ཀླུ་སྨྱོན་ཧེ་རུ་ཀ
གཉིས་པ།
ལོ་ཤས་སྔོན་ནས་དྲ་ལམ་རིག་གནས་ཀྱི་འཁོར་རྒྱུགས་ཇེ་མགྱོགས་སུ་ཕྱིན་པ་དང་བསྟུན་ཏེ་བོད་ཀྱི་རྩོམ་རིག་སྤྱི་དང་ཁྱད་པར་དུ་སྙན་ངག་རིག་པའི་ཕྱོགས་སུ་སྣང་མེད་དུ་གཏོང་མི་ཐུབ་པའི་དོན་དག་མང་པོ་ཞིག་བྱུང་དང་འབྱུང་བཞིན་འདུག གཅིག་ནི་གལ་སྲིད་བོད་ཀྱི་སྙན་ངག་པ་ཞིག་གིས་སྙན་ངག་ཅིག་བྲིས་ཏེ་དྲ་ལམ་དུ་བཞག་མ་ཐག་སྐད་ཅིག་དེ་ཉིད་ལ་སྙན་ངག་དེས་ཤར་ནུབ་འཛམ་གླིང་ལ་དཀྲིས་བརྒྱབ་ནས་འགྲོ་བཞག་པ་དེ་རེད།
སྙན་ངག་པ་ཁ་གྱའི་ཁྱུང་སྔོན་གྱི་སྙན་ངག་དག་ཀྱང་ངས་བརྒྱུད་ལམ་འདི་འདྲ་ཞིག་ནས་ཡང་དང་སྐྱར་དུ་མཇལ་མྱོང་། ངས་རང་གིས་བརྒྱུད་མྱོང་བའི་རྩོམ་རིག་གསར་རྩོམ་གྱི་ལོ་ཟླ་དཀའ་སྡུག་ཅན་དེར་ཕྱིར་བལྟས་ཤིག་བྱས་ཚེ། གྲོགས་པོ་ཁྱུང་སྔོན་ལྟ་བུའི་རྩོམ་པ་པོ་དག་གི་ལས་དབང་ལ་ཡིད་སྨོན་སྐྱེ་དགོས་བྱུང་། དེ་ནི་ཁོང་ཚོར་རང་ཉིད་ལ་དབང་བའི་དྲ་ཚིག་དང་ཚོགས་པ་གང་འདོད་ཅིག་ཡོད་པས་ཡིན།
ལོ་འདི་དག་གི་རིང་རྒྱ་ནག་རྒྱལ་ཁབ་སྤྱི་དང་ཁྱད་པར་དུ་ང་རང་གི་ཕ་ས་ཕ་ཡུལ་བོད་གངས་ཅན་པའི་ཡུལ་དུ་ཡང་འགྱུར་ལྡོག་མང་པོ་ཞིག་བྱུང་ཟིན། དེ་ནི་འབྲོག་མོ་ཚོས་རང་རང་གི་རྐང་སྣམ་གྱི་ཁ་ལ་ཟྭ་བརྒྱབ་པ་དེ་མིན་ལ། དེ་ནི་ཕོ་གསར་ཚོས་རང་གི་འདོད་སྤྱོད་བརྙན་དུ་བླངས་ནས་དྲ་ལམ་དུ་བཞག་པ་དེ་བས་ཀྱང་མིན། དེ་ནི་རང་རེ་སྙན་ངག་པའི་སྡེ་ཡི་ཁྲོད་དུ་དཀའ་སྡུག་ལ་མགོ་མི་སྒུར་བའི་འཆི་ཕོད་རུ་ཁག་ཅིག་བྱུང་དང་འབྱུང་བཞིན་དེ་ཡིན། རུ་ཁག་དེའི་མགོ་ཁུངས་སམ་དར་འཕྱར་མཁན་དོན་གྲུབ་རྒྱལ་དང་ལྗང་བུ་སོགས་ལ་གཏུགས་དགོས་ཤིང་། རུ་ཁག་དེའི་རྔ་རྡུང་བ་སེང་རྡོར་དང་གཟི་མིག་གསུམ་པ་སོགས་ཀྱང་གླེང་དགོས་ལ། རུ་ཁག་དེའི་གདོང་མཆོང་བ་གྲོགས་ཁྱུང་སྔོན་སོགས་ངུར་སྨྲིག་སྐེད་པར་དཀྲིས་ནས་སྙན་ངག་གི་གཟུངས་སྔགས་གྱེར་མཁན་འདི་ཚོ་རེད།
གྲོགས་ཁྱུང་སྔོན་གྱིས་ཉེ་སྔོན་ཚངས་སྲས་བུམ་པ་རྟགས་མའི་སྙན་ངག་འགྲན་སྡུར་ཞིག་སྤེལ་ཞིང་། འགྲན་སྡུར་དེའི་ཁྲོད་དུ་མདོ་དབུས་ཁམས་གསུམ་གྱི་སྙན་ངག་པ་ལྔ་བརྒྱ་དང་དྲུག་ཅུ་ཡས་མས་ཀྱིས་སྙན་ངག་བསྐུར་ཡོད་ཅིང་། ཁོང་གིས་སྙན་ངག་དེ་དག་ལས་སྙན་ངག་བརྒྱད་ཅུ་བདམས་རྗེས་ཆེད་ཞུས་དཔྱད་འདེམས་པ་མི་བདུན་གདན་དྲངས་པ་ཚོས་མཇུག་མཐའི་སྙན་ངག་པ་བཅོ་ལྔའི་སྙན་ངག་ལ་བྱ་དགའ་བསྩལ་ཡོད།
སྙན་ངག་པ་ལྔ་བརྒྱ་དང་དྲུག་ཅུ་ཞེས་པའི་ཐ་སྙད་འདིས་ཅུང་མིན་ན་ངའི་མགོ་བོ་གཏོར་བཞག མི་ལྔ་བརྒྱ་དང་དྲུག་ཅུ་ནི་བོད་ལ་མཚོན་ན་དགོན་ཆེན་ཞིག་གི་གྲྭ་ཚང་མིན་ནམ། མི་ལྔ་བརྒྱ་དང་དྲུག་ཅུ་དུས་གཅིག་ཏུ་ཁྱེད་ཚང་ལ་ཐོན་ན་ཁྱོས་ཁོང་ཚོར་ཇ་འདྲེན་ཆང་བསུ་ཇི་ལྟར་བྱེད།
ཐེངས་འདིའི་སྙན་ངག་འགྲན་སྡུར་ཁྲོད་བོད་ཁམས་ན་གྲགས་ཆེ་བའི་སློབ་གསོ་བ་ཆེན་མོ་རྒན་ལྡོང་ཡོན་ཏན་དང་སྙན་ངག་པ་གཅན་རང་སད། བླ་ནག་པ་སྐལ་ལྡན་རྒྱ་མཚོ་དང་ཀ་རྒྱའི་འཕྲིན་ལས་རྒྱ་མཚོ་ལྡོང་སྲས་སོགས་ཀྱི་བརྗོད་བྱ་ཟབ་ཅིང་བརླིང་ལ་རྗོད་བྱེད་སྙན་ཞིང་འཇེབས་པའི་སྙན་ངག་དག་གིས་རྩོམ་པ་པོ་སོ་སོའི་རྣམ་དཔྱོད་ཀྱི་རང་མདངས་དང་མཛེས་དཔྱོད་ཀྱི་ཤེས་རབ་འབུར་དུ་ཐོན་པར་བྱས་འདུག
སྤྱིར་ན་ང་རང་ནུབ་གླིང་ཨ་མེ་རི་ཀར་བོད་ཀྱི་ཆོས་དང་རིག་གཞུང་ཁྱབ་སྤེལ་དང་རང་གི་ཉིན་རེའི་སྒོམ་སྒྲུབ་སོགས་ཀྱིས་བྲེལ་བ་ཅུང་ཆེ་མོད། མ་མཐོང་རྒྱང་གི་གྲོགས་པོ་ཁ་གྱའི་ཁྱུང་སྔོན་མཆོག་ནས་འདི་ལྟ་བུའི་ངལ་བ་ཁྱད་བསད་ཀྱིས་བོད་གངས་ཅན་པའི་སྙན་ངག་རིག་པ་དར་སྤེལ་གྱི་ཕྱག་ལས་གསེར་གྱི་གླེགས་བམ་དུ་དགོད་འོས་པ་ཞིག་བསྒྲུབས་པར་ཤ་མེད་ཀྱང་རུས་པའི་གསེང་ནས་རྗེས་སུ་ཡི་རང་དང་དགའ་བསུའི་ཐལ་མོ་ཞིག་ཅིས་ཀྱང་བརྡེབ་པར་འདོད།
