ཐུབ་བསྟན་རྒྱལ་མཚན།
གནའ་བོའི་ཕ་མེས་ཡབ་མེས་ནས་ཡང་ཡང་གོ་མྱོང་བའི་རྒྱ་གར་ཀ་ལི་སྤུངས་ནི་ཧ་ཅང་མཛེས་སྡུག་གིས་བཅིངས་པའི་ཁོར་ཡུག་ཅིག་རེད། ང་ལ་མཚོན་ན་ཆེས་ཐོག་མ་ཀ་སྤུངས་སུ་བསྐྱོད་པའི་ཉིན་མོ་ནི་༢༠༡༥་༡༡་༦ དགོང་མོ་ཏག་ཏག་ལ་ཁེལ་སོང་། དེའི་སང་ཉིན་ནས་དཔལ་ས་སྐྱའི་ཁྲི་ཐོག་ཞེ་གཅིག་པ་སྐྱབས་མགོན་༧གོང་མ་བདག་ཁྲི་རིན༌པོ་ཆེ་མཆོག་གིས་འཕགས་ཡུལ་གྲུབ་ཆེན་རྣམས་ནས་བརྒྱུད་པའི་ཆེ་བ་དུ་མའི་ལྡན་པའི་ཟབ་ཆོས་མན་ངག་དགུའི་ནང་གསེས་ལམ་སྐོར་ཕྱི་མ་བརྒྱད་ཀྱི་བཀའ་ཁྲིད་བསྩལ་རྒྱུ་ཡིན་པ་དང་། དུས་མཚུངས་འཁོན་གདུང་སྐུ་བགྲེས་རཏྣ་བཛྲ་རིན་པོ་ཆེ་མཆོག་གིས་གསང་སྔགས་རྡོ་རྗེ་ཐེག་པའི་ཆོས་ཀྱི་སྙིང་ཁུ་ཡབ་ཆོས་བླ་ན་མེད་པའི་གསུང་ངག་རིན་པོ་ཆེ་ལམ་འབྲས་ཚོགས་བཤད་ཆེན་མོ་ཤར་ནུབ་ཡུལ་གྲུ་གང་ས་ནས་ཕེབས་པའི་ཆོས་ཞུ་བ་སྟོང་ཚོ་གཅིག་ལྷག་ལ་བཀའ་དྲིན་སྩོལ་བཞིན་པ་བཅས་ཁེལ་བའི་དེ་རིང་གི་འགྲུལ་བཞུད་འདི་ནི་མི་ཚེ་ནང་ཆེས་རིན་ཐང་ཆེ་ཤོས་ཀྱི་འགྲུལ་བཞུད་ཅིག་ཡིན།
སྤྱིར་བཏང་ནས་བཤད་ན་ཀ་ལི་སྤུངས་ནི་བོད་ཀྱི་ཆོས་སྲིད་རིག་གནས་ཀྱི་བསྟི་གནས་ཤིག་ཡིན་ཞིང་། དུས་འགྱུར་མ་བྱུང་གོང་བོད་ཀྱི་གྲགས་ཅན་ཚོང་པ་དང་དཔོན་ཁག་མང་པོ་ཞིག་གིས་ཚོང་དུས་གནང་སའི་ས་ཚིགས་གལ་ཆེ་ཞིག་ཆགས་འདུག ད་ལན་ཁོ་བོས་གོ་སྐབས་གཟུང་ཏེ་སྔོན་མའི་ལོ་རྒྱུས་མང་པོ་ཞིག་ལ་འཚོལ་ཞིབ་དང་དྲི་བ་བྱས་པས་བོད་ཀྱི་གནད་ཡོད་མི་སྣ་མང་པོ་ཞིག་གི་ལོ་རྒྱུས་དང་རྗེས་ཤུལ་ཁང་མིག་སོགས་ལ་ལྟ་རྒྱུ་བྱུང་། ད་དུང་དེའི་ཁོངས་ནས་ཚོར་སྣང་ཟབ་ཤོས་ཤིག་ནི་བགྲེས་སོང་ཁག་གཅིག་གིས་མིད་པ་མཆིལ་མས་རྣོང་བཞིན་དུ་ལྐོག་ལྐོག་སུད་སུད་ཀྱིས་ངོ་སྤྲོད་གནང་འོང་ཡ་གཅིག་ནི་སྨར་ཁམས་སྤང་མདའ་ཚང་གི་སྐོར་རེད།
