ཀོ་ལི་གྷལ་དོན་ལྡན་གླིང་གཞིས་ཆགས་བཙུགས་ནས་ལོ་ལྔ་བཅུ་འཁོར་བའི་དུས་དྲན་སྲུང་བརྩི་འདི་ལོ་ ༢༠༢༤/༠༢/༡༧ ནས་ཚེས་༢༠ བར་ཉིན་བཞི་རིང་སྲུང་བརྩི་དང་འབྲེལ་བའི་མི་ལོ་ལྔ་བཅུའི་བཞུད་ལམ་ལ་ཕྱི་མིག་བལྟ་བ།

གཞུང་པ་ཚེ་དབང་བསོད་ནམས།

བོད་རྒྱལ་ཁབ་དང་བོད་མི་རིགས་ཀྱི་བླ་ན་མེད་པའི་དབུ་ཁྲིད ༧ སྤྱི་ནོར་༧ གོང་ས་༧ སྐྱབས་མགོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཐུགས་སྐྱེད་སྨོན་ལམ་དང་རླབས་ཆེན་གྱིས་མཛད་འཕྲིན་འོག་རྒྱ་གར་དབུས་གཞུང་ནང་སྲིད་ལས་ཁུངས་དང་དབུས་བོད་མིའི་སྒྲིག་འཛུགས་སྤྱི་ཁྱབ་ནང་སྲིད་ལྷན་ཁང་གཉིས་ཀྱིས་ལམ་སྟོན་འོག་སྤྱི་ལོ་ ༡༩༧༥ སྤྱི་ཟླ་གསུམ་པའི་ནང་ཀུ་ལུ་མ་ན་ལི་ལམ་བཟོའི་སྒྲིག་འཛུགས་ནས་མི་གྲངས་གཅིག་སྟོང་ཀོ་ལི་གྷལ་གཞིས་ཆགས་སུ་གཏོང་རྒྱུའི་མཐོ་གཞུང་ནང་སྐབས་དེའི་ང་པ་བརྒྱ་ཤོག་གམ་གཞུང་པ་བརྒྱ་ཤོག་ཚུད་ནས་ཕྲན་ང་པ་བརྒྱ་ཤོག་གི་བརྒྱ་དཔོན་གཞུང་པ་ཚེ་དབང་བསོད་ནམས་ཀྱིས་འགོ་ཁྲིད་འོག་མི་གྲངས་ ༡༦༦ བཅས་གཞིས་ཆགས་འདིར་འབྱོར་བ་ཡིན། ང་ཚོའི་སྔོན་ལ་འབྲས་ལྗོངས་སྒང་ཏོག་ཁུལ་ནས་མི་གྲངས་ལྔ་བརྒྱ་ ༡༩༧༤ ལོར་འབྱོར་འདུག ང་ཚོ་གཞིས་ཆགས་སུ་འབྱོར་སྐབས་མཚན་ལ་འབྱོར་བ་དང་སང་སྔ་དྲོ་ཡར་ལངས་ནས་ས་ཆའི་གནས་བབ་ག་འདྲ་ཡོད་བལྟ་སྐབས་གཞིས་ཆགས་ཀྱི་ཉེ་འཁོར་ནགས་རི་དང་སྤང་རི་སོགས་ཀྱིས་སྐོར་བ། ས་ཆ་བསིལ་གྲང་སྙོམས་པོ་བོད་ས་མཐོ་ས་ནས་ཡོང་བའི་བོད་མི་སྡོད་ས་རང་རེད་འདུག། རི་ཕག་དང། གླང་ཆེན། ཤ་བ། རྨ་བྱ་། རི་གི་མ་ཧེ། བདག་མེད་སྲོག་ཆགས་དང་བྱ་བྱེའུ་སོགས་ཤིང་ནགས་ལ་སྟེན་པའི་སྲོག་ཆགས་མང་པོ་མཐོང་རྒྱུ་འདུག། ང་ཚོ་གཞིས་ཆགས་སུ་འབྱོར་སྐབས་གཞིས་འགོ་གོ་འཇོ་ཨ་ནག་དཔོན་སྐུ་ངོ་རྡོ་རྗེ་རྣམ་རྒྱལ་ལགས་དང་། མཉམ་དྲུང་ཏྲེ་ཧོར་སྐུ་ངོ་ཐུབ་བསྟན་ཕུན་ཚོགས་ལགས་རེད་འདུག འཕྲུལ་རྨོས་དང་བཟོ་བཅོས་སྡེ་ཚན། ༼ workshop ༽ གྱི་འགན་འཛིན་ཆབ་མདོ་བྱམས་པ་རྣམ་རྒྱལ་དང་། འཕྲུལ་རྨོས་སྡེ་ཚན། ༼ Tractor section ༽ གྱི་འགན་འཛིན་སྡེ་དགེ་སྐུ་ཚ་ཚང་བློ་གྲོས་རྣམ་རྒྱལ་རེད་འདུག ང་ཚོ་ཀུ་ལུ་ལམ་བཟོ་ནས་འབྱོར་བའི་བརྒྱ་དཔོན་ཚོ་མ་ར་ཌ་༼ MYRADA ༽ རོགས་ཚོགས་ཀྱི་གཙོ་འཛིན་ ༼ Director. W.William Devonson ༽ མཆོག་ནས་བརྒྱ་དཔོན་རེ་རེ་བཞིན་སྐད་ཆ་དྲིས་སོང་། སྐབས་དེ་དུས་ང་རང་ལོ་ཉེ་ཤུ་རྩ་དྲུག་ཡིན། མ་ར་ཌ་རོགས་ཚོགས་ཀྱི་གཉེར་པའི་ལས་རོགས་ལ་བཞག་བྱུང། ༼ Assistant of Store keeper ༽ ཟླ་ཕོགས་སྒོར་དྲུག་བཅུ་འདུག་ལས་འགན་ནི་མི་མང་མཉམ་ལས་སྐབས་ལག་ཆ་སྤྲོད་རྒྱུ་དང་འཕྲུལ་ཆས་ལ་སྣུམ་སྤྲོད་རྒྱུ་དང་ཆུ་འཐེན་ཡོ་ཆས་སྤ་ཡེབ་སོགས་དོ་ཁང་ནང་གི་བཅའ་དངོས་ཆ་ཚང་བྱུང་སོང་ལྷག་གི་རྩིས་ཁྲ་ཉར་རྒྱུ་སོགས་རེད། གཞིས་ཆགས་འདིར་འཐུང་ཆུའི་དཀའ་ངལ་ཆེ་ཙམ་འདུག ཡུལ་མིའི་གནས་སྟངས་འབྱོར་མེད་གྲལ་རིམ་ནང་ལྷག་ནས་ཉིན་ལྟོ་ཉིན་ཚོལ་བྱས་ནས་ལས་ངལ་རྩོལ་ལ་བསྟེན་ནས་འཚོ་བ་སྐྱེལ་མཁན་མང་ཆེ་བ་རེད་འདུག ཡུལ་མི་ཚོའི་གླང་བཏང་ནས་ཞིང་ས་རྨོས་རྒྱབ་ནས་སྟོན་འབྲས་མོན་ཆག་གམ་ ༼ Ragi ༽ བཏབ་ཀྱིས་འདུག་ལ་ བོད་པ་འབྱོར་ནས་ཡུལ་མིའི་འཚོ་བ་ལ་འགྱུར་བ་ཆེན་པོ་ཐེབས་ནས་དེང་སང་ས་ཞིང་སྟོན་ཐོག་འདེབས་ལས་སྐབས་མ་གཏོགས་ཀྲག་ཀྲར་༼ Tractor ༽ གྱི་ས་ཞིང་རྨོས་སློག་བྱེད་ཀྱི་འདུག་ལ་སྟོན་འབྲས་ཡང་བོད་པ་ནང་བཞིན་ཨ་ཤོམ་ ༼ Maize ༽ འདེབས་ལས་བྱེད་ཀྱི་འདུག ཡུལ་མི་མང་ཆེ་བས་ཁོ་རང་ཚོའི་ཡུལ་སྐད་ཀར་ན་ཊ་ཀའི་སྐད་ཀ་ན་ར་ལས་ཧིན་སྐད་ཤེས་མཁན་ཉུང་ཉུང་རེད་འདུག་ལ་ ཐོག་མ་ཟླ་བ་གཅིག་ཙམ་རིང་ཡུལ་མི་དང་སྐད་བརྡ་མ་འཕྲོད་པའི་དཀའ་ངལ་ཆེ་ཙམ་བྱུང་ཡང་དེ་ནས་ཡུལ་ཆུ་བཏུང་ན་ཡུལ་སྐད་ཤེས་ཟེར་བའི་དཔེ་ལྟར་དཀའ་ངལ་གང་ཡང་འཕྲད་མ་སོང་། གཞིས་ཆགས་གསར་འཛུགས་ཀྱི་ལས་གཞི་འགྲོ་བཞིན་པ་རེད་འདུག གཞིས་མིའི་སྡོད་ཁང་མ་འགྲུབ་བར་ང་ཚོ་སྨྱུག་ཁང་ནང་བཞག་ནས་སྐྱོབས་གསོ་བྲོ་ཆག་དང་། འོ་རྩམ། སྣུམ། རྩམ་པ་སེར་པོ་སོགས་གནང་བ་དང་མི་མང་མཉམ་ལས་རྒྱུགས་ནས་ཆུ་འདྲེན་སྤ་ཡབ་བླུག་སའི་ས་བྲུ་རྒྱུ་དང་ལམ་གྱི་གཡས་གཡོན་ལ་ཆུ་ཡུར་བྲུ་རྒྱུ་སོགས་མཉམ་ལས་རྒྱུགས་སྐབས་ཉིན་གླ་མི་རེར་སྒོར་རེ་གནང་གི་འདུག མི་མང་མཉམ་ལས་རྒྱུགས་ནས་ཨ་ཤོམ་འདེབས་ལས་བྱེད་སྐབས་རི་ཕག་དང་། གླང་ཆེན། བྱ་བྱིའུ་དང་། སྤྲེའུ་སོགས་ནས་ཨ་ཤོམ་སྟོན་འབྲས་ལ་གནོད་འཚེ་མང་བས་ཉིན་མཚན་གཉིས་ལ་མི་གིས་སྲུང་དགོས་པ་དང་ང་ཚོའི་བརྒྱ་ཤོག་གི་མི་རྒན་ལོ་དྲུག་བཅུ་དལ་ཙམ་ཞིག་མཉམ་ལས་སྐབས་མཚན་ལ་གླང་ཆེན་དང་ཕག་པ་སྲུང་དུ་ཕྱིན་ནས་སྔ་དྲོ་ཆུ་ཚོད་དྲུག་པ་ཙམ་ལ་གླང་ཆེན་གྱིས་བསད་སོང་ལ་ཕུང་པོ་མེ་ལ་བསྲེགས་རྒྱུའི་ཤིང་རིན་ཙམ་ལས་གཞན་དེང་སང་ནང་བཞིན་གུན་གསབ་སོགས་གང་ཡང་རག་མ་སོང་། ཤིང་ནགས་གཅོད་བཏུབ་ཀྱིས་ལས་གཞི་དང་ཞིང་ས་འཁོད་སྙོམས་བཟོ་རྒྱུ་སོགས་ཆ་ཚང་རྒྱ་གར་དབུས་གཞུང་གི་གཞིས་ཆགས་འཛུགས་བསྐྲུན་ཚན་པ་༼ RRO ༽༼ Reclamation and Resettlement Organization ༽ ནས་འགན་ཁུར་བཞེས་པ་དང་། གཞིས་མིའི་སྡོད་ཁང་གསར་རྒྱག་དང་། འགྲོ་ལམ་གསར་བཟོ་དང་། ཆུ་འདྲེན་ལས་འཆར་སོགས་གཞིས་ཆགས་གསར་འཛུགས་ཀྱིས་ལས་འཆར་ཆ་ཚང་རོགས་ཚོགས་མ་ར་ཌ་ ༼ MYRADA ༽༼ Mysore Resettlement and Development Agency ༽ ནས་འགན་ཁུར་བླངས་ནས་༧ རྒྱལ་བའི་ཕོ་བྲང་། གཞིས་མིའི་སྡོད་ཁང་། ལས་ཁུངས་ཁག སློབ་གྲཱ སྨན་ཁང་། ཀྲག་ཀྲར་འཕྲུལ་རྨོས་སྡེ་ཚན་དང་། ཀྲག་ཀྲར་ཤིག་སྒྲིག་བཟོ་བཅོས་བསྡེ་ཚན། ཕྱུགས་བཟོ་སྡེ་ཚན། ཙམ་ཐག རུམ་ཐག་སྡེ་ཚན། བྱ་གསོ་སྡེ་ཚན། མཉམ་འབྲེལ། ཚོང་ཁང་། ཟ་ཁང་། དོ་ཁང་། ཆུ་ལས་སྡེ་ཚན། དངུལ་ཁང་། གཞིས་ཆགས་ཀྱི་མཐའ་མཚམས་ཡུལ་མི་དང་ས་འདྲེས་རྩོད་གླེང་མི་ཡོང་བ་དང་གླང་ཆེན་དང་རི་ཕག་སོགས་འགོག་སྲུང་ཆེད་ཨེ་ཀ་གསུམ་སྟོང་ཆ་ཚང་མཐའ་བསྐོར་ས་སྡོང་ཁ་ཞེང་ལ་ཕི་ཊི་བདུན་དང་གཏིང་ལ་ཕི་ཊི་དྲུག་ཅན་བྲུས་པ་སོགས་གཞིས་མིའི་དགོས་མཁོ་ཆ་ཚང་ལེགས་སྒྲུབ་ཟིན་ནས་༧གོང་ས་མཆོག་ནས་གཞིས་ཆགས་འདིའི་མིང་ལ་ ༼ དོན་ལྡན་གླིང་ ༽ ཞེས་བཀའ་བཟང་ཕེབས་པ་ནས་ཁྱིམ་ཚང་སོ་སོར་ཁང་པ་རྩིས་སྤྲོད་དང་ས་ཞིང་བགོ་སྤྲོད་ཀྱིས་གཞིས་མི་སོ་སོའི་ས་ཁང་ལ་བདག་གཅེས་བྱ་རྒྱུ་དང་རང་ཁ་རང་གསོའི་ལས་གཞིའི་ཐོག་ཁྱིམ་བྱ་གསོ་ཉར་དང་ར་དང་བ་ཕྱུགས་བདག་ཉར་གྱི་འོ་མ་ཚོགས་པ་སྡེ་ཁག་སོ་སོར་བཙུགས་ནས་འོ་མ་ཉོ་ཚོང་གིས་ལས་གཞི་གསར་འཛུགས་དང་འབྲེལ་ས་གནས་རྒྱ་གར་གཞུང་གི་དངུལ་ཁང་ནས་དངུལ་བུན་བླངས་ནས་མི་ཆ་ཡོད་མཁན་ཚོ་དགུན་དུས་བལ་ཚོང་ལ་འགྲོ་མཁན་དང་། གཞིས་ཆགས་རང་དུ་བསྡད་ནས་ཟ་ཁང་དང་ཚོང་ཁང་སོགས་གཉེར་མཁན་ཡང་མང་པོ་བྱུང་སོང་། ༼ གཞིས་ཆགས་འདིའི་དཀྱིལ་དུ་རི་འབུར་ཞིག་ཡོད་པ་དེའི་སྟེང་བོད་མིའི་བླ་ན་མེད་པའི་དབུ་ཁྲིད་༧ སྤྱི་ནོར་༧ གོང་ས་སྐྱབས་མགོན་ཆེན་པོའི་ཕོ་བྲང་དང་། སྲུང་མ་དམར་ནག་གཉིས་ཀྱི་རྟེན་མཁར། མགོན་ཁང་། གསུང་ཆོས་ར་བ་བཅས་ཡོད་པ་དང་། གཞིས་མིའི་སྐྱབས་ཡུལ་ཆོས་སྒར་ཁག་དགུ་དང་། གཞིས་མིའི་ཤེས་ཡོན་ཆེད་འཛིན་རིམ་དང་པོ་ནས་བཅུ་པ་བར་ཉིན་སློབ་དབུས་མ་དང་སྡེ་ཁག་གསུམ་སོ་སོར་སྔོན་འགྲོའི་ཉིན་སློབ་རེ་བཅས་ཡོད། གཞིས་མིའི་འཕྲོད་བསྟེན་དང་སློབ་གསོའི་ཆེད་དབུས་འཕྲོད་བསྟེན་ལྷན་ཁང་གི་ཡན་ལག་ས་གནས་ཕྱི་ལུགས་འཕྲོད་བསྟེན་སྨན་ཁང་དང་དབུས་སྨན་རྩིས་ཁང་གི་ཡན་ལག་ས་གནས་སྨན་རྩིས་ཁང་། གཞིས་ཆགས་མི་མང་གི་འཚོ་བའི་རྒྱབ་བསྟེན་ས་གནས་མངའ་གཞུང་གི་མཉམ་འབྲེལ་ཚོགས་པའི་འོག་དེབ་སྐྱེལ་ཟིན་པའི་མི་མང་སྤྱི་པའི་མཉམ་འབྲེལ་དང་། གྲོང་སྡེ་ཉི་ཤུ་རྩ་གཉིས་ལ་སྡེ་ཁག་གསུམ་ཡོད་པ་དང་། གྲོང་སྡེ་རེ་ལ་བཅུ་ཁང་བཅུ་དྲུག་ཡོད་པ་མི་གྲངས་བརྒྱ་དང་དྲུག་བཅུའི་ཚད་ཡིན་པ་དང་། བཅུ་ཁང་གཅིག་ལ་ལྔ་ཁང་དང་གསུམ་ཁང་གཉིས་ཁང་བཅས་མི་བཅུ་གི་ཚད་ཡིན་པ་དང་། ཞིང་ས་མི་རྒན་པ་ལ་འགུན་ཊ་སུམ་བཅུ་སོ་གཉིས་དང་། མི་ཆུང་བ་ལོ་བཅུ་བཞི་མན་ལ་འགུན་ཊ་ཉི་ཤུ་དང་། ཚལ་ཞིང་དང་། ཁང་ས། ལམ་བཅས་ལ་འགུན་ཊ་བརྒྱད་ཕུད་མི་རེ་ལ་ཨེ་ཀ་རེའི་ཚད་དེ་ལྟར་ཡིན་པ་དང་། གཞིས་ཆགས་ཀྱི་ས་ཆའི་རྒྱ་ཁྱོན་ཨེ་ཀ་གསུམ་སྟོང་ཡོད་པ་དང་། གཞིས་ཆགས་འདིར་བཙན་བྱོལ་བོད་མིའི་བཅའ་ཁྲིམས་དགོང་དོན་ས་གནས་འཐུས་མིའི་སྒྲིག་འཛུགས་དང་ས་གནས་བོད་རང་དབང་བདེན་པའི་ལས་འགུལ་ཚོགས་ཆུང་དང་། གཞུང་འབྲེལ་མ་ཡིན་པའི་ཚོགས་པ་ས་གནས་བོད་ཀྱི་གཞོན་ནུ་དང་ས་གནས་བོད་ཀྱི་བུད་མེད་ལས་ཆོལ་ཁ་དང་ལུང་ཚན་ཤོག་སྒྲིལ་གྱི་ཚོགས་སྐྱིད་སོགས་མེད་པ་གཞིས་མི་རྣམས་ཁྱིམ་ཚང་ཆེན་པོ་ཞིག་གི་ངོ་བོར་ཞི་བདེ་ལྷིངས་འཇགས་སུ་གནས་ནས་དབུས་བོད་མིའི་སྒྲིག་འཛུགས་ཀྱི་ལམ་སྟོན་འོག་གཞིས་ཆགས་སྤྱིའི་སྒྲིག་འཛུགས་དང་ཁྱིམ་ཚང་སོ་སོའི་འཚོ་བའི་མདུན་ལམ་ལ་འགན་སྲུང་བྱེད་བཞིན་པ་ནས་ལོ་རབས་བརྒྱད་བཅུའི་ནང་༧ གོང་ས་༧ སྐྱབས་མགོན་ཆེན་པོ་མཆོག་དང་སྐྱབས་རྗེ་བཀའ་ཁྲི་ཟུར་བ་མཁས་དབང་ཟམ་གདོང་རིན་པོ་མཆོག་རྣམ་གཉིས་ནས་གཞིས་ཆགས་འདིར་བསྔགས་བརྗོད་རིམ་པར་ཕེབས་པ་ནི་གཞིས་མི་སེར་སྐྱ་ཡོངས་ནས་གཞིས་ཆགས་ཀྱི་མིང་༼ དོན་ལྡན་གླིང ༽ ཟེར་བའི་ཐ་སྙད་ལ་འགན་འཁུར་ནས་མིང་དོན་མཚུངས་པའི་རྒྱལ་བ་དགྱེས་པའི་མཆོད་སྤྲིན་བླ་ན་མེད་པ་འདིས་བསོད་ནམས་ཀྱི་ཚོགས་རླབས་ཆེན་བསགས་པ་བཅས།

