངས་ཤིག་ནས་ཡར་རི་ཅུང་མཐོ་བོ་ཞིག་ཡོད་པའི་སྐེད་ནས་བསྐྱངས་པའི་ལམ་ཁ་དེ་བརྒྱུད་ནས་སོང་། རེ་ཞིག་ནས་ཕྱོགས་སྟོན་འཁོར་ལོས་བརྡ་རྟགས་ལྟར། ལམ་ངོས་གཡོན་ཕྱོགས་སུ་བདེ་སྐྱིད་སྡོད་སྒར་ཞེས་བརྗོད་པའི་བྱང་བུ་ཆུང་ངུ་ཞིག་མཐོང་།

རྙིང་ཧྲལ་དུ་ཕྱིན་པའི་སྒོ་ར་དང་བྱང་བུའི་རྣམ་པ་ལ་བལྟས་ན། འདི་ནི་ང་ཚོས་ཚོལ་བཞིན་པའི་བདེ་སྐྱིད་སྡོད་སྒར་ཞེས་པ་དེ་ཨེ་ཡིན་སྙམ་པའི་རྣམ་རྟོག་བསླངས། ང་ཚོ་འཛུལ་སྒོ་དེ་ནས་མར་ནང་དུ་ཕྱིན་པས། ལམ་ཁ་གཡས་གཡོན་དུ་དར་ཆ་སྣ་ཚོགས་ཕྱར་ཞིང་། ཁ་དོག་རྣམ་པར་བཀྲ་བའི་འཛུལ་སྒོ་ཞིག་གི་ཕྱི་རོལ་གྱི་མདུན་སྟེགས་ཐོག ཤོག་བྱང་མང་བོ་བཀྲམས་པའི་འཁྲིས་སུ་དགོད་བྲོ་བའི་ཆས་གོས་གྱོན་པའི་ཕོ་སར་ཁ་ཤས་ཤིག་ཡར་ལངས་ནས་བསྡད་འདུག་པ་མཐོང་། ང་ཚོ་ཉེ་སར་སླེབས་པ་ན་ཕོ་སར་ཞིག་སྔོན་དུ་སླེབས་ནས་བསུ་མ་དང་ཆབས་ཅིག རླངས་འཁོར་གང་དུ་འཇོག་སའི་ཡུལ་ངོ་སྤྲོད་གནང་། ང་ཚོས་རླངས་འཁོར་བཞག་རྗེས་བཅའ་དངོས་ཚང་མ་ཁུར་ནས་ཕར་སྒོ་འགྲམ་དུ་ཕྱིན། ང་ཚོ་ཅུང་སྔ་དྲགས་པས་ད་དུང་ནང་དུ་གཏོང་གི་མི་འདུག བུའི་མིང་དང་དེབ་སྐྱེལ་ཡིག་ཆ་སོགས་ཁོང་ཚོར་རྩིས་སྤྲོད་བྱས་རྗེས། ས་ལྟ་ཡུལ་ལྟ་ཞིག་བྱས་པ་ཡིན།
ང་ཚོ་ཡོང་ས་དེ་གོང་གི་སྒོ་བྱང་རྙིང་ཧྲལ་དེའི་རྣམ་པ་དང་འགངས་ནས་མི་མཚུངས་པར། མཛེས་ལྗོངས་ཤིག་གི་ཐང་ག་མིག་མདུན་དུ་བཤམས་པ་ལྟར། ཁོར་ཡུག་ཚང་མ་ལྗང་མདོག་གི་ནགས་ཚལ་གྱིས་ཡོངས་སུ་བསྐོར་བའི་དབུས་ན། བཟོ་བཀོད་མི་འདྲ་བའི་ཁང་རྩེག་ཆེ་ཆུང་རྣམས་ནི། སྤྲིན་དཀར་གྱི་གསེབ་ན་བརྗིད་པའི་ལྡིང་ཁང་བཞིན་དུ་མཛེས་ལ། རྙིང་རྗེ་བའི་རྩེད་ཆས་དང་རྩེད་ཐང་། བྱིས་པ་དགའ་བའི་དགའ་ཚལ་བཅས་ཀྱིས། ངའི་སེམས་པ་བྱིས་སྒྲུང་དག་ན་གསལ་བའི་བྱིས་པའི་དག་ཞིང་ཞིག་ཏུ་ངང་གིས་དྲངས། ངའི་རྣམ་ཤེས་ཕར་ཕར་དག་ཞིང་དེར་འཁྱམས་པ་བཞིན། སྡོད་སྒར་འདིར་ཕེབས་མཁན་བྱིས་པ་དང་ཕ་མ་དག་ཀྱང་གཅིག་རྗེས་གཉིས་མཐུད་ཀྱིས་སླེབས།

ང་ཚོས་ཀྱང་འཛུལ་སྒོ་ནས་བཅའ་དངོས་རྣམས་བླངས་རྗེས་ཕོ་སར་ཞིག་གིས་ལམ་སྟོན་འོག སྡོད་སྒར་གྱི་ར་བའི་ནང་དུ་འཛུལ། ང་ཚོ་ཨར་འདམ་དང་རྡོ་ཀ་མ་རས་བཟོས་པའི་རྐང་ལམ་ཕྲ་མོ་ཞིག་བརྒྱུད་ཆུ་རྩེད་གཏོང་སའི་བཅོས་རྫིང་ཡིད་དུ་འོང་བ་ཞིག་གི་མཐའ་བསྐོར་ནས་ཅུང་ཙམ་སོང་བས། ཁང་རྩེག་ཚིགས་གཉིས་ཅན་ཞིག་དང་། ཚིགས་གཅིག་ཅན་གྱི་ཁང་བ་གཉིས་བཅས་ཁང་བ་ཆེ་ཆུང་གསུམ་གྱིས་གྲུ་བཞིར་བསྐོར་པའི་བདེ་ཡངས་ཀྱི་ཁྱམས་རའི་དབུས་སུ། ༼བདེ་སྐྱིད་སྡོད་སྒར་དུ་ཕེབས་པར་དགའ་བསུ་ཞུ༽ཞེས་བཀོད་པའི་འཕྲེད་དར་ཞིག་གི་འོག མི་ཁ་ཤས་ཤིག་ཡོད་པ་དེའི་ཕྱོགས་སུ་སོང་། མི་དེ་ནི་སྡོད་སྒར་གྱི་འགན་འཛིན་གཞོན་པ་དང་། བུད་མེད་དེ་ནི་སྡོད་སྒར་དེར་ཡོང་མཁན་ཕྲུ་གུ་ཚོར་བཅའ་དངོས་མཁོ་སྒྲུབ་གནང་མཁན་གྱི་ལས་བྱེད་ཅིག་རེད།
ང་ཚོས་ཕན་ཚུན་འཚམས་འདྲི་བྱས་འབྱོར་ཐོ་འགོད་སྐབས། མདུན་འཇོག་སྟེང་ཞལ་འདེབས་སློང་དེབ་ཅིག་ཀྱང་བཞག་ཡོད་པ་མཐོང་། སྡོད་སྒར་དེས་ང་ཚོར་ངོས་ལེན་སྔ་ཡིག་ཅིག་བཏང་བའི་ནང་། ཕྲུ་གུ་རེ་རེའི་ཉིན་རེའི་འགྲོ་སོང་དང་། དགོས་མཁོ་མི་འདྲ་བའི་དབང་གིས་འགྲོ་སོང་ཡང་ཆེན་པོ་ཡིན་པས། གལ་སྲིད་ཁྱེད་ཀྱིས་འཁོས་ཀས་འདང་ཚེ། བདུན་རེའི་ཞལ་འདེབས་སྒོར་བརྒྱ་རེ་ཕུལ་ཐུབ་ན་རབ་དང་། མ་ཐུབ་ཀྱང་ངེས་པར་འབུས་དགོས་པའི་འགར་ཁུར་ཁྱེར་མི་དགོས་པ་དགོངས་འཇགས་ཞུ། ཞེས་བཀོད་འདུག རིན་མེད་ཐོག་སྡོད་སྒར་འདི་འདྲ་བཀོད་སྒྲིག་བྱེད་པ་ནི། ས་ཆ་འདིར་མཚོན་ན་ཅུང་མཐོང་དཀོན་པ་ཞིག་ཡིན་པས། ང་ཚོར་དཔལ་འབྱོར་གྱི་འཁོས་ཀ་དེ་ཙམ་བཟང་རྒྱུ་མེད་ཀྱང་། ཆུང་མ་ངེད་གཉིས་ཀྱིས་གྲོས་བསྡུར་བརྒྱུད། བདུན་དང་པོར་ང་ཚོ་རང་ངོས་ནས་སྒོར་ལྔ་བརྒྱའི་ཞལ་འདེབས། བདུན་གཉིས་པ་དང་། གསུམ་པ་གཉིས་ཀར་མ་རྒན་མོ་དང་སྤུན་མཆེད་ཚོར་ཞལ་འདེབས་ཤིག་གཏོང་དུ་འཇུག་རྒྱུའི་གྲོས་འཆམ་བྱུང་། ངའི་དངུལ་འཛིན་སྟེང་ཞལ་འདེབས་ཕུལ་རྗེས། རིན་པ་སྤྲོད་མི་དགོས་པའི་ཆུ་བཏུང་སྣོད་ཅིག་དང་། སྒྲིག་ཆས་ཤིག་ཉོས། བུད་མེད་གཞོན་པ་ཞིག་གིས་སྐད་བཏང་བ་ལྟར། འཕྲོད་བསྟེན་ཚན་པར་བཅར་ནས། བུའི་སྨན་དང་སྨན་བཅོས་རྒྱུས་ཡིག་སོགས་རྩིས་འབུལ་བྱས།

དང་བླངས་སྨན་ཞབས་མ་དེ་ནི་བུའི་སྐྲན་ནད་སྨན་ཁང་གི་ལས་བྱེད་ཅིག་རེད། མོས་བུའི་མིང་ནས་འབོད་ཞོར། ཁྱེད་རང་དཔེ་ཡག་པོར་ཆགས་འདུག ཁྱེད་མཇལ་བ་དགའ་བོ་བྱུང་། སྡོར་སྒར་འདིར་ཕེབས་པར་དགའ་བསུ་ཞུ། ཞེས་མཛའ་བརྩེ་ལྡན་པའི་ངང་བུའི་གཟུགས་པོར་བརྟག་པ་བྱས། བརྟག་དཔྱད་གྲུབ་རྗེས་དང་བླངས་ཕོ་སར་གཞན་པ་ཞིག་གིས་རྒྱུས་སྟོན་འོག ངེད་ཅག་ཕར་བུ་ཕྲུག་སྡོད་སའི་ཁང་ཚན་གྱི་ཕྱོགས་སུ་བསྐྱོད། ང་ཚོ་ཁྲིད་མཁན་གྱི་ཕོ་སར་དེ་ནི། ཡོ་རོབ་ནས་ཕེབས་པ་ཞིག་ཡིན་འདུག་ཅིང་། ཁོ་སློབ་གྲྭའི་གུང་སང་སྐབས་སྡོད་སྒར་འདིར་ལས་ཀར་ཡོང་བ་ཟེར། ང་ཚོ་ད་གའི་ཁང་ཆེན་དེའི་རྒྱབ་ལོགས་ནས། ཁུ་སིམ་ལྷིང་འཇགས་ཀྱི་རྐང་ལམ་ཕྲ་མོ་ཞིག་དེད་ནས་ག་ལེར་ཕར་ངོས་སུ་བསྐྱོད། རྐང་ལམ་གཡས་གཡོན་དུ་མེ་ཏོག་དང་ལྗོན་པ་སྣ་ཚོགས་ཀྱིས་བརྒྱན་ཡོད་པ་དང་། ནགས་རྫོང་སྟུག་པོ་དག་གི་རྩེ་ནས་བྱ་བྱེའུ་སྣ་ཚོགས་ཕར་འཕུར་ཚུར་འཕུར་བྱེད་བཞིན་སྙན་མོའི་བྱ་དབྱངས་དར་དིར་སྒྲོག
