ཀླུ་སྨྱོན་རྒས་འདུག ཁོང་གི་སྨྱུག་གུ་ཡང་རྒས་ཀྱིན་འདུག

ལོ་མ་རྒྱལ།
——༼མདང་དགོང་ཀླུ་སྨྱོན་ཝཱ་ཎར་སླེབས་ཏེ་རྩོམ་རིག་དང་འབྲེལ་བའི་གཏམ་བཤད་ཅིག་གནང་སོང་བས། དེ་ལ་རང་ཉིད་ཀྱི་ཇི་ལྟར་གོ་སྟངས་ཞིག་ཡིགས་ཚོགས་ཀྱི་ཕྲེང་བ་འདི་ལ་སྤེལ་བ་ལགས་སོ༽

དང་པོ།

སྤྱིར་རྩོམ་རིག་ནི་མིའི་རིག་པའོ་ཞེས་བརྗོད་པའི་སྣེ་མོ་འདི་ནས་གཞིགས་ན། ཀླུ་སྨྱོན་གྱིས་བརྗོད་པའི་སྐད་ཆ་དེ་དག་ནི་དང་ལེན་བྱེད་མི་ཐུབ་པ་གང་ཡང་མི་འདུག་སྟེ། རྩོམ་རིག་གིས་མི་ཡི་དགའ་སྐྱོ་ཆགས་སྡང་སོགས་སེམས་ཀྱི་འགྱུར་བ་དེ་ཇི་བཞིན་དུ་བརྗོད་ཐུབ་པ་ཡིན་ན་རྩོམ་རིག་གི་ལས་འགན་རྫོགས་པ་རེད། དེ་བས། ང་ཚོས་ཀླུ་སྨྱོན་གྱི་རྩོམ་ཡིག་ལ་ལྟ་མྱོང་རོལ་གསུམ་བྱེད་སྐབས། མིའི་རིག་པའི་མིག་དབང་སྤྱད་དེ་ལྟ་དགོས་པ་ལས། སྤྱི་ཚོགས་ལ་ཕན་ཐོགས་མིན་གྱི་སྤྱི་ཚོགས་རིག་པའི་ལམ་ནས་ལྟ་བར་མི་རུང་བ་ཞིག་རེད། འདི་ཡང་ང་ཚོ་བོད་ཀྱི་ཀློག་པ་པོ་ཚོས་སེམས་ན་འཛིན་དགོས་པའི་ལྡེ་མིག་ཅིག་ཡིན་ཏེ། རྩོམ་རིག་ལ་ལ་ཞིག་མིའི་རིག་པའི་སྒོ་ནས་ལྟ་དགོས་པ་དང་། ལ་ལ་ཞིག་སྤྱི་ཚོགས་རིག་པའི་སྒོ་ནས་ལྟ་དགོས་པ་དེའོ། དེ་ནས། ངཚོས་རྩོམ་རིག་ལ་ལྟ་བྱེད་ཀྱི་མིག་དབང་དེ་གཉིས་སྤྱད་དེ་རྩོམ་རིག་ལ་རོལ་བ་ཡིན་ན། རྩོམ་རིག་དེ་ལ་གདེངས་འཇོག་ཡག་པོ་ཞིག་བྱེད་ཐུབ་ལ། སྤྱི་ཚོགས་ལ་ཕན་ཐོགས་ཀྱི་མི་འདུག དེ་བས། རྩོམ་ཡིག་དེ་ཡག་པོ་མི་འདུག་ཅེས་པའི་ཆིག་རྐྱང་གི་གདེངས་འཇོག་དེ་འདྲ་དང་དགོས་མེད་ཀྱི་རྩོད་རྙོག་དེ་འདྲ་ཡང་བྱུང་མི་སྲིད་པ་ཞིག་རེད།