བར་སྐབས་ཀྱི་ཚིགས་སུ་བཅད་པ།

༼ མི་ཚེ་གསར་པའི་མདུན་ལམ་གཞིས་ཆགས་འབྱོར། ཉམས་མྱོང་མེད་པས་ཞིང་ལས་འབད་བརྩོན་འོག ཟས་གོས་གཉིས་ལ་འདོད་ཆུང་ཆོག་ཤེས་བསྟེན། ལོ་ཟླ་འགྲོ་བཞིན་ཉམས་མྱོང་ཕུན་སུམ་ཚོགས། ༽

༼ གནམ་ཆུའི་འོག་ཏུ་འཚོ་བའི་ཞིང་པ་ཚོ།

རི་ཕག་གླང་ཆེན་ཞིང་ལ་གནོད་འཚེ་མང་།

ལས་སྨོན་འབྲེལ་བས་འབད་བརྩོན་ཉིན་མཚན་འོག

མཆོག་གསུམ་བསླུ་མེད་མགོན་སྐྱབས་འཕྲིན་ལན་མཛོད། ༽

ལོ་རབས་དགུ་བཅུའི་ནང་གཞིས་འགོ་སྐུ་ངོ་བཀྲས་ཁང་རྣམ་རྒྱལ་རྡོ་རྗེ་དང་། ལས་དྲུང་སྐུ་ངོ་ཀརྨ་དགྲ་འདུལ། མཉམ་འབྲེལ་དྲུང་ཆེ་སྐུ་ངོ་འཇིགས་མེད་འབྱུང་གནས་བཅས་སྐུ་ངོ་གསུམ་གྱི་ལས་དུས་སྐབས་སྦེང་ལོར་དུ་ཡོད་པའི་ཡེ་ཤུའི་བྱིས་ཚོགས་ ༼ Christian Children’s Foundation. CCF ༽ ཀྱིས་ལས་ཁུངས་སུ་ལན་མང་ཆེད་བཅར་ཞུས་ནས་བདེ་སྙན་རིམ་འབུལ་དང་འབྲེལ་བརྗོད་ལན་མང་ཞུས་ནས་མཐར་གཞིས་ཆགས་ཀྱི་ཕྲུ་གུའི་ཤེས་ཡོན་དང་འཕྲོད་བསྟེན་ཆེད་རོགས་པ་གནང་རྒྱུའི་ཞལ་བཞེས་བཟང་པོ་ཐོབ་ནས་དོན་ལྡན་གླིང་ནང་མི་བདེ་དོན་༼ Dhondenling Famiy welfare Project ༽ གྱིས་འགན་ཁུར་འོག་ཕྲུ་གུ་ཚོར་ཤེས་ཡོན་དང་འཕྲོད་བསྟེན་ཐོག་རོགས་རམ་དང་ཉིན་སློབ་ཀྱི་ཉིན་དགུང་བཞེས་ལག་དང་བཅུད་ཟས་སོགས་ལ་རོགས་རམ་དང་ཕྲུ་གུ་སོ་སོར་སྦྱིན་བདག་གིས་དངུལ་བཏང་བ་རྣམས་མ་འོངས་མཐོ་སློབ་འགྲོ་སྐབས་འགྲོ་སོང་གཏོང་དམིགས་དུ་མཉམ་འབྲེལ་ལ་ཟུར་དུ་དངུལ་བཅོལ་ཞུས་ནས་ཕྲུ་གུ་དང་ཕ་མ་ཚང་མར་ཕན་ཐོག་ཆེན་པོ་བྱུང་བ་དང་། གྲོང་སྡེ་སོ་སོའི་ནང་གཅིག་ཕན་གཅིག་གྲོགས་ ༼ SHG ༽ བཙུགས་ནས་ཁྱིམ་ཚང་སོ་སོའི་འཚོ་བའི་མདུན་ལམ་ལ་ཕན་པའི་རོགས་སྐྱོར་ལས་འཆར་ནང་བ་ཕྱུགས་ཉར་མཁན་དང་ཤིང་འབྲས་འདེབས་མཁན་ཚོར་ནང་བདེ་ལས་ཁུངས་ནས་རོགས་དངུལ་སྐྱེད་མེད་སྔ་གཡར་གྱིས་ལོ་དུས་རྒྱས་བཅད་ནང་རོགས་དངུལ་གྲོང་སྡེ་སོ་སོའི་གཅིག་ཕན་གཅིག་གྲོགས་ ༼ SHG ༽ ལ་འབུལ་དགོས་པའི་སྒྲིག་གཞི་ས་གནས་འཐུས་མིའི་ཚོགས་འདུ་ནས་གཏན་འབེབས་གནང་བའི་ལམ་སྟོན་ལྟར་འགྲོ་བཞིན་པ་ནས་གཅིག་ཕན་གཅིག་གྲོགས་ནང་ཡོད་པའི་ཁྱིམ་ཚང་སོ་སོའི་འཚོ་བའི་ལས་གཞིའི་ཐོག་ཕན་ཐོགས་ཆེན་པོ་ཡོང་གི་ཡོད་ན་ཡང་སྤྱི་ལོ་༢༠༢༠ ལོར་སྤྱི་ཁྱབ་ནང་སྲིད་ལྷན་ཁང་གི་བཀའ་འབྲེལ་ལྟར་གྲོང་སྡེ་ཉེར་གཉིས་ལ་རོགས་དངུལ་བསྡོམས་སྒོར་འབུམ་བརྒྱ་དང་གཅིག་ཁྲི་དྲུག་སྟོང་ལྷག་ཙམ་ཡོད་པ་དེ་དག་ཆ་ཚང་གཞིས་ཆགས་ལས་ཁུངས་ནས་བསྡུ་བཞེས་གནང་ནས་གཅིག་ཕན་གྲོགས། ༼ SHG ༽ སྒོ་རྒྱབ་ནས་མ་དངུལ་དེ་དག་མ་འོངས་མི་མང་ལ་དགོས་གལ་བྱུང་ཚེ་དངུལ་བུན་གཏོང་དམིགས་ཆེད་ས་གནས་འགོ་འཛིན་གྱིས་བཏང་འཛིན་འོག་བུན་གཏོང་འགན་འཁུར་ཚོགས་ཆུང་ཟུར་འཛུགས་ཀྱིས་དངུལ་བུན་གཏོང་ཕྱོགས་ཀྱི་སྒྲིག་གཞི་ལམ་སྟོན་དོན་ཚན་བརྒྱད་ཅན་ས་གནས་འཐུས་མིའི་ཚོགས་འདུ་སྐབས་བཅུ་པ་ནས་གཏན་འབེབས་གནང་བ་བཅས།