རེ་ཞིག་ནས་ལྷུང་ལྷུང་འབབ་བཞིན་པའི་ཆུ་ཕྲན་ཞིག་གི་ཟམ་པའི་ཐོག་སླེབས། ང་ཚོ་ཟམ་པ་དེའི་ཐོག་བསྡད་ནས་དང་གཙང་གི་ཆུ་ཕྲན་དང་དེར་རྒྱུ་བའི་ཉ་དང་རུས་བལ་ཆུ་སྦྲུལ་སོགས་ལ་བསྟད་མོར་བལྟས་ཤིང་། ཆུ་ཕྲན་དེའི་རྒྱབ་ངོས་ན་སུ་ཡོད་པའི་གཡང་དྲུའི་ལྡེར་མ་ཐང་ལ་བཀོད་པ་ལྟ་བུའི་རྫིང་བུ་ཆེན་པོ་དེ་དང་། རྫིང་བུ་དེར་རྒྱུ་བའི་ཆུ་བྱ་སྐེ་རིང་། མཚོ་གྲུ་ཆེ་ཆུང་སོགས་ནི་ངོ་མའི་སྙིང་དུ་སྡུག་པ་ཞིག་རེད། དེ་ནས་ང་ཚོ་རིམ་བཞིན་རྐང་ལམ་དེ་དེད་ནས་མཚོ་རྫིང་དེའི་ཉེ་འཁྲིས་སུ་ཡོད་པའི་ངང་བ་ཁྱུ་གཅིག་ལ་ཞིབ་ལྟ་དང་འབྲུ་རིགས་གཏོར། དྲན་རྟེན་གྱི་པར་མང་བོ་ཞིག་བཏབ། མཚོ་འགྲམ་དེ་ནས་ཡར་ས་ཁད་ཅུང་མཐོ་བོ་ཞིག་ངོས་སུ་མདའ་རྩེད་དང་། པོལ་རྩེད། མཚོ་ཐོག་ཐག་ཤུད་ཀྱི་རྩེད་མོ་རྩེད་སའི་རྩེད་ར་གསུམ་ཕང་སྒྲིག་པའི་གཡས་ཕྱོགས། ས་གཞོང་ཁོད་སྙོམ་པོ་ཕྱོགས་མཐར་མི་ཚད་ཙམ་གྱི་ལྗོན་པ་དང་། མེ་ཏོག་སྣ་ཚོགས། རྡོ་གཅལ་ལ་བཟོ་བཀོད་ངོ་མཚར་ལྡན་པའི་ལྡུམ་རས་བརྒྱན་པ། ས་ཆ་དེ་ནས་ཁ་མདུན་ཕྱོགས་སུ་འཁོར་ན། ད་གའི་ང་ཚོ་ཡོང་སའི་ལམ་ཁ་དང་། ཟམ་པ། མཚོ་དང་ཆུ་ཕྲན་ཁང་རྩེག་སོགས་བསམ་བཞིན་མིག་སྔར་བཀོད་པ་བཞིན་ཡིད་དུ་འོང་བ་ཞིག་རེད།

ས་གཞོང་དེའི་དབུས་སུ་ཁང་བ་ཐོག་གཅིག་མ། བཟོ་བཀོད་སྐྱེད་ཚལ་ནང་གི་ལྡིང་ཁང་ལྟ་བུའི་གཟུགས་སུ་བསྐྲུན་པ། ཁང་བའི་ནང་ལོགས་ཤག་ཚན་མང་བོས་བཅད་ཡོད་པ། ཤག་ཁང་རེ་རེའི་ནང་ཕྲུ་གུ་ལྔ་ནས་དྲུག་པར་སྡོད་ཆོག་པ་ཞིག་འདུག ང་ཚོ་སླེབས་པ་ཅུང་སྔ་བས་ཁང་བའི་མདུན་ངོས་སྒེ་ཁུང་གི་ཐད་ན་ཉལ་ཁྲི་སྟེང་འོག་གཉིས་ཡོད་པ་ལས། འོག་མ་དེ་བདག་འཛིན་བྱེད་རུང་བར་གྱུར། བུའི་བཅའ་དངོས་རྣམས་སོ་སོའི་ཁོངས་སུ་བཞག་རྗེས། ལྟ་རྟོག་པ་དང་བུས་སྐྱེལ་མ་བྱས་ཏེ་ཕྱིར་ད་གའི་ཟམ་པ་ཆུང་ངུ་དེའི་བར་ཡོང་། ངས་བསམ་པར་ས་ཆ་འདི་འདྲ་ཞིག་ཏུ་སྒོམ་གྲྭ་ཞིག་ཡོད་ན་ཅི་མ་རུང་སྙམ། ཇོ་བོ་རྗེས་གསེར་གླིང་ནས་ཆུ་རླབས་འདར་ཕྲི་ལི་ལི་རྒྱུ་བཞིན་པའི་འགུལ་སྐྱོད་ལ་དམིགས་ནས་མི་རྟག་པ་སྒོམ་མྱོང་བའི་ལོ་རྒྱུས་དང་། ནུབ་ལ་ཕྱི་གངས་ཀྱི་ར་བ་ནས། མི་ལ་བཞད་པའི་རྡོ་རྗེས་ཕྱག་རྒྱ་ཆེན་པོ་ཐུགས་ཉམས་སུ་བསྟར་བའི་ལོ་རྒྱས། རྡོ་གྲུབ་ཆེན་གྱིས་དབེན་གནས་འདི་འདྲ་བར་རྫོགས་ཆེན་ཐོད་རྒལ་གྱི་ཟབ་ཆོས་ཉམས་བཞེས་རྩལ་འདོན་མཛད་པའི་ལོ་རྒྱུས་སོགས། ཡིད་ལ་ཝ་ལེར་དྲན་ཡོང་།
སྒར་ཚོགས་དེ་ནི་སྐྲན་ནད་ཅན་གྱི་ཕྲུ་གུ་ལོ་ན་དྲུག་ནས་བཅོ་ལྔ་བར་ལོན་མཁན་ཚོར་ཆེད་དམིགས་རིན་མེད་ཐོག་སྦྱོར་འཇགས་བྱས་པའི་སྡོད་སྒར་ཞིག་རེད། སྡོད་སྒར་དེར་ས་ཁྱོན་ཨེ་ཀར་བརྒྱ་དང་ལྔ་བཅུ་ལྷག་དང་། རྩེད་ཐང་། རྫིང་བུ། རྒྱུག་ཆུ། ཀྱག་ཀྱོག་གི་ལམ་ཕྲན་ལྡན་པའི་སྐྱེད་ཚལ་སོགས་རང་བཞིན་མཛེས་ལྗོངས་ཀྱིས་ཁོར་ཡུག་ཀུན་ནས་བརྒྱན་པ། དེའང་འབྱོར་ལྡན་གྱི་རོགས་དངུལ། ལྷག་བསམ་ཅན་གྱི་མི་མང་ཚོའི་ཞལ་འདེབས། ལོ་རེར་མི་གྲངས་བརྒྱ་དང་ལྔ་བཅུ་ལྷག་གིས། བྱམས་བརྩེའི་ལྷག་བསམ་གྱི་དང་བླངས་ཞབས་ཞུ་བཅས་ལ་བརྟེན་ནས་གྲུབ་པ་ཞིག་རེད། སྐྲན་ནད་ཅན་གྱི་ཕྲུ་གུ་དང་དེའི་སྤུན་མཆེད་ལོ་ན་ཆུང་གྲས་དག་ཀྱང་འཛུལ་ཞུགས་བྱས་ན་ཆོག་པ་ཞིག་འདུག

