འབྲོང་བུ་ཟླ་བ་ཚེ་རིང།
སྨག་མུན་དང་སྡུག་ཡུས་ཀྱི་བར་གསེང་ཞིག་སྟེ། གངས་རིའི་འཚོ་གནས་ལ་ཐོལ་བརྒལ་གྱི་གཡོ་འགུལ་ཐེབས་ཤིང། ཁ་བའི་གཟི་མདངས་ཇེ་ཞན་དུ་གྱུར་བའི་དུས་སྐབས་ཤིག་ཏུ། ལྷ་ཀླུས་མེ་ཏོག་གི་ཆར་ཕབ་ཅིང་འཇའ་ཚོན་གྱི་གུར་ཕུབ་ལ། འཇིག་རྟེན་འདིའི་ཡང་སྟེང་དུ་༧སྐྱབས་མགོན་གྱི་མཚན་སྙན་ལ་དད་དུང་ཕུལ་བའི་བསུ་བ་དང་འབོད་སྐུལ་མཐོ་ཕྱིར། ཁྱེའུ་ལྷ་མོ་དོན་འགྲུབ། དགུང་གི་ཉི་མ་དང། ཁོག་གི་སྙིང། དཔྲལ་བའི་མིག་བཞིན། བདེ་འཇགས་ཀྱི་རྩ་སྦུབས་ཕྲ་ལ་གཉའ་གནོན་གྱི་མགོ་འཕངས་མཐོ་ཞིང། བརྩེ་འདང་གི་འབྲེལ་མཐུད་ཉམས་ཤིང་འགྲན་སེམས་ཀྱི་ཡོ་ལང་འཕྱུར་བའི་འཇིག་རྟེན་འདིའི་མགོན་དུ། བྱང་ཆུབ་སེམས་དཔའི་སྤྱོད་པ་འཛིན་བཞིན། སྤྱན་རས་གཟིགས་ཀྱི་སྙིང་རྗེ་སྒོམ་བཞིན། ཆོས་ལྡན་ཞིང་གི་བདེ་སྡུག་དགོངས་བཞིན་ཕེབས་འོངས། ཕེབས་འོངས་བའི་དུས་ཚིགས་དེ་ནས། ལག་ཟུང་ཐལ་མོ་སྦྱར་ནས་༧ ཁྱེད་ལ་ཡིད་ཆེས་དང་རེ་བ། འབོད་པ་དང་སྨོན་འདུན་འབུལ་མཁན་གྱི་གངས་ཅན་པ་ཁྲི་ཕྲག་གི་སེམས་ཁམས་སུ། ཉི་འོད་ཡོངས་སུ་འཕྲོས་་ཤིང། བདེ་སྣང་ཡོངས་སུ་ཁྱབ།
ལོ་རྒྱུས་ཀྱི་ཀྱོག་མཚམས་ཤིག་གིས། གངས་སེངས་དཀར་མོའི་རྒྱལ་དར་པོ་ཏ་ལའི་ཡང་རྩེ་ནས་ཕབ་ཅིང། གངས་ཅན་ལྗོངས་ཀྱི་ལྷ་སྲས་འཕགས་ཡུལ་དུ་བཙན་གྱིས་སྐྱེལ། ཡིན་ཡང་། རྐྱེན་ངན་གྲོགས་སུ་འཆར་ཤུལ་ན། དྲང་བདེན་དང་བྱམས་བརྩེ། ཞི་བདེ་དང་མཉམ་གནས་ཀྱི་ཆོས་དབྱངས་སྙན་མོ། འཛམ་གླིང་མི་དམངས་ཀྱི་ཐན་ཤིང་སྐམ་པའི་སེམས་ཁམས་སུ་དཔྱིད་ཆར་བཞིན་འཇོ་དུས། དད་འདུན་དང་ཡིད་སྨོན་གྱི་མེ་ཏོག་དཀར་དམར་སྔོ་གསུམ་འཇིག་རྟེན་འདིའི་པང་བ་ནས་ཆར་རྗེས་ཀྱི་ཤ་མོ་བཞིན་འཚར།
འཛམ་གླིང་ཞི་བདེའི་དེད་དཔོན་མཚན་དུ་འབོད་ཅིང། འཛམ་གླིང་མི་དམངས་ཀྱི་སེམས་ཁམས་སུ་ལྷ་སྲས་གསོན་པོ་ཞིག་ཏུ་སྣང་བས། བདུན་པའི་ཚེས་དྲུག་གི་ཉིན་མོ་འདི། འཛམ་གླིང་ཞི་བདེའི་འཁྲུངས་སྐར་ཡིན། ཉིན་མོ་འདིར། ཞི་བདེ་ལ་དུངས་བའི་ང་ཚོས་སྙན་འཇེབས་ཀྱི་རོལ་དབྱངས་ལ་དྲུག་འགྱུར་གྱི་ཞབས་བྲོས་སྤྲོས་ཏེ་༧ཁྱེད་ཀྱི་བཞེད་དོན་ལྷུན་གྱིས་འགྲུབ་ཅིང་མཛད་འཕྲིན་ཉི་མའི་ཚད་དུ་འགྲན་ཐུབ་པའི་སྨོན་ལམ་འདེབས།