༸གོང་ས་ཏཱ་ལའི་བླ་མའི་གཉིས་སྨན་དབུ་མའི་ལམ་གྱི་ལྟ་སྤྱོད་ཀྱི་དགོངས་དོན།

མདའ་མོ་ཚང་རྨོག་རུ་བསྟན་པ།

གཉིས་སྨན་དབུ་མའི་ལམ་གྱི་ངོ་བོ།

གཉིས་སྨན་དབུ་མའི་ལམ་ནི་རྒྱལ་ཁབ་དང་།ཚོགས་སྡེ།མི་སྒེར་སོགས་སུ་འདྲ་ཞིག་ཡིན་ཀྱང་ཕྱོགས་གཅིག་གི་ཁེ་ཕན་གཙོར་བཟུང་བྱེད་པ་མིན་པར་ཕྱོགས་གཉིས་ཀར་འདྲ་མཉམ་དང་།གུ་ཡངས།བཟོད་བསྒོམ་སོགས་ཀྱི་ཆ་ལག་ཚང་བའི་རྣམ་དཔྱོད་ལྡན་པའི་བསམ་བློ་གཏོང་སྟངས་ཤིག་དང་།རྒྱལ་ཁབ་དང་སྤྱི་ཚོགས།མི་དང་མིའི་བར་གྱི་གནད་དོན་ཐག་གཅོད་ཀྱི་འདུམ་འགྲིག་ལ་མེད་ཐབས་མེད་པའི་ལྡེ་མིག་ཞིག་ཡིན།
འདིའི་ཐད་ཨ་རིའི་གྲོས་ཚོགས་གོང་མའི་འཐུས་མི་ལྕམ་diannefeinsten ལགས་ཀྱིས།རང་རེའི་འཛམ་གླིང་འདི་རྩོད་རྙོག་དང་འཐབ་རྩོད་ཀྱིས་ཁེངས་ཡོད་ཀྱང་།ཏཱ་ལའི་བླ་མ་མཆོག་གིས་འཛམ་གླིང་འདི་རང་གི་རྒྱལ་མཚམས་ལས་བརྒལ་དུ་བཅུག་ནས་ང་ཚོར་རེ་བ་དང་།བློ་སྟོབས་ཁྱད་དུ་འཕགས་པ་ཞིག་སྤེལ་བར་མཛད་བཞིན་ཡོད།སྐུ་ཉིད་མྱོང་རྒྱུས་བྱུང་བ་ནི་སྙིང་རྗེ་བདག་ཉིད་ཡིན་པ་ངེས་པ་སྐྱེས་ལ།སྐུ་ཉིད་ཀྱི་གསུང་གི་འཕྲིན་ལས་ལ་ཞུགས་པ་ནི་ཤེས་རབ་སྦྱོང་བ་ཡིན།སྐུ་ཉིད་ཀྱི་ཉེ་དྲུང་དུ་བཅར་བ་ནི་ཧ་ཅང་ཁྱད་དུ་འཕགས་པ་ཞིག་གི་མྱོང་ཚོར་ཐོབ་པའི་ཆེད་དུ་ཡིན།སྐྱེས་མཆོག་ཁྱེད་ནི་ཞི་བདེ་དང་བྱམས་སྙིང་རྗེའི་ནུས་སྟོབས་ཆེན་པོ་ཞིག་ཡིན་ལ།སྐུ་ཉིད་ནས་མི་རྣམས་ལ་གུ་དོག་དང་།རང་གཅེས་འཛིན་གྱི་འཆིང་རྒྱ་ལས་བསྒྲལ་ཏེ་གཞན་ཕན་སྒྲུབ་པའི་གདེང་སྤོབས་རྙེད་པར་མཛད་ཀྱིན་ཡོད།ཅེས་གཉིས་ཕན་དབུ་མའི་ལམ་གྱི་ངོ་བོ་གསལ་འདོན་གནང་ཡོད།

