༧འཁྲུངས་སྐར་སྲུང་བརྩི་དང་སྐད་ཡིག་བགྲོ་གླེང་འགྲན་བསྡུར་སོགས།

གནས་ཚུལ་མཁོ་གཏོང་བ། བྱ་འཕུར་ལྷུན་གྲུབ་རྒྱ་མཚོ།

ལོ་ཤས་གོང་ནས་བཟུང་བོད་ཕྱི་ནང་གཉིས་སུ་སྔར་ལས་ལྷག་པའི་ཧ་ཅང་ཡིད་སྐྱོ་བའི་གནས་ཚུལ་རིམ་པར་བྱུང་བ་ལ་བརྟེན་ནས་འཛམ་གླིང་གི་རྒྱལ་ཁབ་ཁག་ཏུ་གནས་པའི་བོད་རིགས་སྤུན་ཟླ་སྤྱི་མཚུངས་ལྟར་ནུབ་ཨ་རིའི་ཁུལ་གྱི་བོད་མི་རྣམས་ཀྱིས་ཀྱང་བོད་ཀྱི་བསྟན་སྲིད་ཆེད་གཤེགས་པའི་དཔའ་བོ་དཔའ་མོ་རྣམས་ལ་གདུང་སེམས་མཉམ་བསྐྱེད་དང་བཅས། ༡༩༩༦ ལོར་དབུ་ཚུགས་པའི་ West Coast Tibetan Cultural and Sports Meet ཞེས་བོད་ཀྱི་གླུ་གར་རོལ་རྩེད་དང་གཞས་སྣ་འགྲན་བསྡུར་གྱི་འདུ་འཛོམས་ནར་འགྱངས་བྱས་ཏེ་ལོ་གང་མང་ཞིག་ཕྱིན་ཡོད།

འདི་ལོར་༧གོང་ས་༧སྐྱབས་མགོན་ཆེན་པོའི་སྐུའི་འཁྲུངས་སྐར་དང་སྟབས་བསྟུན་སྤྱི་ཟླ་ ༧ ཚེས་ ༤ ནས་ ༦ བཅས་ཉིན་གསུམ་རིང་ San Francisco Bay Area བྱང་ཀེལ་བོད་རིགས་སྤྱི་མཐུན་ཚོགས་པས་འགན་བཞེས་ཏེ། བོད་ཀྱི་བསྟན་སྲིད་ཆེད་ཞི་བར་གཤེགས་པའི་བོད་ཀྱི་དཔའ་བོ་དཔའ་མོ་རྣམས་ལ་གདུང་སེམས་ཉམས་བསྐྱེད་མཚོན་ཕྱིར་ཁོང་ཚོའི་མཚན་གྲངས་ཇི་བཞིན་ཨ་རིའི་རྒྱ་གྲམ་དམར་པོའི་ཚོགས་པར་ཁྲག་གི་ཞལ་འདེབས་དང་བོད་དོན་ཆེད་མི་མང་གིས་ཞི་བའི་གོམ་བགྲོད། དེ་བཞིན་ནུབ་ཕྱོགས་བོད་རིགས་གཞོན་སྐྱེས་རྣམས་ལ་གནའ་རབས་བོད་ཀྱི་ཐུན་མིན་རིག་གཞུང་ངོ་སྤྲོད་འབྱུང་ཆེད་བོད་ཀྱི་སྐད་ཡིག་བགྲོ་གླེང་དང་ཡིག་གཟུགས་འགྲན་བསྡུར། ད་དུང་དུས་རབས་དང་མཐུན་པའི་རྩེད་རིགས་འདྲ་མིན་དང་ནུབ་ཨ་རིའི་བོད་ཀྱི་མཛངས་མ་འགྲན་བསྡུར་སོགས་བྱས།

ཚོགས་ཞུགས་མི་སྣར་ Vancouver, Seattle, Portland, Salt Lake City, Los Angeles ནས་ཕེབས་པ་བཅས་མི་མང་ཆིག་སྟོང་ལྔ་བརྒྱ་ལྷག་དང་། བལ་པོ་བ་སོགས་མི་རིགས་གཞན་ཁག་ཅིག་གིས་ཀྱང་རྩེད་རིགས་འགྲན་བསྡུར་དང་གཞས་སྣ་འཁྲབ་སྟོན་གྱི་ཆ་ཤས་བླངས་ཡོད། ཚེས་༦ ཉིན་གྱི་ཞོགས་ཀར་བསྟན་སྲུང་དམ་ཅན་རྒྱ་མཚོར་འཕྲིན་བཅོལ་བསང་གསོལ་གྱིས་སྣེ་དྲངས་ཏེ་༧གོང་ས་༧སྐྱབས་མགོན་ཆེན་པོའི་སྐུ་ཚེ་བསྐལ་བརྒྱར་བརྟན་པའི་ཞབས་བརྟན་གསོལ་འདེབས་སོགས་ཀྱིས་སྐུའི་འཁྲུངས་སྐར་གྱི་མཛད་སྒོ་དབུ་ཚུགས། མཛད་སྒོའི་སྐུ་མགོན་གཙོ་བོར་བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ལགས་དང་། བོད་ཀྱི་ཆོས་ལུགས་ཆོས་བརྒྱུད་ཆེན་པོ་ལྔའི་ཆོས་ཚོགས་ཀྱི་དབུ་འཛིན་སོགས་ཕེབས་ཡོད། ཉིན་དེའི་ཕྱི་དྲོར་ལྕགས་ཟམ་པ་ཟློས་གར་ཚོགས་པས་མི་མང་ལ་ལྷ་སྒྲུང་གཟུགས་ཀྱི་ཉི་མའི་བྲོ་གར་སྤྱན་འབུལ་ཞུས་པ་སོགས་བོད་ཀྱི་རིག་གཞུང་འགྲེམས་སྟོན་དང་དེང་རབས་ཤེས་ཡོན་འགྲན་བསྡུར་གྱི་མཛད་སྒོ་སྣ་འཛོམས་དང་བཅས་པ་དེ་ཉིད་རྒྱལ་ཁའི་ངང་གྲོལ།།

ཨ་རིའི་བོད་ཀྱི་མཛངས་མ་འགྲན་ཞུགས་པ།