བཱིརྱ་ས་ར།
དེ་རིང་ཁ་སང་མཚོ་ལྷོའི་སྐད་ཡིག་སློབ་གསོ་ཟེར་བ་ཞིག་གིས་མི་མང་པོ་ཞིག་ལ་རླུང་ལང་དུ་བཅུག་ནས་རྩོམ་ཡིག་སྤེལ་གྱིན་འདུག་ལ་དེ་ཡི་ལ་ལ་ཞིག་གིས་ཁ་ཕར་འཁོར་ནས་རྒོལ་བ་ལས་མདུང་རྩེ་ནང་ལ་གཏད་པ་ལྟ་བུའི་བྱེད་སྟངས་མ་ཤེས་པ་དང་ཡང་ལ་ལས་གནད་ལ་ཁེལ་བའི་རྩོམ་ཡིག་སྤེལ་བ་འདྲ་བའི་ཚོར་སྣང་ཞིག་ཡོང་གི ། ཡིད་ཕངས་པ་ཞིག་ལ་བོད་ཡིག་འབྲི་སྩལ་ལྡན་ནའང་རྒྱ་རྩོམ་སྤེལ་ཡོད་པ་ལྟ་བུ་རེད་ལ་དེ་ལ་ཡང་ཁྱབ་རྒྱ་ཡི་ཕྱོགས་ནས་དགེ་མཚན་ཡོད་པ་འདྲ། གང་ལྟར་སུ་ཡིན་ཡང་སེམས་ཤུགས་ཀྱིས་བྲིས་པ་ཤ་སྟག་ཡིན་པས་དགའ་བའི་གནས་སོ། ང་ལ་མཚོན་ནའང་སྐད་ཡིག་ཕྱོགས་ལ་དོ་སྣང་ཡོད་ཁུལ་གྱིས་དོན་དག་དེའི་སྐོར་ལ་ཞིབ་ལྟ་བྱེད་སྐབས་ཚོར་བ་སྐྱེན་པོ་ཞིག་གིས་ཡོངས་སུ་བཅུམ་སོང་། སྡུག་བསྔལ་དེའི་ལྕི་ཚད་ནི་ཉེ་དུ་ཞིག་ཤི་སོང་བ་ལྟ་བུའི་ཚོར་སྣང་དང་ཙོག་ནའང་དེ་ཡི་ཕྱོགས་ལ་མདང་རྒྱག་ལ་སོང་ནའང་དེ་ལ་མདང་རྒྱག་གི ། དེ་བས་དེ་སྐོར་ནས་ཅུང་ཟད་རེ་འབྲི་ཐུབ་ན་སྙམ་ནོར་བ་ཡོད་ན་བཟོད་གསོལ་སྔོན་ལ་བྱེད། དེས་ན་ད་ཐེངས་ཀྱི་གླེང་གཞི་ནི་ཀྲང་ཝིན་ཁེ་ཞེས་པའི་མཚོ་ལྷོ་ཁུལ་གྱི་དྲུང་ཆེའམ་ཧྲོའུ་ཅུ་ཡིས་སླང་བ་ཡིན་པ་འདྲ། ཡིན་ནའང་དང་པོ་གླེང་གཞིས་སྐོར་ནས་ཅི་བཤད་མ་ཤེས་ཡང་མཚོ་ཁའི་གླང་རའི་གཏམ་རྒྱུད་དང་འདྲ་བོ་ཞིག་ཡིན་ས་རེད། རིས་ཀྲང་ཅན་པའི་ཐེངས་གཉིས་པའི་ལན་ཞེས་པའི་བོད་རྒྱ་སྦྲག་མ་ཞིག་འདུག་པ་དེའི་སྐོར་ནས་བཤད་ན། རྩོམ་དེའི་ནང་དོན་གནད་བསྡུས་འདི་འདྲ་བཤད་ཀྱི་འདུག་སྙམ་བྱུང་བ་ནི། ༼ད་ཐེངས་རྩིས་དངོས་རྫས་གསུམ་དབྱིན་སྐད་ལམ་ནས་ཁྲིད་རྒྱུ་བྱས་ཤིང་བོད་སྐད་ལམ་ནས་མི་སློབ་དགོས་པའི་འཆར་གཞི་གདེང་དོན་ནི། ད་བར་དུ་རིག་གནས་འདི་དག་བོད་སྐད་ཡིག་སྟེང་ནས་བསླབ་ཡང་སློབ་མའི་རིག་གནས་ཆུ་ཚོད་མཐོར་འདེགས་བྱེད་མ་ཐུབ། དེ་བས་ང་ཚོས་སློབ་གསོའི་ཐབས་ལམ་ལེགས་བཅས་ཀྱིས་སློབ་མའི་ཤེས་ཡོན་གོང་འཕེལ་མ་བཏང་ན་རོང་འབྲོག་མང་ཚོགས་ཀྱི་དཔལ་འབྱོར་ཡར་རྒྱས་གཏོང་མི་ཐུབ་ལ་དཔལ་འབྱོར་ཡར་རྒྱས་འགྲོ་བའི་རྒྱུ་རྐྱེན་སྐྲུན་དགོས་ན་སློ་གསོ་ཅེ་ལེགས་སུ་གཏོང་དགོས། དེ་བས་ང་ཚོས་རྩིས་དངོས་རྫས་གསུམ་དབྱིན་ཡིག་ལམ་ནས་ཁྲིད་རྒྱུ་བྱས་ན་ཕན་པ་འབྱུང་ངེས། རྒྱུ་མཚན་ནི་རྒྱ་ནག་མི་རིགས་ཀྱིས་ཀྱང་སྔོན་དབྱིན་ཡིག་སྟེང་ནས་མཚན་རིག་བསླབ་ནས་རྒྱལ་ཁ་ཐོབ་པ་རེད། ཁོ་ཚོ་ཕྱིར་རྒྱལ་ལ་སོང་དེ་སློབ་སྦྱོང་བྱས་ནས་ཕྱིར་ཡོང་རང་རྒྱལ་ལ་ཕྱིས་རྗེས་ཆེན་པོ་གཞག་ཡོད་ལ་ང་ཚོ་ཁོ་ཚོའི་རྗེས་སུ་འབྲང་ནས་དབྱིན་ཡིག་ལམ་ནས་མཚན་རིག་བསླབ་ནས་ཕྱི་རྒྱལ་ལ་སློབ་སྦྱོངས་ལ་གཏོང་དགོས། ང་ཚོའི་ད་ལྟའི་བོད་ཡིག་སྟེང་མཚན་རིག་སོགས་བསླབ་པ་འདིས་ས་རྒྱ་ཆོད་ཀྱི་མེད་པ་ནི་བོད་རིགས་ལས་བྱེད་མང་པོ་ཞིག་གིས་རང་གི་ཕྲུ་གུ་རྒྱའི་སློབ་གྲྭ་ལ་འཇོག་གི་ཡོད་པ་འདིས་མི་ཤེས་སམ། ཤེས་རློམ་འགས་ང་ཚོའི་སློབ་གསོ་ལ་བར་ཆད་བྱེད་པ་ནི་མི་རིགས་ཀྱི་ལོ་རྒྱུས་ཀྱི་ནག་ཉེས་པ་ཆགས་ཀྱི་རེད།༽ཅེས་པ་འདི་རེད། ངས་འདིའི་སྐོར་ནས་དོན་ཚན་ཁ་ཤས་གླེང་འདོད།
དང་པོ།
དང་པོ་འདི་ལྟ་བུའི་སློབ་གསོའམ་བྱ་འགུལ་གྱི་བྱུང་རིམ་ནི། སྤྱིར་ན་དཀྱིལ་རྒྱལ་གྱིས་དྲུག་ཅུ་རེ་གྲང་ནས་སྐད་གཉིས་སློབ་གསོ་དར་སྤེལ་གྱི་འགོ་བཙུག་ཅིང་སྐབས་དེ་དུས་ནས་རྒྱའི་སྐད་ཡིག་དར་སྤེལ་གཏོང་བའི་དམིགས་ཡུལ་ཡོད་པ་སྨྲས་མ་དགོས་པ་ཞིག་རེད། འོན་ཀྱང་དེ་དུས་སྐད་ཡིག་ཡོངས་རྫོགས་རྒྱ་སྐད་རྐྱང་བར་སློབ་རྒྱུ་བྱས་ཡང་མི་འདོད་པའི་རྣམ་འགྱུར་ཙམ་སྟོན་མི་ཐུབ་པ་ཐག་གིས་ཆོད། ཡིན་ནའང་རྩ་བའི་དམར་པོའི་རང་ལུགས་ནི་མི་རིགས་དང་དེའི་སྐད་ཡིག་ལ་ལྡོག་རྫུས་མི་གཏོང་བར་