ཚོགས་པ་དེའི་འགྲེལ་བརྗོད་བྱས་པ་ལྟར་ན། ཚོགས་པ་དེས་ཆ་སྙོམ་བདུན་གཅིག་ལ་ཕྲུ་གུ་རེར་ཨ་སྒོར་ཉིས་སྟོང་གི་འགྲོ་སོང་གཏོང་གིན་ཡོད་པ་དང་། ལོ་རེའི་ཆ་སྙོམ་འགྲོ་སོང་ཨ་སྒོར་ས་ཡ་གཅིག་ལྷག་དང་། ཕྲུ་གུ་འཛུལ་ཞུགས་ཀྱི་གྲངས་ཀ་དགུ་བཅུ་ཡས་མས་ཤིག་ཡིན་ཟེར། དེ་དག་ཀྱང་གཙོ་བོ་ཟས་སོང་དང་། འགྲིམ་འགྲུལ། སྨན་དང་སྨན་ཆས། སྡོད་སྒར་ལེགས་བཅོས་དང་། ཁོར་ཡུག་གཙང་བཟོ་སོགས་ཀྱི་ཐོག་གཏོང་གིན་ཡོད་པ་དང་། སྡོད་སྒར་དེའི་འཕྲོད་བསྟེན་དང་སྨན་བཅོད་ཐད། སོ་ལོན་ཁ་ཁྲི་རེན་སྐྲན་ནད་དྲན་རྟེན་ལྟེ་བ་དང་། མོན་གྲི་བེ་ཡར་གསོ་རིག་ལྟེ་བ་གཉིས་ཀྱི་དང་བླངས་སྨན་པ་དང་སྨན་ཞབས་དག་གིས་རོགས་སྐྱོར་གནང་གི་ཡོད་འདུག
སྡོད་སྒར་དེས་ཕྲུ་གུར་ཚོར་གནང་བཞིན་པའི་བྱེད་སྒོ་གཙོ་བོ་ཁག་ནི། མཚོ་ངོགས་སུ་གོ་གྲུ་གཏོང་བ། ཉ་འཛིན་པ། བཅོས་རྫིང་ནང་ཆུ་རྐྱལ་བྱེད་པ། སྒྱུ་རྩལ། ལག་རྩལ། འཁྲབ་སྟོན། རང་བྱུང་ཁམས། དྲ་པོལ། སིལ་པོལ། ཐག་རྩེད། ལྕོག་མཁར་སྟེང་འཛེགས་པ། འཕོང་རྩལ། ལྟེ་སྐོར་ཟམ་པའི་ཐོག་འགྲོ་བ་སོགས་རེད། སྐབས་དེར་ངའི་བུ་ཆུང་ད་དུང་རེས་གཟའ་པ་སངས་ནམ་ཤར་ལ་སྨན་ཁང་དུ་བསྟེན་གཏུགས་བྱེད་དགོས་སྟབས། གཟའ་ཕུར་བུའི་ཕྱི་གྲོར་བུ་ཆུང་བཅའ་དངོས་བཅས་ཚུར་རང་ཁྱིམ་དུ་བསུས། གཟའ་པ་སངས་ཀྱི་ཞོགས་པ་སྔ་བོ་ནས་སྨན་ཁང་དུ་སོང་སྟེ། ཉིན་དེའི་སྨན་བཅོས་གྲུབ་རྗེས་ཕྱིར་རང་ཁྱིམ་དུ་ལོག་སྟེ། གཟའ་མཇུག་གི་ཉི་མ་ནང་ནས་བསྐྱལ། གཟའ་ཉི་མའི་དགོང་ག་ཆུ་ཚོད་བཞི་ལྔ་གང་རུང་ཞིག་གི་ཐོག ངའི་ཆུང་མའི་མ་རྒན་དང་གཅེན་པོ་ངེད་བཟའ་མི་གསུམ་བཅས། ངེད་ཅག་མི་བཞི་བུ་ཆུང་ཕར་སྡོད་སྒར་དུ་བསྐྱེལ་བར་ཕྱིན། སྡོད་སྒར་དུ་སླེབས་རྗེས་སྔར་བཞིན་འབྱོར་ཐོ་བཀོད་འཕྲལ། ཆུང་མའི་མ་རྒན་གྱིས་སྒོར་ལྔ་བརྒྱ་དང་། གཅེན་པོས་སྒོར་ལྔ་བརྒྱ་སྡོད་སྒར་ལ་ཞལ་འདེབས་སུ་ཕུལ། ང་ཚོས་ཆུ་ཚོད་ཁ་ཤས་ཤིག་གི་རིང་། སྡོད་སྒར་གྱི་ཕྱོགས་མཐར་སྤྲོ་འཁྱམས་བྱས་ཤིང་དྲན་རྟེན་གྱི་པར་ཡང་བཏབ།

བུ་ཆུང་སྡོད་སྒར་དེར་ཞུགས་པའི་བདུན་གཉིས་པའི་གཟའ་ཕུར་བུའི་ཕྱི་དྲོར། ངའི་ཆུང་མས་ལས་ཀ་ནས་སྔ་དགོངས་ཞུས་ཏེ་མོ་རང་གཅིག་པུ་བུ་ཆུང་ཚུར་རང་ཁྱིམ་དུ་བསུ་བར་ཕེབས། དགོང་མོར་དེར་ང་ད་དུང་ལས་ཁུངས་སུ་ཡོད་སྐབས། མོས་ཁ་པར་ཞིག་སླེབས་ཏེ། བུ་ལ་ཆམ་ནད་ངན་པ་ཞིག་ཕོག་ཡོད་པ་དང་། རྐང་བའི་པུས་ཞབས་སུ་རྨ་ཆེན་པོ་ཞིག་ཀྱང་བཟོས་ཡོད་ཚུལ་བཤད། ང་ལ་སླར་ཡང་སེམས་ཁྲལ་དང་སྐྲག་སྣང་ཆེན་པོ་ཞིག་བྱུང་མོད། སྡོད་སྒར་གྱིས་ང་ཚོར་ཉེན་བརྡའི་ཁ་པར་གང་ཡང་