ཀྲུའུ་དང་དབུས་ཀྱི་འགལ་བ་ལ་གཞིགས་དང་།

འཇམ་དཔལ་ཚུལ་ཁྲིམས།

ཉེ་ཆར་ཕྱི་ཟླ༢ཚེས་༡༣ཉིན། རྒྱ་ནག་དབུས་དམར་ཤོག་སློབ་གྲྭའི་<<སློབ་སྦྱོང་དུས་བབ>>་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་འགན་འཛིན་ཀྲུའུ་ཝེ་ཆོན་གྱིས་མི་རིགས་གནད་དོན་སྐོར་གྱི་རྕོམ་ཡིག་དེ་དབུ་མའི་ལམ་པ་ཚོ་ལ་ཅོང་བརྡ་ཞིག་ཏུ་འགྱུར་བའི་རེ་བ་ཡོད། ་འདིར་བོད་མི་དག་གིས་ཉན་མི་འདོད་པ་དང་། ང་ལ་སྡང་ཟུག་སྐྱེ་བའི་གནད་དོན་ཞིག་ཡོད་པ་ནི་རྩོམ་ཡིག་འདི་བརྒྱུད་ནས་ངས་ཀྲུའུ་ཝེ་ཆོན་ལ་གདེངས་འཇོག་ཅིག་སྐྱེས་བྱུང་བ་དེ་རེད། རྒྱུ་མཚན་ནི་རྩོམ་ཡིག་འདི་བརྒྱུད་ནས་ཁོང་གིས་རང་ཉིད་ལ་བབ་པའི་ལས་འགན་དེ་རང་ཉིད་ཀྱི་དབུས་གཞུང་གི་བཀའ་བཞིན་ཇི་ལྟར་ལམ་ལྷོང་ཡོང་བར་བསམ་གཞིགས་བྱེད་ཀྱིན་ཡོད་པ་དེ་མཐོང་ཐུབ་པས་ཡིན། ཁོ་རང་ཉིད་ཀྱི་ལས་འགན་དེ་ལྷག་བསམ་རྣམ་དག་གིས་སྒྲུབ་བཞིན་ཡོད་པའི་ཚོར་སྣང་ཞིག་སྐྱེས་བྱུང་བས་ཡིན།

ཀྲུའི་དང་ཁོ་བོའི་ལས་ཁུངས་ཀྱི་ལས་འགན་ནི་ཁོས་གང་བྲིས་ཡོད་པ་དེ་རང་རེད། མདོར་ན་མི་རིགས་ཀྱི་གནད་དོན་ཞིག་རྨག་མེད་དུ་གཏོང་རྒྱུ་དེ་རེད། མདོར་ན་ལས་ཁུངས་དེ་འཛུགས་དགོས་དོན་ཡང་གྲངས་ཉུང་མི་རིགས་ལ་ཤ་ཚ་དང་། གྲངས་ཉུང་མི་རིགས་ཀྱི་བདེ་སྡུག་གི་ཆེད་དུ་བཙུགས་པ་ཞིག་ཡེ་ནས་མིན་པར་ཇི་ལྟར་བྱས་ནས་གྲངས་ཉུང་མི་རིགས་འདི་དག་མན་ཇུ་ལ་ཇི་ལྟར་བྱུང་བ་བཞིན་འབྱུང་ཐབས་ལ་དམིགས་ནས་བཙུག་པ་ཞིག་རེད། ང་ཚོས་(དབུ་མའི་ལམ་པ་ཚོས)་དེ་ཡང་བརྗེད་པ་ཡིན་ནམ།
ངས་བཤད་འདོད་པ་ནི་རང་ཅག་གིས་རང་ས་ན་ཡོད་པའི་ནོར་འཁྲུལ་ལ་རང་ངོས་ནས་ཡོ་སྲང་བྱས་ནས་འགྲོ་དགོས་པ་ལས་གཞན་ས་ན་ཡོད་པའི་ནོར་འཁྲུལ་ཡོ་སྲང་བྱས་ནས་རང་ཅག་གི་ཐུགས་དམ་བསྐང་ཡོང་བར་རེ་བ་བྱེད་པ་ནི་ཇི་འདྲའི་རེ་སྟོང་ཞིག་མིན་ནམ་ཟེར་བ་ཡིན། ཀྲུའུ་ཝེ་ཆོན་གྱི་རྩོམ་ཡིག་འདི་མཐོང་སྐབས་ད་ནི་ང་ཚོ་“ར་ཚེ་ཟད་འཕར་བའི་སྒོ་རྩར་སོང་།”་ཡོད་པ་ཅིའི་ཀྱང་ངོས་ཟིན་རན་པ་མ་ཡིན་ནམ་ཟེར་བ་ཡིན། ད་བར་དུ་ང་ཚོས་འཕར་བས་ར་ལ་སྙིང་རྗེ་བསྒོམས་ནས་ར་ཚེ་ཐར་གཏོང་བར་རེ་སྒུག་བྱས་པ་དེ་ཇི་འདྲའི་ནོར་འཁྲུལ་ཞིག་མིན་ནམ་ཟེར་བ་ཡིན། ད་བར་དུ་ལོ་བཅུའི་རིང་ལ་ཉིས་སྟོང་བརྒྱད་ཀྱི་ཨོ་ལིམ་ཕིག་རྩེད་འགྲན་གྱི་དུས་སྐབས་ཚུད་པའི་གོ་སྐབས་ཇི་འདྲའི་མང་པོ་ཞིག་ལ་འཕར་བས་ར་ལ་ཇི་ལྟར་རྩེད་སྤྱད་ཇི་ལྟར་བྱས་མི་འདུག་གམ་ཟེར་བ་ཡིན།