གཉིས་པ།

ཀླུ་སྨྱོན་གྱི་བསམ་བློའི་རང་དབང་དེ་ནི་ངོ་སོ་བསྟོད་པར་འོས་པ་ཞིག་རེད། སྤྱིར་མི་སུ་དང་སུ་ཞིག་ཡིན་ན་ཡང་ཚོགས་པ་དང་སྒྲིག་སྲོལ། རིག་གནས། སྲོལ་རྒྱུན་ལ་སོགས་ཀྱི་ར་སྐོར་ཞིག་གི་ནང་ནས་རང་ཉིད་ཀྱི་སེམས་ཚོར་དངོས་མ་ཞིག་དང་བདེན་པ་བདེན་ཐུབ་ཀྱི་སྐད་ཆ་ཞིག་བཤད་རྒྱུ་ནི་ཧ་ཅང་དཀའ་མོ་ཞིག་རེད། ཡིན་ན་ཡང་། ཀླུ་སྨྱོན་ལ་ཆ་མཚོན་ན། ཁོང་གིས་རྩོམ་ཡིག་འབྲི་དུས། ཚོགས་པ་དང་ཆོས་ལུགས། ཆོལ་ཁ། ལྟ་གྲུབ། རིག་གནས། སྲོལ་རྒྱུན་ལ་སོགས་ཀྱི་བཀག་རྒྱའམ་ར་སྐོར་དེ་ལས་ཐར་ཏེ། རང་དབང་ངམ་རང་རྐྱ་འཕར་བའི་སྒོ་ནས་འབྲི་བཞིན་ཡོད་སྐད། དེ་བས། ཁོའི་སྨྱུག་ཁ་ནས་ཐོན་པ་དག་ནི་ཁོ་རང་ཉིད་ཀྱི་བདེན་པ་དང་རང་ཉིད་ཀྱི་མྱོང་བ། རང་ཉིད་ཀྱི་འཚོ་བ། ཡང་ན། རང་ཉིད་ཀྱི་བསམ་བློ་དང་འཚོ་བ་གཉིས་རྩུབ་བརྡར་ལས་བྱུང་བ་ཡིག་འབྲི་ཤ་སྟག་ཅིག་ཡིན་ཙ་ན། ཀླུ་སྨྱོན་ནི་ཁོང་གི་ཡི་གེ་དང་། ཁོང་གི་ཡི་གེ་ནི་ཀླུ་སྨྱོན་ནོ་ཞེས་བརྗོད་ན་ཡང་ཐལ་དྲགས་མེད་པ་འདྲ། ཟུར་འདི་ནས་ཅུང་ཙམ་འཕྲོས་ཏེ་བཤད་ན། གསར་གཏོད་དང་སྒྱུ་རྩལ་ཟེར་བ་ཡང་ལམ་བུ་འདི་ནས་བརྡོལ་བཞིན་པར་སྣང་། གཏན་ཚིགས་ནི་ང་ཚོ་བྱེ་བྲག་པ་རེ་རེ་གཞན་དང་མི་འདྲ་བར་ཁོ་ན་རེ་རེ་ཡིན་པས་སོ། ཡིན་ན་ཡང་། ང་ཚོས་རང་ཉིད་ཀྱི་ཁོ་ན་དེ་ངོས་མ་ཟིན་པའམ་མཐོང་ཆུང་གི་དབང་གིས་ང་ཚོ་ཕལ་མོ་ཆེ་ནི་ལད་ཟློས་བྱེད་མཁན་འབའ་ཞིག་ཏུ་གྱུར་ཡོད། སྤྱིར་མི་རེ་རེ་ཡིས་རང་ཉིད་ཅི་ལྟ་བུ་ཞིག་ཡིན་པ་དེ་ངོས་ཟིན་བྱུང་ནས་དེ་ཇི་བཞིན་དུ་སྟོན་ཐུབ་པ་ཡིན་ན། དེ་ནི་གསར་གཏོད་དང་སྒྱུ་རྩལ་གྱི་རྣམ་པ་ཞིག་རེད། ཡིན་ན་ཡང་། ལད་ཟློས་ཀྱིས་དེ་དག་དམར་གསོད་གཏོང་གི་ཡོད། མདོར་དྲིལ་ན། ཀླུ་སྨྱོན་གྱི་བསམ་བློའི་རང་དབང་གི་ཆ་དེ་ནི་སྨྱུག་ཐོགས་པ་ཀུན་པོས་བླང་བྱ་ཞིག་ཡིན་པས་འདོད་དོ།

