ཨ་ཡིས།
དཔྲལ་བའི་མིག་ནས་སེམས་ཀྱི་ཨ་ཇོ་བོར་ཐལ།
ནང་གི་ཁོག་ཏུ་སྤུན་ཟླའི་ཡོད་ཚད་ལྷག་པས།
དམར་པོ་སྙིང་གི་གདུང་འབོད་ཨ་ཙ་མ་དེ།
སུ་ཡི་ཤ་དང་རུས་པའི་གསེང་ནས་བཞུར་སོང་།
ནམ་མཁའི་ལྷ་མོས་བོད་ལ་གནང་བའི་ལེགས་སྐྱེས།
ཕ་ཡུལ་སྤང་གི་མེ་ཏོག་ཚལ་ནས་འཁྲུངས་པའི།
མི་བུའི་ནོར་བུ་ན་གཞོན་ནང་གི་འོད་ཟེར།
གླིང་ཚང་ཁྱེད་ཀ་དྲན་པ་བུ་མོས་བསྒུག་ཡོད།
གྲེ་སེར་འབྲོང་གི་ཚུགས་ཀ་སྲ་མོ་ཉིད་ནས།
ཚང་ལ་ཁྲུང་ཁྱུ་འཕུར་ཚུལ་ཡག་མོའི་ཉམས་དང་།
ཅང་ཤེས་མཆོག་གི་བང་རྩལ་འགྲོས་ཀྱི་བཟོ་ལྟས།
དེད་དཔོན་ཁྱེད་རང་ད་ལྟ་གང་ན་ཕེབས་ཀྱིན།
དཔའ་བོ་གཡུལ་སར་ཕྱིན་པའི་ཤུལ་གྱི་བདག་མོས།
སེམས་དང་མིག་གི་རྒྱང་མཐོང་ཕྲག་པར་བླངས་ནས།
ཉིན་མཚན་གཉིས་ཀྱི་དུས་ཚོད་འཁོར་ལོའི་ནང་ན།
མེལ་ཚེ་བྱ་ར་བགྱིས་པའི་ཚུལ་དེ་ངས་སྐྱོང་།
ཡི་ཤེས་རང་གཟུགས་གོང་གི་དཀོན་མཆོག་ལྷ་ཡི།
འཕྲིན་ལས་སྤྲུལ་བསྒྱུར་གོ་ཆ་སྟོང་གི་ཁྲབ་ཀྱིས།
སྐྱེས་ཆེན་ཁྱེད་ཀྱི་བར་ཆད་དྲུངས་ནས་དབྱུང་ཆེད།
གསོལ་འདེབས་ངག་གི་ང་རོ་དྲག་ཏུ་བཏབ་ཡོད།