ང་ཚོས་འཕར་བས་ར་ཟ་གི་འདུག་ཅེས་འཕར་བར་སྡང་བ་ནི་རིགས་པ་དང་མི་མཐུན་སྟེ། འཕར་བ་ནི་ར་སོགས་ཀྱི་སྲོག་འཕྲོག་བྱེད་དུ་སྲིད་པ་རྒད་པོས་བཞེངས་པ་ཡིན་པས་སོ། དེ་ལས་ང་རང་ཚོ་འཕར་བའི་ཚང་སྒོ་ལས་ཇི་ལྟར་གཡོལ་བ་དང་། འཕར་བ་དང་འབྲེལ་མེད་དུ་ཇི་ལྟར་གནས་ཐབས་ལ་མ་འབད་པ་དེ་རང་ཉིད་ཀྱི་ནོར་འཁྲུལ་དུ་བསམ་དགོས་པ་ལས། གཅན་གཟན་ལ་ཤ་ཟ་བའི་ཉེས་དམིགས་བགྲངས་ན་གཅན་གཟན་གྱིས་ར་འཕྲོད་པ་སྲིད་དམ།
སྤྱིར་ན་འདི་ལ་རིག་པ་ཡང་དག་གིས་གནོད་བྱེད་ཅིག་མེད་པས་ཐེ་ཚོམ་དགོས་པ་ཞིག་མི་འདུག་ན་ཡང་། སེམས་ཀྱི་གྲུ་ཟུར་རེ་ན་རྩ་བའི་བླ་མའི་དམ་ཚིག་ལ་འགལ་བའི་འཇིགས་སྣང་དང་། སྤྱི་ཚོགས་ཀྱི་གནོན་ཤུགས་ཀྱི་ལྗིད་ཁོག་གཉིས་ཀ་ཆེ་ན་ཡང་རང་གི་བསམ་ཚུལ་དེ་རང་རིགས་རྣམས་ལ་མ་བཤད་ན་རང་ངོས་ནས་རང་རིགས་ཀྱི་རྩ་དོན་ལ་འགན་མ་ཁུར་བའི་བྱ་བ་རེད་སྙམ་ནས་རང་ཉིད་ལ་དཔག་པའི་བློས་གཏོང་ཆེན་པོ་ཞིག་བྱས་ནས་དབུ་མའི་ལམ་འདིས་མ་འགྲིག་ཚུལ་མང་པོ་ཞིག་ཡིག་ངག་གཉིས་ཐོག་ནས་བཤད་པ་ཡིན། སྐབས་རེ་ངས་དེ་ལྟར་བཤད་པས་སྙིང་པོ་ཅང་ཨེ་ཡོད་དམ་སྙམ་པ་དང་། སྐབས་རེ་ང་རང་ཉིད་རྨང་ནས་ནོར་ཡོད་མི་སྲིད་དམ་སྙམ་པ་རེ་བྱུང་མྱོང་ཡང་། ང་རང་གིས་གང་བཤད་པ་དེ་ལ་ཁ་ཞེ་གཉིས་མེད་ཀྱིས་ང་རང་ཉིད་ལ་བདེན་ཁ་མང་དུ་རྙེད་པར་གྱུར་། དེ་བས་ཀྱང་ཉེ་ཆར་ཀྲུའུ་ཝེ་ཆོན་གྱི་རྩོམ་ཡིག་དེ་མཐོང་སྐབས “་་་དེའི་ཕྱིར་ང་རང་ནོར་ནི་མི་འདུག་ཨང་།”སྙམ་པ་བསྐྱར་དུ་ལན་གཅིག་བྱུང་།
ངས་དབུ་མའི་ལམ་དེ་འགྲིག་མི་འདུག་བཤད་པ་ལ་ཕར་དེད་ན་དོན་ཚན་གཉིས་སུ་བསྡུ་ཆོག་སྟེ། གཞི་རྩའི་ཆ་ནས་མ་འགྲིག་པ་དང་། ལག་ལེན་གྱི་ཆ་ནས་མ་འགྲིག་པ་གཉིས་ལ་འདུ། དང་པོ་ནི་བོད་རྒྱལ་ཁབ་ཀྱི་སྐྱེ་བོ་རེའི་རེའི་སྐྱེས་ཐོབ་ནས་ཡོད་པའི་རང་བཙན་གྱི་བདག་ཐོབ་དེ་འདི་ལྟར་མི་གཞན་ལ་སྤྲོད་མི་རུང་བ་དེ་རེད། ནམ་ཞིག་ང་ཚོས་འདི་ལྟར་ཆ་རྐྱེན་གང་ཡང་མེད་པའི་ཐོག་ནས་རྒྱ་ནག་རྒྱལ་ཁབ་ཀྱི་རྒྱལ་ཁྲིམས་འོག་ཏུ་འཛུལ་ན་འབྱུང་འགྱུར་རང་ཅག་གི་བུ་རབས་ཚ་རྒྱུད་དང་བཅས་པ་ཕྱིར་འབུད་ཀྱི་རེ་བ་དཀོན་པའི་ལྕགས་གཟེབ་ཅིག་ཏུ་བསྐྱུར་བ་ཡིན་པས་རང་རེའི་མི་རབས་འདི་ལ་དེ་ལྟར་བྱེད་པའི་དབང་ཆ་ཡེ་ནས་མེད་པ་དེ་རེད།
དེར་མ་ཟད་དབུ་མའི་ལམ་པ་བ་དག་གི་བློ་ཕུག་ན་འཆང་བའི་རེ་བ་ཡོང་ཐུབ་པ་ཞིག་ད་ལྟའི་དུ་སྐབས་སུ་མ་རེད་ལ། འབྱུང་འགྱུར་ཡང་མ་རེད། རྒྱུ་མཚན་ནི་གཞན་གཏིང་ཟབ་པོ་དང་སྦམ་མཐུག་པོ་གང་ཡང་འདྲེན་མི་དགོས་པར་རང་ཅག་ཕྱོགས་གཉིས་ཀ་སྐྱེ་བོ་ཕལ་བ་ཤ་སྟག་ཡིན་པ་དེ་ཙམ་རེད། བྱང་ཆུབ་སེམས་པས་རང་རྒྱུད་ལ་ཉོན་མོངས་དཀོན་སྟབས་འཇིག་རྟེན་ལ་སྙོག་དྲ་མི་ཡོང་བ་ཅིའི་ཕྱིར་མི་ཐུབ། མི་རྣམས་ཀྱིས་གཟོད་པ་སྒོམ་བཞག་ན་དེ་གས་འགྲིག་པ་རེད། མི་གསོད་དགོས་དོན་ཅི་ཡོད། ཁོང་ཁྲོའི་མགོ་མནན་དེ་གས་འགྲིག་པ་རེད། འཆམ་པོ་བྱས་ནས་ཅིའི་ཕྱིར་འདུག་མི་ཐུབ། ཕན་ཚུན་བསམ་ཤེས་བྱས་ན་དེ་གས་འགྲིག་པ་རེད། ཅེས་སོགས་དགོངས་ཀྱི་འདུག
ང་ཚོ་སྐྱེ་བོ་ཕལ་བ་ཚོས་ཤེས་དགོས་པ་ཞིག་ལ་འདི་ནི་བྱང་སེམས་དག་ལ་དེ་འདྲའི་སྟབས་བདེ་བོ་ཞིག་ཡིན་དུ་ཆུག་ཀྱང་། འུ་ཅག་ལ་དེ་འདྲའི་ལས་སླ་མོ་ཞིག་ཡེ་ནས་མ་རེད། དེས་ན་དེའི་ཆེད་གྲ་སྒྲིག་མི་བྱེད་པ་མི་མཁས་པའི་བྱ་བ་མིན་ནམ། འོ་ན་གྲ་སྒྲིག་གང་བྱེད་དགོས། ལོགས་སུ་འབུད་རྒྱུ་དེ་ལས་གཞན་གང་ཡང་མེད་པ་རེད། ཆོས་ལུགས་ཀྱི་ནང་དུ་ཡང་གཉེན་པོ་བསྟེན་པ་ལས་ཡུལ་ངེས་སྤང་བ་དགའ་ཞེས་པའི་གསུང་ཚུལ་ཞིག་མེད་དམ། དེ་ག་རང་རེད། ཡུལ་ལ་གཡོལ་རྒྱུ་དེ་མ་གཏོགས་ཐབས་ལམ་གང་ཡང་མེད་པ་རེད། ང་ལ་མཚོན་ན་རང་བཙན་གྱི་བསམ་བློའི་ས་བོན་ནི་འདི་ཙམ་ཞིག་ལས་ལོ་རྒྱུས་རིག་པ་དང་། རྒྱུ་མཚན་རིག་པ་སོགས་ཆེན་པོ་གང་ཡང་དགོས་དོན་མེད། གཞི་རིམ་དངོས་ཡོད་ཀྱི་གནས་སྟངས་ལ་དགོངས་ན་དབུ་མའི་ལམ་འདི་འབྱུང་འགྱུར་གྱི་མདུན་ལམ་གྱི་ཆེད་དུ་འབྲེལ་ཆུང་བ་ཞིག་ཏུ་མཐོང་།
གཉིས་པ་ནི་དབུ་མའི་ལམ་འདི་མ་གཞི་ངོ་མ་རང་གཞན་གཉིས་ཕན་གྱི་བླ་ན་མེད་པའི་ཐབས་མཆོག་ཅིག་ཡིན་ལོས་ཡིན་ཡང་། འདི་ལག་ལེན་དུ་སྟར་ན་འདི་ལ་ངོ་བོའི་ཆ་ནས་དང་། དུས་ཀྱི་ཆ་ནས་སྐྱོན་གཉིས་ཡོད། དང་པོ་ལ་ཡང་ལམ་འདི་ལ་རང་གི་ངོ་ཐོག་ནས་གནད་དོན་གལ་ཆེན་གཉིས་ཀྱི་ཐོག་ལ་རྩལ་དུ་གཏོན་མ་ཐུབ་པའི་སྐྱོན་ཡོད། དེ་ནི་ཡང་དག་པའི་རང་སྐྱོང་ཞིག་འཛུགས་དགོས་ན་ཆེས་ཐོག་མའི་ཆ་རྐྱེན་ནི་རང་སྐྱོང་གི་སྲིད་སྐྱོང་ངམ་སྲིད་འཛིན་གང་དུ་མིང་བཏག་རུང་དབུས་གཞུང་གི་ངོ་ཚབ་བྱེད་མཁན་དེ་དང་། སྲིད་བློན་ནམ་བཀའ་ཁྲི་གང་དུ་མིང་བཏག་རུང་སྲིད་ཀྱི་དབང་ཆ་གཙོ་བོ་འཛིན་མཁན་དེ་གཉིས་ངེས་པར་དུ་བོད་མི་གཙང་མ་ཞིག་ཡིན་དགོས། དམའ་མཐར་ཡང་བོད་ཀྱི་རིག་གཞུང་ལ་གཏིང་ནས་ཤེས་རྟོག་དང་དགའ་ཞེན་ཡོད་མཁན་ཞིག་ངེས་པར་དུ་ཡིན་དགོས། ད་སྐབས་དབུ་མའི་ལམ་ལ་འདིའི་སྐོར་ལ་གསལ་ཁ་གང་ཡང་མི་འདུག
ཆེན་པོ་དག་གི་ཐུགས་ལ་འདི་ནི་བྱ་བ་ཆུང་ཙག་ད་ལྟའི་སྐབས་སུ་གླེང་རིན་མེད་པ་ཞིག་ཏུ་གཟིགས་ཀྱིན་ཡོད་སྲིད་ཀྱང་ང་ལྟ་བུ་(བརྒྱ་ཆ་༩༥་ལས་མང་བ་ཡིན་སྲིད)་མང་ཚོགས་དཀྱུས་མ་དག་གི་སེམས་ལ་ནི་གནད་དོན་འདི་གལ་གནད་ཧ་ཅང་ཆེན་པོ་ཞིག་ཡིན་པ་ད་བར་གྱི་ཉམས་མྱོང་ལས་ཤེས་བྱུང་། ཁྲིམས་ཀྱིས་དབང་སྒྱུར་ཞེས་རྫིག་མདོག་རེ་བཤད་ཀྱང་གང་ཟག་གིས་སྒྱུར་ལུགས་ཤིག་ཡོད་དགོས། ཁྲིམས་གཞི་གཅིག་ལ་བློ་ཉེ་བའི་མི་ཞིག་གིས་ལག་ལེན་ལ་སྟར་ཚུལ་དང་། བློ་མི་ཉེ་བའི་ལག་ལེན་ལ་སྟར་གཉིས་ལ་གནམ་སའི་ཁྱད་པར་ཡོད། ཁྱད་པར་དེ་འདྲ་སྲོག་ལྡན་གང་ཟག་གིས་འབྱེད་ཐུབ་པ་ལས་སྲོག་མེད་ཁྲིམས་ཀྱིས་མི་ཐུབ།
གཉིས་པ་ནི་དབུ་མའི་ལམ་གྱི་གྲོས་གཞིའི་ནང་དུ་བོད་ཀྱི་སྐད་ཡིག་ལ་མཐོང་ཆེན་བྱེད་དགོས་སྐོར་འཁོད་འདུག་མོད་སྤྱི་འཇོག་ཙམ་ལས་ཞིབ་ཆ་ཐོན་མི་འདུག མཉམ་འབྲེལ་རྒྱལ་ཚོགས་ལ་གཞུང་འབྲེལ་སྐད་ཡིག་དྲུག་ཡོད་པ་དང་། ཁེ་ན་ཌ་ལ་གཞུང་འབྲེལ་སྐད་ཡིག་གཉིས། སིང་ག་པུར་ལ་གཞུང་འབྲེལ་སྐད་ཡིག་གསུམ། སུད་སི་ལ་གཞུང་འབྲེལ་སྐད་ཡིག་གསུམ། རྒྱ་གར་ལ་གཞུང་འབྲེལ་སྐད་ཡིག་བཅོ་ལྔ་སོགས་ཡོད་པ་བཞིན་བོད་ཀྱི་སྐད་ཡིག་འདི་ཀྲུང་ཧ་རྒྱལ་ཁབ་ཀྱི་གཞུང་འབྲེལ་སྐད་ཡིག་ཏུ་ངེས་པར་འཇོག་དགོས་པའི་གསལ་ཁ་འདོན་དགོས། ད་དུང་དོན་ཚན་གཞན་དག་ལ་ཞིབ་ཆ་མ་ཐོན་པ་མང་པོ་འདུག་མོད་གལ་ཆེ་ཤོས་གཉིས་ཟུར་དུ་བཏོན་པ་འདི་གཉིས་ཡིན།
གཉིས་པ་ནི་དབུ་མའི་ལམ་འདི་མ་གཞི་ངོ་མ་རང་གཞན་གཉིས་ཕན་གྱི་བླ་ན་མེད་པའི་ཐབས་མཆོག་ཅིག་ཡིན་ངེས་ཀྱང་། ད་ལྟའི་སྐབས་སུ་ལག་ལེན་ལ་སྟར་བ་ནི་ཆེས་དུས་ལ་མ་བབ་པ་ཞིག་ཏུ་མཐོང་། དེ་ནི་ཉེ་ཆར་ཀྲུའུ་ཝེ་ཆོན་གྱི་ཆེད་རྩོམ་དེ་ལས་ར་ཡོངས་སུ་འཕྲོད་ཐུབ་ཡོད་ཚོད་རེད། ད་བར་དུ་ཕར་ཕོགས་ཐུག་མི་འགྲོ་བའི་བྱ་བ་ཇི་ཙམ་བྱས་པའི་ལན་དུ་ཚུར་ཅི་ཕོགས་གང་ཕོགས་ཀྱི་གཏམ་སྤྱོད་ཤ་སྟག་སྤེལ་སོང་འདི་ལས