དབྱངས་ཅན་འབངས།
ཁ་ཁོག་མེད་པའི་གཏམ་དེ།།
ཁ་ནས་ཐོན་གྱི་མེད་ན།།
ཁ་བརྡ་དྲ་བར་འཛུལ་ནས།།
ཁ་བརྡ་ཚིག་གསུམ་བྱོས་དང་།།
ཁ་པར་ཡག་ཚད་མི་འདུག །
ཁ་པར་ཀུ་ཤུ་རྟགས་ཅན།།
ཁ་པར་སྐྱོ་ཚད་ཅིག་ལ།།
ཁ་པར་ཟླ་བ་གསུམ་འཁྱོལ།།
ཁ་པར་གསར་པ་ཡིན་དུས།།
ཁ་ལག་དགོས་ཡས་མི་འདུག །
ཁ་པར་རྙིང་པ་ཆགས་དུས།།
ཁ་པར་གྲོད་ཁོག་སྟོང་པ།།
ཁ་པར་ཡོད་ནས་གང་ཡོང་།།
ཁ་པར་ལས་ཀ་བསྐུལ་ས།།
ཁ་པར་མེད་ན་གང་བྱེད།།
ཁ་ཡ་བྱེད་མཁན་དཀོན་པ།།
ཁ་ནས་གང་བྱུང་མང་བྱུང།།
ཁ་པར་ནང་ལ་བཤད་པས།།
ཁ་བརྡ་དངོས་སུ་བྱེད་དུས།།
ཁ་ནི་མུར་ཙམ་མུར་ཙམ།།
ཁ་པར་མེད་དུས་ལྷོད་པ།།
ཁ་ལག་བྲོ་བ་ཆེ་བྱུང་།།
ཁ་པར་ཡོད་ནས་བཟུང་སྟེ།།
ཁ་ལག་ཟ་ལོང་མི་འདུག །
ཁ་པར་སྐུད་ཅན་དར་དུས།།
ཁ་པར་ཡོད་ཟེར་ཀྲོག་ཡོད།།
ཁ་པར་སྐུད་མེད་དར་དུས།།
ཁ་ལས་ཁ་པར་མང་སོང་།།
ཁ་ལ་ཟ་མ་མ་འབྱོར།།
ཁ་པར་ལག་ལ་བཟུང་འདུག །
ཁ་དྲི་ཆིང་ཆིང་བྱས་ནས།།
ཁ་པར་གཏོང་མགོ་ཚུགས་སོང་།།
ཁ་ནས་དྲུག་གསུམ་བཅོ་བརྒྱད།།
ཁ་པར་ནང་ནས་བཤད་པས།།
ཁ་སང་འཆམ་པའི་མི་དག །
ཁ་ལ་གྲག་རེས་མི་འདུག །
ཁ་བཤད་ཚིག་གི་ལྦུ་བ།།
ཁ་ནས་བཤད་ཀྱིན་བཤད་ཀྱིན།།
ཁ་དང་ལག་པ་མི་མཚུངས།།
ཁ་བེད་མགོ་བེད་ཁོ་ན།།
ཁ་བརྡ་དྲ་བའི་ངོས་སུ།།
ཁ་བརྡ་ཚིག་གསུམ་བྱས་ན།།
ཁ་ཤས་ཐུགས་ལ་བབས་ཀྱང་།།
ཁ་ཤས་སྤྲང་ཁྱི་ཟུག་ཟུག །
ཁ་ཅིག་རྒྱབ་ལ་ཡིན་དུས།།
ཁ་གོག་ལྦུ་བ་ཆིལ་ཆིལ།།
ཁ་དང་ཞལ་གཉིས་ཐུག་དུས།།
ཁ་ཁུ་སིམ་པའི་ཞི་མི།།
ཁ་པར་དགེ་མཚན་བཤད་དུས།།
ཁ་པར་མ་ཡིན་ཅི་ཡིན།།
ཁ་བའི་བུ་བརྒྱུད་དག་ལ།།
ཁ་པར་ཙམ་གྱིས་ཆོག་གམ།།
ཁ་པར་རྐྱང་རྐྱང་འཇུས་ནས།།
ཁ་ལ་ཐེམ་པ་མི་འདུག །
ཁ་བའི་ལས་དབང་བསམ་ན།།
ཁ་པར་རན་ཙམ་གནང་དང་།།
ཁ་ནི་ཁ་རོག་པ་ལ།།
ཁ་མཆུ་འོང་དོན་མེད་པས།།
ཁ་འདི་བཙུམས་ནས་བསྡད་ན།།
ཁ་རྩོད་ཤོར་དོགས་མེད་ཀྱང་།།
ཁ་རོག་བསྡད་པས་ཅི་ཕན།།
ཁ་ནས་བསམ་འཆར་ཚིག་གསུམ།།
ཁ་ཙམ་མིན་པར་བཤད་ནས།།
ཁ་བའི་ལ་རྒྱ་བཅིངས་ཡོད།།