བསྟན་འཛིན་འོད་ཟེར།
ཁ་བ་དཀར་པོ།
གངས་ལྗོངས་ཀྱི་ཡུལ་ན།
རང་བྱུང་གི་ཁ་བཏག།།
ཁ་བ་དཀར་བོ།
ཁ་བ་རི་བའི་ལྷག་བསམ་མཚོན་པའི།
ཁ་བ་དཀར་པོ།
ནག་ནོག་གི་དྲི་མ་བྲལ་བའི།
ཁ་བ་དཀར་པོ།
མཁའ་དབྱིངས་ནས་དལ་གྱི་འབབ་པའི།
ཁ་བ་དཀར་པོ།
ས་གཞི་ན་ལྷོད་ཀྱི་ལྟམས་པའི།
ཁ་བ་དཀར་པོ།
མཐོ་སྒང་གི་མུ་ཏིག་ཟེགས་མ།
བསིལ་ལྡན་གྱི་ག་བུར་དངས་མ།
གངས་ལྷ་མེ་ཏོག་གི་འདབ་མ།
བདུད་རྩི་གངས་ཆབ་གྱི་མ་མ།
ཁྱོད་ནི་ངང་གིས་དཀར་ལ།
ལྷོད་ཀྱིས་འབབ།
ཁྱོད་ནི་གད་ཀྱིས་ཆགས་ལ།
འོད་ཀྱིས་འཚེར།
ཁྱོད་ནི་ལྷུན་གྱིས་བརྗིད་ལ།
རྔམ་གྱིས་འགྱིང་།
ཁྱོད་ཀྱི་གཟི་བརྗིད་དང་།
ཁྱོད་ཀྱི་མཛེས་སྡུག།
ཁྱོད་ཀྱི་ལ་རྒྱ་དང་།
ཁྱོད་ཀྱི་དཔའ་ངར།
ད་དུང་ཁྱོད་ཀྱི་ལོ་རྒྱུས་དང་།
ཁྱོད་ཀྱི་བྱུང་བ།
དངས་གཙང་གི་ཁ་བ།
ཞི་བདེ་དང་བག་ཕེབས་ཀྱི་ཁ་བ།
རབ་དཀར་གྱི་ཁ་བ།
ལྷང་འཇག་དང་ཁུ་སིམ་པའི་ཁ་བ།
མཐོ་སྒང་གི་རི་བོ་ལ།
གོས་དཀར་གྱི་ན་བཟའ་བཀླུབས་དུས།
ཇི་འདྲའི་བརྗིད་ཆགས་ལ།
ཕྱོགས་མེད་ཀྱི་རི་འཕྲན་ལ།
དར་དཀར་གྱི་ལ་ཐོད་བཅིང་དུས།
ཇི་འདྲའི་ཡིད་འཕྲོག་པ།
ཐང་ཆེན་གྱི་ཁུག་སོ་ན།
དཀར་འཇམ་གྱི་ཐང་མ་བརྡལ་དུས།
ཇི་འདྲའི་འོད་མཚེར།
ཁ་བ་དཀར་པོ།
རི་མགོ་ན་ནམ་མཁའི་སྤྲིན་དཀར་དང་འདྲེས་པའི།
ཁ་བ་དཀར་པོ།
རི་སྐེད་ན་ཤེལ་གྱི་མཆོད་རྟེན་བཞིན་བརྩེགས་པའི།
ཁ་བ་དཀར་པོ།
རི་འདབས་ན་དངུལ་གྱི་མེ་ལོང་བཞིན་བལྟམ་པའི།
ཁ་བ་དཀར་པོ།
སྲིད་པའི་གངས་རི་དཀར་པོ།
མེས་པོའི་ཕ་ས་དཀར་པོ།
ནམ་མཁའི་མེ་ཏོག་དཀར་པོ།
ལས་དབང་གི་ཁ་བ་དཀར་པོ།
སྤྲིན་དཀར་གྱི་བང་རིམ་ནས་དཀར་ཆེམ་ཆེམ།
འཛམ་གླིང་གི་ཡང་རྩེ་ན་འོད་འཁྱུག་འཁྱུག།
དཀར་ཞིང་གཙང་བའི་ལྷ་ཡི་ཕ་འབབས།
མཛེས་ཤིང་སྡུག་པའི་འདབས་ལྡན་མེ་ཏོག།
འཇམ་ཞིང་བསིལ་བའི་རང་བྱུང་ནོར་བུ།
ཁྱོད་ངའི་ཕ་ས་ན་འཁྱིལ་དུས།
ངས་ཁྱོད་རྒྱང་རིང་ནས་དྲན།
དྲན་པ་ལན་གཅིག་མིན།
དུང་བ་ཐང་གཅིག་མིན།
ཡང་ནས་ཡང་དུ།
ད་དུང་ནས་ད་དུང་།
འདས་པའི་ལོ་ཟླ།
ད་ལྟའི་འཆར་ཡན།
འབྱུང་འགྱུར་གྱི་ཁུག་སོ་རེ་རེར།
དྲན་དབང་གི་སོ་ཁ་རེ་རེར།
ཁྱོད་ཀྱི་འོད་སྣང་དེ་ནུབ་པ་མེད་ལ།
ཁྱོད་ཀྱི་གཟི་བརྗིད་དེ་ཡལ་བའང་མེད།
ཁྱོད་རི་རྩེ་ནས་འཛུམ་གྱིས་དགོད་དུས།
ངས་རྒྱང་རིང་ནས་ཟུར་མིག་འཕངས་ཡོད།།
03/04/15 ལ་བྲིས།