་ར་འཕྲོད་ཐུབ་དགོས་ཚོད་རེད། ད་བར་དུ་ང་ཚོས་“དོན་དམ་པའི་རང་སྐྱོང་”་ཞིག་ལ་རེ་བ་འཆང་ནས་ཆ་རྐྱེན་གང་ཡང་མེད་ཅིང་། ཁོ་བ་ཅག་གི་ཆ་རྐྱེན་ཚང་མ་ཁུར་ནས་གྲོས་མོལ་བྱེད་ས་གཙོ་བོའི་དེས་ངག་ནས་མིང་ཙམ་གྱི་རང་སྐྱོང་ཞིག་ཀྱང་མི་འགྲིག་ཚུལ་སྨྲས་སོང་བ་འདི་ལས་ར་འཕྲོད་ཐུབ་ཡོད་ཚོད།
ཁྱིའི་སྔུན་ལ་གློ་བ་གཡུག་ན་འཁྱེར་བ་ལས་གསེར་གཡུག་ན་འཁྱེར་གྱི་རེད་དམ། དེ་ནི་གསེར་ལ་རིན་ཐང་མེད་པ་མ་རེད་དེ། ཁྱིས་གསེར་གྱི་རིན་ཐང་མ་ཤེས་པས་རེད་ལ། ཕྱོགས་གཞན་ནས་གཞིགས་ན་གཡུག་མཁན་གྱིས་ཁྱིས་གློ་བ་ལས་གསེར་ལེན་མི་སྲིད་པ་ལ་ཐུགས་ཉམས་མ་བཞག་པའི་སྐྱོན་ཡང་རེད།
ཁྱིས་གསེར་ལེན་དགོས་ན་ཐབས་ལམ་གཅིག་ཡོད་པ་ནི་གློ་བའི་ནང་དུ་གསེར་བཏིམས་ནས་གཡུག་རྒྱུ་དེ་ཡིན་ཞིང་། དེ་ཡང་ཁྱི་ལ་གློ་བ་བསྟན་ཡོད་པ་ལས་གསེར་བསྟན་མེད། གལ་སྲིད་དབུ་མའི་ལམ་འདི་གསེར་ཞིག་ཡིན་ན་དེ་འཐབ་ཇུས་ཀྱི་གློ་བ་ཞིག་ལ་བཏུམས་ནས་རྒྱ་ནག་ལ་སྤྲོད་དགོས་པ་ལས་དེ་གསེར་ཡིན་པ་མ་ཤེས་བར་དུ་དང་ལེན་བྱེད་སྲིད་དམ། ལར་ནས་རང་ཅག་བོད་གངས་ཅན་གྱི་ཡོད་ཚད་ཀྱི་ཡོད་རྨང་ནས་བཅོམ་མཁན་དེ་ལ་འདི་ལྟར་ སྤྱང་ཀི་ལ་རྣ་ཚར་དང་། རྐུན་མ་ལ་གཟེངས་སྟོད། བྱེད་དགོས་དོན་གང་ཡོད།
དབུ་མའི་ལམ་འདི་ནི་པ་ཡེ་ཐོན་སྦྲུལ་གྱི་དུག་བཞིན་ག་ལེར་ལུས་པོའི་རྩ་ལམ་ཡོངས་སུ་ཁྱབ་ནས་མཐར་ལུས་པོ་ཡོངས་རྫོགས་བཟི་ནས་འགུལ་ནུས་མེད་པ་ཞིག་ཏུ་འགྱུར་བ་ཡོངས་སུ་འདྲ་བ་ཞིག་རེད། དབུ་མའི་ལམ་འདི་བྱུང་ནས་བོད་མིའི་ཆིག་སྒྲིལ་ལ་གནོད་པ་བྱུང་སོང་། དབུ་མའི་ལམ་འདིའི་རྐྱེན་གྱིས་རང་ཅག་གི་ཁོང་ཁྲོའི་རྣམ་འགྱུར་ལ་ཐོན་པའི་ངག་གི་འབོད་ཚིག་བཀག་སོང་། ལུས་ཀྱི་བྱ་སྤྱོད་བཀག་སོང་། མཐའ་ན་སེམས་ཀྱི་འདུ་ཤེས་ལ་ཡང་དོ་ཕོག་བཏང་སོང་། ད་ནི་སྔར་སྤོབས་པ་དང་སྐད་གསེང་མཐོན་པོའི་ངང་ནས་སྒྲོག་ནུས་པའི་“བོད་གཞུང་།”་ཞེས་པའི་ཚིག་འབྲུ་འདི་འདི་གཉིས་ཀྱང་དཔའ་ཞུམ་ཞུམ་དང་མགོ་བོ་དུད་དུད་ཀྱི་སྒོ་ནས་སྨྲ་དགོས་པར་གྱུར། ད་ནི་“བོད་གཞུང་།”་ཞེས་པའི་ཚིག་འདི་བེད་སྤྱོད་མི་ཆོག་ཅེས་སྨྲ་མཁན་ནི་དགྲ་རིགས་ལས་རང་རིགས་ཀླད་མེད་དེ་ཚོ་འགྱིང་ཉམས་ཆེ་བའི་དུས་ཚོད་ཤར་སོང་། འདི་ལྟར་དབུ་མའི་ལམ་གྱི་བཟི་སྨན་དེས་རང་ཅག་གི་མགོ་ལུས་ཡོངས་སུ་ཁྱབ་ནས་འདི་ལྟར་རང་ཅག་གི་འགུལ་ནུས་ཐམས་ཅད་སྦྲིད་པར་བཏང་སོང་།

