ཆང་སྐྱེས།
ཀ་ཁའི་འགོ་རྔ་བསྒྲིགས་ཏེ་རྩོམ་ཞིག་བྲིས།།
ཁ་ཤ་འདར་བཞིན་འདར་བཞིན་གླུ་ཞིག་བླངས།།
ག་མོ་རྒྱབ་ལ་འཁུར་ནས་བྲོ་ཞིག་འཁྲབ།།
ང་འདྲ་ང་ངོ་ཟེར་བཞིན་མགུར་ཞིག་བརྩམས།།
ཅ་དག་ཤོམ་ཞིག་བྱས་ནས་གྲོང་ལ་སོང་།།
ཆ་ལུགས་ཡ་མ་ཟུང་གི་ཉམས་ཤིག་བསྟན།།
ཇ་ཆང་སྡེར་ཁའི་བར་ནས་ལག་ཅིག་བསྲིངས།།
ཉ་ཉོག་མང་པོ་བསྲེས་ནས་གཏམ་ཞིག་བཤད།།
ཏ་རིན་སྐུ་ངོའི་དྲུང་ན་ཞུམ་ཞུམ་རྒྱུགས།།
ཐ་ཤལ་བློ་ཞིག་བཀོལ་ནས་ལམ་ཞིག་བསྙེགས།
ད་ནི་འགྲིག་སོང་བསམ་ནས་ངལ་ཞིག་གསོས།།
ན་ཟུག་མེད་པའི་ན་ཚ་ཁོག་ཏུ་སྦས།།
པ་ཕ་ཨ་མ་ཡིན་ཞེས་ཕུག་ན་བཞུགས།།
ཕ་གའི་མཛེས་མ་ཟེར་བཞིན་འཛུམ་ཞིག་བསྟན།།
བ་སྤུ་བྲང་སྤུ་མ་ལུས་གྱེན་དུ་གཟེངས།།
མ་ཎི་ཡིག་དྲུག་འདོན་མཚམས་རྨང་ནས་འགག།
ཙ་ཙིག་ལས་ཀྱིས་ཉིན་མོའི་གྲོ་ཁ་ཆད།།
ཚ་བའི་ནད་ཀྱིས་མཚན་མོའི་གཉིད་ཀྱང་བཅག།
ཛ་རེ་ཛོ་རེ་བར་ནས་ཟུངས་ཁྲག་ཟད།།
ཝ་ཞྭ་ཟུར་གོན་བྱེད་པའི་དུས་ཚིགས་རྫོགས།།
ཞ་ར་ལམ་ལ་ཆས་ན་རྡོ་ལ་ཐོགས།།
ཟ་ཉེས་འཐུང་ལོག་བྱས་ན་ཕོ་བར་གནོད།།
འ་རི་འུ་རི་ལས་ཀྱིས་རང་ཉིད་བརླག།
ཡ་སེ་ཡོ་སེ་བྱས་ན་ཀུན་གྱིས་སྨད།།
ར་རྩག་ཕྱི་ནང་སློག་ན་སྨྱོན་པར་རྩི།།
ལྭ་བའི་ཕུ་རུང་རིང་ན་མྱི་ཁ་འཁོར།།
ཤྭ་བོ་རྭ་བརྒྱད་བསད་ན་སྡིག་པ་ཆེ།།
ས་ཆ་འདྲ་མིན་ཉུག་ན་བཤད་རྒྱུ་མང་།།
ཧ་ཅང་སྙན་ཆ་མེད་པའི་གླུ་ཆུང་འདི།།
ཨ་མའི་གཅེས་ཕྲུག་རྣམས་ལ་དམིགས་ཏེ་བླངལ།།
ཧ་ནེ་ཧོན་ནེ་ངང་ནས་བླངས་པ་ཡང་།།
ཨ་ལ་ཀུ་རེ་ཞིག་གི་ཚུལ་ཏུ་ཡིན།།
ཀ་ཁའི་གོ་རིམ་བསྒྲིགས་ནས་རྩོམ་ཞིག་བྲིས། །
ཁ་ལྕེ་འདར་བཞིན་འདར་བཞིན་གཏམ་ཞིག་བཤད། །
ག་ས་ག་ལ་ཕོག་པའི་གྲོས་ཤིག་བཏོན། །
ང་འདྲའི་ང་ངོ་མི་ཤེས་བླུན་རྒན་ང་། །