སྲུང་སྐྱོབས་བྱེད་པ་རེད། དགོས་སུ་འདི་ཚང་གིས་ཀྱང་དངོས་སུ་མི་རིགས་སྐད་ཡིག་མེད་པར་གཏོང་བའི་ཁྲིམས་ཤིག་བསྒྲགས་ན་ལོ་རྒྱུས་ཀྱི་ཉེས་ཅན་པ་རུ་འགྱུར་ཞིང་མ་མཐའ་ཡང་རྒྱལ་ཁབ་དང་ཚོགས་སྡེ་དག་གིས་ལོ་ནས་ལོར་ངན་ཕྱོགས་ནས་རྒྱུན་མི་ཆད་པར་གླེང་གི་རེད། དེ་བས་ཁོ་ཚང་གིས་བཙན་བཀའ་བྱེད་པར་གདོང་འཇིགས་བྱེད་པ་རེད། དེ་བས་མི་རིགས་སྐད་ཡིག་ཕྱོགས་ནས་ཐོབ་ཐང་ཡོད་འདོག་འདོག་གི་བཅས་མའི་འཛུམ་ཞིག་ཞིག་གི་ངོ་གདོང་ཞིག་ཚུར་མངོན་པའི་རྒྱབ་ལོག་ན་སྐད་དང་ཡི་གེ་འཆི་ལམ་ལ་འདེད་པའི་མགོ་ལྐོག་སྐམ་པོ་ཞིག་གི་འདྲེ་ཡིས་ཉམས་ཚད་བྱེད་ཀྱི་ཡོད་པ་འདྲ་བའི་རྣམ་རྟོག་ཅིག་སུ་ལའང་ངང་གིས་འཁོར་འོང་བ་འདི་རེད། དེ་ཡང་ཁོ་ཚོས་ཇུས་ངན་བཤམས་པ་་དག་བདག་གིས་དྲན་ཚོད་ནི། ༡ པན་ཆེན་རིན་པོ་ཆེའི་བཀའ་སློབ་ཏུ་སྐབས་དེ་དུས་ཡང་བོད་ལྗོང་སློབ་གྲྭ་ཆེན་མོའི་སྐད་ཡིག་བོད་ཡིག་གིས་ཁྲིད་ཀྱི་ཡོད་པ་རྒྱ་ཡིག་ལ་སྒྱུར་འདུག་པ་ཁོང་གིས་བོད་ཡིག་གིས་ཁྲིད་རྒྱུ་གཏན་འབབ་གནང་འདུག་པ་བསྟན་ཡོད། ༢ གཅིག་དགུ་གོ་གསུམ་ཡས་མས་སུ་བོད་ལྗོང་བོད་ཀྱི་སློབ་ཆེན་ཞིག་སྒོ་རྒྱབ་པའམ་ཅིག་བཅས་པར་བདག་གིས་རྩོམ་ཡིག་ཞིག་ལས་འཐོང་། ༣ ཉིས་སྟོང་བཅུ་ལོའི་ཟླ་དགུ་བའི་ཚེས་བཅོ་བརྒྱད་ཉིན་ཟི་ལང་ནས་སློབ་མས་བོད་ཡིག་གི་བདག་དབང་ཆེད་ཡར་ལང་བྱས་་ཤིང་བླ་བྲང་གསང་ཆུ་ནས་དེའི་རྗེས་སུ་འབྲང་ནས་ཡར་ལང་བྱས། བོད་མིའི་སྒྲིག་འཛུག་ཕྱོགས་ནས་སྡ་སྟེང་བོད་ཁྱིམ་དང་བྷང་ལོར་མཐོ་སློབ་སོགས་སློབ་གྲྭ་ཁག་གིས་སྐད་འབོད་བྱས། ལྷོ་གཞིས་མང་པོ་ཞིག་གིས་སྐད་འབོད་བྱས། སྐབས་དེར་ང་ཚོས་བརྙན་འཕྲིན་ལས་མཐོང་བ་ནི་རྒྱ་མི་འབྲེལ་ཡོད་དཔོན་རིགས་ཤིག་གིས་ང་ཚོས་རྒྱའི་སྐད་ཡིག་གཙོ་བོ་བྱས་ནས་བོད་ཡིག་ཕལ་བར་འཇོག་དགོས་དོན་ནི་མི་རིགས་མང་བོས་རྒྱ་སྐད་མཐུན་མོང་དུ་གོ་བར་བྱས་ནས་མི་རིགས་མཐུན་སྒྲིལ་ཡར་རྒྱས་གཏོང་རྒྱུར་དམིགས་པ་ལས་བོད་ཡིག་མེད་པར་ནམ་ཡང་མི་གཏོང་བློ་བདེ་བོ་གྱིས་ཞེས་བཤད་འདུག