ཁོང་ཁྲོ་ལ་བསམ་གཞིགས།
ང་ཚོས་ག་དུས་ཡིན་རུང་། དོན་དག་གང་ཞིག་ཡིན་རུང་བསམ་གཞིགས་ངེས་པར་དུ་བྱེད་དགོས། སྔར་སྐྱེ་བུ་དམ་པ་ཆེ་གེ་མོས་གང་དུ་ཐག་བཅད་པ་དེ་དུས་དང་རྣམ་པ་ཀུན་དུ་དེ་རང་དུ་ངེས་དགོས་པ་དང་། ངེས་ཤག་ཤག་ལས་བསམ་གཞིགས་ཡེ་ནས་མ་བྱས་ན། སྨན་ཟ་ཉེས་བྱས་ན་དུག་ཡིན། ། དུག་ཟ་སྟངས་ཤེས་ན་སྨན་་ཡིན། ། ཞེས་པའི་དཔེ་ལ་འགྲོ་ཉེན་འདུག་སྙམ། ཁོང་ཁྲོ་ནི་དུས་དང་རྣམ་པ་ཀུན་ཏུ་སྤང་བྱ་དང་། བཟོད་སྒོམ་ནི་དུས་དང་རྣམ་པ་ཀུན་ཏུ་བླངས་བྱ་ཡིན་པར་སྔར་ཡོངས་སུ་གྲུབ་ཟིན་ཞིང་། གང་ཟག་སྒེར་ཞིག་ལ་མཚོན་ན་དེ་ནི་དེ་ག་རང་རེད། ཡིན་ན་ཡང་ད་ནི་སྔར་གྱི་དུས་ཚོད་དེ་འགྱུར་སོང་བས་སྤྱི་ཚོགས་ཤིག་གི་བྱ་འགུལ་གྱི་ཁྲོད་དུ་འདིའི་འོས་བབས་ལ་བསམ་གཞིགས་བྱེད་རིན་མེད་པ་ཞིག་ཡེ་ནས་རེད་མེད། དམའ་མཐར་ཡང་རང་ཉིད་ལ་བདེན་དོན་དེ་ངེས་ཤེས་རྙེད་ཆེད་དུ་བསམ་གཞིགས་བྱེད་དགོས།
ང་ཚོ་ལ་ཁོང་ཁྲོ་ཡོད་ཅིང་། ང་ཚོའི་ཁོང་ཁྲོ་ནི་རྒྱུ་མཚན་ལྡན་པའི་ཁོང་ཁྲོ་ཡིན། དེའི་ཕྱིར་ང་ཚོས་རང་ཉིད་ཀྱི་ཁོང་ཁྲོ་ཕྱི་ལ་སྟོན་འོས། ཁོག་ལ་བཟུང་ན་དུག་ཡིན། ། ཁ་ནས་བཤད་ན་སྨན་ཡིན། །་ཞེས་ཟེར་སྲོལ་ཡོད། ངོ་མ་བཤད་ན་ང་ཚོས་ཁོང་ཁྲོ་བྱས་པ་དེ་རྒྱ་མི་རིགས་ཀྱིས་གོ་རྟོགས་བྱེད་ཐུབ་པ་ཞིག་ཡིན་པ་ལས། རྒྱ་མི་རིགས་དང་འཁོན་འདྲེས་སྔར་ལས་ཆེ་རུ་གཏོང་བྱེད་ཅིག་མིན། དེ་ལས་ལྡོག་སྟེ་མིའི་རང་གཤིས་ལས་ཡོངས་སུ་བརྒལ་བའི་སྤྱོད་པ་གཟོད་སྒོམ་ཞེས་པ་དེ་ཁྱེར་ན་རྒྱ་མི་རིགས་ནི་དེ་བས་མགོ་རྨོངས་བྱེད་ཅིག་ཏུ་འགྱུར་སྲིད། རྒྱ་མི་རིགས་ཀྱིས་ང་ཚོ་ཡོངས་རྫོགས་བྱང་ཆུབ་སེམས་པ་ཡིན་པར་ནམ་ཡང་ཡིད་ཆེས་བྱེད་མི་སྲིད། དེ་ནི་ངན་པ་རྒྱ་ཡན་དུ་བཏང་བ་རང་ཡིན། དེ་ནི་རྟོགས་པ་མཐོན་པོ་དག་གི་བྱ་སྤྱོད་ཅིག་དང་། གང་ཟག་དཀྱུས་མ་དག་གི་ཟོལ་བརྫུ་ཞིག་ཡིན།
ཟོལ་བརྫུ་ནི་ཟོལ་བརྫུ་རང་ཡིན་པས་ནམ་ཡང་རྒྱུན་འཁྱོང་མི་ཐུབ་ཅིང་། དེའི་བར་ནས་ང་དང་ང་ལྟ་བུ་གང་ཟག་དཀྱུས་མ་དག་གིས་བསམ་བློ་དངོས་རྗེན་པ་ཁོང་ཁྲོའི་རྣམ་འགྱུར་ཞིག་ཕྱིར་ཐོན་(འཐོན་རྒྱུ་ཡིན་པ་གཏན་ཁེལ་ཡིན)་པ་ན་རྒྱ་མི་རིགས་ཀྱི་སེམས་སུ་འཁོན་འདྲེས་དེ་བས་ཆེ་རུ་འགྲོ་སྲིད། གང་ལགས་ཤེ་ན་སྔན་ཆད་ཁོང་ཚོས་ང་ཚོ་ལ་མ་རུང་བ་ཞིག་བྱས་པའི་ལོ་རྒྱུས་དེ་ཁོ་ཚོ་ལ་ངོ་སྤྲོད་མཁན་གཅིག་ཀྱང་མེད་པས་དེའི་སྐོར་ལ་ཁོ་ཚོར་རྒྱུས་མེད་པས་སོ། དེའི་ཕྱིར་ང་ཚོས་ངོས་ནས་དོན་མེད་ཁྲོ་བ་སྟོན་གྱི་འདུག་བསམ་གྱི་རེད།
