ཨེ་མ་ཧོ།
རྒྱལ་བ་རྫོགས་པའི་སངས་རྒྱས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། དེ་ལ་འདིར་ངོས་ལ་མཚོན་ན་ནམ་རྒྱུན་མཐོན་པོ་དང་ཆོས་བརྒྱད་ལ་ཞེན་ཅིང་སྲིད་དོན་ཁོ་ན་ལ་ཕྱོགས་པ་སོགས་ཀྱི་བླ་མ་གཞན་དག་ལ་བསྟེན་འདོད་དང་འགྲོགས་འདོད་མེད། དེ་བཞིན་གཡོ་འཕྲུལ་མཁན་གྱིས་སློབ་མ་གསར་བ་ཡང་བསྡུ་འདོད་ནི་མེད་པ་ཞིག་ཡིན། ད་ལྟ་ནི་དེ་བས་ཀྱང་མེད་དོ།
ངོས་ནི་ཆུང་ནས་སྐལ་བ་བཟང་པོའི་ལས་སྨོན་རྟེན་འབྲེལ་ཤིན་ཏུ་ལེགས་པས་རྒྱལ་བ་རྫོགས་པའི་སངས་རྒྱས་དངོས་ཀྱི་བླ་མ་དམ་པ་དུ་མ་མཇལ། བཅུ་ཕྲག་རིག་གཞུང་སོགས་ལ་ཐོས་བརྩོན་མི་དམན་པ་བྱས། ཁྱད་པར་རང་ལུགས་སྔ་འགྱུར་ཀུན་མཁྱེན་ཡབ་སྲས་དང་། སྨིན་གླིང་གཏེར་ཆེན་ཡབ་སྲས་ཀྱི་སྙིང་ཐིག་བརྒྱུད་པ་ཡོངས་དང་། ཁྱད་པར་དམིགས་བསལ་བ་རིག་འཛིན་པདྨ་དྲག་སྔགས་གླིང་པ་འམ་ཁམས་པདྨ་གླིང་གི་གཏེར་གསར་ལ་བཤད་སྒྲུབ་ཕྲིན་ལས་ལ་འབད་འབུས་སུ་མཆིས་སོ། ད་སྐབས་དམིགས་བསལ་གྱིས་སྒོ་ཆེན་སྤྲུལ་སྐུ་གསང་སྔགས་བསྟན་འཛིན་ལས་སྙིང་ཐིག་སྐོར་དང་གནམ་ལྕགས་སྙན་རྒྱུད་སྐོར་ཞུ་རུ་དབྱིན་ཡུལ་ནས་ལེ་བར་ཁྲི་ཕྲག་ནས་ཁྲི་ཕྲག་བརྒལ་སྟེ་ཨ་རི་ལ་ཕྱིན་པ་ཡིན། ཨ་མི་རི་ཀའི་ཨེ་ཝཾ་པདྨ་མཁའ་འགྲོའི་ཆོས་ཚོགས་སུ་རིགས་ཀུན་ཁྱབ་བདག་༸སྐྱབས་རྗེ་དམ་པ་སྒོ་ཆེན་སྤྲུལ་སྐུ་གསང་སྔགས་བསྟན་འཛིན་རིན་པོ་ཆེ་མཇལ་དུ་སོང་། ལམ་བར་ནས་འཇའ་འོད་སྤྲིན་དཀར་ཀྱི་དར་མཆོད་དང་ཉི་ཟླ་རྒྱུ་སྐར་ཕྲེང་བས་སྣ་འདྲེན་དང་། རི་ཐང་དང་ཆུ་ཀླུང་གི་བཀོད་བཤམས་སོགས་ཀུན་བཟང་མཆོད་སྤྲིན་སཉན་ཚོགས་ལ་རོལ་ཅིང་མཁའ་བགྲོད་རྒྱུ་ལམ་དགེ་བས་བདེ་བར་འབྲས་བཟང་དགའ་ཚལ་གླིང་དུ་འབྱོར། དབང་མོས་ཡུན་རིང་གནམ་ཐང་དུ་སྒུག་པ་མཇལ། གསེར་མདོག་གི་མེ་ཏོག་དང་དར་དཀར་བཟང་པོས་སྣ་འདྲེན་བཅས་དབང་མདོག་རླངས་འཁོར་ལ་ཞུགས་ནས་ཨེ་ཝཾ་པདྨ་མཁའ་འགྲོའི་གླིང་དུ་ཆས། སྣུམ་གསོས་རྟེན་འབྲེལ་བཟང་པོས་དག་སྣང་དང་ལོ་རྒྱུས་བགྲོ་གླེང་ངང་དཀའ་ཚེགས་དབེན་པར་ཆོས་ཚོགས་ཀྱི་རི་དྭགས་ཆོས་ཉན་ཆོས་འཁོར་དང་ཇོ་དར་མཇལ། ཁ་བ་སིལ་སིལ་དུ་འབབ་བཞིན་པའི་སྐབས་