བར་སྐབས་ཀྱི་ཚིགས་སུ་བཅད་པ།

༼ བྱམས་སྙིང་གཏོང་འཕོད་ཅན་གྱི་ཡི་ཤུའི་བྱིས་ཚོགས་ནས།

བཙན་བྱོལ་བོད་ཕྲུག་ཤེས་ཡོན་འཕྲོད་བསྟེན་ཆེད།

རོགས་དངུལ་གནམ་གྱི་ཆར་ལྟར་བབ་པའི་འོག བོད་ཕྲུག་སྟོང་ཚོ་མང་པོར་མདུན་ལམ་བསྟན། ༽

༼ བྱམས་དང་སྙིང་རྗེ་གཞན་ཕན་བྱང་ཆུབ་སེམས།

དོན་དངོས་གཞན་ཕན་བྱ་བ་རླབས་ཆེན་འདི། བོད་མིའི་དཀའ་སྡུག་ཤེས་ནས་རོགས་ཕན་གནང་།

ཡི་ཤུའི་བྱིས་ཚོགས་བོད་མིར་བཀའ་དྲིན་ཆེ། ༽

འདས་པའི་མི་ལོ་སུམ་བཅུ་ལྷག་ཙམ་རིང་གནམ་ཆུ་ལ་སྐྱབས་བཅོལ་ནས་ཨ་ཤོམ་འདེབས་ལས་བྱེད་བཞིན་པ་ནས་གཞིས་མི་ཁག་གཅིག་ནས་ས་འོག་ནས་ཆུ་བྲུས་ནས་ཞིང་ཆུ་འདྲེན་གཏོང་གི་ལས་གཞི་གསར་དུ་སྤེལ་ནས་ལོ་རེར་སྟོན་འབྲས་ཐེངས་གཉིས་འདེབས་ལས་བྱེད་མཁན་ཡང་འདུག་ལ་ས་འོག་ལ་ཞིང་ཆུ་འདྲེན་གཏོང་བྱ་རྒྱུའི་ཆུ་ཡོད་ན་ཆུ་ཞིང་ལ་གློག་རིན་སྤྲོད་མི་དགོས་པ་ཞིང་པ་ཚོར་ཕན་ཐོགས་ཆེན་པོ་ཡོད་ས་རེད། ལོ་རབས་ཉི་སྟོང་ཤར་ནས་དབུས་བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་འོག་སྤྱི་ཁྱབ་ནང་སྲིད་ལྷན་ཁང་ནས་ཀོ་ལི་གྷལ་དོན་ལྡན་གླིང་གཞིས་ཆགས་འདི་བཞིན་མིག་དཔེ་འོས་པའི་སྲོལ་རྒྱུན་སོ་ནམ་ལས་གཞི། ༼ Organic Farming ༽ ལ་འདམས་ནས་དངོས་སུ་གྲོང་སྡེ་གཅིག་ཆ་ཚང་སྲོལ་རྒྱུན་ལ་ཕྱིན་པ་དང་ལོ་རྗེས་མ་ལ་གྲོང་སྡེ་གཉིས་བཅས་རིམ་བཞིན་གྲོང་སྡེ་ཚང་མ་སྲོལ་རྒྱུན་ལ་འགྲོ་འཆར་ཡོད་པ་དང་། སྤྱི་ཁྱབ་ནང་སྲིད་ལྷན་ཁང་ནས་སྲོལ་རྒྱུན་སོ་ནམ་ལས་གཞིའི་ཐོག་མི་མང་ལ་རྒྱ་གར་ཆེད་ལས་མཁས་པའི་ཟབ་སྦྱོང་དང་ལམ་སྟོན་བ་ལུད་རོགས་རམ་དང་མངའ་སྡེ་གཞན་ལ་སྦྱོངས་དར་དང་ཉམས་མྱོང་བསོག་སླད་བལྟ་བསྐོར་ལ་འཁྲིད་པ་དང་ཞིང་ཁའི་མཐའ་ལ་ཆུ་དཀྱིལ་ཆེད་ས་སྡོང་བྲུས་པ་དང་ཤིང་སྣ་བཙུགས་པ་དང་སྔོ་ལུད་དང་འབུ་ལུད་བཟོ་སྟངས་སོགས་ལ་ཟབ་སྦྱོང་རིམ་པ་མང་པོ་སྤྲད་པ་དང་ལུད་སྦྱོར་བཟོ་སའི་འགྱིག་དམ་དང་ཆུ་འཐེན་འགྱིག་གི་སྤ་ཡབ་གནང་བ་དང་ཁང་པའི་ཐོག་ཆུ་བསོག་འཇོག་གི་ལས་གཞི་ ༼ Rooftop rain water Harvesting ༽ སྤེལ་ནས་ཁྱིམ་ཚང་སོ་སོར་ ༼ Sintex Tank 3000 lt+ 1000 lt ༽ བཅས་གནང་བ་དང་ཁྱིམ་ཚང་སོ་སོར་ཉི་འོད་གློག་༼ Solar Home light Four Blub ༽ ཤེལ་ཏོག་བཞི་ཅན་གནང་བ་དང་སྲོལ་རྒྱུན་ལ་འགྲོ་མཁན་གྱི་གྲོང་སྡེ་ཚོར་ལོ་དང་པོ་ལ་གུན་གསབ་བརྒྱ་ཆ་དགུ་བཅུ་གནང་བ་བཅས་དབུས་བོད་མིའི་སྒྲིག་འཛུགས་ནས་རོགས་དངུལ་ཐབས་ཚོལ་ཆེད་སྐུ་ལས་མང་པོ་རྒྱབ་ཡོད་རེད་ལ་ཞིང་པ་སོ་སོ་ནས་ཀྱང་ཉིན་མཚན་མེད་པར་ཆུ་དང་ཆར་པའི་ནང་འཛུལ་ནས་ཞོགས་སྔ་ལངས་དང་དགོང་ཕྱི་ཉལ་བྱས་ནས་དཀའ་ལས་མང་པོ་རྒྱབ་ཡོད་པ་དང་གཞུང་ནས་འགྲོ་སོང་ཁྱོན་ཆེ་བཏང་ཡོད་ན་ཡང་སྲོལ་རྒྱུན་ལ་དང་པོ་ཉམས་མྱོང་མེད་པའི་དཀའ་ངལ། གཉིས་པ་ལུད་སྦྱོར་མ་རག་པའི་དཀའ་ངལ། གསུམ་པ་ཐོན་འབབ་མེད་པའི་དཀའ་ངལ། བཞི་པ་འབུ་སྐྱོན་གྱི་དཀའ་ངལ། ལྔ་པ་ཁྲོམས་ར་མེད་པའི་དཀའ་ངལ་བཅས་དཀའ་ངལ་ཆེན་པོ་ལྔ་གི་འོག་ནས་སྲོལ་རྒྱུན་ལ་མུ་མཐུད་ནས་འགྲོ་མ་ཐུབ་པ་དེ་དངོས་འབྲེལ་ཆགས་ཡོད་པ་ནས་སུ་གཅིག་ལ་ངན་ཁག་གཡོགས་ས་མེད་པ་ནི་སྐལ་བཟང་དུས་བཟང་གི་སྲོལ་རྒྱུན་སོ་ནམ་ཞིང་ལས་དེ་དུས་རབས་ཉི་ཤུ་རྩ་གཅིག་ནང་།༼ དེང་རབས་སོ་ནམ་ཞིང་ལས་ Modern Agriculture ༽རྫས་ལུད་དང་སྦྱོར་ལུད་ཀྱི་དུས་རབས་ནང་སླར་གསོ་བྱ་རྒྱུ་དེ་ལས་སླ་པོའི་ལས་ཀ་ཞིག་ག་ནས་ཡིན། དེ་སྔོན་རྫས་ལུད་བེད་སྤྱོད་སྐབས་ས་ཞིང་བཏབ་མཁན་ཚང་ཁ་ཤིག་ཤིག་ཡོད་པ་མ་ཟད་རྒྱ་གར་ཡུལ་མིའི་ལག་ནས་ས་ཞིང་བོགས་མ་བླངས་ནས་འཚོ་བ་སྐྱེལ་མཁན་ཡང་འདུག་ལ་སྲོལ་རྒྱུན་འགོ་བཙུགས་པ་ནས་ས་ཞིང་བཏབ་མཁན་ཉུང་དུ་ཕྱིན་པ་མ་ཟད་བོགས་རིན་མེད་པར་རིན་མེད་ལའང་ས་ཞིང་བཏབ་མཁན་མེད་པ་ཞིང་ས་མང་པོ་ས་སྟོང་ལ་བཞག་པ་ཡང་ལོ་ཤས་སྔོན་ལ་མཐོང་རྒྱུ་འདུག་ལ་ལོ་རབས་དགུ་བཅུའི་ནང་དབུས་བོད་མིའི་སྒྲིག་འཛུགས་ནས་བོད་མི་གཅིག་སྟོང་ཨ་རིར་གནས་སྤོས་ལས་འཆར་སྒྲིག་པ་ནས་གཞིས་ཆགས་ནང་ཞིང་ལས་དང་བ་ཕྱུགས་གསོ་སྐྱོང་བྱ་མི་ལོ་རེ་ནས་ལོ་རེ་བཞིན་ཉུང་དུ་ཕྱིན་ནས་གཞིས་ཆགས་སྲ་བརྟན་དང་རྒྱུན་གནས་ཟེར་བའི་ཁ་གཡང་ཆེན་པོའི་གཏམ་དེ་དོན་ལ་གནས་མིན་ད་ལྟའི་རྒྱ་བལ་འབྲུག་གསུམ་ནང་ཡོད་པའི་བོད་མི་བཙན་བྱོལ་བའི་གཞིས་ཆགས་ཁག་གི་གནས་སྟངས་ལ་ཉམས་ཞིབ་དང་དོ་སྣང་གནང་མཁན་ཞིག་ཡོད་ན་དེ་ནས་གསལ་པོ་མཁྱེན་ཐུབ་པ་དང་མཐོང་ཐུབ་པ་དང་ཤེས་ཐུབ་པ་དང་། མི་གྲངས་གཅིག་སྟོང་ཨ་རིར་གནས་སྤོ་གནང་བའི་ཤུགས་རྐྱེན་འོག་ནས་གཞིས་ཆགས་ནང་གཞིས་མི་ཉུང་དུ་འགྲོ་བཞིན་པ་དང་། ཉིན་སློབ་ནང་སློབ་ཕྲུག་ཉུང་དུ་འགྲོ་བཞིན་པ། ཞིང་ལས་དང་བ་ཕྱུགས་བདག་ཉར་བྱེད་མཁན་ཉུང་དུ་འགྲོ་བཞིན་པ། ལོ་གཞོན་པ་ཚོ་ནུབ་ཕྱོགས་རྒྱལ་ཁབ་ནང་འགྲོ་རྒྱུའི་བསམ་བློ་ལས་གཞིས་ཆགས་ནང་བསྡད་ནས་ཞིང་ལས་དང་བ་ཕྱུགས་གསོ་སྐྱོང་བྱས་ནས་གཞིས་ཆགས་ཀྱི་འཚོ་བ་ལ་འགན་སྲུང་བྱ་རྒྱུའི་བསམ་བློ་ཞན་པ་བཅས་གོང་རིམ་གྱི་རྒྱུ་ཚན་ཁག་ལ་ལྟ་སྐབས་གཞིས་ཆགས་སྲ་བརྟན་དང་རྒྱུན་གནས་ཟེར་བའི་ཁ་གཡང་ཆེན་པོའི་གཏམ་དེ་དོན་ལ་གནས་རྒྱུ་ཁ་སྒྲུང་ཙམ་ལས་མ་མཐོང་བ་ནི་དེ་སྔ་ལོ་རབས་བརྒྱད་བཅུ་དགུ་བཅུའི་ནང་གཞིས་མིའི་གྲངས་ཚད་དེ་ལྔ་སྟོང་ལྔ་བརྒྱའི་ནང་ཡོད་པ་དང་ད་ལྟའི་སྐབས་ལ་གཞིས་མི་གྲངས་ཚད་དེ་གསུམ་སྟོང་ཡས་མས་ལས་མེད་པ་དང་། སྔོན་འགྲོའི་སློབ་གྲྭ་གསུམ་དང་ཉིན་སློབ་ཨ་མ་བཅས་ནང་ཕྲུ་གུ་གཅིག་སྟོང་ལྷག་ཙམ་ཡོད་པ་ནས་ད་ལྟའི་དུས་ལ་སྔོན་སློབ་གསུམ་དང་ཉིན་སློབ་ཨ་མ་བཅས་ནང་ཕྲུ་གུ་ཉི་བརྒྱ་ཙམ་ལས་མེད་པ་ནས་དངོས་ཡོད་གནས་སྟངས་གསལ་པོ་མཐོང་ཐུབ་པ་དང་། གཞིས་ཆགས་སྲ་བརྟན་དང་རྒྱུན་གནས་ཐུབ་པའི་ཆེད་ས་ཞིང་གཅིག་པོ་འདེབས་ལས་ཙམ་མ་ཡིན་པར་ི

