ས་གནས་ནས་ཐུབ་རྒྱལ་གྱིས།
ཕྱི་ལོ་༢༠༡༡ཕྱི་ཟླ་༣ཚེས་༢༥ཉིན་འདི་གར་ས་སྐྱ་སྤུ་རུ་ཝ་ལ་གཞིས་མི་མང་ཚོགས་ནས་ཇི་ལྟར་གསོལ་འདེབས་ཞུས་པ་བཞིན་དེ་རིང་འདི་གར་སྤུར་རུ་ཝ་ལ་ས་སྐྱ་མ་དགོན་བཤད་གྲྭ་རུ་དཔལ་ས་སྐྱའི་སྐྱབས་མགོན་༸གོང་མ་བདག་ཁྲི་རིན་པོ་ཆེ་མཆོག་གིས་ཕྱི་ནང་གི་ཆོས་ཞུ་བ་བླ་སྤྲུ་སེར་སྐྱ་བཅས་ཁྱོན་མི་གྲངས་བཞི་བརྒྱ་ལྷག་ལ་ཆོས་འབྲེལ་ཚེ་དབང་དང་ཡིག་དྲུག་གི་ལྗགས་ལུང་བཅས་བསྩལ་སོང་། སྐབས་དེ་ཐོག་མ་མགོན་པོ་གང་གིས་མི་མང་ལ་འཚམས་འདྲི་དང་སྦྲགས། གསུང་ཆོས་ཀྱི་སྔོན་འགྲོ་ལ་ཀུན་སློང་ཀུན་སྤྱོད་སོགས་ལེགས་པ་བཞེས་དགོས་པའི་བཀའ་གནང་སོང་། དེ་ནས་མི་མང་ལ་བཀའ་སློབ་གནང་དོན། ང་རང་ཚོར་འདས་པའི་དུས་སུ་ནོར་འཁྲུལ་ཆེ་ཤོས་དེ་ཆོས་བརྒྱུད་དང་ཆོལ་ཁ་ཕན་ཚུན་དབར་ཕྱོགས་ཞེན་འཐེན་འཁྱེར་བྱས་པ་ལ་བརྟེན་ནས་ད་ལྟའི་གནས་སྟངས་འདི་བྱུང་བ་རེད།དེང་གི་དུས་འདིར་སྤྱི་ནོར་༸གོང་ས་སྐྱབས་མགོན་ཆེན་པོས་དབུ་ཁྲིད་པའི་བཀའ་སློབ་ལམ་སྟོན་འོག་ངེད་ཅག་ཚང་མ་མཐུན་སྒྲིལ་གོམ་བུ་གཅིག་ཏུ་སྒྲིལ་དགོས་ཡ་དེ་ཞེ་དྲག་གལ་ཆེ་རེད།
ཆོས་བརྒྱུད་ཕན་ཚུན་དབར་མཚོན་ནའང་སྟོན་པ་གཅིག་གི་སློབ་མ་དང་དེས་སྟོན་པའི་ས་ལམ་འབྲས་བུའི་རྣམ་གཞག་ལ་ཁྱད་པ་གཏན་ནས་མེད་པས་ཉམས་ལེན་གཅིག་མཚུངས་རེད། དེ་བཞིན་ཆོལ་ཁ་ཡིན་ནའང་སྟོད་ནས་སྨད་རྒྱ་བོད་ས་མཚམས་ཡན་གྱི་མི་མང་ཚང་མ་དཀོན་མཆོག་ལ་བློ་གཏད་ཞུ་མཁན། ཁ་ནས་མ་ནི་བགྲང་མཁན་རྩམ་ཟན་གཅིག་མཚུངས་ཡིན་པས་ཁྱད་པ་དང་ཕྱོགས་རེས་བྱེད་དགོས་ནམ་ཡང་མེད།དེ་བཞིན་ཚེ་རིང་པོ་འཚོལ་གནས་བྱེད་དགོས་ཚེ་སྤྱི་བཏང་ཚེ་དབང་ཚེ་སྒྲུབ་དགོས་ཀྱང་ཚང་མས་འཕྲོད་བརྟེན་ཐོག་ནས་ཐུགས་གནང་དགོས་པ་མ་ཟད་དེང་གི་དུས་སུ་གཞོན་སྐྱེས་ཚོར་ནང་ལོག་ལ་དུག་རྫས་འདྲ་མིན་ཟས་ནས་ལུས་སེམས་གཉིས་ཀ་འཕྲོ་རླགས་གཏོང་མཁན་ཡོད་ཚོད་འདུག་པས་དེ་དག་ཚང་མ་མི་ཚེ་དོན་ལྡན་ཞིག་ཡོང་ཐུབ་དགོས་ཡ་ལ་འབད་དགོས་པ་དང་། གཞན་ཡང་ངེད་ཅག་གནས་ཡུལ་རྒྱ་གར་ལུང་པ་དེ་གནའ་ནས