གསུམ་པ།

ཀླུ་སྨྱོན་རྒས་འདུག ཁོང་གི་སྨྱུག་གུ་ཡང་རྒས་ཀྱིན་འདུག ཁོང་གིས་བརྗོད་ན་ན་ཚོད་མ་འདྲ་བའི་དབང་གིས་རྩོམ་རིག་ལ་ཕྱོགས་པའི་འདུ་ཤེས་འཛིན་སྟངས་དེ་ཡང་མ་འདྲ་མ་འདྲ་བ་ཡོད་པར་བརྗོད་དེ། ཁོ་རང་ཉིད་ཀྱི་ན་ཚོད་རྒས་ལ་ཕྱོགས་པ་དང་བསྟུན་ནས་རྩོམ་རིག་ལ་བཟུང་བའི་འདུ་ཤེས་དེ་ཡང་རྒས་ནས་འགྲོ་བཞིན་པ་དང་། རྩོམ་རིག་དང་ཁོ་རང་གི་བར་ཐག་དེ་ཡང་རིང་དུ་འགྲོ་བཞིན་པ་ཞིག་བརྗོད་སོང་། འདི་ཡང་། ཀླུ་སྨྱོན་རང་ངོས་ནས་རྩོམ་རིག་ལ་འཇུག་པའི་རང་ཉིད་ཀྱི་ཉམས་མྱོང་གཤའ་མ་ཞིག་ཡིན་པས། དེ་ལ་ཐིག་ཤིང་གཞན་ཞིག་གི་ཚད་ཐིག་འཇལ་ཏེ། ལེགས་ཉེས་དགེ་སྡུག་ལ་སོགས་ཀྱི་ཤན་འབྱེད་ནི་གཞར་ཡང་མི་བྱའོ།
སྤྱིར། ཤན་འབྱེད་བྱེད་པའི་དོན་བྱ་འདི་ནི་གཞུང་ལུགས་སམ་ལྟ་གྲུབ་ལ་སོགས་ཀྱི་ནང་རོལ་ཞིག་ནས་ཐག་གཅོད་བྱེད་པའི་ལས་ཀ་ཞིག་ཡིན། དེ་བས། ཁོང་གིས་བརྗོད་པ་དག་ནི་དེ་དག་ལས་བརྒལ་ཏེ། རྩོམ་རིག་གི་བདེན་པ་ནི་ཅི་ཞིག་ཡིན་མིན་དེ་ལྟ་གྲུབ་དང་གཞུང་ལུགས་གང་ལ་ཡང་ཐོ་མ་གཏུགས་པར་རང་ངོས་ནས་འཚོལ་ཞིབ་དང་མྱོང་བ། ལས་སུ་འཇུག་བཞིན་ཡོད་པས། དེ་ལྟར་ཤན་འབྱེད་ནི་བདག་གིས་མི་བྱའོ། གལ་ཏེ། བྱེད་པའི་དབང་དུ་བཏང་ན་ཡང་། གདེངས་འཇོག་དང་ཤན་འབྱེད་རན་པོ་འཚམ་པོ་ཞིག་ནི་མི་སྲིད་པ་ཞིག་རེད།
ཡིན་ན་ཡང་། ཀླུ་སྨྱོན་རྩོམ་རིག་ལ་ཨ་ཐང་ཆད་པའི་རྣམ་པ་དེ་མཐོང་ན། ང་ཚོས་ཀླུ་སྨྱོན་གྱིས་རྩོམ་རིག་ལ་འཛིན་པའི་ལངས་ཕྱོགས་དེར་ཕྱིར་རྟོག་ཅིག་བྱེད་དགོས་པ་འདྲ། ཡང་ན། ཁོང་གི་གསར་རྩོམ་མམ་གསར་གཏོད་ལ་ཕྱོགས་པའི་བློ་ཡི་རྔམ་ཁ་དེ་གཏིང་ཇེ་ཟབ་དང་ཁོད་ཇེ་ཡངས། རྒྱ་ཇེ་ཆེ་རུ་གྱུར་ཡོད་པའི་རྟགས་མཚན་ཞིག་ཀྱང་ཡིན་པར་འཁུམས། གང་ལྟར། ཁོང་གི་རྩོམ་རིག་ལ་བཟུང་ཡོད་པའི་ལངས་ཕྱོགས་དེ་རབ་རིབ་ཅིག་ཏུ་གྱུར་ཡོད་པ་ཁོང་གི་ངག་སྒྲོས་ཀྱི་ཚིག་གི་ཟ་ཁ་ཟུར་ཁ་མང་པོ་ཞིག་ནས་རྡོ་འཇུར་འཇུར་དང་ས་འབུར་འབུར་གྱི་ངང་ནས་ཐོན་ཡོང་།

