ཀ་བཤད་མཐའ་མ་སུམ་ཅུ་པ།

ཀོ་ལི་གྷ་གཞུང་པ་ཚེ་དབང་བསོད་ནམས།

 
ཀ་ར་གུ་རམ་ཁ་ལ་མངར་ཡང་ཡ་སྲིན་ནག་པོའི་སྣ་འདྲེན་རེད།།
ཁ་ཤ་ཁུར་ཤ་ག་ནས་འཐེན་ཀྱང་རང་གི་ལུས་ཀྱི་ཆ་ཤས་རེད།།
ག་ནས་བལྟས་ཀྱང་རང་དོན་སྒྲུབ་ནས་གཞན་ལ་སྐྱོན་འཛུགས་བྱེད་མཁན་མང་།།
ང་ཚོ་ཁོང་ཚོའི་གླེང་གཞི་བཟོས་ནས་རང་བཙན་དབུ་མས་དུས་ཚོད་བསྣར།།
ཅ་ཅོ་མང་བའི་ཆོས་མེད་ཀླ་ཀློ་གུང་བྲན་སྲིད་གཞུང་ཆབ་སྲིད་རྣོ།།
ཆ་རྒྱུས་ཉམས་མྱོང་ཁ་མཐུན་མེད་པའིི་རྗེས་ལུས་སྤྱི་ཚོགས་ང་ཚོ་འདྲ།།
ཇ་ཆང་མ་ཅང་ཤོ་སྦག་རྒྱན་རྩེད་མགོ་བོ་འཁོར་སའི་རྒྱན་རྩེད་མང་།།
ཉ་མོ་ཆུ་ནང་འཁྱུག་ལ་མཁས་ཀྱང་སྐམ་སར་སླེབས་དུས་ཆུ་རླུང་འཐིམ།།
ཏ་ལའི་བླ་མས་དུས་གསུམ་གསལ་གཟིགས་མ་འོངས་བོད་ཀྱི་མདུན་ལམ་བསྟན།།
ཐ་མའི་ཐག་གཅོད་བོད་མིར་གནང་ཡང་ང་མཁས་ཁོ་མཁས་གླེང་གཞིར་བསྒྱུར།།
ད་ལྟའི་སྐབས་སུ་བོད་རྒྱའི་འབྲེལ་ལམ་ཆབ་སྲིད་སྟོང་པའི་མིང་ཙམ་ལྷག །
ན་གཞོན་མི་རབས་གསར་པའི་ལྷག་བསམ་རང་གི་ཕ་ཡུལ་ཕྱོགས་སུ་གཏོད།།
དཔའ་རྩལ་ཆེ་བའི་ཆོས་རྒྱལ་གོང་མས་འཛམ་གླིང་གསུམ་ཆ་དབང་དུ་བསྡུས།།
ཕ་ལམ་བཞིན་དུ་ཆོས་སྲིད་སྐྱོང་བའི་རྒྱལ་དབང་སྐུ་ཕྲེང་རིམ་བཞིན་ཕེབས།།
བ་དན་ཕྱོགས་བཅུའི་ནམ་མཁར་བསྒྲེངས་ནས་སངས་རྒྱས་བསྟན་པ་འཛམ་གླིང་ཁྱབ།།
མ་རབས་བྱ་བ་སྤེལ་མཁན་མེད་པའི་མི་ཡི་སྤྱི་ཚོགས་བོད་པ་ཙམ།།
རྩ་བ་བརྟན་པོའི་བོད་རྒྱའི་འབྲེལ་ལམ་ལོ་རྒྱུས་ངོ་སྤྲོད་བརྒྱུད་ན་བཟང་།།
ཚ་གྲང་ཇི་བྱུང་བཟོད་བསྲན་ཐུབ་ནས་མ་ནོར་ལམ་ལ་འཇུག་པར་འཚལ།།
ཛ་དྲག་བྱས་ནས་བོད་རྒྱའི་དཀའ་རྙོག་མ་སེལ་གྱོང་ཁ་བོད་དུ་ཆེ།།
ཝ་ལེར་སོམས་དང་གཞིས་བྱེས་མཉམ་འཛོམས་མགོན་པོ་གང་གི་སྐུ་དུས་འདིར།།
ཞ་ཉེ་ཧ་ཡང་ངོ་རྟགས་མ་ཆོད་རིན་ཚད་གཅིག་ལ་ཉོ་ཚོང་བྱེད།།
གཟའ་དང་རྒྱུ་སྐར་མུ་མཐའ་མེད་པར་འཁོར་རྒྱུགས་བྱེད་པ་རླུང་གིས་འདྲེན།།
འ་འུར་རྒྱབ་ནས་རྒྱལ་ཁབ་ཆབ་སྲིད་སྲ་བརྟན་ཐུབ་པའི་ལོ་རྒྱས་དཀོན།།
ཡ་རབས་མ་རབས་བློ་ཡིས་དཔྱད་པ་ཤེས་བྱ་རིག་པས་བསྟན་པའི་ལམ།།
ར་བ་ལྕགས་རིས་སྲུང་སྐྱོབ་ཐུབ་པ་འཛམ་གླིང་མི་ཡི་ལམ་ལུགས་འདྲ།།
ལ་རྒྱ་བརྟན་པོ་མེད་པའི་སྤྱི་ཚོགས་ཡུལ་ལུང་གང་སར་ནང་འཁྲུག་མང་།།
ཤ་མདོག་མི་འདྲའི་མི་རིགས་མང་ཡང་ལུས་ཀྱི་ཚེ་སྲོག་འབྱུང་བས་སྲུང་།།
ས་ཆ་སྐྱིད་པོ་བོད་ཡུལ་མངའ་རིས་ང་ཡི་སྐྱེས་ཡུལ་གཞུང་སྡེ་འབྲོག །
ཧ་ཅང་མང་བའི་ཚིག་རྙོག་ཐལ་ཡང་ལྟ་ཀློག་ཐུགས་དང་མ་འགལ་ལོ།།
ཨ་གསར་གཏམ་གྱི་ཀ་བཤད་སུམ་ཅུ་ལན་གཅིག་འདི་རུ་མཇུག་སྒྲིལ་ལོ།།

སླར་སྨྲས་པ།
རིང་ནས་སེམས་ལ་འཁོར་བའི་དྲན་པ་དང་།།
རྒྱུན་རིང་ལག་ཏུ་བཟུང་བའི་འབྲི་སྨྱུག་གཉིས།།
བློ་རྩེ་མཐུན་ནས་ཁ་བརྡ་དྲ་རྒྱར་འཛུལ།།
གཟུར་གནས་མཁས་པའི་སྤྱན་འོག་མ་ཚུད་ཤོག །

ལྟ་ཀློག་མཆན་འགོད་དྲ་གྲོགས་རྣམས་ལ་སྤྱི་ལོ་གསར་པར་འཚམས་འདྲི་ཞུ་བ་དང་། ཁ་བརྡ་དྲ་རྒྱ་བཀའ་དྲིན་ཆེ་བས་ཁ་སྟོང་མིན་ཙམ་གྱི་ཐུགས་རྗེ་ཆེ་ཞུ།
TA TA.„BYE BYE.