སུ་ཆོས་ཚོགས་སུ་ཕྱིན། མཁན་པོ་གནམ་ལྕགས་རྡོ་རྗེས་དངུལ་དཀར་ཟླ་བའི་མདངས་འཛིན་གྱིས་མགྲོན་བསུས་བཅས་༸སྐྱབས་རྗེ་དམ་པའི་བཞུགས་གནས་བཅར། ༸སྐྱབས་རྗེ་བླ་མ་རིན་པོ་ཆེ་ཁོང་ནི་མདོ་སྔགས་ལས་བཤད་པའི་བླ་མའི་མཚན་ཉིན་ཀུན་ལྡན་པའི་ཆོས་པ་རྣམ་དག་གཅིག་ཡིན་པ་དང་། རང་ངོས་ནས་ཉིན་མཚན་གྱི་ལོ་ཟླ་ཞག་གི་རྟེན་འབྲེལ་མ་བསྒྲིག་རང་འགྲིགས་སུ་གྱུར་ནས་༸སྐྱབས་རྗེ་དམ་པ་ཉིད་བླ་མ་རུ་བསྟེན་དུ་ཆས། དམ་པ་ཉིད་ནི་རྒྱང་རིང་ནས་དྲན་པ་དང་། ཞལ་སྤར་ལས་ཐོས་པའི་གསུང་དང། རྨི་ལམ་ལས་གསལ་བ་ནང་བཞིན་མཆོག་ཏུ་དགའ་དད་སྤྲོ་བ་ཆེན་པོས་གསེར་ཞལ་མཇལ། རིགས་ཀུན་ཁྱབ་བདག་སྒོ་ཆེན་སྤྲུལ་སྐུ་ཞེས་གྲགས་པའི་མཚན་སྙན་ཕྱོགས་ཀུན་ཏུ་ཁྱབ་པ་དང་རྣམ་ཐར་ལས་གསུངས་པ་ལྷག་གིས་བདག་ལ་ཐུགས་རྗེ་ཆེན་པོ་བྱམས་བརྩེ་དད་གུས་དག་སྣང་རབ་འབྱམས་སུ་ཤར་བ་མགོན་པོ་རྡོ་རྗེ་འཆང་ཀུན་ཏུ་བཟང་དང་དབྱེར་མེད་པ་ཉིད་དུ་མཇལ། སྔོན་བྱོན་གྱི་བདག་གི་དྲིན་ཆེན་བླ་མ་དམ་པ་རྣམས་དྲན་པ་དང་ད་ལྟའི་སྐབས་སུ་༸སྐྱབས་རྗེ་དམ་པ་གསང་སྔགས་བསྟན་འཛིན་བཞུགས་པ་མཇལ་བས་བསམ་ཡུལ་ལས་འདས་པའི་དགའ་ཚོར་བརྟས། བླ་མ་སངས་རྒྱས་སུ་མཇལ་བ་དང་གདམས་ངག་གནད་དུ་སོན་པ་ནི་བསྐལ་མང་བསགས་པའི་བསོད་ནམས་ལས་གཏམས་པ་ཡིན་པ་སྨོས་ཅི་འཚལ། ༸སྐྱབས་རྗེ་ཉིད་ནས་རྫོགས་ཆེན་རྒྱུད་སྡེའི་གླེགས་བམ་དང་རང་བྱུང་ཤེལ་རྡོ་ཟུར་བརྒྱད་པའི་རྟེན་འབྲེལ་གསེར་བཟང་གི་ཁ་དར་བཅས་གནང་། བདག་གིས་དམ་ཚིིག་དུང་དཀར་གྱི་ཁ་དར་བཅས་རྫོགས་ཆེན་དུས་འཁོར་མཚོན་པའི་རིན་ཆེན་དང་པོའི་གའུ་དང་འཇམ་དབྱངས་ཤེས་རབ་རིལ་བུ། སྐུ་གསུམ་བརྡ་རྟགས་ཕྱག་རྒྱས་དབང་གཟི་དང་།
༄༅།།རིགས་ཀུན་ཁྱབ་བདག་སྒོ་ཆེན་སྤྲུལ་སྐུ་དམ་པ་
༸སྐྱབས་རྗེ་གསང་སྔགས་བསྟན་འཛིན་རིན་པོ་ཆེའི་
ཞབས་བརྟན་ཨེ་ཝཾ་ཡིད་བཞིན་ནོར་བུ།
ན་མོ་མ་ཧཱ་གུ་རུ་བུདྡྷ་ཛྙཱ་ན་ཡེ།།
ཀ་དག་ལྟ་བ་ཀློང་ཆེན་རབ་འབྱམས་དཔལ།།
ལྷུན་གྲུབ་སྒོམ་པ་མཁྱེན་བརྩེ་འོད་གསལ་གར།།
ཟུང་འཇུག་སྤྱོད་པ་འཇིགས་མེད་རྒྱལ་བུའི་དབང་།།
རིགས་ཀུན་ཁྱབ་བདག་བླ་མས་དགེ་ལེགས་སྩོལ།།
