དོན་འགྲུབ་བཀྲ་ཤིས།
དེ་རིང་ཀོང་པོའི་ལོ་གསར་ཚེས་གཅིག་ཡིན་པས་རྒྱ་གར་ལྷོ་ཕྱོགས་སྦེལ་ཀོབ་ཏུ་ཀོང་པོ་མི་མང་གིས་ལོ་གསར་སྲུང་རྩི་བྱེད་བཞིན་ཡོད་འདུག
དེ་རིང་ཞོགས་པར་སྦེལ་ཀོབ་ལུགས་བསམ་གཞིས་ཆགས་གྲོང་སྡེ་གསུམ་པའི་ནང་ཀོང་པོའི་ལོ་གསར་སྲུང་གཙི་བྱས་ཡོད་པ་དང་། སྐུ་མགྲོན་གཙོ་བོ་རྣམ་གྲོལ་བཤད་སྒྲུབ་དར་རྒྱས་གླིང་གི་སྨིག་ཚང་སྤྲུལ་སྐུ་རིན་པོ་ཆེ་དབུ་བཞུགས་ཐོག ད་ལོར་སྦེལ་ཀོབ་གསར་རྙིང་གཉིས་དང་ཧོང་སུར་རབ་རྒྱས་གླིང་། ཀོ་ལེ་གྷལ་སོགས་ནས་ཀོང་པོའི་མི་མང་འཛོམས་འདུག
དེ་རིང་ཉིན་གོང་རྒྱབ་ནས་སྐྱེས་པ་རྣམས་ཀྱིས་མདའ་འཕེན་པ་དང་མཆོད་ཆང་འདེགས་པ། གླུ་གཞས་གཏོང་བ། ཁ་བཏགས་སྒྲོན་པ་སོགས་བྱེད་སྒོའི་ཞབས་ཞུའི་ལས་ཀ་བྱེད་ཀྱི་ཡོད་པ་ཕུད། བུད་མེད་རྣམས་མཉམ་འཛོམས་ཀྱིས་རྩེ་དགར་རོལ་གྱི་ཡོད་པ་དང་། ལོ་ལྟར་ཀོང་པོ་ཚོས་སོ་སོོོོོོོོོའི་གཞིས་ཆགས་ནང་ཀོང་པོའི་ལོ་གསར་སྲུང་གཙི་གནང་གི་ཡོད་པ་རེད།
བོད་ཁུལ་གཞན་དང་འདྲ་བར་བོད་ཟླ་དང་པོའི་ཚེས་གཅིག་ཉིན་ཀོང་པོས་ལོ་གསར་གཏོང་གི་ཡོད་མོད། འོན་ཀྱང་ལོ་རྒྱུས་ཀྱི་བཤད་རྒྱུན་དུ། ཕྱི་ལོའི་དུས་རབས་བདུན་པའི་ནང་ཉིང་ཁྲིར་བྱང་ཕྱོགས་ཧོར་པས་བཙན་འཛུལ་བྱས་པའི་ལོ་དེའི་སྟོན་མཇུག་ཏུ། ཀོང་པོའི་དཔོན་ཨ་སྐྱིད་རྒྱལ་པོས་ཀོང་པོའི་སྐྱེས་པ་རྣམས་ཁྲིད་དེ་དམག་ལ་ཆས་པ་དང་། སྐབས་དེར་ལོ་གསར་བསླེབ་པར་དུས་ཡུན་རིང་པོ་མེད་པས་མི་རྣམས་ཁྱིམ་དང་བྲལ་འདོད་མེད་པར་བརྟེན། ཨ་སྐྱིད་རྒྱལ་པོས་དམག་ནི་མ་བརྒྱབ་དཀའ་མེད་རེད། ལོ་གསར་ནི་མི་གཏོང་ཐབས་མེད་ཡིན། ལོ་གསར་མ་བཏང་ཚེ་དམག་རྒྱག་རྒྱུའི་བསམ་བློ་མེད་པས་ཀོང་པོའི་ལོ་