༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་བརྙན་དེབ་༼འཇིག་རྟེན་མིག་འབྱེད༽་ཅེས་བྱ་བ་འདི་ནི། མདོ་སྨད་བཙན་རྒོལ་བདེན་རྒྱབ་མནའ་འབྲེལ་རྩོམ་སྒྲིག་ཚོགས་ཆུང་གིས་མགོན་པོ་མཆོག་མདོ་སྨད་ས་ཡི་ཐིག་ལེར་སྐུའི་མཚན་དཔེ་མངོན་པར་བཞད་དེ་དགུང་གྲངས་ ༧༥ ཕེབས་པའི་གཞུང་འབྲེལ་ལོ་འཁོར་གཅིག་གི་མཛད་འཆར་ཁོངས་སུ་རྩོམ་སྒྲིག་ཞུས་པ་ཞིག་ཡིན་ཞིང་། བརྙན་དེབ་འདི་དཔར་སྐྲུན་ཞུས་པ་བརྒྱུད། སྐལ་ལྡན་ཀློག་པ་པོ་རྣམས་ཀྱིས་༸རྒྱལ་བ་ཐམས་ཅད་མཁྱེན་པའི་མཛད་འཕྲིན་གཞལ་ཡས་ཆུ་གཏེར་ཆེན་པོ་ལས་ཟིལ་རྡུལ་ཙམ་མཇལ་བའི་བྱིན་མཐུས། མགོན་པོ་གང་གི་ཡོན་ཏན་ཚོར་བའི་སྒོ་ནས་བཀའ་དྲིན་རྗེས་དྲན་གྱི་བསོད་ནམས་གསོག་པའི་རྒྱུ་རུ་འགྱུར་ཐུབ་པ་དང་། རྩོམ་སྒྲིག་ཚོགས་ཆུང་ནས་མདོ་སྨད་གཞིས་བྱེས་མི་དམངས་ཀྱི་ཚབ་ཞུས་ཏེ། མགོན་པོ་མཆོག་འགྲོ་བ་མིའི་རིགས་ཀྱི་མགོན་དཔུང་དམ་པར་སྐུ་ཚེ་༸ཞབས་པད་བསྐལ་བརྒྱར་བཞད་པའི་བརྟན་བཞུགས་ཀྱི་ཚུལ་དུ་ཕུལ་བ་ཡིན།
ལེའུ་དྲུག་གི་བདག་ཉིད་ཅན་གྱི་མཛད་རྣམ་བརྙན་དེབ་འདིར། མགོན་པོ་མཆོག་སྐུ་བལྟམས་པ་ནས་རྒྱ་དམར་ལྷ་སར་མ་འབྱོར་བར་དང་། རྒྱ་གུང་ཁྲན་དང་མཉམ་གནས་ཀྱི་ལོ་ངོ་བརྒྱད། རྒྱ་གར་དུ་བཙན་བྱོལ་སྒྲིག་འཛུགས་དང་བོད་མིའི་བདེ་རྩར་ཐུགས་བརྩོན་ཇི་མཛད། ནང་པའི་བསྟན་པ་དར་སྤེལ་དང་ཆོས་ལུགས་འཆམ་མཐུན་སྐུལ་འདེད། འཛམ་གླིང་གི་དབུ་ཁྲིད་དང་གྲགས་ཅན་མི་སྣར་མཇལ་འཕྲད་དང་བོད་དོན་བདེན་མཐའ་གསལ་ཐབས། ཕྱི་རྒྱལ་ཡུལ་གྲུར་འཇིག་རྟེན་ཀུན་ཁྱབ་འགན་འཁུར་གསེད་འགྲོལ་དང་གཟེངས་རྟགས་སྣ་ཚོགས་འབུལ་བཞེས་བཅས་ཚོས་ལྡན་ཤོག་ལྷེ་ ༣༡༤ ལས་གྲུབ་ཡོད།
དེབ་འདི་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་རྒྱལ་ས་ཝ་ཤིན་ཊོན་དུ་ཕྱི་ལོ་ ༢༠༡༡ ཟླ་ ༧ ཚེས་ ༦ སྐུའི་འཁྲུངས་སྐར་ཉིན་དབུ་འབྱེད་བཀའ་དྲིན་བསྐྱངས་གནང་བ་དང་། ཕྱོགས་མཚུངས་བཞུགས་སྒར་དྷ་རམ་ས་ལར་ཡང་དུས་ཚེས་འདི་རང་ལ་དབུ་འབྱེད་གནང་ཡོད།
བརྙན་དེབ་བླུ་འདོད་ཡོད་མཁན་ཚོས་གཤམ་གསལ་ཁ་བྱང་བརྒྱུད་འབྲེལ་བ་གནང་རོགས། མདོ་སྨད་བཙན་རྒོལ་བདེན་རྒྱབ་མནའ་འབྲེལ་རྩོམ་སྒྲིག་ཚོགས་ཆུང་ནས་ཕྱི་ལོ་ ༢༠༡༡ ཟླ་ ༦ ཚེས་ ༡༧ ལ།
འབྲེལ་གཏུགས་ཁ་བྱང།
Gyalrong Dawa Tsering,
C/o Tibetan Parliament-in-Exile,
CTA, Gangchen Kyishong
Dharamsala-176215, HP, India.
