རླུང་དམར།
ད་ལྟའི་དུས་རབས་གསར་བའི་གླིང་འདིར་༧སྤྱི་ནོར་༧གོང་ས་སྐྱབས་མགོན་རིན་པོ་ཆེ་མཆོག་ནི་འཛམ་གླིང་ཞི་བདེའི་གསེར་གྱི་དར་ཆེན་བླ་མེད་དེ་ཡིན་ལ། གོ་ལ་ཧྲིལ་བོའི་སྟེང་གི་མི་མང་གིས་ཆེས་དགའ་མོས་བྱེད་སའི་བྱང་ཆུབ་སེམས་དཔའ་ཞིག་རེད། ཁོང་གིས་འཇིག་རྟེན་སྐྱེ་འགྲོའི་ཀུན་ཁྱབ་རིན་ཐང་དང་། རྒྱལ་སྤྱིའི་ཁོར་ཡུག་ལ་དོ་ཁུར། མི་རིགས་དབྱེར་མེད། ཆོས་ལུགས་མཐུན་སྒྲིལ། ཞི་བདེ་མཉམ་གནས། ཐོབ་ཐང་འདྲ་མཉམ། ཕན་བདེའི་བཀའ་སློབ་སོགས་གསུངས་བཞིན་དེང་གི་ཚན་རིག་པའི་མཉམ་དུ་བགྲོ་གླེང་གནང་གིན་ཡོད་པ་ནི་ཆེས་ངོ་མཚར་བའི་སྙིང་རྗེའི་བདག་ཉིད་ཆེན་པོའི་མཛད་འཕྲིན་ཞིག་རེད་འདུག དེའང་། ༧གོང་ས་མཆོག་གིས་མི་ལོ་དུ་མའི་རིང་ལ་འཛམ་གླིང་གི་ཚན་རིག་པའི་ལྷན་དུ་བོད་ཀྱི་ཐུན་མོང་མ་ཡིན་པའི་”སེམས་ཀྱི་ཚན་རིག”་གཙོར་བཞག་ལས་བཀའ་མོལ་ཟབ་གསལ་རེ་གནང་གིན་ཡོད་པ་རེད་ལ། ལྷག་པར་ཏུ་རྒྱ་གར་གྱི་དཔལ་ནཱ་ལེནྡྲའི་པཎ་གྲུབ་བཅུ་བདུན་གྱི་ཚད་མ་རིག་པའི་གཞུང་ལུགས་སོགས་དྲངས་ཏེ་ནང་སེམས་ཀྱི་ཞི་བདེ་ཇི་ལྟར་ཉམས་ལེན་གནང་དགོས་པ་དང་། ནང་ཆོས་དང་ཚན་རིག་གཉིས་དཔུང་བ་མཉམ་གཤིབ་ཀྱིས་ཤར་བསྐྱོད་ཐུབ་པའི་དགོས་པ་དང་བདེན་འཚོལ་ནི་ད་ལྟའི་ཚན་རྩལ་དར་བའི་དཀའ་རྙོག་གི་འཇིག་རྟེན་ལ་ཕན་ཐོགས་མང་པོ་འབྱུང་གིན་ཡོད་པས། དེའི་ཐད་ནས་བགྲོ་གླེང་གཙོ་གནད་རེ་གནང་གིན་ཚན་རིག་གིས་གླེང་བའི་ཚད་རྡུལ་དངོས་ཁམས་དང་འབྲེལ་བའི་སྐོར་ལའང་བསམ་ཚུལ་བརྗེ་རེས་དང་། བཀའ་སློབ་ལམ་སྟོན་སོགས་གནང་གིན་ཡོད་འདུག
དེ་ལྟ་ནའང་། ང་ཚོ་བོད་མི་བྱིངས་ཀྱིས་༧གོང་ས་མཆོག་གི་ཐུགས་དགོངས་བཞིན་རང་རེའི་སྐད་ཡིག་དང་། ནང་ཆོས། ཡུལ་སྲོལ་གོམས་གཤིས་སོགས་ལ་སྔར་ལས་ལྷག་པའི་སློབ་སྦྱོང་བྱེད་དགོས་པ་རེད། འཛམ་གླིང་ཤར་ནུབ་ཀྱི་ཚན་རིག་པ་མང་པོས་༧ཡིད་བཞིན་ནོར་བུའི་ཞབས་ལ་གཏུགས་ཏེ་བཀའ་སློབ་ལམ་སྟོན་ཞུ་བ་ནི་ཧ་ཅང་སྲིད་ན་དཀོན་པའི་མིག་དཔེ་བླ་མེད་ཅིག་རེད་འདུག