དུས་རབས་ཉི་ཤུའི་མགོ་སྟོད་དུ་སྤང་མདའ་ཚང་ནི་རྟ་དྲེལ་བརྒྱ་ཕྲག་མང་པོ་དེད་ནས་སྨད་དར་མདོ་དང་རྒྱ་ནག་གི་རྒྱལ་ས་པེ་ཅིང་ནས་ཤར་རྒྱ་གར་ཀ་ལི་སྤུངས་ཚུན་ཆད་བར་དར་གོས་འགྲུལ་ལམ་རིང་མོའི་ཚོང་ལས་གཉེར་ནས་ཧ་ཅང་སྐད་གྲགས་ཆེ་བའི་ཚོང་པའི་ཁྱིམ་ཚང་ཞིག་ཡིན། བརྒྱ་ཕྲག་ཉི་ཤུའི་དཀྱིལ་ཙམ་ནས་རིམ་བཞི་དང་ནང་སོ་མཛོད་པ་ཡུལ་དམག་གི་རུ་དཔོན་སོགས་ཀྱི་གོ་གནས་སྣ་མང་བཞེས་ནས། སོག་སྡེ་དཔོན་འགོ་བཅོ་བརྒྱད་ཀྱི་གྲས་སུ་བཞུགས་པ་དང་སྡེ་པ་གཞུང་གི་སྐུ་ཚབ་ཀྱི་འགན་ཁུར་ཐོག་གྲུ་མོ་སྤྱི་ཁྱབ་སོགས་གནང་ནས་ཚོང་པའི་ལས་དོན་ཙམ་མ་ཟད་ས་སྐྱ་དང་དགའ་ལྡན་ཕོ་བྲང་སྲིད་གཞུང་གཉིས་ཀྱི་གོ་གནས་རིམ་པ་ཡོད་པའི་དཔོན་ཚང་ཞིག་ཏུ་གྱུར། མ་ཟད་༧གོང་ས་སྐུ་ཕྲེང་བཅུ་གསུམ་པ་ཀྱང་ཐུགས་བློའི་རྗེན་འགེལ་གནང་སའི་སྤྱན་གསལ་གྱི་མི་སྣ་ཞིག་ཏུ་ཆགས་འདུག།
སྤང་མདའ་ཞེས་པ་ནི་གནས་མིང་ཁྱིམ་ཚང་ལ་ཐོགས་པའི་དུད་ཚང་ཞིག་ཡིན་ཅིང་ཁྱིམ་འདིར་བུ་ཆེ་བ་སྤང་མདའ་ཡར་འཕེལ་དང་། འབྲིང་བ་སྤང་མདའ་སྟོབས་རྒྱས། ཆུང་བ་སྤང་མདའ་རབ་དགའ་བཅས་བུ་སྤུན་གསུམ་འདུག བུ་རྒན་པ་གཉིས་ནི་སྦྱང་སྟོབས་ཀྱི་སློབ་སྦྱོང་ལ་དེ་ཙམ་གོ་ཚོར་མེད་ཀྱང་སྐྱེས་སྟོབས་ཀྱི་རྣམ་དཔྱོད་དང་ཀླད་པ་ནི་ཧ་ཅང་ཚད་མཐོན་པོ་ཡིན་ཞིང་ཉེ་རབས་ལོ་རྒྱུས་སྨྲ་བ་དང་གནད་ཡོད་མི་སྣ་མང་པོས་ཁོང་གཉིས་ལ་བསྔགས་བརྗོད་གནང་བ་མ་ཟད་༧གོང་ས་མཆོག་གིས་ཀྱང་སྔ་ཕྱིར་བསྔགས་བརྗོད་མཛད་འདུག །
བུ་ཆུང་བ་རབ་དགའ་ནི་བོད་རང་གི་རིག་གཞུང་དང་ནང་ཆོས་ལ་མཁས་པ་ཆེན་པོ་ཡིན་འདུག་པ་མ་ཟད་། རྒྱ་སྐད་དང་ཆབ་སྲིད་ཀྱི་ཐོག་ནས་ཧ་ཅང་མཁྱེན་པ་རྒྱས་པའི་ཕུལ་བྱུང་གི་མི་སྣ་ཞིག་རེད་འགི