༧གོང་ས་མཆོག་གིས་ལ་དྭགས་སུ་བསྩལ་བའི་བཀའ་སློབ།

Comments (39) on “༧གོང་ས་མཆོག་གིས་ལ་དྭགས་སུ་བསྩལ་བའི་བཀའ་སློབ།”

1. ༧གོང་ས་མཆོག་གིས་ལ་དྭགས་སུ་སྩལ་པའི་བཀའ་སློབ་ཞུ་བའི་གོ་སྐབས་ཐོབ་པར་སྐལ་བ་བཟང་། ཡང་དག་པའི་བཀའ་སློབ་ལ་གུས་བཀུར་ཞུ། རྗེ་བཙུན་བླ་མའི་ཞབས་འདེགས་ལ་དམིགས་ཏེ། བོད་ཡིག་གི་ཡི་གེའི་དག་ཆ་རྣམས་བོད་ཀྱི་མཁས་པ་རྣམས་ཀྱིས་བྲིས་པའི་བཀའ་བསྟན་གསུང་འབུམ་བཅས་ན་ཡོད་པ་ལ་བརྩི་བཀུར་ཞུས་ཏེ། བོད་ཀྱི་ཡི་གེའི་དག་ཆ་རྣམས་ལ་བརྩི་བཀུར་ཞུ་ན། བོད་ཀྱི་རིག་གཞུང་སྲུང་ཐུབ། དེ་ལ་བོད་ལ་གཅེས་པ་རྣམས་ཀྱིས་འབད་རྩོལ་བྱེད་དགོས་པར་མཐོང་། དེ་ཡང་། བཀའ་སློབ་བསྩལ་བ་འདིར། ཅེས་པ་དེ་ཚིག་མཛོད་རྣམས་ན་ནོར་འཁྲུལ་ཡོད་པའི་རྗེས་སུ་འབྲངས་པར་ངེས། ཚིག་མཛོད་དག་ན་ཡང་གཞུང་དཔེ་རྣམས་དང་ཚིག་མི་མཐུན་པ་མང་། དེས་ན། སྔར་བོད་ཀྱི་མཁས་པ་རྣམས་ཀྱི་ལུགས་ལྟར་ན། བཀའ་སློབ་སྩལ་པ་འདིར། ཞེས་འབྲི་དགོས་པར་མཐོང་ངོ་།།

2. ༧གོང་ས་མཆོག་གི་བཀའ་དགོངས་གོ་བ་ལོག་པའི་འུར་མ་རྒྱག་རོགས། ལྷག་དཀར་ལགས་ཀྱི་གསུང་པ་འདིར་སྐྱར་བཀོད་ཞུས་ཡོད་ཡག་པོ་ཞིག་མཐོང་སོང་། རྒྱུ་མཚན་བོད་ནང་གི་མི་མང་པོ་ཞིག་ལ་མཚོན་ན་ནམ་རྒྱུན་རྒྱ་ནག་གི་དམ་དྲག་པའི་སྟངས་འཛིན་འོག་ན་བཙན་བྱོལ་ནང་གི་གནས་སྟངས་ཕྲ་ཞིང་ཕྲ་བ་རེ་རེར་མིག་ལྟོས་དང་རེ་བ་བྱེད་ཀྱི་ཡོད་པ་བཞིན། ཉེ་སྔོན་༧གོང་ས་མཆོག་ནས་ལ་དྭགས་དང་ཨོ་སི་ཁྲི་ལི་ཡ་ནས་གསུངས་པའི་བཙན་བྱོལ་བོད་གཞུང་གི་མིང་བརྗེ་སྒྱུར་ཐད་ཀྱི་གསུང་བཤད་གང་ལའང་མཚོན་ནའང་ཁོང་ནས་བོད་པ་སྤྱི་བའི་ལས་དོན་ལ་འཐུས་ཤོར་ཡོང་ཉེན་གྱིས་ཆུ་མ་ཡོང་གོང་གི་རགས་བྱས་ཏེ་ཚང་མའི་བྱ་བ་གང་ལའང་བབ་ཅོལ་བྱེད་མི་ཉན་པའི་ཉེན་བརྡ་བཏང་བ་ཙམ་ལས་ཚོགས་པ་དང་ཚོགས་པའི་བར་དུ་བསྒྲགས་གཏམ་སྤེལ་ནས་ངོ་རྒོལ་བྱེད་རྒྱུ་ཞིག་ཡེ་ནས་གསུང་མི་འདུག་པར་བསམ། བཙན་བྱོལ་གཞུང་མང་གང་ལ་མཚོན་ནའང་བོད་ནང་གི་མི་རྣམས་ཀྱིས་རྣ་བས་ཉན་ས་དང་སེམས་ཀྱིས་རེ་ས་གཅིག་པོ་ཡིན་པས་གཞུང་སྒེར་གྱི་ཚོགས་པ་གང་ལ་མཚོན་ནའང་སྒེར་གྱི་ཆགས་སྡང་བསགས་ས་ཞིག་ཏུ་མི་འགྱུར་བར་ཚང་མས་རེ་ས་གཅིག་པོ་སྟེ་བོད་མི་ས་ཡ་དྲུག་གི་བདེ་སྡུག་གཞི་ལ་བཞག་ནས་བྱ་བ་གང་ལའང་བསམ་ཤེས་ཀྱིས་ཞུགས་ན་འགལ་བ་ཐལ་ཆའི་རིགས་བྱུང་མི་སྲིད་པ་ཞིག་རེད། དེ་བས་ང་ཚོས་གསུང་གཅིག་ཉིད་དུ་གསུངས་ནའང་།། དུ་མ་ཉིད་དུ་སོ་སོར་གོ་ཞེས་པ་བཞིན་གོང་ས་མཆོག་གི་གསུང་གང་ཡིན་ཡང་བོད་མི་སྤྱི་བོ་གནམ་བསྟན་ཡོངས་ཀྱི་བདེ་སྡུག་གི་ཆེད་དུ་གསུང་གི་ཡོད་པ་བཞིན་ང་ཚོ་མི་རེ་ངོ་རེ་ནས་བོད་སྤྱི་བའི་འཕྲལ་ཕུགས་ཀྱི་བདེ་དོན་ལ་བསམ་བློ་བཏང་ནས་མི་སྒེར་དང་ཚོགས་པ་གང་ཡིན་ཡང་སོ་སོ་རང་ངོས་ནས་བསམ་བློ་བཏང་སྟེ་དུས་ལ་དཔག་ནས་བབ་དང་བསྟུན་རྒྱུ་གལ་ཆེན་རེད་བསམ་ལ། དེ་མིན་གོང་ས་མཆོག་གི་གསུང་ཁ་ལ་ཁྱེར་ནས་ཚོགས་པ་སྐྱིད་སྡུག་གི་བར་དུ་ཆགས་སྡང་བསགས་རྒྱུ་ནི་གོང་ས་མཆོག་གི་དགོངས་བཞེད་ཡེ་ནས་མ་ཡིན་པས་ཚོགས་པ་དང་ཚོགས་པའི་བར་དུ་བསྒྲགས་གཏམ་སྤེལ་ནས་ངོ་རྒོལ་བྱེད་པ་ནི་ཐལ་དྲགས་མ་སོང་འང་བསམ་ལ། བཙན་བྱོལ་ནང་གི་ཚོགས་པ་སྐྱིད་སྡུག་གང་ཡིན་ཡང་ལས་དོན་ལ་འཐུས་ཤོར་བྱུང་ས་ཡོད་སྲིད་མོད། ང་རང་སྒེར་ངོས་ནས་གཞོན་ལྷན་སོགས་ཀྱི་ལྷག་བསམ་དང་སྙིང་སྟོབས་ལ་ནམ་ཡང་རྗེས་སུ་ཡི་རང་བྱེད་ཀྱི་ཡོད་ཀྱི་ཡོད་ལ། ཚོགས་པ་གང་དང་གང་ལ་ཡང་རང་རང་གི་ལངས་ཕྱོགས་དང་རྩ་དོན་ཡོད་པས་སྐབས་རེར་ཕན་ཚུན་བར་ལ་འགལ་ཆའི་རིགས་བྱུང་ཡང་སྲིད་མོད་འོན་ཀྱང་སོ་སོས་ཚོགས་པ་བེད་སྤྱད་ནས་མི་སྒེར་གྱི་ཆགས་སྡང་དང་དུངས་ཞེན་བརྩད་དེ་བོད་པའི་མཐུན་སྒྲིལ་ལ་གཏོར་བཤིག་མི་ཡོང་རྒྱུ་དང་མདོ་དོན་བོད་མི་སྤྱི་བོ་གནམ་བསྟན་ཡོངས་ཀྱི་བདེ་དོན་ལ་དམིགས་པའི་ཀུན་སློང་གཙང་མ་ཞིག་གིས་ཕན་ཚུན་ལ་བསམ་ཤེས་བྱེད་རྒྱུ་དང་། དགོན་གྲོང་གང་གིས་ཀྱང་༧གོང་ས་མཆོག་གི་བཀའ་ཆགས་སྡང་སློང་བྱེད་དུ་མི་འཁྱེར་བའི་རེ་བ་ཧ་ཅང་ཆེ།། འདི་ང་རང་སྒེར་གྱི་རེ་བ་ཡིན་པས་བོད་ནང་གི་བོད་མི་ཡོངས་ཀྱི་ཚབ་བྱེད་མི་ཐུབ།

3. དྲ་གྲོགས་ལ་དྭགས་བློ་བཟང་འཇམ་དཔལ་ལགས། ཁྱེ་ཀྱིས་《བཀའ་སློབ་བསྩལ་བ་འདིར། ཅེས་པ་དེ་ཚིག་མཛོད་རྣམས་ན་ནོར་འཁྲུལ་ཡོད་པའི་རྗེས་སུ་འབྲངས་པར་ངེས། ཚིག་མཛོད་དག་ན་ཡང་གཞུང་དཔེ་རྣམས་དང་ཚིག་མི་མཐུན་པ་མང་། དེས་ན། སྔར་བོད་ཀྱི་མཁས་པ་རྣམས་ཀྱི་ལུགས་ལྟར་ན། བཀའ་སློབ་སྩལ་པ་འདིར། ཞེས་འབྲི་དགོས་པར་མཐོང་ངོ་།།》ཞེས་སྐུ་ཉིད་ཀྱིས་རང་གི་དགོངས་འཆར་གསུངས་པར་བཀའ་དྲིན་ཆེ། འོན་ཀྱང་བསྩལ་ཞེས་པ་དེ་སྩལ་ཞེས་པའི་འདས་ཚིག་ཡིན་པ་ཉིད་ཀྱིས་ལོས་མཁྱེན། ད་དུང་སྔ་དར་སྐབས་བསྩལད་ཅེས་འབྲི་བཞིན་ཡོད་ཀྱང་། སྐད་གསར་བཅད་སྐབས་ནས་ད་དྲག་བསྡུས་པ། དཔེར་ན། སྩལ། བསྩལ་ བསྩལད། སྩོལད། སྒྲུབ། བསྒྲུབ། བསྒྲུབས། སྒྲུབས། སྒྲོལ། བསྒྲལ། བསྒྲལད། སྒྲོལ། སྟོན། བསྟན། བསྟནད། སྟོནད། སློབ། བསླབ། བསླབས། སློབས། དེ་དག་སོགས་ཧ་ཅང་མང་ཡང་གོང་གསལ་རྣམས་རིམ་བཞིན་ད་ལྟ་བ་དང་། མ་འོངས་པ། འདས་པ། སྐུལ་ཚིག་བཅས་ལ་འཇུག་ཅིང་། དེ་ཡང་རྟགས་འཇུག་གི་གཞུང་གིས་བསྟན་ཚུལ་ལྟར་ཡིན་མོད། སྐུ་ཉིད་ཀྱིས་གསུངས་པ་ལྟར་སྔོན་གྱི་ཡིག་རྙིང་ནང་འདས་ཚིག་ལ་བསྩལ་དང་སྩལ་གཉིས་ཀ་བྲིས་ཡོད་ཀྱང་། འདས་ཚིག་ལ་བསྩལ་ཅེས་བྲིས་ན་ནོར་བ་ཡིན་པ་ཁྱེད་ཀྱིས་གང་དུ་ཁུངས་གཏུག་བཞིན་ཡོད་དམ། གསུངས་རོགས་གནང་།

4. དེང་དུས་སུ་མཚོ་སྔོན་དུ་དཔར་བའི་མདོ་མཛངས་བླུན་ནང་འདས་པར་བསྩལ་བྲིས་པ་གང་སར་འདུག་ལ་མི་རིགས་དཔེ་སྐྲུན་ཁག་གིས་བསྐྲུན་པའི་ས་སྐྱའི་གདུང་རབས་ངོ་མཚར་བང་མཛོད་ཀྱི་ཁ་སྐོང་ནང་ཡང་བསྩལ་བྲིས་འདུག དེ་གཉིས་ནང་སྔོན་མ་ནས་དེ་ལྟར་བྲིས་ཡོད་པ་ཡིན་ནམ་ད་ལྟའི་ཞུ་ཆེན་པའི་སྨྱུག་རྩེས་བསླད་བཅུག་པ་ཅི་ཡིན་ལ་བརྟག་རྒྱུ་མ་བྱུང་ཡང་། ད་ལྟ་དུས་གསུམ་ཁག་གང་སར་སྩལ་བྱ་སྩོལ་བྱེད་བསྩལ་སྩོལ་ཅིག་ཅེས་འབྲི་ཁྱབ་སུ་སོང་ཡོད་པས་འདི་རང་གཏན་ཁེལ་ན་ལེགས་པར་མཐོང་།
   ད་དུང་རྒན་འཇམ་དཔལ་ལགས་ནས་དགེ་ཆེས་ཀྱི་རྗེས་སུ་འབྲངས་ཏེ་དེང་ལ་དིང་ཞེས་འབྲི་བཞིན་ཡང་། རྟོགས་བརྗོད་བརྒྱ་པ་དང་མདོ་མཛངས་བླུན་སོགས་གནའ་དཔེ་དེ་དག་ནང་དེང་གིས་གང་སར་ཁེངས་ནས་འདུག་པ་ལའང་ཐུགས་མཉམ་འཇོག་འཚལ། དེ་མི་ད་དུང་ལགས་ཀྱི་ཚབ་ལ་ཁྱེད་ཀྱིས་ལེགས་བྲིས་པ་ཡང་ནོར་བར་མངོན་ཏེ། གོང་གསལ་དཔེ་ཆ་གཉིས་ཀའི་ནང་། འཚལ་དང་ཡིན་པའི་དོན་དུ་ལགས་བྲིས་པ་མགོ་ནས་མཇུག་བར་མང་པོ་མཐོང་རྒྱུ་འདུག ལེགས་ནི་ལེགས་པའི་དོན་སྟོན་བྱེད་དུ་འབྲི་བ་ལས་ཡིན་དང་རེད་ཀྱི་དོན་སྟོན་པའི་ལགས་ཀྱི་ཚབ་ཏུ་བྲིས་པ་གཅིག་ཀྱང་མཐོང་རྒྱུ་མི་འདུག་པ་འདིའང་ཐུགས་གསོའི་ཆེད་དུ་ཕུལ་བ་ཡིན། ད་དུང་ལོ་ཙྰ་བ་དང་ལོ་ཙྪ་བ་གཉིས་ཀྱི་འབྲི་ཚུལ་གྱི་སྐོར་ཡང་ངས་སྔོན་གྱི་དཔེ་ཆ་ཁུངས་ཅན་བཅུ་གྲངས་ཤིག་ཀློག་ནས་ཁྱེད་ལ་གསལ་བཤད་གནང་བ་དེ་ལྟར་ཡང་ཁྱེད་ནས་ལོ་ཙ་བ་དག་ཚུལ་བཤད་ནས་ཁས་ལེན་གྱི་མི་འདུག་པས་ཐབས་གཞན་ཅི་ཞིག་ཡོད། ཁྱེད་ཀྱིས་དང་པོ་དགེ་ཆོས་ཀྱིས་གསུང་ཚུལ་བཤད་ཀྱང་དགེ་ཆོས་དེབ་གསུམ་གྱི་བདག་ཉིད་ཅན་དེའི་ནང་ལོ་ཙྰ་བ་ཞེས་གང་ས་གང་དུ་བྲིས་འདུག ལོ་ཙ་བ་བྲིས་ཡོད་པ་གཅིག་ལས་ང་ལ་རྙེད་མ་སོང་།
   སྔོན་གྱི་བཀའ་བསྟན་ཟེར་ནས་སྤྱི་བམ་པ་ཞིག་བཤད་རྒྱུ་མི་འདུག ལོ་ཙྰ་བ་དང་གཞུང་གང་དུ་དག་ཆ་གང་བྲིས་ཡོད་པ་རེ་རེ་ནས་གླེང་ན་བཟང་བར་སེམས། ག་རེ་རེད་ཟེར་ན། སྔོན་མའི་ལོ་ཙྰ་བ་རྣམས་ཀྱི་ཁྲོད་དག་ཆ་འབྲི་སྟངས་འདྲ་མིན་སྣ་ཚོགས་ཤིག་བྲིས་འདུག་པ་དེ་དག་ད་ཆ་ང་ཚོས་གཅིག་གྱུར་བྱེད་ཐུབ་ན་བཟང་། ད་ཆ་ང་ཚོས་ཡར་མར་ཕྱོགས་འགྲུལ་བྱས་པ་དེ་འགྲུལ་བྲིས་པ་ཡོངས་གྲགས་ཡིན་ཡང་། མདོ་མཛངས་བླུན་ནང་སྔ་ཕྱི་གང་སར་འདྲུལ་ཞེས་བྲིས་པ་དཔེ་མཚོན་ཙམ་ཡིན། དེ་དང་དེ་ལྟ་བུ་མང་པོ་ཞིག་ཡོད་པ་རེད།

5. ཚུལ་ཁྲིམས་འོད་ཟེར་ལགས་ཀྱིས་སྔ་དར་སྐབས་བསྩལད་ཅེས་འབྲི་བཞིན་ཡོད་ཟེར་བ་ཅུང་ཟད་བསམ་དགོས་པ་སྟེ། སྔོན་གྱི་དཔེ་རྙིང་བཀའ་བསྟན་གང་དུ་སྩལ་དུ་གསོལ་ཞེས་པ་མ་གཏོགས་བསྩལ་དུ་གསོལ་ཞེས་པ་འབྲི་སྲོལ་མི་འདུག །བཀའ་སྩལ་དུ་གསོལ། བཀའ་བསྩལ་དུ་གསོལ། བསྩལ་ཞེས་པ་བསལ་བའི་བརྡ་རྙིང་ཡིན་པས་བཀའ་བསྩལ་ཞེས་བྲིས་ན་མི་ལེགས་ཚུལ་མཁས་པ་སྔ་མ་རྣམས་ཀྱིས་གསུང་རྒྱུན་རེད། ཁུ་ནུ་བླ་མ་བསྟན་འཛིན་རྒྱལ་མཚན་རིན་པོ་ཆེ་མཆོག་གིས། དུས་གསུམ་གྱི་ཚེ་ཕལ་ཆེར་སྩལ་ཞེས་འབྱུང་ཞིང་སྔོན་འཇུག་སྦྱར་ན་འདས་མ་འོངས་གོ་བར་མ་ཟད་བསལ་བའི་དོན་ཡང་སྟོན། ཞེས་གསུངས་པ་དང་། དགེ་བཤེས་ཤེར་རྒྱམ། ཨ་ལགས་ཚེ་རྟན། དམུ་དགེ་བསམ་གཏན་སོགས་ཕྱིས་ཀྱི་མཁས་པ་དག་གིས་ཀྱང་དེ་ལྟའི་གསུང་རྒྱུན་འདུག ། རྒྱུད་སྟོད་གྲྭ་ཚང་དུ་འགྲེལ་བ་བཞི་སྦྲགས་ལ་ཞུ་དག་གཏོང་བའི་སྐབས། དཔེ་རྙིང་རྣམས་སུ་བཀའ་སྩལ་དུ་གསོལ། ཞེས་པ་ཤ་སྟག་ལན་མང་དུ་བྱུང་བས་མགོ་འཐོམས་དགོས་པ་བྱུང་། སོག་ཡུལ་ནས་ཁྱེར་འོངས་པའི་དཔེ་རྙིང་དགའ་ལྡན་དཔར་མ་ཞིག་འདུག་པ་དེར་ལྟ་སྐབས། སྩལ་དུ་གསོལ། ཞེས་པ་རང་དུ་འདུག །སྩལ་དུ་གསོལ། ཞེས་པ་གནང་བར་མཛོད་ཅེས་པའི་དོན་ཡིན་པས་སྐུལ་ཚིག་དང་མ་འོངས་པའི་དོན་གཉིས་ཀར་འགྲོ །

6. མདོ་སྨད་སྤྱི་ཟུར་གསེར་རྟ་ཚུལ་ཁྲིམས་འོད་ཟེར་ལེགས་དང་། མགོན་པོ་ཕྱག་གཉིས་པ་མཆོག་ལ། ལྷན་རྒྱས་གཉིས་ཀྱིས་གོང་གསལ་སྩོལ་བའི་འདས་ཚིག་ལ། བསྩལ་བ། ཞེས་མགྲིན་གཅིག་ཏུ་གསུངས་པ་ལ་དགའ་བ་བྱུང་། ཐུགས་རྗེ་ཆེ། འོན་ཁྱེད་གཉིས་ཀྱིས། མདོ་ནས་བཅོམ་ལྡན་འདས་ཀྱིས་བཀའ་སྩལ་པ། མང་དུ་བཀླགས་ཡོད་ངེས། གལ་ཏེ་ཀློག་མེད་ན་ཀློག་པར་མཛད་དགོས། བཀའ་བསྟན་གྱི་དག་ཆ་རྣམས་རང་རེ་ལ་ལྟ་བདེ་ཕྱིར་བསྡུས་པའི་དག་ཡིག་ཟ་མ་ཏོག་དང་། དག་ཡིག་ངག་སྒྲོན་གཉིས་ཀ་ནས་རིམ་པ་བཞིན་འདི་ལྟར་གསུངས་ཏེ།
   བཀའ་སྩལ་པ་དང་དངོས་གྲུག་སྩལ།
   དངོས་གྲུབ་སྩོལ་དང་སྩལ་དུ་གསོལ།
   ཚིག་རྐང་འདི་གཉིས་སུ་སྩོལ་བའི་ད་ལྟ་འདས་མ་འོངས་སྐུལ་ཚིག་བཅས་ཚང་སྟེ། ད་ལྟ་བ་དང་སྐུལ་ཚིག་གི་ཁྱད་པར་ད་བཤུལ་ཡོད་མེད་ལས་ཕྱེ་བ་ལགས།
   ཞེས་དང་། ངག་སྒྲོན་དུ།
   བཀའ་སྩལ་དངོས་གྲུབ་སྩལ་དང་སྩོལ།
   ཞེས་བཀོད་ཡོད་པ་དང་། བདག་གི་གློག་ཀླད་ན། ཆོས་ཡང་དག་པར་སྡུད་པའི་མདོ། སྡེ་དགེ་སྤར་མ། མདོ་ཞ་པ། ཤོག་གྲངས་གོ་དགུ་རྒྱབ་ཤོག་ན་ཡང་འདི་ལྟར་གསུངས་ཏེ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ངས་འདི་སྐད་མཐོང་ནས། བཀའ་བསྟན་གསུང་འབུམ་བཅས་ཀྱི་དག་ཆ་རྣམས་སྲུང་དགོས་པ་རང་ཅག་ཚང་མའི་འགན་ཡིན་མིན་གསུང་བར་མཛོད་ཅེས་ཞུ་བ་ལགས། རྗེས་སུ་ལན་ཞུ་ཆོག ད་ལྟ་ལོང་མི་འདུག་ཡིག་ནོར་ལ་ཞུས་དག་མཛོད་ཅིག ལེགས་སོ།།

