ཨེ་མ་ཧོ།
ན་མོ་གུ་རུ་ཨཱ་ལི་ཀཱ་ལི་ཡ།
ཀ་ར་སྦྲང་རྩི་བྱིས་པའི་དགའ་ཟས་དང་།།
ཁ་བའི་དབྱངས་གསལ་གངས་རིའི་བླ་སྲོག་དང་།།
ག་བུར་བཟང་དྲུག་ལུས་ཀྱི་སྨན་མཆོག་རིགས།།
ང་ཚོ་ཀུན་ལ་དགོས་མཁོ་ཤིན་ཏུ་ཆེ།།
ཅ་ཅོ་འདུ་འཛིའི་གཡེང་བའི་གྲོང་པ་དང་།།
ཆ་ལུགས་ཆོས་བཞིན་སྤྱོད་པའི་དགོན་པ་དང་།།
ཇ་ཆང་ཁོ་ན་བསམ་པའི་ཤེས་མེད་རིགས།།
ཉ་ཉུང་མ་འདྲིས་བཟང་ངན་དཔྱོད་ན་ལེགས།།
ཏ་ཐ་ག་ཏའི་ཆོས་ཚུལ་མཐའ་དག་དང་།།
ཐ་སྙེད་ཤེས་བྱའི་རྣམ་གྲངས་གྲངས་མང་དང་།།
ད་ལྟའི་དུས་རབས་མཐུན་པའི་སློབ་བརྩོན་ནི།།
ན་ཚོད་ཁྱད་མེད་ཀུན་གྱིས་འབད་པར་མཁྱེན།།
པ་མེས་བདེན་པའི་རི་མོ་ཐུགས་སུ་བཀྲ།།།
ཕ་རོལ་གཞན་ཕན་བསམ་པ་ཀུན་ཏུ་ཤིས།།
བ་ལང་རྟུལ་ཞུགས་མིན་པར་དོན་གྱི་བདེ།།
མ་ལུས་བསྟན་འགྲོར་སྨན་ན་གཏན་དུ་ལེགས།།
ཙ་གེ་ཙིག་གེའི་རང་དོན་རྩོད་པ་དང་།
ཚ་བེ་ཚུབ་བེ་གཞན་དོན་སྒྲུབ་ཁུལ་དང་།།
ཛ་ཡའི་བསྟན་པའི་འདྲ་འབག་གྱོན་པའི་རིགས།།
ཝ་བཞིན་གཡོ་སྒྱུ་མཁན་ལ་རྟག་ཏུ་གཟོབས།།
ཞྭ་མོའི་ཆེད་དུ་རྒྱལ་ཆོས་བཙོང་བ་དང་།།
ཟ་མའི་ཕྱིར་ཏུ་ཕ་ཆོས་བརླག་པ་དང་།།
འ་རེ་འུར་རེའི་མི་ཚེ་དོན་མེད་རིགས།།
ཡ་རབ་རྣམ་ཐར་མིན་པས་སྤོངས་ཤིག་ཨང་།།
ར་བ་གངས་རི་དཀར་པོ་མཛེས་ན་ཡང་།།
ལ་རྒྱའི་དབྱངས་གསལ་བསྟན་པ་ཉམས་གྱུར་ན།།
ཤ་ཁྲག་རུས་པ་བོད་ལུས་བླངས་པའི་རིགས།།
ས་སྟེང་འཚོ་འདོད་ཡོད་ཀྱང་སྙིང་པོ་དབེན།།
ཧ་ཅང་རེ་དོགས་མང་བའི་ཤྲྰིཿསྨྱོན་པས།།
ཨ་མཚར་མ་ཡིན་སྙིང་ནས་གངས་ཅན་པར།།
རྒྱལ་སྤྱིའི་ཕ་སྐད་ཉིན་མོར་རྟེན་འབྲེལ་ཕྱིར།།
གནུབས་བན་ཨེ་མ་ཧོ་ཡིས་གུས་ཕུལ་ལོ།།