༼བརྩེ་དུང་སྐོར་གྱིས་སྒྲུང་རྩོམ་ཞིག༽
ཀློག་པ་པོ་རྣམས་ལ་ཞུ་རྒྱུ། སྒྲུང་རྩོམ་འདི་ནི་མཐོ་སློབ་སློབ་མ་ཞིག་གིས་སྦྱོང་བརྡར་གྱི་ཚུལ་ཏུ་འབྲིས་པ་ན། ཚིག་དོན་སོགས་གང་ཅིའི་ཐད་ལ་སྐྱོན་ཆ་མང་པོ་ཡོད་ངེས་ཡིན་པར་དགོངས་འགལ་མེད་པར་ཞུ།
བུ་མོ་སྒྲོལ་མ་དང་ངེད་གཉིས་ཀྱི་འབྲེལ་བ་ནི། ཁ་པར་བརྒྱུད་དེ་བྱུང་པ་དང་། དེ་ཡང་ཉིན་ཞིག གཟའ་འཁོར་གཅིག་རིང་སློབ་གྲྭ་ཆེན་མོའི་ངལ་དུབ་ཀྱི་འཚོ་བས་མནར་བས། ང་རང་ནམ་ཀུན་ལྟར་གྲོགས་པོ་བསམ་གྲུབ་སར་སོང་ནས་ཅུང་གུ་ཡངས་ཀྱི་འཚོ་བ་ཞིག་འཐོབ་ན་བསམ། ང་རང་གླ་འཁོར་ཞིག་ཏུ་བསྡད་ནས་གྲོང་ཁྱེར་གྱི་ཟང་ཟིང་དང་རྙོག་ཙི་ཆེ་བའི་འགྲུལ་ལམ་བརྒྱུད་དེ་བྱ་ཕུར་པར་ལྟར་བསམ་གྲུབ་ཀྱི་སྡོད་གནས་སུ་སོང་ལ། ཁོ་བོས་ཀྱང་ང་ཡོང་པར་ཤེས་ནས་མངར་ཇ་བསྐོས་ཏེ་སྒུག་ནས་བསྡད་འདུག ངེད་གཉིས་ཀྱིས་ཕན་ཚུན་སློབ་གྲྭའི་ནང་ཇི་ལྟར་དཀའ་ལས་ལྡན་ཚུལ་དང་གནམ་གཤིས་ཀྱིས་རྐྱེན་པས་ཉོབ་སྣང་ཇི་ལྟར་སྐྱེས་ཚུལ་སོགས་ཆོ་མེད་སྐད་ཆ་མང་པོ་བཤད་ནས་བསྡད་པ་ཡིན། དེ་ནས་རིམ་བཞིན་ནམ་ཀུན་ལྟར་བརྗོད་གཞི་བུ་མོའི་ཐོག་ཏུ་ལྷུང་པ་དང་། བསམ་གྲུབ་ཀྱིས་ཁོ་བོ་ལ་དེང་སང་གྲོགས་པོ་བླི་ཉི་བརྒྱུད་དེ་མཐོ་སློབ་བུ་མོ་ཞིག་གི་ཁ་པར་ཨང་གྲངས་ཤིག་ལག་ཏུ་སོན་ནའང་། ཁོ་བོའི་དགའ་རོགས་དམིགས་བསལ་ཆེ་བས་བུ་མོ་དེ་ལ་ཁ་པར་གཏོང་ཐབས་མེད་པར་བཤད་སོང་ལ། ང་རང་གློག་བུར་ཏུ་སྤྱང་ཀིས་ཤ་རེག་པར་ལྟར་དགའ་སྣང་གིས་དེ་ལྟར་ཡིན་ན་ཁ་པར་ཨང་གྲངས་དེ་ང་ལ་སྤྲོད་དང་། ངས་འབྲེལ་བ་བྱེད་རྒྱུ་ཡིན་ཞེས་བཤད་པས། ཁོ་བོས་ཀྱང་ཕངས་སེམས་མེད་པར་ང་ལ་ཁ་པར་ཨང་གྲངས་དེ་སྤྲད་སོང་།
ཉིན་ཤས་རྗེས། ངས་བུ་མོ་དེར་ཁ་པར་ཞིག་གཏང་ན་ཁོ་མོས་ཇི་ལྟར་ལན་སྤྲད་པ་དང་། ཅིག་བྱེད་ན་རྒྱུས་མེད་ཀྱི་ཁ་པར་ཡོང་ན་ཁོ་མོས་ཨེ་ལེན་ན་། ལེན་ཡང་ཁ་ལན་ཡག་པོ་ཨེ་སྤྲད་ན་སོགས་ཐེ་ཚོམ་དང་དོགས་པ་མང་པོ་རྒྱ་མཚོའི་རྦ་རླབས་དུས་གཅིག་ལ་འཕྱོ་པར་ལྟར་སེམས་ཚོར་འདྲ་མིན་བྱུང་བས། ཡུན་ཙམ་རིང་ཁ་པར་ལག་པས་འཇུས་ནས་དེ་ལྟར་འཇམ་ཅག་གེར་ལུས། ཕོ་སེམས་མོ་ལ་ཤོར་པ་དང་མོ་སེམས་ཕོ་ལ་ཤོར་པ་ནི་མིའི་རིགས་ཀྱི་རང་བཞིན་ཡིན་པས། ངས་མོ་རང་ལ་ཁ་པར་ཞིག་གཏང་ན། ཅིག་བྱེད་ན་ཁོ་མོས་ཡ་ལེན་ཡག་པོ་ཞིག་སྤྲད་སྲིད་པའི་ཚོད་དཔག་བྱས་ནས་མོ་རང་ལ་ཁ་པར་ཞིག་བཏང་པ་དང་། དེ་ནི་ངས་བསམ་ཚོད་དང་ཡོངས་སུ་བརྒལ་ཏེ། ཁོ་མོར་བློར་འབབ་པའི་ཁ་ཚིག་སྙན་མོ་ཞིག་ཡོད་ལ་ངག་འཇམ་པའི་ཁ་བརྡ་སྐྱིད་པོ་ཞིག་ཡོད་པས་ངའི་སེམས་སྟེང་གི་ཁོ་མོའི་སྣང་བརྙན་དེ་བོད་ཀྱི་ཁྱད་ཆོས་ལྡན་པའི་བུ་མོ་གཞོན་ནུ་མ་ལང་ཚོ་དར་ལ་བབས་པ། དཀར་ཤ་དམར་མདངས་ལྡན་ལ། གྲལ་དག་པའི་སོ་ཕྲེང་དཀར་པོར་དྲི་ཞིམ་འཐུལ་བཞིན་ནམ་ཡང་འཛུམ་ཆུང་ཁོལ་ལེར་འདུག་པ་ཞིག་ཡིན་པའི་ཚོར་སྣང་འཁྲུལ་མེད་བྱུང་། ཁོ་མོས་ཀྱང་ངས་གྲས་སྒྲིག་མེད་པའི་སྐད་ཆ་སོགས་ལ་རྣ་བར་འགྲོ་པ་གང་ཤེས། གང་ལྟར་ཁ་པར་འཇོག་མཚམས་སུ་རྗེས་སུ་འབྲེལ་བ་བྱེད་ཆོག་ཅེས་བཤད་བྱུང་། དེ་ནས་ང་རང་རྨ་བྱས་འབྲུག་སྐད་ཐོས་པ་ལྟར་དགའ་སྣང་གིས་ཁོ་མོ་ལ་རྗེས་སུ་ཅིས་ཀྱང་འབྲེལ་བ་བྱེད་རྒྱུ་ཡིན་ཞེས་བཤད་དེ་ཁ་པར་འཇོག
དེའི་རྗེས་ངས་དུས་ཁོམ་ཡོད་པ་དང་ཁོ་མོ་ལ་ཁ་པར་གཏོང་པ་དང་། ངེད་གཉིས་ཕན་ཚུན་སོ་སོའི་འདས་དོན་དང་མ་འོངས་པའི་ཕུགས་བསམ་སོགས་བཤད་རེས་བྱེད་ཀྱིས་ཡོད་། ཁོ་མོས་རང་ཉིད་ནི་རྗེས་སུ་ཚན་རིག་པ་ཞིག་བྱ་འདོད་ཡོད་པ་དང་། ད་བར་ཕུགས་བསམ་དེའི་ཆེད་དཀའ་ལས་གྲངས་མེད་རྒྱག་གིས་ཡོད་ལུགས་སོགས་བཤད་བྱུང་། ཁོ་མོར་མཛེས་སྡུག་གི་ཕུགས་བསམ་ཡོད་ལ། ཤེས་ཡོན་དང་བློ་སྟོབས་ཀྱང་འདུག ཁོ་མོས་ལྷོད་བབས་ཀྱི་ཚིག་སྙན་དེ་དག་ཐོས་པ་ན་ང་རང་སེམས་སུ་བརྗོད་མི་ཤེས་པའི་བདེ་བ་རེ་བྱིན་གྱིས་ཡོད་ལ་ན། ངས་ཁོ་མོར་ཁ་པར་གཏང་པ་ནི་རྒྱུན་ལྡན་གྱི་གོམས་སྲོལ་ལྟ་བུར་འགྱུར་སོང། ཁོ་མོ་ནི་བོད་ནས་ཡོང་པ་དང་། རྒྱ་གར་ཏུ་སྤུན་མཆེད་གཅིག་ལས་མེད། སྤུན་མཆེད་དེའང་རང་ཉིད་ཀྱི་ཕ་མའི་བཀའ་ལྟར་རྒྱ་གར་ལྷོ་ཕྱོགས་གདན་ས་སེར་རྭ་གླིང་དུ་རབ་ཏུ་བྱུང་བའི་དགེ་བཤེས་ཤིག་ཡིན། ཁོ་མོས་ཁ་བརྡ་བྱས་པར་ལྟས་ན་ཁོ་མོ་ནི་རང་ཉིད་ཀྱི་སྤུན་མཆེད་ལ་གུས་བརྕི་ཆེ་ཞིང་བརྕེ་བ་ལྡན་པ་ཞིག་ཡིན་ལ། ཁོ་མོས་ཉིན་རེའི་འགྲོ་གྲོན་དང་སློབ་ཡོན་སོགས་ཀྱང་སྤུན་མཆེད་དེས་རོགས་པོ་བྱེད་ཀྱི་ཡོད་ཚོད་འདུག ཁ་པར་བརྒྱུད་གླེང་མོས་ཁ་ཤས་བྱས་པ་ནས་ངེད་གཉིས་ཕན་ཚུན་གཉིས་བོད་ནས་ཡོང་པ་ཤེས་ལ། དེར་བརྟེན་ནས་ངེད་གཉིས་ཀྱི་ཁ་པར་བརྒྱུད་ནས་ཁ་བརྡ་བྱེད་གྲངས་ཀྱང་ཇེ་མང་ནས་ཇེ་མང་དུ་བུད་སོང་། སྐབས་ཞིག་ལ་ཕར་ཚུར་གཉིས་ཀའི་སུ་ཡིན་རུང་ཁ་པར་ཐོག་ནས་དུས་བཅད་དེ་ཕན་ཚུན་ལ་སྒུག་རེ་བྱེད་པ་དང་རང་རང་སེམས་ཀྱི་ཉིན་རེའི་ཚོར་བ་དང་མཐོ་སློབ་འཛིན་གྲྭ་རུ་དགོད་བྲོ་བའི་གནས་ཚུལ་སོགས་བཤད་རས་བྱེད་ཀྱིས་ཡོད་ལ། རང་རང་སེམས་ཀྱི་སྡུག་བསྔལ་དང་དགའ་སྤྲོ་སོགས་བརྗོད་སའི་བློས་ཐུབ་ཀྱི་གྲོགས་པོ་ལྟ་བུར་འགྱུར་སོང་། དེ་ནས་ཉིན་རེར་ཁོ་མོ་ལ་ཁ་པར་ཞིག་མ་གཏོང་པ་དང་ཁོ་མོས་ཚུར་ཁ་པར་རེ་མ་སླེབས་ན་སེམས་ནང་ཉིན་དེར་བྱ་བ་གང་ཞིག་ཆད་ལུས་ཤོར་བ་ལྟར་སྣང་ལ། སེམས་ནང་བདེ་ལྷོད་ཞིག་རྩ་བ་ནས་མི་ཡོང་། ངས་ཀྱང་འཛིན་གྲྭ་ནང་ལའང་ཁ་པར་ཁུ་སིམ་སྒྲ་མེད་ཐོག་འཇོག་ནས་ཁ་པར་འཛིན་གྲྭར་ཁུར་ནས་འགྲོ་འགོ་བརྕམས། གང་ཡིན་ཞེ་ན་ངས་ཁོ་མོའི་ཁ་པར་ཐེངས་གཅིག་ཀྱང་མ་ལེན་པར་འཇོག་འདོད་མི་འདུག