གཉིས་སྨན་དབུ་མའི་ལམ་གྱི་དམིགས་ཡུལ།

རྗེ་ཙོང་ཁ་པ་ཆེན་པོས།འཇིག་རྟེན་རྒུད་པ་ཇི་སྙེད་པ།།དེ་ཡི་རྩ་བ་མ་རིག་སྟེ་གསུངས་དོན་བཞིན་འཇིག་རྟེན་འཁོན་འཛིན་གྱི་རྩ་བ་ནི་རྨོངས་པ་དང་།ངར་འཛིན་ལ་ཐུག་པ་ཡིན་པས་སྐྱེ་བོ་སུ་འདྲ་ཞིག་ཡིན་ཀྱང་རང་ཕྱོགས་ནས་གུ་ཡངས་ཀྱི་བསམ་བློ་ཞིག་གཏོང་ཐུབ་པ་ཡིན་ན་ཞི་བར་མི་དགའ་བ་དང་།བདེ་བ་མི་མཁོ་བའི་སྐྱེ་བོ་ཡོད་མི་སྲིད་པའི་མི་དང་མིའི་བར་གྱི་གྱོད་གཞི་དང་འཁོན་འཛིན་ཚང་མ་ཞི་བདེ་ངང་ཐག་གཅོད་བྱེད་ཐུབ་ངེས་ཡིན།དེའི་ཕྱིར།ཞི་བདེ་ནི་དམག་འཁྲུག་གི་མཚོན་ཆ་ངོ་མ་ཡིན་པས་ངོས་འཛིན་སྟེང་འཛམ་གླིང་སྐྱེ་འགྲོ་ཀུན་ལ་ཞི་བདེ་བག་ཕེབས་ཀྱི་ཁོར་ཡུག་བཟང་པོ་ཞིག་འབྱུང་ཐབས་ནི་དབུ་མའི་ལམ་གྱི་དམིགས་ཡུལ་ཡིན།
ནོར་ཝེལ་ཞི་བདེ་དེད་དཔོན་ཆེན་མོ་བོད་གྲོགས་སྐུ་ཞབས་ཨེ་ལི་ཝི་སལ་མཆོག་གིས།ཏཱ་ལའི་བླ་མ་མཆོག་གི་མདུན་དུ་ཆབ་སྲིད་འཐབ་རྩོད་དང་།ཆབ་སྲིད་གནས་བབ་ཀྱི་རང་བཞིན་ལ་གདོང་ལེན་དགོས་པའི་སྐུ་ངལ་མང་པོ་ཞིག་ཡོད་ཀྱང་།དེ་དག་ལ་ཇི་མི་སྙམ་པར་དུས་དང་རྣམ་པ་ཀུན་ཏུ་ཟབ་ཡངས་དཀྱེལ་ཆེ་དང་།དམ་བཅའ་འགྱུར་བ་མེད་པ།གཞན་ལ་འཁོན་འཛིན་སྤངས་ཏེ་བོད་ཀྱི་བདེན་དོན་འཐབ་རྩོད་བྱེད་པ་སྨོས་ཅི།འཛམ་གླིང་གི་སྣེ་ཁྲིད་གནང་མཁན་ཆེས་གུས་བཀུར་འོས་པའི་རླབས་ཆེན་དབུ་ཁྲིད་ཅིག་ཏུ་གྱུར་ཡོད།
ཏཱ་ལའི་བླ་མ་མཆོག་ནས་འཚེ་མེད་ཞི་བ་དང་།གཞན་ཕན་ལྷག་བསམ་གྱི་བློ་གྲོས་ཡངས་པའི་དགོངས་པ་མཐའ་དག་རྒྱལ་མཚམས་ལས་ཡོངས་སུ་བརྒལ་ཏེ་འཛམ་གླིང་ཁྱོན་དུ་བྱམས་བརྩེ་དང་གཞན་ཕན།ལྷག་བསམ་གྱི་ལམ་སྟོན་པ་རླབས་ཆེ་ཞིག་ཏུ་གྱུར་ཡོད།ཏཱ་ལའི་བླ་མ་མཆོག་ནི་དུས་དང་རྣམ་པ་ཀུན་དུ་རང་རེའི་འཇིག་རྟེན་འདི།མི་སྡེའི་ཁྱིམ་ཚང་ཆེན་པོ་གཅིག་ཏུ་ངོས་འཛིན་གྱི་འདུ་ཤེས་སྐུལ་སྤེལ་དང་འགྲོ་བ་མིའི་རིགས་བར་ཕན་ཚུན་འཁོན་འཛིན་དང་།འཐབ་འཁྲུག་་ཁ་བྲལ་གྱི་དཀའ་རྙོག་ཁག་ཞི་ཐབས་སུ་རྒྱུན་ཆད་མེད་པའི་བསླབ་བྱ་ནན་པོ་གནང་མཁན་གཙོ་བོ་ཞིག་ཏུ་གྱུར་ཡོད།ཏཱ་ལའི་བླ་མ་མཆོག་ནས་རྒྱུན་