སྐུའི་གཅེན་པོ་སྟག་མཚེར་རིན་པོ་ཆེ་མཆོག་ལ་མྱ་ངན་རྗེས་དྲན་དུ།
ལྷ་ལུང་རྒྱལ།
ཆོས་སྲིད་ཆུ་འཛིན་གཡོ་བའི་རྔམ་བརྗིད་བློ་དང་སྤོབས་པའི་ནམ་མཁའ་ཡི།།
བེཌཱུའི་མེ་ལོང་ཞལ་གྱི་ཁྱིམ་ན་ངོ་མཚར་གཟིགས་མོའི་མཚར་སྡུག་ཅན།།
བཙན་པོའི་ཞབས་རྗེས་རྡུལ་གྱི་བྱིན་རླབས་སྙིང་ཁ་སྒོར་མོའི་བར་སྣང་ནས།།
དོན་ལྔ་སྣོད་ཀྱི་གཤོང་བར་འཁྱིལ་བ་ལ་རྒྱའི་རླུང་གིས་གཡོ་ཞིང་འཁྱོམ།།
བཙན་འཛུལ་བདུད་མོའི་བསམ་སྦྱོར་དུག་གི་སྲོག་ལ་ཉེན་པའི་རླུང་ནག་འཚུབ།།
འཇིགས་རུང་ཉམས་ཀྱི་གར་ལ་རོལ་པ་གངས་ལྗོངས་རབ་དཀར་སྤྲིན་གྱི་ཚོམ།།
ཚལ་བུར་གཏུབས་པའི་དཔུང་གི་ཤེད་ཀྱིས་ཀྱེ་མ་བས་བའི་མཐར་སྤྱུགས་ཀྱང༌།།
རང་བཙན་གདོང་ལྔའི་གད་རྒྱངས་རིང་མོའི་ང་རོ་དབྱར་གྱི་འབྲུག་བཞིན་བསྒྲགས།།
བླ་མ་ཆེན་པོའི་སྤྲུལ་སྐུ་ཡིན་ཞེས་ཡིན་དང་རྫིག་མདོག་མི་སྟོན་ལ།།
སྐུ་འབུམ་དགོན་པའི་མཁན་པོར་བཞུགས་ཀྱང་མ་དྲིས་ཚུར་ལ་མི་གསུངས་ཞིང༌།།
སྟོན་པ་ཆེན་པོའི་གཅེན་པོ་ཡིན་པ་གདོང་ལ་མ་བལྟས་མི་ཤེས་པར།།
རང་ལུས་འདོམ་གང་རང་དབང་གཙང་མར་མི་ཚེ་ཧྲིལ་པོར་བསྔོས་པ་མཚར།།
རྒ་སྡུག་རྡོ་ཡི་ཁུར་པོའི་སྟེང་ལ་གྲིབ་སྐྱོན་རྡུལ་གྱི་ལྕིད་ཕབ་ཏེ།།
ལུས་ངག་བཙོན་གྱི་མུན་པར་ཚུད་ཀྱང་ལྡིབ་ལྐུགས་ངག་གིས་རང་བཙན་ཞེས།།
འདུན་མ་ཤིང་རྟའི་འཁོར་ལོ་ལ་བརྟེན་ལན་གསུམ་བསྒྲགས་འདི་མཐོང་ཐོས་མོད།།
སྙིང་གི་བུ་མོ་སྐྱོ་གདུང་མེ་ཡིས་ལུས་ཀྱི་ཟུངས་ཁྲག་འཁོལ་ཞིང་གདུ།།
ལྷག་པར་གྲུ་འཛིན་རི་ཡི་རྔམ་བརྗིད་ཐུགས་ལ་ཤར་བཞིན་ཤར་བཞིན་དུ།།
ཁྲི་ཤོར་རྒྱལ་མོའི་རེ་བའི་འབོད་པ་ངག་ལ་བཟློ་བཞིན་བཟློ་བཞིན་དུ།།
ཕ་ཡུལ་གངས་ལྗོངས་དྲན་པའི་མཆི་མས་མཁུར་ཚོས་བརླན་བཞིན་བརླན་བཞིན་དུ།།
རྒྱང་རིང་ཕྱི་མའི་ལམ་ལ་བུད་འདི་ཁོ་བོ་ཅག་ལ་སྙིང་གི་ནད།།