འོས་སྦྱོར་བ། རེ་མདོ་སེངྒེ།
ཕྱི་ལོ་ ༢༠༢༠ ལོའི་ཟླ་ ༩ ཚེས་ ༦ ཉིན།
༄༅།། རང་གཞུང་སྐུ་ཚབ་དོན་གཅོད་སྐུ་ངོ་མཆོག་དང། དེ་རིང་འདིར་ཕེབས་པའི་སྐུ་མགྲོན་རྣམ་པ། ཐེ་ཝན་བོད་མིའི་ཕན་བདེ་མཐུན་ཚོགས་ཀྱི་ཚོགས་མི་དང་འབྲེལ་ཡོད་ལས་བྱེད་རྣམ་པ། སེར་སྐྱ་མི་མང་དང་བཅས་པར་ཐོག་དང་པོར་བཀྲ་ཤིས་བདེ་ལེགས་ཞུ་རྒྱུ་ཡིན།
དེ་རིང་འདིར་ཕེབས་པའི་སྐུ་མགྲོན་རྣམ་པ་འགའ་ཤས་མ་གཏོགས་བོད་རིགས་ཤ་སྟག་ཡིན་དུས། སྐབས་སུ་བབ་པའི་ཚོགས་འདུའི་བརྗོད་གཞི་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་དང། བོད་ཀྱི་མང་གཙོའི་དུས་དྲན་དང་འབྲེལ་བའི་སྐོར་ཚིག་འགའ་ཤས་ཤིག་ཞུ་རྒྱུ་ཡིན། ང་བོད་གཞུང་གི་ལས་བྱེེད་ཟུར་པ་མི་རྒན་ཞིག་ཡིན་པའི་ཆ་ནས་སེམས་ནང་ལ་རྒྱུན་དུ་ན་བཞིན་ཡོད་པའི་གནད་དོན་འགའ་ཤས་ཤིག་དེ་རིང་འདིར་ཞུ་འདོད་བྱུང།
ད་ལོའི་ལོ་འདི་བོད་གཞུང་མང་གཉིས་ཀའི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོ་ལ་སྲུང་བརྩི་གནང་གི་ཡོད་པ་བཞིན་དུ། ཐེ་ཝན་དུ་ཡོད་པའི་བོད་མི་རྣམས་ཀྱིས་ཀྱང་ད་ལོ་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་གནང་བཞིན་པ་རེད།
༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་ཞུ་སྟངས་ནི། ལག་ལེན་ངོ་མའི་ཐོག་ནས་༸རྒྱལ་བའི་དགོངས་པ་བསྒྲུབ་དགོས་པ་འདི་ཤིན་ཏུ་ནས་གལ་ཆེན་པོ་རེད། ད་ལོའི་ལོ་འདི་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་མང་ལ་མང་གཙོ་ཆ་ཚང་བ་གསོལ་བསྩལ་གནང་བའི་རྗེས་ཀྱི་བཀའ་སྤྱི་གཉིས་ཀའི་འོས་བསྡུ་ཆེན་མོ་ཐེངས་གསུམ་པ་དེ་རེད། བཀའ་སྤྱི་གཉིས་ཀྱི་འོས་བསྡུ་ཆེན་མོ་ཐེངས་གཉིས་པའི་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་ཕམ་གནང་དགོས་པ་དང། བོད་གཞུང་མང་གཉིས་ལ་མཚན་ཤས་ངན་པ་བཟོས་པ་སོགས་དགྲ་དགའ་གཉེན་སྡུག་གི་གནས་ཚུལ་ངན་པ་མང་པོ་ཞིག་བྱུང་བ་རེད།
འདས་པའི་ལོ་རྒྱུས་ཀྱི་ཉམས་མྱོང་འདི་ནས་བསླབ་བྱ་བླངས་ཏེ་བཀའ་སྤྱི་གཉིས་ཀྱི་ཐེངས་གསུམ་པའི་འོས་བསྡུ་ཆེན་མོ་འདིའི་སྐབས་བོད་མི་མང་གིས་འགན་བླངས་ནས་མང་གཙོ་ལག་བསྟར་ཡང་དག་པ་ཞིག་ཡོང་ཐུབ་ཐབས་ལ་འབད་བརྩོན་གནང་དགོས་པ་འདི་ཤིན་ཏུ་ནས་གལ་ཆེན་པོ་དང་སྐབས་སུ་བབས་པའི་ལས་འགན་གཙོ་བོ་ཞིག་རེད། ༸རྒྱལ་བ་རིན་པོ་ཆེས་ཆབ་སྲིད་ཀྱི་སྐུ་དབང་ཡོངས་སུ་རྫོགས་པ་བོད་མི་མང་གིས་བདམས་པའི་ཆབ་སྲིད་ཀྱི་དབུ་ཁྲིད་ལ་རྩིས་སྤྲོད་གནང་བ་རེད། ༸རྒྱལ་བ་རིན་པོ་ཆེས་ཐུགས་རེ་ཆེན་པོའི་ཐོག་ནས་བོད་མི་མང་ལ་ཆབ་སྲིད་ཀྱི་སྐུ་དབང་ཡོངས་རྫོགས་རྩིས་སྤྲོད་གནང་བ་དེ་བདག་པོ་ཡག་པོ་ཞིག་བརྒྱབ་ཤེས་དགོས་པ་འདི་བོད་མི་ཡོངས་རྫོགས་ལ་འགན་དུ་འཁྲི་བའི་ལས་འགན་གལ་ཆེ་ཤོས་དེ་རེད།
བོད་པའི་སྤྱི་ཚོགས་ནང་དུ་ད་དུང་ཡང་མང་གཙོ་དང་རང་དབང་ལ་ཁ་གཡར་ནས་སྐད་ཆ་འདྲ་མིན་ཤོད་མཁན་དང། ༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུ་མཁན། ཆོལ་ཁ་དང་ཆོས་བརྒྱུད་ཀྱི་བར་ལ་འཐེན་འཁྱེར་བྱེད་མཁན་གྱི་མི་རེ་ཟུང་ཡོང་གི་འདུག་པས། འདིའི་གྲས་ཀྱིས་༸རྒྱལ་བ་རིན་པོ་ཆེ་ལ་བཀའ་དྲིན་རྗེས་དྲན་ཞུ་རྒྱུའི་ཚབ་ཏུ་བཀའ་དྲིན་ལོག་མཇལ་ཞུ་གི་ཡོད་པ་ཞིག་ཏུ་ངས་མཐོང་གི་འདུག དེ་འདྲ་ཡིན་དུས་རྣམ་པ་ཚོས་འདི་ཚོའི་གྲས་ལ་གཟབ་གཟབ་གནང་དགོས་པ་འདི་ཤིན་ཏུ་ནས་གལ་ཆེན་པོ་རེད་ཅེས་ཞུ་འདོད་བྱུང།
ད་ལྟའི་དུས་ཚོད་འདི་ལ་མི་རབས་རྒན་པ་རྣམས་རིམ་གྱིས་རྫོགས་འགྲོ་གི་ཡོད་དུས། ན་གཞོན་ཚོ་ལ་བོད་སྤྱི་པའི་ལས་ཀའི་འགན་བཀལ་ནས་གོ་སྐབས་སྤྲོད་དགོས་པ་འདི་ཤིན་ཏུ་ནས་གལ་ཆེན་པོ་རེད་བསམས། བོད་རིགས་ན་གཞོན་མི་རབས་ཕྱི་མ་རྣམས་ང་ཚོས་སྐྱེད་སྲིང་ཡག་པོ་བྱས་ཏེ་ལམ་ཁའི་ཐོག་ལ་ཁྲིད་ཐུབ་ཐབས་བྱ་དགོས་པ་ནི་བོད་པ་མི་རབས་རྒན་པ་རྣམས་ཀྱི་འགན་དུ་འཁྲི་བའི