7. མཆན་༥པར་ལེགས་བཤད་ལགས་ཀྱིས།

   ་་་་་་། ཁུ་ནུ་བླ་མ་བསྟན་འཛིན་རྒྱལ་མཚན་རིན་པོ་ཆེ་མཆོག་གིས། དུས་གསུམ་གྱི་ཚེ་ཕལ་ཆེར་སྩལ་ཞེས་འབྱུང་ཞིང་སྔོན་འཇུག་སྦྱར་ན་འདས་མ་འོངས་གོ་བར་མ་ཟད་བསལ་བའི་དོན་ཡང་སྟོན། ཞེས་གསུངས་པ་དང་།
   དགེ་བཤེས་ཤེར་རྒྱམ། ཨ་ལགས་ཚེ་རྟན། དམུ་དགེ་བསམ་གཏན་སོགས་ཕྱིས་ཀྱི་མཁས་པ་དག་གིས་ཀྱང་དེ་ལྟའི་གསུང་རྒྱུན་འདུག
   རྒྱུད་སྟོད་གྲྭ་ཚང་དུ་འགྲེལ་བ་བཞི་སྦྲགས་ལ་ཞུ་དག་གཏོང་བའི་སྐབས། དཔེ་རྙིང་རྣམས་སུ་བཀའ་སྩལ་དུ་གསོལ། ཞེས་པ་ཤ་སྟག་ལན་མང་དུ་བྱུང་བས་མགོ་འཐོམས་དགོས་པ་བྱུང་། ་་་་ཟེར།

8. མདོ་སྨད་སྤྱི་ཟུར་གསེར་རྟ་ཚུལ་ཁྲིམས་འོད་ཟེར་ལེགས་དང་། མགོན་པོ་ཕྱག་གཉིས་པ་མཆོག་ལ།
   སྡེ་དགེ་སྤར་མ། མདོ་སྡེ་ཨ་པ། ཤོག་གྲངས། ༡༢༩ མདོ་མཛངས་བླུན། ཡིག་འཕྲེང་༤པ་ན། དེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ།། མདོ་དེའི་ཤོག་གྲངས་༤༠རྒྱབ་ཤོག ཡིག་འཕྲེང་ ༡། དེང་། ཞེས་ཡོད་པ་མགོན་པོ་ཕྱག་གཉིས་པ་ཁྱེད་བདེན། འོན་ཀྱང་བདག་གིས་དིང་ཞེས་འབྲི་བ་ནི་རྩ་བའི་སྒྲ་གང་ཡིན་པ་དེ་སྟོན་པའམ་གོ་བའི་ཕྱིར་དུ་ཡིན། དེ་ཉིད་གྱུར་ནས་དེང་ཆགས་པ་དེ། ཁྱེད་ཙམ་དུ་མ་ཟད་སྒྲའི་འགྱུར་སྟངས་ལ་ལྟ་རྟོག་ཅན་རྣམས་ཀྱིས་མཁྱེན་དགོས། དིང་སང་ཞེས་པ་དེ་དགེ་ཆོས་ཀྱིས་བཀོལ་པ་དེ་མ་མཐོང་བའི་སྔོན་དུ་ཀློང་ཆེན་རབ་འབྱམས་པ་དང་། མཁས་གྲུབ་རྗེའི་གསུང་འབུམ་དག་ན་མཐོང་། དགེ་ཆོས་ཀྱིས་སྐད་ཀྱི་ཐོག་ནས་བོད་སིལ་བུར་མི་འགྲོ་བའི་ཆེད་དུ། བསྟན་བཅོས་ན་ཡོད་པའི་ཚིག་དག་བཀོལ་བར་སྣང།
   འཚལ་དང་ཡིན་པའི་དོན་དུ་ལགས་བྲིས་པ་མགོ་ནས་མཇུག་བར་མང་པོ་མཐོང་རྒྱུ་འདུག ཞེས་པའི་བརྗོད་པ་འདི་ནི་བདག་གི་འདོད་པ་ཡིན། བདག་གིས་མཆན་བུ་འགའ་རེའི་མཇུག་ཏུ། ཞུ་བ་ལགས་སོ། ཞེས་བྲིས་ཡོད། ཁ་བརྡའི་གསལ་བསྒྲགས་ལ། མཆན་བུ་༥༦པ་ལ་གཟིགས།
   མིང་གང་གི་མཇུག་ཏུ་ཞེ་སའི་ཕྱིར་དུ། ལེགས། ཞེས་པ་གྱུར་ནས། ལགས། ཞེས་ཆགས་པ་མ་ཡིན་ནམ། འདི་ལ་གཟུ་བོར་གནས་པའི་ཚད་ཐུབ་ཀྱི་ཁུངས་ཡོད་དམ། ལ་དྭགས་ལུང་ཁུགས་ཡིན་པས། བོད་ཀྱི་སྒྲ་མང་པོ་མ་ཞིག་པར་རང་ཅག་གནས་ཡོད། མིང་གི་རྗེས་སུ་ལེགས་ཞེས་པ་དེ་དག་གི་ནང་ན་གཅིག་ཡིན།
   ལོ་ཙ་བདང་་ཞེས་པ་ ལོ་ཙཱ་བ་ཞེས་པ་འདི་དཔེ་ཆ་དག་ན་འབྲི་ཚུལ་མི་འདྲ་བ་མང་ཙམ་འདུག། དག་ཤོས་དེ། ལོ་ཙ་པ། ཞེས་མཁས་དབང་དགེ་འདུན་ཆོས་འཕེལ་གྱིས།
   མི་ལོ་བརྒྱད་བརྒྱའི་ཡུན་ལ་རྒྱ་གར་དུ།
   མ་སླེབས་ཕྱི་དལ་ཅན་གྱི་ལོ་ཙ་པ།
   ལེགས་སྦྱར་བསྟན་བཅོས་དངོས་སུ་ཀློགས་པ་ཞིག
   ད་ལྟ་མ་ག་དྷ་ན་མཆིས་སོ་སྐད།།
   དེ་ཡང་། ལོ་ཀ་དང་ཙཀྵུ གཉིས་ཀྱི་མིང་ཡིག་དང་པོ། ལོ། ཞེ་ས་པ་དང་། ཙ། ཞེས་པ་ལ་བོད་ཀྱི་བདག་སྒྲ། པ་ཡིག་སྦྱར་ཏེ། ལོ་ཙ་པ། བོད་སྐད་དུ་བསྒྱུར་ན། འཇིག་རྟེན་མིག་ཅན། ཞེས་གྲུབ།
   གོང་གི་དགེ་ཆོས་ཀྱི་ཚིགས་བཅད་དེ། ཆོས་ཀྱི་ཚིགས་སུ་བཅད་པ། རྒྱ་གར་མ་ཧཱ་བོ་དྷིའི་ཆོས་ཚོགས་ནས། ༡༩༤༦ལོར་སྤར་པའིཤོག་གྲངས་༡༥༦ན་མཆིས། བདག་སྒྲ་ལ་བ་ཡིག་མ་ཡིན་པར་པ་ཡིག་དགོས་ཏེ། སུམ་ཅུ་པ་ན།
   གང་མིང་བརྗོད་པའི་མ་མཐའ་ན།
   ཕོ་ཡི་རྟགས་ཀྱི་སྒྲ་མེད་པ།
   དེ་ལ་ཕོ་ཡི་རྟགས་སྦྱར་ན།
   བདག་པོའི་སྒྲ་རུ་ཤེས་པར་བྱ།།
   ཞེས་པ་ལྟར་ཡིན་ཀྱང་། ཕྱིས་སུ་བརྗོད་བདེ་འདྲེན་པ་མང་དུ་བྱུང་བས།་ བོད་ཀྱི་སྒྲའི་བསྟན་བཅོས་དག་གི་དོན་ལ་ཆ་མ་གནས་པར་ཁ་སྐད་ཀྱི་སྒྲ་བཀོལ་བ་མང་དུ་བྱུང་དང་། འབྱུང་བཞིན་པ་དང་། མ་འོངས་པ་ན་ཡང་འབྱུང་བར་འགྱུར། ལེགས་སྦྱར་སྐད་དུ་དེ་ལྟར་མ་ཡིན་པར་སྔོན་བྲིས་སྒྲའི་བསྟན་བཅོས་རྣམས་ལ་རྩིས་སྟངས་ཆེ་བས། དཔེར་ན། ལོ་ངོ་སྟོང་ཕྲག་སྔོན་ལ་བྲིས་པའི་སྒྲའི་བསྟན་བཅོས་པཱ་ཎི་ཞེས་པ་དེ་ལེགས་སྦྱར་གྱི་སྐད་སྦྱོང་བ་དག་གིས་ད་ལྟར་ཡང་སྦྱོང་བ་ལགས་སོ།།

9. ལི་ཤི་གུར་ཁང་ན། བསལ་བ་ལ་བསྩལ་བ་དང་། ཞེས་སྐྱོགས་སྟོན་ཆེན་པོས་བྲིས་ཤིང་། སྡེ་དགེ་བཀའ་འགྱུར་གྱི་དཔེ་ཆ་འགའ་ན། སེལ་བའི་འདས་ཚིག་ལ། བསྩལ་ཞེས་པ་མཐོང་ངོ་།།

10. དྲིན་ཆེན་བླ་མའི་༸སྐུ་ཚེ་ཡུན་བརྟན་ཤོག །

11. སྒྲུབ། བསྒྲུབ། བསྒྲུབས། སྒྲུབས། ལྟར། སྩལ། བསྩལ་ བསྩལད། སྩོལད། མིན་པ་འདི་ཡང་ནོར་མི་འདུག་གམ། རྒན་འཇམ་དཔལ་ལགས།

12. མངའ་རིས་ཕྲིན་ལས་ལགས་ཀྱིས་ལུང་འདྲེན་བྱས་པ་ལྟར་བདེན་པ་རེད། ཚོགས་པ་སོ་སོར་ལངས་ཕྱོགས་དང་རྩ་འཛིན་སོ་སོར་ཡོད་པ་རེད། ཡིན་ན་ཡང་དེ་རྒྱུ་མཚན་དུ་བྱས་ནས་༧གོང་ས་མཆོག་ལ་སྐྱོན་བརྗོད་བྱེད་དགོས་དོན་ཅི་ཡིན་ཆ་མ་འཚལ། གལ་ཏེ་༧གོང་ས་མཆོག་གི་བཀའ་སློབ་དང་ལམ་སྟོན་ལ་ཡིད་ཆེས་མེད་ན། ཨ་ཆེ་ཕ་ལུས་སྙིང་གཏམ་བཤད་ཡོད་དོ།། ཉན་དང་མི་ཉན་སོ་སོའི་ལག་པ་རེད།། ཅེས་པ་ལྟར་༧གོང་ས་མཆོག་གི་ངོས་ནས་གནའ་སྔོན་མ་རང་དབང་སྤྲད་ཡོད་པས། ཅི་དགར་སོ་སོའི་འདོད་པ་ལྟར་ལས་འགུལ་སྤེལ་ཆོག ནང་ཁུལ་ལ་ངན་སྨྲས་ཉུང་ཙམ་གྱིས། ཕྱི་དགྲ་ལ་སྙིང་རྩ་དཔའ་ཙམ་གྱིས། ནང་དགྲ་ལ་ནམ་ཡང་གཟབ་ཙམ་གྱིས། བོད་རྒྱལ་ལོ།