ངལ་དུབ་དང་ཤིན་ཏུ་ཚ་བའི་ཉི་ཐིགས་རེ་རེས་འཇིག་རྟེན་སའི་གོ་ལ་འདི་ཡང་ཚ་དམྱལ་ཏུ་བསྒྱུར་བའི་ཉིན་ཞིག་ང་རང་འཛིན་གྲྭ་ཚོགས་པའི་སྐབས་ཁ་པར་ཞིག་འབྱོར་པར་ཐོས་སོང་། ངས་དགེ་རྒན་གྱིས་དོ་སྣང་མེད་སར་མགོ་བོ་སྒུར་ནས་བལྟས་པ་ན། ཁོ་མོ་ཡིན་པར་ཤེས། ང་རང་འཛིན་གྲྭའི་ནང་ཡོད་ཕྱིར་ཁ་པར་ལེན་རྒྱུ་མ་བྱུང་། དེ་ནས་ང་རང་འཛིན་གྲྭ་ཚར་ཏེ་བར་སེང་གི་སྐབས་ཁོ་མོ་ལ་ཁ་པར་ཐེངས་ཁ་ཤས་བཏང་ནའང། ཁོ་མོས་ཁ་པར་མ་ལེན། སྐབས་དེར་ང་རང་གྲོ་མ་མེ་སླང་སྟེང་གནས་པར་ལྟར་བྲེལ་འཚུགས་སུ་འགྱུར་ལ། ད་ཐེངས་ཁོ་མོས་ཁ་པར་མ་ལེན་བར་གཏང་རྒྱུ་ཡིན་པའི་དམ་བཅའ་བཞགས་སྟེ་མུ་མཐུད་ཁ་པར་བཏང་། དུས་ཡུན་རིང་ཙམ་རྗས། ཁོ་མོས་ཁ་པར་ལེན་ཏེ་ང་ལ་དགོངས་པ་མ་ཚོམ་རོགས། ཁོ་མོས་དེ་དུས་འཛིན་གྲྭ་ཚོགས་ཀྱིས་ཡོད་པས་ཁ་པར་ལེན་པར་བདེ་བོ་མ་བྱུང་ཞེས་ལབ་བྱུང་ལ། ང་རང་ཡང་ནད་པ་དྲགས་སྐྱེད་ཡོང་བྱུང་པར་ལྟར་དགའ་སྣང་གིས་གལ་བྱེད་མ་རེད་ཅེས་བཤད་དེ་ཁོ་མོ་ལ་ཁ་པར་བཏང་པར་གནས་ཚུལ་འདྲ་ཡོད་དམ་ཞེས་སྐད་ཆ་དྲིས་པ་ཡིན། ཁོ་མོས་ང་ལ་དོན་དག་གལ་མེད་ལ། ཁྱེད་རང་གི་སྐད་གདངས་དེ་གོ་འདོད་བྱུང་བས་ཁྱེད་ལ་ཁ་པར་བཏང་པ་ཡིན་ཞེས་ལན་འདེབས་བྱས། སྐབས་དེར་ང་རང་ལ་བཤད་མི་ཤེས་པའི་ཚོར་བ་ཞིག་བསྐྱེད་དེ་ལུས་ཀྱི་བ་སྤུ་སོགས་ཀྱང་གྱེན་ལ་འཕྱོ་པར་ལྟར་འགྱུར་ལ། ངས་ཀྱང་དེ་མ་ཐག། ངས་ཀྱང་དུས་རྟག་ཏུ་ཁྱེད་ཀྱི་སྐད་གདངས་དེ་གོ་ན་འདོད་ཅེས་བཤད་པར། ཁོ་མོ་ཕལ་ཆེར་ངོ་ཚ་པར་འདྲ། སྐད་གདངས་ཧོབ་དེ་འཇམ་ཅག་གེར་ཕྱིན་ནས་དངོས་གནས་དེ་ལྟར་རེད་དམ་ཞེས་སྐད་ཆ་དྲིས། ངས་ཁོ་མོ་ལ་ང་རང་༧གོང་ས་མཆོག་ལ་གནའ་སྐྱལ་ཆོག དངོས་གནས་དེ་ལྟར་ཡིན་ཞེས་བཤད་པར་ཁོ་མོས་ལམ་སང་དེ་ལྟར་གནའ་སྐྱལ་མི་དགོས་ང་ཁྱེད་ལ་ཡིད་ཆེས་ཡོད་ཅེས་བཤད་བྱུང་། དེ་ནས་ངེད་གཉིས་ཕན་ཚུན་འཛིན་གྲྭ་ནང་གནས་ཚུལ་ཅི་བྱུང་དང་ཚ་བའི་ནང་ཉོབ་སྣང་ཇི་ལྟར་སྐྱེས་ཚུལ་སོགས་སྐད་ཆ་མང་པོ་བཤད་རྗེས་སླར་ཡང་འཛིན་གྲྭ་ཚོགས་པའི་ཅུང་བརྡ་བསྒྲགས་སོང་པས། ངེད་གཉིས་ཀྱི་སྐད་ཆ་མཚམས་མ་འཇོག་ཐབས་མེད་བྱུང་། དུས་དེ་ནས་ངེད་གཉིས་བར་མངོན་འགྱུར་མེད་པའི་ཚོར་བ་དམིགས་བསལ་ཞིག་སླེབས་ཟིན་པར་ཚོར་ལ། དུས་དེ་ནས་ངས་གཉིས་ཀྱི་ཕོ་མོའི་བརྩ་དུང་གི་མངར་སྐྱུར་སོགས་བཤད་པའང་འགོ་བཙུགས།
འདི་ལྟར་ངེད་གཉིས་ཕན་ཚུན་ཁ་བརྡ་བྱས་ཏེ་གོ་མེད་ཚོར་མེད་ཀྱི་ལོ་གཅིག་ཙམ་འགོར་སོང་མོད། ངེད་གཉིས་ཕན་ཚུན་ཐུག་འཕྲད་ཙམ་ཡང་བྱས་མྱོང་མེད། བསིལ་རློང་དལ་བུར་ཐོར་ཞིང་ཚ་བས་མནར་བཅོས་རྒྱུན་ལྡན་ཏུ་གནས་པའི་རྒྱ་གར་ལུང་པ་འདི་ལ་ཅུང་བསིལ་འཇམ་གྱི་བདེ་སྐྱིད་ཞིག་གཞི་ནས་ཐོབ་སོང་སྙམ་པའི་ཉིན་མོ་ཞིག ང་རང་ནང་ལ་བསྡད་དེ་ཅི་ཞིག་ལ་བསམ་བློ་བཏང་པ་དང་། གློག་བུར་ཏུ་ངས་མོ་རང་ལ་ཁ་པར་གཏོང་འདོད་ཀྱི་བློ་སྐྱེས། དེ་ནས་ངས་ཁོ་མོ་ལ་ཁ་པར་གཏང་གྲབས་བྱས་པར། གློག་བུར་ཏུ་ཁ་པར་སླེབས་པའི་རོལ་དབྱངས་ཐོས་སོང་བས། ངས་སུ་ཞིག་གི་ངེད་གཉིས་ཀྱི་ཁ་བརྡ་ལ་བར་ཆད་བཟོས་སོང་བསམ་ཏེ། ཁ་པར་གཏོང་མཁན་སུ་ཡིན་ཡང་མ་བལྟས་པར། ཧ་ལོ་་་་སུ་ཡིན་་་་་ཞེས་དྲིས་པར། ལང་སང་རྣ་བར་རྒྱུན་ཏུ་ཆ་རྒྱུས་ལྡན་པའི་སྐད་སྒྲ་ཞིག་ཐོས་སོང་བས་ད་གཟོད་ཁོ་མོ་ཡིན་པར་ཤེས། དེ་ནས་ངས་རང་ཉིད་དང་ཁོ་མོ་དངོས་གནས་ལས་འབྲེལ་ཡོད་པར་ཚོར་ལ། ལུས་སེམས་ཀྱི་ཉོབ་སྣང་དེ་ཡང་དྲག་འཚུགས་ཀྱི་རླུང་བུས་འདེད་པ་ལྟར་མེད་པར་འགྱུར། ལུས་སེམས་ཡོངས་རྫོགས་བསིལ་སང་སང་དུ་འགྱུར། ཁོ་མོས་ང་ལ་ཅི་ཞིག་བྱས་ནས་བསྡད་ཡོད་ཅེས་དྲིས་པར། ངས་ཁོ་མོ་ལ་ཁྱེད་དྲན་ནས་བསྡད་ཡོད་ཅེ་ཀུ་རེ་ཚུལ་ཏུ་དེ་ལྟར་བཤད། ཁོ་མོ་བགད་མོ་ཞིག་ཤོར་ནས་་་སྐྱག་རྫུན་མ་བཤད། ཁྱེད་ང་དྲན་པའི་དུས་ཤིག་ཨེ་ཡོད་ན་ཞེས་བཤད་དེ་སླར་ཡང་བགད་མོ་ཤོར་ནས་བསྡད། ཡུན་ཙམ་རྗེས་ལ། ཁོ་མོས་ང་ལ་ཁྱེད་ཀྱིས་ད་ཐེངས་བཀའ་བློན་ཁྲི་པ་སུ་འདམ་འདོད་ཡོད་པ་དྲིས་ལ། ངས་ཁོ་མོ་ལ་ཁྱེད་ཀྱིས་སུ་འདམ་ན་འོས་ཤོས་མཐོང་ཞེས་ཕར་དྲིས་པར། ཁོ་མོས་དབུགས་རིང་ཞིག་འཐེན་ནས། བག་ཕེབས་ཀྱིས་དེ་ནི་མཁས་དབང་བློ་བཟང་སེང་གེ་ཡིན་ཡིན་པ་རེད་ཅེས་བཤད་སོང་། ངས་ཁོ་མོ་ལ་རྒྱུ་མཚན་ཅི་ཡིན་དྲིས་པར། ཁོ་མོས་སླར་ཡང་དབུགས་རིང་ཞིག་འཐེན་ནས། མཁས་དབང་བློ་བཟང་སེང་གེ་ནི་དེང་རབས་ཀྱི་ཤེས་ཡོན་ལྡན་པ་དང་འཛམ་གླིང་གི་ཆབ་སྲིད་ཁ་ཕྱོགས