ཁ་བཙུམ་བསྡད་ནའང་།.     མིག་བཙུམ་ཐུབ་ཀྱི་མི་འདུག

སྦྲ་དཔལ་ལྡན། ཧྥ་རན་སུ།

ཉེ་ལམ་རང་རེའི་སྥྱི་ཚོགས་སྤར་མོ་གང་བོ་ལྷིང་འཇགས་ལས་ཧ་ཅང་དཀྲོལ་ཡོད་ལ་སྤྱི་ཚོགས་ལ་ལ་ཞིག་ལ་ཞེན་ཁོག་དང་། རང་ཞེན་དང་ཆོལ་ཞེན་གྱི་སྐད་ཆ་ཧ་ཅང་ཐར་བའི་སྤྱི་ཚོགས་དྲ་རྒྱ་  དཔེར་ན་སྐད་འཕྲིན་དང་ངོ་དེབ་སོགས་སུ་གང་ཟག་ཕལ་མོ་ཆེའི་པར་ལ་འདྲ་མིན་བཟོ་བ་དང་།  དོལ་རྒྱལ་དང་རྒྱ་མིའི་སོ་ཉུལ་བ་ཡིན་པ་སོགས་ཀྱིས་ཁྱབ་སྤེལ་འདྲ་རིས་བཟོ་བ་དང་།   སྤྱི་ཚོགས་དྲ་རྒྱའི་ཐོག་ཏུ་གཏམ་བཤད་སྣ་ཚོགས་ཀྱིས་ཁྱོའི་ཁ་དང་ངའི་སྣ་སོགས་དོན་དག་ཆུང་ངུ་ཞིག་གི་ཆེད་དུ་དོན་མེད་དཀྲོག་གཏམ་དང་།  རྩོམ་པ་པོ་དང་སྤྱི་ཚོགས་དཔྱད་བརྗོད་པ་མང་བོ་ཞིག་གིས་དཔྱད་བརྗོད་དང་རྩོམ་ཡིག་ཅི་རིགས་ཤིག་བྲིས་ཡོད་ནའང་།   གང་ཟག་ཕ་རོལ་བ་ཞིག་གིས་སྣང་བ་མ་འགྲོ་ན་ལམ་སང་རྒྱ་མིའི་སོ་ཉུལ་བ་དང་།   དོལ་རྒྱལ་ལ་འབྲེལ་བ་ཡོད་པ་སོགས་བསྙད་ནས་ནང་ཁུལ་ལ་ཟུག་ངུ་བཟོ་བ་དང་།   བོད་སྤྱི་ལ་ཕན་པ་དང་མང་གཙོ་རང་བཞིན་ལྡན་པའི་ཐོག་ནས་སྐད་ཆ་བཤད་མཁན་ཧ་ལམ་མི་འདུག་ཟེར་ན་མི་ཆོག་པ་མེད་པར་སྣང་།  སྤྱིར་བདག་ལ་མཚོན་ན་ཁ་བརྡ་དང་བང་ཆེན།   དུས་བབས་སོགས་ནི་བདག་གི་བོད་ཡིག་ཡར་རྒྱས་གཏོང་བྱེད་ཀྱི་དྲ་ཚུགས་ཚད་ལྡན་ཞིག་ལ་ངོས་འཛིན་བྱེད་ཀྱི་ཡོད་ཟེར་ན་མི་ཆོག་པ་མེད་མོད།   གནས་སྐབས་རང་ཉིད་ཀྱི་སྐབས་བབ་ཀྱི་སློབ་སྦྱོང་ཞིག་གི་བོད་ཡིག་གི་དྲ་ཚུགས་དེ་དག་ལ་ཧ་ལམ་ཡོང་གི་མེད་ཟེར་ན་མི་ཆོག་པར་མེད།   འོན་ཀྱང་། དེ་རིང་ཁ་སང་བདག་ཡུལ་སྐོར་ཞིིག་གི་དུས་ཚོད་དང་ཁོམ་བར་ལ་ཡར་འགྲོ་མར་འགྲོའི་ལམ་བར་ནས་གོང་གི་དྲ་ཚུགས་དེ་དག་ལ་མིག་ཟུར་ཞིག་བལྟས་པས་ཚོར་སྣང་ཧ་ཅང་ལྕི་བ་མ་ཟད།  རྩོམ་པ་པོ་རེ་ཞིག་གིས་སྤྱི་ཚོགས་རང་བཞིན་ལྡན་པའི་དཔྱད་བརྗོད་རེ་བྲིས་པའི་འོག་གི་མཆན་དེ་དག་ལ་རྒྱུ་མཚན་མེད་པར་རང་སྣང་གང་དྲན་གྱིས་མཆན་འགོད་པ་དང་།  གང་ཟག་སོ་སོར་ཐེར་འདོན་བྱེད་པ་སོགས་བོད་པ་ཞིག་གི་ཡར་རབས་གོམས་གཤིས་ཕལ་ཞོག་   ཐ་ན་ང་རང་ཚོས་དཔེ་བརྗོད་འཇོག་བཞིན་པས་རྒྱ་ནག་ཟེར་ནས་མི་རིགས་དེ་ལ་འཐོང་ཆུང་དང་ཁྱད་གསོད་བྱེད་བཞིན་པས་སྡུག་དུ་འགྲོ་བཞིན་ཡོད།   