༼རྒད་པོ་དང་རྒྱ་མཚོ་༽ཞེས་པའི་སྒྲུང་རྩོམ་བོད་བསྒྱུར་དང་འགྲེམས་སྤེལ།

(བོད་ཀྱི་དུས་བབ་ནས་བླངས།)

དུས་བབ་རྩོམ་སྒྲིག་པ་ཟུར་པ་དགེ་འདུན་རབ་གསལ་ལགས་ཀྱིས་བོད་བསྒྱུར་བྱས་པའི་༼རྒད་པོ་དང་རྒྱ་མཚོ་༽(The old man and the Sea) ཞེས་པའི་དུས་རབས་ཉི་ཤུའི་ནང་གི་སྒྲུང་རྩོམ་གྲགས་ཅན་འདི། ཉེ་ལམ་བོད་ཀྱི་དུས་བབ་གསར་ཁང་གིས་པར་སྐྲུན་ལེགས་གྲུབ་བྱས་ཏེ། ཕྱི་ཟླ་ ༥ ཚེས་ ༡ ཉིན་ནས་བཟུང་འགྲེམས་སྤེལ་ཞུ་རྒྱུ་རེད།

སྤྱིར་སྒྱུར་རྩོམ་ནི་མིའི་རིགས་ཀྱི་རྩོམ་རིག་བྱ་བཞག་ཁྲོད་ཆེས་གལ་གནད་ཆེ་བའི་སྒྱུ་རྩལ་བརྩམས་ཆོས་ཤིག་ཆགས་ཡོད་པ་ལྟར། མདོ་དབུས་མཐོ་སྒང་དུ་གནས་སྡོད་བྱེད་པའི་གདོང་དམར་བོད་པ་འདིས་གནའ་བོའི་དུས་ནས། རྒྱ་དཀར་ནག་གཙོས་འདབས་འབྲེལ་རྒྱལ་ཁབ་ཁག་ལ་འབྲེལ་འདྲིས་ཡུན་རིང་གནང་སྟེ། ཕྱིའི་རིག་གནས་དང་ལག་རྩལ་སོགས་ཕྱོགས་གང་ཐད་ནས་ནང་འདྲེན་བྱེད་ཐུབ་བྱུང་ཡོད་ཀྱང་། ང་དགུ་ལོར་དུས་འགྱུར་བྱུང་སྐབས་བོད་ཀྱི་རིག་གནས་ལ་ལོ་རྒྱུས་ཐོག་སྔར་བྱུང་མ་མྱོང་བའི་གྱོང་གུད་ཚབས་ཆེན་ཞིག་བྱུང་ཡོད། ལོ་རབས་བརྒྱད་ཅུ་ནས་བོད་ནང་ལོགས་སུ་རིག་གཞུང་སླར་གསོ་དང་རིག་གསར་ནང་འདྲེན་གྱི་སྨྱུ་གུ་འབུས་མགོ་བཙུགས་ཡོད་ལ། བཙན་བྱོལ་དུའང་རིག་གཞུང་ཉམས་གསོ་དང་། མི་རིགས་གཞན་གྱི་སྒྱུ་རྩལ་རྩོམ་རིག་ནང་འདྲེན་ཐད་དོ་སྣང་ཆེན་པོ་བྱེད་བཞིན་པའི་སྐབས་འདིར། དུས་བབ་རྩོམ་སྒྲིག་པ་ཟུར་པ་སྐུ་ཞབས་དགེ་འདུན་རབ་གསལ་ལགས་ཀྱིས། རང་གི་དཀའ་སྤྱད་འབད་བརྩོན་ལ་བརྟེན་ནས་དུས་རབས་ཉི་ཤུའི་ནང་སྐད་གྲགས་ཆེ་བའི་༼རྒད་པོ་དང་རྒྱ་མཚོ་༽ཞེས་པའི་སྒྲུང་རྩོམ་དེ་བོད་བསྒྱུར་གནང་སྟེ། བོད་ཀྱི་རྩོམ་རིག་ཀྱང་འཛམ་གླིང་ལ་ཁ་ཕྱོགས་རྒྱུར་སྐུལ་འདེད་དང་ཞབས་འདེགས་བསྒྲུབས་ཡོད།