ཁོང་གིས་རྒྱ་སྐད་ནས་བོད་བསྒྱུར་ཞུས་པའི་དེབ་གཅིག་ཀྱང་ཡོད་ཚོད་གདའ། སྤང་མདའ་ཡར་འཕེལ་དང་རབ་དགའ་གཉིས་ཐོག་མའི་ཆར་སྐྱབས་བཅོལ་ཕེབས་ནས་ཀ་སྤུངས་སུ་གནས་གཞིས་བཟུང་ནས་བཞུགས་ཡོད་པ་དང་རང་གཞུང་གིས་ཛ་སག་གི་གོ་གནས་ཤིག་ཀྱང་གསོལ་སྩལ་གནང་ཡོད་ཚོད་འདུག ཁོང་ཚང་གིས་དུས་འགྱུར་སྐབས་བཙན་བྱོལ་དུ་ཕེབས་པའི་རང་ཁོངས་ཀྱི་མི་མང་རྣམས་སྡོད་གནས་ཀྱི་གཞིས་སྒར་ཞིག་དང་རང་ལུགས་ཆོས་བརྒྱུད་ཀྱི་རྟེན་གཞི་དགོན་པ་བཅས་གསར་བཞེངས་གནང་སའི་ཀ་ལི་སྤུངས་ས་གནས་ཡུལ་མིའི་ལག་ནས་ས་ཆ་མང་པོ་ཞིག་སྤུས་གཟིགས་གནང་ནས་དབུ་འོག་དཔུང་འདེབས་ཀྱི་གྲ་སྒྲིག་གནང་འདུག།
ལོ་རབས་དྲུག་ཅུའི་ནང་སྤང་མདའ་ཡར་འཕེལ་དང་མ་ནང་ཨ་བུ་པདྨ་ཚེ་དབང་། སྨར་ཁམས་ཐོས་བསམ་འབྲེལ་ཡོད་སྐུ་དྲག་ཁག་གཅིག་མཉམ་འདུས་ཀྱིས་བོད་མི་རིགས་ཀྱི་ལས་དབང་དང་བདེ་དོན་ཁོ་ན་ལ་དམིགས་ནས་ལས་འགུལ་ཁ་ཤས་ཀྱི་རྨང་གཞི་བཏིང་འདུག་ཀྱང་སྒེ་གནད་ཁོག་བཟུང་གིས་ལས་དོན་ཡོངས་རྫོགས་འགྲེལ་ལོག་དང་མ་ཉེས་ཁག་གཡོགས་གནང་ནས་མཐར་བོད་པ་བོད་པས་བརྡུངས་ནས་དྲང་པོ་དང་བདེན་པ་ཡོད་ཚད་ཞུ་སའི་དཔོན་མེད། སྐྱབས་སའི་མགོན་མེད། མཐར་ཀ་སྤུངས་སུ་གནས་མ་ཐུབ་པའི་དཀའ་ངལ་དང་གནོད་ཤུགས་འོག་ནས་ལས་དོན་ཡོངས་རྫོགས་མཇུག་སྒྲིལ་དགོས་བྱུང་འདུག
གནོན་ཤུགས་དང་དཀའ་ངལ་འདིའི་བྱུང་དོན་གཙོ་བོ་ནི།
༡༽ དུས་འགྱུར་མ་བྱུང་གོང་ནས་སྤང་མདའ་ཚང་ནི་བོད་སྡེ་པ་གཞུང་གི་ཆེས་མཐོ་མི་སྣ་གྲས་ཡིན་པ་མ་ཟད་ཆབ་དཔལ་རིག་གསུམ་གང་ཐད་ནས་རྩ་བ་ཚུགས་ཤིང་རྩེ་མོ་རྒྱས་པས་ཕྲག་དོག་གིས་མི་སྣ་མང་པོ་ཞིག་གི་མིག་ལ་མ་བབས་པ་དང་།
༢༽༧གོང་ས་བཅུ་གསུམ་པའི་སྤྱན་གསལ་དང་ཐུགས་འགེལ་གནང་སའི་མི་སྣ་གལ་ཆེ་ཞིག་ཡིན་པ་དང་། ཁམས་ཕྱོགས་སུ་ནང་སོ་མཛོད་པ་དང་རུ་དཔོན་གྱི་གོ་གནས་ཡོད་ཙང་ཉེ་སྐོར་གྱི་དཔོན་མིང་ཡོད་པ་རེ་གཉིས་ཀྱིས་ཁོ་དང་ཁོའི་མི་མང་ལ་དབང་ཡོད་དང་ཐུགས་རྩོད་གནང་སའི་གོ་སྐབས་མ་རགས་པའི་སྒེ་ནད་བྱུང་བ།