ང་ཚོ་གང་ཟག་དཀྱུས་མ་ཡིན་ལ་རྒྱ་མི་རིགས་ཀྱང་གང་ཟག་དཀྱུས་མ་ཡིན། དཀྱུས་མས་དཀྱུས་མའི་སེམས་ཁམས་རྟོགས་ཐུབ་པས་ང་ཚོས་ཁོང་ཁྲོ་བྱས་པ་དེ་རྒྱ་མི་རིགས་ཀྱི་སེམས་ལ་གཏན་དུ་ཡལ་རྒྱུ་མེད་པའི་རྨ་ཁ་བཟོ་བྱེད་ཅིག་ཡེ་ནས་མིན། ང་ཚོའི་ཁོང་ཁྲོ་ཕྱིར་བཏོན་པ་དེ་ནི་རྒྱ་མི་རིགས་ཀྱིས་རང་གི་ནོར་འཁྲུལ་ངོས་འཕྲོད་བྱེད་གཅིག་རང་ལས་མེད་པ་དེ་ཡིན་ཞིང་། ནམ་ཞིག་དེ་ངོས་འཕྲོད་ན་དེས་མི་རིགས་གཉིས་ཀྱི་བར་ལ་སྔར་ལས་མཛའ་བརྩེའི་འདུ་ཤེས་བསྐྲུན་པའི་སྲིད་པ་ཧ་ཅང་ཧ་ཅང་ཆེ།
དེས་ན་ང་ཚོས་རྒྱའི་རྒྱལ་དར་མེར་སྲེག་པ་ནི་རྒྱ་མི་རིགས་ལ་འཁོན་འདྲེས་བཟོ་ཆེད་མིན་པར་ང་རང་ཚོའི་སེམས་ཀྱི་ཁོང་ཁྲོ་དེ་ཕྱིར་མངོན་ཆེད་ཙམ་ཡིན་པ་འཇིག་རྟེན་པ་སུས་ཀྱང་ཤེས་རྟོགས་ཐུབ་པ་ཞིག་རེད། འདི་ཙམ་ནི་རྒྱ་མི་རིགས་ཀྱིས་ད་ལྟའི་སྐབས་སུ་ཡང་ཤེས་རྟོགས་ཐུབ་ཟིན་ཡོད་ངེས་ཡིན་ལ། གལ་སྲིད་མེད་རུང་དེ་འབྱུང་བར་དཀའ་ངལ་ཆེ་བ་དེ་ཙམ་ཡེ་ནས་མེད། སྔ་དྲོ་ཁྲག་གི་འཁོར་ལོ་བསྐོར་ན། ཕྱི་དྲོ་གྱོད་ལ་འགྲིག་ཐབས་ཡོད། ཟེར་སྲོལ་ཡོད་ན་སྔ་དྲོ་ཁོང་ཁྲོའི་རྣམ་འགྱུར་ཞིག་བསྟན་ན། ཕྱི་དྲོ་ཕན་ཚུན་འགྲིག་རྒྱུ་མེད་པ་ཞིག་ཏུ་དེ་བས་ཀྱང་ག་ལ་འགྱུར། ང་ཚོས་རྒྱ་གཞུང་ལ་ཁྲོ་རུང་བས་ཁྲོ་བ་ཕྱིར་བཏོན་དགོས་ཟེར་དུས་ང་ཚོ་ཡེ་ནས་མི་འགྲིག་པའི་ལམ་ཆས་པ་རེད་བསམ་ན་དེ་ནི་ང་ཚོ་བོད་རིགས་ནང་ཁུལ་ལ་གཅིག་སེམས་གཅིག་གིས་མ་རྟོགས་པ་རང་རེད།
དུས་རབས་ཉེར་གཅིག་པ་དེ་གྲོས་མོལ་གྱི་དུས་རབས་ཤིག་ཡིན་དགོས་པར་རེ་བ་འཆང་ཞིང་། གྲོས་མོལ་ནི་མཐར་གཏུག་ན་ཕྱོགས་གཉིས་ཀས་གཅིག་གི་སེམས་ཀྱི་དཀའ་ངལ་གཅིག་ལ་བརྡ་སྤྲོད་རྒྱུ་དེ་རེད། ཤེས་དགོས་པ་ཞིག་ལ་ཁྲོ་བ་ཕྱིར་བཏོན་པ་ན་དྲག་པོའི་བྱ་བ་ཡིན་དགོས་པའི་ངེས་པ་ཡེ་ནས་མེད་པ་དེ་རེད། ང་ཚོས་སེམས་ནང་གི་ཁོང་ཁྲོ་ཕྱིར་བསྟན་པས་བརྡ་འགའ་ཞིག་སྤྲོད་ཐུབ་ཀྱི་ཡོད། གཅིག་ནི་ཁོ་བ་ཅག་གིས་ང་ཚོ་ལ་གང་བྱས་པ་དེ་འགྲིག་མེད་པར་རམ། དམའ་མཐར་ཡང་ལམ་ལ་སོང་མེད་པ་ཤེས་ཐུབ་པ་དེ་རེད། གཉིས་ནི་རང་ཅག་གིས་ཁོ་བ་ཅག་གིས་ང་ཚོ་ལ་གང་བྱས་པ་དེས་ང་ཚོ་ལ་དོན་དམ་པའི་སྡུག་བསྔལ་ཞིག་སྤྲོད་ཀྱིན་ཡོད་པར་ར་སྤྲོད་ཐུབ་པ་དེ་རེད། ཁོང་ཁྲོའི་རྣམ་འགྱུར་ཞིག་མེད་ན་ཁྱེད་ཅག་གིས་བྱས་པ་དེས་ངེད་ཅག་ལ་ཅིག་ཅིག་གནོད་ཀྱི་འདུག་ཅེས་ཇི་ཙམ་བཤད་རུང་སུས་ཡིད་ཆེས་བྱེད་དམ། གསུམ་ནི་ཁོང་ཁྲོའི་རྣམ་འགྱུར་ཕྱིར་མངོན་པ་ནི་མི་སྡུག་པའི་བྱ་བ་ཞིག་ཡིན་པས་རང་གཞན་སུ་ལ་དེ་བསྐྱར་ཟློས་བྱེད་པའི་འདོད་མོས་མེད་སྟབས་རང་གཞན་གཉིས་ཀས་དེ་ལས་བསླབ་བྱ་བླངས་ནས་འབྱུང་འགྱུར་དེ་འདྲ་མི་འབྱུང་བའི་སློབ་ཚན་ལེན་ཐུབ།
ཁོ་བོས་གོང་གི་འདི་དག་བཤད་དགོས་དོན་ནི་དབུ་མའི་ལམ་ནི་ཁྲོ་བ་མི་བྱེད་པ་དང་། སེམས་བཟང་ཁོ་ན་བྱེད་པའི་རྨང་གཞི་ལ་གཞི་བཅོལ་ཡོད་པས་དབུ་མའི་ལམ་གྱི་གཞི་རྟེན་བཅོལ་ས་ཁོ་རང་ན་དོགས་འདྲི་བྱས་པ་ཙམ་ཡིན། གལ་སྲིད་བྱ་བ་གང་ཞིག་གི་གཞི་རྟེན་བཅོལ་དེ་ནོར་ཡོད་ན་བྱ་བ་དེའི་ངོ་བོ་དང་། རྣམ་པ་ཇི་ལྟར་བཟང་རུང་བྱ་བ་དེའི་རྩ་བའི་ཆ་ལ་འགྲིག་མེད་སྟབས་བྱ་བ་དེ་མ་འགྲིག་པར་འཇོག་འོས་པ་རྟོགས་སླ་ཞིག་རེད་སྙམ་ནས་བྲིས་པ་ཡིན། ཅི་སྟེ་དབུ་མའི་ལམ་གྱི་གཞི་རྟེན་བཅོལ་ས་ནོར་མེད་ན་དེ་གས་འགྲིག་པ་རེད། ནོར་མེད་པར་ཡང་སྨོན།
མཇུག་མཐར་ཁ་བྱང་གི་འགྲེལ་བ། ཁ་བྱང་འདི་བདག་གི་རེ་སྨོན་ཙམ་ལས་དོན་དུ་ཀྲུའུ་དང་རྒྱ་ནག་དབུས་གཞུང་གཉིས་ལ་མི་རིགས་ཀྱི་གནད་དོན་སྐོར་ལ་འགལ་བ་ཅི་ཡང་མཐོང་རྒྱུ་མེད། འགལ་ཟླ་ཡོད་པ་ནི་ཀྲུའུ་དང་རང་རེའི་དབུས་མའི་ལམ་པ་དག་གི་བསམ་ཚུལ་རེད།
གཤམ་དུ་ངས་ལྟས་དབང་གིས་རྙེད་པའི་དྲ་ལམ་ཞིག་འབུལ་རྒྱུ་ཡིན། འདི་ནི་༧གོང་ས་མཆོག་དང་གསར་འགོད་པའི་དྲིས་ལན་ཞིག་རེད། འདིའི་ནང་དུ་༧གོང་ས་མཆོག་གིས་ “ངས་ཡོངས་གྲགས་སུ་ང་ཚོའི་ཐབས་ལམ་དེ་གྲུབ་འབྲས་མ་ཐོན་པར་ངོས་ལེན་བྱེད་ཀྱིན་ཡོད།”་ཅེས་གསུང་མཚམས། དྲི་བ་འདོན་མཁན་གྱིས“ཁྱོད་ཀྱིས་ཡོངས་གྲགས་སུ་དབུ་མའི་ལམ་ལ་གྲུབ་འབྲས་མ་ཐོན་པར་ངོས་ལེན་བྱེད་ཀྱིན་ཡོད།”་ཅེས་ཟེར་མཚམས། ༧གོང་ས་མཆོག་གིས་“དེ་ཡོངས་གྲགས་སུ་གྲུབ་འབྲས་མ་ཐོན་པར་ངོས་འཛིན་བྱེད་ཀྱིན་ཡོད།”་ཅེས་གསུང་འདུག ཞིབ་པར་རྣམ་ཚོས་གཟིགས་པར་ཞུ།
http://www.youtube.com/watch?v=jsFDKQZsRDA&feature=related་