་ལས་དོན་གཙོ་བོ་ཞིག་ཏུ་གྱུར་ཡོད། སྲིད་སྐྱོང་དང་སྤྱི་འཐུས་སུ་ཡིན་ཡང་རུང་ཤེས་འཇོན་གཉིས་ལྡན་ཞིག་ཡིན་པའི་ཐོག།ལྷག་བསམ་ཡོད་པ། བོད་མི་རིགས་ཀྱི་ལས་དོན་སྒྲུབ་ཐུབ་མཁན་དང་འཇོན་ཐང་ཡོད་མཁན། བོད་མི་མང་ལ་ཤ་ཚ་རྣམ་དག་བྱེད་མཁན་གྱི་མི་ཞིག་བདམ་དགོས་པ་འདི་ཤིན་ཏུ་ནས་གལ་ཆེན་པོ་རེད།
འདས་པའི་ཉམས་མྱོང་གི་ཐོག་ནས་འོས་བསྡུའི་སྒྲིག་གཞི་ལ་བསྐྱར་བཅོས་མང་པོ་གནང་ཡོད་ནའང། ད་དུང་ཡང་མངོན་གསལ་དོད་པོ་མེད་པའི་ཐོག་ནས་ལས་ཀ་བྱེད་སྟངས་སྔོན་མའི་ནོར་འཁྲུལ་ཅན་གྱི་སྲིད་བྱུས་ལོག་པ་དེའི་ནང་ལ་འགྲོ་མཁན་འགའ་ཤས་ཤིག་ཡོང་གི་མེད་དམ་སྙམ་པའི་ཞེད་སྣང་ཞིག་སྐྱེས་ཡོང་གི་འདུག འདིའི་ཐད་ལ་བོད་རྒྱ་ཆེ་མི་མང་གིས་དོ་སྣང་མཛད་ནས་གཟབ་གཟབ་གནང་དགོས་ཀྱི་འདུག
༸རྒྱལ་བ་རིན་པོ་ཆེས་ཐུགས་རེ་གནང་ས་དང། བོད་ནང་གི་བོད་རྒྱ་ཆེ་མི་མང་གིས་རེ་བ་བརྒྱག་སའི་བོད་གཞུང་འདི་མུ་མཐུད་ནས་བརྟན་པོར་གནས་ཐུབ་པར་བྱ་བ་ལ། བོད་མི་ཡོངས་རྫོགས་ཀྱིས་འགན་བླངས་ཏེ་གཟབ་གཟབ་གནང་དགོས་པ་འདི་ཤིན་ཏུ་ནས་གལ་ཆེན་པོ་རེད། ཅེས་ངས་ཡང་བསྐྱར་ཞུ་འདོད་བྱུང།
མི་རེ་རེ་ལ་འོས་ཤོག་རེ་རེའི་ཐོབ་ཐང་ཡོད་པ་བཞིན་ང་རང་ལ་ཡང་འོས་ཤོག་གཅིག་གི་ཐོབ་ཐང་ཡོད། ང་ཚོ་ཡོངས་རྫོགས་ཀྱིས་སོ་སོ་ལ་ཡོད་པའི་འོས་ཤོག་གཅིག་བུ་འདི། མི་མ་ནོར་བ་འཇོན་ཐང་ཡོད་མཁན་ཞིག་ལ་འཕེན་ཐུབ་དགོས་པ་འདི་ཤིན་ཏུ་ནས་གལ་ཆེན་པོ་རེད། བོད་རྒྱ་ཆེ་མི་མང་གིས་ཆབ་སྲིད་ཀྱི་དབུ་ཁྲིད་སུ་ཞིག་བདམས་པ་ཡིན་ན་དེའི་གཞུང་ལ་བོད་མི་ཡོངས་རྫོགས་ཀྱིས་བརྩི་བཀུར་དང་རྒྱབ་སྐྱོར་ཞུ་དགོས་པ་རེད། ང་ལྟ་བུ་ཡིན་ནའང་བོད་མི་མང་གིས་བདམས་པའི་ཆབ་སྲིད་ཀྱི་དབུ་ཁྲིད་དེས་བཙུགས་པའི་གཞུང་དེ་ལ་ད་ལྟའི་བར་དུ་རྒྱབ་སྐྱོར་དང་བརྩི་བཀུར་ཞུས་པ་ཡིན།