གསར་ཟླ་བཅུ་པའི་ཚེས་གཅིག་ཉིན་གཏོང་རྒྱུ་ངས་གཏན་འཁེལ་བྱ་རྒྱུ་ཡིན། ང་ཚོས་བཟའ་བཏུང་ཡིད་ཚིམ་པ་ཞིག་བྱས་ཏེ་དམག་རྒྱག་པར་བསྐྱོད་ཆོག་ཅེས་ཐག་བཅད་དེ། ལོ་གསར་བཏང་ནས་དམག་ལ་ཆས་པ་དང་། མཐའ་མའི་རྒྱལ་ཁའང་ཐོབ། དེ་ནས་བཟུང་ཀོང་པོའི་མི་མང་གིས་ལོ་རེའི་བོད་ཟླ་བཅུ་པའི་ཚེས་གཅིག་ཉིན་ལོ་གསར་གཏོང་བའི་ལུགས་སྲོལ་འདི་རྒྱུན་མ་ཆད་པར་གནས་ཡོད་པ་རེད།
ཀོང་པོའི་ལོ་གསར་ཚེས་གཅིག་ཉིན་གྱི་ཞོགས་པར་ཀོང་པོ་བ་ཚོས་བྱ་སྐད་དང་པོ་དང་འགྲོགས་ནས་མལ་ལས་ལངས་ཏེ་ཆུ་ཕུད་ལེན་པ་དང་། གྲོང་མི་རྣམས་མཉམ་འཛོམས་ཀྱིས་ཡུལ་ལྷ་གསོལ་བ་དང་རིམ་བཞིན་གཞས་དང་ཆང་སོགས་དགའ་སྟོན་ལ་རོལ་བ་རེད། དེ་ནས་ཚེས་གཉིས་དང་གསུམ་སོགས་རིམ་བཞིན་གྲོང་པ་ཁྱིམ་མཚེས་དང་ཕ་མ་སྤུན་མཆེད་སོགས་ཕན་ཚུན་བར་འགྲོ་འོང་བྱས་ནས་བཟའ་བཏུང་གི་ལོངས་སྤྱོད་ལ་རོལ་བ་ཡིན་པ་རེད་འདུག
རྒྱ་གར་ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས་ནས།
་་་་་་་་་་ དེ་རིང་ཉིན་གོང་རྒྱབ་ནས་སྐྱེས་པ་རྣམས་ཀྱིས་མདའ་འཕེན་པ་དང་མཆོད་ཆང་འདེགས་པ། གླུ་གཞས་གཏོང་བ། ཁ་བཏགས་སྒྲོན་པ་སོགས་བྱེད་སྒོའི་ཞབས་ཞུའི་ལས་ཀ་བྱེད་ཀྱི་ཡོད་པ་ཕུད། བུད་མེད་རྣམས་མཉམ་འཛོམས་ཀྱིས་རྩེ་དགར་རོལ་གྱི་ཡོད་པ་དང་། ལོ་ལྟར་ཀོང་པོ་ཚོས་སོ་སོོོོོོོོོའི་གཞིས་ཆགས་ནང་ཀོང་པོའི་ལོ་གསར་སྲུང་གཙི་གནང་གི་ཡོད་པ་རེད། ་་་་་་་་་་
་
ཉིན་གོང་རྒྱབ་ནས་་་་་་
འདི།
ཉིན་གུང་ངམ། ཉིན་དགུང་རྒྱབ་ནས་
ལ་བཅོས་དགོས།