མ་ཟད། ང་ཚོས་ཀྱང་རང་གི་རིག་གཞུང་ལ་བློ་ཐག་ཉེ་བོས་སྦྱང་བརྩོན་བྱེད་པ་དང་། མུ་མཐུད་དུ་༧རྒྱལ་བའི་བཀའ་དགོངས་ལྟར་ལག་ལེན་ལེགས་པོ་གནང་དགོས་པ་ང་ཚོ་བོད་མི་ཡོངས་ཀྱི་རྩ་བའི་འགན་འཁྲི་ཞིག་ཡིན། དེ་བཞིན་དུ་ང་ཚོས་ངེས་པར་ཏུ་མཁྱེན་རྟོགས་ཤིག་བྱེད་དགོས་པ་ནི་༧གོང་ས་མཆོག་གིས་གནང་བའི་བཀའ་སློབ་ལ་རྒྱབ་འགལ་སོགས་མེད་པར་བོད་མི་སྤྱོད་ཡོན་གཉིས་ལྡན་ཅན་ཞིག་བྱེད་དགོས་ལ། ཉུང་མཐར་ཡང་རང་རེའི་རྩ་དོན་སོགས་མི་བརླག་པར་ཞི་བའི་འཐབ་རྩོད་བྱེད་དགོས་རྒྱུ་དེ་དབུ་མའི་ལམ་རེད། དེ་བས། འཛམ་གླིང་གི་ཆབ་དཔལ་རིག་གསུམ་མགྱོགས་འགྲོས་ཆེ་བའི་དུས་འདིར་འགྲོ་བ་སྤྱི་ལ་སྨིན་པའི་ཕན་བདེའི་སྲིད་དོན་ཞིག་བསྐྱང་དགོས་པའང་རང་གཞན་ཀུན་ལ་བདེ་བའི་རྒྱུ་འབའ་ཞིག་རེད་འདུག
དེ་ལ་དེ་ལྟར། ༧གོང་ས་མཆོག་གིས་”སེམས་ཀྱི་ཞི་བདེ”དང་”སེམས་ཀྱི་ཚན་རིག”གི་ཐད་ནས་བགྲོ་གླེང་རྫོགས་མེད་ཅིག་གནང་གིན་པ་འདིའང་མཐར་འཇིག་རྟེན་བྱིངས་ཀྱི་ཞི་བདེའི་ཆེད་དུ་ཡིན་པ་སྨྲ་ཅི་ལ་དགོས། ཁོང་ཉིད་འཛམ་གླིང་གང་དུ་ཕེབས་ཀྱང་འགྲོ་བ་ཡོངས་ལ་ཐུགས་བརྩེས་གཟིགས་པ་དང་། སྙིང་རྗེའི་བྱམས་སྐྱོང་། ཞི་བདེའི་འཇིག་རྟེན་བཅས་ཀྱི་ཐོག་ནས་བགྲོ་གླེང་གནང་གིན་ཡོད་པ་འདི་གཟི་དཔལ་འབར་བའི་གོ་ལ་ཧྲིལ་བོའི་སྟེང་གི་ཁྱད་ནོར་རེད། དེ་ལའང། རང་རེའི་ཚེ་འདི་ཕྱི་གཉིས་ཀྱི་སྐྱབས་གནས་དམ་པ་༧རྒྱལ་བ་རིན་པོ་ཆེའི་བཀའ་སློབ་མང་པོ་གསན་གཟིགས་བྱས་ཏེ་རང་རིགས་ཀྱི་སྤྱི་ཚོགས་ནང་དུ་ཕྱི་གསལ་ནང་གསལ་གྱི་ཕན་ཐོགས་རེ་སྒྲུབ་རྒྱུ་ཧ་ཅང་གལ་ཆེན་ཡིན་པར་བསམས། དེ་མིན། ང་ཚོས་རང་རེའི་གཅེས་ནོར་ངོ་མཚར་ཅན་དེ་མདུན་ནས་བཞག་སྟེ་གོ་མེད་ཚོར་མེད་ཀྱིས་བསྡད་དེ་གཞན་གྱི་ཕྱི་ལྟོས་མཛེས་དཔྱོད་ལ་སེམས་འཁོར་བ་ནི་སྨྱོ་རྟགས་ཤིག་རེད་འདོད་པས། དེང་གི་ཆར་༧གོང་ས་མཆོག་གིས་སྣེ་སྟོན་གནང་གིན་པའི་”སེམས་ཀྱི་ཚན་རིག་”དང་”ཚན་རིག”་གི་ཕྱོགས་ནས་ལྟ་ཚུལ་རིན་པོ་ཆེ་དེ་དག་ཨེན་ཙམ་རེར་ལག་ལེན་དུ་འཁྱོལ་ཐུབ་པའི་རེ་འདུན་སྙིང་ནས་ཡོད་དགོས།
