—–རེབ་སྨད་ལྷའུ།
སྒང་བ་བོད་ཀྱི་ཕ་གཞིས་དེ། སེར་མིན་སྐྱ་མིན་གྱི་དབང་དྲག་ཅན་ཚོས་ཡུན་རིང་ལོངས་སུ་སྤྱད་མཐར། ཁྱིམ་མཚེས་གཅན་གཟན་གཏུམ་པོས་གླགས་རྙེད་དེ་ཁྱུར་མིད་བྱར་ཉེ་བ་ན། ཡུལ་མི་དང་ཕ་གཞིས་དགྲ་ལག་ཏུ་གཏད་པའི་ནག་ཉེས་ལ་གཡོལ་ཆེད་དུ། ཁོ་ཚོས་འགན་འཁྲི་ཡོད་ཚད་སྐུ་ན་མ་སོན་པ་ཁྱེད་ཀྱི་དབུ་ལ་གཡོགས།
རྒྱལ་ཕམ་དང་འཆི་གསོན་གྱི་འགག་འཕྲང་དོག་མོ་ནས། ཁྱེད་ཀྱིས་སྐུ་སྲོག་གཏའ་མར་བཞག་སྟེ། རང་ནུས་ཡོད་རྒུས་འཁོར་འབངས་སྐྱོབ་ཐབས་མཛད། འོན་ཀྱང་ཕྱི་ནང་གི་འགལ་རྐྱེན་མང་ཞིང་། དགྲ་ནག་གི་གཡོ་སྒྱུ་དང་གདུག་རྩུབ་ཀྱི་དཔུང་ཁ་ཤིན་ཏུ་རྒོད་པས། དཔུང་མེད་དཔའ་བོ་ཁེར་རྒྱུག་གིས་ཕ་གཞིས་སྐྱོབ་ཐབས་བྲལ་བ་དང་། ཐུགས་འགན་ལྗིད་ཏིག་ཏིག་གིས་མནན་ཏེ་གཞན་ཡུལ་འགྲིམས། དེ་ནི་ཕ་གཞིས་སྐྱོབ་པའི་མཐའ་མཇུག་གི་གདམ་ག་ལོས་ཡིན་ཨང་།
རེ་ཞིག་གི་ཚེ། སྲོལ་ངན་མཁྲེགས་འཛིན་གྱི་གསེག་མས་ཁྱེད་ཀྱི་ཞབས་ཟུང་ལ་ན་ཟུག་ཡང་ཡང་བསླངས་ནའང་། ཁྱེད་ཀྱིས་རྐྱེན་ངན་བྱང་ཆུབ་ལམ་ཁྱེར་གྱི་བརྟུལ་ཞུགས་མཛད་དེ། གྲོགས་མེད་ཁེར་རྐྱང་དུ་ལུས་པའི་མི་རིགས་ཤིག་འཛམ་གླིང་ལ་གྲགས་པར་བྱས་པ་དང་། ད་ཆར་ཁྱེད་ཀྱི་མཁྱེན་བརྩེའི་འོད་སྣང་འཇིག་རྟེན་ཡོངས་ལ་རིས་མེད་དུ་ཁྱབ། དེ་ལྟ་མོད་ཀྱང་། ཕྱག་འཚལ་ཞོར་དུ་ཁྱེད་ཀྱི་ན་བཟའ་འོག་ལ་ལག་སྙོབ་བྱེད་པའི་བོད་མི་ལྟས་ངན་རིགས་ནི་སྐྱོབ་ཐབས་མ་མཆིས།
ཁྱེད་ཀྱིས་སྒང་བ་བོད་ཀྱི་ཆེད་དུ། གནང་དགོས་ཚད་གནངས་ཟིན་པ་དང་། དྲིན་གྱིས་བསྐྱངས་པ་མང་མེད་ན་ཉུང་མེད།
༧སྐྱབས་དམ་པ་ལགས། ཁྱེད་ཀྱི་སྐུ་ཚེ་ཡུན་རིང་བརྟན་པར་སྨོན།
༄༅། རེབ་སྨད་ལྷའུ་ལགས་ཀྱི་རྩོམ་དེ་ཡག་ཙམ་བྲིས་འདུག་སྙམ་ཡང་་་ཡག་པོ་མགོ་ཚོས་མ་སོང།
གཅིག་བྱས་ན་ངས་ཤེས་ཚད་དང་་ཁྱེད་ཀྱི་ཤེས་ཚད་གཉིས་འདྲ་ཚད་་མི་འདུག།
ཁྱེད་ཀྱི་ཤེས་ཚད་དེ་ང་ཡི་ཤེས་ཚད་ཀྱི་གོང་ན་འཕགས་པ་ཞིག་འདུག་
གང་ལྟར་༧རྒྱལ་བ་དོན་གྱི་བདག་པོ་ལ་ཁྱེད་ནས་བསྟོད་པ་དེ་ལ་ང་ཤིན་ཏུ་དགའ་བྱུང།
ཐུགས་རྗེ་ཆེ་ཞུ།།
༄༅། ལྷ་མིའི་རྣམ་འདྲེན་བསྟན་འཛིན་རྒྱ་མཚོ་མ།ཅོག།
ས་བཅུའི་མངའ་བདག་བྱང་སེམས་འཕགས་པའི་སྲས།།
འཚེ་མེད་ཞི་བའི་ཡོན་ཏན་ལེགས་ལྡན་པའི།།
འཛམ་གླིང་ཞི་བདེའི་དེད་དཔོན་མཚན་སྙན་གསོལ།།