བཞི་བ།

རྩོམ་རིག་གིས་མིའི་བསམ་བློ་དང་སྤྱི་ཚོགས་ལེགས་བཅོས་བྱེད་ཐུབ་མིན་གྱི་ཐད་ལ་ཡང་ཁོང་གི་རྣམ་འགྱུར་དེ་ནི་ཤི་ལ་ཉེ་བའི་བགྲེས་སོང་ཞིག་གི་ངོ་གདོང་ལྟར་སྐྱ་ཟིལ་ཟིལ་ཞིག་ཏུ་སྣང་། ཁྱད་པར་དུ་བོད་དང་ཧི་མ་ལ་ཡའི་མི་དང་སྤྱི་ཚོགས་སུ་རྩོམ་རིག་གི་ནུས་པ་ཞིག་མངོན་འགྱུར་བྱེད་པ་དེ་ནི་ཧ་ཅང་ཁག་པོ་ཞིག་ཡིན་པར་བརྗོད་ཅིང་། རྩོམ་རིག་གི་ཚབ་ལ་ཆོས་ལུགས་ཀྱིས་ནུས་པ་ཐོན་ཐུབ་པར་བརྗོད་སོང་། སྐད་ཆ་འདི་ལ་ཐད་ཐད་དུ་ཅིག་ལྟོས་ན། ཅུང་བདེན་བདེན་དུ་སྙམ་པའི་སྣང་བ་བན་བུན་ཞིག་ཐོལ་ཐོལ་ལ་སྐྱེས་ཡོང་མོད་། མནོ་བསམ་ཞིབ་དུ་བགྱིས་ན། དེ་ལ་དོགས་པ་ཟ་ཟིལ་ཞིག་ཀྱང་ངང་ངམ་ཤུགས་ཀྱིས་སླེབས་ཡོང་ཏེ། བོད་དང་ཧི་མ་ལ་ཡི་མི་དང་སྤྱི་ཚོགས་དག་ལ་དོན་གྱི་ཆོས་ལུགས༼ནང་ཆོས། ༽་ཀྱིས་ནུས་པ་ཞིག་ཐོན་ཡོད་དམ། ནང་ཆོས་ཀྱི་གོ་བ་བློ་ལ་སྐྱེས་ཏེ་བསམ་བློ་ལ་ལེགས་བཅོས་ཤིག་ཐེབས་ཡོད་དམ། དེ་ཡིས་སྤྱི་ཚོགས་ཀྱི་སྣེ་ཁྲིད་དེ་འགྱུར་བ་ཞིག་ཐེབས་ཡོད་དམ། ཡོད་ན། ནང་ཆོས་དང་བོད་མི་ཡི་བར་ན་དེ་འདྲའི་བར་ཐག་ཅིག་ཡོད་དོན་ཅི་ཡིན་ནམ། ནང་ཆོས་དང་བོད་ཀྱི་སྤྱི་ཚོགས་གཉིས་ཀྱི་བར་ན་དེ་འདྲའི་ཧེ་བག་ཅིག་ཡོད་དོན་ཅི་ཡིན་ནམ།
སྤྱིར་རྩོམ་རིག་དང་ཆོས་ལུགས་གཉིས་ལ་མཚུངས་རྟགས་རྒྱག་མཁན་ཡང་ཡོད་དེ། དེ་གཉིས་ཀ་མིའི་བསམ་བློ་བཙོ་སྦྱོང་བྱེད་ཀྱི་ཡོད་པས་ཡིན་། ཡིན་ན་ཡང་། འུ་ཅག་གིས་གླེང་བཞིན་ཡོད་པའི་རྩོམ་རིག་དེ་ནི་ཇི་འདྲའི་ཉམས་ཆུང་ཆུང་ཞིག་རེད་ཨང་། འབབ་ས་ལ་བབས་ཏེ་བཤད་ན། རྩོམ་རིག་གི་ནུས་པ་ཐོན་མིན་དེ་ནི་རྩ་བའི་མི་རིགས་དེ་ཡི་སློབ་གསོ་ཡི་སྒྲོམ་གཞི་དེ་ལ་རག་ལས་ཡོད་པ་ཞིག་ཡིན། མི་རིགས་གང་ཞིག་གི་སློབ་གསོ་ཡི་སྒྲོམ་གཞི་དེ་བརྟན་པོ་ཞིག་དང་ཆུ་ཚད་མཐོན་པོ་ཞིག་ཡོད་ན། རྩོམ་རིག་གིས་ཀྱང་མི་རིགས་ལ་སྣེ་ཁྲིད་དང་སྤྱི་ཚོགས་ལེགས་བཅོས། བསམ་བློ་ཡར་རྒྱས་སུ་གཏོང་ཐུབ་པའོ། དེ་ཡང་། ང་ཚོས་མི་རིགས་གཞན་གྱི་ལོ་རྒྱུས་དག་ལ་ཕྱིར་མིག་ཅིག་ལྟོས་ན་གསལ་བོ་རེད།