བོད་ནང་གི་བོད་རྒྱ་ཆེ་མི་མང་གིས་ད་ལྟའི་བར་དུ་སེམས་ཤུགས་དང་ལངས་ཕྱོགས་ནི་བྲག་རི་ལྟ་བུའི་བརྟན་པོར་གནས་ནས་བཞུགས་ཡོད། བཙན་བྱོལ་ནང་དུ་ཡོད་པའི་བོད་རྒྱ་ཆེ་མང་ཚོགས་སྤྱི་ཡོངས་ཀྱི་ཆ་ནས་ལངས་ཕྱོགས་བརྟན་པོ་དང་གཟབ་གཟབ་གནང་གི་འདུག་ལ། གནང་དགོས་པ་ཞིག་ཀྱང་རེད། ཡིན་ནའང་བོད་མི་རེ་ཟུང་ཞིག་གིས་ད་དུང་ཡང་བོད་སྤྱི་པའི་ཆིག་སྒྲིལ་ལ་གནོད་པའི་སྐད་ཆ་འདྲ་མི་འདྲ་ཤོད་པ་དང། ལས་ཀ་འདྲ་མིན་བྱེད་མཁན་རེ་ཟུང་ཡོང་གི་འདུག་པས། འདིའི་ཐོག་བོད་མི་མང་ཡོངས་རྫོགས་ཀྱིས་རྒྱུན་དུ་དོ་སྣང་ཆེན་པོ་མཛད་ནས་གཟིགས་དགོས་པ་དང། གཟབ་གཟབ་གནང་དགོས་པ་འདི་ཤིན་ཏུ་ནས་གལ་ཆེན་པོ་རེད། ཅེས་ཞུ་འདོད་བྱུང།
ཐེ་ཝན་ལ་གནས་སྡོད་བྱེད་མཁན་གྱི་བོད་མི་རྣམས་ཀྱིས་བོད་རིགས་ཚོགས་པ་བཙུགས་ཏེ་བོད་མི་ཡོངས་རྫོགས་ཆིག་སྒྲིལ་ཡོང་ཐབས་གནང་བཞིན་འདུག་པ་འདི་ཤིན་ཏུ་ཡག་པོ་བྱུང་འདུག།མ་འོངས་པར་ཡང་ཐེ་ཝན་ལ་བཞུགས་མཁན་གྱི་བོད་མི་ཡོངས་རྫོགས་རྡོག་རྩ་ཆིག་སྒྲིལ་གྱི་ཐོག་ནས་བོད་གཞུང་གི་ལམ་སྟོན་འོག་ལ་འགྲོ་ཐུབ་པར་བྱ་དགོས་པ་དེ་གལ་ཆེན་པོ་རེད། ཐེ་ཝན་གྱི་བོད་རིགས་ཚོགས་པའི་རྒྱུན་ལས་རྣམ་པ་ཁ་སྔོན་ངའི་སར་ཕེབས་བྱུང། ཁོང་ཚོས་ཆོལ་ཁ་དང་ཆོས་བརྒྱུད་ཀྱི་དབྱེ་བ་མེད་པར་ཡག་པོ་གནང་གི་ཡོད་ཅེས་བཀའ་གནང་གི་འདུག་པས་ཤིན་ཏུ་ཡག་པོ་རེད། མ་འོངས་པར་ཡང་དེ་ལྟར་ཧུར་ཐག་བར་ཐག་གནང་རོགས་གནང་ཞེས་རེ་བ་ཞུ་རྒྱུ་ཡིན།
ང་རྒན་འཁོགས་ཡིན་པས་ཨ་མཆོག་གིས་མི་གོ་བ་དང། རྒྱ་སྐད་ཀྱང་མི་ཤེས་པས་དེ་རིང་འདིར་ཕེབས་པའི་བོད་དོན་ཐོག་དམིགས་བསལ་རྒྱབ་སྐྱོར་གནང་མཁན་གྱི་གྲོགས་པོ་རྣམ་པ་ལ་ངས་འབྲེལ་བ་ཡག་པོ་ཞིག་ཞུ་ཐུབ་མ་སོང་བར་དགོངས་དག་ཞུ་གི་ཡིན། ཐུགས་རྗེ་ཆེ།
་་་་་་་་་་་་་ ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་ཞུ་སྟངས་ནི། ལག་ལེན་ངོ་མའི་ཐོག་ནས་༸རྒྱལ་བའི་དགོངས་པ་བསྒྲུབ་དགོས་པ་འདི་ཤིན་ཏུ་ནས་གལ་ཆེན་པོ་རེད། ་་་་་་་་་་་་་