སྐབས་དེར་ཟི་ལང་ནས་ལས་བྱེད་རྒན་ཡོལ་ཉིས་བརྒྱ་སྐོར་གྱིས་མཚོ་སྔོན་ཞང་ཆེན་གྱིས་བོད་རིགས་སློབ་མའི་སློབ་སྦྱོངས་ཀྱི་ཁྲིད་གཞི་མང་བོ་ཞིག་རྒྱ་སྒྱུར་བྱས་པར་མི་འདོད་པའི་དགག་ཡིག་བྲིས་པ་བཅས་ཀྱིས་ཇུས་ངན་ཕྱིར་འཐེན་བྱས། ༤ མཚོ་ལྷོ་ཁུལ་ལ་མཚོན་ན་སྔོན་ཀུན་གཟིགས་པཎ་ཆེན་རིན་པོ་ཆེ་དང་ཁུལ་དོན་གྲུབ་རྒྱལ་རྣམ་གཉིས་ཐུགས་ཡིད་གཅིག་འདྲེས་ཀྱིས་བོད་ཁུལ་ཡོངས་ལས་ཁུལ་འདི་རང་སྐྱོངས་གཙང་མ་ཞིག་ཏུ་སྔོན་ལ་སྒྱུར་འདོད་ཀྱི་ཐུགས་ཀྱི་འདུན་པ་གནང་ཞིང་ཀུན་གཟིགས་སྣང་བ་མཐའ་ཡས་ནས་ཁོང་ཐེངས་རྗེས་མར་ཕེབས་དུས་མཚོ་ལྷོ་རང་སྐྱོངས་ཁུལ་གཙང་མ་ཞིག་ཏུ་སྒྱུར་གྱི་ཡིན་ཞེས་དངོས་སུ་གསུང་། དོན་གྲུབ་རྒྱལ་ནས་ཀུན་གཟིགས་སྣང་བ་མཐའ་ཡས་ཀྱི་བླ་ཤེད་བྱས་ནས་རྒྱ་དག་ལ་བོད་ཡིག་འདོན་དུ་བཅུག་ཅིང་དོན་གྲུབ་རྒྱལ་ཁོ་མི་འཐོང་ས་ནས་རྒྱ་དག་གིས་མི་འདོད་པའི་སྡིག་མོད་བྱེད་ལ་ཁོ་སླེབས་ཚེ་ཀ་ཁ་ག་ང་ཞེས་སྐད་ཆེན་པོས་འདོན་པའི་གཏམ་རྒྱུད་དགོད་བྲོ་བ་ཞིག་ཡོད་པ་དེ་རེད། འཇིག་རྟེན་མི་རྟག་པ་ནི་མི་རྟག་པ་རང་རེད་དེ་ལྟ་བུའི་དམ་པ་དག་གསེར་གྱི་གདོང་མ་བཞིན་ཆག་ཅིང་དངུལ་གྱི་ཀྭ་བ་བཞིན་འགྱེལ་སོང་བའི་རྗེས་ཤུལ་ན་མཚོ་ལྷོ་ཁུལ་ནི་ས་གནས་དཔོན་ངན་དག་གིས་ཆབ་སྲིད་ངན་པ་ལག་སྟར་བྱེད་སའི་ཡུལ་ཞིག་ཏུ་གྱུར་བ་ནི་རུང་བོ་དགོན་པའི་དགེ་སྐོས་ཀྱིས་ལོ་སྔོན་མར་མཚོ་ལྷོ་ནས་ཆབ་སྲིད་ཚོགས་འདུའི་སར་གཏམ་བཤད་བྱས་པའི་ཚིག་གི་ཤུགས་ལ་གསལ་བོ་མི་འདུག་གམ།
གཉིས་པ་ནི།