དུ་འཇིག་རྟེན་ཐོག་ས་ཁུལ་བྱེ་བྲག་པ་ཞིག་ཏུ་འཐབ་འཁྲུག་གི་དཀའ་ངལ་དང་།ཡང་ན་འགྲོ་བ་མིའི་གཞི་རྩའི་རང་དབང་ལ་བཙན་གནོན་བྱེད་པའི་གནས་ཚུལ་བྱུང་ན་དེ་ནི་ས་ཁུལ་བྱེ་བྲག་པའི་གནས་ཚུལ་མ་ཡིན་པར།འཛམ་གླིང་སྤྱི་ལ་ཕན་གནོད་དང་འབྲེལ་བའི་གཅིག་ལ་གཅིག་བརྟེན་གྱི་འབྲེལ་བའི་རྣམ་གཞག་རྒྱས་བཤད་ཀྱིས་གཞན་ལ་ཡང་དག་པའི་ལམ་སྟོན་གནང་བཞིན་པ་འདི་ནི།དངོས་འབྲེལ་རང་རེར་ཐོབ་པའི་གཞི་རྩའི་བསླབ་བྱ་ཆེན་པོ་ཞིག་ཡིན།ཞེས་དགོས་དམིགས་གསལ་འདོན་གནང་ཡོད།
༸གོང་ས་སྐྱབས་མགོན་ཆེན་པོ་མཆོག་གིས་ཀྱང་།དེང་སང་ནི་དེ་སྔའི་གནས་སྟངས་དང་ཡོངས་སུ་མི་འདྲ་བར་རྒྱལ་ཁབ་བར་དང་།མི་དང་མིའི་བར།དེ་བཞིན་མི་དང་སེམས་ཅན་གཞན་གྱི་བར་འཇིག་རྟེན་སྤྱི་ཡོངས་ཀྱི་འགན་འཁུར་བསམ་བློ་དགོས་རྒྱུ་དེ་ནི་མི་ཚེའི་ཁྱད་ཆོས་མེད་དུ་མི་རུང་བར་གྱུར་ཡོད།
མ་འོངས་པར་འགྲོ་བ་མིའི་རང་བཞིན་ལྷན་སྐྱེས་ཀྱི་བཟང་པོའི་སྤྱོད་ཚུལ་དེ་དག་ལམ་ལྷོང་ཡོང་མིན་ནི་གཞི་རྩའི་ཐོག་ནས་ད་ལྟའི་མི་རབས་ཀྱི་འདུན་པ་དང་།ཆོད་སེམས་ལ་རག་ལུས་པ་ཡིན།གལ་ཏེ་ང་ཚོ་རང་ཉིད་ཀྱིས་འགྲོ་བ་མིའི་རྣམ་དཔྱོད་ཀྱི་ནུས་པ་དང་།འདུན་པ་བཅས་བེད་སྤྱོད་མ་བྱས་ཚེ།གཞན་སུ་ཞིག་གིས་ཀྱང་ང་ཚོའི་མི་ཐོག་འདི་དང་།མི་རབས་རྗེས་མའི་མ་འོངས་མདུན་ལམ་ཐད་འགན་ལེན་བྱེད་མི་ཐུབ་ཅེས་མ་འོངས་མངོན་གཟིཊ་ཀྱིས་བཀའ་གནང་ཡོད།
མ་ཧཱ་པཎྚིཏ་ཟམ་གདོང་རིན་པོ་ཆེ་མཆོག་གིས་ཀྱང་།༡༩༨༧་ལོར་ཞི་བའི་དོན་ཚན་ལྔ་དེ་བཀའ་གནང་བ་རེད།ཞི་བའི་དོན་ཚན་ལྔ་ནི་ང་ཚོས་མ་འོངས་པའི་དབུ་མའི་ལམ་གྱི་སྲིད་བྱུས་གཏན་འབེབས་བྱེད་རྒྱུའི་རྒྱབ་ལྗོངས་ཀྱི་འཆར་སྣང་(Backgroundvision)དེ་རེད།དེ་ནི་རྒྱ་བོད་ཀྱི་གནས་བབ་ཐག་གཅོད་བྱུང་རུང་མ་བྱུང་རུང་གང་ལྟར་འཛམ་གླིང་སྤྱིའི་དོན་དུ་ཕུགས་རྒྱང་རིང་པོའི་དམིགས་ཡུལ་གང་དང་གང་ཡོད་པ་དེ་ཞིབ་ཚགས་པོས་གསུངས་པ་དེ་ལ་ཞི་བའི་དོན་ཚན་ལྔ་ཟེར་བ་རེད་ཅེས་གསུང་ཡོད།༼༢༠༠༩།༦།༢༤ཉིན་རྡ་སྟེང་བོད་ཁྱིམ་སློབ་གྲྭར་གནང་བའི་གསུང་བཤད་ལས།༽