དོ་ནུབ་ང་ཕེ་རུ་སུ་ནས་བདག་སྡོད་སར་སྤྱི་སྤྱོད་རླངས་འཁོར་ཞིག་ཏུ་འགྲོ་ཞོར་སྙིང་གཏམ་དམར་བོ་ཞིག་བརྡོད་འདོད་བྱུང་མོད།   སྙིང་གཏམ་དེ་ཕ་ཡུལ་གྱིས་ཕྱོགས་ཞེན་དང་ཆོལ་ཞེན་ལ་རང་འགུལ་གྱིས་འཇོག་པ་ལས་སྙིང་གཏམ་དེ་ལ་རིན་ཐང་ཡོད་མེད་དང་།   གནས་ལུགས་ལ་མི་བལྟ་བར་སྙིང་གཏམ་འཆད་པ་པོའི་སྙིང་གཏམ་པ་རིན་ཐང་ཡོད་མེད་ཁྱོད་ནས་བལྟ་ཀི་མེད།   སྙིང་གཏམ་བཤད་མཁན་དེ་ཁམས་ཕྱོགས་ནས་ཡིན་ན་བློ་སེང་གི་རྒྱུགས་ཁྱི་དང་།  སྙིང་གཏམ་བཤད་མཁན་པོ་ཨ་མདོ་ཡིན་ན་སྤེན་ཚེའི་རྒྱུགས་ཁྱི་ཡིན་པ་ལས་བོད་སྤྱི་ཡོངས་ལ་བསམ་བློ་བཏང་ནས་སྐད་ཆ་བཤད་ཀྱི་ཡོད་པར་རྩ་ནས་གཏོང་ཐུབ་ཀི་མེད།    དེའི་ཕྱིར།   ང་ད་སྐབས་ཡོད་ས་དེ་ལ་བོད་པའི་སྤྱི་ཚོགས་ཀྱི་དྲི་མ་ཙམ་ཡང་མེད་པས་ད་དུང་བོད་པ་གཙང་མ་ཡིན་པ་ལས་ཆོལ་གསུམ་དང་ཆོས་ལུགས་ལ་འབྲེལ་བ་མེད།   ང་ལ་ཨ་མདོ་མི་དགོས་ལ་ཁམས་པའང་མི་དགོས།    ཁྱེད་ཅག་ལ་དགོས་པ་ཁམས་པ་དང་ཨ་མདོ་ཡིན་ན་རྩོད་རོགས་མུ་མཐུད་དུ་རྩོད།    བློ་སེང་གཙང་མ་ཡོད་པ་དང་སྤེན་ཚེ་གཙང་མ་མེད་ན་ཁྱོད་རང་གི་སུ་གང་ཞིག་གིས་གཙང་མ་བཟོ་ཐུབ་ཀྱི་མ་རེད།   རྒྱུ་མཚན།  ཁྱེད་ཅག་ལ་དྲང་བདེན་དང་བོད་པའི་གོམས་གཤིས་ཀྱི་ཡ་རབས་བཟང་སྤྱོད་རྩ་བ་ནས་མི་འདུག་ལ་ཁྱེད་ཅག་གི་ཁ་ནས་ཅི་བཤད་རུང་།   བོད་པ་ཁྲག་བཞིན་དཀྲུག་པའི་ནུས་པ་ལས་གཞན་ཞིག་གི་གདོང་པ་ལ་མིག་ཟུར་ཙམ་ཡང་བལྟ་ཐུབ་ཀྱི་མི་འདུག      བློ་སེང་དང་སྤེན་ཚེ་གཉིས་ཀྱི་ཁ་ནས་༧གོང་ས་མཆོག་ཟེར་ནས་མ་ནི་བཞིན་བགྲང་རུང་དོན་དངོས་སུ་༧གོང་ས་མཆོག་གི་བཀའ་ལ་ཉན་མ་སོང་མོད།   ད་དུང་།  ༧གོང་ས་མཆོག་ཟེར་ནས་ག་ཚད་བར་ཏུ་འདུག་གི་ཡིན་ནམ།   ད་དུང་༧གོང་ས་མཆོག་ཟེར་ནས་ག་ཚད་བར་ཏུ་དཀྲུག་གི་ཡིན་ནམ།   ངས་ཁ་བཙུན་ནས་བསྡད་རུང་།   མིག་བཙུམ་ཐུབ་ཀྱི་མི་འདུག  རྒྱུ་མཚན་ཁྱེད་གཉིས་ཀྱིས་ཁྲག་བཞིན་དཀྲུག་པའི་ངའི་སྤྱི་ཚོགས་ནང་དུ་ཁྱོད་གཉིས་ཀྱི་རྙོག་སློང་ནས་རིག་རྒྱུ་ལས་གཞན་རིག་རྒྱུ་འདུག     དེའི་ཕྱིར།   ད་བར་ངས་ཁ་བཙུན་ནས་ཡོད།  ཡིན་ནའང་།  ནམ་ཞིག་ང་དང་འདྲ་བའི་མི་དེ་དག་གིས་ཀྱང་ཁ་བཙུམ་བསྡད་རུང་།  མིག་བཙུམ་མི་ཐུབ་པས་སླར་ཡང་ཁ་ཡང་མང་རུ་འགྲོ་ངེས།