13. ཨ་ཆེ་ཕ་ལུས་སྙིང་གཏམ་བཤད་ཡོད་དོ།། ཉན་དང་མི་ཉན་སོ་སོའི་ལག་པ་རེད།།
    འདི་དང་།
    ཁ་ཆེ་ཕ་ལུས་སྙིང་གཏམ་བཤད་ཡོད་དོ། །ཉན་དང་མི་ཉན་སོ་སོའི་འདོད་པ་རེད།
    འདི་གཉིས་དག་པ་རེད། ཁུངས་ལུང་སུས་གསུངས་ཐུབ་བམ།

14. བསེ་རུ་ལགས་ཀྱིས།
    ཡང་།
    ཁ་ཆེ་ཕ་ལུའི་སྙིང་གཏམ་བཤད་ཡོད་དོ།།
    ཉན་དང་མ་ཉན་རང་རང་སོ་སོ་རེད།།

15. ཀརྡོ་གཉེར་ཕྱག་པ་མཆོག

    སྒྲུབ། བསྒྲུབ། བསྒྲུབས། སྒྲུབས། ཞེས་པ་གཞུང་དཔེ་དག་ན་ཡོད་པ་དང་མཐུན། ཕྱི་མ། སྩལ། བསྩལ་ བསྩལད། སྩོལད། ཞེས་པར་བདག་གི་འདོད་པ་བཀོད་ཟིན་ཏེ། མདོ་སྨད་སྤྱི་ཟུར་གསེར་རྟ་ཚུལ་ཁྲིམས་འོད་ཟེར་ལེགས་དང་། མགོན་པོ་ཕྱག་གཉིས་པ་མཆོག་གི་ལན་ལ་སྒུག་ཡོད་པ་ལགས་སོ།།

16. རྒན་འཇམ་དཔལ་ལགས་ཀྱིས།
    ལོ་ཙ་པ། བོད་སྐད་དུ་བསྒྱུར་ན། འཇིག་རྟེན་མིག་ཅན། ཞེས་གྲུབ། ཅེས་གསུངས་འདུག
    ཁུངས་ནི།
    གང་མིང་བརྗོད་པའི་མ་མཐའ་ན།
    ཕོ་ཡི་རྟགས་ཀྱི་སྒྲ་མེད་པ།
    དེ་ལ་ཕོ་ཡི་རྟགས་སྦྱར་ན།
    བདག་པོའི་སྒྲ་རུ་ཤེས་པར་བྱ།།ཞེས་དང། དགེ་ཆོས་ཀྱིས་ཀྱང་གསུངས་འདུག་ཟེར།

17. མ་རྩོམ་ཞིག་ན། “ཁ་ཆེ་ཕ་ལུའི་སྙིང་གཏམ་བཤད་ཡོད་དོ། །ཉན་དང་མི་ཉན་སོ་སོའི་བསམ་བློ་རེད། །”ཅེས་གསལ་འདུག་ཀྱང་། ༧གོང་ས་མཆོག་གིས་དོལ་རྒྱལ་སྐོར་བཀའ་སློབ་ཅིག་བསྩལ་བའི་སྐབས་དེ་ལྟར་གསུངས་པ་ཡིད་འཇགས་སུ་འདུག་པ་ལྟར་བྲིས་པ་ཡིན།

18. བཀུར་འོས་ལ་དྭགས་བློ་བཟང་འཇམ་དཔལ་ལགས། རང་རེའི་མི་རིགས་འདིའི་སྲོག་རྩ་སྐད་ཡིག་ལ་དོ་སྣང་ཤུགས་ཆེན་གནང་བར་བཀའ་དྲིན་དཔག་མེད་ཆེ་ཞུ།
    སྐུ་ཉིད་ཀྱིས།
    མི་ལོ་བརྒྱད་བརྒྱའི་ཡུན་ལ་རྒྱ་གར་དུ།།
    མ་སླེབས་ཕྱི་དལ་ཅན་གྱི་ལོ་ཙ་པ། །
    ལེགས་སྦྱར་བསྟན་བཅོས་དངོས་སུ་ཀློགས་པ་ཞིག
    ད་ལྟ་མ་ག་དྷ་ན་མཆིས་སོ་སྐད།།ཅེས་དགེ་ཆོས་ཀྱི་ལུང་དེ་དྲངས་མོད། ལོ་ཙ་པ། ཞེས་དང་། ཀློགས་པ་ཞིག །ཅེས་དང་། མཆིས་སོ་སྐད། །ཅེས་དང་། ཡང་ཚིགས་རྐང་མཐའ་མ་ལ་གཉིས་ཤད་ཡོད་པ་ལས། དང་པོ་གཉིས་ལ་ཤད་རེ་རེ་དང་། ཚིགས་རྐང་གསུམ་པར་ཤད་མེད་པ་བཅས་ཉིད་ཀྱིས་བྲིས་འདུག འོན་ཀྱང་ཕྱི་ལོ་༡༩༨༩ལོའི་ཟླ་༡༠་བར་སི་ཁྲོན་མི་རིགས་དཔེ་སྐྲུན་ཁང་གིས་དཔར་བསྐྲུན་བྱས་པའི་《མཁས་དབང་དགེ་འདུན་ཆོས་འཕེལ་གྱི་གསུང་རྩོམ་ཕྱོགས་སྒྲིག།》ཅེས་པའི་དེབ་ཀྱི་ཤོག་ངོས་༤༡༠་བའི་ཐིག་འཕྲེང་༡་ན།
    མི་ལོ་བརྒྱད་བརྒྱའི་ཡུན་ལ་རྒྱ་གར་དུ། །
    མ་སླེབས་ཕྱི་དལ་ཅན་གྱི་ལོ་ཙཱ་བ། །
    ལེགས་སྦྱར་བསྟན་བཅོས་དངོས་སུ་ཀློག་པ་ཞིག །
    ད་ལྟ་མ་ག་དྷ་ན་མཆིས་སོ་ལོ།། ཞེས་གསལ་འདུག དེ་ཡང་། ལོ་ཙཱ་བ། །ཞེས་དང་། ཀློག་པ་ཞིག །ཅེས་དང་། མཆིས་སོ་ལོ། །ཞེས་དང་། ཚིག་རྐང་གསུམ་པའི་མཐར་ག་ཡི་ཕྱི་རྐང་གིས་ཤད་ཀྱིས་གོ་ཆོད་པ་བྱས་པ་མ་གཏོགས་གཞན་རྣམས་ལ་གཉིས་ཤད་འདུག་ཀྱངཁྱེད་ཀྱིས་དྲངས་པའི་ཚིགས་བཅད་དང་འདི་གཉིས་ལ་ཁྱད་པར་འདི་འདྲ་རེ་ཤོར་དགོས་དོན་ག་རེས་ཡིན་ནམ།
    གཞན་ཡང་དེབ་དེའི་ཤོག་ངོས་༤༩་བའི་ཐིག་འཕྲེང་༡༨་ན། དེས་ན་ལོ་ཙཱ་བ་ཤམྦྷ་ལ་པའི་ཞལ་ནས། ཞེས་དང་། ཤོག་ངོས་༣༥༥་ན། བོད་ཀྱི་ལོ་ཙཱ་བ་ཆག་ཆོས་རྗེ་དཔལ་གྱི་ལམ་ཡིག་རྒྱས་པ། ཞེས་དང་། ཤོག་ངོས་༣༥༦་པའི་ཐིག་འཕྲེང་༤་ན། དེས་ན་འགའ་ཞིག་ནི་ཡུལ་འདིར་དངོས་སུ་བྱོན་ཏེ། ཡུན་རིང་བཞུགས་པའི་སྔོན་གྱི་ལོ་ཙཱ་བ་ཚད་ཐུབ་དེ་དག་གི་གསུང་ལ་རྒྱས་ཅུང་ཟད་ཀྱང་མེད་པར། ཞེས་སོགས་ཡང་ནས་ཡང་དུ་གསལ་འདུག་པས་དགེ་ཆོས་ཀྱིས་ལོ་ཙཱ་བ་ཞེས་པའི་ཙཱ་ལ་རིང་ཆ་བཞག་ཡོད་པ་དང་། མཐའི་བདག་སྒྲ་ཡང་བ་ཡིག་འབྲི་བཞིན་ཡོད་ཚོད་འདུག་བདག་གིས་ནི་སྙམ་མོད། འོན་ཀྱང་དགེ་ཆོས་ཀྱིས་ལོ་ཙ་པ་ཞེས་ཙ་ལ་རིང་ཆ་མི་འདོགས་ཤིང་། མིང་མཐའི་བདག་སྒྲ་ལ་པ་ཡིག་ཁོ་ན་སྦྱར་ངེས་ཡིན་པར་སྐུ་ཉིད་ཀྱིས་ར་སྤྲོད་ཁུངས་སྐྱེལ་ཇི་ལྟར་གནང་ངམ།
    གཞན་ཡང་དགེ་ཆོས་ཀྱིས་བོད་ཆེན་པོའི་སྲིད་ལུགས་དང་འབྲེལ་བའི་རྒྱལ་རབས་དེབ་ཐེར་དཀར་པོའི་ནང་དེང་སང་གི་ཚབ་ལ་དིང་སང་བྲིས་མོད། འོན་ཀྱང་ཀླུ་སྒྲུབ་དགོངས་རྒྱན་ནང་དེང་སང་ཤ་སྟག་བྲིས་ཡོད། སྤྱིར་ཀླུ་སྒྲུབ་དགོངས་རྒྱན་ཉག་རོང་ཟླ་བཟང་སོགས་ཀྱིས་ཟིན་བྲིས་གནང་བ་ཕྱིས་སུ་དགེ་ཆོས་ལ་སྤྱན་འབུལ་ཞུས་པ་བཤད་སྲོལ་ཡོད་མོད། འོན་ཀྱང་ཁོང་གིས་རང་ལུགས་དེང་སང་གི་ཚབ་ལ་དིང་སང་འབྲི་དགོས་ཡོད་ན་ནི། ཟིན་བྲིས་པ་རྣམས་ཀྱིས་དེང་སང་བྲིས་པ་རྣམས་ཁོང་གིས་བཟོ་བཅོས་གནང་ངེས་སྙམ་ཡང་དེ་ལྟར་གནང་མི་འདུག་ལ། མ་ཟད་དགེ་ཆོས་ཀྱིས་བྲིས་པའི་རྒྱ་གར་གནས་ཡིག་ནང་དེང་སང་ཁོ་ན་བྲིས་འདུག་པས་དགེ་ཆོས་དེང་སང་ཡིན་ཚད་ལ་དིང་སང་ཞེས་འབྲི་མཁན་ཞིག་མིན་པར་སྙམ་མོ། འོན་ཀྱང་དགེ་ཆོས་རྩོམ་པ་བོ་གཅིག་གིས་བརྩམས་པའི་ཡིག་ཆ་ཁག་ནང་ཡི་གེའི་དག་ཆ་ལའང་མི་འདྲ་བ་འདི་ལྟར་འབྱུང་དོན་གང་ཡིན་ནམ། ཞེས་ངས་ཁྱེད་ལ་བཀའ་འདྲི་ཞུ་བཞིན་ཡོད།

19. རྒན་བློ་བཟང་འཇམ་དཔལ་དང་སྒོམ་སྡེ་ལྷ་རམ་པ་གཉིས་ལོ་གཉིས་གསུམ་ཞིག་གི་སྔོན་ལ་ཁ་བརྡ་དྲ་བའི་ནང་ཡིག་ནོར་ཐོག་རྩོད་པ་བྱུང་སོང་། དེ་དུས། སྒོམ་སྡེ་ལྷ་རམ་པ་ལགས་ཀྱིས་རྒན་བློ་འཇམ་་་་་་་་་་ཧ་ཧ་ཧ ད་མི་བཤད།