རབ་གསལ་ལགས་ཀྱིས་བོད་བསྒྱུར་ཞུས་པའི་༼རྒད་པོ་དང་རྒྱ་མཚོ་༽ཞེས་པའི་གྲགས་ཅན་སྒྲུང་རྩོམ་འདི་ནི། ༢༠༠༥ ལོར་གསར་དུ་བོད་བསྒྱུར་གནང་གྲུབ་པ་དང་། ཉེ་ཆར་པར་སྐྲུན་བདག་དབང་གི་ཆོག་མཆན་ཐོབ་མཚམས་དུས་བབ་གསར་ཁང་གིས་པར་སྐྲུན་ཞུས་ཏེ། ད་ཆར་དབུས་ལས་ཁུངས་སུ་འབྱོར་ཡོད་སྟབས། མི་འགྱངས་བའི་ཕྱི་ཟླ་ ༥ ཚེས་ ༡ ཉིན་ནས་བཟུང་དངོས་སུ་འགྲེམས་སྤེལ་བྱ་རྒྱུ་རེད། དཔེ་དེབ་འདི་ནི་ཉ་བ་རྒད་པོ་ཞིག་གི་མི་ཚེའི་ལོ་རྒྱུས་ལས་འཕྲོས་པའི་གྲགས་ཅན་སྒྲུང་རྩོམ་ཞིག་ཡིན་ཞིང་། བོད་འགྱུར་སྒྲུང་རྩོམ་འདི་ལ་ཁྱོན་ཤོག་གྲངས་ ༡༣༤ ཙམ་གྱིས་གྲུབ་ཡོད་པ་དང་། ད་ཆར་སྒྲུང་རྩོམ་འདི་འཛམ་གླིང་རྒྱལ་ཁབ་མང་པོའི་སྐད་ཡིག་ནང་བསྒྱུར་ཏེ། སློབ་གྲྭ་ཁག་གི་སློབ་ཚན་དུའང་གཏན་འབེབས་བྱུང་ཡོད་འདུག

དུས་བབ་རྩོམ་སྒྲིག་པ་ཟུར་པ་ལུང་རིགས་རྒྱལ་ལགས་ཀྱིས་འགྱུར་རྩོམ་འདིའི་གླེང་བརྗོད་དུ། “ སྒྲུང་རྩོམ་འདི་ནི་བོད་གངས་ཅན་པ་དག་གི་སྤྱི་ཚོགས་འཚོ་བའི་ཚུར་སྣང་ཞིག་མིན་ལ། སྒྲུང་འདིའི་ནང་གི་ཁོར་ཡུག་དང་དོན་རྐྱེན་གྱི་བྱུང་བའི་ཆ་ནས་ང་ཚོར་རྒྱུས་མངའ་དེ་ཙམ་མེད། བོད་མི་རིགས་ནི་སའི་གོ་ལའི་ཡང་རྩེ་ན་ཆགས་ཡོད་ལ། ང་ཚོའི་ཁོར་ཡུག་དེ་གངས་རི་དང་རྫ་རི། སྤང་རི། རྩྭ་ཐང་། གཙང་པོ་སོགས་ཀྱིས་གཙོ་བོར་གྲུབ་པ་རེད། རྟ་ནོར་ལུག་གསུམ་གྱིས་གཙོས་སྒོ་ཕྱུགས་མང་ས་ཞིག་རེད། སྒྲུང་རྩོམ་འདི་ཞི་བདེ་རྒྱ་མཚོའི་ཁ་ནས་བྲིས་པ་རེད། གྲུ་གཟིངས་དང་གྲོང་ཁྱེར། ཉ་ཆེན། རྦ་རླབས་སོགས་ང་ཚོའི་འཚོ་བ་དང་ཁ་ཐག་ཧ་ཅང་རིང་ས་ཞིག་ཡིན་སྟབས། སྒྲུང་རྩོམ་འདིའི་ནང་གི་བྱུང་བ་དང་དེ་དག་མཚོན་བྱེད་ཀྱི་སྐད་བརྡ་སོགས་ནི་སྒྲུང་རྩོམ་ཁོ་རང་ལས་ཀྱང་ང་ཚོར་གསར་པ་ཆགས་ཡོད། ཅི་ཙམ་གྱིས་རང་གི་བློ་རིག་དང་འཚོ་བའི་ཉམས་མྱོང་ལ་ཁ་ཐག་རིང་ན་དེ་ཙམ་གྱིས་སོ་མ་དང་རྩ་ཆེ་བར་འདོད་ ” ཅེས་འཁོད།