་ཤེས་མཁན་ཞིག་ཡིན་པ་མ་ཟད། ལོ་ན་ཆུང་ཞིང་༧སྐུ་འདུན་གྱིས་དགོངས་གཞི་བསྒྲུབ་མཁན་ཞིག་ཡིན་ལ། ༧སྐུ་འདུན་གྱིས་ནམ་ཀུན་ན་གཞོན་ཕོ་མོ་ཚོས་བོད་ཀྱི་བདེན་དོན་འདི་གསོན་པོར་གནས་པར་ལེགས་སྐྱེས་འཕུལ་དགོས་པ་སོགས་བཀའ་སློབ་དང་ཡོངས་སུ་མཐུན་པ་ཞིག་རེད། དེ་མ་ཚད་གལ་སྲིད་ཁོང་ཉིད་བཀའ་བློན་ཁྲི་པར་འགྱུར་ན་བོད་ཀྱི་ན་གཞོན་ཕོ་མོ་ཚོའི་ཕུགས་བསམ་ཇེ་ཆེ་དང་རང་ཉིད་ཀྱིས་མ་འོངས་བོད་མི་རིགས་ལ་ཞབས་ཞུ་ཞུ་འདོད་ཀྱི་ཆོད་སེམས་ཀྱང་ཇེ་ཆེར་འགྲོ་རྒྱུ་ཡིན་པས་ཁོང་ནི་ང་ཚོ་ན་གཞོན་ཚོར་གསོན་ཤུགས་དང་ཕུགས་བསམ་བསྐྲུན་ནུས་ཡོད་པའི་སྐྱེ་བོ་དམ་པ་ཞིག་ཡིན་པ་སོགས་བཤད་རྗེས། ང་ལ་ཁྱེད་ཀྱིས་བལྟས་ན་སུ་རན་ཤོས་རེད་ཅེས་དྲིས་སོང་ལ། སྤྱི་བཏང་ངའི་བསམ་ཚུལ་ནི་ཁོ་མོའི་བསམ་ཚུལ་དང་ཡོངས་སུ་མཐུན་ནའང་། ཉམས་ཚོད་ལེན་པའི་ཚུལ་ཏུ་ངས་བལྟས་ན་བཀྲེས་མཐོང་བསྟན་འཛིན་རྣམ་རྒྱལ་ལགས་རན་ཤོས་སུ་མཐོང་ཞེས་སྨྲས་པར། ཁོ་མོས་དལ་ལྷོད་ཀྱིས་རྒྱུ་མཚན་ཅི་ཡིན་ཞེས་དྲིས་བྱུང་། དེ་ནས་ངས་ཁོ་མོ་ལ་ བཀྲེས་མཐོང་བསྟན་འཛིན་རྣམ་རྒྱལ་ལགས་ནི་ཉམས་མྱོང་ལྡན་ཞིང་ཤེས་ཡོན་ཆེ་པ་མ་ཚད་ཁོང་ནི་བོད་དང་རྒྱལ་སྤྱིའི་ཆབ་སྲིད་དང་དཔོན་རིགས་ལ་རྒྱུས་མངའ་ཆེས་ཆེ་ལྡན་པ་ཞིག་ཡིན་ལུགས་སོགས་བཤད་པར། ཁོ་མོས་ལང་སང་ང་ལ། ངས་ཁྱེད་ཀྱི་བཤད་པ་བདེན་པ་མ་རེད་ལབ་གྱིས་མིན། ཡིན་ནའང་མི་རབས་རྙིང་པ་ཚོས་རང་ཉིད་ཀྱི་མི་ཚེ་ཧྲིལ་བུ་བོད་ཀྱི་རྕ་དོན་ལ་ལེགས་སྐྱེས་སུ་ཕུལ་ཟིན་པ་དང་། ཁོང་རྣམ་ཚོས་རང་ཉིད་ཀྱི་འཇོན་ཐང་ཡོད་ཚད་བཏོན་ཚར་པ་རེད། ད་ཕན་ཆད་ཀྱང་འཇོན་ཐང་དམིགས་བསལ་ཞིག་བཏོན་ཐུབ་པ་ཁག་པོ་རེད་ལ། སེམས་ཀྱིས་བསམ་ནའང་ལུས་ཀྱིས་འཇོན་ས་སླེབས་མེད། དཔེར་ན་ང་ཚོས་ཇ་བསྐོས་པ་དང་གཅིག་མཚུངས་རེད། ཇ་དང་པོ་ཆུའི་ནང་ཕན་དུས་ཇ་ཁུར་སྒར་པོ་ཐོན་པ་དང་དེ་ནས་རིམ་གྱིས་ཇ་ཁུར་བརླར་རུ་འགྲོ་པ་དང་གཅིག་མཚུངས་རེད་ཅེས་དཔེར་དོན་དང་བཅས་པ་དེ་ལྟར་བཤད་སོང་པས། ང་རང་ཡང་ཁོ་མོས་བཤད་པར་རྒྱུ་མཚན་མཐོང་ལ། ཁོ་མོ་ནི་དངོས་གནས་མནོ་བསམ་གཏོང་ཐུབ་པ་མ་ཟད། ཆབ་སྲིད་ཀྱི་སྐོར་ལའང་མཐོང་རྒྱ་དང་ཐོས་རྒྱ་ཆེ་ཞིང་རིགས་བཟང་བུ་མོའི་བྱེད་ཚུལ་ལྡན་པ་ཞིག་རེད་འདུག་བསམ་པའི་དགའ་སྣང་སྐྱེས་ལ། ཁོ་མོར་བཅངས་པའི་མངོན་མེད་ཀྱི་དུང་བ་དེ་ཡང་ཡར་ངོ་ཟླ་ལྟར་ཇེ་ཆེར་སོང་།
བཅོ་ལྔའི་ཟླ་བའི་དྭངས་གཙང་གི་འོད་ཐིགས་ས་གཞིར་འཕོས་ཏེ། ས་ཕྱོགས་ཡོངས་སུ་དཀར་ལྷམ་མེར་བསྒྱུར་བའི་དགོང་མོ་ཞིག ང་རང་ནམ་ཀུན་ལྟར་ཁང་པའི་ཡང་ཐོག་ཏུ་སོང་ནས་མཛེས་སྡུག་གི་ཟླ་བ་དང་བསིལ་འཇམ་གྱི་གནམ་ངོགས་དེར་ལོངས་སུ་སྤྱད་པ་ནི་བདེ་སྐྱིད་ཀྱི་ལོངས་སྤྱོད་མཆོག་ཏུ་འགྱུར་པ་ཞིག་ཏུ་རེད་བསམ་ཏེ་ཁུར་སིམ་མེར་རང་ཉིད་གཅིག་པོ་དུས་གསུམ་གྱི་བྱ་བ་རྣམས་ལ་བསམ་གཞིགས་བྱས་ནས་ཟླ་འོད་འོག་ཏུ་ལོངས་སྤྱོད་ཀྱི་བརྟོལ་བཞུགས་ཀྱིས་བསྡད། ངས་རང་ཉིད་དང་ཁ་ཐག་ཤིན་ཏུ་རིང་བའི་ཟླ་བར་མིག་ཞགས་འཕངས་ནས་རང་ཉིད་སྔོན་ཆད་ཕ་མ་དང་སྤུན་མཆེད་མཉམ་དུ་གངས་ལྗོངས་ཀྱི་མཛེས་སྡུག་དང་སྤྲོ་སྐྱིད་ཀྱི་འཚོ་བ་རོལ་བའི་འདས་དོན་དང་ད་ལྟའི་སོ་སོ་ཁྱི་དོམ་གཞན་ཡུལ་ཏུ་ཉུལ་པར་ལྟར་རྒྱུས་མེད་ཀྱི་གཞན་ཡུལ་ཏུ་ཁེར་རྐྱང་དང་ཕ་མའི་དྲོད་འཇམ་གྱི་བརྕེ་དུང་དབེན་བའི་གནས་བབས་སོགས་ལ་བསམ་བློ་བཏང་པ་དང་། སྐྲ་ལོ་དངུལ་མདོག་ཏུ་གྱུར་ཞིང་གདོང་རས་གཉེར་མས་ཁེངས་པའི་ཕ་མ་གཉིས་དྲན་ཞིང་ཁོང་གཉིས་ལ་ད་བར་རང་ཉིད་ཀྱི་བཀའ་དྲན་གང་ཡང་འཇལ་རྒྱུ་རག་མེད་པ་སོགས་བསམ་བློ་འཁོར་ཏེ་རེ་ཞིང་མིག་མཐར་མཆི་མས་བརླན་ལ། སེམས་ངོགས་སུ་རང་ཉིད་ལ་འཁང་ར་དང་འཁོན་འཛིན་གྱི་འུ་ངག་ཤོར། རང་ཉིད་ཀྱི་སེམས་པ་ཡོངས་སུ་དྲན་གདུང་དང་གནོངས་འགྱོད་ཀྱི་མནར་བའི་དུས་དེར། ཁ་པར་འབྱོར་བའི་རོལ་དབྱངས་ཞིག་གི་ལྷན་འཇགས་ཀྱི་མཚན་ལྗོངས་ཡོངས་སུ་དཀྲོག་པ་ལྟར་འགྱུར། ངས་རབ་རིབ་ཀྱི་མིག་ངོགས་ན་ཁོ་མོའི་མིང་ཞིག་ཤར་སོང་བས། དེ་ནི་དངོས་གནས་ཁོ་མོའི་ཁ་པར་རེད་འདུག ངས་རང་ཉིད་ཀྱི་སྡུག་སྐད་རྒྱག་སའི་གནས་ཤིག་རྙེད་སོང་བསམ་ནས་ཁོ་མོ་ལ་རང་ཉིད་ཀྱི་སེམས་ཚོར་སྐྱུར་མོ་དེ་དག་བཤད་པས། ཁོ་མོས་ང་ལ་ཁྱེད་སྐྱེ་ཕོ་རབས་ཤིག་གིས་དེ་ལྟར་དྲན་ནས་གནོངས་འགྱོད་དང་རང་ཉིད་ལ་འཁང་ར་དང་འཁོན་འཛིན་ཅི་ཞིག་བྱེད་དགོས། ང་ཚོ་ནི་མི་ཡུལ་ལ་རང་ཉིད་ཀྱི་འཚོ་སྡོད་གཅིག་པོ་མིན་པ་བོད་མི་ས་ཡ་དྲུག་གི་བདེན་དོན་ཆེད་དུ་གནས་ཡོད། གལ་སྲིད་ང་ཚོ་རང་ཉིད་ཀྱི་གསོན་ཤུགས་ལྡན་པའི་ལངས་མཚོ་དེ་ཉིད་རང་ཉིད་ཀྱི་མི་རིགས་དང་མི་དམངས་ཆེད་དུ་བློས་གཏོང་དང་ལེགས་སྐྱེས་སུ་འཕུལ་པ་དང་། ༧གོང་ས་མཆོག་གི་དགོངས་པ་ལྟར་ཚེ་སྲོག་གི་རིན་ཐང་ཡོད་ཚད་ཞི་བདེ་དང་མཐུན་སྒྲིལ་གྱི་ཕུགས་བསམ་ཆེད་དུ་ཕུལ་ཐུབ་ན་ཁྱེད་ཀྱི་ཕ་མ་གཉིས་ཀྱང་སྤོབས་པ་ལྡན་པ་འགྱུར་ལ། བོད་ཁ་བ་གངས་ཅན་གྱི་མ་འོངས་ལོ་རྒྱུས་ཀྱི་དེབ་ཐེག་ཏུ་