དེ་རིང་ངས་དབྱིན་སྐད་དུ་Hitler in Colourཞེས་པའི་དངོས་བཤུས་གློག་བརྙན་ཞིག་ལ་བལྟས་པ་ཡིན། དེའི་ནང་དུ་སྤྱི་ལོ་༡༩༣༦ལོར་ཧི་ཡིས་ཨོ་ལིམ་ཕིས་ཁུ་འཇར་མན་དུ་འཚོགས་པའི་གོ་སྐབས་བེད་སྤྱོད་ཀྱིས་སྐབས་དེར་རྩེད་འགྲན་ལ་ཞུགས་པའི་རྒྱལ་ཁབ་དག་གི་མདུན་ནས་རྫིག་རྫིག་ངར་ངར་གྱིས་རང་གི་སྟོབས་ཤུགས་ངོམ་པ་དང་། དེ་ནས་ལོ་གཅིག་གི་རྗེས་སུ་ཨ་སི་ཀྲི་ཡར་བཙན་འཛུལ་བྱེད་མགོ་བརྩམས་པ་དང་། དེ་བཙན་བཟུང་བྱས་མ་ཐག་ཧྥ་རན་སི་ལ་དཔུང་འཇུག་གིས་དེ་ཡང་བཙན་བཟུང་བྱས། དེ་ནས་ད་དུང་འདོད་པ་མ་ཁེངས་པར་དབྱིན་ཡུལ་ལ་དཔུང་འཇུག་བྱས་པར་དེ་རུ་སྣ་རྒྱུགས་ཚ་ཐག་ཆོད་ཅིག་རག་རྗེས། དམག་སྣ་ར་ཤི་ཡ་ལ་གཏད་དེ་མོ་སི་ཁོའི་ཐག་ཉེ་བར་དུ་བཙན་འཛུལ་བྱས་པ་ན། སི་ཏ་ལིན་གཞི་ནས་རྨོངས་གཉིད་ལས་སད་དེ་དམག་རྒྱག་ཐེངས་རབས་དང་རིམ་པ་ཡིས་ན་ཚེ་འཇར་མན་པ་ཁོ་ཚོའི་རྒྱལ་ས་བར་དུ་འདེད་གསོད་དང་། མཐའ་མ་སྦར་ལིན་ཡང་ར་ཤི་ཡའི་དམར་དམག་གི་ལག་ཏུ་ཤོར་ནས་ཧི་ཁྲི་ལིར་གྱིས་རང་སྲོག་རང་གིས་གཅོད་དགོས་ཐུག་སོང་། གློག་བརྙན་འདིའི་ཞར་དང་ཞོར་ལ་ན་ཚེ་བས་ཇུའུ་མི་རིགས་ས་ཡ་དྲུག་དམར་གསོད་དང་། ར་ཤི་ཡའི་དམག་གིས་འཇར་མན་གྱི་སྐྱེས་དམན་ས་ཡ་གཉིས་ལ་བཙན་གཡེམ། དེ་བཞིན་དམག་འཁྲུག་འདིའི་ནང་ར་ཤི་ཡའི་དམར་དམག་ས་ཡ་གཉིས་ལྷག་ཤི་བ་སོགས་འཇིགས་སུ་རུང་བའི་འཁྲུག་ཆེན་གཉིས་པའི་ཟུར་ཁ་ཞིག་མིག་དབང་བརྒྱུད་དེ་སེམས་གཏིང་དུ་ཟུག་སོང་།