དེ་རིང་ཕྱི་ཚེས་༢༢ཉིན་གྱི་བོད་ནང་གི་དགོང་དྲོ་ཆུ་ཚོད་༤དང་ཕྱེད་ཀ་ཡས་མས་ཤིག་ལ། བོད་མདོ་སྨད་རེབ་གོང་དུ་བོད་མི་ན་གཞོན་རང་ལོ་༡༨ཡིན་པ་ཀླུ་འབུམ་ལགས་ཞུ་བ་ཞིག་གིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་བཏང་ནས་འདས་གྲོངས་ཕྱིན་པའི་ཡིད་སྐྱོའི་གནས་ཚུལ་ཐོན་འདུག་ཅེས་ཨེ་ཤ་ཡ་རང་དབང་རླུང་འཕྲིན་ཁང་གིས་གནས་ཚུལ་སྤེལ་འདུག རྒྱས་པ་འདི་ནས་གཟིགས་རོགས། www.rfa.org
ཡང་གནས་ཚུལ་ཡོང་ཁུངས་གཞན་ཞིག་ལྟར་ན། གནས་ཚུལ་འདི་ནི་རེབ་གོང་འདོ་བ་ཞེས་པ་དང་། དེ་ཡང་འདོ་བ་ཡོ་ལག་ཅེས་པ་ནས་བྱུང་ཡོད་ཚོད་འདུག
གངས་ཅན་འགྲོ་བའི་རང་དབང་བདེ་སྐྱིད་སླད། །
རང་གི་ལུས་དང་སྲོག་ཀྱང་ཡོངས་བཏང་བའི། །
རྒྱལ་གཅེས་དཔའ་བོ་ན་གཞོན་ཀླུ་འབུམ་མཆོག །
དག་ཞིང་བདེ་བ་ཅན་དུ་མྱུར་སྐྱེ་ཤོག །
བདེ་གཤེགས་ཀུན་གྱིས་བསྔགས་པའི་བདེ་བ་ཅན།།
རྣམ་དག་ཞིང་གི་དབང་ཕྱུག་བཅོམ་ལྡན་འདས།།
ལྷ་མིའི་སྟོན་པ་མགོན་པོ་ཚེ་དཔག་མེད།།
རྒྱལ་བའི་དབང་པོས་འགྲོ་ལ་འཆི་མེད་སྩོལ།།
འདི་ནས་ཤི་འཕོས་གྱུར་མ་ཐག།
དགའ་ལྡན་སྐྱེས་ནས་ཡིད་དགའ་བར།།
མྱུར་དུ་བྱམས་མགོན་མཉེས་བྱས་ནས།།
བྱང་ཆུབ་ལུང་བསྟན་འཐོབ་པར་ཤོག།
གོང་གི་སྨོན་ཚིག་འདི་གཉིས་ཀྱི་སྨོན་དོན་ལྟར་བོད་རིགས་སྤུན་ཟླ་ཡོངས་ཀྱིས་བོད་བཙན་པོའི་ལར་ཞེན་དང་བོད་མིའི་རང་དབང་གི་ཆེད་དུ་རང་གི་གཅེས་སྲོག་ཕུལ་བ་གང་ཡིན་རུང་། རབ་བྱུང་ན་འཆི་མ་དགོས་བ་ཞིག་དང་ཚེ་རིང་ལོ་བརྒྱ་ཡོང་བར་སྨོན་འདུན་ལོས་ཡོད། བོད་ཀྱི་ན་གཞོན་མང་པོ་འདི་ལྟར་གཅིག་རྗེས་གཉིས་མཐུད་དུ་འཆི་མ་དགོས་ན་བསམ་གི་ཡོད་པ་རེད། ཡིན་ཡང་ཕ་མས་བསླབ་པ་ཡང་མ་ཡིན་ལ། དགེ་རྒན་གྱིས་བསླབ་པ་ཡང་མ་ཡིན། གཞན་གྱིས་སྐུལ་སློང་བྱས་པ་ཡང་མིན་པར། རང་ལུས་གཏོང་བའི་ཆོད་སེམས་དང་སྙིང་སྟོབས་དེར་ཚོད་འཛིན་བྱེད་དཀའ་བ་ཞིག་ལ་གྲུབ་འབྲས་བཟང་པོ་ཞིག་ཡོད་པར་སྨོན།