ཁྱེད་ཀྱི་བྱ་བཞགས་དང་མཚན་སྙན་དེ་དག་བཀོད་ཐུབ་ཀྱིས་ཡོད་པ་སོགས་ང་ལ་སེམས་གསོའི་སྐད་ཆ་མང་པོ་བཤད་སོང་ལ། སྤྱི་བཏང་ནས་ཁོ་མོའིི་སྐད་ཆ་དེ་དག་ནི་ང་ལ་སེམས་གསོ་གཏང་ཆེད་དུ་ཡིན་མོད། འོན་ཀྱང་ངས་ཁོ་མོའི་རླབས་ཆེན་གྱི་སྐད་ཆ་དང་བུ་མེད་ཅིག་ལ་ཡོད་པའི་སེམས་རྒྱ་དེ་དག་སེམས་ཚེ་ང་རང་དངོས་གནས་རྨོངས་གཉིད་ལས་བསད་པ་ལྟར་རང་ཉིད་ཀྱི་མ་འོངས་མི་ཚེ་ལ་འོད་སྟོང་འབར་བའི་གསོན་ཤུགས་ཤིག་ངང་གིས་སྐྱེས་སོང་། ཁ་བརྡ་དེས་ངས་ཁོ་མོ་ལ་ཞེན་གདུང་གི་ཚོར་བ་དེ་ཡང་རྒྱ་མཚོ་ལས་གཏིང་ཟབ་ཞིང་ནམ་མཁའ་ལས་རྒྱ་ཆེ་བར་འགྱུར་བའི་ཚོར་བ་ཤིག་འཕྱུར། དེ་ནས་ངས་གོ་སྐབས་དེ་དང་བསྟུན་ནས་ཁོ་མོ་ལ་ང་ཁྱེད་ལ་དགའ་ཞེས་ལབ་འདོད་བྱུང་ལ། རང་ཉིད་ཀྱི་མི་ཚེའི་ནང་ཁོ་མོ་ལྟ་བུའི་བུ་མོ་ཞིག་བྱུང་ན་ཅི་མ་རུང་བསམ། ངས་དབུགས་རིང་ཞིག་འཐེན་ཏེ་ཁོ་མོ་ལ་་་་ང་ཁྱེད་ལ་དགའ་་་་་ཞེས་བཤད་པ་ཡིན། ཁོ་མོས་གོ་ནའང་མི་གོའི་མདོག་གིས་ང་ལ། ག་རེ།་་་་་ སྐད་ཆེ་ཙམ་རྒྱོབ་་དང་།་་་་ ངས་གོ་མི་འདུག་ཅེས་བཤད་བྱུང་། དེ་ནས་ངས་མི་གཉིས་བཙུམ་ཏེ་སྐད་སངས་ཐོན་པོས་་་་ང་ཁྱེད་ལ་དགའ་་་་ཞེས་བཤད་པར། ཁོ་མོས་བགད་མོ་ཤོར་ཏེ་ཨ་ལེན་ཙམ་ཡང་མ་སྤྲད། ངས་བསམ་པར་ཁོ་མོ་ང་ལ་དགའ་ཡི་མེད་པ་འདྲ་བསམ་ཏེ་ཡུན་ཙམ་རིང་ཅི་བཤད་འདི་བཤད་མེད་པར་ལུས། ཡུན་ཙམ་རྗས་ལ། ངས་ཁོ་མོ་ལ་དགོངས་དག་ཁྱེད་ང་ལ་དགའ་མདོག་ཁག་པོ་མ་རེད། དོ་དགོང་ངས་ཁྱེད་ལ་བཤད་པའི་སྐད་ཆ་འདི་དག་སེམས་ལ་མ་བཞགས་རོགས་གནང་ཞེས་བཤད་པར། ཁོ་མོ་སླར་ཡང་བགད་མོ་ཤོར་ནས། ལྐུགས་པ།་་་་ ང་ཁྱེད་ལ་དགའ་ཡི་མི་འདུག་ལབ་སོང་ངམ་ཞེས་དྲིས་སོང་། ངས་ཁོ་མོ་ལ་འོ་ན་ཁྱེད་ཀྱིས་ཨ་ལེན་མི་སྤྲད་པ་གང་ཡིན་ནམ་ཞེས་དྲིས་པར། ཁོ་མོས་སྐད་ངག་ཆུང་ཆུང་ངང་མཚམས་རེར་ཨ་ལེན་མ་སྤྲད་པར་ཁུར་སིམ་མེར་བསྡད་པ་དེའང་ཨ་ལེན་རེད། ད་དུང་དེའང་ཁྱེད་ལ་དགོས་པའི་ཨ་ལེན་དེ་རེད་ཅེས་བཤད་ནས་ཅི་ཡང་མ་སྨྲ། གློག་བུར་ཏུ་ངའི་ལུས་སེམས་ཡོངས་སུ་གློག་འཕྱུག་པ་ལྟར་བརྗོད་མི་ཤེས་པའི་དགའ་ཚོར་ཞིག་སྐྱེས་ལ། དེ་ནི་ཕོ་མོ་བརྕེ་དུང་གི་ཚོར་བ་ངོ་མ་དེ་ཡིན་པར་འདྲ། དུས་དེ་ནས་ངེད་གཉིས་ཕན་ཚུན་མཐོང་མྱོང་མེད་པའི་དགའ་རོགས་སུ་འགྱུར།
ཉིན་ཞིག་ཁོ་མོ་དང་ངེད་གཉིས་ཁ་བརྡ་བཤད་ཅིང་བཤད་ཅིང་ངས་ཁོ་མོ་མཐོང་འདོད་ཡོད་ལུགས་བཤད། ཁོ་མོས་བཤད་རྒྱུར། འུ་གཉིས་ཁ་པར་གྱི་བློས་ཐུབ་གྲོགས་པོ་ནས་ཁ་མཐུན་དགའ་རོགས་གྱུར་བའི་གོ་རིམ་ཧྲུལ་བོ་ལས་ཕན་ཚུན་སུས་ཀྱང་སུ་མཐོང་མྱོང་མེད་པས། ཁྱེད་ཀྱི་ང་དངོས་སུ་མཐོང་ན་ང་ཕལ་ཆེར་གཡུག་མདོག་ཁ་པོ་རེད། ང་ནི་དེང་རབས་ཀྱི་མོ་གསར་ལྟར་མཛེས་ཉམས་མེད་ལ་སྐྱེ་གཟུགས་ཀྱང་མེད། ཁྱོད་ཀྱིས་སོམས་དང་གལ་ཏེ་འུ་གཉིས་ངོ་འཕྲད་རྗེས་ངའི་སྣང་བརྙན་གྱིས་ཁྱོད་ལ་འཇིགས་སྐུལ་ནས་འུ་གཉིས་ཀྱི་འབྲེལ་བ་འདི་ཆད་སོང་ན་ཅི་བྱེད། ང་སྐྲག་ཀི དེ་ལས་འུ་གཉིས་ད་དུང་ངོ་མ་འཕྲད་ན་བཟང་འདོད་ཅེས་བཤད་པར། ངས་ཁོ་མོ་ལ། སྒྲོལ་མ། ཁྱེད་ཀྱིས་ཉོས་ཨ། ང་ཁྱེད་ལ་སེམས་ཆགས་ཏེ་བརྕེ་དུང་གི་ཀླུང་རིང་ནང་ལྷུང་པ་ནི་ཁྱེད་ཀྱི་མཛེས་ཉམས་མིན་ལ་ཁྱེད་ཀྱི་སྐྱེས་གཟུགས་ནི་དེ་བས་ཀྱང་མིན། ང་ཁྱེད་ལ་དགའ་པ་ནི་ཁྱེད་ཀྱི་གཤིས་སྤྱོད་དང་བློ་སྟོབས། ད་དུང་བོད་ཀྱི་བུ་མོ་ལ་ཡོད་དགོས་པའི་ཡ་རབས་དང་བཟང་སྤྱོད་དེ་དག་ཡིན། ངས་གཉིས་འདི་ལྟར་བགྲང་བྱ་གཅིག་ལྷག་སོང་ཟིན་ལ། ད་ཆ་ངེད་གཉིས་ནི་ཕན་ཚུན་མཐོང་མྱོང་མེད་ཙམ་རེད་མ་གཏོགས། ངེད་གཉིས་ཀྱི་སེམས་པ་ནི་ཆུ་དང་འོ་མ་འདྲེས་པ་ལྟར་ཡིན་པས་ཁྱེད་ཀྱིས་ད་དུང་ང་མཐོང་འདོད་མེད་པ་དེ་ཅི་ཡིན་ཞེས་བཤད་པར། དེ་ནས་ཁོ་མོས་ང་ལ་ད་ཐེངས་གོང་སེང་ག་ལ་འགྲོ་རྒྱུ་ཡིན་པ་དྲིས་པས། ངས་རང་ཉིད་ད་ཐེངས་གོང་སེང་ཟླ་བ་གཅིག་རིང་སེར་ར་ལ་འགྲོ་རྒྱུ་ཡིན་ཞེས་བཤད་པ་ཡིན། གཟའ་འཁོར་རྗེས་མ་སློབ་གྲྭ་གོང་སེང་ཡིན་པས། ང་སེར་ར་ལ་འགྲོ་རྒྱུ་ཡིན། ཁོ་མོས་ང་ལ་འོ་ན་ཁྱེད་ཀྱིས་བཤད་པ་ལྟར་བྱེད། ད་ཐེངས་གོང་སེང་ལ་ངའང་སེར་ར་ལ་འགྲོ་རྒྱུ་ཡིན། དེ་དུས་འུ་གཉིས་མཉམ་དུ་འགྲོ་ཞེས་བཤད། སྐད་ཆ་དེ་གོ་པ་དང་ངས་དེ་ནི་རྨི་ལམ་ཡིན་ནམ་དངོས་གནས་ཡིན་པར་མི་ཤེས་ལ། རང་ཉིད་ལ་ཤ་བཙིས་ཡང་ཡང་བརྒྱབ་པར་གཞི་ནས་དེ་ནི་རྨི་ལམ་མིན་པ་ཤེས། གཟའ་འཁོར་ཉིན་བདུན་གྱི་དུས་ཡུན་ནི་ལོ་བདུན་ལས་རིང་པ་ཚོར་བྱུང་། ངས་ཉིན་མཚན་མེད་པར་ཁོ་མོའི་སྐྱེས་གཟུགས་ཇི་ལྟར་ཡིན་པ་དང་ཁོ་མོ་བྱ་སྤྱོད་ཇི་ལྟར་ཡིན་ནམ་བསམ་ཏེ་གཟའ་འཁོར་གཅིག་དེ་ལྟར་རྫོགས་སོང་།
