—–བྱ་མདོ་སྐལ་རྒྱམ།
རབས་འདི་ནི་མི་སྒེར་དང་ཚོགས་ཁག་སོ་སོས་རང་དོན་གཙོ་གཉེར་བྱེད་པའི་དུས་ཤིག་ཡིན་པས་ཁེ་ཕན་གྱི་དུས་རབས་ཞེས་འབོད་ཀྱིན་ཡོད། ཅུང་གནའ་བོའི་དུས་སུ་ཁེ་ཕན་གྱི་དབང་དུ་མ་སོང་བའི་རང་ཚུགས་ཅན་གྱི་སྡེ་ནི་རིག་གནས་པ་དང་ཡོན་ཏན་པའི་སྡེ་ཡིན་ཡང་། མི་ཚོར་རང་ཉིད་གཙོར་འཛིན་གྱི་འདུ་ཤེས་ཤུགས་ཆེར་ཕྱིན་པའི་དེང་གི་དུས་འདིར། ཐམས་ཅད་ཀྱིས་གཉེར་བྱ་ནི་རང་ཉིད་ཀྱི་ཁེ་ཕན་ཁོ་ན་རེད། ཡོན་ཏན་པའི་སྡེ་ནས་ཀྱང་དམིགས་འདུན་གྱི་སྤྱི་ཚོགས་འགན་འཁྲི་བོར་ཏེ་དགག་བཞག་དང་ཟུར་ཟའི་རྩོམ་ཡིག་གང་མང་སྤེལ་ཏེ་སྔོན་ཆད་མ་བྱུང་བ་ཞིག་བཤད་འདོད་ཀྱིས་མཁས་པ་སྔ་མ་རྣམས་ཀྱི་གསུང་ལ་དཔྱད་པ་ཞིབ་མོར་མ་བཏང་བའམ། ཡང་ན། དཔྱད་པ་མ་ཕོག་པའི་དབང་གིས་ཡིན་ནམ། རང་ཉིད་ཀྱི་རྣམ་རྟོག་ལ་འཚར་ཚོད་ཙམ་གཙོ་བོར་བཟུང་སྟེ་ཐག་གཅོད་བྱེད་རྒྱུར་དགའ་བའི་དུས་འདིར། བན་ཤུལ་དཔལ་མཁར་རྒྱལ་གྱིས་དབུ་ཁྱུད་དང་ཤད་ཀྱི་སྐོར་ལ་དྲྭ་རྩོམ་ཞིག་མཐོང་བས། རང་ཉིད་ཀྱིས་བསམ་ཚུལ་ཞིག་བརྗོད་དགོས་བསམས་ཀྱང་བྲེལ་ཟིང་གི་ཁྲོད་ནས་དེ་མུར་ལུས་སོང་། དེ་རིང་སླར་ཡང་ཧིན་ངྷིའི་ཡི་གེའི་ཨོཾ་རིས་ཤིག་གིས་དྲན་སོས་སུ་བཅུག་སོང་།
བོད་ཀྱི་མཁས་པ་སྔ་མ་རྣམས་ཀྱིས་ཁ་སྐད་དུ་དབུ་ཁྱུང་ཞེས་པ་མ་དག་པས་དབུ་ཁྱུད་ཅེས་འབྲི་དགོས་ལ། དེ་ཡང་གོར་གོར་རམ་གུག་གྱོག་གི་མིང་ཡིན་པར་གསུངས་པ་ལས་བཟློག་སྟེ། ཁོང་གིས་དབུ་ཁྱུང་ཞེས་འབྲི་དགོས་པའི་རྒྱུ་མཚན་དུ༼བྱ་ནམ་འཕང་བཅད་ནས་འཕུར་བའི་ཚེ་ཁྱུང་གིས་མགོ་འདྲེན་པ་ལྟར་ཡི་གེ་དང་བརྗོད་བྱ་གང་ཞིག་མགོ་རྩོམ་པའི་ཚེ་ནའང་དབུ་ཁྱུང་གིས་འདྲེན་དགོས་པ་ཡིན་ནོ༽ ཞེས་སྒྲུབ་བྱེད་བཀོད་པ་ནི་རང་གི་རྣམ་རྟོག་ལ་ཤར་བའི་ལྷ་སྒྲུང་ཞིག་དང་འདྲ་སྟེ། བྱ་ཚོགས་ནམ་མཁའ་ལ་འཕུར་བའི་ཚེ་ཁྱུང་གིས་མགོ་དྲངས་ནས་འཕུར་དགོས་པ་ཡིན་ནམ། དེ་བཞིན་དུ་གྷརུཊ—བེརྒརུ་ཟུར་ཆགས་ཚུལ་ཡང་རང་གི་ཞེ་འདོད་ཙམ་ལས་སྒྲ་དེ་གཉིས་འདྲ་འབྲེལ་གང་ཡང་མ་གྲུབ་ཕྱིར་རོ།