གཉིས་སྨན་དབུ་མའི་ལམ་གྱི་ཉམས་ལེན།

དབུ་མའི་ལམ་ལ་ཞི་བའི་ལམ་དུ་འབོད་བཞིན་ཡོད་ལ།ཞི་བའི་ལམ་འདིར་ནང་པ་སངས་རྒྱས་པའི་ལྟ་སྤྱོད་བཟང་པོ་ཕར་ཕྱིན་དྲུག་གི་ཉམས་ལེན་གྱི་གནད་འདུས་པ་ཡིན།སྐྱེ་བོ་སུ་འདྲ་ཞིག་ཡིན་ཀྱང་མི་དང་མིའི་བར་གྱི་གནད་དོན་ཐག་གཅོད་ཞི་བའི་སྒོ་ནས་འདུམ་འགྲིག་བྱེད་པ་ལ་བཟོད་པ་དང་ལེན་བྱེད་དགོས་ཤིང་།བཟོད་བསྒོམ་གུ་ཡངས་ཀྱི་བྱ་སྤྱོད་ལ་ཚུལ་བཞིན་སྲུང་བ་དང་།ཕྱོགས་གཉིས་སུ་དྲང་ཚུགས་སུ་ལྟ་བའི་ཁྲིམས་ཀྱིས་རོགས་འདེགས་དགོས་པ་ཡིན།གནད་དོན་གང་ཞིག་ཡིན་ཀྱང་ཕྱོགས་གཅིག་གི་ཁེ་ཕན་གཙོར་བཟུང་བྱས་པས་འདུམ་འགྲིག་ལ་ཁ་ཐག་རིང་བ་དང་།ཕྱོགས་གཉིས་ལ་གུ་བཤངས་བྱེད་པས་ཁེ་ཕན་འདྲ་མཉམ་གྱི་གཏོང་ཕོད་ཞིག་དགོས་པ་ཡིན།གཉིས་ཕན་གྱི་ཀུན་ནས་བསླངས་བའི་ཁེ་ཕན་གཏོང་ལེན་བྱེད་པ་འགྱུར་མེད་ཀྱི་བསམ་པ་བརྟན་པོ་དགོས་ཤིང་།རང་དཔེ་གཞན་ལ་སྦྱར་བའི་དཔྱོད་ཤེས་ཀྱི་ཤེས་རབ་སྤྱད་དེ་ངང་རྒྱུད་རིང་པོའི་དུས་དང་གནས་སྐབས་ཀྱི་ཞི་བདེ་བརྩོན་ལེན་ངང་བསྲིངས་བྱེད་པ་ནི་ཕར་ཕྱིན་དྲུག་གི་གནད་དང་འབྲེལ་བའི་དབུ་མའི་ལམ་གྱི་ཉམས་ལེན་བྱེད་ཕྱོགས་ཡིན།
ཨ་རིའི་སྤྱི་མཐུན་ཚོགས་པའི་འཐུས་མི་ལྕམ་LieanaRos_lehtinen,མཆོག་གིས།༸གོང་ས་སྐྱབས་མགོན་ཏཱ་ལའི་བླ་མ་མཆོག་ནི་བོད་མི་རིགས་ཀྱི་རང་དབང་འཐབ་རྩོད་ཀྱི་རླབས་ཆེན་དང་དབུ་ཁྲིད་ཡིན་པ་མ་ཟད།གང་ཉིད་ཀྱི་དགོངས་པ་ནི་རྒྱལ་མཚམས་དབྱེ་བ་མེད་པར་འཇིག་རྟེན་ཀུན་ཁྱབ་ཀྱི་དཔེ་སྟོན་གཙོ་བོར་གྱུར་ཡོད།༸སྐྱབས་མགོན་ཏཱ་ལའི་བླ་མ་མཆོག་གིས་རྒྱུན་དུ་རྨད་དུ་བྱུང་བའི་རྣམ་ཐར་བདག་གིར་མཛད་བཞིན་པ་ནི་ཉམ་ཆུང་རྣམས་ཀྱི་མགོན་དཔུང་དང་།ཕ་རོལ་དུ་བགྲོད་པའི་ཟམ་པ།རྒྱ་མཚོ་སྒྲོལ་བའི་གྲུ་གཟིངས།དབུལ་བ་རྣམས་ཀྱི་ཟས་དང་གནས་མལ།མུན་པ་སེལ་བའི་སྒྲོན་མེ་ཞིག་ཏུ་འགྱུར་ཐུབ་པའི་ཐུགས་འདུན་དང་མཛད་རྗེས་ཁྱད་དུ་འཕགས་པ་དེ་ཡིན།ཞེས་གཉིས་སྨན་དབུ་མའི་ལམ་གྱི་ཉམས་བཞེས་གནང་ཕྱོགས་གསལ་འདོན་གནང་ཡོད།