20. ལོ་ཙའམ། ལོ་ཙྰ་དང་ལོཙྪ་སོགས་ནི། ལེགས་སྦྱར་ནང་ལ་གང་བྲིས་པ་དེ་དང་བསྟུན་དགོས་པ་ལས། རང་རིགས་སྐད་གཉིས་སྨྲ་བའི་ཁུངས་དྲངས་ན་ཅུང་མི་འཐད་ལ། བདག་སྒྲ་པ་དང་པོ་གཉིས་མ་གཏོགས་དངོས་བསྟན་ལ་མེད་པ་ཡང་། རྒན་འཇམ་དཔལ་ལགས་ཅུང་བདེན་པ་བདེན་པ་ལྟར་མཐོང་ལགས། ད་དུང་དཔྱད་དགོས་པ་མང་ངོ་སྙམ་ལགས།

21. སྔར་གྱི་སྒོམ་སྡེ་ལྷ་རམ་པ་ལགས་དང་། དེང་གི་མེ་ཏོག་དཀར་པོ་གཉིས་ཀ་ཁ་བརྡར་མཐོང་ས་ལ་ཡང་མི་འདུག་གོ །

22. ལ་དྭགས་བློ་འཇམ་ལགས་ཀྱིས། ན་རོ་ཡོད་མེད་པ་བ་མ། །བདག་པོའི་སྒྲ་སྟེ་ག་ད་ན། །བ་མ་ས་དང་དྲག་མཐར་པ། །ང་འ་ར་ལ་མཐའ་མེད་ལ། །བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །ཞེས་པའི་ལེགས་བཤད་ལྗོན་དབང་གི་རྩ་བར་དཔྱད་ཞིབ་བྱེད་དགོས། གལ་སྲིད་ཁྱེད་ཀྱི་མིག་ལམ་ལ་ཁང་བ། སྟོང་བ། རྐང་བ་ལྟ་བུ་སོགས་མི་མཛེས་ཤིང་རྣར་མི་སྙན་པའི་དབང་དུ་བཏང་ཡང་། རྟགས་ཀྱི་འཇུག་པའི་སྐབས་ཀྱི་བརྗོད་བདེ་ལ་བརྩི་བཀུར་ཅིས་ཀྱང་བྱེད་དགོས་ངེས་རེད། དེ་མིན་དོན་མེད་ཀྱི་རྩོམ་འཆལ་སྤེལ་ན་ཁང་དཀར་ཚུལ་ཁྲིམས་སྐལ་བཟང་གི་དེབ་སྔོན་གསར་མའི་གླེང་བརྗོད་ཀྱི་འཆལ་གཏམ་དང་གཅིག་མཚུངས་སུ་འགྱུར་ངེས་རེད།

23. བཀུར་འོས་ལ་དྭགས་བློ་བཟང་འཇམ་དཔལ་ལགས། རང་རེའི་མི་རིགས་འདིའི་སྲོག་རྩ་སྐད་ཡིག་ལ་དོ་སྣང་ཤུགས་ཆེན་གནང་བར་བཀའ་དྲིན་དཔག་མེད་ཆེ་ཞུ་བ་དང་ཆབས་ཅིག་ངེད་ཀྱིས་བཀའ་བསྟན་གྱིས་ཡིག་རྙིང་ཁག་མཐོང་བར་མ་ཟད། དེ་དག་ན་ཡི་གེའི་དག་ཆ་འདྲ་མིན་ཡོད་པ་དེ་དག་གང་དག་དང་། གང་མ་དག་པ་ཡིན་སོགས་ལ་གང་འཚམ་བསམ་བློ་བཏང་བའི་ཁུལ་ཡིན་ལགས། བཀའ་བསྟན་ན་ཡི་གེའི་དག་ཆ་འདྲ་མིན་ཡོད་ཀྱང་དེ་དག་གང་ཞིག་གིས་ཁུངས་གཏུག་ས་མཁས་མཆོག་ཐོན་མིའི་བརྡ་སྤྲོད་པའི་གཞུང་གནང་ཡོད་མེད་ལ་ང་ཚོས་བརྟག་དགོས། གཞན་དུ་སྔོན་མའི་ཡིག་རྙིང་ཞིག་ན་འདི་འདྲ་འདུག་ཅེས་ལྐུགས་པས་ཨུ་ཚུགས་ཀྱིས་མཁས་མཆོག་ཐོན་མིའི་གཞུང་ལུགས་ཀྱི་ལྡོག་ཕྱོགས་སུ་ཕྱིན་ན་དེ་ནི་མཐའ་གཅིག་ཏུ་ནོར་བ་ཡིན་པས་གཏན་ནས་འགྲིགས་ཐབས་མེད། དེ་བཞིན་བརྡ་གསར་རྙིང་གི་རྣམ་གཞག་སོགས་སུ་ཡོད་པ་ཙམ་གྱིས་ཤ་གཟུག་ཟ་རྐྱང་མ་གནང་ན་བཟང་སྟེ། རྒྱ་བོད་ཡོངས་ལ་མཁས་པའི་མཚན་སྙན་གྱིས་ཁྱབ་པའི་ཡོངས་ཀྱི་དགེ་བའི་བཤེས་གཉེན་ཆེན་པོ་རྗེ་ཤེས་རབ་རྒྱ་མཚོའམ། ཡོངས་གྲགས་སུ་རྡོ་སྦིས་དགེ་བཤེས་ཤེས་རབ་རྒྱ་མཚོ་འཇམ་དཔལ་རྒྱས་པའི་བློ་གྲོས་ཀྱི་ཞལ་སྔ་ནས་གསུང་འབུམ་པོད་གསུམ་པའི་ཤོག་ངོས་༤༥༢་པའི་ཐིག་འཕྲེང་༦་ན། མཁས་བླུན་སྣ་ཚོགས་པས་མཚོ་ལས་སྐྱོགས་ཀྱིས་བཅུས་པའི་ཚུལ་དུ་སུམ་རྟགས། བརྡ་གསར་རྙིང་། དག་ཡིག་སོགས་ལ་གཞུང་ཆེ་ཆུང་མཐའ་ཡས་པར་སྤེལ་བ་དེ་དག་གི་ནང་ན་ཚད་མར་བྱ་བའི་འོས་མ་མཆིས་པའང་ཤིན་ཏུ་མང་ཞིང་། གྲགས་ཅན་ཆེན་པོ་དག་གི་ཡང་སྨྲ་སྒོ་མཚོན་ཆའི་དབྱངས་བདུན་དང་། ངག་གི་སྒྲོན་མེའི་དབྱངས་ལྔ་ལྟ་བུ་རང་རེའི་རྩ་བའི་མཁན་པོ་ཐུ་མི་འཇམ་པའི་དབྱངས་ཀྱིས། ཨཱ་ལི་གསལ་བྱེད་ཨི་སོགས་བཞི། །ཞེས་གསུངས་པ་དང་དངོས་སུ་འགལ་བསཁས་བླང་དུ་མི་རུང་ལ། དེའི་ཕྱིར་གང་དང་གང་ལའང་ཐུ་མི་རང་གིས། བོད་ཁ་བ་ཅན་གྱི་རྒྱལ་ཁབ་འདིར། །མི་མཁས་པ་སླེབས་པའི་སྔོན་མ་ཡིན། །དང་། ཁྱོད་ཁ་བ་ཅན་གྱི་མི་རྣམས་ལ། །ང་ཐུ་མི་བཀའ་དྲིན་མི་ཆེའམ། །གྲོགས་བློན་པོའི་ཁྲོད་ན་ང་ཙམ་མེད། །ཅེས་རང་གི་རྣམ་ཐར་མགུར་དུ་བཞེས་པ་ནི། ཕལ་བའི་དྲིན་བགྲང་བ་དང་མི་མཚུངས་པར་བདག་ཅག་རྣམས་ཀྱི་གཙུག་གི་ནོར་བུ་དང་། གདོང་གི་མིག་ལྟ་བུ་ཁོང་ཡིན་པས་དེའི་བཞེད་པ་ལ་ཕྱི་མོས་དམིགས་གཏད་བྱ་དགོས་སོ། ཞེས་གསུངས་པ་ལྟར་སྔོན་གྱི་བཀའ་བསྟན་སོགས་ཡིག་རྙིང་རེ་ཟུང་ན་སྩལ་ཞེས་པ་འདས་ཚིག་ལ་བེད་སྤྱད་ཡོད་ཅིང་། དེའི་རྗེས་སུ་འབྲང་སྟེ། བསྟན་བཅོས་སུ་དེ་ལྟར་འབྲི་མཁན་བྱུང་ཡོད། འོན་ཀྱང་དེའི་རིགས་མ་དག་རྒྱུན་འབྱམས་ཡིན་པར་བརྟེན། ༧གོང་ས་ལྔ་པ་ཆེན་པོས་ཀྱང་རང་རྣམ་དུ་ཀཱུ་ལའི་གོས་བཟང་ལྷ་སའི་ཤིང་དཔར་ཤོག་གྲངས་༣༠་བའི་མདུན་ངོས་སུ། མིང་བློ་བཟང་རྒྱ་མཚོར་བསྩལ། ཅེས་དང་། དེ་བཞིན་ངེད་ཀྱི་སློབ་དཔོན་བཀའ་དྲིན་མཚུངས་མེད་མཁས་དབང་དམུ་དགེ་བསམ་གཏན་གྱིས་བརྩམས་ཤིང་ཀན་སུའུ་མི་རིགས་དཔེ་སྐྲུན་ཁང་གིས་ཕྱི་ལོ་༡༩༩༠་ལོའི་ཟླ་༡༠་བར་དཔར་ཐེངས་ལྔ་བ་དཔར་བའི་《བརྡ་སྤྲོད་བློ་གསལ་དགའ་སྟོན་》གྱི་ཤོག་ངོས་༡༨༧་པའི་ཐིག་འཕྲེང་༡༢་ན། གནང་སྦྱིན་སོགས། སྩོལ་བ། བསྩལ་པ། བསྩལ་བ། སྩོལ་ཅེས་ད་ལྟ་བ་དང་། འདས་པ་དང་། མ་འོངས་པ་དང་། སྐུལ་ཚིག་བཅས་ཀྱི་དཔེར་བརྗོད་བྲིས་འདུག་པ་དང་།
    མཁས་དབང་ཚེ་ཏན་ཞབས་དྲུང་གིས་བརྩམས་ཞིང་མི་རིགས་དཔེ་སྐྲུན་ཁང་གི་བོད་ཡིག་རྩོམ་སྒྲིག་ཁང་གིས་ཕྱི་ལོ་༢༠༠༧་ལོར་དཔར་བསྐྲུན་བྱས་པའི་《《ཐོན་མིའི་དགོངས་རྒྱན་》གྱི་ཤོག་ངོས་༤༧༥་བའི་ཐིག་འཕྲེང་༨་ན། བཀའ་སོགས་ བསྩལ་བྱ། སྩོལ་བྱེད། བསྩལད་ཟིན། སྩོལད་ཅིག ཅེས་གསུངས་པ་དང་།
    མཁས་དབང་དོར་ཞི་གདོང་དྲུག་སྙེམས་བློས་བརྩམས་ཞིང་ཀན་སུའུ་མི་རིགས་དཔེ་སྐྲུན་ཁང་གིས་ཕྱི་ལོ་༡༩༨༧་ལོའི་ཟླ་༦་པར་དཔར་དུ་བསྐྲུན་པའི་《བརྡ་སྤྲོད་རིག་པའི་དོན་འགྲེལ་ཕྱོགས་བསྒྲིགས་》ཀྱི་ཤོག་ངོས་༢༤༠་ན། གདམས་ངག་སོགས་ བསྩལ སྩོལ བསྩལད སྩོལད་ ལྟ་བུའོ། ཞེས་བྲིས་འདུག་པས། ཁྱེད་ལྟར་ན་རྒྱལ་སྤྱི་ནང་ལ་དོན་ལྡན་མཁས་པའི་མཚན་སྙན་གྱིས་ཁྱབ་པའི་གོང་གསལ་རྩོད་མེད་ཟླ་བྲལ་གྱི་བོད་ཀྱི་མཁས་ཆེན་ཁོང་དག་གིས་བཀའ་བསྟན་གཟིགས་མྱོང་མི་འདུག་ཞུ་ནུས་སམ། ག་ལ་ནུས་སོ། །
    འོན་ཀྱང་སྐུ་ཉིད་ཀྱིས་བསྩལད་ཅེས་པ་བསལ་བའི་བརྡ་རྙིང་ཡིན་ཕྱིར། གནང་བའི་དོན་ཅན་ལ་སྩལ་ཞེས་པའི་འདས་ཚིག་ལ་སྩལད་གཅིག་པུ་འབྲི་དགོས་གསུངས་མོད། འོན་ཀྱང་བོད་ཡིག་གི་མིང་ཚིག་ཁྲོད་དོན་གཅིག་ལ་མིང་འདྲ་མིན་དང་། མིང་གཅིག་ལ་དོན་འདྲ་མིན་ཡོད་པ་སོགས་ཁྱེད་ཀྱིས་ལོས་མཁྱེན། དེ་ཤེས་ན་བསྩལ་ཞེས་པ་འདི་བསལ་བ་གཅིག་པུ་མ་གཏོགས་མི་འཇུག་དགོས་པའི་རྒྱུ་མཚན་ཅི་ཡོད། འོ་ན་བསལ་བའི་དོན་ཅན་གྱི་བསྩལ་ཞེས་པའི་ད་ལྟ་བ་ལ་སྩལ་ཞེས་འབྲི་མི་རུང་བར་ཐལ། སྩལ་ཞེས་པ་གནང་བའི་དོན་ཡིན་པ་གང་ཞིག་དེ་ཡིན་ན་བསལ་བའི་དོན་ལ་འཇུག་མི་རུང་བར་ཁྱེད་ཀྱིས་ཁས་བླང་ཟིན་པའི་ཕྱིར། འདོད་ཟེར་ན། བསྩལ་ཞེས་པ་དེ་དུས་གསུམ་དུ་གཟུགས་མི་འགྱུར་གྱི་བྱ་ཚིག་ཡིན་པར་ཐལ་ལོ། །
    གཞན་ཡང་བསྩལ་ཞེས་པ་བསལ་བའི་བརྡ་རྙིང་ཡིན་ཟེར་བ་དེ་ཡང་ས་ཁུལ་རེ་ཟུང་ལ་དེ་ལྟར་ཡིན་སྲིད་པ་ལས། བོད་ཁམས་ཡོངས་གྲགས་སུ་བསྩལ་ཞེས་པ་བསལ་བའི་དོན་ལ་མི་གོ་བ་གོང་གི་མཁས་པ་དེ་དག་གིས་གསུང་སྟངས་ཀྱིས་ཤེས་ལ། རང་རེར་ཡང་གྲུབ།
    དེ་བཞིན་ས་ཁུལ་ཁུག་གྱོག་རེ་ཟུང་ལ་བརྩམས་དང་། བརྩེགས་དང་། བརྩིགས་སོགས་ཀྱང་དོན་གཞན་གྱི་བརྡ་རྙིང་སོགས་ཡིན་མི་སྲིད། ཅེས་དང་། ང་ཚོས་གོ་སྟངས་འདི་ཙམ་ཁོ་ན་ལས། གཞན་ཚོས་དོན་གཞན་ལ་གོ་བ་ལེན་མི་སྲིད། དེ་ལྟར་གོ་བའི་ས་ཁུལ་ཡོད་མི་སྲིད། ཅེས་ཤོད་ནུས་སམ། མི་ནུས་ན། འོ་ན་ད་ནི་བརྩམས་ཞེས་པ་བསྟན་བཅོས་སོགས་བརྩམས་པའི་འདས་ཚིག་མིན། བརྩེགས་ཞེས་པ་གཅིག་ཐོག་གཅིག་བརྩེགས་ཀྱི་འདས་ཚིག་མིན། བརྩིགས་ཞེས་པ་ཁང་བ་སོགས་བརྩིགས་པའི་འདས་ཚིག་མིན་ཞེས་ཟེར་རམ། དེ་ལྟར་ཟེར་ན་ནི། ཐོན་མས་སུམ་རྟགས་ཀྱིས་ད་ནི་ཅི་ཡང་གོ་ཆོད་པར་གྱུར་ཟིན་ཏོ། །
    དེའི་ཕྱིར་ད་ནི་འདི་ལྟར་འབྲི་བར་བྱ་སྟེ།
    བརྩམས་རྩོམ་བརྩམས་རྩོམས་དུས་གསུམ་སྐུལ་ཚིག་ལྟར། བསྩལད་སྩོལ་བསྩལ་སྩོལད་འབྲི་བ་ཤིན་ཏུ་འཐད། །བརྩེགས་རྩེག་བརྩེག་རྩེགས་དུས་གསུམ་སྐུལ་ཚིག་ལྟར། །བརྩིགས་རྩིག་བརྩིགས་རྩིགས་འབྲི་བར་རིགས་པས་འཐད། །ཞེས་ཞུའོ། །

24. གསང་འདུས་རྩ་རྒྱུད་ལེའུ་བཅུ་གཉིས་པའི་ནང་། བཀའ་སྩལ་ཏོ། །ཞེས་ཤ་སྟག་ཏུ་འབྱུང་བ་དང་དཔེ་གསར་རྙིང་དག་ན་དེ་ག་རང་རེད། ཤེར་རྙིང་དུ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཞེས་པ་ལྟར་བཀའ་སྩལ་ཞེས་པའི་སྩལ་ལ་འདས་མ་འོངས་གཉིས་ཀར་སྩལ་ཞེས་འབྲི་བ་དེ་ག་རང་ཡིན་པ་ལས་བཀའ་བསྩལ་ཞེས་པ་བཀའ་བསྟན་གང་ནའང་མཐོང་མ་སོང་། འོན་ཀྱང་མ་མཐོང་ན་མེད་པས་ཁྱབ་པ་མེད་ཀྱང་སྔོན་གྱི་སྐད་གཉིས་སྨྲ་བའི་ལོ་ཙཱ་པ་རྣམས་དང་མཁས་པ་རྣམ་པའི་ལག་ལེན་ལ་བཀའ་སྩལ་ཞེས་འབྲི་བ་མ་གཏོགས་བཀའ་བསྩལ་ཞེས་མི་འབྲི་བ་རྟེན་འབྲེལ་གྱི་གནད་ཅིག་ཡོད་པ་འདྲ། །དེས་ན་ཁུ་ནུ་བླ་མ་བསྟན་འཛིན་རྒྱལ་མཚན་རིན་པོ་ཆེ་མཆོག་གིས། དུས་གསུམ་གྱི་ཚེ་ཕལ་ཆེར་སྩལ་ཞེས་འབྱུང་ཞིང་སྔོན་འཇུག་སྦྱར་ན་འདས་མ་འོངས་གོ་བར་མ་ཟད་བསལ་བའི་དོན་ཡང་སྟོན། ཞེས་གསུངས་པ་ལྟར། བཀའ་སྩལ་ཏོ། །ཞེས་པ་འདས་པ་དང་། བཀའ་སྩལ་དུ་གསོལ། ཞེས་པ་ཚིག་གྲོགས་ཀྱི་དབང་གིས་མ་འོངས་བར་གོ །བཀའ་སྩོལ་ཅིག་ལྟ་བུ་སྐུལ་ཚིག །སྤྱིར་ན་བསལ་བ་ལ་བསྩལ་དང་སེལ་བ་ལ་སྩེལ་ཞེས་བརྡ་རྙིང་ལ་དེ་ལྟར་ཡིན་ཡང་། ས་ཁུལ་ཁུག་ཀྱོག་ཙམ་མ་ཡིན་པར་བཀའ་སྩལ་ལྟ་བུ་ལ་བས་འཕུལ་མི་འབྲི་བ་ད་ལྟའི་བར་མདོ་སྟོད་སྨད་དང་དབུས་གཙང་ཁུལ་དུ་མཐོང་བ་བརྒྱུད་པའི་ལག་ལེན་དེ་ག་རང་དུ་བྱུང་ཡོད་པ་རེད།

25. མ་དག་རྒྱུན་འབྱམས་ལ་སོང་བའི་དབང་གིས་སྩལ་བའི་བཀའ་སློབ་དང་བཀའ་སློབ་སྩལ་ཞེས་བྲིས་ན་བློ་ངོར་མི་བདེ་བ་ཞིག་འདུག་མོད། བས་འཕུལ་མ་བྲིས་ན་མ་དག་པ་དང་ངེས་བར་བས་འཕུལ་འབྲི་དགོས་པའི་དོན་གནད་ག་རེ་རེད། དུས་གསུམ་ནི་གཙོ་བོར་བྱ་ཚིག་གི་སྒོ་ནས་དབྱེ་བ་འབྱེད་ཀྱང་དུས་གསུམ་གང་རུང་དང་བདག་གཞན་གང་རུང་ལ་མུ་བཞི་ཡོད་པ་ཡང་ཤེས་དགོས་པ་རེད། སི་ཏུའི་དགོངས་པའོ།།

26. ལེགས་བཤད་ལགས་ཀྱིས།
    ་་་་་ སྤྱིར་ན་བསལ་བ་ལ་བསྩལ་དང་སེལ་བ་ལ་སྩེལ་ཞེས་བརྡ་རྙིང་ལ་དེ་ལྟར་ཡིན་ཡང་། ས་ཁུལ་ཁུག་ཀྱོག་ཙམ་མ་ཡིན་པར་བཀའ་སྩལ་ལྟ་བུ་ལ་བས་འཕུལ་མི་འབྲི་བ་ད་ལྟའི་བར་མདོ་སྟོད་སྨད་དང་དབུས་གཙང་ཁུལ་དུ་མཐོང་བ་བརྒྱུད་པའི་ལག་ལེན་དེ་ག་རང་དུ་བྱུང་ཡོད་པ་རེད། འདིས་ཁུ་ནུ་རིན་པོ་ཆེའི་གསུང་ཚད་མ་ཡིན་པར་ར་འཕྲོད་ངེས་མིའདུག་གམ། འདི་ངས་ཀྱང་ལེགས་བཤད་དུ་མཐོང་ངོ་། །
    སྔར་གྱི་ཡིག་རྙིང་དུ། བསལ་ལ། བསྩལ་དང་། སོགས་ལ། སྩོགས་ཡོད་པས། རྒྱུམཚན་དེ་ལ་བརྟེན་ནས་སྔར་རྒྱུན་བཞིན་བཞག་ན།
    སྩལ་པ་པོ། བསྩལ་ཡ་ཡུལ། བསྩལད་ཟིནད་པ་སོགས་བསྒྲུབ་བྱ། སྒྲུབ་བྱེད། བསྒྲུབས་ཟིན་དང་རིགས་འགྲེས་ན་ཁུངས་ཐུབ་པ་མེད་པ་ཤེས་ཐུབ་པ་འདུག་གོ །