ངས་སྔ་ས་ནས་མཁོ་ཆས་སོགས་དུལ་སོག་བརྒྱབ་ནས་ཁོ་མོའི་ཁ་པར་ལ་སྒུག་ནས་བསྡད། སྔ་དྲོ་གང་བོ་ངས་ཁོ་མོས་ཁ་པར་སྒུག་ནས་བསྡད་མོད། ཁོ་མོའི་ཁ་པའི་སྒྲ་ཙམ་ཡང་ཐོས་རྒྱུ་མ་བྱུང་། ངས་ཁོ་མོས་གྲོས་མཐུན་གྱི་མཆར་གཞིར་འགྱུར་བ་བཏང་པ་མིན་ནམ་སྙམ་ནས། ཁོ་མོ་ལ་ཁ་པར་བཏང་པས། ཁོ་མོས་བྲལ་འཚུབ་ཀྱིས་ང་ལ་ང་ཚོའི་སྡོད་ཁང་རྒན་ལགས་ད་དུང་ཡང་སླེབས་མ་སོང་། ཁོང་གི་ཆོག་མཆེན་མེད་པར་འགྲོ་ན་མི་འགྲིག་སོགས་བཤད། ངས་རྒན་ལགས་པྭ་མགོ་དེ་ཞེས་དགེ་རྒན་དེ་ལ་འཁང་ར་དང་སྡིག་དམོད་བྱས་པ་ལས་ཅི་ཡང་བྱེད་ཐབས་མ་རྙེད། དགོང་དྲོ་ཆུ་ཚོད་ལྔ་པ་ཙམ་ལ་ཁོ་མོའི་ཁ་པར་འབྱོར་པར། ང་ལ་མགྲོན་འཁོར་བབ་ཚུགས་སུ་ཤོར་དང་ཁོ་མོ་དེ་གར་ང་སྒུག་ནས་བསྡད་ཅེས་བཤད་སོང་། སྐད་ཆ་དེ་གོ་མ་ཐག་ངས་གླག་འཁོར་ཞིག་གླག་ནས་མགྲོན་འཁོར་བབ་ཚུགས་སུ་རྒྱུགས་སོང་། ང་རང་མགྲོན་འཁོར་བབ་ཚུགས་སུ་འབྱོར་པ་དང་གཡས་གཡོན་གྱི་བོད་པ་འདྲ་བ་བུ་མོ་ཚང་མ་ལ་དམིགས་བཞགས་དབང་མེད་དུ་འཕངས་ཤོར། ང་རང་རྐུབ་སྟེག་ཞིག་ཏུ་བསྡད་ནས་ཁོ་མོའི་ཁ་པར་ལ་རེ་སྒུག་བྱས་ནས་བསྡད། དུས་ཡུན་ཅང་མ་མགོར་པར་ཁོ་མོའི་ཁ་པར་ཞིག་འབྱོར་པར། ཁྱེད་ག་ལ་ཡོད། ང་མགྲོན་འཁོར་བབ་ཚུགས་སུ་སླེབས་ཚར། སྐད་ཆ་དེ་གོ་མ་ཐག་ངས་གཡས་གཡོན་ལ་ཕ་ལྟ་ཚུར་ལྟ་བྱས་པ་དང་། ང་དང་ཅུང་ཐག་རིང་ས་ནས་བུ་མོ་ཞིག་གིས་ང་ལ་བརྒྱབ་འཁོར་ནས་ཁ་པར་གཏོང་པ་མཐོང་ལ། བུ་མོ་དེའི་རྒྱབ་གཟུགས་ལས་མཐོང་མི་ཐུབ་རུང་གནག་ཅིང་རིང་ཐུང་རན་པའི་སྐྲ་ལོ་ལྡན་པ་དང་། དབྱར་གོས་ལྗང་ཁུར་ཕུ་ཐུང་མེད་པ་ཞིག་གྱིན་པ་ལས་གཞོན་ཤ་དར་བའི་གཟུགས་བཟང་མ་ཞིག་ཡིན་པ་མངོན་འདུག དེ་ནི་དངོས་གནས་མཛེས་མ་ནང་གི་མཛེས་མ་ཞིག་ཏུ་རྕི་མཆོག་པས་ངས་དེ་ནི་ཁོ་མ་ཡིན་རྒྱུ་མ་རེད་སྙམ་ཏེ། མུ་མཐུད་འདོད་ཆགས་ཀྱིས་ཁེངས་བའི་མིག་བཞགས་གང་སར་འཕངས། ངས་ཁ་པར་ནང་ཁོ་མོ་ལ་ང་ནི་མགྲོན་པ་ཚོ་སྡོད་སའི་རྐུབ་སྟེར་ཞིག་ཏུ་བསྡད་ཡོད་ཅེས་ལབ་པ་ཡིན། ཅུང་མ་མགོར་པར། ངའི་མདུན་དུ་བུ་མོ་ཞིག་སླེབས་སོང་ལ། དེ་ནི་ད་གི་བུ་མོ་དེ་རེད་འདུག ངས་རང་ཉིད་ཀྱི་མིག་འཕྲུལ་མིན་འགྲོ་བསམ་ནས་སླར་ཡང་ཁ་པར་ཐོག་སྐད་ཆ་བཤད་པས། ཁོ་མོ་བགད་མོ་ཤོར་ནས་ང་མདུན་ལ་ཡོད་ནའང་ཁ་པར་ག་རེ་གཏང་རྒྱུ་འདུག་ཅེས་ལབ་སོང་། ཡུན་ཙམ་རིང་ངས་ཁོ་མོར་བལྟས་ཏེ་ཅི་ཡང་བཤད་རྒྱུ་མ་རྙེད། ཁོ་མོས་ང་ལ། ལྐུགས་པ། ཐོམས་རྒྱུ་ག་རེ་འདུག ད་འགྲོ་ན་མ་གཏོགས་རྗེས་ལུས་ཐེགས་སོང་ཞེས་ལབ་པ། ད་གཟོད་ང་རང་བླ་འགུག་པ་ལྟར་འགྱུར་ནས་ཁོ་མོ་ལ། འོ་འོ་་་་་འགྲོ་་་་ད་འགྲོ་ཞེས་ལབ་ནས་ངེད་གཉིས་མགྲོན་འཁོར་ཞིག་ཏུ་བསྡད་ནས་བྷེ་ཀོའི་ཕྱོགས་སུ་སོང་།
མགྲོན་འཁོར་དེའི་ནང་བོད་པ་ངེད་གཉིས་མ་གཏོགས་མེད་པ་དང་། དགོངས་དྲོ་ཆུ་ཚོད་དྲུག་པ་ཙམ་རན་ནའང་ཚ་བ་རང་སྐྱར་དེ་ལྟར་ཆེ་མོད། ང་རང་ཁོ་མོ་དང་མཉམ་དུ་ཡོད་པར་ཉོབ་སྣང་དེ་ཙམ་མི་སྐྱེས། ངས་ཁོ་མོ་ལ་ཅི་ཞིག་བཤད་དགོས་མིན་མ་ཤེས་པ་ཡུན་ཙམ་ལུས། ཁོ་མོས་ང་ལ་བལྟས་ཏེ་ཁྱེད་ཀྱིས་སྒུག་ཁག་ཨེ་སོང་ཞེས་དྲིས་སོང་། ངས་ཁོ་མོའི་གནག་ཅིང་ཆེ་བའི་མིག་ཟུང་ལ་བལྟས་ནས། སྒུག་ཁག་མ་སོང་ཞེས་ལན་འདེབས་བྱས། ཁོ་མོའི་དཀར་ཞིང་འཇམ་བའི་གདོང་པར་མཛུམ་མདངས་ཤིག་མངོན་ནས་ཁྱེད་ཀྱིས་ང་ཅི་འདྲ་ཞིག་ཡོད་རྒྱུ་རེད་དྲན་སོང་ཞེས་དྲིས་པས། ངས་མགོ་བོར་ཕུར་ཕུར་གཏོང་ཙང་བྱས་ནས་ངས་དངོས་གནས་ཁྱེད་རང་འདི་ལྟར་མཛེས་མ་ཞིག་ཡིན་པ་བསམ་ཡུལ་ལས་མེད་ཅེས་བཤད་པར། ཁོ་མོས་ང་ལ་བལྟས་ཙམ་བྱེད་ནས། འགྱོད་པ་སྐྱེས་ས་རེད་དམ་ཞེས་དྲིས་པར། ངས་ཁོ་མོ་ལ་་་་ག་བ་་་་ག་བ་་་་་ཞེས་བཤད་ཞོར་ཁྱེད་རང་ང་འདྲ་བོ་སྐྱེ་གཟུགས་མེད་པའི་ཕོ་གསར་ཞིག་དང་འཕྲད་པར་འགྱོད་པ་མི་སྐྱེས་སམ་ཞེས་སྐད་ཆ་ཡོངས་རྫོགས་བཤད་མ་ཚར་པར་ཁོ་མོས་དྲོད་འཇམ་གྱི་ལག་པས་ངའི་ཁ་ལྐབ་ཏེ་དེ་ལྟར་བཤད་མི་ཆོག ང་རང་ཁྱེད་འདྲ་བོ་ཞིག་དང་འཕྲད་པར་བློ་ཡིད་ཡོངས་སུ་ཚིམས་སོང་ཞེས་ལབ་ནས་ངའི་བྲང་ངོགས་སུ་སྦྱར་ནས་གཉེར། ང་རང་ཅུང་དོག་མི་བདེ་པར། གཡས་གཡོན་ལ་བལྟས་ཙམ་བྱས་པར། མགྲོན་མི་གཞན་པ་ཚོ་ནི་སྔ་ས་ནས་གཉིད་ཀྱི་ཞིང་ཁམས་སུ་སོང་ཟིན། ཁོ་མོའི་མགོ་བོ་ངའི་བྲང་ཁོག་ཏུ་སྦྱར་བའི་ཚོར་བ་ནི། དངོས་གནས་བརྗོད་མི་ཤིས་པ་ཞིག་འདུག་ལ། ངའི་ཡ་ཆུང་སྙིང་གའི་འཕག་ལྡིང་དེའང་ཇེ་མགྱོགས་ཇེ་མགྱོགས་སུ་སོང་། ངས་ཁོ་མོའི་གདོང་རས་ལ་ཕྱིས་ཕྱིས་ཙམ་བྱས། ཁོ་མོའི་དཀར་འཇམ་གྱི་གདོང་ཤ་དེས་ངའི་ཤ་སྲིངས་ལ་ཁབ་རྩུགས་པའི་ཚོར་རེ་བྱིན་པ་མ་ཚད། ངའི་འདོད་ཆགས་ཀྱི་ཉོན་མོངས་དེའང་ཇེ་འཕེལ་ཏུ་འགྲོ་བཞིན་ཡོད་པར་ཚོར། རྨི་ལམ་ལྟར་ཅི་བསམ་འདི་དྲན་མེད་པའི་དུས་ཡུན་ཐུང་ངུ་ཞིག་ནང་། མའེ་སོའི་མགྲོན་འཁོར་བབ་ཚུགས་སུ་འབྱོར་པ་དང་། དེ་ནས་ངེད་གཉིས་ཀྱི་མགྲོན་འཁོར་བརྗེ་སྟེ་བྷེ་ཀོར་འགྲོ་དགོས་ནའང་། སྐབས་དེར། མའེ་སོ་གྲོང་ཁྱེར་ཡོད་ཚད་མཚན་མོའི་གཡོལ་བས་གྲིབ་ནས་གྲོང་ཁྱེར་གྱི་ཁྲ་ལྷམ་མེར་གློག་ཞུག་དུ་མའི་དཀྱིས་སུ་མཚན་ལྗོངས་ཀྱི་མཛེས་སྡུག་མངོན་བཞིན་འདུག ཁོ་མོ་དལ་གྱིས་མགོ་བོ་ཡར་གྱེན་ཙམ་བྱས་ནས། དོན་གྲུབ། དོ་དགོང་འུ་གཉིས་བྷེ་ཀོར་འགྲོ་ན་ཕལ་ཆེར་ཕྱི་དྲགས་ཚོད་འདུག དེང་སང་གོ་ཐོས་ལ་བྷེ་ཀོའི་གླ་འཁོར་བ་དང་བོད་མི་བར་དེ་ཙམ་མཛའ་མཐུན་མེད་པར་འདྲ། ངས་བསམ་པར་དོ་དགོང་འུ་གཉིས་མའེ་སོར་བསྡད་ནས་སང་ཞོགས་སྔ་མོ་ལམ་ལ་མཆས་ན་བཟང་ཞེས་བཤད་པར། ང་རང་སེམས་སུ་འདི་ནི་ངའི་བློ་ངོར་ཤར་བའི་བསམ་ཚུལ་དང་ཡོངས་སུ་མཐུན་བྱུང་བསམ་པས། ཁོ་མོ་ལ་ཁྱེད་ཀྱིས་ཅི་བཤད་ན་དེ་ཡིན་ཞེས་ལམ་སང་ཁས་ལེན།