གཉིས་སྨན་དབུ་མའི་ལམ་གྱི་ལྟ་བ།

སྟོན་པ་ཤཱཀྱ་ཐུབ་པའི་ལམ་སྟོན་གྱི་དགོངས་དོན་དང་།དངོས་ཡོད་ཚན་རིག་པའི་དཔྱད་བསྡུར་གྱི་བརྒྱུད་ལམ་དང་མཐུན་པའི་རྟེན་ཅིང་འབྲེལ་བར་འབྱུང་བའི་ནང་བའི་ལྟ་སྤྱོད་ཀྱི་དགོངས་དོན་དང་།རིས་སུ་མ་མཆིས་པའི་སྐྱེ་འགྲོ་ཡོངས་ལ་ཕན་པ་དང་བདེ་བའི་བྱམས་བརྩེ་ཐོབ་ཐབས་བྱེད་རྒྱུ་དང་།ཀུན་ཁྱབ་སེམས་འཁུར།འཚེ་བ་མེད་པ།འདྲ་མཉམ་སོགས་ཀྱི་སྒོ་ནས་ཞི་བདེ་ཡི་ཁོར་ཡུག་བསྐྲུན་རྒྱུ་ནི་དབུ་མའི་ལམ་གྱི་ལྟ་བ་ཡིན།
༸གོང་ས་སྐྱབས་མགོན་ཆེན་པོས།ནང་ཆོས་སློབ་གཉེར་བྱས་ཏེ་རྟེན་ཅིང་འབྲེལ་བར་འབྱུང་བ་དང་།མཐའ་མེད་པའི་སྙིང་རྗེ་བཅས་ཀྱི་ལྟ་གྲུབ་ལ་གོ་རྟོགས་འཕེལ་བའི་དབང་གིས་ཀུན་ཁྱབ་སེམས་འཁུར་དང་།འཚེ་བ་མེད་པ།ཆོས་ལུགས་མཐུན་ལམ་བཅས་ཀྱི་གལ་འགངས་ཤེས་རྟོགས་བྱུང་།ལྟ་གྲུབ་ཀྱི་རྒྱུ་མཚན་འདི་དག་ལ་བརྟེན་ནས་ངས་མིའི་གཞི་རིམ་གྱི་བཟང་སྤྱོད་སྤེལ་རྒྱུའི་འབད་བརྩོན་མུ་མཐུད་བྱེད་ཀྱིན་ཡོད།ཐབས་ཚུལ་འདིས་དཀའ་ངལ་ཧ་ཅང་ཆེ་བའི་བོད་མི་རིགས་ཀྱི་འཐབ་རྩོད་ཀྱང་འཚེ་མེད་ཞི་བའི་ལམ་ནས་བྱེད་ཐུབ་པའི་ལམ་སྟོན་ཐོབ་བྱུང་ཞེས་བཀའ་གནང་ཡོད།

གཉིས་སྨན་དབུ་མའི་ལམ་གྱི་སྤྱོད་པ།

འཚེ་བ་མེད་པ་དང་།ཡང་དག་པ།བདེན་པ་སོགས་ཀྱི་གནས་ལུགས་ལ་གཞི་བཅོལ་ནས་འགྲོ་བ་རྣམས་ཕན་ཚུན་གཅིག་མཚུངས་ཀྱི་འདུ་ཤེས་ཐོག་བདག་གཞན་གྱི་ཁེ་ཕན་འདྲ་མཉམ་ཡོང་ཐབས་ནི་གཉིས་སྨན་དབུ་མའི་ལམ་གྱི་སྤྱོད་པ་ཡིན།
༸གོང་ས་སྐྱབས་མགོན་ཆེན་པོས།ཡར་རྒྱས་ཆེ་ཆུང་དང་།དཔལ་འབྱོར་བཟང་ཞན་ལ་མ་ལྟོས་པར་འཛམ་གླིང་འདིའི་སྟེང་གི་རྒྱལ་ཁབ་རྣམས་དང་།ཡུལ་སྡེ་ཕན་ཚུན།ཐ་ན་གྲོང་པ་ཁྱིམ་མཚེས།མདོར་ན་ལས་གྲྭའམ།ཁྱིམ་ཚང་གཅིག་གི་ནང་མི་ཚུན་ཆད།མིའི་རིགས་ཐམས་ཅད་ཕན་ཚུན་གཅིག་ལ་གཅིག་བརྟེན་གྱི་སྒོ་ནས་འཚོ་ཞིང་གནས་དགོས་པ་དང་།ཐམས་ཅད་ཀྱང་བདེ་བ་འདོད་ཅིང་སྡུག་བསྔལ་མི་འདོད་པའི་བསམ་ཚུལ་གཅིག་གྱུར་ཡིན་པ་བཅས་ཤེས་རྟོགས་གསལ་པོ་ཐུབ་པ་བྱས་ཏེ།མི་དང་མིིའི་བར་ཕན་ཚུན་བྱམས་པ་དང་བརྩེ་བའི་བསམ་ཚུལ་འཛིན་པ་དང་།དྲང་བདེན་རྕ་བར་བཟུང་བའི་ཉན་ཤེས་གོ་ཤེས་བཅས་བྱས་ན།ཆེ་ས་རྒྱལ་སྤྱིའི་ནང་གི་དཀའ་རྙོག་ནས།ཆུང་ས་ཁྱིམ་ཚང་གཅིག་ནང་གི་དཀའ་རྙོག་ཐམས་ཅད་ངང་གིས་སེལ་ཏེ་གཞི་ནས་མི་རྣམས་ཞི་བདེ་བག་ཕེབས་སུ་གནས་ཐུབ་པའི་རེ་བ་ཡོད་ཅེས་གསུངས་ཡོད།