ད་ནི་ཀྲང་གི་ལན་ལ་ཐད་ཀར་རྗོད་ན། ༡དབྱིན་ཡིག་བསླབ་ནས་ཕྱི་རྒྱལ་ལ་སློབ་སྦྱོངས་ལ་གཏོང་འདོད་ཟེར་བར། དཀྱིལ་རྒྱལ་ཁབ་གཞུང་གིས་ཆབ་སྲིད་ཀྱི་རྣམ་རྟོག་གིས་བོད་རིགས་ཡོངས་ཕྱི་ལ་ཐོན་པར་བར་ཆད་བྱེད་པ་མ་གཏོག་དོན་དམ་པའི་བོད་རིགས་གཞོན་སྐྱེས་དག་ཕྱིའི་སློབ་སྦྱོངས་ལ་བཏང་ནས་མིག་རྒྱ་སྐྱེད་ཀྱི་འཇུག་འདོད་ན་ཁོ་ཚོར་རང་གི་རིག་གཞུང་དྲི་མ་མེད་པ་བོར་དུ་མ་འཅུག་པར་མཉམ་དུ་སྣམ་ཕེབས་སུ་ཆུག་དང་འཛུམ་གྱིས་བསུ་མ་བྱེད་མཁན་མང་དག་ཅིག་ཡོད་ངེས། མགོ་སེར་ཚོ་བོད་པར་དགའ་ལ་དེ་ནི་བོད་མི་རིགས་ཀྱི་རིག་གཞུང་གིས་ཡིན་རྒྱུ་རེད། ཁོ་ཚོར་རང་གི་སྐད་ཡིག་བོར་དུ་བཅུག་ནས་ཅི་བྱེད། བོད་པ་ཚོར་རང་གི་རིག་གཞུང་རླག་ཏུ་བཅུག་ན་སུ་ལ་ཕན། ༢ ཞང་འབྲོག་དཔལ་འབྱོར་ཡར་རྒྱས་མ་བྱིན་པ་ཤེས་ཡོན་མེད་པས་ལན་ཟེར་བར། ཏུན་རྒད་པོས་གནའ་སྔ་མོ་ནས་ཁོའི་ཕ་ཡུལ་ནས་མགོ་བརྩམས་ཏེ་དཔལ་འབྱོར་སྒོ་འབྱེད་བྱས་པ་ནས་དུས་ད་ལྟའི་བར་དུ་བོད་མི་ཚོས་རེ་ལྟོས་བྱས་ནས་བསྡད་ཡོད་པ་འདི་རེད། ནུབ་རྒྱུད་ཐོན་འབྱེད་ཆེན་མོ་ཡི་རླབས་ཆེན་གྱི་བྱ་བཞག་ཅེས་ཁ་དབྱངས་ཁྲོད་ས་ཁུལ་འདིའི་མང་ཚོགས་ཀྱི་ཚོ་བ་ཡར་རྒྱས་གཏོང་གི་ཡིན་ཞེས་མང་དུ་བཤད་ཡང་ཆེས་རིན་ཐང་གཞལ་ཐབས་བྲལ་བའི་རིན་ཆེན་གཏེར་ཁ་གང་ཞིག་ལ་ཁྱེར་བ་མ་ཤེས་ཡང་ཞང་འབྲོག་མང་ཚོགས་ད་དུང་ཡར་རྒྱས་ཅུང་ཟད་ལས་སོང་མེད་པ་མངོན་སུམ་འདི་རེད། དཀྱིལ་རྒྱལ་གྱི་འོ་ལམ་ཕིས་ཁི་ཡི་རྩེ་མོའི་སྐབས་སུ་རྩ་ཆེ་བའི་རིན་ཆེན་རྡོ་གཡང་གྲི་ཡི་ལག་རྟགས་གང་མང་ཞིག་ཕངས་སེམས་མེད་པར་གཞན་ལ་ལག་རྟགས་སུ་སྤྲད་ཡོད། དེ་དག་ནི་ཀྲང་གི་ཕ་ཡུལ་ལམ་དེའི་ཕྱོགས་མཚོ་ནུབ་བོད་ཁུལ་ནས་སྔོག་འདོན་བྱས་པ་ཤ་སྟག་རེད་ཅེས་ཡུལ་དེའི་མི་ཞིག་གི་ཁ་ནས་ང་ཡིས་ཐོས། ངས་འདི་བྱས་བཤད་དོན་བོད་ས་ནས་ཁྱེར་བའི་གཏེར་ཁ་ས་གནས་ཀྱི་མི་ཚོར་མ་ཐོབ་པ་རེད་ཟེར་གྱི་ཡོད། མ་ཟད་མང་ཚོགས་ཀྱི་ཞང་ས་རྩ་སར་སྒྱུར་ནས་ད་དུང་དེ་ཡིས་མ་ཕན་པར་རྩ་སའི་སྟེང་ལ་ཚེར་མ་བཙུག