ང་རང་ཉིད་ཀྱི་འདས་པའི་མི་ཚེའི་ལོ་ཟླ་རིང་མོའི་ནང་དུ་ཡང་སྙན་ངག་རིག་པའི་ཕྱོགས་སུ་རང་གི་དུས་སྐར་བཏང་བ་ཅུང་མང་ཙམ་འདུག་ཅིང་། ངའི་མི་རབས་དེའི་སྐབས་སུ་བོད་ཀྱི་སྙན་ངག་རིག་པ་འདི་གོག་ནུར་གྱི་སྐབས་ཤིག་ཡིན་མོད། ཁ་གྱའི་ཁྱུང་སྔོན་སོགས་ཀྱི་དུས་རབས་འདི་ནི་བོད་ཀྱི་སྙན་ངག་རིག་པ་མཆོང་རྒྱུག་བྱེད་བཞིན་པའི་སྐལ་བཟང་ཞིག་རེད། དེ་བས་གྲོགས་ལགས་ཀྱིས་ཐེངས་འདིར་སྤེལ་བའི་ཚངས་སྲས་བུམ་པ་རྟགས་མའི་སྙན་ངག་འགྲན་སྡུར་སྤེལ་བ་ལ་ཡང་གཡུར་དུ་ཟ་བའི་གྲུབ་འབྲས་སྨིན་པ་རེད།
མི་མང་པོ་ཞིག་གིས་ལོ་ན་རྒས་རིམ་བཞིན་སྙན་ངག་རིག་པར་བཅངས་པའི་བརྩེ་དུང་གི་མདུད་པ་ཡང་ཞིག་འགྲོ་བར་གླེང་མོད། ང་ལ་མཚོན་ན་དེ་ལས་ལྡོག་སྟེ་ལོ་ཟླའི་གཉེར་མ་ཇེ་མང་དུ་ཕྱིན་པ་དང་བསྟུན་ནས་སྙན་ངག་རིག་པའི་དུང་བ་ཡང་ཇེ་ཟབ་ཏུ་འགྲོ་བཞིན་འདུག དེ་བས་ཁ་གྱའི་ཁྱུང་སྔོན་ལྟ་བུའི་བོད་ནང་དུ་བཞུགས་པའི་སྙན་ངག་པ་དག་ལ་སེམས་ཀྱི་འཐམ་འཁྱུད་དུས་ཀུན་ཏུ་བྱེད་བཞིན་ཡོད་པ་མ་ཟད། ཁོང་ཚོས་བྲིས་པའི་སྙན་ངག་དང་ཁོ་ཚོས་སྤེལ་བའི་སྙན་ངག་གི་བྱ་འགུལ་དག་ལ་ཡང་རྣམ་ཀུན་རྣ་ཅོར་ཅོར་གྱིས་ཉན་བཞིན་པ་དང་མིག་བགྲད་བགྲད་ཀྱིས་ལྟ་བཞིན་ཡོད།
ཐེངས་འདིའི་ཁ་གྱའི་ཁྱུང་སྔོན་གྱི་སྙན་ངག་འགྲན་བསྡུར་ལ་བར་ཆད་ཅི་ཡང་མ་བྱུང་བར་ལེགས་འགྲུབ་བྱུང་བ་འདི་ནི་རང་རེའི་སྔོན་བྱོན་སྙན་ངག་པ་གོང་མ་དག་གི་བྱིན་རླབས་དང་། ད་བཞུགས་བོད་ཀྱི་སྙན་ངག་པ་ཚོའི་སེམས་ཤུགས་ཀྱི་མེ་ལྕེ་དྲག་ཏུ་འབར་བ་ལས་བྱུང་བ་ཞིག་རེད། དེ་བས་ང་ཚོས་སྙན་ངག་གི་འདས་པའི་ཉམས་མྱོང་དང་སྙན་ངག་གི་ད་ལྟ་བའི་གསོན་ཤུགས་གཉིས་མཉམ་བསྲེས་ཀྱི་སྙན་ངག་གི་མ་འོངས་པའི་ཁྱིམ་གཞིས་ཤིག་འགྲུབ་པར་བྱེད་དགོས།
སྙན་པོ་ཐམས་ཅད་སྙན་ངག་མིན།
བརྡ་སྤྲོད་ཚིག་རྒྱན་འཛོམས་ན་སྙན་ངག་རེད།
ཞིམ་པོ་ཐམས་ཅད་ཁ་ཟས་མིན།
ཟས་བཅུད་འཛོམས་ན་ཁ་ཟས་རེད།