འཇམ་གཅེས།
ཀ་རྩོམ་འབྲི་འདོད་མེད་ཀྱང་།།
ཁ་ནག་རེ་འགའི་སྙིང་དམར།།
ག་ལེར་སྤུ་གྲིའི་རྩེ་མོས།།
ང་ཡིས་ཐེངས་གཅིག་གཤག་འདོད།།
ཅ་ཅོའི་གཏམ་འཆལ་གད་སྙིགས།།
ཆ་རྒྱུས་མེད་པའི་ཁོར་ཡུག །
ཇ་རོ་བཞིན་དུ་སྤུངས་དུས།།
ཉ་རུལ་ལས་ཀྱང་བཙོག་པ།།
ཏཱ་ལའི་བླ་མའི་མང་གཙོ།།
ཐ་ཤལ་ཉུང་ཤས་སྙིང་ལ།།
ད་ལྟ་མདའ་མཚོན་སྣུན་འདྲའི།།
ན་ཟུག་ལྕི་དོན་གང་ཡིན།།
པ་ལོ་མགོ་ནས་བྲེགས་ཀྱང་།།
ཕ་རྟགས་འཛེམ་མེད་སྟོན་མཁན།།
བ་གླང་ལས་ཀྱང་བླུན་པའི།།
མ་རབས་སྤྱོད་ངན་ཤ་ཚ།།
ཙ་གེ་ཙིག་གེའི་ཐ་སྙད།།
ཚྭ་སྒོག་མཉམ་དུ་བསྲེས་ནས།།
ཛ་དྲག་ཡིན་མདོག་འཁྲབ་མཁན།།
ཝ་སྐྱེས་རྒྱལ་པོ་སྙིང་རྗེ།་
ཞྭ་གོས་མཛེས་ཚོན་ཡག་ཀྱང་།།
ཟ་ཟུར་ངན་དགུའི་སྤྱོད་ངན།།
འ་འུར་ངང་ནས་སྤེལ་དུས།།
ཡ་ངལ་ཡིད་མུག་སྐྱེས་སོང་།།
ར་བ་གངས་ལྗོངས་བདེ་སྡུག །
ལ་ལས་ལྷག་བསམ་གནང་རུང་།།
ཤ་རུས་ཁྲག་རྒྱུན་འདུ་ཤེས།།
ས་ཁུལ་འགའ་ནས་བོར་འདུག །
ཧ་ཅང་ཐལ་སྤྱོད་དེ་ཡིས།།
ཨ་མདོ་ཁམས་པ་དབུས་པ།།
ཧ་ལམ་དམག་གི་གཡུལ་སར།།
ཨ་ཧོ་ཞུགས་ལ་ཉེ་འདུག །
ང་ལ་ཡིད་ཆེས་མི་དགོས།།
གནས་ལུགས་ངོ་རྒོལ་མ་གནང་།།
རང་རང་རྣམ་དཔྱོད་ལམ་ནས།།
ཚིག་འདི་བདེན་མིན་དཔྱོད་མཛོད།།
ཀ་རྩོམ་སྤུ་གྲིའི་སོ་ཁ་ཞེས་པ་འདི་ནི་མདོ་ཁམས་འབྲི་ཀླུང་སྔོན་མོ་ལྷུང་ལྷུང་དུ་འབབ་པའི་གཡས་ཟུར་ཞིག་ནས་ལང་ཚོའི་འདབ་མ་ཡོངས་སུ་རྒྱས་ཤིང་། སྣ་ཚོགས་ཤེས་རིག་གི་ཟེའུ་འབྲུ་འཕགས་ཡུལ་ནས་སྨིན་པའི་སྨྱུག་འཛིན་པ་འཇམ་གཅེས་མིང་ཅན་གྱིས་བྱང་ཕྱོགས་དྷརྨ་ཤ་ལ་ནས་སྤྱི་ལོ་༢༠༡༥ཟླ་༡༠ཚེས༢༤ཉིན་གུང་ཟས་ཀྱི་ཞོར་དུ་བྲིས་པའོ།། །།