གཉིས་སྨན་དབུ་མའི་ལམ་གྱི་གྲུབ་མཐའ།

རང་རྒྱལ་གཞན་ཕམ་དང་།གཞན་རྒྱལ་རང་ཕམ་གྱི་མཐའ་གཉིས་ལས་གྲོལ་ཏེ་གཉིས་ཕན་འདྲ་མཉམ་གྱི་བསམ་བློ་མི་འདོར་བ་ནི་དབུ་མའི་ལམ་གྱི་གྲུབ་མཐའ་ཡིན།འཇིག་རྟེན་གྱི་དཀའ་ངལ་དང་།རྙོག་འཛིངས་མང་ཤོས་ནི་རྣམ་རྟོག་གི་སྒྲོ་བཏགས་ལས་བྱུང་ཞིང་།སྒྲོ་བཏགས་ཀྱི་དབང་གིས་མི་རྣམས་ཕྱོགས་རིས་པའི་མཐའ་རུ་ལྷུང་བཞིན་ཡོད།ཕྱོགས་འཛིན་གྱི་མཐའ་ལས་གྲོལ་བ་ལ་གཉིས་ཕན་དང་།འདྲ་མཉམ།གཅིག་མཚུངས་ཀྱི་འདུ་ཤེས་དགོས་ངེས་ཡིན་པས།གཉིས་སྨན་དབུ་མའི་ལམ་གྱི་གྲུབ་པའི་མཐའ་ནི་སྒེར་འཛིན་དང་།ཧམ་པ།ང་རྒྱལ་སོགས་ཀྱི་བསླུ་བྲིད་ལས་བརྒལ་ཏེ་དྲང་ཚུགས་སུ་གནས་པ་དེ་ཡིན།

གཉིས་སྨན་དབུ་མའི་ལམ་གྱི་ཁྱབ་ཚད།

གཉིས་སྨན་དབུ་མའི་ལམ་གྱི་ལྟ་སྤྱོད་བཟང་པོ་ཡིས་སེམས་ལྡན་འགྲོ་བ་སྤྱི་དང་།རང་བྱུང་གི་ཁོར་ཡུག་ཀུན་ལ་ཁྱབ་པ་ཡིན་པས།ཇི་སྐད་དུ།ཇི་སྲིད་ནམ་མཁའ་གནས་པ་དང་།།འགྲོ་བ་ཇི་སྲིད་གནས་གྱུར་བ།།དེ་སྲིད་བདག་ནི་གནས་གྱུར་ནས།།འགྲོ་བའི་སྡུག་བསྔལ་སེལ་ཅེས་པའི་རླབས་ཆེན་ཞིང་།གཏིང་ཟབ་པའི་དགོངས་ཕྱོགས་ནི་༸གོང་ས་ཏཱ་ལའི་བླ་མ་མཆོག་གི་དབུ་མའི་ལམ་གྱི་ལྟ་སྤྱོད་བཟང་པོའི་ཁྱབ་ཚད་ཡིན།
ཨ་རིའི་གསེར་གྱི་རྟགས་མའི་རྩ་འཛིན་གྱི་བསྒྲགས་གཏམ་དོན་ཚན་དྲུག་པར།༸གོང་ས་སྐྱབས་མགོན་ཏཱ་ལའི་བླ་མ་མཆོག་ནས་འཛམ་གླིང་ཁྱོན་ཡོངས་སུ་མཁྱེན་བརྩེ་ནུས་གསུམ་གྱི་ནུས་ཤུགས་ལ་བརྟེན་ནས་འཇིག་རྟེན་སྤྱི་ཡོངས་འགན་འཁུར་བསམ་བློའི་གོ་རྟོགས་གོང་སྤེལ་གཏོང་བཞིན་ཡོད་པ་བཅས་ལ་ཆེས་བླ་ན་མེད་པའི་གུས་བརྩི་ཞུ་བཞིན་ཡོད་ཅེས་འཁོད་ཡོད།

