ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས།
ཀ་མད་སུམ་ཅུ་བོད་ཀྱི་ཡི་གེ་ལ།།
ཁ་སང་དེ་རིང་ལྟ་ཀློག་བྱ་མཁན་དཀོན།།
ག་པ་ཡིན་ཀྱང་དབྱིན་ཡིག་ཆག་ཀྱོག་ལ།།
ང་མཁས་ཁོ་མཁས་འཚང་ཁ་ཤིག་ཤིག་རེད།།
ཅོལ་ཆུང་བློ་ཡིས་ལྟོ་གོས་འཚོལ་ཐབས་སུ།།
ཆ་འཇོག་ཡིད་ཆེས་དབྱིན་སྐད་དབྱིན་ཡིག་ལ།།
ཇ་ཆང་བཞིན་དུ་རྒྱུན་དུ་བེད་སྤྱོད་མང་།།
ཉ་མོ་བྱེ་སྟེང་ལྷག་འདྲའི་ཀ་ཁ་ལ།།
རྟག་ཏུ་ཆེ་མཐོང་ཞུས་ནས་ལྟ་ཀློག་ཟབ།།
ཐོག་མ་ཉིད་ནས་རང་གི་སྐད་ཡིག་ལ།།
དོན་དངོས་སློབ་གསོ་མ་འདང་འཐུས་ཤོར་ལ།།
ནམ་ཡང་སུབ་ཐབས་མེད་པའི་གྱོང་གུན་ཕོག །
པ་ཕ་ཨ་མས་རང་གི་བུ་ཕྲུག་ལ།
ཕ་སྐད་བོད་སྐད་བོད་ཡིག་ངོ་སྤྲོད་ཟབ།།
བོད་ཀྱི་སྐད་ཡིག་བོད་མིའི་ངོ་བོ་རེད།།
མ་འཕྱུག་མ་ནོར་མ་འགྱོད་ཀ་ཁ་སློབས།།
རྩ་བ་མི་རིགས་འབྱུང་ཁུངས་སྐད་ཡིག་ལ།།
ཚ་གྲང་སྤངས་ནས་ཉིན་མཚན་དུས་དྲུག་སྦྱོངས།།
མཛའ་བརྩེ་ཡོད་ན་ཕ་མེས་སྐད་ཡིག་ལ།།
ཝ་ཞྭ་བཞིན་དུ་གཅེས་སྐྱོང་གཟབ་ན་དགའ།།
ཞ་ར་འོན་པ་ཚུན་གྱིས་ཀ་ཁ་སློབས།།
བཟང་པོའི་བསླབ་བྱ་ངན་པའི་དགྲ་རུ་འཛིན།།
འུག་སྐད་འདྲ་བའི་དབྱིན་སྐད་ཆག་ཀྱོག་ལས།།
ཡིད་ཆེས་ཐུབ་པའི་ཕ་མེས་སྐད་ཡིག་དགའ།།
རང་གི་ཕ་མེས་སྐད་ཡིག་ནོར་བུ་རེད།།
ལ་ལུང་བརྒལ་ཡང་མ་བརྗེད་སྙིང་ལ་བཅང་།།
ཤ་ཚ་ཡོད་ན་ཕ་མེས་སྐད་ཡིག་ལ།།
ས་མཐའ་འདི་རུ་ཀ་ཁའི་བསྟན་པ་ཚུགས།།
ཧ་ཅང་འཕྲུལ་ནས་ཕྱི་མིའི་སྐད་ཡིག་ལ།།
ཨ་གསར་མ་མང་རང་གི་སྐད་ཡིག་སྲུངས།།