གཞིས་མི་ཁྱིམ་ཚང་སོ་སོར་ཡོང་འབབས་ལས་གཞི་ ༼ Family income Project ༽ བཟོ་ལས་ཆུང་རྩག་ ༼ Small scale industry ༽ བཙུགས་ནས་གཞིས་མི་གཞིས་ཆགས་རང་དུ་གནས་ཐུབ་པའི་ཡོང་འབབས་འཛུགས་བསྐྲུན་གྱིས་ལས་གཞི་གང་མང་སྤེལ་དགོས་པ་ནི་གཞིས་ཆགས་སྲ་བརྟན་དང་རྒྱུན་གནས་ཐུབ་པའི་སྲོག་རྩ་ངོ་མ་དེ་གཞིས་མིའི་དཔལ་འབྱོར་གནས་སྟངས་ལ་རག་ལས་པ་ལས་ཟབ་སྦྱོང་དང་འཚོ་སྣོན་ལ་འགན་བཀུར་ནས་གཞིས་ཆགས་སྲ་བརྟན་དང་རྒྱུན་གནས་དུས་ནམ་ཡང་མི་ཐུབ་པ་བཅས།

བར་སྐབས་ཀྱི་ཚིགས་སུ་བཅད་པ།

༼ བཙན་བྱོལ་བོད་མིའི་འཚོ་བའི་མདུན་ལམ་ཆེད།

གནས་ཡུལ་གཞུང་གི་གཞིས་ཆགས་ས་ཁང་གནང་།

བེད་སྤྱོད་ཚུལ་མཐུན་མ་ཐུབ་བོད་མིའི་འགན། ས་ཞིང་སྟོང་པར་བཞག་པ་ཤིན་ཏུ་འཁྲུལ། ༽

 

༼ གཞིས་ཆགས་སྲ་བརྟན་ཐུབ་ལ་མི་འབོར་དགོས།

གཞིས་ཆགས་རྒྱུན་གནས་ཐུབ་ལ་འཛུགས་བསྐྲུན་དགོས།

མི་འབོར་དང་འཛུགས་བསྐྲུན་མེད་པའི་སྲ་བརྟན་དེ།

བསམ་མེད་བྱིས་པས་བྱེ་མའི་ཁང་བརྩེགས་འདྲ། ༽

 

སྤྱི་ལོ་ ༡༩༥༩ ལོར་རྒྱ་ནག་གིས་བོད་དྲག་པོའི་བཙན་བཟུང་བྱས་ནས་བོད་རྒྱལ་ཁབ་དང་བོད་མི་རིགས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧ གོང་ས་༧ སྐྱབས་མགོན་ཆེན་པོ་མཆོག་གིས་དབུ་ཁྲིད་འོག་ཁོང་གི་བཀའ་ཤག་ལྷན་རྒྱས་དང་བོད་མི་ཁྲི་ཚོ་བརྒྱད་ལྷག་ཙམ་བཅས་རྒྱ་གར་འཕགས་པའི་ཡུལ་དུ་བཙན་བྱོལ་དུ་ཕེབས་ནས་༧གོང་ས་མཆོག་ནས་རྒྱ་གར་གྱི་སྲིད་བློན་དམ་པ་ནེ་རུ་དང་ལྷན་བཀའ་བསྡུར་གྱིས་བོད་མི་བཙན་བྱོལ་བ་ཚོར་རང་མི་རིགས་ཀྱིས་སྐད་ཡིག་དང་རིག་གཞུང་གོམས་གཤིས་སོགས་བདག་ཉར་ཆེད་བོད་མི་བཙན་བྱོལ་བ་ཚོ་ལ་གཞིས་ཆགས་དང་སློབ་གྲ་ཆོས་སྒར་སོགས་ཟུར་འཛུགས་བྱ་རྒྱུར་ཞིང་ས་དང་སྡོད་ཁང་དང་བོད་མིའི་སློབ་གྲ་ཟུར་འཛུགས་དང་བོད་ཀྱི་ཆོས་བརྒྱུད་སོ་སོར་ཟུར་དུ་སླབ་པ་སློབ་གཉེར་བྱེད་སའི་དགོན་པ་གྲ་ཚང་ཟུར་འཛུགས་སོགས་བོད་མི་བཙན་བྱོལ་བ་རྣམས་རྒྱ་གར་ལུང་པའི་ནང་ཕ་ཡུལ་གཉིས་པའི་འདུ་ཤེས་འོག་ནས་གང་བསམ་གང་དགོས་དང་ག་འགྲོ་གར་བསྡོད་བྱ་རྒྱུའི་སྒོ་སྐབས་བཟང་པོ་ཐོབ་པ་ནས་རང་རང་གི་འཚོ་བ་ཡུལ་མི་དང་གཉིས་སུ་མེད་པའི་འཚོ་བའི་མདུན་ལམ་སྤེལ་ཆོག་པའི་རང་དབང་འོག་ནས་བོད་མི་བཙན་བྱོལ་བའི་འཚོ་བའི་གནས་སྟངས་ལོ་རེ་ནས་ལོ་རེ་བཞིན་ཡར་རྒྱས་འགྲོ་བཞིན་པ་འདི་དག་གཙོ་བོ་༧གོང་ས་༧ སྐྱབས་མགོན་ཆེན་པོ་མཆོག་གིས་ཐུགས་སྐྱེད་སྨོན་ལམ་མཛད་འཕྲིན་དང་། ཁོང་གིས་དབུ་ཁྲིད་པའི་དབུས་བོད་མིའི་སྒྲིག་འཛུགས་ཀྱིས་མཛད་གཙོ་རྣམ་པའི་ལྷག་བསམ་དང་འགན་འཁུར་དྲང་བདེན་དང་འཚེ་བ་མེད་པ། ཡང་གོས་གནས་ཡུལ་རྒྱ་གར་གཞུང་མང་གཉིས་ནས་བོད་མིར་མཛའ་བརྩེའི་མཐུན་རྐྱེན་སྦྱར་བ་དང་ལྷག་དོན་དུ་ནུབ་ཕྱོགས་དགེ་བའི་ཡུལ་གྱིས་གཏོང་ཕོད་ཅན་ཨ་རིས་གཙོས་པའི་འབྱོར་ལྡན་རྒྱལ་ཁབ་ཚོའི་བོད་མི་བཙན་བྱོལ་བ་ཚོར་འགྲོ་བ་མིའི་འདུ་ཤེས་འོག་དཔལ་འབྱོར་གྱིས་རོགས་དངུལ་གནང་བ་སོགས་ལ་བརྟེན་ནས་བྱུང་བ་ནས་གོ་སྐབས་འདི་བརྒྱུད་ནས་༧ གོང་ས་༧སྐྱབས་མགོན་ཆེན་པོ་མཆོག་དང་། དབུས་བོད་མིའི་སྒྲིག་འཛུགས། གནས་ཡུལ་རྒྱ་གར་གཞུང་མང། ནུབ་ཕྱོགས་དགེ་བའི་ཡུལ་གྱི་སྦྱིན་བདག་ཨ་རིས་གཙོས་པའི་འབྱོར་ལྡན་རྒྱལ་ཁབ་ཁག་བཅས་ལ་ཁ་ཙམ་མིན་པ་སྙིང་ཁོངས་རུས་པའི་གཏིང་ནས་སྒོ་སྐབས་འདི་བརྒྱུད་ནས་ཐུགས་རྗེ་ཆེ་ལན་བརྒྱར་ཞུ་གི་ཡོད།

བར་སྐབས་ཀྱི་ཚིགས་སུ་བཅད་པ།

༼ མགོན་པོ་གང་གིས་དུས་གསུམ་གསལ་གཟིགས་འོག

རླབས་ཆེན་མཛད་པས་བཙན་བྱོལ་སྒྲིག་འཛུགས་བཙུགས།

ཡུལ་མི་ལས་ལྷག་བཙན་བྱོལ་བོད་མི་ཚོ། དཔལ་འབྱོར་ཡར་རྒྱས་བསམ་བློའི་ཚད་ལས་བརྒལ། ༽

༼ གངས་ཅན་མགོན་པོའི་རླབས་ཆེན་མཛད་འཕྲིན་འོག

གངས་ལྗོངས་སྐྱེ་འགྲོའི་བདེ་སྐྱིད་ཕུན་སུམ་ཚོགས།

གངས་ཅན་མགོན་པོའི་སྐུ་ཚེ་རྒྱས་པ་དང་། གངས་ལྗོངས་ཞིང་དུ་ཞི་བདེ་ཡུན་གནས་ཤོག ༽

སྤྱི་ལོ་ ༡༩༥༧ བོད་ས་མ་ཤོར་སྐབས་༧ གོང་ས་མཆོག་ནས་བོད་ཀྱི་ཆབ་སྲིད་ལམ་ལུགས་ལ་འགྱུར་བ་གཏོང་རྒྱུའི་རླབས་ཆེན་གྱི་དགོངས་གཞིའི་འོག་སྤྱི་ཚོགས་ལེགས་བཅོས་ཚོགས་ཆུང་བཙུགས་ཀྱང་ཕྱི་ནང་གི་འགོག་རྐྱེན་འོག་ནས་བོད་ནང་ལས་དོན་ལག་ལྟར་མ་ཐུབ་པ་ནས་སྤྱི་ལོ་ ༡༩༥༩ ལོར་བཙན་བྱོལ་དུ་ཕེབས་མ་ཐག་སྤྱི་ལོ་ ༡༩༦༠ ལོར་མ་འོངས་བོད་ཀྱིས་ཆབ་སྲིད་ལམ་ལུགས་དེ་དུས་རབས་དང་མཐུན་པ་མང་གཙོའི་ལམ་ལུགས་ལ་ཁ་ཕྱོགས་ནས་ཆོལ་གསུམ་བོད་མིའི་སྐུ་ཚབ་སྤྱི་འཐུས་གསར་བསྐོ་གནང་། སྤྱི་ལོ་ ༡༩༦༡ ལོར་མ་འོངས་བོད་ཀྱི་རྩ་ཁྲིམས་སྙིང་དོན་ཟིན་བྲིས་བཏབ། སྤྱི་ལོ་ ༡༩༦༣ ལོར་མ་འོངས་བོད་ཀྱི་རྩ་ཁྲིམས་ཡོངས་ཁྱབ་ཏུ་གསལ་བསྒྲགས་གནང་། སྤྱི་ལོ་ ༡༩༩༡ ལོར་སྤྱི་ཚོགས་ཀྱི་འཕེལ་རིམ་དང་རྒྱལ་སྤྱིའི་གནས་བབ་དུས་ཀྱི་དགོས་མཁོ་སོགས་ལ་གཟིགས་ནས་མང་གཙོ་སྲ་བརྟན་དང་རྒྱ་སྐྱེད་གནང་ནས་བཙན་བྱོལ་བོད་མིའི་མང་གཙོའི་སྒྲིག་འཛུགས་འདི་དག་མང་གཙོ་སྤྱིའི་ལྟ་གྲུབ་དང་མཐུན་པའི་ཁྲིམས་ཡིག་གི་ལམ་སྟོན་འོག་ཁྲིམས་བཟོ་སྡེ་ཚན་དང་། ༼ Legislature ༽ འཛིན་སྐྱོང་སྡེ་ཚན། ༼ Executive ༽ ཁྲིམས་ལུགས་དབང་འཛིན་སྡེ་ཚན། ༼ Judiciary ༽ བཅས་མང་གཙོའི་གཞུང་འཛིན་སྐྱོང་གནང་མཁན་གྱི་མང་གཙོའི་ཀ་བ་གསུམ། ༼ Three Pillar of Democracy Government ༽ འགན་དབང་འདྲ་མཉམ་ཐ་དད་དུ་གནས་ཐུབ་པའི་༼ Responsible and Answerable ༼ Check and Balance System ༽ བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་སྤྱི་འཐུས་སྐབས་བཅུ་གཅིག་པས་ཁྲིམས་བཟོའི་འགན་འཁུར་བླངས་ནས་བཅའ་ཁྲིམས་དོན་ཚན་བརྒྱ་དང་བཅོ་ལྔ་ཡོད་པ་དེ་དག་གཏན་འབེབས་གནང་ནས་༧ གོང་ས་མཆོག་གི་ཆོག་མཆན་དེ་སྤྱི་ལོ་ ༡༩༩༡ སྤྱི་ཟླ་ ༦ པའི་ཚེས་ ༢༨ ཉིན་དངོས་སུ་ཕེབས་པའི་ཉིན་མོ་ནས་ཁྲིམས་སུ་བཅས་ནས་སྤྱི་འཐུས་ཁྲིམས་བཟོ་གྲོས་ཚོགས་ཀྱིས་ལས་དོན་ཡོངས་རྫོགས་བཅའ་ཁྲིམས་ཀྱི་ལམ་སྟོན་འོག་ནས་འགྲོ་དགོས་པ་མང་གཙོ་ཁྲིམས་ཀྱི་དབང་བསྒྱུར་ ༼ Rule of Law ༽ ཟེར་བ་དེ་ཡིན་པ་ནས་སྤྱི་འཐུས་ཚོ་ལས་ཁུར་མ་བླངས་གོང་བཅའ་ཁྲིམས་ནས་བསྟན་པའི་དམ་བཅའི་ཚིག་གཞི། ༼ བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་ཀྱི་ཐོག་ནས་སྤྱི་འཐུས་ཀྱི་ལས་ཁུར་ཞུ་སྒོ་མཐའ་དག་བཅའ་ཁྲིམས་ཀྱི་འབྲུ་དོན་འགལ་མེད་ཐོག། རང་དོན་ཕྱོགས་ལྷུང་དང་། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས་རང་ནུས་གང་ཐེག་ཞུ་རྒྱུའི། ༽ དམ་བཅའ་དང་མ་འགལ་བའི་ཐོག་ནས་ཁྲིམས་བཟོ་གྲོས་ཚོགས་འཐུས་མིའི་འགན་འཁུར་ལེན་དགོས་པའི་ལམ་ལུགས་གསར་གཏོད་གནང་བ་དང་། སྤྱི་ལོ་ ༢༠༠༡ ནས་བཀའ་བློན་ཁྲི་པ་མི་མང་ནས་ཐད་ཀར་འོས་འདེམས་བྱ་རྒྱུའི་ལམ་ལུགས་གསར་གཏོད་གནང་བ་དང་སྤྱི་ལོ་ ༢༠༠༢ ལོ་ནས་འཛིན་སྐྱོང་གི་ཐུགས་འགན་བཀའ་བློན་ཁྲི་པར་གནང་ནས་༧གོང་ས་མཆོག་ཕྱེད་གྲེས་ཡོལ་དུ་ཕེབས་པ་དང་། སྤྱི་ལོ་ ༢༠༡༡ ནས་བོད་ཀྱི་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གི་འདམས་པའི་བཀའ་བློན་ཁྲི་པར་གནང་ནས་དེ་སྔ་རྒྱལ་དབང་སྐུ་ཕྲེང་རིམ་བྱོན་ནས་བོད་ཀྱི་ཆོས་སྲིད་ཀྱི་ཐུགས་འགན་བཞེས་ནས་མི་ལོ་གསུམ་བརྒྱ་དྲུག་བཅུ་ལྷག་ཙམ་སོང་བའི་དགའ་ལྡན་ཕོ་བྲང་གི་བོད་ཀྱིས་གཞུང་སྲིད་སྐྱོང་བའི་ལམ་ལུགས་ལ་འཇུག་བསྡོམས་རྒྱབ་ནས་མ་འོངས་བོད་ཀྱིས་ཆབ་སྲིད་ལམ་ལུགས་དེ་དེང་རབས་ཅན་གྱི་མང་གཙོ་ཡང་དག་པ་ཁྲིམས་ལུགས་ཀྱི་དབང་བསྒྱུར་ལ་ཁ་བསྒྱུར་གནང་མཛད།

བར་སྐབས་ཀྱི་ཚིགས་སུ་བཅད།

༼ འཛམ་གླིང་རྒྱལ་མང་མང་གཙོའི་ལམ་ལུགས་ལ།

ཐུགས་མོས་ཟབ་པས་བོད་འབངས་བདེ་ལམ་བསྟན།

མི་མང་འཐུས་མིའི་གྲོས་ཚོགས་ལམ་ལུགས་འོག བཙན་བྱོལ་མང་གཙོ་ཁྲིམས་ཀྱིས་དབང་བསྒྱུར་བསྟན། ༽