༣༽ བོད་ས་ཤོར་ལ་ཉེ་སྐབས་སྡེ་པ་གཞུང་གི་གསེར་དངུལ་མང་པོ་ཞིག་འབྲས་ལྗོངས་བར་སྐྱེལ་འདྲེན་གྱི་ལས་འགན་བཞེས་ཡོད་པ་དང་། ས་ཤོར་རྗེས་མི་སྣ་ལ་ལས་ངན་པ་ལག་སྦྲེལ་གྱིས་གསེར་དངུལ་དེ་དག་ཟ་འདོད་ཧམ་བཤད་བྱས་ཙང་སྤང་མདའ་ཡར་འཕེལ་གྱིས་གསེར་དངུལ་ནི་བོད་མི་སྤྱི་མཐུན་གྱི་རྒྱུ་རྫས་ཡིན་སྟབས་མི་རེ་གཉིས་ལ་ཁ་གསལ་མེད་པའི་རྩིས་སྤྲོད་ཞུ་ཐབས་མེད་སྐོར་གསུངས་ཏེ་དང་ལེན་མ་བྱས་པས་གནད་ཡོད་མི་སྣ་མང་པོ་ཞིག་ཁ་སྐྱེངས་ཙང་སྒེར་ནད་ཇི་ཆེར་གྱུར་ཡོད།
གོང་གསལ་གནས་ཚུལ་འདི་གསུམ་གཙོར་བཟུང་གིས་དངོས་ཤུགས་བརྒྱུད་གསུམ་ནས་མི་མང་ནང་ཁུལ་ལ་སྤང་མདའ་དང་སྤང་མདའི་འབྲེལ་ཡོད་ཡོངས་རྫོགས་རྩ་མེད་བཟོ་མ་ཐུབ་ཚེ་ཁོང་ཚོས་༧གོང་ས་ཆེན་པོ་སྐུ་དབང་ལ་ཐེ་བྱུས་གནང་གིན་ཡོད་པ། བོད་སྡེ་པ་གཞུང་གི་གསེར་དངུལ་ཚང་མ་སྒེར་ཟས་གནང་གིན་ཡོད་པ། དེ་དག་ངེས་པར་དུ་ཚུར་འཕྲོག་ནས་མི་མང་བདེ་རྩའི་ཆེད་ལྕག་གི་བཟོ་གྲྭ་འཛུགས་དགོས་པ། རྒྱ་དམར་ནག་གཉིས་ལ་ངན་པ་ལག་སྦྲེལ་གྱི་འབྲེལ་བ་ཡོད་པ་སོགས་དཀྲོག་གཏམ་སྤེལ་ཏེ་མཚན་རྟགས་བསྡུ་རུབ་སོགས་ཀྱང་གནང་ཡོད་ཚོད་འདུག
གནས་ཚུལ་དེ་དག་གི་རྐྱེན་པས་སྤང་མདའ་ཡར་འཕེལ་ཀ་སྤུངས་ལ་སྡོད་ཐབས་ཡོངས་སུ་ཟད་ནས་མཐར་བོད་དུ་ལོག་དགོས་བྱུང་བ་དང་། སྤང་མདའ་རབ་དགའ་ལ་ཀ་སྤུངས་ལྷམ་ཚོང་ཁང་ཞིག་ནས་ལྐོག་མདའ་བརྒྱབ་ནས་གསོད་གྲབས་བྱས་ཡོད་ཀྱང་མེ་མདའ་ཁོང་ལ་མ་ཕོག་ནས་ཚོང་བདག་གི་སྐྱེས་དམན་གྱི་རྐང་པར་ཕོག་ཤོར་འདུག མེ་མདའ་རྒྱག་མཁན་ནི་ཆེད་གཏོང་གནང་བའི་བོད་པ་ཞིག་ཡིན་པ་མ་ཟད་དམག་ཟུར་ཞིག་ཀྱང་ཡིན་འདུག ཁོང་གིས་སྤང་མདའ་རབ་དགའ་གསོད་ཆེད་ཉིན་མང་རྗེས་འདེད་བྱས་ཀྱང་མེ་མདའ་གཏན་ནས་རྒྱག་མ་ཐུབ་པས་མི་དེ་ནི་སྤྱིར་བཏང་ཞིག་རེད་མི་འདུག་ཟེར་བ་སོགས་བཤད་རབས་འདུག
