གནས་ཚུལ་གཏོང་མཁན། ཨ་འདུས་སྐལ་བཟང་རྒྱ་མཚོ།
དེ་རིང་ཕྱི་དྲོ་བལ་ཡུལ་གྱི་ཆུ་ཚོད་ལྔ་བའི་སྟེང་༸དཔལ་ས་སྐྱའི་༸སྐྱབས་མགོན་གོང་མ་ཁྲི་ཆེན་རིན་པོ་ཆེ་མཆོག་བལ་ཡུལ་རྒྱལ་སྤྱིའི་གནམ་ཐང་དུ་ཞབས་སོར་བདེ་བར་འཁོད་ཡོད་པ་དང་། གནམ་ཐང་དུ་༸འཁོན་གདུང་སྐུ་བགྲེས་རིན་པོ་ཆེ་མཆོག་དང་། སྐྱབས་རྗེ་དཀར་ཞབས་དྲུང་རིན་པོ་ཆེ། རྒྱལ་ཡོངས་གསུང་རབ་སློབ་གཉེར་ཁང་གི་ངེས་སྟོན་པ་མཁན་རིན་པོ་ཆེ་འབྱོར་ལྡན་གཙོ་བྱས་པའི་ཆོས་བརྒྱུད་རིས་མེད་ཀྱི་མཁན་སྤྲུལ་ལས་བྱེད་དང་། དད་ལྡན་སེར་སྐྱ་ཕོ་མོ་བརྒྱ་ཕྲག་མང་པོས་རྒྱལ་ཡོངས་གསུང་རབ་སློབ་གཉེར་ཁང་དུ་ཕེབས་བསུ་གཟབ་རྒྱས་ཞུས་ཡོད་པ་རེད།
ཐེངས་འདིར་མགོན་པོ་མཆོག་བལ་ཡུལ་དུ་གདན་འདྲེན་བྱེད་མཁན་གཙོ་བོ་དཔལ་ས་སྐྱའི་ལྷ་སྡེ་མི་སྡེ་ཡོངས་དང་། གློ་བོ། གཉེ་ཤངས། ཝ་ལུང་སྐྱིད་སྡུག་སོགས་ཡིན་འདུག
ད་ལམ་གྱི་མཛད་རིམ་གཙོ་བོ་ཁག་ནི། ཕྱི་ཚེས་༢༡། ཉིན་ཡང་ལེ་ཤོད་དུ་ཁྲ་རིགས་དགོན་པའི་སྒྲུབ་ཁང་གསར་བར་རབ་གནས་དང་། དེ་རྗེས་དཔལ་ཨ་འཛོམས་འོད་གསལ་མདོ་སྔགས་ཆོས་འཁོར་གླིང་དུ་ཆོས་འབྲེལ་བསྐྱངས་རྒྱུ།
ཕྱི་ཚེས་༢༣། ཉིན་གྱི་སྔ་དྲོ་ byoma kusuma ཆོས་ཚོགས་སུ་ཕེབས་ཆོས་འབྲེལ་དང་། ཕྱི་དྲོ་རྒྱལ་ཡོངས་གསུང་རབ་སློབ་གཉེར་ཁང་དུ་བསྐང་གསོའི་ཚོགས་མགོན་དུ་ཕེབས་རྒྱུ།
ཕྱི་ཚེས་༢༤། ཉིན་མཆོད་རྟེན་བྱ་རུང་ཁ་ཤོར་ཡར་རྒྱས་ཚོགས་པའི་ཉེ་ལམ་ཉམས་གསོ་ཟིན་པའི་མཆོད་རྟེན་རིན་པོ་ཆེར་རབ་གནས་དང་། མང་ཚོགས་ལ་ཚེ་དབང་བཀའ་དྲིན་བསྩལ་རྒྱུ་དང་།
ཕྱི་ཚེས་༢༥། ཉིན་མགོན་པོ་གང་ཉིད་སྐུའི་དགུང་གྲངས་བདུན་ཅུར་ཕེབས་པའི་འཁྲུངས་སྐར་གྱི་ཚོགས་མགོན་དུ་ཕེབས་རྒྱུ།
ཕྱི་ཚེས་༢༦། ཉིན་བལ་ཡུལ་དཔལ་ས་སྐྱའི་ལྷ་སྡེ་མི་སྡེ་ཡོངས་ནས་བརྟན་བཞུགས་གཟབ་རྒྱས་འབུལ་བཞེས་གནང་རྒྱུ།
ཕྱི་ཚེས་༢༧། ནས་སྤོག་ར་བརྒྱུད་གློ་བོ་འཛོམ་གསུམ་དུ་ཆིབས་བསྒྱུར་གནང་སྟེ་གློ་བོ་དགོན་ཁག་ཐུན་མོང་གི་གཙུག་ལག་ཁང་གསར་པའི་རྟེན་འབྲེལ་དབུ་དབྱེ་དང་ཆོས་འབྲེལ་སོགས་ཉིན་དྲུག་གི་མཛད་རིམ་བསྐྱངས་རྒྱུ། དེ་རྗེས་སླར་ཡང་བལ་ཡུལ་དུ་ཕེབས་ཏེ་རྒྱལ་ཡོངས་གསུང་རབ་སློབ་གཉེར་ཁང་དུ་མགོན་པོ་གང་ཉིད་ཀྱི་ཡོངས་འཛིན་༸སྐྱབས་རྗེ་བདེ་བར་གཤེགས་པ་མཁན་ཆེན་ཨ་པད་རིན་པོ་མཆོག་གི་སྐུ་གདུང་མཆོད་རྟེན་ལ་རབ་གནས་དང་། སློབ་གཉེར་ཁང་དེའི་དཔེ་མཛོད་གསར་བ་སྒོ་དབྱེ་གནང་རྒྱུ།
ཕྱི་ཚེས་༡༠། ༩། ཉིན་རྒྱ་གར་དུ་ཞབས་སོར་འཁོད་རྒྱུ་བཅས་མཛད་རིམ་མདོར་བསྡུས་སུ།
ཨ་འདུས་སྐལ་བཟང་རྒྱ་མཚོས་བལ་ཡུལ་ནས་སྤེལ་བའོ།།
བརྩེ་ཆེན་བསྟན་པའི་མངའ་བདག་ཀུན་དགའ་སྙིང༌།།
མཁྱེན་རབ་འགྲན་ཟླ་བྲལ་བ་ས་པཎ་རྗེ།།
མཐུ་སྟོབས་དབང་སྒྱུར་ངོར་ཆེན་རྡོ་རྗེ་འཆང༌།།
རིཊ་གསུམ་གཅིག་བསྡུས་འཁོན་གདུང་གོང་མར་འདུད།།