གཉིས་ཕན་དབུ་མའི་ལམ་གྱི་གྲུབ་འབྲས།

གཉིས་ཕན་དབུ་མའི་ལམ་གྱི་སྲིད་བྱུས་ལ་བརྟེན་བོད་ཀྱི་རང་དབང་གི་འཐབ་རྩོད་འདི་ཉིད་འཛམ་གླིང་གི་སྡིངས་ཆར་གནས་ཐུབ་ཡོད་པ་དང་།དེ་བཞིན་རྒྱལ་ཁབ་གཞུང་དང་།གཞུང་འབྲེལ་མ་ཡིན་པ།མི་སྒེར་བཅས་ཀྱི་ངོས་ནས་སྔ་ཕྱིར་རྒྱབ་སྐྱོར་ཤུགས་ཆེ་བྱུང་བ་དང་།༸གོང་ས་སྐྱབས་མགོན་ཆེན་པོའི་མཛད་འཕྲིན་ལ་ཆར་བ་ཆུ་གྲོགས་བྱུང་ཡོད།
རྒྱ་ནག་གཞུང་དང་༸གོང་ས་སྐྱབས་མགོན་ཆེན་པོའི་སྐུ་ཚབ་བམ་༼བོད་གཞུང་གི་སྐུ་ཚབ་༽ཀྱི་བར་ཏུའང་ཕན་ཚུན་གནས་བབ་དང་བསམ་ཚུལ་བཤད་རེས་ཀྱི་གོ་སྐབས་ཐོབ་པ།དེ་བཞིན་༸གོང་ས་མཆོག་གི་རླབས་ཆེ་བའི་ཐུགས་ཀྱི་བཞེས་ཕྱོགས་ནི་བདེན་དོན་ཡང་དག་པ་ཞིག་ཡིན་པའི་གནས་ལུགས་འཛམ་གླིང་ཡོངས་སུ་ཉིན་མོ་བཞིན་གསལ་པོ་ཆགས་ཀྱིན་ཡོད།
བོད་དང་རྒྱ་ཡི་གནད་དོན་རྐྱང་བ་ཙམ་མིན་པར་གཉིས་སྨན་དབུ་མའི་ལམ་གྱི་དགོངས་པ་བཞེས་ཕྱོགས་ཀྱིས་བློ་གཟུ་བོར་གནས་པའི་སྐྱེ་བོ་གང་མང་ལ་མིག་དཔེ་དང་ལམ་སྟོན་གནང་ཡོད་ལ།ཨ་རིའི་གསེར་གྱི་རྟགས་མ་དང་།ནོ་ཝེལ་ཞི་བདེ་གཟེངས་རྟགས་ཀྱི་བྱ་དགའ་གནང་བ་སོགས་ཐོབ་དཀའ་བའི་ཆེ་མཐོང་དང་།འཛམ་གླིང་དྲེགས་ལྡན་ཀུན་གྱིས་གོང་དུ་བཀུར་བའི་རིན་ཐང་སོགས་ཀྱང་གཉིས་ཕན་དབུ་མའི་ལམ་དུ་ཕེབས་པའི་གཟི་བརྗིད་ཡིན།
ཨ་རིའི་གསེར་གྱི་གཟེངས་རྟགས་ཀྱི་རྩ་འཛིན་བསྒྲགས་གཏམ་དོན་ཚན་བཞི་བའི་ནང་།༸གོང་ས་སྐྱབས་མགོན་ཏཱ་ལའི་བླ་མ་མཆོག་ནི་འཛམ་གླིང་ཁྱོན་ཡོངས་སུ་ཞི་བདེ་དང་།ལྷག་པར་དབུ་མའི་ལམ་གྱི་མཛད་ཐབས་ལ་བརྟེན་ནས་བོད་ཀྱི་གནད་དོན་སེལ་རྒྱུའི་འབད་བརྩོན་གནང་བཞིན་ཡོད་པར་བརྟེན།སྤྱི་ལོ་༡༩༨༩་ལོར་ནོ་ཝེལ་ཞི་བདེ་གཟེངས་རྟགས་ཀྱི་བྱ་དགའ་འབུལ་བཞེས་གནང་ཡོད།ཞེས་འཁོད་ཡོད།
གཞན་ཡང་།ཨ་རིའི་གྲོས་ཚོགས་གོང་མའི་འཐུས་མི་ལྕམ་DianneFeinsteinམཆོག་གིས།ད་ལྟ་འཇིག་རྟེན་ཐོག་༸གོང་ས་ཏཱ་ལའི་བླ་མ་མཆོག་ལས་ལྷག་པའི་གྲོས་ཚོགས་ཀྱི་གསེར་གྱི་རྟགས་མའི་གཟི་བརྗིད་མཚན་སྙན་འབུལ་འོས་པའི་སྐྱེ་བོ་ཞིག་ཡོད་པ་ཕྲན་ནས་མཐོང་གིན་མེད།འཛམ་གླིང་གི་ས་ཕྱོགས་གང་སར་གང་གི་གསུང་བཤད་ཀྱིས་ཁྱབ་ཅིང་།གང་ཉིད་གང་དུ་འཁོད་པ་དེ་གར་མི་མང་ཁྲི་སྟོང་མང་པོ་འདུས་ཏེ་གསུང་གི་འཕྲིན་ལས་ལ་ཞུགས་ཤིང་།བྱམས་བརྩེ་སྐྱབས་བྱིན་གྱིས་རྗེས་འཛིན་ཡོང་བར་དད་འདུན་གྱིས་ཁྱབ་བཞིན་ཡོད།གང་གི་གསུང་ཆོས་ནི་ཆོས་ལུགས་དང་།རིག་གཞུང་།མི་རིགས་མི་འདྲ་བ་ཁག་ཡོངས་སུ་ཁྱབ་ཅིང་།ཞི་བདེ་དང་།འཚེ་བ་མེད་པ།ཕན་ཚུན་བསམ་ཤེས་བཅས་དང་འབྲེལ་བའི་གསུང་འཕྲིན་དེ་དག་ལས་ལྷག་པའི་འཇིག་རྟེན་འདིའི་ཐོག་ཕན་བདེ་ཞིག་གང་དུ་ཡང་གཏན་ནས་བྱུང་མྱོང་མེད་ཅེས་གསུང་ཡོད།

གཉིས་སྨན་དབུ་མའི་ལམ་གྱི་མ་འོངས་པ།

བཙོ་སྦྱངས་གསེར་གྱི་མདངས་ལྟར་བསྲེས་བསླད་ཀྱི་དྲི་མ་མེད་པའི་ཡང་དག་པའི་ཆོས་ལུགས་ཀྱི་འདུ་ཤེས་དང་།དགོངས་དོན་ལ་མཐུན་པ།མཐོ་དམན་བར་གསུམ་གྱི་སྐྱེ་བོའི་དབྱེ་འབྱེད་དང་།ལྟ་གྲུབ་བྱེ་བྲག་པའི་རིས་སུ་མ་ཆད་པའི་༸གོང་ས་ཏཱ་ལའི་བླ་མ་མཆོག་གི་གཉིས་སྨན་དབུ་མའི་ལམ་ནི་ལྟ་བསྒོམ་སྤྱོད་གསུམ་གྱི་གནད་འདུ་བའི་གཞུང་ལུགས་ཡང་དག་པ་ཞིག་དང་།
མི་སྡེའི་སྤྱི་ཚོགས་ཐུན་མོང་གིས་ཉམས་སུ་ལེན་བྱའི་ཉིན་རེའི་འཚོ་བའི་གྲུབ་ཆ་གལ་ཆེ་ཞིག་ཡིན་པ་ཤེས་བར་བྱས་ཏེ་འཛམ་གླིང་སྡིངས་ཆའི་སྟེང་དུ་༸གོང་ས་ཏཱ་ལའི་བླ་མའི་གཉིས་སྨན་དབུ་མའི་ལམ་གྱི་ལྟ་སྤྱོད་དང་དགོངས་དོན་བཟང་པོར་སློབ་ཁྲིད་དང་འཛུབ་སྟོན་གནང་བའི་རེ་སྐུལ་དང་བཅས་ཏེ་རྨོངས་བློར་འཆར་ཚུལ་ཙམ་ཞིག་གྲོས་འདེབས་ཀྱི་ཚུལ་དུ་ཕུལ་བ་ལགས་ན་དགོངས་འཆར་དང་ལམ་སྟོན་ཡོང་བའི་རེ་སྐུལ་བཅས་༢༠༡༡།༢།༥་ཉིན།