ཨེ་མ་ཧོ།
ན་མོ་གུ་རུ་ཀརྨ་རཏྣ་ཡེ།
གདོད་མའི་མགོན་པོ་ཀུན་བཟང་རྡོ་རྗེ་འཆང་།།
སྐྱེ་འགག་གནས་བྲལ་རྟེན་འབྱུང་རྒྱལ་བའི་སྲས།།
བསྟན་དང་འགྲོ་བའི་དོན་ལ་བྱོན་མཛད་པའི།།
ངེས་དོན་དགེ་བའི་བཤེས་གཉེན་ཚོགས་ཀུན་རྒྱལ།།
མདོ་ཁམས་རྡོ་སྟོད་ཡོག་མདའ་གཟས་གོར་རུ།།
བདེ་ཆེན་རྡོ་རྗེ་འབའ་ལོར་སྐུ་འཁྲུངས་ཤིང་།།
བཤད་དང་སྒྲུབ་པ་ཁོ་ནས་བསྟན་པ་སྐྱོང་།།
སྦས་པའི་རྣལ་འབྱོར་ཆེན་པོ་གསོལ་བ་འདེབས།།
གཡུ་ཐོག་རྣམ་རྒྱལ་དགོན་པའི་སྐྱབས་མགོན་མཆོག།
ཐུབ་བསྟན་མདོ་སྔགས་བཤད་སྒྲུབ་སྤེལ་མཛད་པ།།
ཀརྨ་བསོད་ནམས་རིན་ཆེན་དཔལ་བཟང་པོའི།།
ཐུགས་དགོངས་ཇི་བཞིན་འབྲེལ་ཚད་དོན་ལྡན་ཤོག།
ཅེས་པ་རབ་རྒྱན་ཤིང་རྟའི་སྨིན་ཟླའི་དབང་ཚེས་རྒྱལ་བ་གསུམ་པར་དབང་སྟོད་སྤྲུལ་སྐུ་ཐུབ་བསྟན་ནོར་བུའི་འཕྲིན་ཕྲན་ལས་བརྡ་ཁྱབ་མཇལ་བའི་མོད་ལ་དབྱིན་ཡུལ་ཀུན་བཟང་ཆོས་གླིང་ནས་ཨེ་མ་ཧོས་གང་ཤར་སྨོན་པར་དགེའོ།།
མཆན་འདི་སྤྲུལ་སྐུའི་འཕྲིན་ཕྲན་ལས་བཤུས། ཁམས་ཀྱི་མཁས་དབང་མ་ཧཱ་པཎ་ཌི་ཏ་ཀརྨ་སི་ཏུ་གཙུག་ལག་ཆོས་ཀྱི་སྣང་བས་ཕྱག་བཏབ་པ་ནས་བཟུང་ད་ལོ་༢༠༡༤ལོའི་བར་བགྲང་བྱ་ཉིས་བརྒྱ་དོན་གཉིས་ཀྱི་ལོ་རྒྱུས་ལྡན་པའི་དཔལ་གྱི་ཆོས་སྡེ་ཆེན་མོ་རྡོ་གཡུ་ཐོག་རྣམ་རྒྱལ་དགོན་ཐུབ་བསྟན་མདོ་སྔགས་བཤད་སྒྲུབ་ཆོས་འཁོར་གླིང་གི་༧བྱང་སེམས་སྤྲུལ་བའི་རྣལ་འབྱོར་ཆེན་པོ་སྐྱབས་རྗེ་བླ་མ་ཀརྨ་བསོད་ནམས་རིན་པོ་ཆེ་མཆོག་ནི་བསིལ་ལྡན་གངས་ཀྱི་ར་བས་ཡོངས་སུ་བསྐོར་བའི་ཞིང་ཁམས། ཆེན་པོ་བོད་ཀྱི་བྱེ་བྲག ཨ་མདོ་གསེར་ལྡན་འཛིན་མའི་ཐིག་ལེ། རྡོ་ཀླུང་དལ་གྱིས་འབབས་པའི་གཡས་ཟུར། རྡོ་སྟོད་ཡོག་མདའ་གཟས་གོར་བྱ་བར་བོད་རབ་བྱུང་བཅོ་ལྔ་བའི་ལྕགས་མོ་བྱ་ཡི་ལོ་སྟེ་ཕྱི་ལོ་༡༩༢༡ བོད་ཟླ་དང་བོའི་ཡར་ཚེས་བརྒྱད་ཀྱི་སྔ་དྲོར་དུད་ཁྱིམ་དབུལ་བོ་ཞིག་སྟེ་ཕ་བདེ་རྡོར་དང་། མ་འབའ་ལོ་གཉིས་ཀྱི་སྲས་སུ་ངོ་མཚར་བའི་ལྟས་བཟང་དུ་མ་དང་བཅས་སྐུ་འཁྲུངས་ཤིང་ཟླ་འདིའི་ཚེས་བརྒྱད་ཉིན་དགོངས་པ་ཆོས་དབྱིངས་སུ་རྫོགས་པ་དང་། དེ་རིང་བོད་ཟླ་དགུ་བའི་ཉེར་བདུན་ཉིན་ལ་སྐུ་གདུང་ཞུས་པ་ན་གདུང་འདི་འདྲ་ཆུང་ཆུང་འདུག
བླ་མ་གྲོངས་པའི་སྐབས་སུ་སྐུ་ཕུང་ཆུང་དུ་ཕྱིན་པ་དང་། འཇའ་ཤར་བ། འབྲུག་གྲགས་པ་སོགས་བྱུང་སྐབས་སློབ་མ་ཚོས་སྤོབས་པ་ཆེན་པོས་ཤོད་སྲོལ་འདུག དོན་ངོ་མར་སྐུ་ཕུང་ཆུང་དུ་ཕྱིན་པ་དང་། འཇའ་ཤར་བ། འབྲུག་གྲགས་པ་སོགས་ཀྱིས་ཕན་ཐོགས་ཅི་ཞིག་ཡོང་གི་ཡོད་པ་རེད། ངས་སུ་གང་ལ་ཡང་ཟུར་ཟ་མིན། སྔོན་མ་ནས་འདིས་ཅི་ཞིག་ལ་ཕན་གྱི་ཡོད་པ་ཡིན་ནམ་སྙམ་པའི་དོག་པ་ཞིག་ཡོད་པས་དྲིས་ལན་རེ་གནང་མཁན་ཡོད་ན་ཕན་ཐོགས་འདུག
མཁས་དབང་ཆེན་མོ་སྤོབས་པ་ཚང་ལ་བཀྲ་ཤིས་བདེ་ལེགས་ཞུ། འདིར་ལན་རྒྱག་དགོས་དོན་ཡེ་མེད་མོད། ཡིན་ན་ཡང་དྲ་གྲོགས་རྙིང་པ་ཞིག་ཡིན་པའི་ཆ་ནས་ཚད་མ་རྣམ་འགྲེལ་ལས་མཚུངས་ན་འབྲེལ་གསུངས་པ་བཞིན་དུ་དགེ་བཤེས་ཕལ་མོ་ཆེ་བ་གྲོངས་པའི་སྐབས་སུ་སྐུ་ཕུང་ཆེ་རུ་ཕྱིན་པ་དང་། དྲི་ངན་བྲོ་བ། ཁྱི་ཟུག་པ། རོ་ལང་པ་སོགས་བྱུང་སྐབས་སློབ་མ་ཚོས་ལམ་རིམ་བཤད་པ་མི་མཐུན་ཚེ་གསང་རྒྱ་ཆེན་པོས་ཤོད་སྲོལ་འདུག དོན་ངོ་མར་སྐུ་ཕུང་ཆེ་རུ་ཕྱིན་པ་དང་། དྲི་ངན་བྲོ་བ། ཁྱི་རྒྱ་བོ་ཟུག་པ་དང་རོ་ལང་་པ་སོགས་ཀྱིས་ཕན་ཐོགས་ཅི་ཞིག་ཡོང་གི་ཡོད་པ་རེད། ངས་སུ་གང་ལ་ཡང་ཟུར་ཟ་མིན། སྔོན་མ་ནས་འདིས་ཅི་ཞིག་ལ་ཕན་གྱི་ཡོད་པ་ཡིན་ནམ་སྙམ་པའི་དོག་པ་ཞིག་ཡོད་པས་དྲིས་ལན་རེ་གནང་མཁན་ཡོད་ན་ཕན་ཐོགས་འདུག སྤོབས་པ་མཆོག་གིས་ལན་གསུངས་ལ་འབྲེལ་མཚུངས་སུ་ཕུལ།།