༼ཁྱོད་ཉིད།༽

གནས་མེད།

 
དེ་རིང་གི་ནམ་མཁའ་ནི་ཇི་འདྲའི་སྔོ་ཞིང་དྭངས་ལ།
ཉི་འོད་ལ་ཡང་དེ་ཚོད་ཀྱིས་དྲོད་འཇམ་ལྡན།
ཚོར་ཤེས་དང་ཁད་ཀྱིས་འདྲེས་པའི་ཡིག་ཕྲེང་དག
དེ་རིང་དང་སང་ཉིན།
ཁྱོད་ཉིད་གཅིག་བུའི་སྐྱོ་གདུང་སེལ་བྱེད་ཅིག་ཡིན་ནམ།
ཡང་ན། འདས་དོན་འཆར་བྱེད་ཀྱི་དྲན་ཤིང་ཞིག་ཡིན།

བརྩེ་དུངས་ཀྱི་རྒྱབ་ཕྱོགས་ན་འགྲེང་ཡོད་པའི་ཁྱོད་ཉིད།
བརྗེད་དཀའ་བའི་གཏམ་རྒྱུད་ཅིག་གི་སྣེ་མོར་འཐམས་ཏེ།
གང་ཞིག་ཏུ་བོར་བརླགས་བྱུང་སོང་ངམ།

འགྲེལ་མི་ཤེས་པའི་བརྩེ་དུངས་ནི་ཡོད་ཀྱང་ཆོག་ལ།
ནན་ནན་ཨུ་ཚུགས་ཀྱིས་མེད་ཀྱང་རུང་།

མཚམས་མཚམས་སུ་ཁྱོད་ཉིད་ཆང་རག་གི་བཟི་ཁ་ན་ཨེ་ཡོད།
སྐབས་སྐབས་སུ་ཁྱོད་ཀྱིས་སྙན་ངག་འདྲ་བའི་བུད་མེད་དང་།
བུད་མེད་འདྲ་བའི་སྙན་ངག་ལ་རོལ་གྱིན་ཨེ་ཡོད།

ཆེས་ལྕི་བའི་ཚོར་བ་ཡི་སྣེ་མོར་དྲིལ་བའི་ཁྱོད་ཉིད་ལ།
སྐབས་ལན་རེར་ཞེ་གཏིང་ནས་འཁོན་ན་བསམ།
དུས་རེ་འགར་གཏན་དུ་བརྗེད་ན་སྙམ།
བསམ་ཞིང་བསམ་ན་ཡོད་ཚད་ནི་སྐྱོ་བའི་མིག་ཆུ་རེད།