དེའི་དགོས་སྙིང་བཞིན་བོད་ཀྱི་རིག་གཞུང་ནི་ཆེས་ཆེར་འགྲོ་ཀུན་ཡོངས་ལ་ཕན་ཐོགས་པའི་རིག་གནས་ཤིག་དང་། ངོ་མཚར་བསམ་གྱིས་མི་ཁྱབ་པའི་རིན་ཐང་རྩ་ཆེན་ཞིག་རེད་འདུག དེའང། ༧གོང་ས་མཆོག་གིས”མིའི་རྩ་བའི་རང་བཞིན་ནི་བྱམས་སྙིང་རྗེ་ཡིན་”གསུངས་པ་ལྟར་ཁོང་ཁྲོ་དང་། ང་རྒྱལ། ཞེ་སྡང་། དམག་འཁྲུག་སོགས་ནི་སྐྱེ་འགྲོ་ཀུན་གྱི་ཕྱི་ནང་གཏོར་བརླག་བྱེད་པའི་རྒྱུ་ངན་པ་ཞིག་ཡིན་པ་ཤེས་པའི་ཐོག་ནས་ཉིན་རེར་འགྲོ་བ་མི་ཡག་པོ་ཞིག་བྱེད་དགོས་པའི་བཀའ་སློབ་དེ་ཡང་སེམས་ལ་བཟུང་ནས་ལག་བསྟར་གནང་དགོས་པ་ང་ཚོ་ཡོངས་ཀྱི་ཆེད་དུ་གལ་ཆེན་ཞིག་རེད། ཕྱིའི་ཚན་རིག་ཇི་ལྟར་ཇེ་རྒྱས་ཇེ་འཕེལ་ལ་སོང་ནའང་། ནང་སེམས་ལ་ཞི་བདེ་མེད་པར་གནས་པ་ནི་འཛམ་གླིང་འདི་རྒུད་པའི་རྟགས་ཤིག་རེད་འདུག ཡིན་ཡང་། ༧གོང་ས་མཆོག་དང་ཚན་རིག་པའི་བགྲོ་གླེང་གི་སྙིང་དོན་གྱིས་ང་ཚོ་འཇིག་རྟེན་གྱི་མི་མང་གི་འཚོ་གནས་ལ་བདེ་སྐྱིད་དང་ཞི་བདེ་ཞིག་བསྐྲུན་བཞིན་པའི་ལམ་བུ་གསར་བ་ཞིག་གི་སྒོ་ཕྱེས་པའི་སྲོལ་འབྱེད་མཁན་བྱམས་སྙིང་རྗེའི་བདག་ཉིད་ཆེན་པོ་༧རྒྱལ་བ་ཡིད་བཞིན་ནོར་བུ་མཆོག་རེད་འདུག དེར་བརྟེན། ང་ཚོས་བོད་གངས་ཅན་གྱི་གནའ་རབས་མཁས་པའི་བཀའ་གསུང་དང་དེང་གི་༧གོང་ས་མཆོག་གི་བྱིན་རླབས་གསུང་གི་གདུལ་བྱའི་དཔལ་དུ་བགྲོད་པར་སྨོན་སྨོན།
2018-11-19ཉིན།
་་་་་་་་་་་་ ཕྱིའི་ཚན་རིག་ཇི་ལྟར་ཇེ་རྒྱས་ཇེ་འཕེལ་ལ་སོང་ནའང་། ནང་སེམས་ལ་ཞི་བདེ་མེད་པར་གནས་པ་ནི་འཛམ་གླིང་འདི་རྒུད་པའི་རྟགས་ཤིག་རེད་འདུག ་་་་་་་་་་་་
༄༅། རླུང་དམར་ལགས་ནས་དཔེ་ཡག་པོ་བྲིས་གནང་འདུག་པ་་་བདེན་པ་
དྲང་དངོས་གནས་རེད། ཐུགས་རྗེ་ཆེ་། བཀྲིས་བདེ་ལེགས་ཡོད།