སྒེའུ་ཁུང་།
ཀ་ཆེན་ལྟར་བུའི་སྒལ་ཚིགས་ཐོག།
ཁ་བ་རི་བའི་སྐྱིད་སྡུག་བསྔས། །
ག་ཏེ་ཁོང་ཉིད་ཕེབས་ཕྱིན་ཚེ། །
ང་ཚོའི་རྩོད་ལེན་སུ་ཡིས་བྱ།
ཅ་ཅོའི་དོན་དུ་དུས་མ་གཏོང་། །
ཆ་རྒྱུས་ཡོད་པའི་མི་དང་འདྲོགས །
ཇ་རིན་ཙམ་ཡང་མི་ཁུག་པའི། །
ཉ་མོའི་ཚོགས་ཀྱིས་སླུས་ན་སྐྱོ། །
ཏ་ལའི་བླ་མའི་མཛད་རྗེས་དག །
ཐ་ཤལ་རེ་འགས་ལོག་པར་མཐོང་། །
ད་དུང་ག་ཕེབས་དེར་འདེབས་ནས། །
ན་གེ་ནོག་གེའི་ཁ་འབོད་མང་། །
པ་ལགས་བཞིན་དུ་བོད་ཕྲུག་སྐྱོང་། །
ཕ་སའི་དོན་དུ་གང་ཐུབ་མཛད། །
མ་གཞི་དྲན་གསོ་དགོས་པར་མེད། །
བ་ཕྱུག་མིན་ན་ཤེས་གསལ་རེད། །
ཙ་ཙིག་ལྷ་འདྲེའི་མིང་ཁུར་ནས། །
ཚ་གཟེར་ཆེ་པའི་རྩོད་རྙོག་བསླང་། །
ཛ་དྲགས་ཆེ་བའི་རང་རིགས་ཆེད། །
ཝ་མོ་འདི་ཚོར་ལྷག་བསམ་དབེན། །
ཞྭ་ཆེན་ནག་པོ་མགོ་རུ་བརྐོན། །
ཟ་ཟིང་ཁོ་ནར་དོན་ཉེར་བྱ།
འ་ཅག་དོན་དུ་ཡིན་མདོག་མདོག །
ཡ་རབས་མིན་པར་ཀུན་གྱིས་ཤེས། །
ར་རོ་རུལ་པའི་དྲི་ངན་བཞིན །
ལ་དགུ་ལུང་བཅུ་ཁྱབ་པ་འདིས། །
ཤ་ཞེན་མེད་པའི་མི་འདི་ལྟར། །
ས་གཏིང་འདི་ན་དཀོན་པར་མངོན།།
ཧ་ལམ་ཧམ་བཤད་ཡིན་པའི་རྟགས། །
ཧ་ཅང་གསལ་གསལ་རྗེན་རྗེན་ཞིག །
ཨ་རིར་དམངས་ཁྲོད་ཁ་བརྡ་ལས། །
ཨ་ཉོག་དེ་ཚོས་བཤད་ཀྱིན་འདུག །
༢༠༡༤/༠༩/༡༨ཉིན།