ད་དུང་འགྱུར་རྩོམ་འདིའི་གླེང་བརྗོད་ནང་། “ བོད་ལ་མཚོན་ན། ང་ཚོ་བོད་མི་རིགས་ཀྱིས་ད་སྐབས་རང་གི་རུས་རྐང་ལ་ཟུག་ཅིང་། བླ་སྲོག་ལ་བརྩི་བཞིན་པའི་ཆོས་དང་རིག་གནས་ཀྱི་ཕྱོགས་མང་པོ་ཞིག དེང་གི་ཆར་འཛམ་གླིང་རིག་གནས་ཀྱི་བང་མཛོད་དུ་ངོམ་ཆོག་ཆོག་བྱས་ནས་ཡོད་པ་འདི་ཡང་། སྔོན་བྱོན་ལོ་ཙཱ་བ་དག་གི་ཡིག་སྒྱུར་གྱི་སྒྱུ་རྩལ་ལ་བརྟེན་ནས་བྱུང་བ་ཞིག་རེད། ད་སྐབས་འཛམ་གླིང་མི་རིགས་མི་འདྲ་བ་མང་པོས་སོ་སོའི་མ་སྐད་མ་བརླག་པར་གཅིག་རྗེས་གཅིག་གིས་ཟིན་ཞིང་། མུ་མཐུད་ནས་བང་འགྲན་བཞིན་སྔོན་ཐོན་ཕྱོགས་སུ་སྐྱོད་བཞིན་པ་འདི་ཡང་ཡིག་སྒྱུར་གྱི་སྒྱུ་རྩལ་ལ་བརྟེན་ཡོད། འདི་ལྟར་བསམ་ཡོང་དུས། ང་ཚོར་ཡང་ཡིག་སྒྱུར་བའི་དཔུང་ཁག་ནི་ཅི་འདྲའི་མཁོ་ཨང་སྙམ་ཞིང་། སྐུ་ཞབས་དགེ་འདུན་རབ་གསལ་ལགས་ཀྱིས་གཙོས་དེང་གི་ཡིག་སྒྱུར་བ་དག་ནི་ཅི་འདྲའི་དྲིན་དུ་ཆེ་ཞིང་མེད་ཐབས་མེད་པ་ཞིག་རེད ” ཅེས་འཁོད་འདུག

སྐུ་ཞབས་དགེ་འདུན་རབ་གསལ་ལགས་ཀྱིས་སྒྱུར་བ་པོའི་གཏམ་དུ། “ ངས་བཅོས་སྒྲུང་འདིའི་བོད་འགྱུར་ལ་ཞུ་དག་གཏོང་བའི་སྐབས་ནི། བོད་ནང་དུ་བོད་མི་ ༡༦ གིས་སྐུ་ལུས་ཞུགས་མེར་ཕུལ་ནས་བོད་ཀྱི་གནད་དོན་འདི་ཛ་དྲག་གི་ཚོར་བ་ལྕི་མོ་ཞིག་ཏུ་དེད་པའི་སྐབས་ཡིན། དེར་བརྟེན། དུས་ཚོད་འདི་ལ་ནི། བོད་མི་ཞིག་གིས་ཨ་རིའི་རྩོམ་པ་པོ་ཞིག་གི་བཅོས་སྒྲུང་ལ་འགྱུར་བཅོས་དང་ཞུ་དག་གི་ལས་ཀ་བྱེད་པ་ལ་ནི་ཚོར་བ་མེད་ཅིང་། འདོད་རྔམས་མི་སྐྱེ་བའི་ལས་ཀ་ཞིག་ཡིན་པ་སྨྲས་མ་དགོས། གཅིག་བྱས་ན། ལས་ཀ་འདི་འདྲ་ཞིག་ལ་མགོ་འཁོར་ས་ཡོད་པ་ནི་རང་གི་སེམས་ཇེ་སྐྱིད་ལ་གཏོང་བའི་ཐབས་ཤེས་ཤིག་ཡིན་པ་རེད། ངས་སྲང་ལམ་ནས་དབྱིན་ཇིའི་ཚིག་འབྲུ་རེ་ཟུང་རེ་བཏུས་ཤིང་། ཕོ་ལོ་ ༢༥ ཡིན་པའི་སྐབས་དེ་ལ་སློབ་གྲྭའི་གོ་སྐབས་ཤིག་བྱུང་ཚེ། སྐད་ཡིག་གི་དཀའ་ངལ་འདི་སེལ་ཡོད་པ་རེད་དྲན། འོན་ཀྱང་། སྐབས་དེ་ལ་ལྟོ་གོས་དང་དེ་ལས་ཀྱང་ལྟོ་འཚོལ་བའི་ལས་ལ་ཞུགས་དགོས་པར་བརྟེན། ད་དུང་ཡང་རང་གི་ཨིན་ཇིའི་སྐད་ཡིག་ནི་སྲང་ལམ་ནས་སྦྱངས་བའི་སྐད་ཡིག་གི་ངོ་བོར་ལྷག་འདུག ཨིན་ཡིག་གི་སྒྲུང་རྩོམ་བོད་སྐད་ལ་བསྒྱུར་བའི་འདོད་པ་ནི་ཇི་ལྟར་མགོ་བཙུགས་པ་ཡང་མ་ཤེས། བྱིས་པ་གཉིས་ག་ས་གནས་སྤྱི་དམངས་དཔེ་མཛོད་ཁང་དུ་ཁྲིད་སྐབས་སུ་མཐོང་བའི་དཔེ་དེབ་དག་གིས་ང་ལ་སྐུལ་མ་ཞིག་ཐེབས་ཡོད་པ་ནི་སྨོས་མ་དགོས། ཨིན་སྐད་ཐོག་ཀློག་ཏུ་ཡོད་པའི་དཔེ་དེབ་དེ་ཚོ་བོད་སྐད་ལ་སླེབས་ཐུབ་པ་བྱ་འོས་པའི་ཆོད་སེམས་ཤིག་རྙེད་པ་དང་། མི་རེ་རེ་ནས་འགན་འཁུར་ཏེ་གང་ཐུབ་ཅིག་བྱེད་དགོས་སྙམ་ཏེ་ལས་ཀ་འདི་ཕྲག་ཏུ་བླངས་པ་རེད” ཅེས་འཁོད།