ཀོང་པོ་བ་ཚོས་ལོ་ལྟར་མཐུན་མོང་མ་ཡིན་པའི་ལོ་གསར་སྲུང་བརྩི་ཞུ་གསོལ་ཡོད་ཀྱང་ཀོང་པོ་བ་ནང་ཁུལ་མཐུན་ལམ་ཧ་ཅང་སྐྱོ་པོ་ཡོད། རྒྱུ་མཚན་ནི་ཀོང་པོ་བའི་མི་ཕལ་ཆེ་བ་ཁམས་པའི་མི་རིགས་འདྲེས་ནས་ཡོད་པ་ལས་ཀོར་པོའི་མི་རིགས་གཙང་མ་ཞིག་ཧ་ཅང་དཀོན་པོ་ཡིན་པ་དང་གཅིག བོད་ནང་ཆོས་ལུགས་ཀྱིས་འཐེན་འཁྱེར་ཡོད་སྐོར་གོ་རྒྱུ་མེད་ཀྱང་རྒྱ་གར་ནང་སྐབས་ཤིག་ཆོས་ལུགས་ཀྱི་འཐེན་འཁྱེར་ཕྲན་བུ་ཐེབས་ཡོད་པ་དང་གཉིས། དེའི་རྗེས་མདོ་སྟོད་དང་དབུ་གཙང་ཁོངས་གང་དུ་གཏོགས་ཀྱི་ཡོད་མེད་སྐོར་མི་མཐུན་པའི་ལབ་གླེང་མང་པོ་བྱུང་ཡོད་པ་དང་གསུམ་ཡིན། ད་ལྟའང་ན་ཚ་དེ་ཤུགས་ཆེན་པོ་གནས་ཡོད། མདོ་སྟོད་དབུས་གཙང་གི་རྩོད་སྙོགས་འདིའི་བྱེད་ལྟེ་གཙོ་བོ་ཁག་ནི་དྲི་མེ་གོང་ཁྱིམ་ཚང་། སྦེལ་ཀོབ་ཉིང་ཁྲི་བ། བདེ་སྐྱིད་གླིང་གི་སྤྱི་ཟུར་ཀོང་པོ་བ། གཞན་ཀོང་པོ་བ་སྤྱི་ཟུར་ཞིག་ཀྱང་ཡོད།
སྟབས་ལེགས་པ་ཞིག་ལ་བོད་ནང་གི་ཀོང་པོ་བའི་དབར་ལ་དེ་ལྟ་བུའི་སྙོགས་གློང་ཡོད་པ་གོ་ཐོས་མ་བྱུང་། ཡིན་ནའང་བོད་ཀྱི་ཕྱི་ན་གནས་པའི་ཡུལ་གྱར་དུ་ཡོད་པ། དཔེར་ན། རྒྱ་གར། ཨ་རི། ཁེ་ན་ཊ། སུད་སི་ལགས་སོགས་པའི་ནང་ལོ་གསར་གཏོང་སྲོལ་རྒྱུན་ལྡན་ཞིག་ཆགས་ནས་ཡོད་པ་དེ་དགའ་བསུ་ཞུ་འོས་པ་ཞིག་རེད། དེ་དག་གཅིག་སྒྲིལ་ནི་ཡོང་ཐབས་ཤིན་ཏུ་དཀའ་བ་ཡིན། མ་འོངས་པར་མི་ཐོག་རྗེས་མ་ཚོའི་དབར་ལ་གཅིག་སྒྲིལ་ཞིག་ཡོང་བའི་སྨོན་འདུན་ཞུ། བཀྲ་ཤིས་བདེ་ལེགས།
ཀོང་པོའི་ལོ་གསར་དབུས་པའི་ལོ་གསར་གཙང་པའི་ལོ་གསར་ཁམམས་པའི་ལོ་གསར་ཨ་མདོའི་ལོ་གསར་འབྲོག་པའི་ལོ་གསར་མངའ་རིས་ལོ་གསར་ཧོར་གྱི་ལོ་གསར་གླིང་གི་ལོ་གསར་ཡི་ཤུའི་ལོ་གསར་ཧིན་འདུའི་ལོ་གསར་ནང་པའི་ལོ་གསར་ཁ་ཆེའི་ལོ་གསར་འགྲོ་བ་སེམས་ཅན་ཐམས་བཅས་ཀྱི་ལོ་གསར་ལ་བཀྲིས་བདེ་ལེགས་ཞུ་ཐུགས་རྗེ་ཆེ་བཀྲིན་ཆེ་།