༼ སྤྱི་སྙོམས་དྲང་བདེན་མང་གཙོའི་ཁྲིམས་ཡིག་འོག

འགན་འཁུར་ཐུབ་ལ་བཅའ་ཁྲིམས་སྤྱི་བོར་བཀུར།

མི་མང་མང་གཙོ་བཅའ་ཁྲིམས་ལམ་སྟོན་འོག རང་འགན་འཁུར་ནས་བཙན་བྱོལ་སྒྲིག་འཛུགས་སྲུང་། ༽

༧ སྤྱི་ནོར་༧ གོང་ས་༧ སྐྱབས་མགོན་ཆེན་པོ་མཆོག་ནས་སྤྱི་ལོ་ ༡༩༨༧ སྤྱི་ཟླ་ ༩ པའི་ཚེས་ ༢༡ ཉིན་ཨ་རིར་ཞི་བའི་གྲོས་འཆར་དོན་ཚན་ལྔའི་བཀའ་རྩ་ཁྱབ་བསྒྲགས་གནང་བ་དང་། སྤྱི་ལོ་ ༡༩༨༨ སྤྱི་ཟླ་དྲུག་པའི་ཚེས་ ༡༥ ཉིན་༧ གོང་ས་མཆོག་ནས་སི་ཊས་སྦག་ཏུ་བོད་རྒྱའི་དཀའ་སྙོགས་སེལ་རྒྱུའི་ལམ་སྟོན་བཀའ་སློབ་མ་གནང་སྔོན་སྤྱི་ཟླ་ ༦ པའི་ཚེས་ ༣ ནས་ ༦ བར་ཉིན་བཞི་རིང་བཀའ་ཤག་གི་ཚོགས་ཁང་དུ་བཙན་བྱོལ་བོད་མིའི་ཆབ་སྲིད་ཀྱི་ཚོགས་ཆེན་དང་པོ་དེ་བསྐོང་ཚོགས་གནང་ནས་རྒྱ་བལ་འབྲུག་གསུམ་ནང་ཡོད་པའི་བོད་མིའི་སྡོད་སྒར་ཁག་ནས་མི་འཐུས་གཉིས་རེ་དང་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་འཐུས་མི་བཅས་ལས་སྒྲུབ་པའི་ཚོགས་ཆེན་བསྐོང་ཚོགས་གནང་བ་ནས་ཀོ་ལི་གྷལ་དོན་ལྡན་གླིང་གཞིས་ཆགས་མི་མང་གི་སྐུ་ཚབ་ཏུ་སྐབས་དེའི་རང་བདེན་ཚོགས་ཆུང་གི་ཚོགས་གཙོ་སྐུ་ངོ་གོ་ཇོ་ཨ་ནག་དཔོན་རྡོ་རྗེ་རྣམ་རྒྱལ་མཆོག་དང་ཕྲན་སྤྱི་མི་ལས་ཐོག་གཞུང་པ་ཚེ་དབང་བསོད་ནམས་སྐུ་ངོ་ང་གཉིས་སྐབས་དེའི་གཞིས་འགོ་སྐུ་ངོ་བཀྲས་ཁང་རྣམ་རྒྱལ་རྡོ་རྗེ་མཆོག་ནས་ཆེད་གཏོང་གི་་ཚོགས་བཅར་ཞུས་པ་དང་། ༡༩༨༨ ཟླ་བ་ ༦ པའི་ཚེས་ ༡༥ ཉིན་༧གོང་ས་མཆོག་ནས་སི་ཊས་སྦག་ཏུ་ཞི་བའི་གྲོས་འཆར་དོན་ཚན་ལྔ་གསུངས་པའི་ནང་དོན་གཞིར་བཟུང་ནས་བོད་རྒྱའི་དཀའ་རྙོགས་ལྷག་བསམ་རྣམ་དག་གིས་གྲོས་མོལ་བྱེད་དགོས་པའི་བཀའ་གནང་། སྤྱི་ལོ་ ༡༩༩༥ ལོར་མ་འོངས་བོད་ཀྱི་མདུན་ལམ་དེ་མང་མོས་འོས་བསྡུ་བྱས་ཏེ་ཐག་གཅོད་དགོས་པའི་བཀའ་སློབ་ཕེབས་པ་ལྟར་བཀའ་སྤྱི་གཉིས་ནས་དབུ་མའི་ལམ་དང་། རང་བཙན། རང་ཐག་རང་གཅོད། བདེན་པའི་ཨུ་ཚུགས་བཅས་གདམ་ག་བཞིའི་ཐོག་མི་མང་གིས་བསམ་ཤོག་བསྡུས་ཀྱང་། དབུ་མའི་ལམ་ལ་མོས་མཐུན་དང་འོས་བསྡུ་མ་དགོས་པར་༧ གོང་ས་མཆོག་གིས་དུས་ནས་དུས་སུ་ཐུགས་ཐག་གཅོད་གནང་དགོས་པ་ཞུ་མཁན་བརྒྱ་་ ༦༤་༦༠ བྱུང་བ་དང་། སྤྱི་ལོ་ ༡༩༩༧ ཟླ་བ་ ༩ པའི་ཚེས་ ༡༨ ཉིན་བོད་མི་མང་གིས་སྐུ་ཚབ་སྤྱི་འཐུས་གྲོས་ཚོགས་ནས་སྤྱི་མོས་གྲོས་ཆོད་བཞག་པ་ནས་དབུས་བོད་མིའི་སྒྲིག་འཛུགས་ནས་བོད་རྒྱའི་དཀའ་རྙོགས་དེ་གཉིས་སྨན་དབུ་མའི་ལམ། ༼ Middleway Approch ༽ བརྒྱུད་ནས་སེལ་རྒྱུའི་འགན་འཁུར་བླངས་ནས་སྤྱི་ལོ་ ༢༠༠༢ ནས་སྤྱི་ལོ་ ༢༠༡༠ བར་བོད་རྒྱའི་སྐུ་ཚབ་བར་འབྲེལ་མོལ་ཐེངས་དགུ་བྱས་ཀྱང་དོན་ཕན་གསོན་པ་བྱུང་མེད་པ་ནས་བོད་རྒྱའི་འབྲེལ་ལམ་དེ་སྤྱི་ལོ་ ༢༠༡༠ ནས་བཟུང་ཆད་པ་འམ་འགག་ནས་ལྷག་ཡོད་པ་ནི་བོད་རྒྱ་མི་རིགས་གཉིས་ལ་བསམ་ན་གསུབ་ནས་ཟུབ་རྒྱུ་མེད་པའི་ཆབ་སྲིད་ཀྱིས་གྱོང་གུན་ཆེན་པོ་ཞིག་ཡིན་པའི་ངོས་འཛིན་ཞུ་གི་ཡོད། གང་ལགས་ཟེར་ན་༧གོང་ས་མཆོག་གི་སྐུ་དུས་ལ་བོད་རྒྱའི་དཀའ་རྙོགས་སེལ་དགོས་པ་དེ་ས་འབྲེལ་ཅན་གྱི་བོད་རྒྱ་མི་རིགས་གཉིས་ལ་བསམ་ན་ཤིན་ཏུ་ནས་གལ་ཆེའི་ནང་གི་གལ་ཆེན་དོན་ཆེན་ཞིག་ཡིན་པའི་ངོས་འཛིན་ཞུ་གི་ཡོད། བོད་རྒྱའི་འབྲེལ་ལམ་ཆད་ནས་མི་ལོ་བཅུ་གསུམ་ཙམ་འགྲོ་བཞིན་པ་ནས་ང་ཚོའི་ངོས་ནས་དབུ་མའི་ལམ་གྱི་དགོས་འདུན་ལ་གཞི་བཅོལ་ནས་བཅའ་ཁྲིམས་དོན་ཚན་བཅོ་ལྔ་ནང་འཁོད་པའི་བོད་དོན་བདེན་མཐའ་སེལ་རྒྱུའི་ཆོད་སེམས་དང་འགན་འཁུར་བརྟན་པོ་ཡོད་ན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགོ་ཁྲིད་མཉམ་མི་དང་མི་གདོང་ཐུག་ནས་ཕར་བཤད་ཚུར་ཉན་དང་། ཚུར་བཤད་ཕར་ཉན་བརྒྱུད་ནས་ས་འབྲེལ་ཆབ་སྲིད། ༼ Geopolitics ༽ ལ་འགན་འཁུར་ནས་བོད་རྒྱའི་དཀའ་རྙོགས་སེལ་དགོས་པ་དེ་བོད་རྒྱ་མི་རིགས་གཉིས་ལ་བསམ་ན་ཧ་ཅང་གི་གལ་ཆེན་དོན་ཆེན་ཞིག་ཡིན་པའི་ངོས་འཛིན་ཞུ་གི་ཡོད། གང་ལགས་ཞུས་ན་འཛམ་གླིང་གི་ས་ཁྲའི་ནང་གསལ་བའི་བོད་ཀྱི་ས་ཆ་དེ་སྐོག་ནས་འཛམ་གླིང་གིས་གླིང་ཕྲན་གཞན་ལ་སྤོ་ཐུབ་པའི་ནུས་པ་ད་ལྟའི་ཆ་ལ་སུ་གཅིག་ལ་མེད་པ་ནས་བོད་རྒྱ་གཉིས་འཛམ་གླིང་གི་ས་ཆེན་པོ་འདི་མ་འཇིག་བར་དེ་སྲིད་དུ་ཁྱིམ་མཚེས་རྒྱལ་ཁབ་ཀྱི་ངོ་བོར་འཆམ་མཐུན་བྱས་ནས་གནས་དགོས་པ་ནི་འཛམ་གླིང་ཞི་བདེ་ཟེར་བའི་ཐ་སྙད་དེའི་འོག་ཏུ་བོད་རྒྱ་མི་རིགས་གཉིས་མི་ཐོག་ནས་མི་ཐོག་བརྒྱུད་ནས་འཚོ་ཐུབ་པའི་འགན་དེ་ད་ལྟའི་བོད་རྒྱ་གཉིས་ཀྱིས་འགོ་ཁྲིད་ཚོའི་ཐུགས་འགན་ངོ་མ་དེ་ཡིན་པ་ནས་དུས་ཚོད་བཟང་པོ་ནམ་ཡང་ཆུད་ཟོས་སུ་གཏོང་མི་ཉན་པའི་ངོ་སྤྲོད་ཡང་བྱ་འདོད་བྱུང་།

བར་སྐབས་ཀྱི་ཚིགས་སུ་བཅད་པ།

༼ བོད་རྒྱའི་དཀའ་རྙོགས་སེལ་བའི་ཐབས་ལམ་ལ།

གཉིས་སྨན་དབུ་མའི་ལམ་གྱིས་ས་བོན་བཏབ། ཁྲིམས་བཟོ་གྲོས་ཚོགས་སྤྱི་མོས་གྲོས་ཆོད་འོག བོད་རྒྱའི་འབྲེལ་ལམ་གསར་གཏོད་རྩ་བ་བཙུགས། ༽

