འབའ་སྲས།
ཁ་བའི་འདབ་མ་རེ་རེ་བརྩེགས་པའི་གངས་ཀྱི་རི་བོ་མཆོད་རྟེན་འདྲ།།
དམར་པོ་བྲག་གི་ཐེམ་པའི་བང་རིམ་ལྷ་ཡི་དྲུང་གི་མཆོད་ཁྲི་བཞིན།།
མཛེས་སྡུག་མེ་ཏོག་ལྷམ་མེར་བཀྲ་བ་མཆོད་མེ་འབུམ་ཕྲག་སྒྲོན་པར་མཚུངས།།
ལྷ་ཡི་ཞིང་ཁམས་ས་ལ་ཆགས་འདྲ་ང་ཡི་ཕ་ཡུལ་ཁ་བ་ཅན།།
རྟ་ནོར་ལུག་གསུམ་ཐང་ལ་བཀྲམ་པ་ནམ་མཁའི་སྐར་མ་འཚེར་བ་འདྲ།།
ལོ་ཡག་སྙེ་མ་རླུང་གིས་གཡོ་བ་རྒྱ་མཚོའི་རྦ་རླབས་འཕྱོ་བ་བཞིན།།
ནགས་ཚལ་སྟུག་པོ་སྐྱེས་རྒྱ་རིང་བ་མཐོ་རིས་བགྲོད་པའི་སྐེས་དང་མཚུངས།།
དྭངས་གཙང་ཆུ་མིག་གང་སར་བརྡོལ་བ་ཀླུ་ཡི་བདུད་རྩི་འདྲེན་པ་བཞིན།།
རི་ལ་གནས་པའི་རི་དྭགས་ཐམས་ཅད་དགའ་བས་ཟློས་གར་འཁྲབ་དང་མཚུངས།།
ནགས་སུ་འཕུར་བའི་འདབ་ཆགས་ཚོགས་ཀྱིས་བདེ་སྐྱིད་གླུ་དབྱངས་ལེན་པ་བཞིན།།
མེ་ཏོག་ཚལ་གྱི་སྦྲང་མ་དག་གིས་ཞི་བདེ་དབྱངས་རྟ་འགུག་པ་འདྲ།།
ཆུ་ལ་རྐྱལ་པའི་མིག་ཆུང་ཉ་ཡིས་ཉི་ཟླའི་འོད་ལ་འགྲན་པ་བཞིན།།
རི་ཁོག་ཡོད་ཚད་གཏེར་གྱིས་བཟུང་བས་ལྷ་ཡི་རི་བོ་དམན་སར་བཀོད།།
ས་གཞི་ཐམས་ཅད་གསེར་གྱིས་བཀང་བས་ཀླུ་ཡི་གྲོང་ལ་སྐྱེངས་པ་སྟེར།།
འབྲོག་པའི་སྦྲ་ནག་རི་ནས་ཕུག་པ་བྱ་ཆེན་ས་ལ་བབས་པ་འདྲ།།
རོང་བའི་མཁར་གྲོང་སྨད་བས་བརྩིགས་པ་གྲུ་འཛིན་རི་བོའི་དོ་ཟླ་ཉིད།།
བདེ་ཞིང་སྐྱིད་པའི་ཁ་བའི་ལྗོངས་འདིར་བཙན་པོ་སྟོང་གི་ལོ་རྒྱུས་ཡོད།།
མཚན་སྙན་འབར་བའི་ཁ་བའི་ལྗོངས་ལ་མཁས་དབང་འབུམ་གྱི་སྙན་གྲགས་ལྡིར།།
རྟུལ་ཅིང་ཕོད་པའི་ཁ་བའི་ལྗོངས་སུ་དཔའ་རྒོད་ཁྲི་ཡི་ཚེ་སྲོག་གནས།།
བྱམས་ཤིང་ཞི་བའི་ཁ་བའི་ལྗོངས་འདིར་བླ་མ་ཁྲི་ཡི་བྱམས་བརྩེ་འཁྱིལ།།