ཨེ་ཝཾ་ཀུན་བཟང་རྒྱལ་བའི་དགོངས་པའི་དོན།།
ཇི་བཞིན་གཟིགས་ནས་འགྲོ་ལ་དམ་ཆོས་སྟོན།།
མཁས་གྲུབ་རྒྱལ་པོ་གསང་སྔགས་བསྟན་པ་འཛིན།།
སྒོ་ཆེན་སྤྲུལ་བའི་སྐུ་མཆོག་ཞབས་བརྟན་ཤོག།
དཀོན་མཆོག་རྩ་གསུམ་རྒྱ་མཚོའི་ཐུགས་རྗེ་དང་།།
བདག་གིས་ལྷག་བསམ་དག་པས་སྨོན་ལམ་དང་།།
རྟེན་འབྲེལ་བསླུ་བ་མེད་པའི་བདེན་སྟོབས་ཀྱིས།།
རིགས་ཀུན་ཁྱབ་གསང་གསུམ་རྟག་བརྟན་ཤོག།
ཅེས་པ་འདི་ཡང་རབ་གནས་ས་ཁྱིའི་ལྷ་བབས་དུས་ཆེན་ལ་རིགས་ཀུན་ཁྱབ་བདག་དཔལ་ལྡན་བླ་མ་ཉིད་མཇལ་བའི་མོད་ལ་གང་ཤར་དུ་ཨ་རིའི་ཨེ་ཝཾ་པདྨ་མཁའ་འགྲོའི་ཆོས་གླིང་དུ་མིང་ཡོངས་སུ་གྲགས་པ་མཁན་ཆེན་བླ་མ་རིན་པོ་ཆེའམ་ཤྲཱིཿསྨྱོན་ཨེ་མ་ཧོས་གང་ཤར་དག་སྣང་རྒྱ་མཚོའི་ཀློང་ནས་ཞབས་བརྟན་སྨོན་གསོལ་དུ་བགྱིས་པར་དགེའོ།། །། ཤྲཱིཿསརྦ་ལོ་ཀ་བི་ཛ་ཡ་མངྒ་ལཾ།། ཞེས་སོགས་ཐོལ་སྨོན་ཞབས་བརྟན་གསོལ་འདེབས་ཀྱང་རྟོགས་འབུལ་ཡང་དག་ཏུ་ཕུལ། མགོན་པོ་གང་ཉིད་ཀྱིས་ཐུགས་བརྩེ་ཆེན་པོས་དགུང་གསོལ་མཉམ་དུ་མཛད་ནས་མཁན་པོ་གནམ་ལྕགས་རྡོ་རྗེ་དང་བདེ་ཆེན་སྒྲོལ་མ་དང་ཆོས་དབྱིངས་བཟང་མོ་དང་བླ་་མ་དབང་མོས་བཀོད་བསྒྲིག་བཞིན་ཨེ་ཝཾ་པདྨ་མཁའ་འགྲོའི་གླིང་གི་གཟིམས་ཤག་གི་ནང་དུ་ངལ་གསོ་དང་མཉམ་བཞགས་བདེ་བའི་མལ་དུ་ཉིན་ཐོ་བྲིས། ངོས་ནས་མུ་འཐུད་ནས་བླ་མའི་བཀའ་དབང་ཁྲིད་ལུང་གི་ཁྲིད་རྒྱུན་རྣམས་ཞུ་འདོད་ནི་སྦྲང་མ་ལ་སྦྲང་རྩི་དང་། ལྷ་ཡིས་བདུད་རྩི་ལ་ལོངས་སུ་སྤྱོད་པ་ལྟ་བུས་ཚོར་སྣང་ཟབ་མོ་དང་གཟུར་གནས་བློ་ལྡན་དོན་གཉེར་བླ་ལྷག་ཏུ་སྐྱེས་སོ།།
རབ་གནས་ས་ཁྱིིའི་ལྷ་བབས་ཟླ་བའི་དུས་ཆེན་སྐབས་སུ་བྱང་ཨ་མི་རི་ཀའི་ས་དྷཱ་ཧྥེ་ནས་ཤྲཱིཿཨེ་མ་ཧོས་དད་གུས་བཅས་བྲིས་པར་དགེའོ།
་་་་་་་་་་་་ དེ་ལ་འདིར་ངོས་ལ་མཚོན་ན་ནམ་རྒྱུན་མཐོན་པོ་དང་ཆོས་བརྒྱད་ལ་ཞེན་ཅིང་སྲིད་དོན་ཁོ་ན་ལ་ཕྱོགས་པ་སོགས་ཀྱི་བླ་མ་གཞན་དག་ལ་བསྟེན་འདོད་དང་འགྲོགས་འདོད་མེད། ་་་་་་་་་་
་
དང་
་
་་་་་་་་་་་་་་ བླ་མ་སངས་རྒྱས་སུ་མཇལ་བ་དང་གདམས་ངག་གནད་དུ་སོན་པ་ནི་བསྐལ་མང་བསགས་པའི་བསོད་ནམས་ལས་གཏམས་པ་ཡིན་པ་སྨོས་ཅི་འཚལ། ་་་་་་་་་་་ ཟེར།