ཀ་ཕྲེང་མགྲིན་པའི་སྦུག་གླུ།

ཀ་བ་འགྱིངས་པ་ལྟ་བུའི་ནགས་རིས་གཡས་གཡོན་ཡོངས་སུ་གང་བར་བྱས།།
ཁ་དོག་ཉམས་པའི་སྤང་རྩྭ་སེར་མདོག་མཁྲིས་ནད་ཕོག་པའི་ན་གཞོན་བཞིན།།
གང་དུ་བལྟས་ཀྱང་རི་རབ་ལྷུན་པོ་ཁ་དོག་ཉམས་པའི་ནམ་དུས་ཤར།།
ང་རང་གཅིག་པུ་ཧད་དེ་ལུས་པ་ལྷ་གསོལ་རི་ལས་གཞན་སུས་ཤེས།།

ཅ་གས་བསྐྱངས་པའི་རིན་ཆེན་ལུས་རྟེན་ས་མཐར་གྱར་ལུགས་འདི་འདྲ་ནི།།
ཆ་ཤས་ཙམ་ཀྱང་ལོ་རྒྱུས་ནང་དུ་སྐྱེ་བོ་ཀུན་ལ་མི་འབྱུང་ཤོག །
ཇི་ཙམ་བལྟས་ཀྱང་ཕ་ཡུལ་ཁོ་ན་དྲན་པའི་ངོས་སུ་ཝ་ལེར་འཆར།།
ཉི་མ་བཞུད་པའི་གྲིབ་གཟུགས་ཁྱོད་ནི་གདུང་བ་སྟེར་བའི་ཕོ་ཉ་འདྲ།།
ཏ་ཐ་ག་ཏའི་གཞུང་ཆེན་སྦྱོང་བའི་ལས་དབང་ཚེ་འདིར་མ་བསྐོས་ཀྱང་།།
ཐ་མལ་ལུས་འདིས་རྒྱུས་མེད་རི་ཀླུང་ཐན་པ་འགམ་བཞིན་འདི་རུ་འབྱོར།།
ད་ལྟའི་ང་ཚོའི་གནས་སྟངས་འདི་ཡིས་རྒྱལ་བའི་དགོངས་པ་ག་ལ་འགྲུབ།།
ན་གཞོན་མང་པོས་གངས་ལྗོངས་ཡུལ་ནས་སྐུ་སྲོག་དམར་པོའི་མེ་ལ་ཕུལ།།
པ་ཕའི་བུ་དང་བུ་མོ་མང་པོས་གཞན་ཡུལ་ཕྱོགས་ནས་ཁྲིག་ཁྲིག་བྱས།།
ཕ་ཡུལ་མེད་ཀྱང་ཡོད་མདོག་བསྟན་ནས་གཞན་ཡུལ་རང་ལ་བདག་ན་སྙམ།།
བ་མོ་དུད་འགྲོའི་བརླིང་སྤྱོད་བཞིན་དུ་ད་དུང་ལྐོག་ཟར་ཧམ་སེམས་བྱེད།།
མི་ཡུལ་འདི་རུ་འབུམ་ཕྲག་བརྩིགས་ཀྱང་དོན་གྱི་སྙིང་པོ་ཡོད་དམ་ཅི།།
རྩ་བ་བྲལ་བའི་སྡོང་པོ་བཞིན་དུ་ནམ་ཞིག་ཕུང་ལས་སུས་སྐྱོབ་བམ།།
ཚ་གྲང་སྙོམ་པའི་གསེར་ལྡན་དུས་འདི་ཀུན་གྱི་ཡིད་ལ་མཛའ་ན་འང་།།
ཛ་དྲག་ཆེ་བའི་དགུན་གྱི་གྲང་ངར་རེས་མོས་འཁོར་བ་ཇི་བཞིན་དུ།།
ཝ་ལེར་བསམ་ན་མི་བདག་རྒྱུ་ཡིས་གཞན་མགོ་བསླུས་ཀྱང་རང་ཉིད་ཕོངས།།
ཝ་ཡེ་གསོན་དང་ཞུ་རྒྱུ་ཡོད་དོ་ད་དུང་ལྷོད་པར་གནས་ཁུལ་ཡང་།།
བཞི་གསུམ་བཅུ་གཉིས་ནམ་དུས་རྣམས་ནི་མགྱོགས་འགྲོ་ཐང་ལ་རྒྱུགས་པ་བཞིན།།
གཟི་བརྗིད་ལྡན་པའི་དབྱར་གྱི་དཔལ་མོ་གར་སོང་ཆ་མེད་བྲོས་བྱས་ཤིང་།།
འ་རེ་འུ་རེའི་བྲེལ་འཚུབ་ཁྲོད་ནས་སྨུག་སྤྲིན་ལང་འཚོ་བརྗེད་ནས་ཐལ།།
ཡ་རབས་བཟང་པོའི་གངས་ཅན་ལྗོངས་ཀྱི་སྐྱེ་བོའི་རྣམ་ཐར་སྐྱོང་བསམ་ན།།
ར་ལྟར་གྱོང་བའི་མ་རབས་རྣམས་ལ་ད་ནི་ལས་འབྲས་འཁོར་རེ་རན།།
ལམ་དང་ལུགས་སྲོལ་གང་ལ་མ་བརྩིས་སྒོར་མོའི་འབུལ་བས་སྐྱེ་བོ་འཁྲུལ།།
ཤ་ཚ་ཅན་གྱི་སྐྱེ་བོ་དག་ནི་ཡིད་ལ་གདུང་བའི་ཁུར་གྱིས་མནན།།
ས་ཕྱོགས་འདི་ནས་དྲང་གཏམ་ཞུས་ཀྱང་གསན་པའི་སྐྱེ་བོ་སུ་ཞིག་མཆིས།།
ཧ་ཅང་ཐལ་བའི་བྱ་སྤྱོད་འགའ་རེས་བདེན་པའི་སྐྱེ་བོའི་བླ་དེ་འཁྱར།།
ཨ་གསར་ཅན་གྱི་གཏམ་རྒྱུད་མིན་ཀྱང་ཁུ་སིམ་རྫ་མོའི་རོང་གི་ཆུ།།
ཤང་ཤང་འུར་སྒྲ་ཆེས་རང་དྲགས་ན་ས་བདག་རྒྱལ་པོ་ཁྲོས་གྱུར་ཏེ།།
ས་གཞིའི་སྟེང་གི་ཉམ་ཆུང་མེ་ཏོག་དྲག་པོའི་ཆད་པས་གཏོར་ཉེན་ཡོད།།
ཧ་ཧ་ཞེས་པའི་ཀུ་རེའི་ཚུལ་གྱིས་སེམས་གཏམ་རི་མོའི་ལམ་ནས་ཤོར།།
ཧུ་ཧུ་ཞེས་པའི་སྨྲེ་ངག་ཚུལ་གྱིས་གདུང་བའི་གླུ་ཆུང་མགྲིན་ནས་ཐལ།།
ཨ་ཕྲེང་སྒྲིག་པའི་མུ་ཏིག་ཕྲེང་མཛེས་དཔལ་ལྡན་ལྷ་མོའི་རྒྱན་དུ་ཕུལ།།