ཡུ་ཅེ་ཡིས་བརྩམས། ཚེ་རིང་རྡོ་རྗེས་བསྒྱུར།
དེང་སྐབས་ཀྲུང་གོའི་ལྟ་བ་མི་མཐུན་པའི་རྩོམ་པ་པོ་ནུབ་ཕྱོགས་སུ་བཙན་བྱོལ་ལ་སོང་ན། སྔར་ཨུ་རུ་སུའི་རྩོམ་པ་པོ་སཱོལ་ཇུ་ཉི་ཚིན༼Solzhenitsyn༽་ལ་ཐོབ་པའི་དགའ་བསུ་ཆེན་པོ་དེ་འདྲ་འཐོབ་དཀའ། དུས་རབས་ཉི་ཤུའི་་ལོ་རབས་བདུན་ཅུའི་ནང་དུ། ཨ་རིའི་ཕྱི་སྲིད་བློན་ཆེན་ཁི་སིན་ཇར༼Kissinger༽གྱིས་སྲིད་འཛིན་ཧྥོ་ཌི༼Ford༽་ལ་ཁོང་སཱོལ་ཇུ་ཉི་ཚིན་དང་ཐུག་འཕྲད་མི་གནང་རྒྱུར་བསླབ་བ་བཏོན་པ་མ་ཟད། དྲན་ཐོའི་སྟེང་དུ། སཱོལ་ཇུ་ཉི་ཚིན་དང་འཕྲད་ན་སུའུ་ལེན༼Soviet Union༽ལ་ཕོག་ཐུག་གཏོང་སྲིད། ཅེས་བྲིས། དེང་སྐབས་ལྟ་སྟངས་དེ་འདྲ་འཁྱེར་མི་ནི་ཁི་སིན་ཇར་ལྟ་བུའི་དངོས་ཕན་རིང་ལུགས་ཀྱི་སྲིད་ཚོང་པ་དག་ཡིན་པའི་མི་ཚད། ཀྲུང་གོར་མ་རྩ་ཕོན་ཆེན་བཞག་པའི་རྒྱལ་མཚམས་འདས་པའི་བཟོ་ཚོང་ཚོགས་པ་ཁག་དང་ཀྲུང་གོར་འབྲེལ་ཐག་སྣ་ཚོགས་ཡོད་པའི་སློབ་གྲྭ་དང་ཐེབས་རྩ་ཚོགས་པ་དག་ཀྱང་ཡིན།
ཀྲུང་གུང་སྲིད་དབང་ནུབ་ཕྱོགས་སུ་སིམ་འཛུལ་ཐེབས་ཚད་ནི་སྔོན་ཆད་ཀྱི་སུའུ་ལེན་ལས་ཆེས་ཆེར་བརྒལ། གྲང་དམག་གི་དུས་སྐབས་སུ། སུའུ་ལེན་གྱི་དཔལ་འབྱོར་ནི་ནུབ་ཕྱོགས་ཀྱི་དཔལ་འབྱོར་ལ་འབྲེལ་བ་ཆེར་མེད་པ་དང་། དེ་དུས་ཨ་རིའི་དུད་ཚང་དཀྱུས་མ་ཞིག་ན་*སུའུ་ལེན་གྱིས་བཟོས་པའི*རྒྱུ་རྫས་ཡོད་མི་སྲིད། ཡིན་ནའང་དེང་སྐབས་ཀྲུང་གོ་ནི་གོ་ལ་ཧྲིལ་བོ་ཅན་གྱི་མ་ལག་ཏུ་གཏིང་ཟབ་པར་ཐིམས། ཨ་རི་བ་ཞིག་གིས་དགོད་བྲོ་བའི་དེབ་ཅིག་བྲིས་པ་དེར། ཁོ་མོས་ལོ་གཅིག་གི་དུས་ཡུན་ལ་*ཀྲུང་གོས་བཟོས་པའི*་དངོས་རྫས་མི་ཉོ་བར་ཐག་བཅད་པ་དང་། ཐག་གཅོད་འདིས་ཁོ་མོའི་འཚོ་བར་དཀའ་ངལ་ཇི་ཙམ་འཕྲད་པའི་སྐོར་བརྗོད་འདུག
ཕྱི་ཚུལ་ནས་བལྟས་ན། ཀྲུང་གོ་དང་ཉོ་འཚོང་བྱས་པས་ནུབ་ཕྱོགས་ལ་ཁེ་བཟང་ཐོབ་པ་དང་། ནུབ་ཕྱོགས་ཀྱི་ལོངས་སྤྱོད་མཁན་གྱིས་རིན་གོང་ཁེ་བའི་ཀྲུང་གོའི་དངོས་རྫས་མང་ཚོད་ཅིག་ཉོ་ཆོག འོན་ཀྱང་ནུབ་ཕྱོགས་ཀྱི་གཞི་རྩའི་རིན་ཐང་ལ་ལྐོག་ནས་རུལ་ཟད་ཐེབས། ཁྱོད་ཀྱི་ཁྱིམ་ན་ཡོད་པའི་ཨ་རིའི་རྒྱལ་དར་དེ་ནི་ཀྲུང་གོའི་བཙོན་ཁང་ནང་གི་བཙོན་པའམ་གཡོག་བཀོལ་བྱིས་པ་ཡིས་བཟོས་པ་ཡིན་མིན་སུས་ཤེས།
ང་རང་ཟླ་ངོ་གཅིག་ལྷག་གི་སྔོན་དུ་ཨ་རིར་སླེབས་ནའང་། ཀྲུང་གོའི་གྲིབ་ནག་སྔར་བཞིན་གང་སར་ཁྱབ་པ་མཐོང་། ཨ་རིའི་སློབ་ཆེན་ཁ་ཤས་ཀྱིས་ང་གཏམ་བཤད་བྱེད་པར་གདན་འདྲེན་མི་ཕོད། གང་ཡིན་ཞེ་ན། ཁོང་ཚོར་ཀྲུང་གོ་ དང་མཉམ་ལས་ཀྱི་ལས་གཞི་མང་པོ་འདུག ཀྲུང་གོས་མ་རྩ་བཏང་ནས་བསྒྲུབས་པའི་ཁོང་ཙི་སློབ་གླིང་ནི་དེ་དག་ གི་གྲས་སུ་ཚུད། གལ་སྲིད་ཁྱོད་ནི་ཀྲུང་གོའི་གནད་དོན་ལ་ཞིབ་འཇུག་བྱེད་པའི་མཁས་པ་ཡིན་པ་དང་། ཁྱོད་ཀྱིས་ ཀྲུང་གོ་གུང་ཁྲན་ཏང་སྲིད་གཞུང་ལ་སྐྱོན་བརྗོད་བྱས་ཚེ། ཁྱོད་ལ་ཁུང་ཙི་སློབ་གླིང་གི་ཞིབ་འཇུག་ལས་གཞི་རག་ མི་སྲིད་པ་དང་། ཐ་ན་ཀྲུང་གོར་འགྲོ་བའི་ཐོངས་མཆན་ཡང་མི་རག དེ་མིན་པར་ཁྱོད་ཀྱིས་ཀྲུང་གོ་གུང་ཁྲན་ཏང་ ལ་སྐད་ཆ་སྙན་པ་བརྗོད་ན། ཁྱོད་ལ་ཞིབ་འཇུག་གི་མ་དངུལ་ཚིམས་པ་ཞིག་པ་རག་པ་མ་ཟད། ད་དུང་ཀྲུང་གོར་ འཚམ་འདྲིར་ཕེབས་པར་གདན་ཞུ་བྱ་སྲིད་པ་དང་། ཐ་ན་ཀྲུང་གོའི་མཐོ་རིམ་འགོ་ཁྲིད་ལ་ཐུག་འཕྲད་ཀྱང་རག་པ་ ཡིན། ནུབ་ཕྱོགས་ཀྱི་རིག་གཞུང་རང་དབང་ནི་འདི་ལྟར་མིག་གིས་མི་མཐོང་བའི་ལག་པ་ཟུང་གིས་ཕྱིན་ཅི་ལོག་ པར་བྱས།