མ་བཏང་བའི་ཚུལ་ལ་བལྟས་ན། བུའི་ཆམ་ནད་དང་རྨས་སྐྱོན་ལ་ཉེན་ཁ་ཆེན་པོ་དེ་ཙམ་ཡོད་པ་མ་རེད་བསམས་ནས་སེམས་པ་ཅུང་ལྷོད་ལ་ཕབ། ལས་ཀ་ནས་ནང་དུ་མ་སོང་བར་ཕར་ཐད་ཀར་ཆུང་མའི་མ་རྒན་གྱི་ཁྱིམ་དུ་ཕྱིན། ང་མ་རྒན་མོའི་ནང་དུ་འབྱོར་སྐབས། ཆུང་མ་དང་མོའི་མ་རྒན་གཉིས་ཆ། བྲེལ་ཚུབ་ངང་བུ་ལ་དྲོད་ཆས་བསྐོན་པ་དང་། གྱ་སྒའི་ཁུ་བ་དྲོན་མོ་བླུད་ཀྱིན་འདུག བུའི་གཟུགས་པོ་ཕལ་ཆེར་ནག་པོར་གྱུར་ཏེ། རང་རེའི་འབྲོག་ཁུལ་གྱི་འབྲོག་ཕྲུག་འདྲ་བོ་ཞིག་ཏུ་ཆགས་ཡོད་པ་མཐོང་ཞིང་། ཁ་ནས་ལུད་པ་ཡང་ཡང་རྒྱག་བཞིན་པ་ཐོས་པས། བདུན་ཕྲག་དེའི་ཕྲུ་གུའི་ལས་འཆར་ཕལ་ཆེར་ཕྱི་ལོགས་ནས་བསྐྱངས་ཡོད་པ་ཚོད་ཀྱིས་ཐུག
ངའི་ཆུང་མས་བཤད་ན་ཕྲུ་གུ་ཚོས་ཕྱི་ལོགས་ནས་རྩེད་མོ་རྩེད་སྐབས། བུ་ཐང་ལ་འགྱེལ་ནས་པུས་སྒང་དུ་རྨ་ཁ་ཆེན་པོ་ཞིག་བཟོས་ཡོད་པ་དང་། རྨ་དཀྲིས་སྟུག་པོ་ཞིག་གིས་བཏུམ་འདུག་མོད། ད་དུང་རྨ་ཁ་ནས་ཁྲག་འབབ་ཀྱིན་ཡོད་སྟངས། རྨ་དཀྲིས་བླངས་ཏེ་བཅའ་སྒའི་ཕྱེ་མ་ཡང་ཡང་བཏབ་པས། ད་ལྟ་ཁྲག་ཆོད་ནས་རྨ་ཁ་ཅུང་སྐམ་འགྲོ་བཞིན་པའི་སྒང་ཡིན་ཟེར། ང་མྱུར་སྟབས་སུ་ཕྱིན་ནས་ཅིག་བལྟས་པས། རྨ་ཁ་དེར་ཕལ་ཆེར་རྨ་ལག་མཐིལ་ཙམ་ཞིག་འདུག རྨ་འདི་འདྲ་ནི་ཁོ་ལ་ལྟོས་ན་ཤིན་ཏུ་ཉེན་ཁ་ཆེན་པོ་རེད།

སྐྲན་བཅོས་ཀྱིས་ལུས་ཀྱི་རང་སྲུང་ནུས་པ་ཉམས་དམས་སུ་ཕྱིན་ཡོད་སྟབས། དུག་ལྡན་ཕྲ་རབ་རྨ་སྒོ་ནས་ལས་སླ་བོས་ངང་ལུས་ཀྱི་ནང་དུ་འཇུག་ཐུབ་པ་མ་ཟད། དུག་ཤུགས་ཀྱང་ལས་ཁམས་སུ་མཆེད་པར་རྒྱུན་ལྡན་ལུས་པོ་ཞིག་ལས་ལྡབ་འགྱུར་གྱིས་མྱུར་བ་ཡིན། ངས་བུའི་གཟུགས་པོ་ཧྲིལ་བོར་འཕུར་གནོན་གསོ་བཅོས་ཀྱི་ལག་ཐབས་དེ་ལན་མང་བོར་བེད་སྤྱོད་བཏང་། གཟུགས་པོའི་མདུན་རྒྱབ་གཉིས་ཀར་རྒྱ་སྲན་དམར་བོའི་དྲོད་ཁུག་ཐེངས་མང་བཞག ཚ་དྲོད་སྙོམ་པའི་བཅའ་སྒ་ནུར་བོ་ཡང་ཡང་འཐུང་དུ་བཅུགས། ཕྱིར་ཉིན་ཞོགས་པ་ཁ་སང་ལ་ལྟོས་ན། བུའི་ནད་གཞི་ཇེ་ཡག་ཏུ་སོང་ཡོད་པས། ཉིན་དེའི་སྨན་ཁང་དུ་བདེ་བླག་ངང་འགྲོ་ཐུབ་པ་བྱུང་། དེ་ནས་བཟུང་ཆམ་ནད་དེ་ཕྱིར་འཕར་དྭོགས་ཀྱིས་སྡོད་སྒར་དུ་འགྲོ་རྒྱུ་གནས་སྐབས་རིང་ཅམ་འཇོག་བྱས་པ་ཡིན། སྔ་ལོའི་ལོ་དཀྱིལ་ཞིག་ཏུ་བུད་མེད་ཅིག་དང་སྐྱེས་པ་གཅིག་གིས་ང་ཚོ་བཙལ་ནས་སླེབས།
ཁོང་ཚོས་གསུངས་པ་ལྟར་ན། ཁོང་གཉིས་ཀ་ནི་བྱིས་ནད་རོགས་ཚོགས་མིང་ལ༼འདོད་དོན་ཞིག་བཟོ་བ༽ཞེས་པའི་ཚོགས་པའི་དྭངས་བླངས་ཚོགས་མི་གཉིས་ཡིན་པ་དང་། ཚོགས་པ་དེ་ནི་རྒྱབ་ཁབ་རང་བཞིན་གྱི་ཚོགས་པ། བྱིས་པ་ལོ་ཆུང་ནད་གཞི་ཚབས་ཆེན་གྱིས་མནར་བ་དག་ལ་ཆེད་དུ་དམིགས་ནས། བྱིས་པ་དེ་དག་གི་མངོན་འདོད་སྒྲུབ་པར་འབད་བརྩོན་བྱེད་པའི་ཚོགས་པ་ཞིག་ཡིན་ཟེར། ཁོང་རྣམ་པས་ངའི་བུའི་ལོ་རྒྱུས་ཞིབ་རྒྱས་ཤིག་དྲི་བ་དྲིས་ལན་གྱི་ལམ་ནས་ཡིག་ཚགས་སུ་བཏབ་རྗེས། བུ་ལ་ཁྱེད་རང་གི་མངོན་འདོད་ཅི་ཞིག་ཡིན་ནམ། ཞེས་དྲིས། བུས་ལན་དུ་ངའི་མངོན་འདོད་སངས་རྒྱས་རྒྱུ་དེ་ཡིན་ཟེར། ཁོང་རྣམ་གཉིས་ཀྱིས་སླར་ཡང་། མ་རེད། དེ་མ་རེད། ཁྱོད་རང་འཛམ་གླིང་གི་ས་ཆ་གང་ཞིག་ཏུ་ཡུལ་སྐོར་སྤྲོ་བསང་ལ་འགྲོ་འདོད་པའམ། ཡང་ན། ཁྱོད་ཀྱིས་རང་ཉིད་དགའ་སའི་བཅའ་དངོས་གང་ཞིག་ལག་ཏུ་ཐོབ་འདོད་ཡོད་དམ། ཞེས་དྲིས། བུས་ལན་དུ། ང་འཇར་པན་ནམ། ཡང་ན་ཧ་བ་ཡའི་ལ་འགྲོ་འདོད་ཡོད་ཅེས་སྨྲས། ཁོང་རྣམ་པས་དེ་འགྲིགས་ཀྱི་འདུག ཁྱེད་དང་མཉམ་དུ་སུ་ཞིག་ཕེབས་ན་འདོད་དམ་ཅེས་དྲིས། བུས་ལན་དུ། ངའི་ཕ་མ་གཉིས་དང་ཨ་ཡེ་ཞེས་ལན་བཏབ། ང་ཚོས་ཁྱེད་ཀྱི་མངོན་འདོད་ཡིག་ཆར་བཀོད་ནས་རྗེས་སོར་ཁྱེད་ལ་ལན་སྟེར་འོང་། གལ་སྲིད་ཁྱེད་ཀྱི་མངོན་འདོད་དེར་འགྱུར་བ་འདྲ་སོང་བ་ཡིན་ན། ང་ཚོ་ལ་འཕྲིན་ལན་ཅིག་སྐུར་དང་། སྐབས་བསྟུན་བཟོ་བཅོས་རྒྱག་ཆོག་ཅེས་དང་། ཁྱེད་ཀྱི་མཉམ་འབྲེལ་ལ་ཐུགས་རྗེ་ཆེ་ཞེས་གསུངས་རྗེས་ཕེབས་སོང་།

ངས་གནས་ཚུལ་དེ་འདྲ་ནི་སྨོན་པ་ཙམ་ལས་མངོན་གྱུར་ཡོང་རྒྱུ་ཞིག་ཡིན་པ་ཡིད་ངོར་མ་བཞག མངོན་གྱུར་ཡོང་རྒྱུའི་འདོད་པའང་ཆེར་མེད། ཉེ་བའི་ཆར་ཚོགས་པ་དེས་ང་ཚོར་བརྡ་ལན་འབྱོར་དེ། ཧ་ཝ་ཡེས་ལ་མི་བཞི་བདུན་གཅིག་རིང་གི་ཡུལ་སྐོར་སྤྲོ་འཁྱམས་ཀྱི་ཆོག་ཡིག་ཅིག་སླེབས་བྱུང་། ངས་ཆུང་མ་དང་བུ་གཉིས་ཀར། སྤྲོ་བསང་དེ་མ་ལེན། ང་ཚོ་ནི་དཀའ་ངལ་ཆེ་བའི་མི་གྲངས་མཐའ་ཡས་པ་ཡོད་པའི་ནང་གི་གཅིག་རེད། ང་ཚོས་འགྲོ་སོང་དེ་དག་དཀའ་ངལ་ཤིན་ཏུ་ཆེ་བའི་བྱིས་ནད་ཅན་གྱི་མི་ཚང་ཚོར་རོགས་སྐྱོར་ཡོང་བའི་རེ་འབོད་ཞུས་ན་ལེགས། ཞེས་སྨྲས་པར། ངས་ཆུང་མས། འདི་ནི་གནས་སྟངས་རྒྱུན་ལྡན་དུ་གྱུར་བའི་འགྲོ་ལུགས་ཤིག་རེད། ང་ཚོས་རེ་བ་ཕྱིར་འཐེན་བྱས་ན་འགྲིགས་ཀྱང་། ང་ཚོས་རེ་གསར་དེར་ཁོང་ཚོས་དང་ལེན་བྱ་རྒྱུ་ཁག་པོ་ཡོད་པ་རེད། དེ་བས་བུས་མངོན་འདོད་ལ་ང་ཚོས་ཀྱང་བརྩི་བཀུར་བྱ་འོས། མ་འོངས་པར་འཁོས་ཀས་ལྕོགས་ཚེ་ང་ཚོས་ཀྱང་ཚོགས་པ་དེར་ཞལ་འདེབས་ཞུ་ཆོག་ཅེས་ཟེར། དེ་ལ་ངས་ཀྱང་འཐད་པ་བྱས་པ་ཡིན།
ངེད་གཉིས་ཀྱིས་ནང་མོལ་གྱིས་འདི་ལོའི་སློབ་གྲྭའི་དབྱར་ཁའི་གུང་སེང་སྐབས། ཆུང་མའི་མ་རྒན་ཐེ་བས་ངེད་ཁྱིམ་ཚང་ཧ་ཝ་ཡེས་ལ་སྤྲོ་བསང་དུ་འགྲོ་རྒྱུར་ཐག་ཆོག་བྱུང་། དེ་རིང་ནི་ཉིས་སྟོང་བཅུ་བཞི་ལོའི་སྤྱི་ཟླ་དང་བོའི་ཚེས་ཉི་ཤུ་རེད། ངའི་བུར་སྨན་བཅོས་བྱས་ཏེ་ལོ་གཅིག་དང་ཟླ་བ་བརྒྱད་ཟིན་འགྲོ་གི་ཡོད། ཟླ་རེའི་ཁྲག་གི་བརྟག་དཔྱད་དང་། ཟླ་གསུམ་རེའི་མཚམས་ཀྱི་སྨན་བཅོས་དེ་དག་གཏན་ནས་མཚམས་འཇོག་བྱ་རྒྱུར་གྲ་སྒྲིག་བྱེད་བཞིན་ཡོད། ལར་སྐྱེས་ནས་འཇིག་པ་ནི། འཇིག་རྟེན་གྱི་ཆོས་ཉིད་ཡིན་པས། མ་འོངས་པའི་དུས་ཡུན་ངེས་ཅན་ཞིག་གི་མཚམས། ད་ལྟའི་དུས་ཀྱི་སྣོད་བཅུད་ཕལ་ཆེར་སྟོངས་ནས། དུས་རབས་གསར་བ་དང་། མི་རབས་གསར་བ་དག་གིས་འཇིག་རྟེན་འདིར་སྟངས་འཛིན་བཀོལ་སྤྱོད་གཏོང་རྒྱུ་ཡིན་པར་ཐེ་ཚོམ་བྱ་མ་དགོས་པ་ཞིག་ཡིན། ངའི་བུའི་གནས་སྟངས་ཀྱང་དེ་ལས་མ་འདས་པས། ཁོའི་མ་འོངས་པའི་འཚོ་བ་དང་། གཟུགས་པོའི་གནས་སྟངས་སྐོར་མ་འོངས་པར་འཇོག་པ་ལས། ངས་འདི་ནས་མ་འོངས་ལུང་བསྟན་ལྟ་བུའི་སྐད་ཆ་ཅིའང་བཤད་ན་མི་འདོད།

ངས་བཤད་འདོད་པ་ནི། ཟས་དང་ཀུན་སྤྱོད་ཡག་པོ་ཞིག་བསྟེན་ཤེས་པ་ཡིན་ན། ནད་གང་ལའང་ཡ་ང་འཇིགས་སྐྲག་དེ་ཙམ་ཞིག་སྐྱེ་དགོས་དོན་མི་འདུག ཅེས་པ་དེ་ནི། དེ་རིང་ནི་ཨ་རིའི་མི་ནག་རང་དབང་འཐང་རྩོད་པ་སློབ་དཔོན་མར་ཁྲེན་ལོས་ཏིར་མཆོག་སྐུ་འཁྲུངས་པའི་དུས་ཆེན་ཁྱད་པར་ཞིག་ཡིན་པས། ང་ཚོའི་ལས་ཁུངས་ཀྱང་ཨ་རིའི་གཞུང་འབྲེལ་ལས་ཁུངས་སྤྱི་མཚུངས་ལྟར་སྒོ་བརྒྱབ་སྟེ། དུས་ཆེན་འདིར་བརྩི་བཀུར་གུང་སེང་བཏང་ཡོད། ང་ཞོགས་པ་སྔ་བོར་ཡར་ལངས་ནས་བུའི་ཞོགས་ཟས་དང་། ཉིན་གུང་གི་ཁ་ཟས་བཏུང་བ་བཅས་གྲ་སྒྲིག་གིས་བུ་ཆུང་སློབ་གྲྭར་འགྲོ་ཆོག་ཆོག་བྱས། ཆུང་མས་མོ་རང་གི་རླངས་འཁོར་ཁ་འགོག་ལ་སྐྱོན་ཅུང་ཟད་ཅིག་ཤོར་འདུག ཁྱོད་ཀྱིས་བུ་ཆུང་སློབ་གྲྭར་བསྐྱེལ་རོགས་ཀྱིས་ཟེར།
སྤྱིར་ང་ཚོར་གྲོང་སྡེར་སློབ་མ་སྐྱེལ་འདྲེན་གྱི་རླངས་འཁོར་ཡོད་ཀྱང་། ད་ལོའི་དགུན་དུས་འདིར་གནམ་གཤིས་དྲོད་གྲང་གི་འགྱུར་ལྡོག་སྔར་ལས་ཆེ་བས། ང་ཚོ་རང་ངོས་ནས་ཉིན་བཞིན་བུ་ཆུང་ཕར་སློར་གྲྭར་སྐྱེལ་བཞིན་ཡོད། ཆུང་མས་བུ་ཆུང་མལ་ལས་བསླངས་ནས་ཁ་ངོ་གཙང་མར་བསྐྲུས་ཏེ་ཇ་ཁང་དུ་སླེབས་བྱུང་། ངས་ཁོ་ལ་བྱེ་ཐུག་བསྔོས་མ་ཞིག་དང་། འཇར་པན་གྱི་མེས་སོ་ཟས་ཁུ་ཚ་བོ། ཚོད་མ་ཉུང་ཉུང་། སྐྱུར་འབྲས་ཀྱི་ཁུ་བ་ཕོར་གང་གྲ་སྒྲིག་བྱས་ཡོད། ཁོ་ནམ་རྒྱུར་ལྟར་ག་ལེར་རྐུན་སྟེགས་ཐོག་བསྡད་རྗེས། ཟས་ཟ་བའི་མགོ་བརྩམས། ཇེ་ཞིག་ནས་ངས་དེ་རིང་གི་ཟས་ག་འདྲ་འདུག ཅེས་དྲིས་པར། ཁོས་ཡག་པོ་འདུག ཅེས་ལན་བཏབ། འདི་ནི་ནམ་རྒྱུན་གྱི་ཁོས་ལན་འདེབས་སྟངས་ཤིག་རེད། བུ་ཆུང་འདིས་གཞན་གྱི་སྐྱོན་མཚང་མི་སྔོག ཚང་མར་ཡག་པོ་འདུག་ཅེས་ཟེར་གྱི་རེད། ནན་གྱིས་དྲིས་ཚེ་ངས་མ་ཤེས་པའམ། ཡང་ན། ངས་བརྟག་པ་ཞིག་གཏོང་དགོས་ཞེས་ལན་འདེབས་པར་བྱེད།