གཞན་ཡང་། སྒྱུར་བ་པོའི་གཏམ་གྱི་ནང་དུ། “ ང་ལ་སྒྲུང་རྩོམ་འདི་ངོ་སྤྲོད་བྱེད་མཁན་ནི་ཨ་མ་མཱེ་རེ་ཞུ་མཁན་གྱི་ཨ་མ་ཤིག་ཡིན། ཁོང་གིས་མི་ཚེའི་རིང་སློབ་གྲྭའི་དགེ་རྒན་བྱས་སྐབས། རྩོམ་རིག་སློབ་ཁྲིད་ཆེད་དུ་སྒྲུང་རྩོམ་འདི་བསླབས་ཡོད་འདུག ང་དང་ཨ་མ་མཱེ་རེ་གཉིས་ཀྱིས་ཕན་ཚུན་ལ་སྐད་སློབ་རེས་བྱེད་པའི་ཚུལ་དུ་སྒྲུང་འདི་ཐོག་མར་བསྒྱུར་ཅིང་། རིམ་གྱིས་ཨ་མ་མཱེ་རེ་ནི་སྒྲུང་འདི་ང་ལ་འཆད་པའི་སློབ་དཔོན་ལྟ་བུ་ཞིག་ཏུ་གྱུར། སྐབས་རེར་ཨ་མ་མཱེ་རེ་ལགས་ནི་སྒྲུང་འདིའི་ཚིག་ཤུགས་ཀྱིས་དྲངས་ཏེ། བཀླག་པའི་ཉམས་མི་འདྲ་བ་ཞིག་འདོན་ཅིང་། དེ་ནི་གེ་སེར་སྒྲུང་པ་ཞིག་གིས་སྒྲུང་འཆད་པའི་རྣམ་པ་དང་མཚུངས། ཁོང་གིས་ད་དུང་སྒྲུང་འདི་སྒྲ་ཐག་ཏུ་ཕབ་པའི་སྒྲ་འཛིན་འཁོར་ཐག་དང་། སྒྲུང་འདི་གཞི་ལ་བྱས་པའི་གློག་བརྙན་བཅས་ཀྱང་ཉོས་ནས་ང་ལ་སྤྲད་བྱུང་། ད་དུང་སྒྲུང་འདིའི་ནང་གི་མི་སྣ་གཙོ་བོ་དང་ཡེ་ཤུའི་ཆོས་བར་འབྲེལ་བ་ཡོད་ཚུལ་སོགས་གསང་བ་ཟབ་མོའི་འགྲེལ་བཤད་དག་ཀྱང་གནང་བྱུང་། ང་ཚོས་སློབ་ཚན་ལྟ་བུའི་ངང་ནས་སྒྲུང་འདི་ཀློག་ཞོར་དང་སྒྱུར་ཞོར་བྱས་ཏེ་ ༢༠༠༥ ལོར་ཡོངས་སུ་གྲུབ་པ་རེད ” ཅེས་འཁོད་འདུག