ཁ་ནས་རྨ་འབྲུ་རྫ་གསུམ་གྱི་མགོ་ཁུངས་སྲུང་སྐྱོབས་ཆེད་ཡིན་པར་བཤད། འབྲོག་པའི་ཕྱུགས་སྲོག་གོང་མར་ཕབ་པག་པ་གཅིག་ལ་སྒོར་ལྔ། འདོར་ན་བོད་ཀྱི་ཞང་འབྲོག་ས་ཁུལ་ནས་གཏེར་ཁ་སྔོག་ཡང་ཁོ་ཚོར་ཅི་ཡང་མ་ཐོབ། བཟོ་གྲྭ་མེད། གདོད་མ་ནས་གོམས་པའི་འཚོ་བ་སྐྱེལ་སྟངས་ལ་འགྱུར་བ་བཏང་བས་མི་རྣམས་ལ་ས་ལས་བྱེད་རྒྱུ་ལས་ལམ་ཁ་གང་ཞིག་འདུག་སོམ་དང་། ༣ བོད་ཀྱི་ལས་བྱེད་བརྒྱ་ཆའི་བཞི་བཅུ་ཡིས་རང་གི་ཕྲུ་གུ་རྒྱའི་སློབ་གྲྭར་བསྐྱལ་ཞེས་པར། སྤྱིར་ན་གྲོང་ཁྱེར་ནས་བོད་མི་མང་པོ་ཞིག་གིས་རང་གི་ཕྲུ་གུ་བོད་ཀྱི་སློབ་གྲྭར་སྐྱེལ་གྱིན་པ་ནི་ལོ་རེ་ལས་མང་དུ་འགྲོ་ཡི་ཡོད་འདུག འོན་ཀྱང་བོད་མི་ཧམ་སེམས་དང་རང་དོན་ཚ་བོ་དག་གིས་ཕྲུ་གུ་རྒྱའི་སློབ་གྲྭར་སྐྱེལ་གྱི་ཡོད་པ་དེ་ནི་བོད་ཡིག་སྟེང་ནས་མཚན་རིག་བསླབ་པས་ཤེས་ཚད་མ་ལོན་པས་མ་ཡིན་པར་རྒྱུ་རྐྱེན་གཞན་ཞིག་ཡོད་པ་ནི་ཁ་སང་གི་རྩོམ་ཡིག་དེ་དག་གིས་གནད་དོན་གཉིས་སུ་དྲིལ་ཡོད། གཅིག་ནི་མཚན་རིགས་སོགས་བོད་སྒྱུར་བྱེད་ཐུབ་མེད་པ། གཉིས་ནི་གཞུང་ཕྱོགས་ནས་བོད་ཁུལ་ནས་བོད་ཡིག་བེད་སྤྱོད་གཏོང་བའི་ཁྱབ་རྒྱ་ཧ་ཅང་ཆུང་ལ་བེད་མེད་ལྟ་བུར་གྱུར་ཏེ་ལས་བྱེད་ས་མིག་སོགས་རྒྱ་ཡིག་སྟེང་ནས་ཚད་བཀག་བཟོས་ཤིང་བོད་ཡིག་གི་ཤེས་ཚད་རན་པོ་ཡོད་ནའང་སྣང་མེད་དུ་བཏང་ཡོད་པ་རེད། ཕྱི་མ་འདི་ནི་བོད་རིགས་ལས་བྱེད་ཙམ་མ་ཟད་བོད་མི་ཡོངས་ཀྱིས་བོད་ཡིག་ལ་ཧུར་བརྩོན་བྱེད་མི་ཐུབ་པའི་རྐྱེན་ངོ་མ་དེར་ངེས་འཛིན་ཆོག མ་འོང་པར་གཞུང་ཕྱོགས་ནས་བོད་ཁུལ་ལ་བོད་ཡིག་བེད་མེད་ཀྱི་སྦྱོར་བ་མུ་འཐུད་རྩམ་ཚེ་བོད་མི་ཚོ་ཨ་ཐང་ཆད་ནས་སྐ་རགས་ལྷོད་འགྲོ་གི་རེད་ཅེས་ངས་ཀྱང་ཐག་གིས་ཆོད།
གསུམ།