ངས་བལྟས་ན། ཀྲུང་གོ་ཡི་ཉེན་ཁའི་རང་བཞིན་ནི་སྔོན་ཆད་ཀྱི་སུའུ་ལེན་ལས་བརྒལ་འདུག སེམས་ཕངས་པ་ཞིག་ ལ་ནུབ་ཕྱོགས་སུ་མིག་རྒྱང་རིང་ཞིང་ཤེས་རྒྱ་ལྡན་པའི་ཆབ་སྲིད་པ་རཱེ་གྷན༼Reagan༽་ལྟ་བུ་དཀོན། སྲིད་འཛིན་ ཨོ་བྷ་མས་ཀྲུང་གུང་ནི་མི་ལ་མི་རྨུག་པའི་སྟག་དུ་གྱུར་ཟིན་བསམ་ཡོད་པ་འདྲ། དེའི་ཕྱིར་ཁོ་རང་ཨ་རིར་འཚམ་ འདྲིར་འོང་ལ་ཉེ་བའི་ཞི་ཅིན་ཕིན་གྱི་ཕྱོགས་ལ་རེ་བས་ཁེངས་འདུག ཨོ་བྷ་མ་རང་ཉིད་ནོར་བྷེལ་ཞི་བདེ་གཟེངས་ རྟགས་ཐོབ་མི་ཞིག་ཡིན་པའི་ངོས་ནས། ཁོས་ཞི་ཅིན་ཕིན་ལ་ཀྲུང་གུང་གིས་བཙོན་དུ་བཙུད་པའི་ནོར་བྷེལ་ཞི་བདེ་ གཟེངས་རྟགས་ཐོབ་མི་ལིག་ཞོ་པོ་གློད་དགོས་པ་ཡོངས་གྲགས་ཀྱིས་གླེང་སྲིད་དམ། ལྕམ་ཁི་ལིན་ཌོན་འབར་མའི་ ཨང་སན་སུ་ཁི་ལ་འཕྲད་ཕོད་ཀྱང་། ལིག་ཞོ་པོ་ལ་འཚམ་འདྲིར་འགྲོ་མི་ཕོད་པའི་རྒྱུ་མཚན་ཅི། འབར་མ་ཉམ་ ཞན་པ་དང་ཀྲུང་གོ་སྟོབས་ཆེ་བའི་རྐྱེན་ཡིན་ནམ།
ཀྲུང་གུང་ནི་སྔར་བཞིན་མི་ལ་རྨུག་ཤེས་པའི་སྟག་ཅིག་ཡིན། ངས་ལིག་ཞོ་པོ་དང་ལྷན་དུ་འགྲོ་བ་མིའི་ཐོབ་ཐང་གི་ བྱ་འགུལ་སྤེལ་མྱོང་བའི་རྐྱེན་གྱིས། ལིག་ཞོ་པོ་ལ་ནོལ་བྷེལ་ཞི་བདེ་གཟེངས་རྟགས་ཐོབ་པའི་རྗེས་སུ། ང་རང་ལ་ གསང་བའི་ཉེན་རྟོག་པས་སྡུག་སྦྱོང་མནར་གཅོད་བཏང་བ་དང་སྲོག་ཀྱང་ཤོར་ལ་ཁད་པ་བྱུང་། དེའི་རྗེས་ནས་ ཁྲིམས་རྩོད་པ་དང་རྩོམ་པ་པོ་བཅུ་ཕྲག་ཁ་ཤས་ཀྱིས་ཀྱང་ཡ་ང་བའི་ཁྲིམས་སྦྱོར་གདུག་རྩུབ་མྱངས་། དེ་ཚོའི་ནང་གི་ མི་ཞིག་ནི་སྔོན་ལ་གློག་གི་རླུང་གཡབ་ཀྱིས་གྲང་བར་བྱས་པ་དང་དེ་མུར་གློག་ཐབ་ཀྱིས་ཚ་རུ་བཅུག་པས། རིང་པོ་མ་ ཐོགས་པར་གློ་ཚད་ཀྱི་ནད་གཞི་ཚབས་ཆེན་ཕོག གསང་བའི་ཉེན་རྟོག་པས་ཐ་ན་ང་ལ་འཇིགས་སྐུལ་ནས་བཤད་ པ་ནི། ཁོ་ཚོའི་ལག་ཏུ་གུང་ཁྲན་ཏང་ལ་རྒོལ་བའི་ཤེས་ཡོན་པ་ཉིས་བརྒྱ་ཡི་མིང་ཐོ་ཡོད་པ་དང་། མི་དེ་ཚོ་འཛིན་ བཟུང་དང་གསོན་པོར་ས་འོག་ཏུ་འཇུག་རྒྱུར་ནམ་ཡང་གྲ་སྒྲིག་ཡོད་ཟེར། འདས་པའི་ལོ་གཅིག་ལྷག་གི་རིང་ནས་ ཀྲུང་གོའི་བཙོན་ཁང་ནང་གི་ཆབ་སྲིད་བཙོན་པ་ཇེ་མང་དང་བཙོན་ཡུན་ཇེ་རིང་དུ་སོང་། འོན་ཀྱང་ནུབ་ཕྱོགས་ཀྱི་ ངོ་རྒོལ་སྐད་སྒྲ་ཇེ་ཞན་ནས་ཇེ་ཞན་དུ་གྱུར།