དཔེ་དེབ་འདིའི་རྩོམ་པ་པོ་རྩོམ་ཨར་ནེསྟི་ཧེ་མིང་ཝེ་(Ernest Hemingway)ནི་ ༡༨༩༩ ལོར་ཨ་རིའི་མངའ་སྡེ་ཨི་ལིས་ནོ་ཞེས་པའི་ཨོག་པར་ཀིའི་ནང་འཁྲུངས་ཤིང་། ༡༩༡༧ ལོར་༼ཀེན་ས་སི་གྲོང་ཁྱེར་སྐར་མ་༽ཞེས་པའི་ཚགས་ཤོག་ཐོག་རྩོམ་ཡིག་འབྲི་མགོ་བརྩམས།འཛམ་གླིང་དམག་ཆེན་དང་པོའི་སྐབས་ཨི་ཊ་ལིའི་གཡུལ་སར་དང་བླངས་སྨན་བཅོས་རླངས་འཁོར་ཁ་ལོ་པ་བྱས། ༡༩༢༡ ལོར་ཧེ་མིང་ཝེ་ཕ་རན་སིའི་རྒྱལ་སར་སྡོད་སྐབས། ཁོང་ནི་གཱེར་ཊི་རི་ཌི། སི་ཏའེན་དང་། ཨེ་ཧྥི། སི་ཀོ་ཊ། ཧྥི་ཊི་ཟ་གེ་རལ་ཌི། ཨ་ཛ་རཱ། པོན་ཌི། ཕོར་ཌི། མེ་ཌོ་སེ། ཕོར་ཌི་བཅས་ཀྱི་ཡུལ་གྱར་བའི་ཚོགས་ཁོངས་སུ་ཞུགས། ༡༩༢༦ ལོར་༼ཉི་མ་ཡང་ཤར་འདུག་༽ཅེས་པ་དེ་བརྩམས་རྗེས། ཧེ་མིང་ཝེ་ནི་བརླག་ཟིན་པའི་མི་རབས་ཀྱི་མགྲིན་དབྱངས་ཤིག་ཏུ་གྱུར་པ་ཙམ་མིན་པར། དུས་སྐབས་དེའི་རྩོམ་པ་པོ་ཕུལ་བྱུང་ཞིག་ཏུ་གྱུར། ༡༩༢༩ ལོར་ཨི་ཊ་ལིའི་གཡུལ་སའི་སྐོར་གྱི་བཅོས་སྒྲུང་༼དཔུང་ངར་དང་ཁ་གྱེས་པ་༽བརྩམས། ༡༩༣༠ ནང་ཧེ་མིང་ཝེ་ནི་ཀི་ཝེ་སི་ཊི་དང་ཁུའུ་བྷ་རྒྱལ་ཁབ་ཏུ་གཞིས་སྡོད་བྱས་ཏེ། སི་ཕན་དང་ཨི་ཊ་ལི། ཨ་ཧྥི་རི་ཀ་བཅས་སུ་ཕྱོགས་སྐྱོད་བྱས། སྐབས་དེར་སི་ཕན་གྱི་མི་སེར་དམག་འཁྲུག་ལའང་ཞུགས་མྱོང་ཡོད་པ་རེད། ༡༩༣༩ ལོར་ཁོང་གིས་དམག་འཁྲུག་གི་བཅོས་སྒྲུང་༼གང་གི་ཆེད་དུ་དྲིལ་བུ་དཀྲོལ་བ་༽བརྩམས་པ་དང་། ༼རྒད་པོ་དང་རྒྱ་མཚོ་༽ལ་ ༡༩༥༣ ལོར་པུ་ལེ་ཊི་ཛེར་ཞུ་བའི་གཟེངས་རྟགས་ཐོབ། ༡༩༥༤ ལོར་ཁོང་གི་བརྩམས་ཆོས་ “ གླེང་མོལ་གྱི་སྒྱུ་རྩལ་ལ་དབང་བསྒྱུར་བའི་རྣམ་པ་འཛུགས་མཁན་དང་ཚིག་ཤུགས་ཆེ་བ་ ” ཞེས་པར་ནོ་བྷེལ་རྩོམ་རིག་གི་གཟེངས་རྟགས་བྱ་དགའ་ཐོབ། ༡༩༦༡ ལོར་རྩོམ་པ་པོ་ཁོང་ཨ་རིའི་ཨེ་ཌ་ཧོ་མངའ་སྡེའི་ནང་རང་ཤི་བརྒྱབ་སྟེ་འདས་གྲོངས་སུ་ཕྱིན་ཡོད།

གསར་འགོད་པ། དཔལ་ལྡན།