འཁྱམས་པོ། ས་གནས་ཡོ་རོབ་གླིང་།
ཀ་ཁའི་མགོ་སྔ་མི་སློབ་གངས་ཅན་པ།།
ཁ་འདོན་དགེ་སྒྲུབ་ཁོ་ནར་མགོ་འཁོར་ནས།།
ག་རེ་བྱུང་ཡང་ལྷ་ཡིས་ལུང་བསྟན་ཞེས།།
ང་ཚོས་རྩ་དོན་སྲུང་མའི་ལས་ལ་བཅོལ།།
ཅ་ལག་ཇི་ཡོད་མཆོད་ཁང་ཕུགས་སུ་བསྟིམས།།
ཆ་ཡོད་ཆ་མེད་ཀུན་ལ་ལྷ་གདོན་འགྲེལ།།
ཇ་ཆང་གསོལ་ཁས་འབྱུང་པོ་དྲི་ཟ་མཆོད།།
ཉ་ལུ་ཉུལ་ལེས་ཐམས་ཅད་རྗེས་སུ་ལུས།།
ཏ་ལེན་རྐུབ་ནས་འབྲོག་པའིི་མི་ཚེ་ཟད།།
ཐ་རྡུལ་ཁྲོད་དུ་རོང་པའི་ལང་ཚོ་འཐིམ།།
ད་དུང་སྐྱོབས་པའི་ལྷ་ལ་གསོལ་བ་བཏབས།།
ན་ཚ་མི་ཡོང་རེ་བ་སྔར་བཞིན་བརྒྱབ།།
པཱ་ལགས་རྒས་ནས་རུས་ཀོང་འཐོར་ལ་ཁད།།
ཕ་རབས་ཚ་རྒྱུད་འདི་ལྟར་རྫོགས་ལ་ཉེ།།
བ་གླང་སྐྱོང་པའི་དུས་རབས་མཐར་སླེབས་ཀྱང་།།
མ་མཐོང་བོད་པའི་མི་ཚེ་གཉིད་དུ་ཡུར།།
ཙ་ཏུར་དགེ་སྦྱོང་འགའ་རེས་དམར་ཟུམ་ཟུམ།།
ཚ་གྲང་དཀའ་བ་སྤྱད་ཞེས་མགོ་མཐོ་མཐོ།
ཛ་ལུང་རི་ཁྲོད་འགྲིམས་ཞེས་ཁ་ཆེ་ཆེ།།
ཝ་ཡེ་བླ་སྤྲུལ་འདི་ཚོར་འཁོར་མང་མང་།།
ཞ་སེར་བསྟན་པ་སྐྱོང་པས་གྲྭ་ཆས་གྱོན།།
ཟ་མ་མཛེས་མ་མཐོང་ནས་འགྲམ་ཆུ་ལྡིང་།།
འ་རོ་ཀུ་རེ་ཡིན་ཞེས་ཆགས་སྲེད་གླེང་།།
ཡ་མཚར་ད་དུང་བོད་པའི་གྲྭ་པར་འབོད།།
ར་ལུག་རི་ནས་དེད་དེ་རྒྱ་ལ་བཙོང་།།
ལ་ལུང་རྐམ་ཉོ་རྒྱ་དང་ཁ་ཆེས་གང་།།
ཤ་བ་རི་སྐྱེས་ཡོད་ཚད་གཞན་ལ་བརྫངས།།
ས་འོགས་ས་བླའི་གཏེར་ཁའང་རྒྱ་ཡིས་ཁྱེར།།
ཧ་ཅང་དྲང་པོའི་གཏམ་གྱི་ཕྲེང་པ་འདིས།།
ཧ་ལམ་འགའ་རེའི་ཐུགས་ལ་ཕོགས་སྲིད་མོད།།
ཨ་མྱེས་འདས་པོ་ཚོ་ཡི་ཁ་ཆེམས་ལ།།
ཨ་མཚར་བརྩེས་ནས་སྡོད་ཁོམས་ང་ལ་མེད།།
༢༠༡༣/༥/༢༨ལ་བྲིས།
ཞ་སེར་བསྟན་པ་སྐྱོང་པས་གྲྭ་ཆས་གྱོན།།
ཟ་མ་མཛེས་མ་མཐོང་ནས་འགྲམ་ཆུ་ལྡིང་།།
འ་རོ་ཀུ་རེ་ཡིན་ཞེས་ཆགས་སྲེད་གླེང་།།
ཡ་མཚར་ད་དུང་བོད་པའི་གྲྭ་པར་འབོད།། ་་་་་ཟེར།
ཀ་བ་ལྟ་བུའི་རང་སེམས་དྲང་པོ་ཞིག །
ཁ་ཙམ་མ་ཡིན་བདེན་པར་ཡོད་ན་ནི། །
ག་ཙམ་ཞིག་ཀྱང་སྨྲ་བས་དོན་གྲུབ་ཅིང་། །
ང་ཁྱོད་་ཁོ་ཞེས་དྲག་རྩོད་བདེ་ཐབས་མིན། །
ཅ་ཅོ་ཉིང་མེད་སྒྲ་ལ་ཀུན་ཕྱོགས་ནས། །
ཆ་ལུགས་མི་མཛེས་ལུགས་སྲོལ་དར་ཆེས་ན། །
ཇ་རོ་བག་རོ་སྙིགས་མས་དུག་འདྲེན་པས། །
ཉ་མོ་རིན་ཆེན་རང་སྲོག་བསྐུར་དང་འདྲ། །
ཏ་ལའི་ལོ་མར་བྲིས་པའི་བསྟན་བཅོས་རྣམས། །
ཐ་ན་གཡོག་མོ་ཡིན་ཀྱང་འབད་བརྩོན་བགྱིས། །
ད་ནི་དམ་ཆོས་བཤེས་གཉེན་མ་བསྟེན་ན། །
ན་ནས་འཆི་ལ་ཉེ་དུས་ཕན་པ་ཟད། །