ཀྲུང་གུང་གིས་ནང་ཁུལ་དུ་དྲག་གནོན་ཚ་ནན་དང་ཕྱི་ཕྱོགས་སུ་ཧམ་པས་རྒྱ་བསྐྱེད་པ་ནི་དུང་ཙེ་ཞིག་གི་ངོས་ གཉིས་ལྟ་བུ་ཡིན། མཉམ་འབྲེལ་རྒྱལ་ཚོགས་ཀྱིས་སི་རི་ཡའི་གནད་དོན་ལ་བཏོན་པའི་གྲོས་ཆོད་དེར་ཀྲུང་གུང་གིས་ དགག་བྱ་བྱས། དེའི་རྒྱུ་མཚན་ནི་བོད་ན་ཌི་མ་ཤག༼Dimashq ༽་དམར་གསོད་དང་འདྲ་བའི་དམར་གསོད་ཅིག་ འབྱུང་བཞིན་པས་ཡིན།
ལོ་བརྒྱའི་ཡར་སྔོན་དུ་ནུབ་ཕྱོགས་པས་ཀྲུང་གོ་ནི*གཉིད་ཡུར་བའི་སེང་གེ*་ཡིན་ཚུལ་བརྗོད་མྱོང་། དེང་གི་དུས་སུ་ གཉིད་དུ་ཡུར་བ་ནི་ནུབ་ཕྱོགས་ཡིན་པ་ངས་མཐོང་བྱུང་། སྒེར་ཚུགས་ཅན་གྱི་རྩོམ་པ་པོ་ཞིག་དང་ཁྱིམ་ཚང་ཆོས་ ཚོགས་ཀྱི་ཡེ་ཤུ་ཆོས་པ་ཞིག་ཡིན་པའི་ཆ་ནས། ང་ལ་བདེན་པ་བརྗོད་པའི་འགན་འཁྲི་ཡོད་པས་སྨྲས་པ། ཀྲུང་གུང་གིས་སྔར་བཞིན་མི་ནི་ཟའོ།།
སྤྱི་ལོ་ ༢༠༡༢ ཟླ་ ༢ ཚེས་ ༡༧ ཉིན་སྤེལ།
རྩོམ་ཁུངས་ནི། རྒྱ་ཡིག་སྨྱུག་འཛིན་སྒེར་ཚུགས་ཚོགས་པ།
ངོ་མ་ཡག་པོ་འདུག འདི་ལྟར་བསྒྱུར་དགོས་པ་རེད། འདི་བཞིན་ཐོན་དགོས་པ་རེད། འདི་ལྟར་རྒྱུས་ལོན་གསལ་བོ་ཞིག་བྱས་པས། འུ་ཚོས་ཅིག་ཤེས་ཡོང་རྒྱུ་ཞིག་དང་། ཧ་གོ་རྒྱུ་ཞིག། རྟོགས་པ་ཟད་རྒྱུ་ཞིག་ཡོད་པ་རེད། དེ་མིན་ཐབ་ཁུང་ནང་གི་ཀུ་ཅོ་ལ་རེ་བ་མེད་པ་འུ་ཚོས་ཤེས་ན་རེད།
དྲ་གྲོགས་ཁྱོད་ལ་དུས་ཚོད་ཡོད་ན་མུ་མཐུད་བསྒྱུར་རོགས་གནང་ཞེས་ཞུ་རྒྱུ་ཡིན། ངས་ཀྱང་རྩོམ་ཡིག་ཁ་ཤས་བསྒྱུར་ཁུལ་བྱེད་ཀྱིན་ཡོད་ཀྱང་། འདོད་པ་ཁེངས་པ་ཞིག་ཡོང་གི་མི་འདུག་སྟབས། ཕྲན་གྱིས་ཁྱོད་དང་འབྲེལ་བ་བྱེད་འདོད་ཤིན་ཏུ་ཆེ།