27. འཇམ་དབྱངས་ལགས་ཀྱིས།
    ་་་་་་། ང་འ་ར་ལ་མཐའ་མེད་ལ། །བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །ཞེས་པའི་ལེགས་བཤད་ལྗོན་དབང་གི་རྩ་བར་དཔྱད་ཞིབ་བྱེད་དགོས། གལ་སྲིད་ཁྱེད་ཀྱི་མིག་ལམ་ལ་ཁང་བ། སྟོང་བ། རྐང་བ་ལྟ་བུ་སོགས་མི་མཛེས་ཤིང་རྣར་མི་སྙན་པའི་དབང་དུ་བཏང་ཡང་། ་་་་་་་ ཟེར།
    ང་འ་ར་ལ་མཐའ་མེད་ལ། །
    བདག་སྒྲ་ཡར་གྱུར་བ་དང་ནི། །
    ཆ་ལ་པ་ཉིད་སྦྱོར་བ་ལེགས། །
    དབྱངས་ཅན་གྲུབ་རྡོར་གྱིས་གསུངས་པ་ལ་ཚད་མར་བཟུང་ནས།
    ཁང་པ་ལ། ཁང་བ།
    སྟོང་པ་ལ། སྟོང་བ།
    རྐང་པ་ལ། རྐང་བ་ལྟ་བུ་སོགས་པ་བོད་མའིའི་རང་བཞིན་གྱི་སྐད་དུ་པ་ཐོབ་སར་བ་ཡིག་བཙན་འབྱར་བྱས་པ་འདི་ནི་རིགས་པ་རྩིང་ལ། ཁ་མིག་ཡོད་བཞིན་དུ་གཡང་ལ་མཆོང་བ་ལྟར་མི་འདུག་གམ། ལགས།

28. མངའ་བདག་ཁྲི་སྲོང་ལྡེའུ་བཙན་གྱི་ཁྲིམས་ཡིག་ཏུའང་། བྱིས་པ་བརྡ་སྤྲོད་འབྲི་ཀློག་ཡོན་ཏན་སློབས།།ཞེས་པ་ལྟར་ཡོན་ཏན་མཁས་པའི་ལེགས་བཤད་ལས་འབྱུང་གི་བླུན་པོའི་བབ་ཅོལ་ལས་མིན་པ་ལྟར་རིག་གསར་རྗེས་ནས་བོད་ཀྱི་བཀའ་བསྟན་གྱི་ཐ་སྙད་ལ་འགྱུར་བ་ཕྱིན་མེད་ཀྱང་སྔོན་གྱི་མཁས་པ་རྣམས་ཀྱི་ལེགས་བཤད་ལ་མེད་པ་དང་སྔོན་གྱི་ཐ་སྙད་ལ་མེད་པ་བརྡ་སྤྲོད་པའི་རྣམ་བཞག་མང་པོ་ཞིག་བོད་ལ་དར་བ་དང་འདི་ཡང་ཤེས་བྱ་རིག་གནས་དར་བའི་ཁྲོད་འཕེལ་བསྐྱེད་བྱུང་བ་ཞིག་ལོས་ཡིན། ཕོ་གསར་མོ་གསར་ལ་ལ་ཞིག་གིས་ལོང་བའི་འཁར་བ་ལྟར་གར་འཛུགས་ངེས་མེད་ཀྱིས་རྒྱའི་རིག་གནས་ལས་བརྡ་ཆད་མང་པོ་ཞིག་སྤེལ་ཡོད་པ་རེད། འདི་ཡང་བོད་ཀྱི་བརྡ་སྤྲོད་རིག་གནས་འཕེལ་རྒྱས་ཀྱི་ལམ་ཁ་ཞིག་ཡིན་ན་ཐང་མོད། བཀའ་བསྟན་གྱི་ཐ་སྙད་རྣམས་རྗེས་ལུས་ཀྱི་རྣམ་པ་བཟུང་ནས་གོ་མེད་ཚོར་མེད་ཀྱི་དབྱིངས་སུ་བསྟིམས་ཡོད་པ་རེད། འདི་ཡང་ང་ཚོས་ཤེས་དགོས་པ་རེད།

29. དཀར་ལེབ་ཀྱི་རྟགས་འཇུག་གི་མཐའ་གཅོད་དུ།
    དེ་ལ་པ་བའི་མཐའ་ཅན་གྱི་མིང་ནི་བརྟན་གཡོའི་དངོས་པོ་མིང་དུ་ཐོགས་ཚད་དེ་དཔེར་ན། པགས་པ། མཇིང་པ། རྣ་བ་སོགས་ལུས་ཀྱི་ཆ་ཤས་ཀྱི་མིང་། ཚར་པ། ཉུག་པ། རུ་བ། གཞུང་པ། རོང་པ།་སོགས་ཡུལ་ཅན་གྱི་མིང་དང་། རྙིང་པ། དམ་པ། ཞར་བ་སོགས་རང་བཞིན་གྱི་མིང་རྣམས་ལ་སུམ་ཅུ་པ་ནས་བཤད་པའི་བདག་སྒྲའི་པོ་ཡིག་ནན་གྱིས་སྦྱར་བར་བྱས་ཀྱང་མིང་གཞན་དུ་འགྱུར་བའམ། འབྲེལ་མེད་ཀྱི་ཚིག་འབྱུང་བ་ལས་བྱེད་པ་པོར་ནམ་ཡང་མི་འགྱུར་རོ།།པ་བའི་མཐའ་ཅན་གྱི་བྱེད་པ་ནི་ལས་སམ་བྱ་བའི་སྒྲ་གསལ་བ་དོན་ལ་བྱེད་ལས་གསལ་བྱེད་ཀྱི་སྒྲ་གང་ཡིན་ཐམད་ཅད་དེ་དཔེར་ན། བཞེད་པ། འཆད་པ། འཛིན་པ། གྱོན་པ། འདེབས་པ། རྡུང་བ་སོགས་ལ་པོ་ཡིག་སྦྱར་བས་བཞེད་པ་པོ། འཆད་པ་པོ། འཛིན་པ་པོ། གྱོན་པ་པོ། འདེབས་པ་པོ། རྡུང་བ་པོ་སོགས་བྱེད་པ་པོ་གང་ཟག་ཏུ་འགྱུར་བ་ཡིན་ནོ། །

30. ཁོང་གིས་གསུངས་གསལ་ལ། སྟ་རེས་ཤིང་བཅད་ལྟ་བུའི་སྟ་རེ་ནི་བྱེད་པ་པོའི་རྫས་ཞེས་འདོགས་ཀྱང་བྱེད་པ་པོ་དངོས་མིན་པ་དང་། རླུང་གིས་ཤིང་ཆག་ཟེར་བ་ལས་རླུང་གིས་ཤིང་བཅག་མི་ཟེར་བ་དང་། རྟ་བོང་ལོ་ན་རྒས་པས་ཤི་སོང་ཟེར་བ་ལས་རྟ་བོང་རྒས་པས་བསད་སོང་མི་ཟེར་བ་སོགས་བྱ་བྱེད་ལས་གསུམ་ངོས་འཛིན་མཛད་སྟངས་མི་འདྲ་བའི་དབང་གིས་འདི་འདྲ་ཡོང་ངེས་པ་དང་རྟགས་འཇུག་སྐབས་ཀྱི་བྱེད་པ་པོ་ལ་གང་ཟག་དགོས་པར་འདོད་པ་དང་། ཡང་མཁས་པ་ལ་ལས་རྟགས་འཇུག་སྐབས་ཀྱི་དུས་གསུམ་བདག་གཞན་གྱི་བདག་ལ་གང་ཟག་མི་དགོས་པ་དང་སུམ་ཅུ་བའི་སྐབས་ཀྱི་བདག་སྒྲའི་བདག་ལ་གང་ཟག་དགོས་པར་བཞེད།

31. རྣམ་པ་ཚོས་དཔྱད་བརྗོད་ཡག་པོ་སྤེལ་འདུག་ན་ཕན་ཐོགས་ཆེན་པོ་བྱུང་བས། བཀའ་དྲིན་ཆེ་གནང་།

32. ད་དུང་དཔྱད་བརྗོད་མང་ཙམ་ཞིག་སྤེལ་གནང་ཡོང་བ་ཞུ།

33. མདོ་སྨད་སྤྱི་ཟུར་གསེར་རྟ་ཚུལ་ཁྲིམས་འོད་ཟེར་མཆོག་ལ།
    ལན་གསལ་ཞིང་འཇེབས་པར་སྩལ་པ་ལ་བཀའ་དྲིན་ཆེ། རྟོག་དཔྱོད་བྱེད་པ་ལ་ཕན། འོན་ཀྱང་རང་རེ་གཉིས་རང་རང་གི་འདོད་ཚུལ་དམ་དུ་འཛིན་པ་གཉིས་འཛོམས་འདུག ང་ནི་འདི་ཡི་གསུང་དང་། འདི་ཡི་འདོད་པ་ལྟར་མ་ཡིན་པར་མིག་མཐོང་ལག་ཡོད་ཀྱི་བཀའ་བསྟན་གསུང་འབུམ་བཅས་ཀྱི་དག་ཆ་རྣམས་ཁ་ཆག་རྣ་རལ་དུ་མ་སོང་བ་ལ་ཤུགས་རྒྱབ་པ་ཡོད། རྒྱུ་མཚན་འདི་ཡིས། བཀའ་བསྟན་གྱི་དཔེ་དང་བསྟུན་ནས། དག་ཡིག་བརྩམས་པ་ལ་ཚད་མར་བྱེད་པ་མ་གཏོགས། མིག་མཐོང་ལག་ཡོད་ཀྱི་བཀའ་བསྟན་སོགས་དང་འགལ་བ་མཁས་པ་ཆེན་པོས་བརྩམས་པ་ལ་ཡང་བརྩི་བ་མེད། དེས་ན། གཤམ་གསལ་ཚིག་རྐང་གཉིས་པོ་དེ་ལ་དྭགས་པའི་ཁ་རྒྱུན་ཡིན་ནམ། བོད་སྤྱིའི་ཁ་རྒྱུན་ཡིན་ཏན་ཏན་རང་མི་ཤེས། གང་ལྟར་ཡང་།
    མཁས་པ་བརྒྱ་ལ་ལན་ལན་ཐེབས་ཀྱང་།
    ཨུ་ཚུགས་ཅན་ལ་ལན་མི་ཐེབས།
    ཞེས་པ་ལྟར་འདུག་པས། ད་བཏང་སྙོམས་སུ་བཞག་པ་ལེགས་སོ།།