ཕྱི་ནང་སྣོད་བཅུད་གཞན་གྱིས་འགྲན་མིན་ང་ཡི་ཕ་ཡུལ་ཁ་བ་ཅན།།
དགེ་དང་ཚོགས་ཀྱིས་ཞི་བར་སྤྱོད་པའི་འཛམ་གླིང་ས་ཡི་གནས་གཅིག་གྲང་།།
དེ་ལྟ་ལགས་མོད་སྡིག་རྩུབ་ཆེ་བའི་ཤར་ཕྱོགས་སྲིན་པོ་མཆེ་བ་ཅན།།
བྱང་ཕྱོགས་ཁ་བའི་ལྗོངས་སུ་བསླེབས་ཏེ་ཁྲག་ཆེན་ཁོལ་མོས་མཚོ་ཆེན་བསྐྱིལ།།
རི་བོ་མཐོན་པོའི་ཁོག་པ་སློག་སྟེ་སྦྲུམ་པའི་གསེར་གྱི་སྙིང་བོ་བྲུད།།
མཛེས་པའི་སྤང་ཐང་ཐལ་བར་གཏོར་ཏེ་འཛིན་མའི་ལུས་ལ་ལྕགས་ཀྱིས་བརྡུངས།།
དྭངས་གཙང་ཆུ་བོའི་བཞུར་ཁུག་བཀག་སྟེ་མི་གཙང་དུག་གི་ཆུ་མཛོད་བསྐྱིལ།།
སྟུག་པོ་ནགས་ཀྱི་རྩ་བ་བཅད་དེ་རྒྱ་གྲོང་ཕུག་པའི་ཀ་བ་བྱས།།
མཐིང་སྨུག་སྦྲ་ཡི་ཆོན་ཐག་བཅད་དེ་རྟ་ནོར་ལུག་གསུམ་བཤས་རར་དེད།།
སྨད་གྲོང་རོང་བའི་ཞིང་ཁ་བསྙམས་ཏེ་དྲག་སྤྱོད་དམག་གི་ལམ་དུ་བྱས།།
དེང་རབས་ཅན་གྱི་འཚོ་བ་སྐྱོངས་ཞེས་རོང་འབྲོག་གྲོང་ཁྱེར་ནང་དུ་བརྫངས།།
གྲོང་ཁྱེར་འཚོ་བ་གོམས་བྱང་མེད་པས་རོང་འབྲོག་འབྱོར་བ་དབུལ་བར་གྱུར།།
ལ་རྒྱ་ཅན་གྱི་སྐྱེས་བུ་ཡོད་ཚད་རེ་རེ་བྱས་ནས་བཙོན་དུ་བཅུག །
རྩོམ་པ་པོ་དང་ཤེས་ཡོན་པ་ཡི་སྨྲ་བརྗོད་རང་དབང་ཁྲིམས་ཀྱིས་བཀག །
གཞས་པ་དག་གི་རིགས་ཞེན་མགྲིན་པ་བཙན་དང་དབང་གི་ཐག་པས་བསྡམས།།
ཁ་བ་ཅན་གྱི་མི་ཡི་ཡུལ་འདི་ད་ནི་དམྱལ་བའི་གྲོང་དུ་བསྒྱུར།།
མཉམ་འབྲེལ་རྒྱལ་ཚོགས་མིག་ཅིག་ཡོད་ན་ཁ་བ་ཅན་ལ་སྤྱན་གྱིས་གཟིགས།།
ཨོ་བྷ་མ་ལ་སྟོབས་ཤིག་ཡོད་ན་ཁ་བ་ཅན་ལ་རོགས་ཤིག་བྱོས།།
སཱ་ཀོ་རྫེ་ལ་དཔུང་ཞིག་ཡོད་ན་དམག་དཔུང་རྒྱ་ནག་མཁར་ལ་དྲོངས།།
ཁ་བ་ཅན་གྱི་བུ་ཕྲུག་ཅིག་གིས་འཛམ་པོ་གླིང་ལ་སྐུ་མཁྱེན་ཞུས།།