མགྲོན་འཁོར་བབ་ཚུགས་ཀྱི་གཡས་འགྲམ་ནས་འཐེན་བའི་གཞུང་ལམ་གཡས་གཡོན་ན་ཐོག་བརྩེགས་ཅན་གྱི་ཁང་པ་དུ་མ་ཀྲོང་ངེར་འགྲེང་། དགོང་མོ་ཕྱི་པོ་གང་ཙང་འགྱུར་ཟིན་ནའང་། ཡུལ་མི་མང་པོ་རང་ཉིད་ཀྱི་བདེ་བའི་ཆེད་དུ་གྲོ་མ་བཞིན་ཆད་རྒྱུ་མེད་པར་ཡར་མར་འགྲོ་ཡི་འདུག ངེད་གཉིས་ཀྱིས་རྐང་ལམ་ཞིག་སྙེགས་ཏེ་མགྲོན་ཁང་ཞིག་བཙལ་ཏུ་སོང་པ་དང་། ལམ་འགྲམ་དུ་རྒྱ་གར་ཡུལ་མི་ཁ་ཤས་ཀྱི་རྒྱ་གར་སྐད་དུ་མགྲོན་ཁང་དགོས་སམ། མགྲོན་ཁང་དགོས་ན། ག་གེ་མོའི་མགྲོན་ཁང་ནི་ཡག་པོ་ཡིན་རབ་བཤད་དེ་ངེད་གཉིས་འགུག་ཐབས་བྱས། ངེད་གཉིས་ཀྱི་ཁོང་ཚོར་ཁ་ཡག་མ་བྱས་པར་མདུན་ཕྱོགས་ཀྱི་རྐང་ལམ་སྙེགས་ཏེ་སོང་པ་ན། Lorisཞེས་པའི་མགྲོན་ཁང་ཞིག་རྙེད་པས། དེ་གར་ཐོ་བཙུགས་མི་འགོད་བྱས་ནས་མགྲོན་ཁང་ཉལ་ཁྲི་གཅིག་ཡོད་པ་ཞིག་གླས་པ་ཡིན། དེ་ནས་ངེད་གཉིས་ཁང་བརྕེགས་གསུམ་པའི་ཁང་མིག་ཅིག་ཏུ་འཛུལ་པ་དང་། དེ་ནི་ཆེ་ཆུང་རན་ཞིང་གཙང་མདོག་ཁ་བའི་ཁང་མིག་ཅིག་རེད་ལ། དམར་གསེར་གྱི་ཚོན་རྕི་བཞུས་པའི་མདུན་གྱང་དུ་དེང་རབས་དཔེ་གསར་གྱི་གཟུགས་མཐོང་བརྙེན་འཕྲིན་ལེབ་ལེབ་ཞིག་དཔྱངས་འདུག དེ་ནས་ངས་ཁོ་མོ་དུས་ཡུན་ཆུ་ཚོད་གསུམ་ཙམ་རིང་ངལ་དུབ་ཀྱིས་མནར་བས་གཟུགས་པོ་ཞིག་བཀྲུས་དང་ལུས་སེམས་ལ་ངལ་གསོ་ཞིག་ཐེབས་རྒྱུ་རེད་ཅེས་བཤད་པར། ཁོ་མོས་སྐད་ཆ་དེ་ཉིད་བདེན་པར་མཐོང་ནས། ཁྲུས་ཁང་དུ་འཛུལ། དུས་ཡུན་ཅང་མ་འགོར་པར། ཁོ་མོས་ཕྲ་ཞིང་སྲབ་བའི་གུ་ཐུང་ནག་པོ་ཞིག་གི་ཐོག་ཚོན་མདོག་དཀར་པོ་ཡིན་པའི་སྟོད་གོས་ཕུ་མེད་ཞིག་གོན་ཏེ་ཕྱིར་ཐོན། གནག་ཅིང་བརླན་བའི་སྐྲ་ལོ་རྒྱ་ལྕང་ལོ་མ་བཞིན་ཐུར་ཏུ་དཔྱངས་པ་དང་། གདོང་རས་སུ་འཛུམ་མདངས་བཞད་ཅིང་། རི་དྭགས་ཤྭ་བའི་མིང་བཞིན་ཁྲ་ལྷམ་མེར་ལྡན་པའི་འདྲེནབྱེད་གཉིས་ཀྱང་སྔ་ལས་ཇེ་ཆེར་སོང་བའི་སྣང་བ་བསྟེར། ཁོ་མོའི་བྲང་ཁོག་ཏུ་ཙོག་པུར་འགྲེང་བའི་ལང་ཚོའི་མྱོས་བུ་དང་ཆེ་ཞིང་སྒོར་བའི་ཨོམ་རིལ། དཀར་ཞིང་འཇམ་བའི་དྲོད་ཤ རྨ་བྱ་བཞིན་འཇོ་སྒེས་ཀྱི་ཉམས་དང་ལྡན་པའི་ཁོ་མོའི་གོམས་སྟོབས་རེ་རེས་བདག་གི་འདོད་ཆགས་ཀྱི་བཟི་བའི་ཕོ་མཚན་དེའང་ཀ་བ་བཞིན་ཇེ་མཁྲེགས་ཇེ་མཁྲེགས་སུ་སོང་། ཁོ་མོ་ངའི་ཉེ་འཕྲས་སུ་ཡོད་པའི་འདུག་སྟེག་སྟེང་སྡོད་དེ་ང་ལ། དོན་གྲུབ་་་ད་ཁྱེད་རང་གིས་ཀྱང་གཟུགས་པོ་ཞིག་བཀྲུས་དང་སྐྱིད་པོ་འདུག་ཅེས་བཤད་པར། ངས་རང་ཉིད་ཡར་ལངས་ཚེ་གྱེན་ཏུ་འགྲེང་བའི་ཕོ་མཚན་དེས་ཞབས་འདྲེན་ཞུ་རྒྱུར་དོགས་ནས། མིན་་་ད་ལྟ་མིན་་་ཏོག་ཙམ་སྒུག་ནས་ཉལ་ཁར་བཀྲུ་ན་བཟང་ཞེས་བཤད་དེ་ཁོ་མོའི་ཕྱོགས་སུ་བགད་མོ་ཞིག་འཆོར། ངེད་གཉིས་ཀྱིས་གཟུགས་མཐོང་གློག་བརྙེན་ལྟས་སྟེ་བསྡད་པ་ན། ངས་ཁོ་མོའི་ལག་པར་འཇུས་ནས་རང་ཉིད་ཀྱི་ཕྱོགས་སུ་འཐེན་ཙམ་བྱས་པ་ན། ཁོ་མོས་ཀྱང་ངའི་སེམས་པར་རྟོགས་པ་ལྟར་བདག་གི་འགྲམ་དུ་ཙོར་པུར་བསྡད། ངས་ཁོ་མོའི་གདོང་ལ་ལྟ་བཞིན་་་སྒྲོལ་མ་་་་ཁྱེད་ང་ལ་དངོས་གནས་དགའ་འམ་ཞེས་སྐད་ཆ་དྲིས་པར། ཁོ་མོའི་མགོ་བོ་ངའི་བྲང་ཁོག་ཏུ་སྦྱར་ཏེ། ང་ཁྱེད་ལ་མ་དགའ་ན། ཉི་ཞག་འདི་དག་གི་རིང་ངས་ཁྱེད་དང་འབྲེལ་བ་བྱས་ན་ཅི་བྱེད་ལ། ངས་ཁྱེད་དང་མཉམ་དུ་འདི་ལྟར་ཉལ་ཁང་གཅིག་ཏུ་ཞག་འདུག་བྱེད་ཀྱི་རེད་པས། ལྐུགས་པ་་་ཁྱེད་དངོས་གནས་ལྐུགས་པའི་ནང་གི་ལྐུགས་རྒན་ཞིག་མིན་ན་ཅི་ཞེས་བཤད་པར། ཚིག་འདི་དག་ནི་ང་རང་ལ་ཆེས་མཆོག་ཏུ་འགྱུར་བའི་སེམས་གསོ་ཞིག་ཏུ་སེམས། ངས་ལག་པས་ཁོ་མོའི་མགོ་བོ་ཡར་དལ་གྱིས་གཏད་པ་དང་ཁོ་མོའི་དམར་ཞིང་ཐུག་བའི་མཆུ་སྒྲོས་སུ་འོ་ཞིག་བསྐྱལ་པ་ན། ཁོ་མོས་ཅི་ཡང་མི་སྨྲ་པར་རི་དྭགས་ཤྭ་བའི་མིག་བཞིན་མཛེས་བའི་འདྲེན་བྱེད་གཉིས་དལ་གྱིས་བཙུམ་པ་དང་དབུགས་ཀྱི་འགྱུ་ཁུག་ཀྱང་ཅུང་དལ་ཏུ་སོང་། ངས་ཁོ་མོའི་ལྕེ་དང་མཆུ་སྒྲོས་དམ་པོ་འབྱིགས་ཐེངས་རེར་ཁོ་མོའི་ལག་པས་ངའི་རྐད་པར་འཐམས་པའི་ཤུགས་ཀྱང་ཇེ་ཆེ་འགྲོ། འདོད་ཆགས་ནི་སུས་ཀྱང་འགོག་ཐབས་མེད་པས་ན། ངས་ཁོ་མོའི་སྟོད་གོས་ཀྱི་འདབ་ནས་དལ་གྱིས་ལག་པ་བསྲིངས་ཏེ་ཁོ་མོའི་ཙོག་ཏུ་ལངས་བའི་ལང་ཚོའི་མྱོས་བུ་གཉིས་ལ་ཕུར་ཕུར་བཏང་པ་དང་། ཁོ་མོའི་དབུགས་རིང་ཞིག་འཐེན་ནས་ང་ལ། ཐུགས་རྗེ་གཟིགས་་་་འདི་ལྟར་མ་བྱེད་དྭ་་་་་་དོན་གྲུབ་་་་་་ འདི་ལྟར་མ་བྱེད་དྭ ་་་་་་ཐུགས་རྗེ་གཟིགས་་་་་ འདི་ལྟར་མ་བྱེད་དྭ་ཞེས་འདི་ལྟར་བཤད་ནའང་ཁོ་མོས་ངའི་སྐྲ་དང་གདོང་ལ་ཤུགས་ཀྱིས་ཕུར་ཞིང་ཁོ་མོའི་དབུགས་ཀྱི་མཐེན་ཚད་ཀྱང་ཇེ་གཟབ་ཏུ་སོང་། ངས་ཁོ་མོ་དལ་གྱིས་རང་ཉིད་ཀྱི་འོག་ཏུ་གནན་པའི་ཞོར་ཏུ་གུ་ཐུང་ཕོད་པ་དང་། ཀ་བཞིན་ལངས་བའི་ཕོ་མཚན་དེས་ཁོ་མོའི་རླ་ཤའི་དཀྱིས་སུ་རེག་ཙམ་བྱས་པ་ན། ཁོ་མོས་རྐང་པ་གཉིས་ཕན་ཚུན་ཤུགས་ཀྱིས་བརྡར་རས་བྱས་པ་དང་ལང་ཚོའི་མྱོས་བུ་དེ་གཉིས་ཀྱང་ཇེ་མཁྲེགས་སུ་སོང་། ངས་ཁོ་མོའི་རྐང་པ་གཉིས་ཕྱེ་ཙམ་བྱས་ནས་མཁྲེགས་ཞིང་སྲ་བའི་ཕོ་མཚན་དེས་ཤུགས་ཀྱིས་བཙུགས་པ་དང་། ཁོ་མོ་གཉིད་བསད་པ་ལྟར། ཧོབ་ཏེ་ཡར་ལངས་ནས། དོན་གྲུབ་་་་དགོངས་པ་མ་ཚོམ་་་ངེད་གཉིས་ཀྱིས་ད་ལྟ་འདི་ལྟར་བྱེད་ན་མི་རིགས། ངས་སྔོན་ས་ནས་རང་ཉིད་ཀྱི་ཆེས་ཐོག་མའི་སྨན་ཤ་འདི་རང་ཉིད་ཀྱི་ཁྱོ་ག་ལ་མཏོགས་བསྟེར་རྒྱུ་མིན་པར་དམ་བཅའ་བཞགས་ཟིན། གལ་སྲིད་ངེད་གཉིས་ལ་ལས་འབྲེལ་ཡོད་ན། ངའི་ཡོད་ཚད་ཁྱེད་ལ་དབང་དབང་རེད་ཅེས་ལབ་ནས་མགོ་བོ་སྒུར་ནས་བསྡད། ངས་བུ་མོ་འདི་ནི་དངོས་གནས་རིགས་བཟང་ཞིག་རེད་བསམ་ལ། ཁོ་མོའི་དམ་བཅའ་དང་རེ་འདུན་ལ་བརྩི་འཇོག་ལོས་བྱེད་སྙམ་ནས་་་་་་གལ་ཡོད་མ་རེད་་་་་་ང་ལ་བྲེལ་ལ་མེད་་་་་་གང་ལྟར་ངས་ཁྱེད་མནའ་མ་ལེན་ཐག་ཆོད་ཡིན་་་་་་་དེ་དུས་ཁྱེད་ཀྱི་ང་མི་དགོས་ལབ་ན་མི་འགྲིག་་་་་་་ཅེས་དེ་ལྟར་ཀུ་རེའི་ཚུལ་ཏུ་བཤད་པར་ཁོ་མོས་་་་་་སྐབས་དེ་དུས་ལྟ་རྒྱུ་རེད་ཅེས་ལབ་ནས་སླར་ཡང་ངའི་བྲང་ཁོག་ཏུ་མགོ་བོ་གཉེན། དགོང་མོ་དེ་དེ་ལྟར་འདས་མོད། འོན་ཀྱང་དགོང་མོ་དེ་ནི་ངའི་མི་ཚེའི་ནང་ཆེས་སྐྱིད་ཤོས་དང་རིན་ཐང་ལྡན་ཤོས་ཤིག་ཏུ་སེམས།
ཕྱིར་ཉིན་ཞོགས་པ་སྔ་མོ་ནས་ངེད་གཉིས་ལམ་ལ་མཆིས་པ་འགོ་བཙུགས་ལ། དུས་ཡུན་ཅང་མ་འགོར་པར་སེར་རྭར་སླེབས དེ་ནས་ངེད་གཉིས་ཕན་ཚུན་ཁ་གྱས་ཏེ་སོ་སོའི་སྤུན་མཆེད་སར་སོང་མོད། འོན་ཀྱང་ངེད་གཉིས་ཀྱིས་ཉིན་ལྟར་ཁ་པར་ནང་སྐད་ཆ་བཤད་ཀྱིས་ཡོད་ལ་མཚམས་མཚམས་དུས་བཅད་ཀྱིས་མཉམ་དུ་སྐོར་རྭར་འགྲོ་པ་དང་བོད་པའི་རུ་ཕྱོགས་དང་པོའི་ཁྲོམ་རྭར་སྐོར་པ་དང་ཟ་ཁང་དུ་འགོ་པ་སོགས་བྱས་ཀྱིས་ཡོད། དུས་ཚོད་ནི་ཆུ་བོ་བཞིན་མགྱོགས་ལ། མིག་བརྡབ་ཙམ་གྱི་བར་གོང་སེང་གི་དུས་ཡུན་དེའང་རྫོགས་ལ་ཉེ་འདུག
བསིལ་རླུང་དལ་གྱིས་གཡོས་ཞིང་སྐར་མ་རབ་རིབ་ཙམ་མངོན་པའི་དགོང་མོ་ཞིག ང་རང་ཉལ་ཁྲིའི་སྟེང་དུ་ཁོ་མོ་དང་ང་། ད་དུང་ངེད་གཉིས་མ་འོངས་ཀྱི་འདུན་ལམ་དང་ཕུགས་བསམ་སོགས་ལ་སྟོང་བསམ་འདྲ་བཅངས་ནས་བསྡད་པའི་སྐབས། ཁོ་མོའི་ཁ་པར་ཞིག་འབྱོར་བྱུང་། ངས་ཁོ་མོར་ནམ་ཀུན་ལྟར་ཀུ་རེའི་ཚུལ་ཏུ་་་་་ད་ཡང་ང་དྲན་སོང་ངམ་་་་་ཞེས་བཤད་པར། ཁོ་མོས་ཡུན་ཙམ་རིང་ཅི་ཡང་མི་སྨྲ་པར་འཇམ་ཅག་གེར་བསྡད། ངས་ཁ་པར་གྱི་སྒྲ་བསྲིང་ནས་ཁོ་མོའི་ངུ་སྒྲ་གསལ་ལ་མ་གསལ་ཞིག་ཐོས་ཐུབ་བས། ཁོ་མོ་ལ་་་་ཅི་ཞིག་བྱུང་སོང་་་་་ཤོད་དྭ་་་་་འདི་ལྟར་མ་གནང་་་་ཞེས་དུ་མ་བཤད་པར་་་་་ཡུན་ཙམ་རྗེས་སུ་་་་ད་གཟོད་ཁོ་མོའི་སྐྱོ་སྡུག་གི་ངུ་ངག་དང་བཅས་ང་ལ་་་་་་དོན་གྲུབ་་་་་ངས་ཅི་ཞིག་བྱེད་ན་བཟང་་་་་་ངའི་ཨ་ཁུས་ང་མི་ལ་མནའ་མ་གཏང་གྲབས་འདུག། དེ་རིང་ཁོང་གིས་ང་ལ་མི་རིང་པར་ང་ནི་ཨ་རིར་ཡོད་པའི་ཕོ་གསར་ང་ལས་ལོ་བདུན་ཆེ་བ་ཞིག་ལ་མནའ་མ་འགྲོ་དགོས་ཞེས་བཤད་སོང་། ངས་ཁོ་མོ་ལ་འོ་ན་ཁོང་གི་ཁྱེད་རང་སློབ་གྲྭར་འགྲོ་བཞིན་ཡོད་པར་མི་ཤེས་བསམ་ཞེས་ཁོང་ཁྲོ་དང་བཅས་པ་དེ་ལྟར་དྲིས་པར། ཁོ་མོས་མདར་ལྡིག་གིས་དབུགས་རིང་ཞིག་འཐེན་ནས་ང་དེ་རིང་ནས་སློབ་གྲྭ་འགྲོ་མི་དགོས་ཟེར་ཞེས་འདི་ལྟར་བཤད་རྗེས་ངུ་ཤུགས་ཀྱང་ཇེ་ཆེར་སོང་། སྐབས་དེར་ངས་རང་ཉིད་ཀྱི་རྣ་བར་ཡིད་ཆེས་མི་ཕོད་ལ། སྐད་ཆ་དེ་དག་ཀྱང་རྨི་ལམ་ཡིན་ན་ཅི་མ་རུང་བསམ། ངས་ཁོ་མོའི་ལང་ཚོའི་མཛེས་ཉམས་དང་ཕུགས་བསམ་གྱིས་ཕྱུག་པའི་མི་ཚེ་འདི་ཉིད་འདི་ལྟར་འཆུ་ཟོས་སུ་འགྲོ་ཉེ་མཐོང་ནས། ཁོ་མོའི་ཨ་ཁུ་ལ་འགོག་མི་ཐུབ་པའི་ཁོང་ཁྲོ་ལངས་ལ་ཁ་སྡིག་ཀྱང་གྲངས་མི་སླངས་པ་བྱས། སྙིགས་མའི་གདུད་འདྲེ་ཞུགས་བའི་དུས་རབས་འདིར། དགེ་བཤེས་དང་གྲྭ་བ་མང་པོས་དགོས་པའི་རྣམ་དཀར་གྱིས་ལས་ལ་མ་བཞུགས་པར་མ་དགོས་པར་མནའ་མ་དང་མག་པ་སོགས་གཏོང་མཁན་དུ་འགྱུར་ཅི་ཡིན་ནམ་དྲན། ངས་ཡུན་ཙམ་རིང་ཁོ་མོར་ཅི་ཞིག་བཤད་དགོས་མེད་ཀྱང་མི་ཤེས། ཁོ་མོ་ནི་རང་ཉིད་ཀྱི་ཨ་ཁུ་ལ་བརྕེ་བ་ཆེ་ཞིང་གུས་བཀུར་ལྡན་པ་ཡིན་ལ། ཨ་ཁུ་དེ་ནི་ཁོ་མོའི་རྒྱ་གར་ཏུ་ཡོད་པའི་སྤུན་མཆེད་གཅིག་རང་དེ་ཡིན་པ་དང་། ཁོ་མོས་སྐྱིད་སྡུག་གི་འཚོ་བར་བརྟེན་ས་ཡིན་པས་ཁོ་མོས་ཁོང་གི་སྐད་ཆ་ལ་རྣམ་མེད་ཀྱི་འཇོག་མི་ཐུབ་པར་ངས་ཤེས་ཀྱིས་ཡོད་མོད། འོན་ཀྱང་ངས་ཁོ་མོ་འདི་ལྟར་ཆུ་དུམ་ནང་གཡུག་ན་ག་ལ་འགྲིག་བསམ་ཏེ། ཁོ་མོ་ལ་ཁྱེད་ཀྱིས་ཅིས་ཀྱང་ཁོང་གི་ཁ་ལ་ཉན་མི་རུང་། རང་ཉིད་ཀྱིས་སློབ་མཐར་སོན་ཏེ་མ་འོངས་བདེ་སྐྱིད་ཀྱི་འཚོ་བ་ལ་བསམ་བློ་གཏོང་དགོས་ཞེས་བཤད་པས། ཁོ་མོའི་མདར་དིག་གི་ང་ལ་་་་་དོན་གྲུབ་་་ཁྱེད་ཀྱིས་ཤེས་ཀྱི་མ་རེད་་་་་ངའི་ཨ་ཁུ་ནི་ལྟ་བ་མཁྲེགས་བཟུང་ཅན་ཞིག་རེད་་་་་་གལ་སྲིད་ཁོང་གི་ཁ་ལ་མ་ཉན་ཚེ་ང་ལ་མི་ཚེ་གང་བོ་ཁ་ཡག་མི་བྱེད་ཟེར། གལ་སྲིད་ངས་ཁོང་གི་ཁ་ལ་མ་ཉན་ཚེ་ངའི་རྒྱང་རིང་དུ་གནས་པའི་ཕ་མ་དང་སྤུན་མཆེད་ཚོས་ཀྱང་ང་ལ་ཁ་ཡག་བྱེད་མདོག་མ་རེད་་་་ད་ང་ལ་ཐབས་ཤེས་ཤིག་ག་ལ་ཡོད་་་་ད་ཕལ་ཆེ་ངེད་གཉིས་་་་་ད་ངེད་གཉིས་་་་་་ད་ངེད་གཉིས་་་་་་ཚར་སོང་་་་་་ཞེས་ངུ་སྒྲ་ཇེ་ཆེ་རུ་སོང་། གློ་བུར་དུ་ངས་སེམས་གསོ་ཅི་ལྟར་བྱེད་དགོས་པའང་མ་ཤེས་པར་ལུས། དྲང་མོར་བཤད་ན་སྙིང་ལ་གཟེན་པའི་སྐད་ཆ་དེ་ཐོས་མ་ཐག་ངའི་རྐང་ཐུལ་ནས་སྤྱི་གཙིག་བར་དུ་གློག་རྒྱུ་ལྟ་བུའི་ཚ་དྲོད་ཞིག་འཁོར་བྱུང་ལ། གློ་བུར་གློ་བུར་མིག་གི་དབང་བོའང་རབ་རབ་ཏུ་གྱུར་སོང་། ངས་ཞིབ་དུ་བསམ་བློ་ཞིག་བཏང་བས་ཁོ་མོའི་ཨ་ཁུའི་དྲན་ཕྱོགས་དེ་ལའང་འགལ་བ་ཆེན་པོ་མེད་དེ། ཁོ་མོའི་སྤུན་མཆེད་ཞིག་ཡིན་ཕྱིན་རང་གི་སྙིང་ཉེ་བའི་ཚ་མོ་དུག་སྦྲུལ་གྱི་ཚང་ནང་འཕེན་མི་སྲིད་ལ། ཁོ་མོ་སྐྱེས་པ་འབྱོར་ལྡན་ཞིག་དང་སྡེབས་ན་ཁོ་མོའི་མི་ཚེ་ཧྲུལ་བོར་བདེ་སྐྱིད་ལྡན་རྒྱུ་རེད་བསམ་ནས་རྒྱབ་སྐྱོར་གྱི་སྐད་ཆ་རེ་གཉིས་བཤད་པ་དང་། ཁོ་མོ་སྡུག་ཐོག་རླུང་ལངས་ནས་ཁྱེད་ཚོ་སྐྱེ་པ་བུ་ཚོ་འདི་འདྲ་རེད་་་་ཅེས་བཤད་ནས་ཁ་པར་འཇོག ངས་ཕར་ཁ་པར་ག་ཚོད་བཏང་ནའང་ལེན་གྱི་མི་འདུག ངས་རང་ཅི་བྱ་བརྟུལ་མེད་ཀྱིས་རང་ཉིད་ཀྱི་སྐད་ཆ་ལ་འགྱོད་གདུང་དང་ཁོ་མོའི་ཨ་ཁུ་ལ་རླུང་ལངས་ནས་དེ་ལྟར་ཕྱི་ཉིན་སྐྱ་རེངས་མ་ཤར་པར་བསམ་བློ་འདྲ་མིན་གྱི་གླིང་ན་ལུས། དགོང་མོ་དེར་ངས་བསམ་བློ་བཞི་གསུམ་བཅུ་གཉིས་བཏང་མཐར། རང་ཉིད་སྐྱེ་ཕོ་རབ་ཞིག་ཡིན་ཕྱིན་སོ་སོས་དགའ་སའི་བུ་མོ་མི་གཞན་ལ་སྤྲད་པར་ནི་ངོ་ཚ་ཡིན་པ་དང་སོ་སོས་བུ་མོ་ལ་དགའ་ན་དེར་འགན་ཀྱང་ཁུར་དགོས་སྙམ་ནས། ཕྱིར་ཉིན་ཁོ་མོའི་ཨ་ཁུ་ལ་གནས་ལུགས་ཤིག་བཤད་དུ་འགོ་པར་ཐག་བཅད། དེ་ནས་ངས་ཞོགས་ཇ་ཡང་མ་འཐུང་པར་ཁོ་མོའི་ཨ་ཁུའི་གྲྭ་ཤག་ཏུ་སོང་པ་དང་། ངས་ལག་པས་དལ་གྱིས་སྒོ་ཡར་བུད་པ་དང་། ཤ་ཤད་རྒྱག་ཅི་གཟུགས་སྟོབས་ཆེ་བའི་དགེ་བཤེས་ཞིག་ཉལ་ཁྲིའི་སྟེང་དུ་ཞལ་འདོན་སྐྱོར་ནས་བསྡད་ཡོད་པར་མཐོང་། ཁོ་བོ་ཕར་ལྟས་ཚོད་ལ་དགུང་ལོ་བཞི་བཅུའི་ནང་ཡིན་པ་རེད་འདུག ཁོང་གིས་ང་མཐོང་པ་དང་་་་ཁྱེད་ཀྱིས་སུ་བཙལ་གྱིས་ཡོད་ཅེས་དྲིས་པར། ངས་གུས་གུས་ཀྱིས་ཁྱེད་རང་སྒྲོལ་མའི་ཨ་ཁུ་རེད་དམ་ཞེས་དྲིས་པར། ཁོང་གིས་ངའི་མགོ་ནས་རྐང་རྩེའི་བར་ཞིབ་ལྟ་ཞིག་བྱས་རྗས་ཅུང་ང་རྒྱལ་གྱིས་་་་་ཡིན་་་་ག་རེ་རེད་ཅེས་དྲིས་་་་་ངས་ཁོང་གི་གནག་ཅིང་ཁྲོ་ཉམས་ལྡན་པའི་གདོང་རས་ལ་བལྟས་ནས་ཅི་ཞིག་བཤད་དགོས་པ་དང་གང་ནས་འགོ་འཛུགས་དགོས་པ་སོགས་ཀྱང་མི་ཤེས། དེ་ནས་ངས་རང་ཉིད་ལ་རང་ཉིད་ཀྱིས་སེམས་གསོ་འདྲ་བཏང་ནས་བློ་སྟོབས་ཆེས་ཆེར་གྱིས་ཁོང་ལ་རང་ཉིད་སྒྲོལ་མ་ལ་དགའ་ཚུལ་དང་ཁོ་མོའི་སློབ་མཐར་མ་བྱིན་པར་གཞན་གྱི་མནའ་མར་འགྲོ་ན་མི་འགྲིག་ཚུལ་སོགས་གནས་ལུགས་དང་རྒྱུ་མཚན་གང་ལྡན་གྱིས་བཤད་ནའང་། ཁོང་གི་གདོང་རས་ཀྱི་ངོགས་སུ་མངོན་བའི་ཁྲོ་མདོག་གི་རྣམ་འགྱུར་དེ་ཉིད་འཇིགས་སྣང་ཇེ་ཆེར་བྱིན་ནས། སྤང་ཕྲུག་ཁྱོད་ཅི་ཡིན་དྲན་གྱིས་འདུག་་་་་ངས་ཁྱོད་ཀྱིས་ངའི་ཚ་མོ་དང་དགའ་བོ་སྒྲིལ་པར་བརྩིས་མ་བརྒྱབ་པར་འོ་ཛི་རེད་་་་་་་་ཁྱོད་རང་ད་དུང་ཧམ་པ་ཡོད་་་་་་ལྟོས་དང་་་་་ཁྱོད་རང་ལ་ཅི་ཡོད་་་་ཁྱོད་ཀྱིས་མི་གཞན་ནང་བཞིན་ཁོ་མོའི་མི་ཚེ་གང་བོར་བདེ་སྐྱིད་བསྐྲུན་ཐུབ་བམ། ཁྱོད་ཀྱིས་མོ་རང་རྗེས་སུ་ཨ་རི་ལ་གཏང་ཐུབ་བམ། ཁྱོད་ཀྱིས་མི་གཞན་ནང་བཞིན་སྒྲོལ་མ་ལ་གསེར་དངུལ་སོགས་རྒྱན་ཆ་སོགས་བསྟེར་ཐུབ་བམ། ཁྱོད་ཀྱི་སྒྲོལ་མའི་ཉིན་ལྟར་གྱི་འཚོ་བའི་ཆེད་སྒོར་མོ་སྐུར་ཐུབ་བམ། ཁྱོད་ཀྱིས་སྒྲོལ་མའི་ནང་དང་སྤུན་མཆེད་ཚོ་ལ་ལྟ་རྟོགས་བྱེད་ཐུབ་བམ་་་་་་་་་་་་་སྐྱག་ཕྲུག་ཁྱོད་ཀྱིས་དེ་རིང་ནས་བཟུང་ངའི་ཚ་མོ་དང་འགྲོགས་འབྲེལ་བྱེད་ན་ངའི་ཁྱོད་ཀྱི་རྐང་པ་དེ་བཅག་བཞག་དགོས་ཞེས་བཤད་ནས་ང་ཁྱི་འཁྱམ་བཞིན་སྒོ་ཕྱིར་འབུད།
དུས་དེ་ནས་ད་བར་ངས་ཁོ་མོས་གཅིག་ཀྱང་མ་མཐོང་ལ་ཁོ་མོའི་ཁ་པར་ནི་དེ་བས་ཀྱང་མ་ཐོས། ངས་ཁོ་མོ་དྲན་པའི་རྨི་ལམ་རེ་རེའི་ནང་། ཁོ་མོའི་མིག་མཐར་མཆི་མ་འཁྱིལ་ཏེ་སྐྱོ་སྡུག་གི་མནར་བའི་ངུ་ངག་འབོད་པ་དང་། ཁོ་མོའི་ཨ་ཁུས་ལག་ཏུ་ཕྲེང་མ་བཟུང་ནས་ཁོ་མོའི་རྒྱན་ཆ་དང་གྱོན་གོས་ལ་བལྟས་ནས་བློ་ཡིད་རྦད་དེ་ཚིམ་པ་དང་། འཛུམ་མུལ་མུལ་གྱིས་སྒྲོལ་མ་རྒན་ཁོག་ཅིག་ལ་མནའ་མར་སྟེར་པ་རྨིས་ཡོང་།
སྒྲུང་འདི་ཆ་ཚང་བཀླགས་པ་ཡིན་དངོས་གནས་ཧ་ལས་པའི་ཡོག་པོ་འདུག། རྩོམ་མཁན་དང་སྒྱུར་མཁན་གཉིས་ཀར་ཐུགས་རྗེ་ཆེ་ཞུ་ཡི་ཡིན། ཐུགས་རྗེ་ཆེ།
དངོས་གནས་སྒྲུང་ཡག་པོ་བྲི་འདུག་
ངོ་མ་སྙན་མོ་བྲིས་འདུག སློབ་ཆེན་སློབ་མ་ཞིག་གི་མྱོང་ཚོར་དངོས་ཡིན་པ་འདྲ
ཨ་རོགས་ཚོ་ བླ་རྒན་དེ་ཚོའི་མ་རུང་བའི་བྱ་བ་དྲེད་པོ་དེ་ནམ་ཞིག་ལ་མཚམས་འཇོག་གི་ཡིན་ན།
མགོ་སེར་དང་གྲྭ་དེ་ཚོ
མཁན་པོ་མི་མཁས་མཁན་པོ་མཁས།།མཁན་པོ་འཁོར་བའི་འདུག་ཆུས་མཁས།།ཞེས་པ་དེ་དེ་འདྲ་ཞིག་ལ་ཟེར་ནི་ཡིན་གྱི་རེད།