ཟས་གྲུབ་ནས་རླངས་འཁོར་དུ་བསྡད། ངས་རླངས་འཁོར་གཏོང་མགོ་བརྩམས་པ་དང་ཆབས་ཅིག རྒྱུན་ལྡན་བཞིན་མདོ་གདུགས་སྒྲོལ་གསུམ་གྱིས་མགོ་བཙུགས་ཏེ། ཉིན་རེའི་ཁ་ཏོན་གྱི་འཕྲོ་བསྐྱངས། རེ་ཞིག་ནས་ང་ཚོ་སློབ་གྲྭའི་སྒོ་འགྲམ་དུ་སླེབས། བུས་དཔེ་ཁུག་ལྗིད་པོ་དེ་རྒྱབ་ཏུ་ཡར་ཁུར་ཙམ་ཁུར་ཙམ་དང་། ཟས་ཁུག་ཡང་མོ་དེ་ལག་པར་བཟུང་སྟེ་བྲེལ་ཚུབ་ངང་རླངས་འཁོར་ལས་བབ་ནས། འགྲོ་འོང་གི་འདུ་ལོང་ཆེ་བའི་སློབ་ཚོགས་ཀྱི་ཁྲོད་དུ་འཛུལ། སྐབས་དེར་ངའི་སེམས་ལ། ངའི་བུ་ཆུང་ནི་ཉི་ཆར་དང་། སད་སེར་གྱི་ཐན་པས་ཇི་ལྟར་བཅོམ་ཡང་། འཇོམས་མ་ཐུབ་པར་འཚོ་ནུས་པའི་མཐོ་སྒང་ན་བཞད་པའི་ཁེར་སྐྱེས་ཀྱི་མེ་ཏོག་ངོ་མཚར་ཅན་ཞིག་ཡིན་སྣང་འཆར་ཞིང་། མེ་ཏོག་གི་དྲི་བསུང་ཞིམ་པོ་དེས་འཇིག་རྟེན་འདིར་ཕན་བདེའི་ལེགས་སྐྱེས་ངོ་མཚར་ཅན་རེ་བསྐྲུན་ཐུབ་ན་ཅི་མ་རུང་བསམས། འཆི་ཡུལ་ནས་ཕྱིར་འོང་བའི་ངའི་བུ་ཆུང་། ཁྱེད་ཀྱིས་རྣམ་སྨིན་གྱི་རྒྱུ་འབྲས་འདི་ལྟར་དང་དུ་བླངས་ཤིང་། འདི་ལྟར་དག་བཅོས་མཛད། ཁྱོད་དག་སོང་། དངོས་གནས་དག་སོང་། ཁྱོད་ཀྱི་བཟོད་བསྲན་དཀའ་བའི་སྡུག་བསྔལ་དང་། བློ་ཁོག་ཡངས་པའི་སེམས་རྒྱ། ལྷག་བསམ་དཀར་བའི་གཤིས་སྤྱོད་དག་གིས། ཁྱོད་ཀྱི་འཇིག་རྟེན་དང་། མི་ཚེའི་འགྲོ་ལམ་ནག་པོ་ནས་དཀར་བོ། དཀའ་མོ་ནས་སླ་བོ། ངན་པ་ནས་བཟང་བོ། འོད་མེད་ནས་འོད་ཅན་གྱི་ལམ་བུར་བསྐྱོད་པར་མཐུན་རྐྱེན་རྨད་དུ་བྱུང་བསྐྲུན་ཡོད།
ཁྱོད་ཀྱིས་དཀའ་སྤྱད་འབད་བརྩོན་འདི་ལྟར་བྱས་པར། ཕ་རྒན་ང་སྤོབས་པས་འཚེངས་ཤིང་། ཕ་རྒན་ང་རེ་བས་ཁེངས། ངས་ཁྱེད་ལ་སྙིང་ཐག་པ་ནས་ཐུགས་རྗེ་ཆེ་ཞེས་ཞུ་འདོད་བྱུང་། མཐའ་ཡས་པའི་ལེགས་ཚོགས་ཀྱི་སྐུད་ཐག་མང་བོ་གཅིག་ཏུ་བརྒྱུས་པའི་རྟེན་འབྲེལ་ལས། ངའི་བུ་ཆུང་སླར་ཡང་སྔོན་མ་བཞིན་ངས་མིག་མདུན་དུ་མངོན་བྱུང་། བར་སྣང་ན་ཤར་བའི་འཇའ་ཚོན་བཞིན་ངའི་མིག་ལམ་དུ་སྣང་བྱུང་། རྒྱ་མཚོ་ནས་ལོན་པའི་ནོར་བུ་བཞིན་ངའི་ཁྱིམ་ཕུག་ན་བརྗིད་བྱུང་། གྲང་ངར་ཁྲོད་རྙེད་པའི་མེ་ལྕེ་བཞིན་ངའི་སེམས་ཁོང་ན་དྲོས་བྱུང་། འདི་ཡན་གྱིས་ངའི་བུ་ཆུང་སྐོར་གྱི་ཟིན་བྲིས་ལེའུར་སྡེབ་པ་ཆ་ཚང་ཞིག ཀློག་མཁན་རྣམ་པ་ཚོའི་སྤྱན་ལམ་དུ་ཕུལ་ཐུབ་པར་གུས་པ་དགའ་བོ་བྱུང་།

མཚམས་འདི་ནས་ཕྱི་གླིང་གསོ་རིག་ལས་སྐྲན་ནད་སྐོར་གྱི་ཤེས་བྱ་གལ་ཆེན་ཁག་ཅིག་མུ་འགོད་དང་འབྲེལ། རང་ཉིད་ཀྱི་ཉམས་མྱོང་ལ་དཔགས་པའི་སྐྲན་ནད་རྒྱུན་ཤེས་དང་། ཟས་སྤྱོད། ཀུན་སློང་ཁྱེར་སྟངས། སྤྱིར་བཏང་གི་ནད་རིགས་ལག་ཐབས་གསོ་བཅོས་བཅས་ཀྱི་ཐད། དྲི་བ་དྲི་ལན་གྱི་ཐོག་ནས་གླེང་མོལ་ཞིག་ཞུ་རྒྱུ་ཡིན།
ཁ་མིན་དོན་གྱིས་འདི་སྐོར་མཁྱེན་འདོད་ཡོད་པའམ། ཡང་ན། ནད་གང་ཡང་རུང་བས་ཟིན་པའི་ནད་པ། ནད་བཅོས་ཐབས་སུ་ཕན་པའི་ལག་ཐབས་གང་ཞིག་ཡོད་མེད་ཤེས་འདོད་ཡོད་མཁན་ཚོར། དུས་ཚོད་ཕུད་ནས་ལན་ཅི་ཤེས་རེ་གདབ་རྒྱུ་ཡིན་པས། དེ་ལུགས་དགོངས་འཇགས་ཡོང་བ་དང་། ངོ་ཤེས་མི་ཤེས་ཀྱི་རང་རིགས་སྤུན་ཟླ་དག་གིས་ངའི་བུ་དང་། ངའི་ཁྱིམ་ཚང་ལ་གདུང་སེམས་མཉམ་བསྐྱེད་ལེགས་སྨོན་གང་དགེ་གནང་བར་ཐུགས་རྗེ་ཆེ་ཞུ་བ་ཡིན།