34. འཇམ་དབྱངས་ལེགས

    ན་རོ་ཡོད་མེད་པ་བ་མ། །བདག་པོའི་སྒྲ་སྟེ་ག་ད་ན། །བ་མ་ས་དང་དྲག་མཐར་པ། །ང་འ་ར་ལ་མཐའ་མེད་ལ། །བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །
    སྔོན་བདག་གཞོན་པའི་སྐབས་སུ་ཚིགས་བཅད་འདི་ལ་གཅེས་པར་འཛིན་ཅིང་། གཞན་ལ་ཡང་འདིའི་དོན་བཤད་པ་རེ་བྱས་པ་དྲན། ཕྱིས་སུ་བཀའ་བསྟན་གསུང་འབུམ་ཚད་ལྡན་དག་གི་སྐད་ལ་སྐད་ལ་སྦྱངས་པ་ན། དེ་དག་དང་འགལ་བ་ལྟ་ཅི། བདག་རང་གི་ལུང་པའི་ཁ་སྐད་དང་འགལ།
    བདག་གི་ལུང་པའི་མིང་ཚིག་མང་པོ། སྔོན་དུས་ཀྱི་བཀའ་བསྟན་སོགས་ཀྱི་སྐད་དང་མཐུན་པར་མཆིས། བདག་གི་སྐད་དུ། ལྷ་ས་པ། ཟེར་བ་མ་གཏོགས། ལྷ་ས་བ། ཞེས་གཏན་ནས་མི་ཟེར། འདི་ཉིད་ཆོས་སྐད་མཐུན་པ་འདུག དེས་ན། བདག་སྒྲ་ལ་པ་ཡིག་མ་གཏོགས་། བོད་རིག་གཞུང་སྐད་དུ་བ་་ཡིག་བཀོལ་བ་མ་མཐོང། ཇི་སྐད་དུ། སུམ་ཅུ་པ་ན།
    གང་མིང་བརྗོད་པའི་མ་མཐའ་ན།
    ཕོ་ཡི་རྟགས་ཀྱི་སྒྲ་མེད་པ།
    དེ་ལ་ཕོ་ཡི་རྟགས་སྦྱར་ན།
    བདག་པོའི་སྒྲ་རུ་ཤེས་པར་བྱ།།
    བ་ཡིག་བདག་སྒྲ་རུ་བཀོལ་ན། སུམ་ཅུ་པ་དང་འགལ། དེས་ན། མཁས་མཆོག་དབྱངས་ཅན་གྲུབ་པའི་རྡོ་རྗེའི་གོང་གསལ་ཚིགས་བཅད་དག་གི་དོན་དེ་དག་དབུས་གཙང་གི་ཁ་སྐད་ལ་ཇི་ལྟ་བ་བཞིན་འགྲིག་ཀྱང་ཆོས་སྐད་དང་ལུང་པ་གཞན་གྱི་སྐད་དང་མི་མཐུན།
    རང་གི་སློབ་དཔོན་དངུལ་ཆུ་དྷ་རྨ་བྷ་དྲ་དཔལ་བཟང་པོ། སི་ཏུ་པཎ་ཆེན་ནས་སུམ་རྟགས་ཞུས་པ་ཡིན་ནམ་མ་ཡིན། བདག་ལ་རྒྱུས་མེད། གང་ལྟར་དྷ་རྨ་བྷ་དྲ་སི་ཏུ་པཎ་ཆེན་གྱི་སུམ་རྟགས་འགྲེལ་པས་ཐུགས་ཡིད་འཕྲོགས་ཏེ། ཁོང་གིས་སི་ཏུའི་ཞལ་ལུང་ཞེས་པའི་སུམ་རྟགས་གྱི་འགྲེལ་པ་བརྩམས། དབྱངས་ཅན་གྲུབ་པའི་རྡོ་རྗེས། རང་གི་བླ་མའི་བླ་མ། སི་ཏུ་པཎ་ཆེན་གྱི་དགོངས་པ་དང་འགལ་བ་ཞིག་རྩོམ་པའི་འོས་མ་ཡིན་ཀྱང་། དེ་ལྟར་བྱུང་བ་དེ་སི་ཏུ་པཎ་ཆེན་གྱི་དགོངས་པ་དང་འགལ་བས། དེ་ལ་ཐུགས་དྲན་བསྐུལ་བ་བྱུང་བ་ཡིན་ན། གོང་གསལ་ཚིགས་བཅད་དེ་ལ་འགྱུར་བཅོས་སྲིད་པར་སེམས་སོ།།

35. མིང་མཐའི་པ་བ་དང་བདག་སྒྲའི་པ་བ་འདི་ཚོ་ནམ་ཡང་རང་རང་གི་ཞེ་འདོད་ལྟར་ལས་གཅིག་གྱུར་ཅིག་ཡོང་ཐབས་མི་འདུག དེ་བཞིན་བཀའ་སྩལ་དང་སྒྲ་སྒྲོགས་སོགས་ལ་སྔོན་འཇུག་ཐོབ་མིན་དང་ཡང་འཇུག་ཡོད་མེད་སོགས་ཀྱང་དེ་བཞིན་རེད། དོན་དངོས་ཐོག་ང་ཚོས་བཀའ་བསྟན་སོགས་ཀྱི་ཚིག་ཚད་མར་འཛིན་དགོས་སམ་བརྡ་སྤྲོད་པའི་གཞུང་སུམ་རྟགས་ཀྱི་དོན་ཚད་མར་འཛིན་དགོས། ཡོངས་གྲགས་ལ་མཁས་པ་སྔོན་མ་དང་བསྟན་བཅོས་ཕྱི་མ་ཟེར་བ་མིན་ནམ། ངོ་མ་མགོ་འཐོམ་གྱི་འདུག སྔོན་གཅིག་གྱུར་མ་ཡིན་པ་རྣམས་བརྡ་སྤྲོད་ཀྱི་ལུགས་དང་བསྟུན་ནས་གཅིག་གྱུར་ཅན་དུ་བཅོས་ན་བཟང་ངམ་མ་བཅོས་པར་དེ་མུར་བཞག་ན་བཟང་། གལ་སྲིད་དེ་མུར་འཇོག་དགོས་ན་སྒྲ་སྒྲོགས་ལྟ་བུར་ཚིག་གྲོགས་སྦྱར་ན་མ་གཏོགས་རང་ངོས་ནས་དུས་གསུམ་གྱི་རྣམ་དབྱེ་བྱེད་ཐབས་བྲལ། བསྒྲག་བྱ་ སྒྲོག་བྱེད བསྒྲགས་ཟིན་ སྒྲོགས་ཤིག་ལྟ་བུར་བྱས་ན་དུས་གསུམ་བྱེ་བྲག་པ་མགོ་ཅན་མང་བའི་སྡེའི་འགྲོ་སྟངས་གཅིག་གྱུར་བྱུང་བས་མི་ལེགས་སམ། གོང་གི་དེ་དག་ལ་ཚིག་གྲོགས་མེད་ཀྱང་བྱ་བྱེད་འདས་སྐུལ་སོགས་ཀྱི་དོན་སྟོན་ནུས་པས་ཆ་མ་ཚང་བ་ནས་ཚང་བར་གྱུར་བ་མ་ཡིན་ནམ།

36. རྟགས་འཇུག་ནང་གི་བདག་གཞན་དུས་གསུམ་ནང་གི་བདག་ཡིན་ན་གང་ཟག་ཡིན་པས་མ་ཁྱབ་པར་འདོད་པར་ནི། བདག་ཕལ་པ་ཡིན་ན་གང་ཟག་ཡིན་པས་མ་ཁྱབ་པ་ལ་དགོངས་ཀྱང་། སྤྱིར་བདག་དང་བདག་པོ་གཉིས་ཀ་གང་ཟག་མིན་པར་མི་འགྲིགས་སྙམ་ལགས།

37. འདི་རིང་ངའི་དེབ་ཆུང་བྱིས་པ་དག་ཡིག ལྗོན་དབང་དང་། ང་ལ་ཁ་ཐུག་དགོས་པ་འདིའི་འགོ་བརྗོད་དུ། ཁ་ཆེ་ཕ་ལུའི་འཇིག་རྟེན་ལས་འབྲས་རྩི་ལུགས་ཀྱི་བསླབ་བྱ་བསླབ་བྱ་བཞུགས་སོ།། བསླབ་བྱ་ལེའུ་གསུམ་པ་ནང་ལ། ཁ་ཆེ་ཕ་ལུའི་སྙིང་གཏམ་བཤད་ཡོད་དོ། །ཉན་དང་མི་ཉན་སོ་སོའི་བསམ་བློ་རེད། །ཅེས་དང་།
    ༡༡པའི་རྗེས་སུ། རེ་ས་ལྟ་ས་གོ་བརྡྰ་༼ནི་ཁུ་དྰ་༽ཁོང་ལ་ཞུས། །
    དེའི་བར་དུ། །ཁ་ཆེ་ཕ་ལུ་སྨྱོ་བའི་སྨྱོ་ལབ་རེད། །ཅེས་དང། ཚིག་རྐང་མཐའ་མར། །ཁ་ཆེ་ཕ་ལུས་ཀུན་ལ་གདམས་པའོ། །ཞེས་གསུངས་འདུག་པ་འདི་ཡང་སྤྱན་འབུལ་ཞུས་པའོ། །

38. དོན་དངོས་ཐོག་ང་ཚོས་བཀའ་བསྟན་སོགས་ཀྱི་ཚིག་ཚད་མར་འཛིན་དགོས་སམ་བརྡ་སྤྲོད་པའི་གཞུང་སུམ་རྟགས་ཀྱི་དོན་ཚད་མར་འཛིན་དགོས། ཡོངས་གྲགས་ལ་མཁས་པ་སྔོན་མ་དང་བསྟན་བཅོས་ཕྱི་མ་ཟེར་བ་མིན་ནམ། ངོ་མ་མགོ་འཐོམ་གྱི་འདུག
    ཅེས་པ་ཨ་ར་དཀར་པོ་མཆོག་གི་དྲི་བ་དེ་སྔོན་མ་ནས་ཀྱང་། འབྱུང་གི་ཡོད་པ་འདྲ། ལོ་རྒྱུས་སྨྲ་བའི་མཆོག་གྱུར་དགེ་ཆོས་ཀྱིས་སྐད་མ་བྱུང་གོང་དུ་སྐད་འགྲོ་སྟངས་ཀྱི་བརྡ་སྤྲོད་བརྩམས་ཞེས་པ་ལྐུགས་པའི་གཏམ་དུ་གསུངས། སྔར་ཡོད་བཀའ་བསྟན་གསུང་འབུལ་རྣམས་ལ་གཏུགས་ནས། ལོ་ངོ་ཉི་ཤུ་ཙམ་སྔོན་དུ། བདག་རང་གིས་ཀྱང་། ཤོག་གྲངས་གསུམ་བརྒྱར་ཉེ་བའི་བོད་ཀྱི་བརྡ་སྤྲོད་ཅིག་བྲིས་པའི་ཉམས་མྱོང་ལ་ཕན་པ་ཡོད་ཀྱང་། དེ་ཉིད་སྤར་ནས་འགྲེམས་པ་ལ་སོགས་པའི་བྱ་བ་ལ་རྩོན་མེད།
    རང་རེས་བལྟས་པ་ཡིན་ན། སྔོན་བོད་ཀྱི་སྒྲ་སྒྱུར་མཁན་པོ་རྣམས་ཀྱིས་བོད་ཀྱི་སྐད་ལ་སྦྱངས་པ་གཙོ་བོར་མཛད། ཕྱིས་སུ་དེ་རྣམས་ཀྱིས་བྲིས་པའི་སྐད་ལ་མ་སྦྱངས་པར་སུམ་རྟགས་ཀྱི་འགྲེལ་པ་ཞེས་ལུང་པ་སོ་སོའི་ཁ་སྐད་མི་འདྲ་བ་སྣ་ཚོགས་ཡོད་པ་འགའ་རེ་ཚད་མར་བཟུང་བ་ལ་བརྟེན་ནས། དཔེ་ཆ་དག་པ་རྣམས་མ་དག་པར་བྱས་པ་དེ་དག་བྱུང་དང་འབྱུང་བཞིན་པ་ལྟ་བུ་ལགས་པས། བདག་གིས་ནི་བཀའ་བསྟན་གསུང་འབུམ་རྣམས་ཀྱི་སྐད་ལ་ཐོས་བསམ་སྒོམ་གསུམ་བྱེད་དགོས་པར་མཐོང་ནས། དེ་བཞིན་བྱས་དང་བྱེད་བཞིན་པ་ལགས་སོ།།

39. འདི་ནིཨ་རི་རླུང་འཕྲིན་ཁང་ཡིན། ལས། འདི་ཨ་རི་རླུང་འཕྲིན་ཁང་རེད། ཅེས་པ་འདི་དག་པ་འདུག
    ཡང་། འདི་རྒྱ་གར་རྒྱལས་ལྡིལ་རིར་གཞོན་ནུའི་རྒྱུན་ལས་གསུམ་གྱིས་ཟས་བཅད་ངོ་རྒོལ་གནང་བཞིན་པ་་་་
    གསུང་སྟངས་འདི་ཡང་།
    འདི་རྒྱ་གར་རྒྱལས་ལྡིལ་རིར་གཞོན་ནུའི་རྒྱུན་ལས་༼པ་༽གསུམ་གྱིས་ཟས་བཅད་ངོ་རྒོལ་གནང་བཞིན་པ་་་་ ཞེས་པའི་བདག་སྒྲའི་པ་འདི། མ་ཆད་པ་ཅིག་གནང་རོགས་གནོངས།