དོན་དངོས་ནི། དགེ་འདུན་ཆོས་འཕེལ་གྱིས༼ཡིག་མགོའི་ཏིང་ཀྱོག་འདི་ཡང་ཨོཾ་ཡིག་ཏུ་ཤེས་ལ། རྒྱ་དཔེ་རྣམས་ལ་དབུ་ཤོག་གི་དང་བོར་ཨོཾ་ཡིག་བྲིས་འདུག་ཅིང་༽ཞེས་བཤད་པ་ལྟར་གོང་དུ་བཀོད་པའི་དཔར་རིས་དེ་ནི་དེང་སྐབས་ཀྱི་རྒྱ་གར་ཡི་གེའི་ཨོཾ་ཡིག་རིང་ཆ་ཅན་ཡིན་ལ།ཧིན་ངྷི་བ་ཚོས་དེ་ནི་ཧ་ཅང་གི་བཀྲ་ཤིས་པའི་ཚིག་ཅིག་ཏུ་བཤད་པ་ལྟར་དཔར་དེ་ཉིད་གང་ས་གང་དུ་སྦྱོར་སྲོལ་ད་དུང་ཡང་མ་ཉམས་པར་ཡོད། རིག་བྱེད་པའི་གཞུང་ལས། ཚངས་པ་དང་ནི་ནོར་ལྷ་ཡིས།།གླུར་བླངས་གསང་བ་ཨོཾ་ཞེས་བྱ།། ཚངས་པའི་ཡི་གེ་དེ་ཉིད་ནི།།ཡེ་ཤེས་ཀུན་ལ་ཁྱབ་པ་ཡིན།། ཞེས་ལྷ་ཆེན་ཚངས་པ་དང་ནོར་ལྷས་གླུ་རུ་བླངས་པའི་ཡི་གེ་དེ་ལ་ཚངས་པའི་ཡི་གེ་ཞེས་བྱ་ཞིང་། དེ་ཉིད་ཀྱིས་ཤེས་བྱ་ཐམས་ཅད་ལ་ཁྱབ་ཅིང་། དངོས་པོ་ཀུན་སྐྱེ་བའི་གཞིར་ཡང་བཞེད་དེ། ཚད་མའི་དེ་ཁོ་ན་ཉིད་བསྡུས་པར་ཕྱོགས་སྔའི་འདོད་པ་བརྗོད་སྐབས། སྒྲ་ཡི་རང་བཞིན་ཚངས་པ་མཆོག། གང་དེ་ཡོངས་སུ་གྱུར་བ་ནི།།དངོས་པོའི་འགྲོ་འདི་ཤེས་པར་བྱ།། ཞེས་སོགས་ཕྱི་རོལ་བ་རྣམས་ཀྱིས་རང་གི་གྲུབ་མཐའ་དང་སྦྱར་ནས་ཨོཾ་ཡིག་ལ་འགྲེལ་བཤད་རྒྱ་ཆེར་བྱེད་པ་ཙམ་དུ་མ་ཟད། ནང་བསྟན་ཆོས་ལུགས་རང་ལ་མཚོན་ན་ཡང་། རྡོ་རྗེ་རྩེ་མོ་ལས། ཨོཾ་ནི་ཅི་ཞིག་ཡིན་པར་བརྗོད།།མཆོག་དང་ནོར་གཏེར་དཔལ་དང་གཡང་།།དམ་བཅའ་བ་དང་བཀྲ་ཤིས་དོན།།སྐལ་བཟང་རྣམ་པ་དང་ལྡན་ཞིང་།།ནོར་བུ་འཛིན་པའི་སྔགས་སུ་བརྗོད།།ཅེས་བཀྲ་ཤིས་པའི་དོན་དུ་མ་འཇུག་པར་གསུངས་པ་ལྟར། བོད་དུའང་མཎྜལ་བཤད་པ་དང་ཁྲི་འདོན་མཛད་སྒོ་སོགས་ཀྱི་བཤད་པའི་མགོར༼ཨོཾ་བདེ་ལེགས་སུ་གྱུར་ཅིག་ལྟ་བུ་དང་བཀྲ་ཤིས་པར་གྱུར་ཅིག༽ ཞེས་པའི་ཚིག་བེད་སྤྱོད་བྱེད་པའང་འདི་ལས་རིགས་འདྲ་བླངས་པ་བསྙོན་དུ་མེད་ལ། སློབ་དཔོན་ཐོན་མིས་ཀྱང་རྒྱ་གར་གྱི༼གོང་དུ་བཀོད་པའི་ཨོཾ་ཡིག་གི་དཔར༽ ཨོཾ་ཡིག་ལ་དཔེ་བླངས་ནས་བོད་ཀྱི་དབུ་ཁྱུད༄༅།། འདི་བཟོས་པ་ཡིན་པར་རི་མོ་རང་ངོས་ནས་ཁ་གྲག་འདུག་པས་མང་བོ་བཤད་དགོས་སུ་མི་སྣང་ངོ།།
ཤད་ཀྱི་འགྲེལ་བཤད་ལ་ཁོང་གིས། ཤད་ནི་གཡག་དང་གཡག་གི་རྔ་མར་གཉི་གར་གོ་ཞིང་། ཕྱི་མའི་རྒྱུ་མཚན་དུ། གཡག་གི་རྔ་མ་ནི་གཡག་གཅིག་རྫོགས་པའི་དོན་ཡིན་པར་བཤད་པ་ནི་བོད་ཀྱི་སྐད་ཡིག་ལ་རྨོངས་པའི་རྒྱ་མི་ཞིག་གིས་བོད་སྐད་བཤད་པ་དང་འདྲ་བས་གོ་རྒྱུ་ཅི་ཡང་མེད་ལ། དག་ཡིག་རྣམས་སུ། ཤད་པོ་ནི་ལོ་གསུམ་ལོན་པའི་ནོར་ལ་གོ་ཞིང་། དེ་ཡང་ཕོ་ལ་ཤད་པོ་དང་མོ་ལ་ཤད་མོ་ཟེར་བར་བཤད་པས་གཡག་སྤྱི་ཡི་མིང་བརྡ་ཞིག་མིན་ལ། རྔ་མར་འཇུག་པ་ཞིག་དེ་བས་མིན་ནོ།།
༢༠༡༥–༡༠–༥ མཚན་མོར་སྔར་གྱི་མ་ཟིན་ཞིག་ལ་བཟོ་བཅོས་ཕྲན་བུ་དང་བཅས་བཀོད་པའོ།།