༼ གཉིས་སྨན་དབུ་མའི་ལམ་གྱི་དགོས་འདུན་དེ།

གསོན་པོར་གནས་ལ་གྲོས་ཚོགས་གྲོས་ཆོད་འགན།

ཞི་བའི་མི་མང་གློ་སྙིང་བྲང་གསུམ་གཏད།

བོད་རྒྱའི་འབྲེལ་ལམ་ས་འབྲེལ་ཆབ་སྲིད་འགན། ༽

སྤྱི་ལོ་ ༢༠༡༩ སྤྱི་ཟླ་ ༣ པའི་ཚེས་ ༡ ནས་ས་གནས་འགོ་འཛིན་གསར་པ་སྐུ་ངོ་དགེ་ལེགས་འབྱུང་གནས་མཆོག་དབུས་བོད་མིའི་སྒྲིག་འཛུགས་བཀའ་ཤག་ནས་དམིགས་བསལ་བསྐོ་བཞག་གནང་སྟེ་ས་གནས་སུ་ཕེབས་ནས་དབུས་བོད་མིའི་སྒྲིག་འཛུགས་ཀྱི་ལམ་སྟོན་ལྟར་གཞིས་ཆགས་བསྲ་བརྟན་དང་རྒྱུན་གནས་ཐུབ་པའི་འཛུགས་བསྐྲུན་གྱིས་ལས་གཞི་གཞིས་ཆགས་ཀྱི་འཁོར་ལམ་དང་། ལུས་སྦྱོངས་ཁང་། ཉིན་སློབ་ཀྱི་ཚོགས་ཁང་དང་། ཆོས་ཁང་། དཔེ་མཛོད་ཁང་། འཛིན་ཁང་། གཞིས་ཆགས་ལས་ཁུངས། ཕྱི་ལུགས་སྨན་ཁང་། རྒན་གསོ་ཁང་། མི་མང་ཚོགས་ཁང་། མགྲོན་ཁང་དང་། ཟ་ཁང་། གཞིས་ཆགས་ཀྱི་རྒྱལ་སྒོ་སོགས་དེང་རབས་དང་མཐུན་པའི་གསར་གཏོད་ཀྱིས་འཛུགས་བསྐྲུན་ལས་གཞི་ཁག་དུས་ཐུང་ནང་ཡར་རྒྱས་ཚད་མཐོ་བཏང་བ་དང་། གཞིས་ཆགས་ནང་རྒན་བྱིས་མང་བ་དང་ལྷག་པར་དུ་རྒན་གསོ་ཁང་གི་རྒན་ཁོག་ཚོ་ཕྱི་འགྲོ་མ་ཐུབ་པ་མང་བས་དེ་དག་གིས་དཀའ་ངལ་སེལ་སླད་ཕྱི་ནས་བླ་ཆེན་ཀམ་ཚང་བཀའ་རྒྱུད་༧སྐྱབས་རྗེ་གོ་ཤིར་རྒྱལ་ཚབ་རིན་པོ་ཆེ་མཆོག་དང་། སྦེ་ཀོབ་རྣམ་གྲོལ་གླིང་གི་༧སྐྱབས་རྗེ་གྱང་གང་རི་པོ་ཆེ་མཆོག ༧སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག ༧སྐྱབས་རྗེ་བླ་མ་བཟོད་པ་རིན་པོ་ཆེ་མཆོག་བླ་སྤྲུལ་སྐྱེས་ཆེན་དམ་པ་རྣམས་གཞིས་ཆགས་སུ་གཅིག་རྗེས་གཉིས་མཐུད་བྱས་ནས་ཆེད་དུ་གདན་ཞུས་ནས་གཞིས་ཆགས་མི་མང་ལ་ཆོས་འབྲེལ་དང་བཀའ་དབང་ཆོས་སྦྱིན་བླ་ན་མེད་པ་བཀའ་དྲིན་བསྐྱངས་གནང་མཛད་པ་ནས་ད་ལྟའི་ས་གནས་འགོ་འཛིན་གྱིས་ཕྱག་ལས་གནང་སྟངས་ལ་གཞིས་མི་ཚང་མ་རྗེས་སུ་ཡིད་རངས་དང་ཁ་གཅིག་དྲག་གི་བསྟོད་བསྔགས་གཏོང་མཁན་འདུག་ན་སྒོ་སྐབས་འདི་བརྒྱུད་ནས་ས་གནས་འགོ་འཛིན་སྐུ་ངོ་དགེ་ལེགས་འབྱུང་གནས་མཆོག་ལ་ས་གནས་མི་མང་གི་ཚབ་ཞུས་ནས་ཐུགས་རྗེ་ཆེ་ཞུ་གི་ཡོད།

བར་སྐབས་ཀྱི་ཚིགས་སུ་བཅད་པ།

༼ ལྷག་བསམ་རྣམ་སྤྱོད་འགན་འཁུར་རི་ལྟར་བརྟན།

གཞིས་ཆགས་སྲ་བརྟན་རྒྱུན་གནས་ཐུབ་པའི་ཆེད།

གྲངས་མང་ལས་གཞི་འཛུགས་བསྐྲུན་ཕུགས་བརྟན་བཟོས།

ཕྱི་ནང་ཀུན་ཏུ་ཁྱེད་ལ་བསྔགས་མཁན་མང་། ༽

གཞིས་ཆགས་འདི་སྤྱི་ལོ་ ༡༩༧༤ སྤྱི་ཟླ་ ༤ པའི་ཚེས་ ༢༧ ཉིན་བཙུགས་པ་ནས་འདི་ལོ་ ༢༠༢༤ ཟླ་བ་ ༤ ཚེས ༢༦ བར་མི་ལོ་ལྔ་བཅུ་ཧྲིལ་པོ་འཁོར་བའི་གསེར་དོད་དུས་དྲན་ ༼ Golden Jubilee ༽ སྲུང་བརྩི་ཞུ་བའི་སྒོ་སྐབས་དང་བསྟུན་ནས། ༼ མི་ལོ་ལྔ་བཅུའི་བཞུད་ལམ་ལ་ཕྱི་མིག་བལྟ་སྐབས། ༽ རང་ཉིད་ལ་མྱོང་ཚོར་དང་དྲན་ཤེས་བསམ་ཚུལ་ག་རེ་ཡོད་པ་དེ་འདིར་གསལ་སྟོན་བྱས་ནས་བཀོད་ཡོད་ན་ཀློག་མཁན་ཚོའི་དགོངས་པའི་དཔྱད་གཞིར་མངའ་བ་མཁྱེན།

བར་སྐབས་ཀྱི་ཚིགས་སུ་བཅད་པ།

༼ ལྔ་དང་ལྔ་བཅུ་གྲངས་ཀྱི་གསལ་འབྱེད་ཙམ།

མི་ལོ་ལྔ་བཅུ་རྟགས་དང་རྟེན་འབྲེལ་བཟང་།

ལྔ་བཅུའི་དུས་དྲན་རིན་ཆེན་གསེར་དོད་འདྲ།

མི་ཚེ་གཅིག་ལ་ལྔ་བཅུའི་དུས་དྲན་གཅིག ༽

 

༼ ལྔ་བཅུའི་དུས་དྲན་ལོ་རྒྱུས་མེ་ལོང་ལ།

གཟུགས་བརྙན་གང་འཆར་རང་རང་རྣམ་དཔྱོད་འོག

ལྔ་བཅུའི་དུས་དྲན་སྤྱི་ཚོགས་ལོ་རྒྱུས་ལ། བཅུད་ལེན་ཐུབ་ན་ཤེས་བྱའི་བང་མཛོད་འདྲ། ༽

མཐའ་དོན་བོད་རྒྱལ་ཁབ་དང་བོད་མི་རིགས་ཀྱིས་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་ཆེན་པོ་ས་སྟེང་རྒྱལ་བསྟན་ཡོངས་རྫོགས་ཀྱི་བཙུགས་རྒྱན་༧ སྤྱི་ནོར་༧ གོང་ས་སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཚན་ཡོངས་སུ་སྨོས་ན་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་སྐུ་ཚེ་སྐལ་བརྒྱར་བརྟན་ཅིང་ཐུགས་ཀྱི་བཞེད་དགོང་མཐའ་དག་གེགས་མེད་ལྷུན་གྱི་འགྲུབ་པ་དང་༧ གོང་ས་མཆོག་གི་སྐུ་དུས་འདིར་བོད་མི་གཞིས་བྱེས་གཉིས་རང་ཡུལ་གངས་ཅན་ཞིང་དུ་མཉམ་འཛོམས་ཐུབ་པའི་སྨོན་པ་བཟང་པོའི་རྒྱན་སྟེ་རེ་ཞིག་འདིར་འཇུག་བསྡུས་པའོ། གཞུང་པས། ༢༠༢༤/༠༢/༠༡ ལ། འགྲོ་ཀུན་བདེ་བའི་སྨོན་ལམ་བཅས་ཀུན་ཀྱང་བྱང་ཆུབ་མཆོག་ཏུ་སེམས་སྐྱེད་དོ།

སླར་སྨྲས་པ།

བསྟན་པ་འཛིན་པའི་སྐྱེས་ཆེན་དམ་པ་རྣམས།

ཐུགས་མཐུན་དམ་གཙང་རི་རྒྱལ་བཞིན་དུ་བརྟན།

བསྟན་ལ་འཚེ་བའི་ནག་ཕྱོགས་ཀླ་ཀློའི་དཔུང་།

དམིགས་མེད་རྡུལ་དུ་རློག་པའི་འཕྲིན་ལས་མཛོད།

 

མི་ལོ་ལྔ་བཅུའི་བཞུད་ལམ་རིང་པོ་ནས།

མཐོང་ཐོས་དྲན་པའི་མྱོང་ཚོར་འདི་རུ་སྤེལ།

བློ་ལྡན་ཚོགས་ཀྱི་རྣམ་དཔྱོད་ཡངས་པོ་རུ།

སྤེལ་བའི་མྱོང་ཚོར་རྟགས་ནས་དཔྱད་པ་འཚལ།སརྦ་མངྒ་ལཾ།