Mob: 98170-96699.
ཐུགས་རྗེ་ཆེ། མདོ་སྨད་པ་ཡོངས་ལ།
༄། །བརྙན་པར་གྱི་ལམ་ནས་མཛད་རྣམ་རྩོམ་སྒྲིག་ཞུ་མཁན་མདོ་སྨད་པ་དབུ་ལས་ཡོངས་ལ་ཡིད་སྤྲོའི་བསྔགས་བརྗོད་དང་བཅས་ཐུགས་རྗེ་ཆེ་ཞུ། གཞིས་སྡོད་པ་ང་ཚོར་དམིགས་ཏེ་གང་མྱུར་དྲ་ངོས་ནས་མཇལ་ཀློག་ཐུབ་པ་ཞིག་གནང་སྐྱོང་ཡོང་བའི་དགོས་འདུན་ཞུ་བཞིན་ཡོད།།
མདོ་སྨད་པ་ཚོ་ཁ་བྲོ་བཀྲ་ཤིས། ངོ་མ་ཧྲ་གི་གོ
སྐད་ཆ་མང་པོ་མེད། ནང་དོན་ལ་བལྟས་ནས་བཤད་ཆོག། ད་ལྟ་མཐོང་མ་སོང་། སྤྱིར་དེ་རིང་སྐུའི་འཁྲུངས་སྐར་ཡིན་དུས་བོད་མི་སྐྱེ་བོ་རྣམ་ལྡན་ཡོངས་ནས་སེམས་ནང་ཆོས་དྲན་ནས་གང་བྱས་པ་དེ་ཆོས་ཕྱོགས་སུ་འགྲོ་བ་ཞིག་གནང་དགོས། དེ་མིན། དེ་འདྲ་། དེ་འདྲ་། རྒྱ་སྟོང་། ཁྲི་འབུམ། བྱས་ན་ཕན་སྲིད་དམ་ཅེས་དྲིས་བ་ཆགས་པ་རེད།
དཔེ་མི་སྲིད་པའི་ཡག་པོ་རེད་འདུག དགའ་བསུ་དང་བསྔགས་བརྗོད་ཡོད། གསར་ལམ་ཁག་ཏུ་དགོང་གྲངས་ ༧༦ཟེར་ནས་བསྒྲགས་བཞིན་འདུག ཁྱོད་ཚོས་དགོང་གྲངས་དེ་ནོར་བ་འ་ཡིན།
དགུང་གྲངས་ཟེར་ནས་ཀློག
འཁོར་འདས་མིག་འབྱེད་དམ། རྟེན་འབྲེལ་མིག་འབྱེད་བཏགས་ན་ལེགས་སྙམ། རྒྱུ་མཚན་གང་ཡིན་ཞེ་ན། འཇིག་རྟེན་མིག་འབྱེད་འདི་གུང་བྲན་ཏང་གི་གློག་བརྙན་ཞིག་ལ་འདི་འདྲ་མིང་བཏགས་འདུག
ཡག་པོ་རེད་ཐུགས་རྗེ་ཆེ་ཡིན་ཡང་གཙོ་བོ་བཀའ་གསུང་བརྩི་རྒྱུ་དེ་བས་གལ་ཆེ།
༸རྒྱལ་བའི་བཀའ་དྲིན་དྲན་ཞིང་བཀའ་བཞིན་སྒྲུབ་པའི་མཆོད་པ་བསྒྲུབ་ཆེད་དཔེ་དེབ་དཔར་བསྐྲུན་ཞུས་པ་ཞིག་ཡིན་ཚེ་ངོ་མ་དགའ་སེམས་དང་བཅས་རྗེས་སུ་ཡི་རང་ཞུ་རྒྱུ་ཡིན་ལ། ང་དང་ང་འདྲ་བའི་བླང་དོར་ལ་རྨོངས་པའི་སྐྱེ་བོའི་ཚོགས་རྣམས་ཕྱག་དེབ་དེ་མཇལ་བ་དང་ཉམས་ལེན་གྱི་རྒྱུ་བྱས་ནས་རྨོངས་མུན་སེལ་ཐུབ་པའི་རེ་བ་ཆེ། དེ་མིན་མདོ་སྨད་དང་མདོ་སྨད་ཞེས་ཡང་ཡང་སྨྲོས་སྟངས་ལ་བལྟས་ཚེ་མིང་གྲགས་དོན་དུ་གཉེར་བ་མ་ཚད། ཆོལ་ཁའི་འཐེན་འཁྱེར་གྱི་བསམ་བློ་ཞིག་ངམ་ངམ་ཤུགས་ཀྱི་འདྲེན་མཁན་འདྲ་པོ་ཚོར་སོང་ན། ༸རྒྱལ་བའི་མཛད་རྣམ་དང་མཚན་བེད་སྤྱད་ནས་མདོ་སྨད་ཀྱི་མིང་གྲགས་བཟོ་རྒྱུ་ནི་ངོ་མ་ཐབས་སྡུག་ནང་གི་ཐ་ཤལ་གྱི་སྤྱོད་པ་ལས་མ་མཆིས། ལྷག་པར་དུ་ཨ་ལགས་འཇིགས་མེད་དང་། ཆབ་བྲག་ལྷ་མོ་སྐྱབས་ཟེར་བ་སོགས་དོན་དུ་ཆིག་སྒྲིལ་དང་བོད་སྤྱི་པ་ཁ་ལ་འཁྱེར་ནས་མགོ་བདེ་གནང་མཁན་ཞིག་དང་། དོན་དུ་ཆོལ་ཁའི་འཐེན་འཁྱེར་གྱི་ནང་རུལ་དུ་སོང་བ་མ་ཟད་ངོ་ཤེས་དང་ཕ་ཡུལ་གཅིག་པ་བོད་དོན་མིང་ཐོག་ནས་ནུབ་ཕྱོགས་ཡུལ་དུ་མཛངས་མཁན་ཞིག་ཡིན་པ་ཡང་ཡང་ཐཽས་སོང་བས། ངོ་མ་སྐྱོ་དགོས་པ་ཞིག་མ་ཡིན་ནམ།
༄། །གོང་དུ་ལག་ནས་ཤིག་མི་ཆོར་བར་ཁ་ནས་སྐམ་བཤའ་མཁན་གྱི་དྲ་འབུ་ཁ་ཤས་མཐོང་སྟེ། སྐད་ཆ་མང་པོ་མེད། ནང་དོན་ལ་བལྟས་ནས་བཤད་ཆོག།ཅེས་དང་། འཁོར་འདས་མིག་འབྱེད་དམ། རྟེན་འབྲེལ་མིག་འབྱེད་བཏགས་ན་ཟེར་བ་འདི་རིགསས་ཅི་ཡང་མི་ཤེས་པའི་ཀླད་སྟོང་གནམ་གྱི་སྐར་མ་ལ་ཟུག་པའི་ནོར་སྐྱོང་བརྒྱགས་པ་ཞིག་ཡིན་པར་གོ་ཞིང་། དེ་བས་ཀྱང་། དེ་མིན་མདོ་སྨད་དང་མདོ་སྨད་ཞེས་ཡང་ཡང་སྨྲོས་སྟངས་ལ་བལྟས་ཚེ་མིང་གྲགས་དོན་དུ་གཉེར་བ་མ་ཚད། ཆོལ་ཁའི་འཐེན་འཁྱེར་གྱི་བསམ་བློ་ཞིག་ངམ་ངམ་ཤུགས་ཀྱི་འདྲེན་མཁན་འདྲ་པོ་ཚོར་སོང་ན། སོགས་བྱབ་ཆུང་གི་ཚིག་རོ་མང་བོ་ཞིག་བྲིས་པ་དེས་རང་ཉིད་དོན་དུ་ཆོལ་ཁའི་འཐེན་འཁྱེར་གྱི་ནང་རུལ་བྱེད་འདོད་ཆེ་བ་ཤེས་ཐུབ་ནའང་། དེའི་ནུས་པ་ཁྱེད་ལ་ཨེ་ཡོད། ཁྱོད་ལྟར་ན། མདོ་སྨད་པས་དྲ་ཚིགས་ཕྱེ་བ། ས་བྱི་ཞི་རྒོལ་ཆེན་མོའི་དེབ་དུས་ཐོག་ཏུ་བཏོན་པ། ༧ གོང་ས་མཆོག་གི་སྲིད་དོན་གྱི་མཛད་རྣམ་ཀྱག་ཀྱོག་ཆེ་བའི་བཞུད་ལམ་དང་འོད་སྟོང་འབར་བའི་མི་ཚེ་དང་། ༧ཀུན་གཟིགས་རིན་པོ་ཆེའི་མཛད་རྣམ་ཟླ་བའི་རང་མདངས་རྩོམ་སྒྲིག་འགྲེམས་སྤེལ་ཞུས་པ། ། དོལ་རྒྱལ་སྐོར་གཡའ་སེལ་མེ་ལོང་བརྩམས་ནས་བཀྲམ་པ་སོགས་ཀྱང་ཆོལ་ཁའི་འཐེན་འཁྱེར་གྱི་ནང་རུལ་བྱེད་འདོད་ཡིན་མཆི། དོན་དངོས་སུ་བདེན་པའི་བྱུང་རབས་དེ་དག་མི་ཤེས་པ་ཚོར་ཤེས་སུ་བཅུག མ་གོ་བ་གོ་བར་བྱས། བླང་དོར་གྱི་དམིགས་ཕྱེ། མཛད་ཕྲིན་གལ་ཆེན་རྣམས་དུས་ལས་མ་ཡོལ་བར་ཡིག་ཐོག་ཏུ་བཀོད་དེ་བསྐལ་བ་ནམ་གནས་ཀྱི་བར་བརྗེད་མེད་སྙིང་བཅང་ཡོང་བའི་ཆ་རྐྱེན་བསྐྲུན་པ་སོགས་ཕྱོགས་ངོས་མང་པོ་ནས་ཕན་རླབས་ཆེ་ཞིང་། ད་ལྟའི་བོད་ཡུལ་གང་སར་ཤིན་ཏུ་མཁོ་ཆེ་བ་ལགས་ཀྱང་ཁྱེད་ཅག་ལྟ་བུར་ཅི་ཆ། དེས་ན། གཙང་བཀྲས་ལྷུན་དགོན་གྱི་རྗེས་འཇུག་ཚོས་ཞིང་གཤེགས་༧ཀུན་གཟིགས་རིན་པོ་ཆེ་དང་མཆོག་སྤྲུལ་ཟླ་བ་གཞོན་ནུའི་ཆེད་དྲ་ཚིགས་ཤིག་ཀྱང་གཉེར་མེད་པ་ལ་བསྔགས་བརྗོད་ཞུ་རྒྱུ་ཨེ་ཡིན། དུང་དཀར་སེར་མཐོང་གི་ནད་གདོན་གྱིས་ཟིན་པའམ། དོལ་འདྲེས་བརླམས་པ་གང་ཞིག་ཡིན་ངེས་འདི་དག་ལ་བསྟན་སྲིད་མི་རིགས་ཀྱི་ལས་དོན་ལ་ཕན་པའི་བྱ་གཞག་སྒྲུབ་རེ་མ་མཐོང་བས་ཞབས་འདྲེན་ཉག་གཅིག་ཞུ་མཁན་གླེན་ལྐུགས་སྙིང་རྗེའི་གནས་སུ་བལྟའོ།།
ཁྱེད་རྣམས་ཀྱི་དགེ་བའི་འབད་རྩོལ་ལ་རྗེས་ཡི་རངས། མཛད་རྣམ་དེ་ཨ་རིའི་རྒྱལ་ས་ན་་བླུ་ཡོན་ལ་ཞུ་ཐུབ་པའི་རེ་འདུན་ལགས།
རྗེས་སུ་ཡི་རངས་ཡིན་དང་ཡིན། ཨ་རི་ནས་༧སྐུའི་འཁྲུངས་ལྷ་ཡར་གསོལ་ཀྱི་མཛད་སྒོའི་སྟེང་༧གོང་ས་མཆོག་ལ་ཐད་ཀར་འབུལ་ཐུབ་བྱུང་འདུག་པར་ཧ་ཅང་དགའ་བོ་བྱུང་སོང་། དེ་ལྟར་ཕུལ་བར་དགའ་སྤོབས་ཆེན་པོ་བྱུང་ཡང་ད་དུང་མཇལ་ཐུབ་མ་སོང་། ལེགས་པོ་དང་འཐུས་ཚང་རང་བཞིན་ལྡན་པ་བྱུང་ཡོད་པར་ཡིད་ཆེས་ཡོད། གང་ཐུབ་རིན་གོང་ཆུང་ཆུང་གིས་བོད་ཕྱི་ནང་གཉིས་ལ་ཁྱབ་འགྲེམས་རྒྱ་ཆེར་ཡོང་ཐབས་གནང་གལ་ཤིན་ཏུ་ཆེ་བར་མཐོང་། ཞེས་འབོད་སྐུལ་དང་བཅས་བྲིས་པའོ།།