གནས་ཚུལ་དེ་དག་གི་དབར་ན་སྤང་མདའ་དབང་མོ་༧གོང་ས་མཆོག་ལ་མཇལ་ཁ་ཞིག་ཐོབ་ཡོད་པས། དེ་ཡང་དཔེ་མེད་ཚབས་ཆེ་ཡིན་པས་མཇལ་ཁ་གཏོང་མཁན་མི་དེའི་སྐེར་ཐག་པ་བཏགས་ནས་ཕོ་བྲང་ཕྱི་རུ་དྲུད་ཀྱི་ཡིན་ཞེས་འུར་སྒྲ་ལང་ཡོད་འདུག སྐབས་དེ་ཤེད་དུ་སྤང་མདའ་དང་འབྲེལ་ཡོད་ཡོངས་ལ་དཀའ་ངལ་གཅིག་རྗེས་གཉིས་མཐུད་ཡོང་སྟབས་ལུང་ཚན་གཅིག་པའི་མི་སྣ་མི་ཉུང་བ་ཞིག་ལུང་ཚན་མིང་བསྒྱུར་བྱེད་དགོས་ཁེལ་འདུག
མདོར་ན་བརྒྱ་ཕྲག་ཉི་ཤུའི་ནང་ས་སྤང་མདའ་གནམ་སྤང་མདའ་ཞེས་པའི་གྲགས་སྙན་ཆེ་བ། ཆབ་དཔལ་རིག་གསུམ་ལ་མཁྱེན་དཔྱོད་ཡངས་པ། རྣམ་དཀར་གྱི་བགྱི་བ་ལ་མོས་པ་དང་དད་ཞེན་ཆེ་བའི་བསྟན་པ་མཆོད་སྦྱིན་གྱི་སྦྱིན་བདག་ཆེན་པོ། དགྲ་བོར་བློ་མི་ཞུམ་པའི་དཔལ་འཛངས་གཉིས་ལྡན་སྤང་མདའ་ཚང་། ཁྱེད་སྤུན་གསུམ་པོར་འདི་ལྟར་ཉེས་མེད་ནག་གཡོག་གི་འོག་ནས་ཁྱིམ་ཚང་འདིའི་ཡོད་ཚད་མཇུག་བསྡོམས་རྒྱག་དགོས་བྱུང་བ་དེ་བསམ་བློ་ཇི་ཙམ་བཏང་ཡང་གྱོང་རྒུད་དང་བློ་ཕམ་གྱི་རང་བཞིན་ཞིག་ལོས་ཡིན།
ད་ནི་ཆེས་མཐའ་མཇུག་གི་སྤང་མདའ་ནི་ད་ལྟ་མིག་སྔ་ནས་མཐོང་བཞིན་པའི་ཀ་ལི་སྤུངས་ཡོད་པའི་སྤང་མདའ་སྒོ་མཛོད་ཟེར་བའི་ལྕག་ལེབ་ཁང་པ་ཁ་ཤས་དང་རི་ངོགས་སུ་སྤང་མདའ་ས་ཆ་ཟེར་བ་ས་ཁྱོན་ཆེ་ཙམ་ཁ་ཤས་མཇལ་རྒྱུ་འདུག་ཀྱང་། ས་གནས་ཡུལ་མི་དང་བོད་པ་གཉིས་ཀས་མ་བདག་བདག་བཟུང་གནང་ནས་དེ་དག་ཀྱང་མིག་སྔ་ནས་དྲན་གསོ་སློང་བྱེད་ཙམ་ལས་ཅི་ཡང་མི་འདུག
ཐུབ་བསྟན་རྒྱལ་མཚན་གྱིས་ཀ་སྤུངས་ནས། ༢༠༡༥ ། ༡༡ ། ༡༧