་ད་བར་དུ་བཀའ་དྲིན་བླ་ལྷག་ཏུ་ཆེ་བས་ལུང་པ་ཞིག་རེད། དེ་ཕྱིར་ཚང་མས་ཡུལ་མི་དང་མཐུན་ལམ་གནང་དགོས་པ་མ་ཟད་ཡུལ་ཁྲིམས་ལ་བརྩི་སྲུང་ངེས་པར་དུ་གནང་དགོས། གཙོ་ཆེ་ངེད་ཅག་རྣམས་ཀྱི་སྐྱབས་མགོན་སྤྱི་ནོར་༸གོང་ས་སྐྱབས་མགོན་ཆེན་པོས་མ་གཅིག་བུ་ལ་གདམས་པ་ལྟར་བཀའ་སློབ་ལམ་སྟོན་རྣམས་དུས་ཁོམས་བྱུང་ཚེ་ཀློག་པ་ཙམ་མ་ཡིན་པ་དུས་རྒྱུན་དུ་ལག་ལེན་སྟར་དགོས་ཡ་དེ་ཞེ་དྲག་གི་གལ་ཆེ་རེད་དེ་ལྟར་བྱུང་ཚེ་མཆོད་པ་ཐམས་ཅད་ཀྱི་ནང་ནས་མཆོག་ཏུ་གྱུར་པ་དེ་བླ་མར་མཆོད་པ་དེ་མཆོག་ཡིན་ཙམ་ཆོས་འཇིག་རྟེན་གཉིས་ཀའི་དོན་ཡིན་པས་ཚང་མ་ཐུགས་ལ་འཇོགས་རོགས་གནོངས་ཅེས་གསུང་སོང་།
དཔལ་ས་སྐྱ་བའི་ལུང་བསྟན་ནང་ལ། །
བཀའ་གདམས་བཤེས་གཉེན་ཚོའི་སྟོན་པ། །
དཔལ་ལྡན་ཨ་ཏི་ཤ་དེ་ཡིས། །
བོད་ས་སྐྱ་བོའི་གནས་འདི་རུ། །
ཧྲྰི་དྷྰི་དང་ཧྰུང་སོགས་ཀྱི་སྔགས། །
ཡིག་གཟུགས་ས་བོན་སྔོན་གཟིགས་ནས། །
སྐྱེས་ཆེན་འཁྲུངས་འགྱུར་ལུང་བསྟན་བཞིན། །
བདག་གི་ཤ་ཡི་མིག་གིས་ཀྱང་། །
མཇལ་བས་བཀའ་དྲིན་འཇལ་དཀའ་འོ། །
༸གང་གི་༸སྐུ་ཚེ་ཡུན་བརྟན་ཤོག །
༄༅། །སྐྱབས་སུ་མཆི། བཀའ་སློབ་གལ་ཆེན་གནག་ཐོག་ཏུ་གཙག་ལྟ་བུར་གནང་འདུག་པས་འདི་བཞིན་ཚང་མས་ཉམས་ལེན་དོན་འཁྱོལ་བྱ་གལ་ཆེ་བ་དགོངས་འཇགས་ཞུ་ཞིང་། ༧བདག་ཁྲི་རིན་པོ་ཆེ་སྐུ་ཚེ་ཞབས་པད་རྡོ་རྗེའི་ཁམས་སུ་བརྟན་པའི་སྨོན་འདུན་ཤུགས་དྲག་བཅས་མདོ་སྨད་རེབ་གོང་ནས།
འཆི་མེད་མི་ཞིག་སྲུང་བའི་གུར་ཁང་ནང་། །འཆི་མེད་ཚེ་སྦྱིན་ལྷ་མོ་སྤྱན་བདུན་མ། །འཆི་མེད་ཚེ་ལ་དབང་བའི་ཚོགས་རྣམས་ཀྱི། །འཆི་མེད་ཚེ་དངོས་གྲུབ་སྩལ་དུ་གསོལ།། །།
ས་སྐྱ་གོང་མ་འདི་བ་ཚང་༧གོང་ས་མཆོག་གི་བཀའ་དགོངས་བཞིན་འགྲོ་མཁན་བོད་ཀྱི་བླ་ཆེན་ཚོའི་གྲས་ནས་ཡག་ཤོས་དེ་ཡིན་པ་རེད།ང་ཁོང་ལ་དགའ་བོ་ཡོད།ཁོང་གི་ཐུགས་དགོངས་ལྟར་ཡོང་སྨོན་ནོ།།
ས་སྐྱ་གོང་མ་དབང་ལ་དགའ། །
ཟླ་བ་ཆོས་འཛོམས་གོང་མར་དགའ། །
རྟགས་དང་རྟེན་འབྲེལ་འདིར་ཚང་བས། །
དབང་དགའ་གོང་དགའི་བཀྲ་ཤིས་ཤོག །