ལྔ་བ།

ཀླུ་སྨྱོན་གྱིས་བརྗོད་ན། མིའི་འཚོ་ཐབས་ལ་ཁ་ཐུག་གི་འབྲེལ་བ་ཡོད་པ་ནི་སྒོར་མོ་རེད་ཟེར། ང་རང་གིས་བསམ་ན། མིའི་འཚོ་ཐབས་ལ་ཐད་ཀར་ཀྱི་འབྲེལ་བ་ཡོད་པ་ནི་བདེ་སྐྱིད་རེད་འདོད། དེ་བས། ཁོང་གིས་སྒོར་མོ་འཚོ་ཐབས་ཀྱི་དེབ་རེ་བརྩམས་ན་བྲིན་རྒྱུགས་ཆེ་བར་བརྗོད། དེ་བས། ང་རང་གིས་བསམ་ན་བདེ་སྐྱིད་ཇི་ལྟར་ཐོབ་ཐབས་ཀྱི་དེབ་ཅིག་བརྩམས་ན་ཕན་ཐོགས་ཆེ་བར་འདོད།
མང་པོ་ཞིག་གིས་མཁྱེན་གསལ་ལྟར་རེད། སྒོར་མོ་ཡིས་མི་ལ་བདེ་སྐྱིད་བསྐྲུན་མི་ཐུབ་པ་གསལ་བོ་རེད། ཡིན་ན་ཡང་། སྒོར་མོ་མི་དགོས་ཞེས་བརྗོད་ཀྱི་ཡོད་པ་མ་རེད། ཡིན་ན་ཡང་། ང་རང་ལ་འདི་འདྲའི་ཡིད་ཆེས་བརྟན་པོ་ཞིག་ཡོད་དེ། མི་ལ་སྒོར་མོ་སོགས་ཅི་ཡང་མེད་ན་ཡང་བདེ་སྐྱིད་ལྡན་ཐུབ་པ་དེའོ།
དེ་ནས། ཅུང་འཕྲོས་ཏེ་ང་ཚོས་འདི་ལྟར་བསམ་བློ་ཞིག་ཀྱང་གཏོང་དགོས་ཏེ། དུས་རབས་ཉེར་གཅིག་གི་སྐྱ་རེངས་བོད་ལ་ཤར་བ་ནས་བཟུང་། བོད་ཀྱི་ཕྱིའི་དངོས་པའི་ཡར་རྒྱས་ཀྱང་ག་ལ་གང་གང་འཚམ་མགྱོགས་མྱུར་འཕེལ་བཞིན་ཡོད་པ་རེད། དེ་བཞིན་ལོ་ངོ་བཅུ་ཕྲག་ཁ་ཤས་ཀྱི་རྗེས་ནས་བོད་ཀྱི་འཚོ་བའི་ཡར་རྒྱས་དེ་ཡང་སྔར་ལས་ཇེ་མཐོ་དང་ཇེ་རྒྱས་སུ་སོང་ཏེ། མི་རིགས་གཞན་དང་མཉམ་མཉམ་དུ་འགྲོ་བ་ཡང་དོགས་པ་ཟ་དགོས་པ་ཞིག་མ་རེད་འདོད། དེ་ན། ང་ཚོས་ཕྱིའི་དངོས་པའི་ཕྱོགས་ལ་དང་དོད་དང་ཐེར་ཟུག་ཆེ་དྲག་ན་བོད་ལ་ཡང་ནུབ་ཕྱོགས་པ་ལྟ་བུའི་སེམས་ཀྱི་དཀའ་ངལ་འཕྲད་མི་སྲིད་པ་དང་། རང་སྲོག་རང་གིས་གཅོད་མཁན་ཡང་འབྱུང་མི་སྲིད་པ་ཞིག་རྦད་ཀྱི་མ་རེད་འདོད།
འོ་ན། ང་ཚོས་ལམ་བུ་ཅི་ཞིག་གདམས་དགོས་སམ་ཞེ་ན། ཕྱིའི་དངོས་པའི་ཡར་རྒྱས་དང་ནང་གི་བསམ་བློའི་ཡར་རྒྱས་གཉིས་ཟུང་དུ་འབྲེལ་བའི་ལམ་ཁ་ཞིག་བཏོལ་དགོས་པ་དེའོ། དེ་ཡང་། སློབ་གསོ་ཡི་ལམ་བུ་ཉག་ཅིག་ལ་བསྟེན་དགོས་པ་ལས་གཞན་ནི་མ་ཡིན་ནོ་ཞེས་བརྗོད་འདོད་པ་དེ་ཡིན།

༢༦། ༡༡། ༢༠༡༣ཉིན།