—–རྔ་བ་རྒྱལ་ཁམས་པ།
མཐིང་མདོག་ནམ་མཁའི་ཕོ་བྲང་ན།།
ཚོམ་པུར་ཆགས་པའི་ཆུ་ཤེལ་ཕྲེང་།།
གྲང་རེག་རལ་གྲིའི་འཕྲུལ་འཁོར་གྱིས།།
འཐག་པའི་ཁ་བ་དེ་རིང་བབ།།
ཁ་བའི་འདབ་མ་རེ་རེ་ནི།།
ཚེ་སྲོག་རེ་རེའི་བསྟི་གནས་ཏེ།།
ང་ཚོས་འདབ་མའི་གྲུ་ཆུང་རེ།།
ཞོན་ནས་མཁའ་ལ་ལྡིང་སྐོར་བྱེད།།
ཡབ་ཆེན་གནམ་གྱི་སྲས་པོ་དང་།།
ཡུམ་ཆེན་ས་ཡི་ལྷ་མོ་གཉིས།།
དགའ་བས་འཕྲད་པ་ཁ་བའི་ཟོལ།།
རླུང་ཞགས་ནག་པོས་ཕྱི་ཕྱིར་འཐེན།།
ཁ་བ་དཀར་བོའི་མཛེས་སྡུག་གིས།།
མ་བརྒྱན་སྲིད་པའི་འཇིག་རྟེན་ནི།།
དགུན་གྱི་ལྷ་མོའི་བརྩེ་དུང་གི།
འོ་མ་འཐུང་ལ་དབང་བ་མིན།།
ཁ་བའི་འདབ་རེ་ཡང་མོད་ཀྱི།།
ཁྲི་འབུམ་རྩེག་པ་ཤིན་ཏུ་ལྕི།།
ཤིན་ཏུ་ལྕི་བའི་ཁ་བའི་ཁྲོད།།
མི་དག་ངལ་བས་དབུགས་ཐུང་འཐེན།།
ཐག་ཐག་རྒྱུ་བའི་ཆུ་ཚོད་ལགས།།
ང་ལ་སུན་པོ་མ་བཟོ་ཞིག།
དོ་ནུབ་ང་ཡང་ཁ་བའི་འོག།
རི་ཀླུང་མཉམ་དུ་གཉིད་ན་འདོད།།
ཁ་བར་སྐུར་བ་མ་འདེབས་རོགས།།
ཁ་བ་ཅན་དང་ཁ་བའི་ལྗོངས།།
ང་ཚོའི་གླུ་པ་སྙན་དངགས་ཚོས།།
བསྟོད་གླུ་འཐེན་ས་དེ་ལས་མེད།།
ཁ་བའི་འདབ་མ་རེ་རེ་ཡིས།།
བརྩེགས་པའི་ཁ་བའི་ལྗོངས་འདི་ཉིད།།
འཛམ་གླིང་ཁོར་ཡུག་ཚོགས་པ་ན།།
ངོམ་ངོམ་བྱེད་རྒྱུ་འདི་ལས་མེད།།
ཁ་བར་བསྟོད་དུས་གནམ་ལ་བསྐྱག །
ཁ་བར་སྨད་དུས་དོང་དུ་བརྫངས།།
ཁ་བ་མེད་ན་འཛམ་གླིང་གི།།
ཆུ་ཆེན་བཞི་བོ་གང་ནས་འབྱུང།།
དབྱར་ཟླ་གསུམ་ས་གཞི་མེ་ཏོག་རྒྱན་།
དགུན་ཟླ་གསུམ་ས་གཞི་གངས་ཀྱི་རྒྱན་།
དེ་འབྱུང་བ་བཞི་ཡིའི་འགུལ་ཤུགས་རེད་།
དེ་འཇིག་རྟེན་སྲིད་པའི་བསྐོས་སྐལ་རེད་།
དེ་མི་འདོད་བསམ་ནས་ཟུར་ས་མེད་།
ཁ་བའི་སྐོར་གྱི་སྙན་ངག་ཞིག་བྲིས་འདུག་པ་ལྟས་ནས་སྙན་བྱུང་དགའ་བ་སྐྱིད་པ་ལ་ཧ་ཧ་ཧ