ཁ་ཁ་རེད།

ཆང་སྐྱེས།

གྲོགས་པོ་ཞིག་ལ་
ཁྱེད་ནི་ནམ་འཕང་སྟོད་པའི་ཐང་དཀར་ཞིག།
ང་ནི་མཚོ་བསྐོར་རྒྱག་པའི་ངང་སེར་ཞིག།
གཤོག་ཐོག་འདབ་ཆགས་ཡིན་པ་འདྲ་ན་ཡང་།།
ངེད་གཉིས་འཕུར་ལམ་མི་གཅིག་ཁ་ཁ་རེད།།

ཁྱེད་ནི་བྱང་ལམ་སྐྱོད་པའི་འདོ་བ་ཞིག།
ང་ནི་ཞིང་ཚིགས་བར་གྱི་བོང་བུ་ཞིག།
སྲོག་ཆགས་དུད་འགྲོ་ཡིན་པ་འདྲ་ན་ཡང་།།
ངེད་གཉིས་རྒྱུགས་ལམ་མི་གཅིག་ཁ་ཁ་རེད།།

ཁྱེད་ནི་རྒྱ་མཚོ་གཏིང་གི་གསེར་ཉ་ཞིག།
ང་ནི་ཁྲོམ་པའི་ཞབས་ཀྱི་སྦལ་བ་ཞིག།
རྟེན་ས་ཆུ་མོ་ཡིན་པ་གཅིག་ན་ཡང་།།
ངེད་གཉིས་འཚོ་ས་མི་གཅིག་ཁ་ཁ་རེད།།

ཁྱེད་ནི་ཐོ་རེངས་སྐར་མ་འོད་མ་འོད་ཆེན་ཞིག།
ང་ནི་ཉམ་ཆུང་སྲིན་འབུ་མེ་ཁྱེར་ཞིག།
རང་ལུས་འོད་དུ་འཚེར་བ་གཅིག་ན་ཡང་།།
ངེད་གཉིས་གཞན་གྱི་མིག་ལ་ཁ་ཁ་རེད།།

ཁྱེད་ནི་ཤེས་ཡོན་ལྡན་པའི་སྟོབས་ཆེན་ཞིག།
ང་ནི་ས་མཐར་འགྲིམ་པའི་འཁྱམ་པོ་ཞིག།
རྐང་གཉིས་མི་ཡི་ལུས་བརྟེན་འདྲ་ན་ཡང་།།
ངེད་གཉིས་ཁ་ཕྱོགས་མི་གཅིག་ཁ་ཁ་རེད།།