ད་ཐེངས་མཁས་དབང་དང་རྩོམ་པ་པོ། སློབ་མ། བྱིས་པའི་ཁྱིམ་བདག་སོགས་སྣ་འཛོམ་ལྡན་པའི་སྒོ་ནས་བོད་ཡིག་ལ་འགྱུར་བ་བཏང་ན་མི་བཟང་རབ་དང་རང་འཇག་འཇོག་དགོས་པའི་བསམ་འཆར་རྒྱ་ཆེར་སྤེལ་ཏེ་གནས་ལུགས་དྲང་བདེན་གྱི་ངར་སྐད་ཀྱིས་དབྱར་གྱི་རྔ་བོ་ཆེའི་སྒྲ་ལ་མགྲན་བཟོད་པར་བྱས་པ་ནི་དགའ་སྤོབས་སྐྱེས་དགོས་པའི་གནས་ཤིག་མ་ཡིན་ནམ། རེད་ཡ་ང་ཚོས་རང་གི་ལས་དབང་རང་གིས་ཐག་གཅོད་དགོས་ན་ཚང་མས་འགན་ཁུར་དང་བླངས་ཀྱིས་འཕྱར་གྲུ་མཉམ་འདེགས་བྱེད་དགོས་པ་ཅིས་མ་ཡིན། ཡིན་ཡང་འདི་ནི་ཕྱོགས་གཅིག་གི་ལས་འགུལ་ཙམ་པོ་བ་ཕ་རོལ་བའི་བྱེད་སྟངས་ལ་མི་འདོད་པའི་རྣམ་འགྱུར་ཙམ་རེད། དེ་ལས་གལ་ཆེ་བ་ནི་ང་ཚོས་ངེས་པར་བསམ་བློ་གནད་ལ་ཁེལ་བའི་སྒོ་ནས་རྗེས་རབ་པའི་སློབ་གསོའི་ཁ་ཕྱོགས་ཡག་པོ་ཞིག་ལ་ཁྲིད་རྒྱུར་འདེང་དཔོག་དགོས་པ་རེད། རང་ངོས་ནས་གྲལ་སྒྲིག་གང་ཡང་མེད་པར་གཞན་རྟེན་ལ་གོམས་ཤུགས་ཆེ་བ་འདི་ང་ཚོས་གཏན་དུ་སྤང་དགོས་པའི་ནད་ཡམ་དེ་ཡིན། བྱིས་པའི་སློབ་གསོའི་ཁ་ཕྱོགས་བྱིས་པའི་ཕ་མས་ཐག་གི་གཅོད་དགོས་པས་བྱིིས་པའི་ཕ་མ་ཡོད་ཚད་བསམ་བློ་བ་ཡིན་དགོས་སོ། བོད་སྐད་ཡིག་གི་བདག་པོ་ང་ཚོ་ཡིན་པས་བོད་སྐད་ཡིག་རྒྱུན་འཛིན་བྱེད་པར་འགལ་རྐྱེན་གང་དག་ཡོད་པ། མཐུན་རྐྱེན་ཅི་བྱས་ཚང་གི་འཇུག་དགོས་བཅས་ང་ཚོས་ཤེས་དགོས་ལས་གཞན་གྱིས་དོ་སྣང་བྱེད་དོན་ཡོད་པ་མ་རེད། ནམ་ཡིན་ཡང་རང་གིས་འགན་མ་ཁུར་བར་གཞན་གྱིས་ནམ་ཡང་བྱེའུ་ཡི་མས་བྱེའུ་ཕྲུག་ལ་འབུ་སྟེར་སྟེར་བྱས་ནས་ཡོང་སྲིད་དོན་མེད། རྒྱ་ཁབ་ཀྱི་ཁྲིམས་སུ་གསལ་བ་ནི་མི་རིགས་ས་ཁོངས་རང་སྐྱོང་གི་མི་རིགས་དག་གིས་རང་གི་རིག་གཞུང་ལ་རང་གིས་བདག་རྒྱག་ནའང་རང་དབང་ཡིན་བདག་མི་རྒྱག་ནའང་རང་དབང་ཡིན་ཞེས་པ་དེ་རེད་ལ་དེ་ཡིས་ང་ཚོ་ལྟ་བུ་ལ་སྡོམ་ཞིག་རྒྱབ་ཡོད་འདྲ་ཞིག་མི་འདུག་གམ། འཀྱིལ་རྒྱལ་ཁབ་ཀྱིས་རྒྱ་མི་རིགས་ཀྱི་སྐད་ཡིག་རྒྱ་ཁབ་ཀྱི་སྐད་ཡིག་ཡིན་ཞེས་ཁྲིམས་སུ་བཅས་པས་སྐད་ཡིག་གི་ཐོབ་ཐང་ལ་ཁྱད་པར་ཡོད་ནའང་ང་ཚོས་རང་གི་སྐད་ཡིག་ཆེད་ཧུར་བརྩོན་དང་འབད་འབུང་མང་དུ་བྱས་ཡང་ཁོ་ཚོས་བཙན་དབང་གིས་བཀག་འགོག་བྱེད་ཀྱི་མ་རེད་སྙམ། དེ་བས་ང་ཚོ་ཤེས་འཇོན་གྱི་དབྱེ་བ་དང་ཐོབ་གོ་ས་ཡི་དབྱེ་བ། སྐྱ་སེར་གྱི་དབྱེ་བ་མེད་པར་བོད་ཡིག་སྲུང་སྐྱོབ་དང་དར་སྤེལ་ཆེད་བསམ་བློ་གཏོང་བ་དང་ཁུར་འགན་ལེན་དགོས། བོད་སྐད་ཡིག་སྲུང་སྐྱོབས་བྱེད་པ་ནི་བོད་མི་རིགས་སྲུང་སྐྱོབས་བྱས་པ་རེད་ལ་བོད་ཀྱི་རིགས་བཞུང་སྲུང་སྐྱོབས་བྱས་པ་རེད་ཡ། བོད་ཀྱི་སངས་རྒྱས་སྟན་པ་སྲུང་སྐྱོབས་བྱས་པ་རེད་ཡ། རྒྱལ་བ་པཎ་ཆེན་རྣམ་གཉིས་གཙོས་པས་བོད་ལ་ཤ་ཚ་བ་ཐམས་ཅད་ཀྱིས་བོད་ཀྱི་སྐད་ཡིག་སྲུང་སྐྱོབས་ཆེད་བཀའ་སློབ་མ་གནང་བ་ཞིག་ཨེ་ཡོད་ན། ང་ཚོ་ལ་ངེས་པར་གོ་བ་ཞིག་ཡོད་དགོས། རྒྱལ་ཁབ་ཀྱི་ཁྲིམས་ནའང་མི་རིགས་སུ་ཡིན་ཡང་རང་གི་སྐད་ཡིག་དར་སྤེལ་གཏོང་བར་རང་དབང་ཡོད་པར་གསལ་བས་སྐྲག་དགོས་དོན་མི་འདུག བོད་ཡུལ་ན་བོད་ཀྱི་ཡིག་གཟུགས་ཉིན་མོ་ཞེས་ཡར་རྒྱས་ཀྱི་རྣམ་པ་མངོན་ཡང་། གནད་དོན་གཅིག་བུའི་ནད་སྐྲན་དེར་གཤག་བཅས་བྱེད་ཐུབ་ཀྱི་མེད། དེ་ནི་ས་གནས་ས་ཐོག་ནས་བོད་ཡིག་གཞུང་འབྲེལ་གྱིས་བེད་སྤྱོད་ཤུགས་ཆེན་པོ་གཏོང་གི་མེད་པ་དེ་རེད། འདི་ལ་འགྱུར་བ་ཞིག་མ་བྱིན་ན་ང་ཚོ་འདུན་དུ་སྐྱོད་ཐུབ་པ་ཁག་པོ་རེད། དེས་ན་མ་འོང་བར་དུས་དྲན་སྲུང་རྩི་བྱེད་དགོས་པ་ཡིག་གཟུགས་ཉིན་མོ་མ་ཡིན་པར་ས་གནས་གཞུང་ངོས་ནས་བོད་ཡིག་བཀོལ་སྤྱོད་ཀྱི་ཉིན་མོ་ཞིག་སྲུང་རྩི་ཐུབ་དགོས། བཀྲ་ཤིས་བདེ་ལེགས།
བོད་སྐད་ཤེས་བགྱིད་ཡོད་མེད་མི་ཤེས་ཀྱང་་་་་
https://www.facebook.com/francis.kyungu/posts/10154276481418068