ཡག་པོ་ཞིག་བྲིས་གནང་འདུག་ སྙན་པོ་བྱུང་ ཐུགས་རྗེ་ཆེ།་་ དེ་འདྲ་བྲིས་ཐུབ་མཁན་ ཨ་རླུངས་ཚང་དང་ ཨེ་རླུངས་ཚང་ ནོར་རླུངས་ཚང་ལ་ཡོ་མ་རེད་ ཡིན་ནའི་ལོ་རྒྱུད་ཀྱི་དེབ་ཁ་ཤས་ནང་སྤོམས་མདའ་ཨ་ཕོ་རབས་དགའ་ལ་རྒྱ་གོ་མིན་ཏང་དང་འབྲེལ་བ་ཡོད་པའི་སྐོར་བྲིས་འདུག་ གང་ལྟར་མི་ཚང་དེ་བོད་པའི་མི་ཚང་ཕུལ་དུ་བྱུང་བ་ཞིག་བྱུང་འདུག་
དམིགས་བསལ་ཨེ་རླུངས་ཚང་ལ་ལྟ་བཟོ་གང་ཡང་མེད་པ་འགྱུར་འདུག།གནས་ཚུལ་རྙིང་བསྐྱར་ཟློད་ཡང་ཟློད་བྱེད་ནས་རྒྱང་སྲེང་བྱས་པ་དང་བོད་མིའི་སྒྲིག་འཛུགས་ཀྱི་གནས་ཚུལ་བརྐུས་ནས་བཏང་བ་ལས་གཞན་ཅང་མིནའདུག།་རླུངས་འཕྲིན་ལས་ཁུངས་གཞན་གཉིས་ཕྲན་བུ་མི་ལེགས་སམ་པ་ལས་ཧ་ཅང་ཁྱེད་པར་ཆེན་པོ་མ་མཐོང།
་་་་་་་་་་་ ལོ་རབས་དྲུག་ཅུའི་ནང་སྤང་མདའ་ཡར་འཕེལ་དང་མ་ནང་ཨ་བུ་པདྨ་ཚེ་དབང་། སྨར་ཁམས་ཐོས་བསམ་འབྲེལ་ཡོད་སྐུ་དྲག་ཁག་གཅིག་མཉམ་འདུས་ཀྱིས་བོད་མི་རིགས་ཀྱི་ལས་དབང་དང་བདེ་དོན་ཁོ་ན་ལ་དམིགས་ནས་ལས་འགུལ་ཁ་ཤས་ཀྱི་རྨང་གཞི་བཏིང་འདུག་ཀྱང་སྒེ་གནད་ཁོག་བཟུང་གིས་ལས་དོན་ཡོངས་རྫོགས་འགྲེལ་ལོག་དང་མ་ཉེས་ཁག་གཡོགས་གནང་ནས་མཐར་བོད་པ་བོད་པས་བརྡུངས་ནས་དྲང་པོ་དང་བདེན་པ་ཡོད་ཚད་ཞུ་སའི་དཔོན་མེད། སྐྱབས་སའི་མགོན་མེད། མཐར་ཀ་སྤུངས་སུ་གནས་མ་ཐུབ་པའི་དཀའ་ངལ་དང་གནོད་ཤུགས་འོག་ནས་ལས་དོན་ཡོངས་རྫོགས་མཇུག་སྒྲིལ་དགོས་བྱུང་འདུག ་་་་་
རྩོམ་ཡིག་གི་མགོ་བཙུགས་སྟངས་ཡག་པོ་འདུག དོན་དངོས་ཡོད་ཀྱི་ལོ་རྒྱུས་གཞིར་བཞག་ནས་གླེང་ཡོང་གིན་འདུག ཡིན་ན་ཡང་མཇུག་བསྡུ་སྟངས་ཚོར་བ་གཙོ་བོར་བཟུང་ནས་བསྡུས་སོང་སྟབས་དེ་ཙམ་ཡག་པོ་བྱུང་མ་སོང་། ལྷག་པར་ཡང་ཕང་ཚུལ་དང་གྱོང་ཚུལ་སོགས་མང་པོ་བྲིས་ཡོང་དུས་རྩོམ་པ་པོ་རང་གི་ཚོར་བ་གསལ་སྟོན་བྱས་པ་ཡིན་སྟབས་མིའི་ཡིད་ཆེས་དེ་ཙམ་བྱེད་གི་མ་རེད། མི་སྣའི་ལོ་རྒྱུས་དྲང་པོ་བྱས་ནས་ངོ་སྤྲོད་བྱས་ན་མི་སྣ་དེ་ག་འདྲ་ཞིག་ཡིན་མིན་ཀློག་པ་པོས་རིན་ཐང་གཅོད་གི་རེད།